Blog

رات کے سوا گیارہ بجے، پہاڑی کی ڈھلان سے نیچے اترتے میری نظریں نہ تو دور شہر کی جھلملاتی روشنیوں پر ہیں اور نہ ہی آسمان پر چمکتے حسین ستاروں پر. راستے کے ساتھ موجود گھروں کے پائیں پاغوں میں لگے پھولوں کی بھینی بھینی خوشبو روح کو سرشار کر دیتی ہے. مگر میں مسکراتے لبوں کے ساتھ گاڑیوں کی اس لمبی قطار کو دیکھ رہی ہوں جو ڈھلان کے اختتام پر مسجد کے صدر دروازے میں داخل ہورہی ہے. اردگرد شاندار مکانات اور سینئرز کے اپارٹمنٹس سمیت سارا شہر گھنٹوں پہلے تاریکی کی چادر اوڑھے سو چکا ہے. ہر طرف خاموشی ہے . صبح سب کو غم دوراں کے درماں کے لئےجو نکلنا ہے اسی لئے رات اوڑھ کر جلدی سو گئے ہیں.
مگر یہ کچھ عجیب لوگ ہیں جو ہر رات جب کہ باقی سب اپنی نیند کا ایک حصہ بھی پورا کر لیتے ہیں ، خوب تیار ہو کر، جلدی جلدی ایک عجیب حزبے سے سرشار اپنے گھروں سے نکلتے ہیں. حضرات تیز تیز قدموں سے چلے جارہے ہیں، خواتین اپنے لبادے سنھبالے رواں دوان ہیں، آگے آگے بچے بھی اچھلتے کودتے چلے جا رہے ہیں. مسجد میں داخل ہو جایے، تو آپ کو گمان ہوتا ہے کہ کسی پر مسرت تقریب کا اہتمام ہے. مسکراہٹیں، تسلیمات ، اداب، خیرخیریت کا تبادلہ ہورہا ہے.. حجاب اور عبایا بھی ہیں، سکرٹس اور پینٹس بھی، عرب بھی ہیں اور عجم بھی، گورے بھی اور کالے بھی. کچھ نوافل پڑھ رہے ہیں، کچھ تلاوت کر رہے ہیں اور کچھ خوش گپیوں میں مصروف ہیں. ادھر موذن اذان دیتا ہے اور ادھر سب کچھ چھوڑ چھاڑ ،جلدی سے سیدھی صفیں بناے ، ہاتھ باندھے اور سر کو جھکاۓ کھڑے ہو جاتے ہیں. کیسا دلربا نظارہ ہے. اعتکاف کے لئے بھائیوں کے حجرے لگے ہیں. اور رات گئے جب مسجد سے باہر تاریکی اور خاموشی میں نکلیے تو ایسا لگتا ہے کہ کسی اور دنیا میں آگئے ہیں.
رمضان ہمیشہ سے ہی ہم سب کے لئےایک بہت پر رونق موقع رہا ہے. جس سے ہماری بہت پیاری یادیں وابستہ ہیں. سحری میں اٹھنے کا شوق، روزہ رکھنے کے لئے اصرار ، افطاری کے لذیذ لوازمات کے لئے بے تابیاں اور پھر عید کی تیاری.
اپنوں سے اور اپنے وطن سے دور انسان ڈرتا ہے کہ اجنبیوں کے دیس میں یہ ماہ کیسا گزرے گا. مگر الله کے بندوں نے صحراؤں سے لے کر برفستانوں تک، پہاڑوں سے لے کر میدانی علاقوں تک اپنے رب کی محبت میں کیسی بستیاں بسائی ہیں. یہاں بھی وہی چہل پہل ہے، وہی رونق ہے. بچے خوش ہیں کہ یہ کیسی تقریب ، یہ کیسا تہوار آیا ہے کہ سارے مہینے اس کی رونقیں چلتی رہتی ہیں. آج فلاں انٹی کے گھر سے افطاری انی ہے، آج ہم نے سب کے گھر بھیجنی ہے، کل مسجد میں معتکفین کے لئے کھانا بھجوانا ہے، مساجد اور تنظیموں کی جانب سے انفاق فی سبیل الله کی صدائیں سن کر بڑے ہی نہیں، بچے بھی اپنے منی بینک ٹٹولتے ہیں. سب نے اپنے لمبے سفید لبادے اور شلوار قمیصیں، اور نت نےحجاب بہت اہتمام سےنکالے ہیں کہ ہر روز مسجد جانا ہوتا ہے. غیر مسلموں میں دعوت کے کیپمس لگے ہیں، شامی مہاجرین ، نرسنگ ہومز اور خواتین کے دارالامان کے لئے تحائف جمع ہو رہے ہیں. غرضیکہ دیکھیے کس طرح عقیدے اور عمل کی بنیادوں پر ایک بے حد خوبصورت ثقافت تیار ہوتی ہے.
رمضان راہبوں کا روکھا پیکھا، خشک تہوار نہیں کہ سارا دن بھوکا پیاسا رہنے ، بے وقت اٹھنے سونے اور عبادت کی مشقت کا خیال اسے کوئی بوجھل شے بنا دے. یہ تو ایک ایسی روحانی مسرت لے کر اتا ہے جو ملنے والے ہر شخص کے چہرے اور گفتگو سے عیاں ہے.
یہ اور بات کہ اگر کوئی شے “عادت” بن جاۓ تو انسان اس کے انوکھے پن کی مسرت کو کھو بیٹھتا ہے.
رب کریم نے نیکیوں کا ایک ایسا موسم بہار ہمیں عنایت کیا جو ہمارے لئے قرب الہی ، تزکیۂ نفس، صلہ رحمی، خدمت، محبت اور خوشیوں کا پورا پیکج لے کر اتا ہے. بڑے محروم ہیں ہم کہ اگر اس کی روح سے خالی ہو کر اسے ایک بوجھل عادت یا روزمرہ کے طور پر لیں.
کل ہی خواتین کے ایک حلقے کے ساتھ قران کریم مکمل کیا ہے. سب ہی اعلی تعلیم یافتہ خواتین تھیں، جن کے ذہنوں میں الجھنیں بھی تھیں، شکوے بھی، اور دبی چھپی سی محبتیں بھی. مگر ہم نے مل کر قرآن کریم کو سمجھ کر پڑھا. وہ ساری باتیں جو فضول بحثوں کی گرد میں بدنما معلوم ہوتی ہیں، مکمل متن کے ساتھ اور سیاق و سبق کی روشنی میں پڑھیں تودل میں اترتی چلی جاتی ہیں.
اسی لئے انکار خدا کے اس شور میں کچھ لوگوں کو رات کے اس پہر جوق در جوق ساری بقراطیوں اوربحثوں سے لاتعلق ، خدا کے گھر کی طرف رواں دواں دیکھتی ہوں تو لبوں پر ایک مسکراہٹ پھیل جاتی ہے.
کیسا اچھا ہو کہ یہ سارے لوگ محبت، رحمت اور خدمت کے اس حقیقی پیغام کو سمجھ کر شعوری طور پر اسی ذوق و شوق سے اپنی زندگیوں کا مقصد بنا لیں. خدا کے احسان فراموشوں کی ساری دوڑ دھوپ کے بالمقابل عالم جذب میں کیا گیا وہ ایک سجدہ کیسا بھاری ہے، یہ دیکھنا ہو تو دوران نماز صف در صف جھکنے والوں کو دیکھ لیجیے

دنیا جس اسلام کو محمد عربی ﷺ کے پاکیزہ حوالے سے جانتی ہے ،اسے ریاست میں ایک مقتدر اور سپریم مقام حاصل تھا ، ہے اور رہے گا۔ ماننے والوں کے لیے عزت اور امن کی صورت میں اور ناماننے والوں کے لیے خوف اور خطرہ کی صورت میں۔
سیکولرزم(مذہبی آزادی) اسلامی ریاست کا لازمی حصہ ہے لیکن اس کی حیثیت ایک ماتحت، ایک پیادے اور ایک سپاہی کی سی ہے، جس کا کام ہر گھڑی اور ہر لمحے ریاست کے نظریاتی بادشاہ اور مقتدر اعلیٰ اسلام کے آگے جھکنا اور اس کی اطاعت کا دم بھرنا ہے۔اس کے برعکس مذہب کا جو مسخ شدہ تصور مغربی تہذیب کے متاثرین ہم سے منوانا چاہتے ہیں اس کے مطابق سیکولرزم کو ریاست میں سپریم طاقت حاصل ہے اور مذہب اس کا ایک ماتحت اور غلام ہے۔
محمد عربیﷺ کے اسلام کو فرد کی ذاتی زندگی کی طرح اس کی سب سے بڑی اجتماعی زندگی (ریاست) میں بھی مکمل اختیار، طاقت اور کنٹرول حاصل ہے، جبکہ مغرب کے غلاموں کا تصور مذہب صرف فرد کی ذاتی زندگی تک محدود ہے اور ریاست میں اسے مداخلت کا کوئی حق نہیں۔
لڑائی کب شروع ہوتی ہے؟
آپ کو سیکولرزم بہت پسند ہے ناں۔ آپ جاگتے، سوتے، ہنستے روتے، اٹھتے بیٹھتے غرض ہر ہر لمحہ میں سیکولرزم کا خواب دیکھتے رہتے ہیں ناں؟ تو جایئے جا کر مغرب اور مشرق کے غیر مسلم ممالک میں مسلط سیکولرزم کے بت کی پوجا شروع کردیجیے، اس کی حمد ،ثناء اور تسبیح پڑھنا شروع کردیجیے۔ محمدﷺ کے ماننے والوں کی آپ سے کوئی لڑائی نہیں۔آپ کو آپ کا دین مبارک ہمیں ہمارا دین۔
لڑائی اس وقت شروع ہوجاتی ہے جب آپ کاآقا مغرب سیکولرزم کی چھتری تلے ہر مذہب کے پیروکاروں کو احترام دینے کے لیے تیار ہے لیکن کائنات کے واحد سچے دین اسلام کو احترام دینے کے لیے تیار نہیں۔ یہی وجہ ہے کہ اسلام کے رسولﷺ، اسلام کی کتاب (قرآن) اور اسلام کے احکامات کا سیکولر دنیا کا میڈیا برسرعام مذاق اڑاتا ہے اور توہین کرتا ہے ، اور اسلام کے بھی صرف ان پیروکاروں کو اذیت اور جاہلی عصبیت کا شکار بناتا ہے جو اسلام کی تعلیمات پر عمل پیرا ہونے کی کوشش کرتے ہیں اور مغرب کی سیکولرتہذیب کے علمبردار مسلمان کی داڑھی، اس کے پردہ اور اس کے لباس پر پابندیاں لگانا شروع کردیتی ہے۔
جی جناب !لڑائی اس وقت شرو ع ہوتی ہے جب آپ اپنے اس بت کی محبت میں اسلام کو بھی دھکے دینے لگ جاتے ہیں اور مطالبہ کرنے لگ جاتے ہیں کہ جناب جس طرح دنیا کے باقی مذاہب نے سیکولرزم کی بالادستی کو تسلیم کرلیا ہے اور ریاست میں عمل دخل سے دستبردار ہوگئے ہیں اسلام بھی سیکولرزم کی بالادستی کے آگے سربسجود ہوتے ہوئے ریاست کی تعمیر و تشکیل کے خواب دکھانا چھوڑ دے۔ نہیں منے بھائی نہیں یہ دھاندلہ نہیں چلے گا۔ ۔ ۔دنیا میں جب تک قرآن محفوظ ہے، دنیا میں جب تک محمد ﷺ کا نام باقی ہے، دنیا میں جب تک اسلام کے ماننے والے موجود ہیں، مسلم اکثریتی ممالک میں ریاست کی اسلامی تشکیل اور ریاست و حکومت پر اسلام کی بادشاہی قائم کرنے کی کوشش ہوتی رہے گی ۔
چاہے کوئی پسند کرے یا ناپسند یہ سلسلہ اس وقت تک چلتا رہے گا جب تک یا تو اسلام کو بھی فرد کی نجی زندگی کی طرح اس کی ریاستی زندگی پر بھی مکمل کنٹرول اور اقتدار حاصل ہوجائے گا یا پھر دنیا سے مسلمان ختم ہوجائیں گے۔آپ اس کو فکری سطح پر روکنے کی کوشش کریں گے غلامان محمد ﷺسے آپ کی فکری سطح پر لڑائی شروع ہوجائے گی ، آپ اور آپ کے آقا (مغربی طاقتیں) عملی میدان میں اسلام کا راستہ روکنے کی کوشش کریں گے تو زندگی کے عملی میدان میں غلامان محمد ﷺ سے آپ کے آقاؤں کی لڑائی شروع ہوجائے گی ۔ آپ کے آقا (مغربی طاقتیں) کہتے ہیں کہ مسلمان دہشت گرد ہیں۔ جی ! آپ ہی کے بنائے ہوئے اصول کی صورت میں مسلمان ضرور دہشت گرد ہوتے اگر مسلمان مغرب میں جاکر ریاستی اور فوجی مشینری کی طاقت کے ذریعے سیکولرزم کو روکنے کی کوشش کرتے اور وہاں زبردستی اسلامی قانون نافذ کرنے کی کوشش کرتے۔
لیکن یہاں تو معاملہ الٹ ہے۔ دولت مغرب کے پاس، طاقت مغرب کے پاس، ٹیکنالوجی مغرب کے پاس، بے مہابا جنگی سازوسامان و افواج مغرب کے پاس اور مغرب تھر تھر کاپنتا ہے کہ دنیا کے کسی بھی مسلم ملک میں کہیں اسلام کا عدل و انصاف اور امن پر مبنی نظام نافذ نہ ہوجائے، جس کے نتیجے میں مغرب کے کھوکھلے، دجالی، فریبی اور انسانیت کے دکھوں کا استحصال کرنے والے مغربی ازموں اور نظاموں پر انسانیت کا اعتبار ختم نہ ہوجائے ۔یہ ڈر، یہ خوف اور اندیشہ ان نام نہاد مغربی سیکولرطاقتوں کو مسلم ممالک میں مداخلت پر ابھارتا ہے اور وہ ان مسلم ممالک میں اسلام کا، امن کا اور عدل کا راستہ روک کر کھڑا ہوجاتا ہے۔ اس کے لیے مغرب پیسہ بھی پانی کی طرح بہاتا ہے ، اپنی طاقت سے بھی ڈراتا ہے اور مسلم ممالک میں انارکی اور انتشار کو بھی ہوا دیتا ہے ۔تو جناب اصل اور بڑا دہشت گرد کون ہوا؟ دہشت گردی کا منبع اور سرچشمہ کون ہے؟دنیا کے خزانوں پر قابض اور سائنس و ٹیکنالوجی کے ٹھیکیدار آپ کے مغربی آقا یا کہ بھوکے، ننگے، وسائل سے تہی دامن، ٹیکنالوجی اور اداروں سے محروم بدحال اور فاقہ کش مسلمان۔
اپنی خواہش کو معبود بنانے والے:
جو لوگ یہ چاہتے ہیں کہ جس طرح غیر مسلم اکثریتی ممالک نے اپنے اپنے ممالک سے اپنے پسندیدہ مسخ شدہ اور تحریف شدہ مذاہب کو ریاست و حکومت کے ایوانوں سے نکال باہر کیا اسی طرح مسلم اکثریتی ممالک میں بھی “ریاست وحکومت”کے ایوانوں سے اسلام کو نکال باہر کیا جائے، یہ لوگ سوائے اپنی خواہش کو معبود بنانے اور اٹکل پچودلائل دینے کے اور کچھ بھی نہیں کرتے۔
ان لوگوں کے بس میں یہ تو نہیں ہے کہ قرآن سے وہ تمام احکام اور آیات کھرچ کھرچ کر مٹا دیں جن میں ریاست وحکومت سے متعلق مسلمانوں کو ہدایات دی گئی ہیں اور نہ ہی ان کے بس میں یہ ہے کہ یہ اس حقیقت کو مسلمانوں سے چھپا سکیں کہ اسلام کے مقدس ترین رسولﷺ اور آپ کے قریب ترین ساتھیوں نے نہ صرف ریاست اور حکومت کے ایوانوں پر اسلام کے احکام کو نافذ کرکے دکھایا بلکہ اپنے وقت کی عالمی طاقتوں کو بھی الٹ پلٹ کر رکھ دیا۔
تو پھر یہ کیا کرتے ہیں؟ یہ کرتے یہ ہیں کہ اپنی عقل، اپنی دانش، اپنے خیال، اپنے قلم اور اپنے کلام کے طاقت ورگھوڑوں کو دنیا کی ادنیٰ قیمت کے بدلے میں بیچ دیتے ہیں۔ کبھی ان کی منطق کے گھوڑوں کو کافروں کی دنیاوی طاقت و ٹیکنالوجی مسحور کرکے رکھ دیتی ہے، کبھی ان کے خیال کے گھوڑے مغرب کی ظاہری چمک دمک کے پیچھے رسیاں تڑوا کر بھاگنے لگتے ہیں، کبھی ان کی دانش کےگھوڑے مغرب کی بے خدا(سیکولر) تہذیب کے پیچھے اس لیے سرپٹ دوڑنا شروع کردیتے ہیں کہ اس میں مسلمانوں کو نجی زندگی میں بھی برابر کی عزت و آزادی دینے کا اعلان کیا جاتا ہے، یہ الگ بات ہے کہ ان کی دانش کے بے لگام گھوڑے مسلمانوں کی نجی زندگی میں بھی اسلام سے وابستگی (مثلاً نماز، تقویٰ، زہد، غنا، صبر، توکل، حجاب، داڑھی) کا موقع بے موقع مذاق اڑانے سے نہیں چوکتے۔
مسخ شدہ مذاہب اور اسلام:
جس کا مذہب ذاتی خواہشات ،مسخ شدہ اور تحریف شدہ تاریخی حوالوں کا نام ہے وہ جائے اور جاکر اعلان کرتا پھرے کہ ہمارا مذہب جس طرح غیر اللہ کی پوجا کی تلقین کرتا ہے اسی طرح دنیا کے تازہ “خدا” سیکولرزم کی پرستش سے بھی نہیں روکتا بلکہ اس کی بندگی کا حکم دیتا ہے۔ اور جس کا مذہب (دین) محمدﷺ اور قرآن کے عطا کیے ہوئے اسلام کا نام ہے ، وہ جس طرح ذاتی زندگی میں ایک اللہ کی بندگی اور پرستش پر اصرار کرتا ہے عین اسی طرح مسلمانوں کی ریاستی زندگی کو بھی اللہ کی بندگی اور پرستش کا حکم دیتا ہے۔
مسخ شدہ اور تحریف شدہ مذاہب اپنی ریاست کی بادشاہی کسی بھی فلسفہ اور ازم کو دے سکتے ہیں اور انہوں نے عملی طور پر ایسا کیا۔ مگر سچا ، صاف اور پاکیزہ دین اسلام دو ٹوک اعلان کرتا ہے کہ فرد کی نجی زندگی ہو یا ریاستی زندگی بادشاہی کا حق صرف اور صرف اللہ اور اس کے قانون (اسلام )کو حاصل ہے۔

تین سال ہوگئے، لیکن ابھی کل کی بات معلوم ہوتی ہےبارہ مولہ (کشمیر) سے واپسی کے لئے نماز فجر کے بعد میں اپنا سامان سمیٹ رہا تھا، کہ وہ نوجوان، جن کے ساتھ میں نے ایک ہفتہ گزارا تھا، مجھے رخصت کرنے کے لیے آگیےان کے چہرے اترے ہوئے تھے، ان پر حزن و ملال کے آثار نمایاں تھے اور وہ سخت کرب میں مبتلا دکھائی دے رہے تھے_
بارہ مولہ کا سفر ادارہ فلاح دارین کی دعوت پر ہوا تھامیں عمومی پروگراموں سے بھاگتا ہوں، لیکن برادر سہیل بشیر کار کا اصرار غالب آیاوہاں میرے متعدد پروگرام ہوئے:کیی مسجدوں میں درس قرآن، سوال جواب کی نشستیں، لیکچر، خواتین اور طالبات کے درمیان مطالعہ قرآن، نظم زکوۃ کے موضوع پر ایک سمینار اور خواتین کے ایک بڑے عمومی پروگرام میں شرکت وغیرہایک دن گلمرگ کی خوب صورت وادی میں اور ایک دن سری نگر میں سیر و تفریح کا پروگرام رہامیں نے ان نوجوانوں کو بہت صالح، پرجوش، اسلام پر چلنے والا اور اسلام کے لیے مر مٹنے والا پایا_
نوجوانوں کے حزن و ملال اور کرب و اضطراب کا سبب یہ تھا کہ گزشتہ رات میں مصر میں فوجی انقلاب کے نتیجے میں جنرل سیسی نے اقتدار پر قبضہ کر لیا تھا اور صدر مرسی کو برطرف کرکے پس دیوار زنداں کر دیا تھا_
ایک نوجوان نے سوال کیا: مولانا! یہ بحث زور پکڑ رہی ہے کہ سیاسی اسلام ناکام ہو گیا ہےآپ کیا کہتے ہیں؟
میں نے کہا :موجودہ صورت حال سیاسی اسلام کی کام یابی کی دلیل ہےصدر مرسی نے ایک سال کام یابی کے ساتھ حکومت چلائی ہے، عوام کی فلاح و بہبود کے بہت سے کام کیے ہیں، بین الاقوامی سطح پر اسلام کی سربلندی کے متعدد اقدامات کیے ہیں اسلام دشمنوں نے سیاسی اسلام کو کام یاب ہوتا دیکھ کر اس کے خلاف سازش کی ہےسیاسی اسلام کو اس وقت ناکام کہا جا سکتا تھا جب صدر مرسی یا ان کے کسی وزیر پر کرپشن کا الزام ہوتا، انھوں نے ملک کی دولت لوٹ کر تجوریاں بھری ہوتیں، عوام پر ظلم ڈھائے ہوتےیہ تو مغربی جمہوریت کی ناکامی کی دلیل ہےاس کے علم برداروں نے الجزائر میں اعلان کیا کہ ووٹ کی طاقت سے جو کام یاب ہوگا اسے اقتدار سونپ دیں گے، مگر جب اسلام پسندوں کو پہلے ہی مرحلے میں اکثریت مل گئی تو اقتدار پر فوج نے قبضہ کرلیا اور اسلام پسندوں کی پکڑ دھکڑ شروع ہو گئیاسی طرح اس کے علم برداروں نے مصر میں اعلان کیا کہ بیلٹ پیپر سے جو پارٹی اکثریت حاصل کرے گی اسے اقتدار سونپ دیں گے، مگر اسلام پسندوں کو اکثریت ملی تو ان سے ہضم نہ ہو سکا، انھیں پریشان کرتے رہے، یہاں تک کہ بے دخل کرکے دم لیا
ایک نوجوان نے دریافت کیا :اس کا مطلب یہ ہے کہ اب پر امن جدوجہد سے اسلامی انقلاب نہیں آ سکتا؟
میں نے جواب دیا:میں طاقت کے استعمال کو حرام نہیں سمجھتا ، لیکن میرا خیال ہے کہ موجودہ دور میں پرامن جد و جہد ہی محفوظ ترین طریقہ ہے_ مولانا مودودی نے فرمایا ہے کہ جس نظام کو طاقت کے ذریعے قائم کرنے کی کوشش کی جائے گی اسے طاقت کے ذریعے ہی آسانی سے ہٹایا بھی جاسکتا ہے_
میں ان نوجوانوں سے رخصت ہوا تو میرے ذہن میں بار بار وہ واقعہ گردش کر رہا تھا کہ مکی دور میں مشرکین مکہ کی جانب سے اذیتیں بہت بڑھ گئیں تو حضرت خباب بن ارت رضی اللہ عنہ خدمت نبوی میں حاضر ہوئے اور عرض کیا :”اے اللہ کے رسول صلی اللہ علیہ و سلم! اب تو ظلم کی حد ہوگئی ہےآپ ہمارے لیے دعا نہیں فرمائیں گے؟ ” اس وقت آپ کعبہ کی دیوار کے سائے میں ٹیک لگائے ہوئے تھے یہ سنتے ہی اٹھ کر بیٹھ گئےآپ کا چہرہ مبارک تمتما اٹھاآپ نے فرمایا :”تم سے پہلے جو اہل ایمان گزرے ہیں ان پر اس سے زیادہ سختیاں کی گئی ہیںان میں سے کسی کو گڈھا کھود کر بٹھایا جاتا اور اس کے سر پر آرہ چلاکر اس کے دو ٹکڑے کر دیے جاتے اور کسی کے جوڑوں پر لوہے کے کنگھے گھسے جاتے تھے، تاکہ وہ ایمان سے باز آجائے، پھر بھی وہ اپنے دین سے نہ پھرتے تھےیقین جانو کہ اللہ اس کام پورا کرکے رہے گا، یہاں تک کہ ایک وقت آئے گا جب ایک شخص صنعاء سے حضر موت تک بے کھٹک سفر کرے گا اور اللہ کے سوا اس کو کسی کا خوف نہ ہو گا، مگر تم لوگ جلد بازی کرتے ہو“(بخاری، ابوداؤد، نسائی، احمد)
آج صدر مرسی کی معزولی کی تیسری برسی کے موقع پر میری نظروں میں بارہ مولہ کے اُن نوجوانوں کی صورتیں گھوم گئیںمیں نے ان نوجوانوں کی آنکھوں میں وہ چمک دیکھی ہے کہ مجھے یقین ہے کہ اگر ایسے نوجوان دنیا کے دوسرے خطوں میں بھی پیدا ہو جائیں تو اسلام کے روشن مستقبل کی ضمانت دی جا سکتی ہے_

” اسلامی سیکولرزم ” کا بیانیہ ۔۔ یہ اصطلاح پڑھتے ہی دماغ میں کسی محبت کے مارے کا اک قول جگمگا اٹھا کہ ” اس نے جاتے ہوئے پلٹ کر کہا تجھ جیسے لاکھوں ملیں گے، ہم نے کہا کہ آخر بھری دنیا میں مجھ جیسے ہی کی تلاش کیوں؟ ”
آج کل ہمارے ہاں اسلام کی نہیں بلکہ کسی اسلام جیسے کی تلاش زورو شور سے جاری و ساری دکھائی دیتی ہے۔ اس تلاش میں ہمارے بعض محترم دانشور حضرات مغرب کی ہر اترن کو ” اسلامی ” کا لاحقہ لگا کر مشرف بہ اسلام کرلینے پر بضد ہیں اور اس کی تبلیغ پر دہاڑی دار مزدور کی طرح ویسے ہی جتے ہوئے دکھائی دیتے ہیں جیسے ایک زمانے میں بعض لوگ سوشلزم کو اسلامی لباس پہنانے پر مصر تھے۔ وقت نے مگر یہ ثابت کردیا کہ انھوں نے سوشلزم کو جو ” اسلامی ” لباس پہنانے کی کوشش کی تھی وہ کامیاب نہیں ہوسکی تھی۔
گاہے حیرت ہوتی ہے کہ جب اسلام پسند نہیں تو پھر ” اسلام جیسا ہی کوئی ” کی کیوں تلاش ہے۔ صاف کھل کر اس سے اظہار برات کیوں نہیں کہ رب تعالیٰ نے تو صاف الفاظ میں آپشن دیا ہوا ہے ” لااکرہ فی الدین ”
ہمارے خیال میں ضرورت خارجی نہ ہوتی تو اظہار برات کیا، کوئی چولا پہننے یا سابقہ لاحقہ لگانے کی ضرورت ہی نہ ہوتی۔ داخلی سے زیادہ یہ خارجی محرکات ہیں جن کی بنا پر نئے بیانیے اور نئی اصطلاحات کی ضرورت پیش آ رہی ہے۔ مغرب میں چونکہ مذہب چرچ اور کلیسا تک محدود ہے، اس لیے یہاں بھی ایسے معاشرے کی تشکیل کی کوشش کی جا رہی ہے جہاں مذہب کو فرد کا ذاتی فعل قرار دے کر اسے ہر مذبی پابندی سے آزاد کردیا جائے اور اس کا سکون اطمینان بس اسی میں ہو کہ مسائل حیات کے جھمیلوں سے دور رہ کر تسبیح پر “اللہ ہو” اور سبحان اللہ کی گردان کی جائے اور سمجھا جائے بس حق مذہب ادا کردیا گیا ۔ یعنی یہ اختیار بھی مغرب کی طرح انسان کو سونپ دیا جائے کہ خدا کا زندگی میں بس اتنا ہی دخل ہو جتنا وہ دینا چاہے اور جب دل کرے اور چاہے تو وہ بھی نہ ہو اور اسے زندگی سے مکمل طور نکال باہر کرے۔ ( نعوذ باللہ )
” احیائے اسلام ” کا خیال تو ان کے نزدیک قابل نفرین ہے کہ سیکولر طرز فکر سے اس کی کوئی نسبت نہیں مگر ” اسلامی سیکولرزم” شاید کوئی ایسی چیز ہے جو قابل قبول ہو سکتی ہے۔ شاید اسلام کی ایسی سیاسی و غیر سیاسی تقسیم مقصود ہے جو ان دائروں سے تجاوز نہ کرے جو سیکولرزم نے کھینچ رکھے ہیں۔ مذہب کو بخوشی یہ اجازت دینے کو تو تیار ہیں کہ وہ تہذیب مغرب کے ساتھ تنائو کو کم کرنے کے لیے بطور نسخہ آسودگی (فردی اسلام اور صوفی ازم ) استعمال ہو لیکن اسے یہ ہرگز برداشت نہیں کہ وہ حقیقی زندگی کے سماجی اور سیاسی حل کے لیے ایک نظام کے طور پر کام کرے۔ یعنی اسلام کو اس کی قوت متحرکہ سے محروم کردیا جائے۔ اور یہ وہ خواہش تھی جس نے مغرب کو مجبور کیا کہ وہ شرعی اسلام سے صوفیانہ اسلام کی ترکیب پیدا کرے۔
اصلا یہ اسلامی نظام کی راہ روکنے کی اسی مغربی واردات کا حصہ ہے جس میں “صوفیانہ اسلام ” سے لے کر ” اسلامی سوشلزم ” تک شامل ہیں اور اب اک اور نقب ” اسلامی سیکولرزم ” کے نام پر لگانے کی کوشش ہو رہی ہے۔
تاہم اصل سوال یہ ہے کہ کیا اسلام کو ٹکڑوں میں بانٹ کر لاگو کرنا جائز ہے جبکہ خود اسلام بہ حیثیت ” الدین ” وجود کلی پر مصر ہے ؟ اور خود قرآن ایسا کرنے والوں کے لیے سخت سزا کی وعید کرتا ہے جو اس کی بعض باتوں کو مانیں اور بعض کو ماننے سے انکار کردیں ۔ یہود و نصاریٰ کے اس طرز عمل پر گرفت کرتے ہوئے قرآن ایسے لوگوں کو کافر ، فاسق ، اور ظالم قرار دیتا ہے ۔

اسلام کا یہ زور تحکم اور اس امر کی پوری تاریخ اتنی واضح ہے کہ مغرب کے پڑھے لکھے دیانت دار اصحاب دانش بھی اسے تسلیم کرتے ہیں ۔
مثلا پروفیسر این لیمبٹن (Ann Lambton) اپنی قابل قدر تصنیف (
Author of State and Government in Medieval Islam)
میں لکھتی ہیں :
” شریعہ ، مغرب میں سمجھے جانے والوں معنوں میں کوئی قانون کی کتاب نہیں ۔ شریعہ دراصل مسلمانوں کے فرائض کا بیان ہے۔ نظری طور پر یہ انسانی زندگی کے سب ہی معاملات بشمول تجارت و حرفت کا احاطہ کرتی ہے اور اس کے ساتھ ساتھ سیاسی نظام کی بنیاد مہیا کرتی ہے ”
ریاست کی ماہیت بیان کرتے ہوئے وہ لکھتی ہیں :
“( اس نظام میں ) ریاست موجود ہے ۔ کسی اور جمعیت ( اور ادارے ) کی موجودگی جو اس کے برابر یا اسے برتر ہونے کی مدعی ہو، اس ریاست کو کسی طرح محدود نہیں کرتی ”
اسی حوالے سے ہیملٹن گب ( Hamilton Gibb) جب عہد جدید میں اسلامی ورثہ کی بات کرتا ہے تو اس کا بیان بھی بڑا اہم ہے ۔
” (مسلم) کمیونٹی اس اندھیاری دنیا میں خدائے برتر کی شہادت دینے کے لیے موجود ہے اور یہ حکومت کا فرض منصبی ہے کہ قانون کی تنفیذ کا کام انجام دے ”
کیا اس کا مطلب یہ نہیں بنتا کہ اسلام کی اساسی روح سے مغربی مفکرین اور صاحب دانش تو آگاہ ہیں مگر ہمارے بعض دانشور اس سے پہلوتہی کر رہے ہیں۔
یہاں ایک سوال یہ بھی پیدا ہوتا ہے کہ اسلام جیسی جامع اور مکمل چیز پاس ہونے کے باوجود اس میں پیوند کاری کرنے والے کیسے پیدا ہوجاتے ہیں ؟ یہاں پھر منبر و محراب سے لے کر مدرسہ و علمیت کے بانجھ پن کا بھی بھانڈا پھوٹتا دکھائی دیتا ہے کہ وہ اسلام کو جدید رنگ میں پیش کرنے میں ناکام رہے؟ جہاں تک عام آدمی کی بات ہے تو دراصل اسی کو مطمئن کرنے کے لیے یہ سب پاپڑ بیلے جارہے ہیں کہ اس کے اضطراب کو ختم کر دیا جائے جو بار بار اسے رب کی طرف پلٹنے پر مجبور کر دیتا ہے
یہ بات واضح رہنی چاہیے کہ ” اسلام نہیں اسلام جیسا ہے ” کے جتنے بھی جدید سے جدید برانڈ مارکیٹ میں آئیں گے، ان کی کل زندگی بارش میں پیدا ہونے ان پتنگوں کی مانند ہوگی۔ پتنگے چند لمحوں کے لیے ایسے طوفان کی طرح اٹھتے دکھائی دیتے ہیں کہ انسان کی عقل دنگ رہ جاتی ہے اور سمجھ نہیں آتا اس افتاد سے کیسے جان چھڑائی جائے مگر ایسے میں کچھ عقل مند لوگ اپنے گھر کے دروازے کھڑکیاں بند کرلیتے ہیں اور جن روشنیوں پر وہ پروانے چمٹ چمٹ جانے کے لیے بیقرار ہوتے ہیں، وہی گل ہو کر ان کی موت کا پروانہ بن جاتی ہیں۔
ذرا پیچھے نگاہ دوڑا کر دیکھیے تو آپ کو ایک نہیں بلکہ بہت ایسے بیانیے ایک کے بعد ایک کر کے اپنے موجدین کے ہمراہ ایسی قبروں میں مدفون نظر آئیں گے جن پر کوئی پھول اور چادر تو درکنا کوئی کتبہ کا تختی بھی نہیں ملے گی اور ان کے مقابلے میں اسلام آج بھی تمام تر حشر سامانیوں کے ساتھ یہ کہتا دکھائی دے گا کہ
“بھری دنیا میں مجھ جیسے ہی کی تلاش کیوں آخر ؟؟ “

’’اسلامی سیکولرازم‘‘ کی بات کرنے والے کیا ’’اسلامی سوشلزم‘‘ کا انجام بھول گئے؟ یا پھر سرخ انقلاب کے متلاشیوں کی طرح ’’سیکولرازم‘‘ کی آغوش میں پناہ لیتے ہوئے انھوں نے اپنا بیانیہ تبدیل کر دیا ہے؟ یا اسے وقت کے ساتھ ساتھ بدلتے بیانیے میں اپنے آپ کو ایڈجسٹ کرنے اور جگہ بنانے کی کوشش سمجھا جائے؟ چند مہینے پہلے ’’اسلامی سیکولرازم‘‘ کے بجائے ’’مذہبی نما سیکولرز‘‘ کی اصطلاح استعمال کی تھی۔ لیکن تب یہ فکر لاحق ہوئی تھی کہ کہیں علمی ’’خیانت‘‘ یا ’بیانیہ‘ موسم میں افراط وتفریط کا شکار نہ ہوجاؤں۔
خورشید ندیم صاحب سے تعلق دوست سے بڑھ کر ایک استاد و شاگرد کا بھی ہے۔ کئی دفعہ ان سے مختلف موضوعات پر گفتگو ہوتی رہی ہے، اور نقد و اعتراض کے ذریعہ کچھ موضوعات کو سمجھنے اور ان سے سیکھنے کی کوشش بھی ہے۔

لیکن گزشتہ کل جب انھوں نے اپنے کالم میں میں پاکستانی سیاست اور سیکولرازم کو ’’مقبول بیانیہ‘‘ قراردیتے ہوئے ’’اسلامی سیکولرازم‘‘ کی اصطلاح استعمال کی تو حیرانی نہیں ہوئی بلکہ جس خدشہ کا اظہار کیا جارہا تھا ، وہ درست ثابت ہوا۔ رائے اور خیالات میں تبدیلی کا یہ عنصر جو ’’المورد‘‘ کے احباب کے ہاں دیکھنے کو ملتا ہے شاید کہ کہیں دوسری جگہ اس کی کوئی مثال ملتی ہو۔ چاہے وہ 1973 کے آئین کے بعد مملکت کے ’’مسلمان‘‘ ہونے سے مذہبی سیاست نہ کرنے کا مشورہ دے کر بعد میں ریاست کو ’’بلامذہب‘‘ قرار دے دینا ہو یا جہاد کے اعلان و توہین رسالت و حدود کی سزائوں کو ’ریاست‘ کی اتھارٹی اور پابندی کے زمرے میں لا کر (اور اسی طرح ہونا بھی چاہیے) لیکن مسئلہ قادیانیت سمیت بعض دیگر امور کو ریاست و پارلیمنٹ کے دائرے سے نکال کر علماء و سکالرز کا معاملہ قرار دینا ہو۔ علی ہذا القیاس۔ خاکسار کو خورشید ندیم صاحب کی کئی دینی و مذہبی رہنمائوں سے ملاقاتوں کا اہتمام کرنے کا موقع ملا، اور انھیں ایسے پروگرامات میں باصرار بلوایا جہاں دوسرے شرکاء کو اعتراض ہوتا تھا، کوشش یہی تھی کہ ان کی رائے کو سننے اور خیالات سے آگاہی کا موقع فراہم کیا جائے تاکہ قربت کا کوئی راستہ نکل سکے۔ اس کوشش میں بسا اوقات احساس ہوتا تھا کہ کہیں احباب اور بزرگ میرے بارے میں کوئی خاص رائے قائم نہ کریں)

خورشید ندیم صاحب سے جب بھی گفت وشنید ہوئی یا ملاقاتوں اور پروگرامات میں سننے کا موقع ملا تو پاکستانی سیاست پر بات کرنے سے انہوں نے ’’تقریبا‘‘ احتراز ہی کیا، مذہبی جماعتوں کے مرکزی قائدین سے ملاقاتوں کے موقع پر ان کی گفتگو کا آغاز کچھ ایسا ہی ہوتا تھا کہ ’’میں سیاست کا نہیں بلکہ مذہب و سماجیات کا طالبعلم ہوں، اس لیے سیاست سے ہٹ کر تربیت و دعوت پر ہی بات کرسکتا ہوں‘‘ مگر مذکورہ کالم میں انھوں نے بلاول زرداری اور پاکستانی سیاست پر ’’ماہرانہ‘‘ گفتگو کی۔ (ویسے یہ بھی خوش آئند ہے کہ اسلامی سیکولرزم یا بلاول زرداری کی وجہ سے وہ سیاست کی طرف آئے اور کھل کر بات کی۔

خورشید ندیم صاحب سے پہلے ’اسلامی سیکولرازم‘ کا نعرہ جن معروف و غیر معروف چہروں کی طرف سے لگایا گیا ہے، ان سب نے اپنی نسبت بالواسطہ یا بلاواسطہ ’’المورد‘‘ یعنی جاوید احمد غامدی صاحب کی طرف کی ہے۔ اگر خورشید ندیم صاحب دبے لفظوں سے سیکولر بیانیہ کو اسلام کا لبادہ اوڑھا کر اسے ’اسلامی سیکولرازم‘‘ کا نام دے رہے ہیں اور کچھ اذہان کو ترغیب دینے کی بھی کوشش کررہے ہیں ، تو میری دانست کے مطابق یہ ان کی ذاتی رائے کم اور فکری سوچ و رائے ذیادہ ہے۔ اس وقت اہل مذہب کا وہ طبقہ جو سیکولرازم بیانیہ کا حامی اور بڑا وکیل نظر آتا ہے، ان میں خود جاوید غامدی صاحب اور ان کی فکر سے وابستہ افراد سب سے نمایاں ہیں۔ اس وجہ سے موصوف نے اپنے مضمون میں اسلامی بیانیہ (جسے انھوں نے سیاسی اسلام کا بیانیہ کہا ہے) کو ’’ناکارہ و نامکمل‘‘ قرار دینے کوشش کی نیز اسے ’دہشت گرد‘‘ تنظیموں کے ہاتھوں یرغمال بھی کہا۔
ایک طرف اسے ناکارہ سمجھتے ہیں اور مذہب کا بیانیہ علمی طور پر پیش کرنے والا انھیں پاکستان بھر میں کوئی فرد نظرنہیں آرہا تو دوسری طرف سیاست میں بیانیہ کو صرف ’دیوبند‘ تک محدود کر دیا جسے ابھی ان کا حتمی یا دوٹوک موقف قرار نہیں دیا جا سکتا بلکہ ’یہاں‘ بھی تضاد نظر آرہا ہے۔

خلاصہ:

1 : خورشید ندیم صاحب سیکولرازم کے علمبرداروں کو ایک نیا نام و اصطلاح پیش کرنے اور اسے اسلامی رنگ دینے کی کوشش کر رہے ہیں۔

2 : موصوف مذہبی جماعتوں کو مفلوج و اپاہج سمجتھے ہوئے مذہب کا بیانیہ پیش کرنے کے لیے نا اہل سمجھتے ہیں۔

3 : وہ لوگ جو دینی و مذہبی پس منظر رکھنے کے ساتھ ساتھ مذہب وسیاست کے بارے میں تحفظات کا شکار ہیں انھیں ایک نئی راہ دکھاتے ہوئے ’’اسلامی سیکولرازم‘‘ کے سایہ میں پناہ لینے پر آمادہ کرتے ہیں۔

4 : ایک لحاظ سے اپنی سوچ اور فکر کے سرخیل کو مذہب کا بیانیہ پیش کرنے کے لیے اہل اور موزوں سمجھتے ہوئے ان کےلیے ’’اعتماد سازی ‘‘ اور ” ذھن سازی ” کر رہے ہیں۔ واللہ اعلم