Category: اسپورٹس

اسے پنجروں میں قید پرندے دیکھ کر ہمیشہ ہی دکھ ہوتا تھا..
وہ اکثر ایسے پنجرے کھول دیا کرتی تھی..
اور جب کسی بھی پنجرے سے پرندہ پھر سے اڑ کر آزاد فضا میں سانس لیتا اور فضا کی بلندیوں تک جاتے جاتے بھی وہ مڑ مڑ کر اسے دیکھتا تو…
وہ اڑتے پرندوں کی محبت اور تشکر بھری نگاہوں کو پہچان لیا کرتی تھی…
اس لمحہ اس پر اک عجیب سی سرشاری کی سی کیفیت طاری رہتی…
پھر یوں ہوا..
وقت نے ایسا پلٹا کھایا..
وہ اب اپنے پنجرے کی جالیوں سے باہر دیکھا کرتی ہے..
اور
اس کا پنجرہ کھولنے والا کوئی نہیں..

’نہیں نہیں، فواد عالم تم ون ڈے ٹیم میں نہیں کھیل سکتے۔‘
’مگر کیوں؟ میں نے تو ون ڈے انٹرنیشنل میں 40 اور ڈومیسٹک ون ڈے میں 48 کی ایوریج سے بیٹنگ کی ہے۔‘
’ایوریج تو ٹھیک ہے مگر تمھارا سٹرائیک ریٹ ٹھیک نہیں‘
’اتنی ایوریج پر کتنا سٹرائیک ہو تو کافی ہوتا ہے؟‘
’75 تو ہو کم از کم‘
’ہاں میرا بھی سٹرائیک 75 کا ہی ہے۔‘
’مگر تم تیز نہیں کھیل سکتے۔ میرا مطلب ہے کہ آخری اوورز میں 150 کے سٹرائیک ریٹ کی ضرورت ہوتی ہے، تب تم سے نہیں کھیلا جاتا۔ تب جب چھکوں چوکوں کی ضرورت ہو۔‘
’میری آخری دونوں ون ڈے ففٹیز میں میں نے ٹوٹل 6 چھکے لگائے تھے اور ایشیا کپ کے فائنل میں جب میں نے سنچری کی، تو اس میں میں نے آخری 78 رنز صرف 38 بالز پر بنائے تھے۔‘
’اچھا ہاں سری لنکا کے خلاف ناں؟ ان کے تو سپنرز تھے۔ فاسٹ باولر کو نہیں مار سکتے تم‘
’مگر اس میچ میں میں نے مالنگا کو بھی 2 چھکے اور 2 چوکے مارے تھے‘
’اچھا پر تم ہٹر لگتے نہیں ہو۔ اگر میں نے تمہیں ٹیم میں رکھا تو مجھ پر بہت تنقید ہو گی۔‘
’چلیں ٹیسٹ ہی کھلا لیں۔ میری ٹیسٹ اوسط بھی 42 اور ڈومیسٹک میں 56 ہے۔‘
’اچھا 56 کی اوسط ہے؟‘
’ہاں جی اور پاکستان کی طرف سے تاریخ کی سب سے زیادہ ڈومیسٹک اوسط میری ہی تو ہے۔ دنیا میں بھی ٹاپ ٹین میں آتا ہوں۔‘
’مگر تمھارا سٹائل بڑا عجیب سا ہے۔ ‘
’چندرپال اسی سٹائل سے کھیلتا تھا مگر بڑا کامیاب تھا‘
’ہاں مگر اس ٹیکنیک سے انگلینڈ میں نہیں کھیلا جاتا۔‘
’مگر میں نے تو کاؤنٹی میں بھی 80 سے زیادہ کی اوسط سے بیٹنگ کی‘
’تم نے کاؤنٹی بھی کھیلی ہے؟‘
’جی 2006ء میں لیور پول چیمپئن شپ اور 2011ء میں لنکا شائر کی طرف سے کھیلا تھا۔‘
’واہ بھئی زبردست مگر مسئلہ یہ ہے کہ تم ہو مڈل آرڈر کے کھلاڑی اور یونس، مصباح اور اسد شفیق کے ہوتے ہوئے ہم مڈل آرڈر کو ڈسٹرب نہیں کرنا چاہتے۔‘
’مجھے اوپنر کھلا لیں۔ میں نے تو اپنی پہلی ٹیسٹ سنچری سری لنکا کے خلاف بطور اوپنر ہی کی تھی۔‘
’ہاں مگر اب جو بچے اوپنر کھیل رہے ہیں، وہ بھی اچھے ہیں، کبھی کبھی ففٹی بھی کر جاتے ہیں۔ ان کو فی الحال ٹرائی کرنا ہے، اس کے بعد 5،4 اور بچے ہیں۔ اس کے بعدخدا نے چاہا تو تمہیں بھی چانس ملے گا۔‘
’تو ابھی میں کیا کروں؟‘
’ابھی۔۔ تمھیں ٹی ٹونٹی کھیلا لیتے ہیں۔‘
’اس میں کس نمبر پر کھیلوں گا‘
’چھٹے یا ساتویں نمبر پر کھیلو گے‘
’مگر آپ تو کہ رہے تھے کہ میں تیز نہیں کھیل سکتا‘
’ہاں ۔۔ پر چلو فیلڈنگ کر لینا‘

2008ء میں 10 سال تک مسلسل نظرانداز ہونے کے بعد مصباح الحق نے کہا تھا کہ خدا کرے پاکستان میں کوئی اور مصباح پیدا نہ ہو۔ اب اس لائن میں آپ مصباح کاٹ کر فواد عالم لکھ سکتے ہیں۔ 2003ء میں فواد عالم پاکستان کی طرف سے انڈر 19 کھیل رہا تھا۔ پوری دنیا کے کمینٹریٹر اسے مستقبل کا پاکستان کا کپتان بتا رہے تھے مگر شاید وہ بھول رہے تھے کہ وہ آسٹریلیا یا انگلینڈ میں نہیں پاکستان میں کھیل رہا ہے۔ اس وقت فواد عالم ایک زبردست ہٹر تھا۔ 2006ء میں جب پاکستان نے ڈومیسٹک کرکٹ میں پہلے ٹی ٹونٹی ٹورنامنٹ کا انعقاد کیا تو اس میں پاکستان کے تمام بڑے سٹارز نے بھرپور شرکت کی۔ 22 سالہ فواد عالم نے اس میں شعیب اختر، محمد سمیع اور محمد آصف کی خوب درگت بنائی۔ اس وقت فواد عالم آل راؤنڈر تھا۔ اس ایونٹ میں فواد عالم بہترین بیٹسمین کے ساتھ ساتھ بہترین باؤلر بھی قرار پایا اور فائنل کا مین آف دی میچ بھی۔ مگر ٹورنامنٹ کے بعد عمران نذیر کو سلیکٹ کر لیا گیا۔ 2008ء میں کینیڈا میں چار ملکی ٹورنامنٹ میں فواد عالم کی ٹیم میں انٹری ہوئی۔ فائنل میں آخری اوور میں پاکستان کو 18 رنز درکار تھے۔ باؤلر فرنینڈو تھا جو بہترین یارکر نے کے ساتھ ساتھ اس وقت سلو بال کرنے والے چند بالرز میں شامل تھا۔ فواد عالم نے اسے اوور میں 2 چھکے جڑ کر میچ جیت لیا۔ اس کے بعد فواد عالم کو ڈراپ کر دیا گیا۔ اسے کہا گیا کہ ون ڈے ٹیم میں آل راؤنڈر کی جگہ خالی نہیں۔ وہ اگر اپنے آپ کو پراپر بیٹسمین بنا لے تو اس کی ٹیسٹ اور ون ڈے میں جگہ بن سکتی ہے۔

بیچارے فواد عالم نے خود کو پراپر ٹیسٹ بیٹسمین کے روپ میں لانے کے لیے اپنا سٹائل بدل لیا اور رنز کے انبار لگانے لگا۔ اسے ٹیسٹ کھیلایا گیا مگر 3 میچز کھلانے کے بعد پتہ نہیں کیوں ڈراپ کر دیا گیا جبکہ اس نے ان 3 میں سے ایک میچ میں 168 کی شاندار اننگز بھی کھیلی تھی۔ اس کے بعد کبھی اسے ٹیسٹ نہ کھیلایا گیا۔ اسے ون ڈے میں بار بار چانس دیا گیا اور ہر بار سکور کرنے کے باوجود یہ کہہ کر ڈراپ کر دیا جاتا تھا کہ سٹرائیک ریٹ کم ہے۔ میں ایسی سلیکشن کو نہیں مانتا۔ کیا آپ مانتے ہیں؟

آج کے دن 1952ء میں پاکستان نے اپنی پہلی ٹیسٹ فتح حاصل کی تھی۔ یہ پاکستان کا صرف دوسرا ٹیسٹ میچ تھا۔ اس لحاظ سے یہ ایک بہت بڑی خبر تھی جس نے دنیائے کرکٹ کو حیران کر دیا۔ کوئی بھی نہیں سوچ سکتا تھا کہ انڈیا جیسی مضبوط ٹیم جسے ٹیسٹ کھیلتے ہوئے 20 سال ہوچکے تھے، اسے ایک نو آموز ٹیم شکست دے دے گی۔ پاکستان نے مگر اپنی موجودگی کا شاندار احساس دلایا اور آنے والے تابناک دنوں کی نوید سنا دی۔

اپنی پہلی ہی سیریز میں ٹیسٹ میچ جیت جانا اور وہ بھی ایک اننگز سے، ایسا کارنامہ کسی اور ملک نے کیا ہو، تاریخ میں ایسی کوئی مثال نہیں۔

انگلینڈ اور آسٹریلیا کو اس میں استثنی حاصل ہے کیونکہ دونوں کرکٹ کے ایک طرح سے بانی گنے جاتے ہیں اور انگلینڈ آسٹریلیا کے کھلاڑی ٹیسٹ کرکٹ شروع ہونے سے پہلے بھی ایک دوسرے کے ساتھ مسلسل کھیلتے چلے آرہے تھے، اس لیے طرفین میں تجربے اور مہارت کا کوئی فقدان نہیں تھا۔ ویسے انگلینڈ اور آسٹریلیا دونوں نے اپنی پہلی ہی سیریز میں ایک دوسرے کو ٹیسٹ میچ ہرا دیا تھا، تاریخ کا پہلا ٹیسٹ بھی انہی دو ملکوں کے درمیان کھیلا گیا تھا جس میں آسٹریلیا کو فتح حاصل ہوئی۔ اس کے بعد اگلے ہی میچ میں انگلینڈ نے اپنا بدلہ اتار لیا تھا۔ انگلینڈ کے بعد پاکستان واحد ٹیم ہے جس نے اپنا دوسرا ہی میچ جیتا ہو۔

قارئین کی دلچسپی کے لیے بتاتا چلوں کہ بنگلہ دیش نے اپنا پہلا ٹیسٹ جیتنے کے لیے تقریبا 5 سال انتظار کیا اور اس سے پہلے مسلسل 17 سیریز میں شکست کھائی۔ اپنا پہلا ٹیسٹ جیتنے سے پہلے اتنی مسلسل سیریز کسی اور ٹیم نے نہیں ہاری ہیں۔ انڈیا کو اپنا پہلا ٹیسٹ جیتنے کے لیے 20 سال انتظار کرنا پڑا تھا، جب 1952ء میں انہوں نے انگلینڈ کے خلاف ایک ٹیسٹ میچ جیتا۔ اسی سال دوسری کامیابی اسے پاکستان کے خلاف حاصل ہوئی تھی۔ نیوزی لینڈ کو اپنی پہلی ٹیسٹ فتح کے لیے 26 سال انتظار کرنا پڑا تھا، اس نے پہلی دفعہ ویسٹ انڈیز کے خلاف مارچ 1956ء میں فتح حاصل کی۔ ساؤتھ افریقہ نے اپنا پہلا ٹیسٹ میچ 17 سال کی شدید محنت کے بعد جیتا تھا جب انہوں نے جنوری 1906ء میں انگلینڈ کو ہوم گراؤنڈ میں شکست دی تھی۔ ساؤتھ افریقہ انگلینڈ اور آسٹریلیا کے بعد ٹیسٹ سٹیٹس حاصل کرنے والی تیسری ٹیم ہے۔ سری لنکا خوش نصیب ٹیم تھی جس نے صرف تین سال بعد اپنے 14 ویں ٹیسٹ میچ میں ہی فتح حاصل کر لی تھی۔ یہ علیحدہ بات ہے کہ اس کے بہت عرصے بعد تک بھی سری لنکا کو بے بی آف کرکٹ کے نام سے پکارا جاتا رہا۔ ویسٹ انڈیز والے قدرتی ٹیلنٹڈ اور کرکٹ کے لیے شائد فٹ ترین لوگ تھے۔ 1928ء میں ویسٹ انڈین جزائر پر مشتمل کرکٹ ٹیم کو ٹیسٹ سٹیٹس ملا، اور 1930ء میں اپنی دوسری ہی سیریز میں ویسٹ انڈیز نے انگلینڈ کو ٹیسٹ میچ ہرا دیا، حالانکہ انگلینڈ سے ہی پہلی سیریز میں ویسٹ انڈیز کو کلین سویپ شکست بھی ہوچکی تھی۔ زمبابوے کو بھی پہلی ٹیسٹ فتح صرف تین سال بعد مل گئی تھی جب پاکستان کی مضبوط ترین ٹیم زمبابوے کے خلاف ڈھے گئی تھی۔ سلیم ملک کی کپتانی میں فروری مارچ 1995ء میں زمبابوے کا دورہ کرنے والی ٹیم نے پہلا ٹیسٹ جس طرح ہارا، اس پر آج بھی سوالات اٹھائے جاتے ہیں۔ میچ فکسنگ کے حوالے سے یہ میچ بہت بدنام گنا جاتا ہے مگر اب یہ تاریخ ہے۔

خیر موضوع کی طرف آتے ہیں۔ پاکستان کی اس عظیم ترین فتح کے معمار عظیم فضل محمود تھے، جنھوں نے اس میچ میں 12 وکٹیں حاصل کیں۔ انڈین ٹیم بہت مضبوط تھی، اس میں لالا امرناتھ اور پولی امریگر جیسے بڑے کھلاڑی موجود تھے۔ وجے منجریکر (مشہور کمنٹریٹر اور بلے باز سنجے منجریکر کے والد) بھی اس میچ میں انڈین ٹیم کا حصہ تھے، مگر کسی کے پاس فضل محمود کی شاندار باؤلنگ کا جواب نہیں تھا۔ پاکستان نے انڈیا کو پہلی اننگز میں صرف 106 رنز پر آؤٹ کردیا۔ اس اننگز میں فضل محمود نے 5 وکٹیں حاصل کیں، وہ پاکستان کی طرف سے ٹیسٹ اننگز میں 5 وکٹیں لینے والے پہلے باؤلر بن گئے۔

جواب میں نذر محمد کی شاندار اور تقریبا 9 گھنٹے لمبی محنت بھری 124 رنز کی اننگز کی بدولت پاکستان نے 194 اوورز میں 331 رنز بنائے۔ اس میچ میں انڈیا کو اپنے کامیاب ترین باؤلر ونو منکڈ (بہترین آل راونڈر تھے) کی خدمات حاصل نہیں تھیں، جنہوں نے گزشتہ میچ میں 13 وکٹیں حاصل کی تھیں۔ ان کی غیر موجودگی انڈیا کے لیے بہت بڑا نقصان ثابت ہوئی اور پاکستان ایک اچھا ٹوٹل تشکیل دینے میں کامیاب ہوگیا۔ دوسری اننگز شروع ہوئی تو فضل محمود جیسے قہر بن کر انڈین بلے بازوں پر ٹوٹ پڑے اور اپنی پہلی اننگز سے بھی بہترین باؤلنگ کر ڈالی۔ دوسری اننگز میں انڈین ٹیم صرف 182 رنز بنا سکی۔ فضل محمود نے 27 اوورز میں صرف 42 رنز دے کر 7 انڈین بلے بازوں کو پویلین کا راستہ دکھا دیا۔ پاکستان کو اس میچ میں ایک اننگز اور 43 رنز کی شاندار فتح نصیب ہوئی۔

یاد رہے کہ پہلے ٹیسٹ میچ میں انڈیا نے بھی پاکستان کو ایک اننگز سے شکست دی تھی۔ پاکستان کی طرف سے ٹیسٹ میچ میں پہلی دفعہ 10 وکٹیں حاصل کرنے کا اعزاز بھی فضل محمود کے حصے میں آگیا۔ نذر محمد نے ٹیسٹ میں پاکستان کی طرف سے پہلی ٹیسٹ سنچری بنانے کا اعزاز اپنے نام کیا اور تاریخ میں امر ہوگئے۔ انڈیا کے ہری لال گائیکواڈ کا یہ واحد ٹیسٹ میچ ثابت ہوا، وہ دوبارہ کبھی انڈیا کے لیے نہیں کھیل سکے۔ پاکستان کی طرف سے کھیلنے والے امیر الہی اور حفیظ کاردار دونوں متحدہ ہندوستان کی طرف سے بھی کھیل چکے تھے۔ مزے کی بات ہے کہ امیر الہی نے انڈیا کی طرف سے اپنا واحد ٹیسٹ میچ دسمبر 1947ء میں کھیلا تھا جب پاکستان معرض وجود میں آچکا تھا۔ یہ انڈیا کی طرف سے ان کا پہلا اور آخری ٹیسٹ بھی ثابت ہوا۔

25 اکتوبر 1991ء کو پاکستان اور انڈیا کے درمیان ولز ٹرافی کا فائنل کھیلا گیا تھا۔ انڈیا، پاکستان اور ویسٹ انڈیز کے درمیان کھیلے گئے اس تین ملکی ٹورنامنٹ کا فائنل پاکستان نے با آسانی جیت لیا تھا۔ یہ مسلسل تیسرا موقع تھا جب کسی تین یا اس سے زیادہ ملکوں کی سیریز میں میں پاکستانی ٹیم نے فائنل میں انڈیا کو ہرایا ہو۔ اس سے پہلے دو بارمسلسل 1983-84ء کے رتھمینزایشیا کپ اور بینسن اینڈ ہیجز کپ 1985ء میں انڈیا پاکستان کو ہرا چکا تھا۔ پاکستان کو کسی بھی کثیرالملکی سیریز میں پہلی فتح 1986ء کے آسٹریلشیا کپ میں حاصل ہوئی جب پاکستان نے انڈیا کو ہی فائنل میچ میں شکست دی تھی۔ یہ جاوید میاں داد کے مشہور زمانہ آخری گیند پر چھکے والا میچ تھا۔

25 اکتوبر 1991ء کے ولز ٹرافی فائنل کی خاص بات نوجوان عاقب جاوید کا ناقابل یقین باؤلنگ سپیل تھا۔ عاقب جاوید نے اس میچ میں 37 رنز دے کر 7 انڈین بلے بازوں کو پویلین واپس بھیجا تھا۔ یہ اس وقت ایک ورلڈ ریکارڈ تھا۔ ان سے پہلے صرف ایک باؤلر ویسٹ انڈیز کے ونسٹن ڈیوس یہ کارنامہ انجام دے سکے تھے۔ ڈیوس نے جون 1983ء میں آسٹریلیا کے خلاف 51 رنز دے کر 7 وکٹیں حاصل کی تھیں لیکن ونسٹن ڈیوس نے ساتویں وکٹ اپنے گیارھویں اوور کی تیسری گیند پر حاصل کی تھی، اس وقت ون ڈے میچز60 اوورز پر مشتمل ہوتا تھا، سو موجودہ قوانین کے تحت عاقب جاوید 7 وکٹیں حاصل کرنے والے پہلے باؤلر ہیں۔ عاقب جاوید کا یہ ریکارڈ تقریبا دس سال تک قائم رہا اور اکتوبر 2000ء میں مرلی دھرن نے انڈیا کے خلاف صرف 30 رنز دے کر 7 وکٹیں حاصل کر کے یہ ریکارڈ عاقب جاوید سے چھین لیا۔ اب یہ ریکارڈ چمندا واس کے پاس ہے جنہوں نے زمبابوے کے خلاف 19 رنز دے کر 8 وکٹیں حاصل کر رکھی ہیں۔ ان کے سوا کوئی باولر ون ڈے میچ میں 8 وکٹیں حاصل نہیں کر پایا۔

عاقب جاوید نے اس میچ میں اپنے اس باؤلنگ سپیل میں ایک ہیٹ ٹرک بھی سکور کی تھی جب انہوں نے مسلسل تین گیندوں پر روی شاستری، محمد اظہرالدین اور عظیم ترین سچن ٹنڈولکر کو آؤٹ کر دیا تھا۔ مزے کی بات یہ ہے کہ تینوں انڈین بلے باز ایل بی ڈبلیو آوٹ ہوئے تھے۔ یہ مجموعی طور پرساتویں اور پاکستان کی طرف سے چوتھی ہیٹ ٹرک تھی۔ 19 سالہ عاقب جاوید کے کیرئیر میں یہ پہلا موقع تھا جب انہون نے 5 یا اس سے زیادہ وکٹیں حاصل کی ہوں۔ عاقب جاوید اس کے بعد بھی مسلسل اچھی باؤلنگ کرتے رہے مگر 1998ء میں ان کا کیرئیر صرف 26 سال کی عمر میں بہت ہی افسوسناک انداز میں اپنے اختتام کو پہنچ گیا۔ بہت سے لوگ اسے میچ فکسنگ کے خلاف بولنے کا شاخسانہ بھی قرار دیتے ہیں مگر یہ چیز آج تک کسی فورم پر ثابت نہیں ہو سکی۔ پاکستان کی طرف سے ایک اور خاص کارکردگی جو اس میچ میں دیکھنے کو ملی، وہ 18 سالہ زاہد فضل کے 98 ناٹ آوٹ رنز تھے۔ زاہد فضل کریمپس کی وجہ سے اپنی سنچری مکمل نہیں کر سکے تھے اور انہیں ریٹائرڈ ہرٹ ہونا پڑا تھا۔ دکھ کی بات یہ ہے کہ زاہد فضل کا یہ سب سے بہترین ون ڈے سکور بھی ہے۔ اس کے بعد زاہد فضل کئی بار ٹیم سے ان آؤٹ ہونے کے بعد صرف 22 سال کی عمر میں انٹرنیشنل کرکٹ سے باہر ہوگئے تھے۔

اس میچ میں عاقب جاوید کی وکٹیں دیکھیں

ٹیسٹ کرکٹ کی تاریخ میں سر ڈان بریڈمین، سر گیری سوبرز، سر ویون رچرڑز، سنیل گواسکر، ظہیر عباس، جاید میانداد، انضمام الحق، رکی پونٹنگ، جیک کیلس، برائن لارا، سچن ٹنڈولکر، راہول ڈریوڈ جیسے عظیم کھلاڑی پیدا ہوے۔ سر بریڈمین بلاشبہ ٹیسٹ کرکٹ کی تاریخ کے کامیاب ترین بیٹسمین ہیں مگر ان کے بعد تجزیہ نگار دوسرے کامیاب ترین بیٹسمین پر کبھی متفق نہیں ہوئے۔ اس کی وجہ شاید یہ بھی ہے کہ مختلف زمانے کے کھلاڈیوں کا آپس میں موازنہ نہیں کیا جا سکتا کیونکہ ہر زمانے میں کنڈیشن مختلف ہوتی ہے مگر ایک ہی زمانے کے کھلاڑیوں کا آپس میں موازنہ کیا جا سکتا ہے۔

دور حاضر میں بھی بہت شاندار بیٹسمین ٹیسٹ کرکٹ کھیل رہے ہیں۔ اس تحریر میں دور حاضر کے ان بیٹسمینوں کا موازنہ کیا گیا ہے جو کم از کم 40 ٹیسٹ میچ کھیل چکے ہیں اور ان کی اوسط 50 سے زیادہ ہے۔
کسی بھی بیٹسمین کی کارکردگی کو جانچنے کے لیے اس کی ایوریج کافی نہیں ہوتی۔ اس سلسلے میں بہت سے طریقے استعمال کیے جا سکتے ہیں۔ اس موازنے میں ہر بیٹسمین کو پانچ طریقوں سے جانچا جائے گا اور اس کو اس کے مطابق پوائنٹ دیے جائیں گے۔اس کی تفصیل نیچے دی گئی ہے۔
1۔ بیٹسمین کی ایوریج۔ 55 کی اوسط پر 20 پوائنٹ اور اس سے زیادہ ہر زنز پر ایک اضافی پوائنٹ ملے گا۔ 55 سے کم ہر رنز پر ایک پوائنٹ کاٹ لیا جائے گا.
2۔ مختلف ملکوں میں کارکردگی۔ بیٹسمین کی ہر ملک میں کارکردگی دیکھی جائے گی اور اوپر دیے گئے معیار کے مطابق ہر ملک میں پوائنٹ جمع کر کے ان کی ایوریج لی جائے گی۔
3۔ مختلف ملکوں کے خلاف کارکردگی۔ بیٹسمین کی ہر ملک کے خلاف کار کردگی دیکھی جائے گی اور اوپر دیے گئے معیار کے مطابق پوائنٹ جمع کر کے ان کی ایوریج لی جائے گی۔
4۔ لمبی اننگز کھیلنے کی صلاحیت۔ ہر سنچری کے 40، ہر 150 پلس سکور کے 60، 200 پلس سکور کے 80، 250 سکور کے 100 اور 300 پلس سکور کے 120 پوائنٹ ملیں گے۔ ان تمام پوائنٹس کو جمع کر کے میچز کے تعداد پر تقسیم کر کے اس کی اوسط لی جائے گی۔
5۔ پریشر میں کھیلنے کی صلاحیت۔ اس کے لیے کسی بیٹسمین کی بطور کپتان کارکردگی، بڑی اور اہم سیریز میں کارکردگی اور میچ کی تیسری اور چوتھی اننگز میں اوسط دیکھی جائے گی. اس کے علاوہ فتوحات میں کردار بھی دیکھا جائے گا۔
دنیا میں اس وقت 6 ایسے بیٹسمین ہیں جن کی اوسط 50 سے زیادہ اور میچز 40 سے زیادہ ہیں۔ ان سب کا تفصیلی موازنہ نیچے دیا گیا ہے۔

اے بی ڈویلیر
سپرمین یعنی اے بی ڈویلیر کے بارے میں یہ عام خیال ہے کہ وہ ون ڈے اور ٹیسٹ کرکٹ کا شاندار کھلاڑی ہے کیونکہ وہ بہت مختصر وقت میں ہی مخالف ٹیم کے پرخچے اڑا کے رکھ دیتا ہے۔ مگر اے بی کی 50 کی ٹیسٹ اوسط یہ بتانے کے لیے کافی ہے کہ اے بی ایک بہترین ٹیسٹ بیٹسمین بھی ہے۔ اوسط میں اسے 15 پوائنٹس ملتے ہیں۔ اس کے لیے کوئی وکٹ مشکل نہیں، کوئی باؤنڈری بڑی نہیں، کوئی باؤلر تیز نہیں، کوئی گگلی یا دوسرا گیند کو باؤنڈری سے باہر جانے سے نہیں روک سکتے۔ بنگلہ دیش میں ایک بیڈ فیز کی وجہ سے وہ زیادہ سکور نہ کر سکا۔ اس کے علاوہ تمام ممالک میں اور تمام ممالک کے خلاف اس کی اوسط 45 سے زیادہ رہی۔ مختلف ممالک میں اور مختلف ممالک کے خلاف کارکردگی پر اسے بالترتیب 15،16 پوائنٹس ملتے ہیں۔ اس نے 106 میچز میں 21 سنچریاں، 7 بار 150 پلس،اور 2 بار 200 پلس سکور کیا جس سے ظاہر ہوتا ہے کہ اے بی لمبی اننگز کھیلنے میں بہت زیادہ کامیاب نہیں ہو سکا۔ اسے اس کیٹیگری میں 15 پوائنٹس ملتے ہیں۔ اے بی ایک خوف کا نام ہے۔ جب تک وہ وکٹ پر موجود ہو مخالف ٹیم جیت کا سوچ بھی نہیں سکتی۔ اس کی بطور وکٹ کیپر اوسط 57 کی ہے جو ظاہر کرتا ہے کہ وہ مشکل اور زیادہ ذمہ داری کے وقت پہلے سے بھی بہتر پرفارم کرتا ہے۔ اس کی میچ کی تیسری اور چوتھی اننگز میں اوسط بھی 45 سے زیادہ ہے۔ اس لیے پریشر کی کیٹیگری میں اسے 23 پوائنٹس ملتے ہیں۔ اس کے مجموعی پوائنٹس کی تعداد 84 بنتی ہے۔

ہاشم آملہ
ایک بار شعیب اختر نے یہ کہا تھا کہ آملہ کو آؤٹ کرنے کا صرف ایک ہی طریقہ ہے اور وہ یہ کہ اس سے ہی پوچھ لیا جائے کی بھئی تمہیں کہاں پر گیند کرائیں. آملہ ساؤتھ افریقہ کی رنز مشین ہے۔ اس کی ٹیسٹ اوسط 51 کی ہے۔ اوسط میں اسے 16 پوائنٹس ملتے ہیں۔ وہ ہر ٹیم کے خلاف بےرحمی سے پیش آیا مگر اسے پاکستان، ویسٹ انڈیز اور بنگلہ دیش کی سلو وکٹوں نے بہت تنگ کیا۔ وہ ان ملکوں میں 30 کی اوسط سے بھی نہیں کھیل سکا۔ اسے مختلف ممالک میں اور مختلف ممالک کے خلاف کارکردگی میں بالترتیب 12 اور 18 پوائنٹس ملتے ہیں۔ آملہ لمبی دوڑ کا کھلاڑی ہے۔ اگر وہ سیٹ ہو جائے تو پھر مخالف ٹیم اننگز ڈیکلیئر ہونے کا ہی انتظار کرتی ہے۔ اس نے 96 میچز میں 25 سنچریاں، 3 بار 150 پلس، 2 بار 200 پلس اور ایک ٹرپل سنچری بھی سکور کی۔ اسے ا س کیٹیگری میں 18 پوائنٹس ملتے ہیں۔ اس کی بطور کپتان بیٹنگ اوسط میں تھوڑی سی کمی ہوئی ہے۔ میچ کی تیسری اننگز میں اس کی اوسط نہایت شاندار 65 کی ہے مگر چوتھی اننگز میں اوسط کافی کم 35 کی ہے. انڈر پریشر کھیلنے میں آملہ کا ریکارڈ زیادہ امپریسو نہیں۔ اسے اس کیٹیگری میں 10 پوائنٹس ملتے ہیں۔ اس کے مجموعی پوائنٹس کی تعداد 74 بنتی ہے۔

سٹیو سمتھ
اسمتھ آسٹریلیا کا کپتان ہے اور بہت نوجوانی میں ہی اسے یہ ذمہ داری سونپ دی گئی تھی۔ اس کی اوسط 58 کی ہے جو موجودہ دور کے کھلاڑیوں میں سب سے زیادہ ہے۔ اوسط میں اسے 23 پوانٹ ملتے ہیں۔ سمتھ کی یہ خوبی بھی اسے دوسرے تمام نان ایشین کھلاڑیوں سے ممتاز کرتی ہے کہ وہ ہر طرح کی پچ پر کھیل سکتا ہے۔ اس کی تمام آٹھ ممالک میں 40 پلس کی اوسط ہے۔ ایشیا میں بھی اوسط 41 رہی۔ اس لیے مختلف ممالک میں کھیلنے کی کیٹیگری میں اسے 17 پوائنٹس ملتے ہیں۔ کوئی بھی ٹیم سمتھ کے بلے کے سامنے بند باندھنے میں کامیاب نہیں ہو سکی۔ اس نے تمام ٹیموں کے خلاف 40 سے زیادہ کی اوسط سے بیٹنگ کی سوائے پاکستان کے۔ اس لیے اسے اس کیٹیگری میں 16 پوائنٹس ملتے ہیں۔ سمتھ نے 44 میچز میں 15 سنچریاں، 3 بار 150 پلس اور 1 بار 200 پلس رنز کیے۔اس لحاظ سے اسے 20 پوائنٹس ملتے ہیں۔ سمتھ کا انڈر پریشر پرفارم کرنے کا ریکارڈ بہت ہی شاندار ہے۔ اس نے بطور کپتان 47 کی اوسط سے بیٹنگ کی۔ ایشیز سیریز میں کئی انڈر پریشر اننگز کھیلیں۔ جیتنے والے میچز میں اس کی اوسط 81 کی رہی جو ناقابل یقین ہے مگر میچ کی تیسری اور چوتھی اننگز میں اس کی اوسط 40 سے کم رہی جو سمتھ کے ریکارڈ کا واحد منفی پوائنٹ ہے۔ اس لحاظ سے اسے15 پوائنٹس ملتے ہیں۔ کل پوائنٹ 96 بنتے ہیں۔

جو روٹ
جو روٹ انگلینڈ کی بیٹنگ لائن اپ کی ریڑھ کی ہڈی سمجھا جاتا ہے۔ وہ بلاشبہ پچھلے 20 سال میں انگلینڈ کا بہترین ٹیسٹ بیٹسمین ہے۔ پاکستان کے خلاف حالیہ سیریز میں الیسٹر کک اور جو روٹ کے آؤٹ ہونے کے ساتھ ہی پاکستانی قوم یہ سمجھنے لگ جاتی تھی کہ انگلینڈ آل آؤٹ ہو گئی ہے، وہ الگ بات ہے کہ ہر دفعہ ہی بیرسٹو اور معین علی ہمیں جھٹکا لگا دیتے تھے۔ جو روٹ کی ٹیسٹ اوسط 55 کی ہے جو کہ نہایت شاندار ہے۔ اوسط میں اسے 20 پوائنٹس ملتے ہیں۔ روٹ سیم بال کو اچھا کھیلتا ہے۔ اس کی انگلینڈ اور جنوبی افریقہ مین اوسط 55 کی ہے۔ وہ اسپین باؤلرز کو کھیلنے والا انگلینڈ کا بہترین کھلاڑی ہے۔ اس کی ایشیا اور ویسٹ انڈیز میں بھی اوسط 55 سے زائد ہے مگر روٹ کے لیے باؤنسی وکٹ پر کھیلنا محال ہو جاتا ہے۔ یہی وجہ ہے کہ اس کی آسٹریلیا اور نیوزی لینڈ میں اوسط 20 کے قریب ہے۔ اسے مختلف ممالک میں کھیلنے کی کیٹیگری میں 17 پوائنٹس ملتے ہیں۔ روٹ نے تمام ممالک کے خلاف اچھی کارکردگی دکھائی ہے۔ اس کی سب سے کم اوسط نیوزی لینڈ کے خلاف 40 کی ہے۔ اس شاندار کارکردگی پر روٹ کو مختلف ممالک کے خلاف کارکردگی میں 22 پوائنٹس ملتے ہیں۔ روٹ نے 46 میچز میں 10 سنچریاں سکور کی ہیں جو اس کے معیار سے کافی کم ہیں۔ اس نے 3 بار 150 پلس، ایک بار 200 پلس اور 1 بار 250 پلس سکور کیا۔ اس لحاظ سے اسے لمبی اننگز کھیلنے کی صلاحیت میں 16 پوائنٹس ملتے ہیں۔ روٹ نے یواے ای میں پاکستان، ایشیز میں آسٹریلیا اور دورہ بھارت میں کئی انڈر پریشر اننگز کھیلیں۔ اس کی میچ کی تیسری اور چوتھی اننگز میں بھی اوسط 40 سے زیادہ ہے، جیتنے والے میچز میں اس کی اوسط ناقابل یقین یعنی 82 کی ہے۔اس لیے اسے پریشر میں کھیلنے کی کیٹیگری میں19 پوائنٹس ملتے ہیں۔ روٹ کے کل پوائنٹ94 بنتے ہیں۔

کین ولیمسن
ولیمسن صرف 25 سال کی عمر میں بطور بیٹسمین وہ کچھ حاصل کر چکا ہے جو کوئی اور نیوزی لینڈ کا بیٹسمین حاصل نہیں کر سکا۔ وہ پہلا نیوزی لینڈ ہے جس کی ٹیسٹ اوسط 50 کی ہے۔ اس لے اسے اوسط میں 15 پوائنٹس ملتے ہیں۔ کین ولیمسن کی کارکردگی میں ایک قابل تنقید بات اس کی بھارت، جنوبی افریقہ اور انگلینڈ میں 35 سے بھی کم کی اوسط ہے۔ اس وجہ سے اس کی ان ممالک کے خلاف مجموعی اوسط بھی 35 سے کم ہے، البتہ کین ولیمسن ہر ٹیم کے خلاف سنچری اسکور کر چکا ہے۔ اس لیے اسے مختلف ممالک میں اور مختلف ممالک کے خلاف کارکردگی میں بالترتیب 13، 15 پوائنٹس ملتے ہیں۔ اس نے 54 میچز میں 14 سنچریاں سکور کیں، 3 بار 150 پلس اور صرف 1 بار ڈبل سنچری اسکور کی۔ اس سے ظاہر ہوتا ہے کہ اس نے اپنے کیرئیر میں کوئی زیادہ لمبی اننگز نہیں کھیلیں۔ اس کیٹیگری میں اسے 10 پوائنٹس ملتے ہیں۔ کین ولیمسن اننگز کو سنبھال کر چلنے والا کھلاڑی ہے۔ اس کی بھی دوسرے تمام عظیم کھلاڑیوں کی طرح پریشر میں کھیلنے کی صلاحیت شاندار ہے۔ اس نے بطور کپتان 61 کی اچھی اوسط سے بیٹنگ کی۔ میچ کی تیسری اور چوتھی اننگز میں اس کی اوسط 50 کے قریب ہے۔ فتوحات میں کین کی اوسط 82 کی ہے۔ ہر لحاظ سے کین ایک میچ ونر اور انڈر پریشر پرفار کرنے والا کھلاڑی ہے۔ اسے اس کیٹیگری میں 20 پوائنٹس ملتے ہیں۔ کین کے مجموعی پوائنٹس کی تعداد 73 بنتی ہے۔

یونس خان
یونس خان اعداد و شمار کے لحاظ سے پاکستان کے سب سے کامیاب ٹیسٹ بیٹسمین ہیں، اسی وجہ سے آئی سی سی نے اسے کنگ خان کا خطاب بھی دیا، البتہ بہت سے تجزیہ نگار اور سابق کرکٹرز اب بھی اسے جاوید میانداد، ظہیر عباس اور انضمام الحق سے کمتر کھلاڑی سمجھتے ہیں۔ ایسا کیوں ہے اس کی وجہ شاید وہ بھی نہیں جانتے۔ یونس کی پاکستان کی تاریخ میں سب سے زیادہ یعنی 53 کی ٹیسٹ اوسط ہے۔ اوسط میں اسے 18 پوائنٹس ملتے ہیں۔ وہ تمام ممالک میں سنچری اسکور کر چکا ہے سوائے آسٹریلیا کے۔ اس کی ویسٹ انڈیز کے علاوہ تمام ممالک میں اوسط 40 سے زیادہ ہے۔ وہ تمام ممالک کے خلاف سنچری سکور کرنے والا واحد پاکستانی کھلاڑی ہے۔ اس کی کسی ٹیم کے خلاف اوسط 40 سے کم نہیں۔ اس لحاظ سے اسے مختلف ممالک میں اور مختلف ممالک کے خلاف کارکردگی پر بالترتیب 18 اور 22 پوائنٹس ملتے ہیں۔ وہ لمبی اننگز کھیلنے کا ماہر ہے۔ آپ ٹیسٹ میچ کے دوران جب بھی ٹی وی آن کریں گے آپ کو یونس کھیلتا ہوا نظر آئے گا۔ اس نے 108 میچز میں 30 سنچریاں، 6 بار 150 پلس، 4 بار 200 پلس، 1 بار 250 پلس اور ایک بار ٹرپل سنچری بھی اسکور کر چکا ہے۔ اس لیے لمبی اننگز کھیلنے میں اسے 20 پوائنٹس ملتے ہیں۔ اس کی ٹیسٹ کی چوتھی اننگز میں سب سے زیادہ اوسط، سب سے زیادہ سنچریاں ہیں، اس کی بطور کپتان اوسط 55 کی رہی جو کہ اچھی اوسط ہے۔ جن میچز میں پاکستان فتح یاب ہوا ان میں بھی اس کی اوسط 76 کی ہے۔ اس لحاظ سے یونس ٹیسٹ میچز میں پریشر کی صورتحال میں کھیلنے کا ماہر ہے۔ اس لیے اسے اس کیٹیگری میں 20 پوائنٹس ملتے ہیں۔ یونس کے کل پوائنٹس کی تعداد 99 بنتی ہے۔

پچھلے دنوں پاکستانی کرکٹ کے سب سے چہیتے آل راؤنڈر شاہد آفریدی اور ماضی میں پاکستان کے بہت بڑے بلے باز جاوید میانداد کی آپس میں نوک جھونک ہوئی تھی۔ ٹی وی چینلز نے خوب بڑھا چڑھا کر پیش کیا، دونوں طرف سے جو تیر چل رہے تھے، ان کی سطح گرتی جا رہی تھی۔ میانداد ذاتی تبصرہ تک کرنے لگے تھے۔ پھر خبر آئی کہ کچھ سینئر پاکستانی کرکٹرز کے بیچ بچاؤ کے بعد معاملہ نمٹ گیا۔ لیکن اب پتہ چلا ہے کہ یہ معاملہ بیچ بچاؤ سے نہیں، دھمکی سے سےٹالا گیا ہے، اور یہ دھمکی آفریدی کو دی تھی دنیائے انڈر ورلڈ کے جانے پہچانے ڈان داؤد ابراہیم نے جو میانداد کے قریبی رشتہ دار بھی بتائے جاتے ہیں۔ معروف بھارتی ویب سائٹ سیاست ڈاٹ کام، کے مطابق 12 اکتوبر کو داؤد ابراہیم نے شاہد آفریدی کو دھمکی دے کر معاملہ رفع دفع کرنےاور بدلے میں کچھ مراعات کا تقاضا کیا۔ اب آپ اسے بھتہ سمجھ لیں یا دوستی کی ضمانت، یہ آپ پر ہے۔

پاکستان کےان دو نامی گرامی ہستیوں کے درمیان کافی عرصے سے چكچك مچی ہوئی تھی۔ کیونکہ جاوید میانداد نے پوچھ لیا تھا کہ آفریدی ریٹائرمنٹ کب لوگے۔ ان دونوں کی یہ جنگ بہت خطرناک موڑ پر اس وقت پہنچ گئی تھی جب میانداد نے آفریدی پربہت بڑا الزام لگایا تھا کہ آفریدی ایسا پیسہ کمانے کے لیے کر رہے ہیں۔ اور اس وجہ سے وہ اس عمر میں بھی کرکٹ کھیلنا نہیں چھوڑ رہے ہیں۔ صرف یہی نہیں بلکہ میانداد نے آفریدی پر میچ فکسنگ کا الزام بھی لگایا تھا اور یہ بھی کہا تھا کہ ایسے کئی معاملات کی معلومات رکھتے ہیں۔ میانداد نے ایک پاکستانی نیوز چینل سے بات چیت میں کہا تھا کہ شاہد آفریدی اپنے بچوں کی قسم کھا کر کہیں کہ انہوں نے پاکستان کے میچ فکس نہیں کیے ہیں اور پاکستان کی عزت کو نیلام نہیں کیا ہے۔ اور یہ کہ میں گواہ ہوں، میں نے انہیں پکڑا ہے، میں نے پوری ٹیم کو پکڑا تھا۔ یہ لوگ میچ فکس کرنے والے تھے، اس لیے پیسوں کے بارے میں بات کرتے تھے۔

اس کے بعد آفریدی میانداد کے خلاف قانونی ایکشن لینے والے تھے۔ سارے الزامات کے بعد شاہد نے میڈیا سے کہا تھا کہ میانداد کا پیسوں کو لے کر ہمیشہ ہی لالچ رہا ہے اور ان کو وہ ثبوت چاہییں جن کے لیے وہ کہہ رہے ہیں کہ کھلاڑی میچ فکسنگ میں پھنسے ہوئے ہیں. اگرچہ بہت سے سینئر پاکستانی کھلاڑیوں نے اس مڈ بھیڑ کو بند کروانے کے لیے دونوں کے درمیان دخل دیا تھا، جن میں عمران خان اور وسیم اکرم بھی شامل تھے۔ ہفتہ کو دونوں رنجشیں دور کرنے کے لیے ایک دوست کے گھر پر ملے۔ اس میٹنگ کی ویڈیو میں دونوں ایک دوسرے کو مٹھائیاں پیش کرتے ہوئے نظر آ رہے ہیں۔ شاہد آفریدی نے کہا کہ جب سے میانداد نے اپنے کہے الفاظ واپس لیے ہیں، سب ٹھیک ہے۔ شاہد کے میانداد کے لیے لفظ تھے، میں آپ سے مل کر خوش ہوں، میں کبھی نہیں چاہتا تھا کہ آپ مجھے سوری بولیں کیونکہ آپ مجھ سے بڑے ہیں۔آپ نے اپنی کہی بات واپس لے لی ہے یہی میرے لیے کافی ہے۔ میں نے بھی ان ساری چیزوں کے لیے دکھی ہوں جو میں نے کہیں، انہوں نے شاید آپ کو دکھ پہنچایا ہو۔

مگر اس دو ہفتہ کے اتار چڑھاؤ سے پاکستان کی جو جگ ہنسائی ہوئی، پاکستان کے بارے میں باہر کے میڈیا نے جو زہر اگلا اور اس سے پاکستان کے تشخص پر جو منفی اثر پڑا اس کی ذمہ داری کون لے گا؟۔ کیا یہ دونوں بڑے لیجنڈ اس مثبت امیج، جو ان دونوں نے کئی سالوں کی محنت سے بنایا تھا، کو نقصان پہنچانے کا مداوا کرسکیں گے؟ ان کی آپسی رنجشیں جو بھی تھیں لیکن انھیں بیچ چوراہے لانے کی کیا ضرورت تھی، اس کے بعد پاکستان کرکٹ پر باہر کے لوگوں نے جو انگلیاں اٹھائیں اس کا جواب کون دے گا؟

میڈیا نے بھی اس معاملے میں منفی کردار ادا کیا. میڈیا ہر چھوٹی بڑی بات کو خبر کی زینت بناتا دیتا ہے، وہ ایسے معاملات کو دنیا کے سامنے لانے سے پہلے ایک منٹ کے لیے کیوں نہیں سوچتے کہ اس خبر سے پاکستان اور پاکستانیوں کو بحیثیت قوم کس ہزیمت کا سامنا کرنا پڑ گا؟ آخر کب ہم بحیثیت قوم ایک اجتماعی سوچ کو لے کر چلنے والے بنیں گے، جہاں ہم کوئی بھی بات کسی بھی مسئلے پر بولنے اور اس کی بےجا تشہیر کرنے سے پہلے اپنی قومی کردار ، قومی تشخص اور اور اپنی قومی عزت و آبرو کو اپنے ذاتی سوچ اور فائدے سے بڑھ کر مانیں گے۔

محرم کے پہلےدس دنوں میں عام طور پر لوگ دوسری مصروفیات کو کم یا ترک کرکے مجالس، جلوس میں شرکت اور واقعہ کربلا پر بات کر رہے ہوتے ہیں، ایسے میں سیاسی مصروفیات بھی بہت کم ہوجاتی ہیں، ایسا ہی اس سال بھی ہوا اور خاص کر6 محرم کے بعد سےسیاسی بیانات نہ ہونے کے برابر رہ گئے۔ اس اثنا میں پاکستانی میڈیا نے پاکستان کے دو نامور کرکٹ کے کھلاڑیوں جاوید میانداد اور شاہد آفریدی کےآپس میں الجھ جانے کا پورا پورا فائدہ اٹھایا اور اس خبر کو لیڈ نیوز بنائے رکھا۔ میانداد اور آفریدی کے آمنے سامنے آنے کا پس منظر یہ تھا کہ ایک کتاب کی تقریب رونمائی کے دوران میڈیا کے نمائندوں نے شاہدآفریدی سے یہ سوال کیا کہ جاوید میانداد کا کہنا ہے کہ آپ پیسوں کے لیے اپنا الوداعی میچ چاہتے ہیں جس پر شاہد آفریدی نے جواب دیتے ہوئے کہا کہ جاوید میانداد کو ساری زندگی پیسوں کا مسئلہ رہا ہے۔ شاہد آفریدی کا کہنا تھا کہ اتنے بڑے کرکٹر کو ایسی چھوٹی بات نہیں کرنی چاہیےتھی۔ یہی فرق عمران خان اور جاوید میانداد میں تھا۔ شاہد آفریدی کے اس بیان کے بعد جاوید میانداد نے ایک نجی ٹی وی چینل پر شاہد آفریدی پر تنقید کرتے ہوئے مبینہ طور پر ان پر میچ فکسنگ میں ملوث ہونے کا الزام بھی عائد کردیا۔ ان کا کہنا تھا کہ آفریدی اپنی بیٹیوں کے سر پر ہاتھ رکھ کر کہیں کہ انہوں نے میچ نہیں بیچے۔

یہ بات سمجھ میں نہیں آتی کہ جاوید میانداد جو پاکستان کے بہت سینئر اور لیجنڈ کرکٹر ہیں، اپنے سے بہت جونیئر شاہدآفریدی کے بہت زیادہ خلاف کیوں ہیں۔ مثلاً شاہد آفریدی نے بھارت میں ہونے والے 2016ء کے ورلڈ کپ ٹی 20 میں کولکتہ میچ سے پہلے ایک پریس کانفرنس کی اور ایک سوال کے جواب میں ان کا کہنا تھا کہ ہندوستان کے لوگوں سے ہمیں بہت پیار ملا ہے اور اتنا پیار تو ہمیں پاکستان میں بھی نہیں ملا جتنا یہاں ملا۔ یہ ایک طرح کا سفارتی بیان تھا لیکن اس بیان پر انہیں پاکستان بھر میں شدید تنقید کا نشانہ بنایا گیا تھا، ایسا نہیں کہ سب نے ان کی مخالفت کی ہو، لیکن سب سے زیادہ افسوس ناک تبصرہ جاوید میانداد کا ہی تھا، جس میں انہوں نے شاہد آفریدی کے بیان کی مذمت کی تھی۔ انہوں ٹی وی شو میں بیٹھ کر شاہد آفریدی کو لعنت بھی دکھائی۔ ان کا کہنا تھا کہ شاہد آفریدی کے بیان سے انھیں صدمہ اور تکلیف پہنچی ہے۔ سابق پاکستانی کپتان اور موجودہ سیاستدان عمران خان نےایک بھارتی ٹی وی چینل کو انٹرویو دیتے ہوئے کہا کہ وہ جاوید میانداد کے بیان سے اتفاق نہیں کرتے۔ جاوید میانداد ایک کرکٹر رہے ہیں، سیاست دان نہیں لہذا ان کو شاہد آفریدی اور کھلاڑیوں کی کارکردگی پر بولنا چاہیے تھا۔

جاویدمیانداد کے شاہد آفریدی پر میچ فکسنگ کے الزام کے بعد شاہدآفریدی نےجاوید میانداد کے بیان پر وکلا سے مشاورت کے بعد قانونی کارروائی کا فیصلہ کیا ہے۔ آفریدی نے سوشل میڈیا پر پیغام دیا کہ جاوید میانداد کے ذاتی حملے کافی عرصہ برداشت کیے لیکن ہر کسی کی برداشت کی ایک حد ہوتی ہے۔ آفریدی کا کہنا تھا کہ جو کچھ ہوا اس پر افسوس ہے لیکن میانداد کے رویے پر ان کا ردعمل فطری تھا۔ کرکٹ کے سابق کھلاڑیوں کا کہنا ہے کہ شاہدآفریدی کو اپنی پوزیشن کلیئر کرنے کےلیے لازمی عدالت میں جانا چاہیے۔ جاویدمیانداد اور شاہد آفریدی کے درمیان الفاظ کی جنگ کے دوران پی سی بی کے سابق چیئرمین جنرل توقیر ضیاء اور سابق کپتان وسیم اکرم نے دونوں کے درمیان مصحالت کرانے کی کوشش کی تھی۔ ان تمام حالات کے بعد جاوید میانداد کی طرف سے ایک بیان دیا گیا جس میں ان کا کہنا تھا کہ شاہدآفریدی میرے ہاتھوں ہی پروان چڑھا ہے،اس کے بیان نے میرا دل بہت دکھایا ہے، پھر بھی بڑا ہونے کے ناطے میں نے شاہدآفریدی کو معاف کر دیا ہے۔

جاوید میانداد کے اس بیان کے بعد شاہدآفریدی کا ٹوئٹر پر کہنا تھا کہ اپنے ملک کے لیے کھیلنا ان کے لیے اعزاز کی بات ہے اور وہ کبھی اپنے ملک کو نہیں بیچ سکتے۔ جاوید میانداد کے الزامات سے انہیں، ان کے گھر والوں اور پرستاروں کو تکلیف پہنچی ہے۔ ان کے دل میں جاوید میانداد کی بہت عزت ہے، جاوید میانداد نے انہیں معاف کر دیا ہے جس پر وہ ان کے شکر گزار ہیں، لیکن اگر انہوں نے اپنا الزام واپس نہ لیا تو وہ خود کو کلیئر کرانے کے لیے عدالت جائیں گے۔ آفریدی کی طرف سے الزامات واپس لینے کے مطالبے پر جاوید میانداد نے ایک انٹرویو میں کہا ہے کہ ابھی کسی معاملے پر تبصرہ کرنا نہیں چاہتا تاہم کسی سے ڈرنے والا نہیں اور اگر شاہد آفریدی کی جانب سے میچ فکسنگ الزامات پر نوٹس ملا تو اس کا ضرور جواب دوں‌گا۔ جبکہ ایک اخبار نے اپنی ویب سائٹ پر ایک سروے میں ایک سوال پوچھا تھا کہ کیا میانداد کی جانب سے آفریدی پرلگایا جانے والا میچ فکسنگ کا الزام درست ہے؟۔ اس سروے میں جواب ہاں یا نہیں میں دینا تھا، جس کے جواب لوگوں کی ایک معقول تعداد نے دیے۔ رزلٹ کے مطابق 71 فیصد لوگوں نے شاہد آفریدی کی حمایت کی اور نہیں میں جواب دیا جبکہ 29 فیصد کا جواب جاوید میانداد کے حق میں ہاں تھا۔

پاکستان کرکٹ بورڈ کے چیئرمین شہریار خان نے اس سال ہونے والے ورلڈ ٹی ٹوئنٹی سے پہلے واضح طور پر کہا تھا کہ شاہد آفریدی کو ٹی ٹوئنٹی ٹیم کی قیادت صرف اس شرط پر سونپی گئی تھی کہ وہ ورلڈ ٹی ٹوئنٹی کے بعد بین الاقوامی کرکٹ کو خیرباد کہہ دیں گے۔ جبکہ شاہد آفریدی نے بھی اس سال بھارت میں ہونے والے ورلڈ ٹی ٹوئنٹی کے بعد بین الاقوامی کرکٹ کو خیرباد کہنے کا اعلان کیا تھا لیکن بعد میں انھوں نے ایک بیان میں اپنی کرکٹ جاری رکھنے کی خواہش ظاہر کر دی تھی۔ کرکٹ کے بعض مبصرین کا یہ کہنا ہے کہ شاہد آفریدی اپنی ریٹائرمنٹ کے بارے میں مسلسل بیانات تبدیل کرتے رہے ہیں جس کی وجہ سے پاکستان کرکٹ بورڈ ان سے خوش نہیں ہے۔ ستمبر 2016ء کے بیچ میں پاکستانی میڈیا کے حوالے سے شاہد آفریدی نے ایک انٹرویو میں کہا تھا کہ یہ تاثر دیا جا رہا ہے کہ بین الاقوامی کرکٹ کو الوداع کہنے کے لیے انھوں نے پاکستان کرکٹ بورڈ سے خود کہا ہے جو بالکل غلط ہے۔

بقول شاہد آفریدی کہ ابھی ان کی کرکٹ ختم نہیں ہوئی ہے تو پاکستان کرکٹ بورڈ کو چاہیے کہ ان کےلیے کسی الوداعی پارٹی کا انتظام نہ کرے، ہوسکتا ہے کہ اگلے چند ماہ کے بعد کرکٹ بورڈ کو ان کی ضرورت ہو جبکہ شاید آفریدی ایک اچھا میچ کھیل کر ریٹائرمنٹ لینا چاہتے ہیں۔ پاکستان کرکٹ بورڈ کو بھی سوچنا چاہیے کہ شاہد آفریدی 98 ٹی ٹوئنٹی انٹرنیشنل میں97 وکٹیں حاصل کرچکے ہیں اور انہیں ٹی ٹوئنٹی انٹرنیشنل میں وکٹوں کی سنچری مکمل کرنے والا پہلا بولر بننے کے لیے صرف تین وکٹیں درکار ہیں، اگر شاہد آفریدی کا یہ ریکارڈ بنتا ہے تو یہ پاکستان کا بھی ریکارڈ ہوگا۔ کم از کم اس ریکارڈ کو حاصل کرنے کے لیے ہی حال ہی میں متحدہ عرب امارات میں پاکستان اور ویسٹ انڈیز کے درمیان ہونے والی ٹی ٹوئنٹی سیریز میں شاہد آفریدی کو چانس دینا چاہیے تھا۔

آخر میں اپنے دونوں مایہ ناز کھلاڑیوں جاوید میانداد اور شاہد آفریدی سے یہ درخواست ہے کہ اپنے آپس کے اختلافات کو ختم کریں، کیونکہ آپ دونوں جو اس وقت ایک دوسرے خلاف بیانات دے رہے ہیں، اس سے صرف اور صرف پاکستان کی بدنامی ہو رہی ہے۔ اگر دونوں اپنے آپ کو صحیح سمجھتے ہیں تو عدالت کا رخ کریں اور میڈیا میں ایک دوسرے کے خلاف بیان بازی نہ کریں۔