Category: نئے لکھاری

آج کل ہر ایک ناصح برائے دیگراں بنا ہوا ہے، لوگ خود تو نیک عمل کرتے نہیں، البتہ دوسروں کو نصیحت کرنے میں تیزی دکھاتے رہتے ہیں. زبانی تبلیغ کار بےخیر ہے کیونکہ صرف قول مؤثرنہیں ہوتا، کردار اصل اور مؤثر قوت ہے، لہذا ہر شخص پر لازم ہے کہ وہ اسلامی معاشرت، اسلامی عقائد اور اسلامی افکار کا علم حاصل کرے اور پھر اس کا عملی نمونہ بن جائے۔

اسلام کی بنیاد علم پر ہے، اس لیے پہلی اور فوری ضرور علم حاصل کرنا ہے اور یہ ایک مسلمان کے لیے فریضہ ہے.
علمائے کرام کو چاہیے کہ وہ بنیادی دینی علوم جو انسان کی روزمرہ کی زندگی کے لیے ضروری ہیں، ان کو اتنا عام اور سہل الحصول بنا دیاجائے کہ کوئی بھی مسلمان دین سے نا آشنا نہ رہے. ضروری نہیں کہ ہر مسلمان کو بھر پور معلومات ہونی چاہیے، صرف اتنا علم جس سے اس کی زندگی اسلام کے مطابق ڈھل جائے، اگر کوئی کسی دینی معاملےمیں مشکل کا شکار ہے تو اس کو چاہیے کہ علمائے دین سے رابطہ کرے۔

اس کے ساتھ ضرورت ہے کہ مسلمانوں میں دین کے علم کی لگن پیدا کی جائے تاکہ وہ دینی علوم کو سیکھیں. دور حاضر میں والدین بچوں کو دنیاوی علوم کی بلندیوں پر تو پہنچا رہے ہیں، اگرچہ کسی حد تک یہ بھی ضروری ہیں، لیکن وہ دینی علوم جو انسان کو حقیقی معنوں میں انسان بناتے ہیں، عموما والدین خود بھی ان سے ناآشنا ہوتے ہیں اور اولاد بھی ناآشنا رہتی ہے.

ہم حیران ہوتے ہیں کہ مسلمان دن بدن پستی کی طرف جار ہا ہے اور سوال کرتے ہیں کہ ایسا کیوں ہو رہا ہے؟ اس لیے کہ زندگی گزارنے کا جو نظام اس کو اسلام نے دیا ہے، وہ اس کو جانتا ہی نہیں۔ اگر والدین ہیں تو کما حقہ اولاد کے حقوق نہیں جانتے، اوراگر اولاد ہے تو اسے والدین کے حقوق معلوم نہیں۔ الغرض معاشرے کے افراد اسلامی نظام زندگی سے بےخبر اور مقصد سے عاری ہیں۔ خدارا اپنے آپ کو اور اپنی نسلوں کو اسلامی نظام کے نفاذ کے لیے پیش کریں اور دل کے اندر اسلامی نظام کے نفاذ کے لیے لگن پیدا کریں۔ جب دل میں یہ لگن پیدا ہو جائے گی تو یقینا آپ علمائے دین سے رجوع کریں گے، جب ایک مسلمان دینی تقاضوں سے آگاہ ہو جائے گا تو اس کا اطلاق وہ اپنی عملی زندگی پر کرنے کے قابل ہوگا، اس طرح سے ماحول اور معاشرے میں خود بخود اصلاح کے رجحانات پیدا ہو جائیں گے۔

یہ بات یاد رکھنے کی ہے جب تک ماحول ٹھیک نہیں کیا جائےگا اسلامی نظام کا نفاذ ممکن نہیں، اور ماحول اسی صورت میں سنور سکتا ہے جب پوری قوت اور فرض شناسی سے کام لیا جائے اور اس کی ابتداء سب سے پہلے اپنے گھر سے اور خود سے کی جائے. ہر مسلمان کے لیے یہ لازم ہے کہ اپنے گھر کے امور اور معاملات کو اسلامی تعلیمات کے مطابق ڈھالے۔ حلال رزق کو اپنی زندگی کے لیے لازم جانےاور حرام کی کمائی سے دور بھاگے۔

جب امت کا ہر فرد اس پر عمل کرے گا تو اس طرح سے اسلامی نظام کے نفاذ کی راہ اپنے آپ ہی ہموار ہوتی چلی جائے گی۔ جب مسلمان اچھی طرح دینی رنگ میں ڈھل جائیں گے تو پھر حکومت کا کام معمولی رہ جائے گا۔ اس لیے اسلامی نظام کا نفاذ صرف حکومت کی ذمہ داری نہیں ہے بلکہ امت کے ہر فرد کی ذمہ داری ہے۔

بہت افسوس سے یہ بات کہنا پڑ رہی ہے کہ ہمارے ہاں پڑھے لکھے جاہلوں میں مسلسل اضافہ ہو رہا ہے، اور یہ ان پڑھ جاہلوں سے بھی دو ہاتھ آگے ہیں، اور بد تہذیبی سے باز نہیں آتے ہیں. یوں تو گھروں سے حصولِ علم کے لیے نکلتے ہیں مگر نکلتے ہی عوامی املاک کا نقصان کرنا شروع کر دیتے ہیں، مثال کے طور پر اگر ڈرائیور نے بس نہ روکی تو اس کے شیشے توڑ دیے تو کبھی ڈرائیور پیٹ ڈالا. یہ کہاں کا انصاف ہے. زیادہ مسئلہ ہے تو اپنا بندوبست کر کے گھروں سے نکلیں، بسیں اور ڈرائیور حضرات آپ کی جاگیر تو نہیں ہے. آج اجتماع پر جانے کے لیے نکلے تو راستے میں دو دفعہ یہ واقعہ پیش آیا. پڑھنے جانے والے ”جاہلوں“ نے بس غنڈہ گردی سے روکنے کی کوشش کی حالانکہ بس پر تبلیغی اجتماع کا بینر بھی آویزاں تھا. عقل کے کوروں نے بس پر پتھر بھی جڑ دیا.

روز اخبارات میں ایسی خبریں پڑھنے کو ملتی ہیں کہ آج طالب علموں نے بس پر بیٹھنے نہ دینے کی وجہ سے بس میں توڑ پھوڑ کی. جہاں ڈرائیور کا داؤ لگتا ہے، وہاں وہ کام دکھا دیتے ہیں. یوں جھگڑے بڑھتے جاتے ہیں.
بعض اوقات تو طلبہ سڑک کے درمیان میں آ جاتے ہیں اور حادثات کا سبب بن جاتے ہیں اور سارے کا سارا قصور غریب ڈرائیور کا بن جاتا ہے کہ وہ تیز چلا رہا تھا. بندہ پوچھے سڑک کے درمیان آخر آتے کیوں ہیں.
اس سوچ کے ساتھ مستقبل قریب میں ایسے طلبہ ملک کی ترقی کا کیسے حصہ بنیں گے؟ اچھے طریقے سے علم حاصل کریں اور اس ملک کی شان بڑھائیں. اپنی حالت نہیں بدلیں گے تو ملک کی کیسے بدلے گی.

حکومت سے التماس ہے کہ میٹرو اور موٹرویز سے کچھ توجہ ہٹا کر ان پر بھی نظر کرم کر دیجیے. ان کے لیے الگ روٹ اور بسوں کا سسٹم چلا دیجیے، آپ کو ادھر سے بھی ٹھیکوں اور بسوں کی خریداری میں سے کچھ بچ ہی جائے گا. فارن کنٹریز میں طالب علموں کو طرح طرح کی سہولیات میسر ہیں اور وطن عزیز میں ٹرانسپورٹ کا ہی کوئی پراپر نظام موجود نہیں ہے. حکومت کو اس جانب فوری توجہ دینی چاہیے.

سارہ صبح سے لگی ہوئی ہو، اپنے کمرے کی صفائی تک تم سے نہیں ہوتی، آپی تمہاری دو دن کے لیے آئی ہے، بجائے آرام دینے کے ان سے ہی پورا گھر صاف کرواؤگی. امی نے اچھا خاصا جھاڑ دیا.
امی کر تو رہی ہوں، اپنے کمرے کی صفائی میں لگے ہوئے دیکھ ہی نہیں پائی کہ آپی لاؤنج اور کچن کی صفائی کے بعد کھانا پکانے میں مصروف ہیں، اور میرا حال یہ تھا کہ ایک اپنے کمرے کی صفائی میں آدھا دن گزار دیا، امی کے ڈانٹنے پر احساس ہوا کہ جاکر ان کا ہاتھ ہی بٹا لوں، کچن جاکر دیکھا تو دل باغ باغ ہو گیا، آپی نے تو کھانا پکانے کے ساتھ کچن بھی چمکا دیا تھا، آپی! یہ آپ کیا پڑھتی رہتی ہیں اور کون سی جادو کی چھڑی ہے جو گھماتی ہیں تو جھٹ سے سارے کام ہو جاتے ہیں.

سارہ! پہلے میں بھی تمہاری طرح سارا دن کام میں گزار دیتی تھی، پر کام ختم ہونے کا نام ہی نہیں لیتا تھا، چلو فریش ہو لیں بعد میں سکون سے بیٹھ کر بتاتی ہوں. تھوڑی دیر بعد دونوں بہنیں ساتھ بیٹھیں تو آپی نے کہا، اب سنو میں کیسے سارے کام خوش دلی سے بغیر تھکاوٹ کے کرلیتی ہوں، ایک دن میں قرآن پاک کی سورہ الاسراء تلاوت کے دوران اس آیت پر پہنچی
وان من شيء إلا يسبح بحمده ولكن لا تفقھون تسبيحھم؛
ترجمہ اور نہیں ہے کوئی چیز مگر اس کی تعریف کے ساتھ تسبیح بیان کر رہی ہے لیکن تم ان کی تسبیح نہیں سمجھتے.
اس آیت نے مجھ پر سوچ کے نئے در وا کردیے میں پورا دن اس آیت کے پر غور کرتی رہی کہ کائنات کی ہر شے اللہ کی تسبیح بیان کرتی ہے، پھر جب صفائی کرنے لگی تو یوں محسوس ہورہا تھا کہ یہ میز صوفے دیواریں ہر چیز تسبیح کر رہی ہے، اور مجھے لگا ان کو یہ دھول مٹی ناگوار گزر رہی ہوگی، اللہ تبارک و تعالٰی کی تقدیس بیان کرتے ہوئے، اور میرا ہاتھ غیر ارادی ہر چیز کو صاف کرتا گیا یہاں تک کہ کھانا بناتے ہوئے مصالحہ جات کے ڈبوں اور کچن کبینٹ بھی ساتھ ساتھ صاف ہوگئے، اس دن بہت سارا کام کیا اور تھکن بھی محسوس نہیں ہوئی اور جہاں تک تمھارا یہ سوال کہ کام کے وقت کیا پڑھتی رہتی ہیں، تمہیں یاد ہے نا جب خاتون جنت حضرت فاطمہ رضی اللہ عنہا اپنے گھر کے کاموں کے لیے خادمہ کی درخواست کرنے آپ صلی اللہ علیہ و آلہ و سلم کی خدمت اقدس میں تشریف لائیں تو انھوں نے خادمہ کے بجائے ان کو یہ تسبیحات سبحان اللہ 33بار، الحمدللہ33بار، اور اللہ اکبر 34بار پڑھنے کو کہا، اس کے بعد کبھی ان کو پریشانی نہ ہوئی کیونکہ ان کو ایک نسخہ کارگر مل گیا تھا، بالکل اسی طرح میں بھی کام کرتی ہوں تو ساتھ ساتھ یہی کلمات پڑھتی ہوں، کام وقت پر ہوجاتے ہیں، اور مجھے اپنے چڑچڑے پن سے بھی نجات مل گئی.
شکریہ آپی! آپ نے تو میرا مسئلہ ہی حل کردیا. میں نے تو کبھی سوچا ہی نہیں تھا اور اٹھتے ہوئے رخ جھاڑن اٹھانے کی طرف اور نظر کمرے کے کونے کے جالے کی طرف تھا.

اقبال تم اللہ کا شکر ادا کیا کرو کہ تمہیں میرے جیسا مینیجر ملا ہے، تمہیں پتہ ہے آج مجھے تمہاری شکایت ملی ہے،
جی میں آپ کو خود ہی بتانے والا تھا لیکن اس سے پہلے ہی آپ نے مجھے فون کر کے بُلا لیا۔

اقبال میں حیران ہوں کہ لوگ کس طرح کسی کی ایک چھوٹی سی غلطی کو اجاگر کرتے ہیں اور مصیبتوں کا پہاڑ کھڑا کرنے کی کوشش کرتے رہتے ہیں، لیکن جب اللہ پاک کی طرف سے انہیں ڈھیل ملی ہو تو پھر ہم کون ہوتے ہیں اُن کا احتساب کرنے والے، ایسے لوگوں کو اُن کے حال پر چھوڑ دینا چاہیے۔
دو روز پہلے تم میڈیکل کی غرض سے گئے، گزشتہ روز تمہاری گاڑی کا ٹائر پنکچر تھا اور آج تم پھر 20 منٹ دیر سے پہنچے، تمہاری آج کی غلطی کی وجہ سے میں کیسے تمہاری مدد کر سکوں گا۔ جبکہ شکایت لگانے والے کا انداز دیکھو کہ جیسے وہ تمہارا خیرخواہ ہے اور تمہاری بہت فکر کرتا ہے۔

اُس کے الفاظ کچھ یوں تھے کہ

اقبال ایک اچھا لڑکا ہے اور اپنی فیلڈ میں بھی ایک نمایاں حیثیت رکھتا ہے، اس بات میں کوئی شک نہیں کہ اُس میں مذید سیکھنے اور کچھ نیا کرنے کی جستجو بھی ہے اور وہ کوشش بھی کرتا رہتا ہے لیکن یہ کتنی بُری بات ہے کہ وہ ڈیوٹی پر دیر سے پہنچتا ہے، آپ پوچھتے کیوں نہیں اُسے، اُسے سمجھائیے کہ اُس کی یہ عادت اس کے لیے بڑی پریشانی کھڑی کر سکتی ہے، نہ صرف اُس کیلئے بلکہ کل کو آپ کو بھی پوچھنے والے کھڑے ہو جائیں گے، اور آج آپ کو اُسے سبق دینا چاہیے۔

دیکھو اقبال، کس طرح تمہاری ایک غلطی کو تمہاری عادت بنا کر بتایا، یہ اُس کی ڈیوٹی نہیں ہے لیکن خیرخواہی کا ڈھونگ وہ اپنے لیے ہمدردی حاصل کرنے کو اور تمہارے لیے پریشانی کھڑی کرنے کا طریقہ ہے اور مجھے واقعی خوشی ہوتی کہ اگر یہ بات صرف مجھ سے کی گئی ہوتی لیکن یہ بات اور چار چھ لوگوں سے کرنا اور اُن لوگوں سے کرنا جو مجھ سے بھی پوچھنے کی حیثیت رکھتے ہیں، اس بات کا ثبوت ہے کہ یہ خیرخواہی نہیں ہے بلکہ پریشانی پیدا کرنے اور بڑھانے کا طریقہ ہے۔

یہ پروفیشنل لائف ہے اقبال میاں، لوگ معاف نہیں کرتے، بتاتے اور سکھاتے نہیں ہیں، سبق دیتے ہیں، لیکن کبھی تم ایسا نہ کرنا کہ تمہاری وجہ سے کسی کی دل آزاری ہو، اور ایسی باتوں سے پریشان بھی مت ہونا کہ یہ تمہاری مثبت توجہ کو منفی سوچ میں مبذول کرنے واسطے کافی ہوں گی، پہلے سے لگے خط کو مت چھیڑو، نہ مٹانے کی کوشش کرو، کسی کے راستہ میں رکاوٹیں پیدا کرنے میں جتنا ٹائم ضائع کرو گے اگر اتنا ٹائم اپنی بہتری واسطے خرچ کرو تو یقینا تم سیدھے راستہ پر ہو گے اور جلد کامیابی سے ہمکنار ہو پاؤ گے۔ اپنا رستہ تم خوب بنانا جانتے ہو سو اپنے متعین رستے پر چلتے رہو، راہ میں آنے والی رکاوٹیں بہت ہوں گی لیکن بہت سی رکاوٹوں سے سامنا کرنے کے بجائے انہیں نظرانداز کرنا ضروری ہوتا ہے، پر یہ لوگ پتہ نہیں کیوں عمل نہیں کرنا چاہتے ہیں، لیکن اچھائی کو جانتے اور سمجھتے ہوئے بھی عمل نہ کرنا ہی اُن کی تنزلی کا سبب بنتا ہے، اب ہم سکول کالج میں نہیں رہے کہ ہمیں پڑھایا، سکھایا اور بتلایا جائے، پریکٹیکل لائف ہے میاں، پرفیشنل بنو، خود اپنی خامیاں ڈھونڈو اور ان سے چھٹکارا پاؤ۔ ایک چھوٹی سی غلطی ساری محنت پر پانی پھیرنے کے لیے کافی ہوتی ہے۔ کوشش کرو کہ چھوٹی چھوٹی خامیاں دور کرو کہ یہ آنے والے وقت میں بڑی خامیوں اور پریشانیوں کا پیش خیمہ ہوتی ہیں۔ کوشش کرنا چاہیے کہ کسی کو منفی بات کرنے کا موقع میسر نہ ہو سکے۔

سر! اگر میرے رب کی منشا نہ ہو تو کسی کی کیا مجال کہ کچھ کر سکے؟
اور ایک گہری خاموشی کے ساتھ، منہ میں پنسل دبائے مینیجر صاحب مجھے تکتے رہے۔

جوائنٹ فیملی سسٹم میں بہت ساری خرابیاں ہیں .ان سب خرابیوں کو تحریر کرنا ایک مشکل کام ہے. اس لیے اس تحریر میں جوائنٹ فیملی سسٹم کی صرف بڑی بڑی خرابیاں تحریر کروں گی.
‏1. سیاہ و سفید کا مالک صرف اور صرف فیملی کا بڑا ہوتا ہے جو کہ غلط ہے.
‏2. فیملی کا بڑا غلط فیصلہ بھی کرے تو سب کے لیے ماننا لازم ہے.
‏3. بڑے کے کسی غلط فیصلے سے اختلاف کرنے والا باغی شمار ہوتا ہے.
‏4. اگر بڑے کے بچے کسی بھی وجہ سے نہ پڑھ سکیں تو باقی بھائیوں کے بچے بھی نہیں پڑھ سکیں گے.
‏5. شادی کے لیے لڑکا اور لڑکی کی رائے لینے کا کوئی تصور نہیں.
‏6. آپ اپنے بچوں کے چھوٹے چھوٹے خواہشات بھی پورے نہیں کر سکتے.
‏7. بچوں کے بہت سارے حقوق ادا نہیں کیے جاتے.
‏8. سب سے بڑی خرابی یہ کہ اسے اسلامی کہا جاتا ہے مگر یہ کہاں سے اسلامی ہے.

جیسے جیسے وقت گذرتا جارہا ہے تبدیلی کے نت نئے مظاہر سامنے آتے جارہے ہیں، ایک وقت تھا جب انٹینا والے لمبے موبائل کا استعمال کرنا فخریہ کام سمجھا جاتا تھا، لیکن آج ٹیکنالوجی کی ترقی نے ایسے محیر العقول کارناموں کا ڈھیر لگادیا ہے کہ انسانی عقل و فکر کو داد دینی پڑتی ہے، آسائش و وسائل کے ساز و سامان بام عروج کو پہنچ چکے ہیں، انگشت کی معمولی جنبش سے معلومات کا جہاں آباد ہوجاتا ہے، ہر سہولت گھر بیٹھے دستیاب ہوجاتی ہے، لیکن ان تمام مثبت پہلوؤں کے باوجود اس کے منفی اثرات سے نئی نسل محفوظ نہیں رہی۔

نومولود اپنی زندگی کے کچھ ہی بہاریں دیکھ پاتا ہے کہ اس کے ہاتھوں میں سمارٹ فون در آتا ہے، پھر تھوڑے ہی عرصہ میں موبائل، آئی پیڈ، تھری ڈی گیمز وغیرہ بچے کی سوچ و فکر کو ایک مخصوص شکنجے میں جکڑ لیتے ہیں، ایسے بچے عموما واقعاتی دنیا میں خود اعتمادی سے محرومی کا شکار رہتے ہیں اور دنیاوی حقائق کا سینہ تان کر مقابلہ کرنے کی سکت نہیں رکھتے، اپنے ہم جولیوں سے زندگی کی دوڑ میں پیچھے رہ جاتے ہیں، حقائق سے سمجھوتہ خال خال ہی کہیں نظر آئیں گے، اس کے برعکس ہر لمحہ جذباتی اور لمبے خوابوں کا شکار رہتے ہیں، مقصد جلد بازی رومانویت کی نذر ہوجاتا ہے، محنت و کوشش لایعنی جبکہ سستی و کاہلی محبوب ہوجاتے ہیں۔

اس رومانویت پسند کے تناظر میں مختلف کارٹونز کے الگ الگ اثرات ظاہر ہوتے ہیں، ڈوریمون، چھوٹا بیم، وغیرہ جیسے کارٹونز بچوں کی نفسیاتی ساخت پر غیر معمولی اثرات چھوڑتے ہیں جس کی تباہ کاریاں عمر گذرنے کے ساتھ ساتھ نمایاں ہوتی رہتی ہیں۔

ماں باپ ہونے کے ناطے بچے کی جمسانی ہی نہیں روحانی و نفسیاتی تربیت بھی ذمہ داری ہے، اولاد کو قدم قدم پر محبت و پیار دینا ہوگا، زندگی کے حقائق سے آشنائی، مشکل حالات میں ثابت قدمی، بےبسی میں حوصلہ افزائی کرنا ایسا امید افزا تریاق ہے جو مایوسی کے اثرات کا سرے سے خاتمہ کردیتا ہے، مایوسی وہ دشمن ہے جس کی جڑیں رومانویت پسند ی کی روشنی میں نشونما پاتی ہیں، جس کا آخری نتیجہ خود کشی یا پاگل پن کی صورت میں رونما ہوتا ہے۔ اس لیے اپنی اولاد کی تربیت میں معمولی کوتاہی اسے غلط نہج پر لے جاسکتی ہے۔

کچھ دن پہلے کی بات ہے، میں نے بستر پر جانے سے پہلے حسب معمول کمرے کی بتی بند کر دی. ایک دم سے گہرا اندھیرا چھا گیا، مگر اس میں کوئی چیز چمک رہی تھی، غور کیا تو معلوم ہوا کہ وہ اینڈرائیڈ فون کی چارجنگ والی لائٹ ہے، خیر میں بستر پر لیٹ گیا۔ تھوڑی دیر گزری تھی کہ اس کی ٹمٹماہٹ بڑھ گئی اور مزید کچھ دیر گزری تو مجھے اس ٹمٹاتی روشنی میں کمرے کی اس طرف والی دیوار نظر آنے لگی جدھر فون رکھا تھا۔ یہ تو تھی ایک بات اب آتے ہیں اصل بات کی طرف۔

بات کچھ یوں ہے کہ ہماری چھوٹی سی نیکی جس کی ہمارے سامنے قدر و قیمت ہے ہی نہیں اور نہ ہم اس کی طرف غور کرتے ہیں، وہ بھی تاریک کمرے (معاشرے) میں اس ٹمٹماتی روشنی کا کام کرتی ہے اور آگے چل کرہمارے لیے آسانی کا باعث بنے گی۔ آپ کی چھوٹی نیکیاں جن کوآپ سرِ راہ چلتے ہوئے گنوا دیتے ہیں اور دھیان نہیں دیتے. ان میں راستے میں چلتے ہوئے لوگوں کو سلام کرنا، اگر کوئی تکلیف دینے والی چیز نظر آئے تو اس کو پاؤں کی ٹھوکر سے ہی سہی سائیڈ پر کر دینا۔ اگر کہیں کوئی شخص مصیبت میں اٹکا ہوا نظر آ جائے تو فوراََ سے پہلے اس کی مدد کے اسباب تلاش کرنا کہ کس طرح اس کو اس مصیبت سے نکالا جائے نہ کہ فون لے کر ویڈیو بنانا شروع ہو جائیں یا ویسے ہی باقی تماش بینوں کے ساتھ کھڑے ہو جائیں. کل آپ پر بھی ایسا وقت آ سکتا ہے، آج کسی کے ساتھ بھلائی کی ہوگی تو کل کو اس کا بدلا ملے گا، پھر نہ کہنا کہ میں زندہ جلتا رہا اور معاشرہ میری تصویر بناتا رہا۔ کسی نے یونہی نہیں کہا کر بھلا سو ہو بھلا۔
ہمارا کام ہے بھلائی کی دعوت دینا کیوں کہ یہ بھی ایک نیکی ہے!