Tag: فاٹا

کئی اہم ملکی مسائل ایسے ہیں جن پر وفاقی حکومت کسی کی بات سننے کو تیار نہیں، فاٹا کا مسئلہ ہو یا پھر سی پیک کے مغربی روٹ پر صوبوں کو اعتماد میں لینے کا، مجبورا سی پیک منصوبے میں مغربی روٹ کا اسٹیٹس معلوم کرنے کے لیے اسپیکر خیبرپختونخوا اسمبلی اسد قیصر اور حکمران اتحاد کے پارلیمانی لیڈروں نے پشاور ہائی کورٹ میں رٹ پٹیشن دائر کردی ہے جس کی قاضی محمد انور ایڈووکیٹ پیروی کریں گے. رٹ صوبائی اسمبلی میں منظور کی گئی قرارداد نمبر 882 کے تحت دائر کی گئی، تاہم قرارداد پر دستخط کرنے والی چاروں اپوزیشن جماعتیں جے یو آئی، مسلم لیگ ن، اے این پی اور پیپلزپارٹی پیچھے ہٹ گئی ہیں اور اب رٹ حکمران اتحاد میں شامل جماعتوں تحریک انصاف، جماعت اسلامی اور قومی وطن پارٹی کی جانب سے دائر کی گئی ہے. صوبائی کابینہ کے رکن مشتاق غنی نے کہا ہے کہ صوبے کے حصے میں ایک رابطہ سڑک کے سوا کچھ نہیں دیا گیا، نہ ہی وفاق نے معاہدے کی دستاویزات دی ہیں، اور یہ رٹ قرارداد کی بنیاد پر دائر کی گئی ہے، اب کچھ جماعتیں پیچھے ہٹ رہی ہیں تو ان کی مرضی تاہم قرارداد کی سب نے ہی حمایت کی تھی. صوبائی اکائیوں کے اقتصادی راہداری (سی پیک) پر شدید اعتراضات وشبہات ہیں، اعتراضات کرنے والے کوئی انڈین ایجنٹ نہیں بلکہ پاکستان سے محبت کرنے والا سنجیدہ محب وطن طبقہ ہے. خیبر پختونخوا کے وزیراعلی پرویز خٹک نے کئی بار کہا کہ وفاقی حکومت نے چائنہ پاکستان اقتصادی راہداری سے منسلک تمام منصوبوں کو راہداری کے مشرقی روٹ پر منتقل کر کے کام شروع کردیا ہے، اور خیبر پختونخوا و بلوچستان کو اقتصادی راہداری کے منصوبے سے تقریبا محروم کر دیا گیا ہے، جبکہ منصوبے کا مغربی روٹ بھی ختم کر دیا گیا ہے جس کا ہم سے وفاقی حکومت نے وعدہ کیا تھا. یہ الفاظ ایک صوبے کے وزیر اعلی نے کئی بارکہے، اسی قسم کا بیان بلوچ رہنما سردار اختر جان مینگل کا سامنے آچکا ہے کہ جس میں انھوں نے گوادر پورٹ پر اپنے تحفظات کا واضح الفاط میں ذکر کیا تھا۔

چند ماہ قبل ایک نجی چینل پر احسن اقبال کا ون ٹو ون انٹرویو سننے کا شرف حاصل ہوا، انٹرویو میں وزیر موصوف نے سی پیک کے بارے میں دلائل کے انبار پیش کیے، ایسا محسوس ہو رہا تھا کہ چینل حکومتی مؤقف کی ترجمانی کے لیے یہ پروگرام کروا رہا تھا، اور پروگرام میں ایسا تاثر دیا گیا کہ کام تو مغربی روٹ پر ہی جاری ہے. گودار سے سوراب تک چھ سو پچاس کلومیٹر روڈ کو مغربی روٹ قرار دیا گیا جو کہ مغربی روٹ نہیں ہے، جس نے یہ علاقہ نہیں دیکھا اسے کیسے معلوم ہوسکتا ہے کہ کام کہاں ہو رہا ہے؟ وہ یہی سمجھےگا کہ یہ دوسری پارٹیاں اور صوبے شاید بےوقوف ہیں کہ خطے میں گیم چینجر منصوبے کی مخالفت کر رہی ہیں، جب پاکستان کے پس ماندہ علاقوں میں تبدیلی نہیں آرہی تو پھر کیسے یقین کرلیا جائے کہ خطے میں تبدیلی کا منصوبہ ہے. خود اس وقت تک گوادر کے مقامی رہائشی پینے کے صاف پانی سے محروم ہیں۔

بلوچستان میرا آنا جانا رہتا ہے، کوئٹہ اسی سوراب سے گذر کر جاتا ہوں. سوراب چار راستوں کے سنگم پر واقع ہے. ایک سڑک کراچی کی جانب، دوسرا راستہ خضدار سے رتوڈیرو سندھ، تیسرا راستہ کوئٹہ اور چوتھا راستہ گوادار کو جاتا ہے. اس وقت سوراب سے گودار والے روٹ پر کام جاری ہے اور یہ مغربی روٹ نہیں ہے بلکہ یہ تو وہ راستہ ہے جو گودار سے لازمی یہاں تک بنے گا، اور یہی گودار سے پورے ملک کو لنک کرنے کا مختصر راستہ ہے. یہ مغربی روٹ نہیں،گوادر سے نکلنے والا مین روٹ ہے کیونکہ ساحل سمندر کے ساتھ بنائی گئی دوسری سڑک جو کہ پسنی، اور ماڑہ بوزی ٹاپ، ہنگول ندی سے ہوتے ہوئے کراچی کو لنک کرتی ہے، یہ طویل راستہ ہے، اس لیے پہلے مرحلے میں سوراب تک شارٹ ہائے وے تعمیر کی جا رہی ہے. اس سڑک اور کوری ڈور کو خضدار سے جیک آباد، رتوڈیرو سندھ سے لنک کیے جانے کی منصوبہ بندی ہے، جسے چھپایا جارہا ہے. کوری ڈور کا یہ حصہ بھی ضروری ہے کیونکہ اس سے سندھ کو فائدہ ہوگا مگر مغربی روٹ وہ ہے جو کہ سوراب، کوئٹہ سے ہوتے ہوئے برہان کو لنک کرے گا، اس روت پر خاموشی ہے. کچھ عرصہ قبل حکومت کی جانب سے سیاسی جماعتوں کو یہ بتایا گیا تھا کہ دونوں روٹس پر انفراسٹرکچر یکساں ہوگا، لیکن جب اس سے زیادہ مناسب مغربی روٹ پر توانائی کے پلانٹ ہوں گے نہ کوئی صنعتی پارکس اور انفراسٹرکچر ہوگا تو پھر یہ کیسے یکساں ہوگا؟ توانائی اور دیگر پروجیکٹ کوئی چھوٹے منصوبے نہیں ہیں۔ یہ انڈسٹریل پارکس چھوٹے چھوٹے نہیں بلکہ پورے پورے شہر بنیں گے ۔ تو جب مغربی روٹ پر توانائی نہیں ہوگی، بجلی نہیں ہوگی، موٹر وے نہیں ہو گی تو کیسے یہ علاقے ترقی کریں گے۔

ایک صوبے کے علاوہ تمام صوبے راہداری پروجیکٹ کے مخالف ہیں، کیوں؟ سوال بڑا اہم ہے اور جواب بہت سادہ کیونکہ انہیں نظر انداز کیا جارہا ہے۔ اقتصادی زونز کے لیے جب پیسے ہی نہیں تو زونز کا اعلان کرکے لالی پاپ کیوں دیا جارہا ہے۔ سی پیک منصوبے کی کامیابی کے لیے یہ بات ضروری ہے کہ سب سے پہلے بلوچستان کے عوام اور حکومت کو اعتماد میں لیا جائے تاکہ ان کے اندر 69 سالوں سے محرومی کا احساس ختم ہو، اور ان کو بھی ترقی کے ثمرات میں پورا حصہ ملے. دلوں کو جیتنے کے لیے پاکستان کے ساتھ ساتھ چین کو بھی آگے آنا ہوگا اور سب سے زیادہ ضروری تو پاک فوج کا کردار ہونا چاہیے کہ جس پر پہلی بار بلوچ قوم اور نوجوان بھروسہ کر رہے ہیں. ان کو امید ہے کہ اب ان کے مسائل حل کروانے میں پاک فوج کردار ادا کرے گی. اکائیوں میں اتفاق سے قومیں تشکیل پاتی ہیں، جب صورت حال نازک ہو تو بڑے ہونے کا دعوی کرنے والوں کو چھوٹوں کو راضی کرنا پڑتا ہے ، پنجاب بڑا بھائی ہے اس لیے بڑی ذمہ داری اور قربانی بھی اسے دینا ہوگی۔ اس سے چھوٹے صوبوں میں وفاق اور پنجاب کی جانب سے خیر سگالی کا پیغام جائے گا اور چاروں صوبوں کے عوام میں محبت اور بھائی چارگی کو فروغ ملے گا، جبکہ سی پیک راہداری سے جنوبی پنجاب، سندھ ، خیبر پختونخوا اور بلوچستان کے پسماندہ علاقے کو ترقی کے مواقع ملیں گے۔

ماہ رواں کی پہلی تاریخ کو جبکہ ہم دھرنا دھرنا کھیل رہے تھے، جنوبی وزیرستان کے سب ڈویژن وانا میں بارودی سرنگ کے ایک دھماکے کے نتیجے میں پاک فوج کے میجر عمران شہید ہوئے۔ تاہم چونکہ ہماری ٹی وی اسکرینوں پر انقلابی ڈرامے کی کوریج زوروں پر تھی ، اس لئے مشرقی بارڈر پر بھارتی افواج کی مسلسل گولہ باری اور اس میں بے گناہ شہریوں کی ہلاکتوں کی خبر کی طرح میجر عمران کی شہادت کی خبر بھی توجہ حاصل نہ کرسکی ۔ اس حملے کی ذمہ داری تحریک طالبان کے شہریار محسود گروپ نے قبول کی ۔ شہریار محسود اور ان کے ساتھی یا تو افغانستان میں بیٹھے ہیں یا پھر کسی اور نامعلوم مقام پر ، اس لئے ان کے خلاف تو کوئی کارروائی نہیں کی جاسکی لیکن پولیٹکل انتظامیہ نے سزا مقامی افراد کو یوں دے دی کہ اگلے روز ان کی سو سے زائد دکانوں کو بارود سے اڑا کر مکمل طور پر مسمار کردیا۔ ایک محسود کے جرم کے ردعمل میں وزیر قبائل کی دکانوں کی یہ مسماری غیراخلاقی اور غیرانسانی فعل تو ہے لیکن غیرقانونی نہیں ۔

غیرقانونی اس لئے نہیں کہ قبائلی علاقوں میں ایف سی آر کے تحت اجتماعی ذمہ داری (Collective Responsibility) کا جو قانون نافذ ہے ، اس کی رو سے کسی علاقے میں ہونے والے جرم کی سزا پورے علاقے کو دی جاسکتی ہے اور کسی ایک فرد کے جرم کی سز ا پورے قبیلے کو دی جاسکتی ہے ۔اب واقعہ چونکہ وزیروں کے علاقے میں پیش آیا تھا ، اس لئے سو دکانوں پر مشتمل مارکیٹ وزیروں کی مسمار کردی گئی لیکن یہ ضروری نہیں کہ سب دکاندار وزیر ہوں ۔ تاہم چونکہ قانون میں یہ گنجائش موجود ہے ، اس لئے پولیٹکل انتظامیہ نے سب کی دکانیں مسمار کردیں۔ ظلم کی انتہا دیکھئے کہ اس ظلم کے خلاف متاثرہ لوگ نہ تو جلوس نکال سکتے ہیں ، نہ کسی عدالت میں جاسکتے ہیں اور نہ ہائی کورٹ یا سپریم کورٹ سو موٹو ایکشن لے سکتی ہے ۔ اور تو اور وہاں کا ایم این اے یا سینیٹر بھی زبان نہیں کھول سکتا کیونکہ ناراض ہونے کی صورت میں پولیٹکل ایجنٹ ان کے اور ان کے قبیلے کے گھروں کو بھی مسمار کرسکتا ہے ۔ ایم این اے صاحب کو بھی خاندان سمیت جیل میں ڈال سکتا ہے اور پھر ایم این اے صاحب بھی کسی عدالت سے رجوع نہیں کرسکتے ۔ اسی طرح کوئی مقامی رپورٹر بھی ایسے واقعات کے خلاف قلم یا زبان کو حرکت نہیں دے سکتا کیونکہ اجتماعی ذمہ داری کے قانون کے تحت پولیٹکل انتظامیہ اس رپورٹر ، اس کے خاندان اور اس کے قبیلے کے خلاف بھی مذکورہ تمام کارروائیاں کرسکتی ہے۔

وہ سیاسی رہنما جو ذاتی اور سیاسی مفادات کی خاطر ،قبائلی روایات اور الگ شناخت کی آڑ لے کر ،فاٹا کے پختونخوا میں ادغام کی راہ میں رکاوٹیں ڈال رہے ہیں ،وہ آج کہاں ہیں؟ کیا اس الگ شناخت اور نام نہاد روایات کو آگ نہیں لگانی چاہئے جو اس طرح کے مظالم کے راستے میں رکاوٹ نہیں ڈال سکتے ؟۔ لاہور اور اسلام آباد تو کیا ، پشاور، مردان یا مینگورہ میں بھی اس طرح کے کسی ظلم کا انتظامیہ تصور نہیں کرسکتی ہے ؟۔کیونکہ یہاں اپوزیشن کے سیاستدان ، میڈیا اور عدلیہ قیامت اٹھادیں گے لیکن قبائلی علاقوں میں اس طرح کے مظالم روز کا معمول ہیں ۔ جنوبی وزیرستان کے اسی وانا سب ڈویژن سے تعلق رکھنے والے ایاز وزیر بطور سفیر ریٹائرڈ ہونے کے بعد اب ٹی وی چینلز اور مختلف قومی اور بین الاقوامی فورمز پر پورے پاکستان کے مسائل پر تجزیہ کررہے ہوتے ہیں ۔ اسی وانا سے تعلق رکھنے والے سعید وزیر ایک متحرک اور اہل ترین پولیس افسر کی حیثیت سے اس وقت ڈی آئی جی ہزارہ ڈویژن کے طور پر خدمات سرانجام دے کر وہاں پر خیبر پختونخوا میں رائج قانون کے نفاذ کو یقینی بنارہے ہیں ۔ اسی وانا سے تعلق رکھنے والے اجمل وزیر ،گجرات کے چوہدریوں کی مسلم لیگ (ق) کے مرکزی سینئر نائب صدر ہیں اور کبھی لاہور کے ماڈل ٹائون کے ہلاک شدگان کے قصاص کے مطالبے کے لئے طاہرالقادری کے ساتھ کنٹینر پر کھڑے نظر آتے ہیں تو کبھی عمران خان صاحب کو پٹی پڑھانے والوں کی صف میں شامل ہوتے ہیں ۔ اسی علاقے سے تعلق رکھنے والے ہونہار نوجوان احمد نور وزیری نے گورنمنٹ کالج لاہور میں دوسری پوزیشن حاصل کرنے کے بعد سی ایس ایس کا امتحان پاس کیا اور حالیہ دنوں میں سیکشن آفیسر کی حیثیت میں سول بیورو کریسی کا حصہ بن گئے ۔

یہ نمونے کے چند نام ہیں ۔ ورنہ اسی طرح کے سینکڑوں وزیر قبائل کے افراد سیاست، عدلیہ ، سول اور ملٹری بیوروکریسی کا حصہ ہیں ۔لیکن ہمارے چند سیاسی مہربان قبائلی روایات اور الگ شناخت کا ڈھنڈورا پیٹ کر انہیں باقی ملک سے الگ تھلک رکھ کر ،اس ظالمانہ نظام کے شکنجے میں جھکڑے رکھنا چاہتے ہیں ۔ باقی پاکستان تو کیا قدیم قبائلی روایات کے حامل بلوچستان جیسے شورش زدہ اور پسماندہ صوبے میں بھی ان مظالم کا تصور نہیں کیا جاسکتا جن کا فاٹا کے عوام کو سامنا ہے ۔ وہاں جاوید مینگل ریاست سے لڑرہے ہیں لیکن الحمدللہ سردار اختر جان مینگل قومی دھارے اور قومی سیاست کا اہم کردار ہیں ۔ حربیار مری ریاست کے خلاف بغاوت اور غداری کے مرتکب ہورہے ہیں لیکن ان کے بھائی چنگیز مری مسلم لیگ(ن) کے لیڈر ہیں ۔ براہمداغ بگٹی نہ صرف ریاست پاکستان کے خلاف لڑرہے ہیں بلکہ ہندوستان سے مدد اور شہریت بھی طلب کررہے ہیں لیکن ان کے جرم میں بگٹی قبیلے کے کسی اور فرد کو سزا نہیں دی جاسکتی ۔ دوسری طرف ’’آزاد‘‘ قبائل ہیں کہ جن کے کسی ایک فرد کے جرم میں پورے قبیلے اور پورے علاقے کو سزاملتی ہے ۔ اب تو فوج بھی رکاوٹ نہیں ڈال رہی تو پھر سوال یہ ہے کہ میاں نوازشریف کی حکومت قبائلی علاقوں کو پختونخوا میں ضم کرنے سے کیوں گریزاں ہے؟۔ کیا وہ اس وقت کا انتظار کررہے ہیں کہ لاکھوں قبائلی نوجوان اسلام آباد میں دھرنا دینے پر مجبور ہوجائیں اور یاد رکھنا چاہئے کہ ان قبائلیوں کے دھرنے تحریک انصاف کے دھرنوں کی طرح برگر مارکہ نمائشی دھرنے نہیں ہوں گے ۔ یا پھر اس وقت کا انتظار ہے کہ قبائلی علاقوں سے نئے اور پڑھے لکھے نوجوان ایک نئی قسم کی طالبان تحریک شروع کر دیں؟ سرتاج عزیزصاحب کی کمیٹی کسی اور نے نہیں بلکہ خود وزیراعظم صاحب نے تشکیل دی تھی ۔ ہم جیسے لوگ اس کی ساخت پر معترض تھے لیکن حکومت کا دعویٰ تھا کہ وہ نمائندہ کمیٹی ہے ۔ اس کمیٹی نے اپنی رپورٹ میں فاٹا کے پختونخوا کے ساتھ ادغام کی سفارش کی ہے اور یہ بھی واضح کیا ہے کہ قبائلی عوام کی اکثریت یہی چاہتی ہے ۔ یہ وضاحت اور دلائل بھی اس رپورٹ میں موجود ہیں کہ الگ صوبہ ممکن نہیں لیکن اب اس رپورٹ کو سردخانے میں ڈال دیا گیا ہے ۔ وفاق کی کمیٹی ادغام کی حامی ہے ۔ صوبائی حکومت اور پی ٹی آئی ادغام کے ساتھ ہیں ۔ پیپلز پارٹی ، اے این پی اور جماعت اسلامی جیسی تنظیمیں اس کے حق میں ہیں تو پھر کیا وجہ ہے کہ عمل درآمد نہیں کیا جارہا ۔

مجھے تو اس کے سوا کوئی وجہ نظر نہیں آتی کہ یہ علاقے حکومتی ترجیحات میں شامل نہیں اور اسحاق ڈار صاحب چند ارب روپے وہاں خرچ کرنے کو تیار نہیں ۔جہاں تک حضرت مولانا فضل الرحمان اور محترم محمود خان اچکزئی صاحب کے اعتراضات کا تعلق ہے تو ان کا کوئی اخلاقی جواز اس لئے نہیں کہ وہ دونوں وفاقی حکومت کا حصہ ہیں اور سرتاج عزیزکی فاٹا ریفارمز کمیٹی وفاقی حکومت نے ہی تشکیل دی تھی۔ فاٹا سے سب سے زیادہ نشستیں مسلم لیگ (ن) نے حاصل کی ہیں جبکہ اچکزئی صاحب کی پارٹی وہاں سے ایک بھی نشست حاصل نہیں کرسکی ہے ۔ خود فاٹا کے منتخب نمائندوں نے قومی اسمبلی میں جو قرارداد جمع کی ہے اس میں ادغام کا آپشن سرفہرست ہے ۔وزیراعظم کو یاد رکھنا چاہئے کہ اگر انہوں نے اگلے انتخابات سے قبل اپنی بنائی ہوئی کمیٹی کی رپورٹ پر عمل درآمد کو یقینی بنا کر فاٹا کو پختونخوا میں ضم کردیا تو آئندہ نسلیں انہیں اپنا محسن سمجھیں گی اور اگر وہ ناکام رہے تو انہی آئندہ نسلوں کے ہاتھ انکے اور ان کی آئندہ نسلوں کے گریبانوں میں ہونگے۔

سوویت یونین کے خلاف جنگ کے لئے امریکہ اور حکومت پاکستان کی طرف سے پاکستان کو فرنٹ لائن اسٹیٹ اور پھر فاٹا کو بیس کیمپ بنانے کا نقصان یوں تو پورے پاکستان کو ہوا لیکن سب سے زیادہ تباہی کا سامنا فاٹا کو کرنا پڑا ، جس کا پورا سماجی حلیہ بگڑ گیا۔ پھر نائن الیون کے بعد کی دہشت گردی کے خلاف جنگ میں پاکستان کے فرنٹ لائن اسٹیٹ بن جانے اور پھر ڈبل گیم کا نقصان بھی پورے پاکستان کو ہوا اور ہورہا ہے لیکن فاٹا اور پختونخوا کے نقصانات اور تباہیوں کا کوئی شمار نہیں۔ فاٹا کے لوگ پہلے عسکریت پسندوں کے ہاتھوں ذلیل ہوئے، مارے گئے اور بے گھر کئے گئے اور پھر ملٹری آپریشنوں کے ذریعے ان کو ان سب کا سامنا کرنا پڑا۔ دہشت گردی کے خلاف جنگ میں تعاون کے ذریعے پاکستان کے خزانے میں پچھلے دس سالوں میں پچاس ار ب ڈالر سے زیادہ رقم پاکستان آئی لیکن ایک ارب ڈالر بھی قبائلیوں پر خرچ نہیں ہوئے۔ جو تھوڑی بہت رقم وہاں گئی بھی ، وہ گورنروں ، پولیٹکل ایجنٹوں اور منتخب ایم این ایز اور سینیٹرز کی جیبوں میں چلی گئی۔ ظلم کی انتہا دیکھ لیجئے کہ پچھلے تین سالوں کے دوران قبائلی علاقوں کے انسانوں پرفی کس اتنی رقم بھی خرچ نہیں ہوئی جتنی کہ باقی پاکستان کے انسانوں پر فی کس خرچ ہوتی رہی ۔

زبانی کلامی دعویٰ نہیں بلکہ سرتاج عزیز صاحب کی سربراہی میں قائم فاٹا ریفارمز کمیشن کی سفارشاتی رپورٹ میں واضح لکھا گیا ہے ۔ اس رپورٹ کے مطابق 15۔2014 کے بجٹ میں جہاں باقی پاکستان کے شہریوں کے لئے فی کس 18995روپے مختص کئے گئے ، وہاں فاٹا کے عوام کے لئے فی کس 7855 روپے فی کس مختص کئے گئے ۔ اسی طرح 14۔2013ء کےبجٹ میں باقی پاکستان کے شہریوں کے لئے فی کس 15606 روپے مختص کئے گئے تو فاٹا کے شہریوں کے لئے فی کس 7492روپے مختص کئے گئے ۔ یہی صورت حال ان سے پچھلے سالوں کی بھی رہی اور مکرر عرض ہے کہ باقی پاکستان میں اگر سو میں بیس روپے کرپشن کی نذر ہوتے ہیں تو فاٹا میں یہ شرح سو میں اسی کی ہے ۔ فاٹا کے ساتھ یہ ظلم ہورہے ہیں لیکن کوئی اس کے خلاف آواز اٹھارہا ہے اور نہ باقی پاکستان یا دنیا اس طرف متوجہ ہورہی ہے ۔ اس کی سب سے بڑی وجہ فاٹا کی مخصوص آئینی حیثیت اور قومی دھارے سے اس کا باہر ہونا ہے اور اس ظلم کے خاتمے کا نقطہ آغاز یہی ہوگا کہ اسے قومی دھارے میں لاکر وہاں پر بھی اسی طرح کا نظام لاگو کیا جائے جس طرح کہ باقی پاکستان میں ہے لیکن افسوس کہ موجودہ حکومت نے اس میں مجرمانہ تساہل سے کام لیا۔ ہوناتو یہ چاہئے تھا کہ حکومت سنبھالتے ہی پہلی فرصت میں اس عمل کا آغاز کردیا جاتا لیکن چونکہ میاں محمد نوازشریف صاحب اصلاً وزیراعظم اسلامی جمہوریہ وسطی پنجاب ہیں ، اس لئے گورنر کی تقرری سے لے کر آئی ڈی پیز کی بحالی تک اور ترقیاتی عمل سے لے کر فاٹا کو قومی دھارے میں لانے تک، کسی معاملے میں بھی انہوں نے کوئی دلچسپی نہیں لی ۔

سانحہ آرمی پبلک اسکول پشاور کے بعد قومی قیادت نے فوجی قیادت کے دبائو پر جو نیشنل ایکشن پلان بنایا اس میں فاٹا اصلاحات کی شق بھی شامل تھی لیکن پھر بھی وزیراعظم کی عدم دلچسپی کا یہ عالم رہا کہ اپنے وزراء پر مشتمل کمیٹی کے نوٹیفکیشن میں دس ماہ لگائے اور پھر جب دہشت گردی کے ایک اور سانحہ کی وجہ سے فوج کی طرف سے پھردبائو آیا تو انہوں نے نومبر 2015ء میں سرتاج عزیز صاحب کی سربراہی میں سیاسی اور انتظامی اصلاحات کے لئے پانچ رکنی کمیٹی تشکیل دے دی ۔ واضح رہے کہ نیشنل ایکشن پلان کا اعلان 25دسمبر 2014کو ہوا تھا لیکن وزیراعظم نے کمیٹی کا نوٹیفکیشن دس ماہ بعد یعنی8نومبر2015ء کو جاری کیا۔ فاٹا اور پختونخوا کی نمائندگی نہ ہونے کی وجہ سے ہم جیسے طالبعلموں کو اس پر اعتراض رہا لیکن اس کمیٹی نے اپنی رپورٹ مارچ 2016 میں تیار کرلی اور حقیقت یہ ہے کہ مجموعی طور پر اچھی اور قابل عمل رپورٹ ہے تاہم پھر اس رپورٹ کو سامنے نہیں لایا جارہا تھا اور اس کے لئے ہمیں ایک اور بڑے سانحے کا انتظار کرنا پڑا ۔ سانحہ کوئٹہ کے بعد یہ رپورٹ پارلیمنٹ میں بحث کے لئے پیش کی گئی جس پر ان دنوں بحث ہورہی ہے لیکن المیہ یہ ہے کہ اب وہاں پر کوئی اور نہیں بلکہ وزیراعظم صاحب کے دو سیاسی پراکسیز یعنی محمود خان اچکزئی صاحب اور مولانا فضل الرحمان صاحب اس کے خلاف میدان میں آگئے ہیں اور وہ اس کمیٹی کی اہم ترین سفارش یعنی فاٹا کے خیبر پختونخوا میں ادغام کی مخالفت کررہے ہیں ۔ گویا اپنی حکومت کی ، اپنے ہی وزیراعظم کی بنائی گئی کمیٹی کی ، تیار کردہ سفارشات کی مخالفت کرکے وہ اس رپورٹ کو متنازع بنارہے ہیں جس کا نتیجہ یہ نکلے گا اس تنازع کی آڑ لے کرحکومت کا عرصہ پورا ہوجائے گا اور فاٹا کے لوگ اسی طرح ذلیل ہوتے رہیں گے جب کہ یہ علاقے باقی پاکستان کے لئے وبال جان بنے رہیں گے ۔

میں پہلے بھی ’’جرگہ‘‘ میں کئی مرتبہ تفصیل سے لکھ چکا ہوں اور ہر فورم پر اس کا دفاع کرنے کو تیار ہوں کہ فاٹا کے ادغام کو روکنے کے لئے روایات، خصوصی اسٹیٹس اور دیگر اسی طرح کی چیزوں کی آڑ لے کر جو دلائل پیش کئے جارہے ہیں ، وہ بہانہ سازی کے سوا کچھ نہیں۔ سرتاج عزیز کمیٹی نے فاٹا کے منتخب نمائندوں اور عوام سے میاں نوازشریف کے مقر ر کردہ گورنر کی موجودگی میں مشاورت کی ہے اور وہ کمیٹی اس نتیجے تک پہنچی ہے کہ اکثریت صوبے کے ساتھ ادغام چاہتی ہے ۔ خود فاٹا کے پارلیمنٹرین نے 2015ء میں جو بل ایوان میں داخل کرایا ہے ، اس میں ادغام کا آپشن سرفہرست ہے ۔ میں خود اس مہمند قبیلے سے تعلق رکھتا ہوں جو پاکستان اور افغانستان میں منقسم ہے اور جس کو ایزمنٹ رائٹس(Easement rights) حاصل ہیں ۔ اب جب وہاں کے لوگوں کے منتخب نمائندے یا پھر ہم جیسے عوام کی اکثریت ادغام کے حق میں ہے تو پھر کسی اور کو کیا اعتراض ہے ۔ ملک کی تین بڑی جماعتیں یعنی مسلم لیگ(ن)، پیپلز پارٹی اور تحریک انصاف بھی حامی ہیں اور جہاں تک ریفرنڈم کا تعلق ہے تو کیا ریفرنڈم کروا کر فاٹا کے لوگوں کی رائے پوچھی گئی تھی جب وہاں پر طالبان اور مجاہدین کے ٹھکانے بنائے گئے اور کیاکسی ملٹری آپریشن سے پہلے قبائلی عوام کی رائے لی گئی تھی۔ جو سیاسی لیڈر آج مذموم مقاصد کے لئے فاٹا کے پختونخوا میں ادغام کی مخالفت کررہے ہیں وہ اس وقت کہاں تھے؟ ۔ انہوںنے قبائلی عوام کو ساتھ لے کر اور قبائلی روایات کو بروئے کار لا کر طالبانائزیشن یا ملٹری آپریشنوں کا راستہ کیوں نہیں روکا ؟۔ یا چلیں آج ہمت کرکے ، قبائلی عوام کو بجٹ میں سے تو ان کا جائز حصہ دلوادیں ۔

طالبان ملاکنڈ ڈویژن میں بھی آئے اور ملٹری آپریشن وہاں پر بھی ہوا لیکن چونکہ ملاکنڈ ڈویژن قومی دھارے اور صوبے کا حصہ تھا، اس لئے دو سال کے اندر اندر وہاں معاملہ ختم ہوگیا ، طالبان نکالے گئے اور لوگ اپنے گھروں کو واپس چلے گئے ۔ وجہ یہ تھی کہ پارلیمنٹ میں ملاکنڈ کی بات ہورہی تھی، میڈیا شور مچارہا تھا اور کچھ نہ کچھ عدالت بھی حرکت کررہی تھی لیکن چونکہ فاٹا میں یہ تینوں چیزیں نہیں ہیں ، اس لئے پندرہ سال گزرنے کے بعد بھی وہاں زندگی معمول پر نہ آسکی ۔فاٹا کی نئی نسل چاہتی ہے کہ وہ باقی پاکستانیوں کی طرح پاکستانی بنیں ۔ انہیں عزت نفس چاہئے، تعلیم چاہئے ، روزگار چاہئے اور سیاسی و آئینی حقوق چاہئیں جو موجودہ اسٹرکچر میں کبھی ان کو نہیں مل سکتے اور اس کا واحد راستہ پختونخوا اور باقی ملک کے ساتھ ادغام ہے ۔ اس لئے فضول بحث میں وقت ضائع کرنے کی بجائے ہر سیاسی و سماجی لیڈر کا فرض بنتا ہے کہ وہ حکومت پر دبائو ڈالے کہ وہ ان سفارشات پر جلداز جلد عمل درآمد کروائے ۔ اس میں جو کمی بیشی ہے ، وہ دور کی جائے ۔ عمل درآمد والی کمیٹی میں خیبرپختونخوا کے وزیراعلیٰ کو بھی شامل کیا جائے تاکہ ادغام کے عمل میں ضروری کوآرڈنیشن ہوسکے۔ موجودہ گورنرکے پی کے دور میں کرپشن بہت بڑھ گئی ہے اور بیماری و بڑھاپے کی وجہ سے ان کی نگرانی میں فاٹا کے ادغام کا مشکل کام کبھی نہیں ہوسکتا ۔

اس کے لئے دبائو ڈالنا چاہئے کہ وزیراعظم میرٹ پر اہل گورنر کا تقرر کریں۔ عبوری دور کے لئے کمیٹی نے ڈویزیبل پول میں تین فی صد حصہ مقرر کرنے کی سفارش کی ہے جو میرے نزدیک کم ہے لیکن اطلاعات کے مطابق اسحاق ڈار صاحب صرف ایک فی صد دینے پر آمادہ ہیں ۔ مولانا صاحب اور اچکزئی صاحب روڑے اٹکانے کی بجائے اپنے وزیراعظم نوازشریف پر دبائو ڈالیں کہ وہ عبوری دور کے لئے ڈویزیبل پول میں فاٹا کا حصہ کم ازکم پانچ فی صد رکھیں۔ اسی طرح آئندہ انتخابات میں فاٹا میں صوبائی اسمبلی کے بھی انتخابات کرائے جائیں تاکہ کے پی اسمبلی میں فاٹا کو نمائندگی مل جائے ۔ فاٹا کے نمائندے صوبائی اسمبلی میں موجود رہیں گے تو صوبے کے ساتھ اس کے ادغام کے عمل میں معاونت بھی کریں گے اور اپنے حقوق کو بھی یقینی بناسکتے ہیں ۔ میاں نوازشریف کی حکومت میں یہ کام ہوا تو فاٹا کی آئندہ نسلوں کے محسن تصور ہوں گے لیکن اگر یہ موقع بھی ضائع کردیا تو ان نسلوں کے سب سے بڑے مجرم تصور ہوں گے۔ مرضی ان کی ہے کہ وہ اپنے لئے محسن کے ٹائٹل کا انتخاب کرتے ہیں یا مجرم کے ٹائٹل کا ۔میاں صاحب یاد رکھیں کہ فاٹا کے لوگ اسوقت دربدر ضرور ہیں لیکن احسان بھولتے ہیں اور نہ اپنے مجرموں کو معاف کرتے ہیں ۔

محمود خان اچکزئی پھر بولے، پھر سلیم احمد مرحوم کی یاد آئی. 80 کی دہائی میں انہوں نے لکھا تھا:
”آزادی رائے کو بھونکنے دو.“
زندہ ہوتے تو حاضر ہوتا اور پوچھتا: کب تک اور کتنا.
قومی اسمبلی میں خان صاحب نے فرمایا کہ فاٹا کی حیثیت کو مت چھیڑیں ورنہ یہ بین الاقوامی ایشو بن جائے گا.
فاٹا کی حالت ہمارے سامنے ہے. ایف سی آر کے نام پر لاقانونیت. مروجہ آئینی سکیم میں وہاں سپریم کورٹ کو حق نہیں کہ کسی کی داد رسی کر سکے. پولیٹیکل ایجنٹ یہاں کا ان داتا ہے. اور بہت سے مسائل ہیں. چنانچہ اسے قومی دھارے میں لانے اور بنیادی حقوق دینے کی خاطر فاٹا ریفارمز کمیٹی بنائی گئی. ایک طویل مشاورت کا عمل ہوا جو جاری ہے. بہت سی تجاویز زیر غور ہیں کہ فاٹا کو الگ صوبہ بنایا جائے یا کے پی کا حصہ بنایا جائے. عمران خا ن کی تجویز ہے کہ ایک مرحلے پر اسے کے پی کا حصہ بنا دیا جائے. یہ معاملات آگے کو بڑھ رہے تھے کہ اچانک اچکزئی صاحب اپنی آزادی رائے سمیت بیچ میں کود پڑے.
سوال یہ ہے کہ کیا ان کا تعلق فاٹا سے ہے؟
کیا وہ فاٹا سے منتخب رکن اسمبلی ہیں؟
کیا وہ فاٹا کے نمائندے یا ترجمان ہیں؟
فاٹا کے بارے میں فاٹا کے منتخب نمائندوں کی مرضی سے اور فاٹا ریفارمز کمیٹی کے طویل مشاورتی عمل کے بعد اگر منتخب پارلیمان کوئی فیصلہ کرتی ہے تو اس پر اتنا سیخ پا ہونے کی کیا ضرورت ہے؟ ٹھیک ہے آپ مشورہ دیں، رائے دیں لیکن کس استحقاق کی بنیاد پر آپ کی بات کو حرف آخر سمجھ لیا جائے؟ فاٹا پاکستان کا علاقہ ہے، آپ کی جاگیر کا پائیں باغ نہیں.
نیز یہ کہ یہ معاملہ بین الاقوامی ایشو کیسے بن جائے گا؟ اچکزئی کے کس ممدوح ملک کو اس سے تکلیف ہوگی کہ یہ مسئلہ بین الاقوامی مسئلہ بن جائے گا؟ افغانستان کو یا بھارت کو؟ کس کی شہ پر یہ دھمکی دی جا رہی ہے؟
اچکزئی کس کی زبان بول رہے ہیں؟ کس کی شہ پر ان کا دہن مبارک آگ اگل رہا ہے؟ پاکستان کا ایک داخلی مسئلہ بین الاقوامی مسئلہ کیسے بن جائے گا؟
سلیم احمد نے ٹھیک کہا ہوگا مگر کب تک اور کتنا؟

کوئی بھی کام کرنے کا ایک ہی طریقہ ہوتا ہے کہ وہ کر دیا جائے۔ مثلاً سینتالیس سے ستر تک گلگت بلتستان کو فرنٹیر کرائمز ریگولیشنز کے تحت چلایا جاتا رہا۔ پھر بھٹو صاحب نے انیس سو چوہتر میں اس علاقے کی ایک کاغذی کونسل بنا دی جس کا مجازی خدا وفاقی وزیرِ امورِ کشمیر تھا۔ جب زرداری حکومت نے دو ہزار نو میں گلگت بلتستان سیلف گورننس آرڈر نافذ کیا تو نہ تو علاقے کے دو ملین لوگوں کی رائے جاننے کے لیے ریفرنڈم کروایا گیا نہ اس مسودے کو عوامی بحث کے لیے پیش کیا بس نافذ کر دیا گیا اور لوگوں نے چار و ناچار قبول بھی کر لیا۔

لیکن کسی بھی کام کو کرنے کا اگر صرف ایک طریقہ ہے تو نہ کرنے کے ہزار طریقے ہیں۔ جیسے وفاق کے زیرِ انتظام قبائیلی علاقہ جات (فاٹا) میں سیاسی و اقتصادی اصلاحات۔

پاکستان میں جو بھی جب بھی سیاحت کو پروموٹ کرنے کا بروشر چھاپتا ہے تو  کے ٹو سے نانگا پربت تک  ہر چوٹی، ہنزہ سے دیوسائی تک تمام وادیوں میدانوں، اور نذیر صابر و اشرف امان سے ثمینہ بیگ تک تمام کوہ پیماؤں اور بالتورو و بیافو سمیت تمام بلتی و گلگتی گلیشیرز کو ’’پاکستان کے جنت نظیر قابلِ دید‘‘ مقامات کے طور پر شو کیس کیا جاتا ہے۔ مگر جب ان جنت نظیر قابلِ دید مقامات کی اختیار و اقتدار میں مساوی شراکت کا سوال اٹھایا جاتا ہے تو فوری جواز و جواب یہ ہوتا ہے کہ آپ تو متنازعہ علاقہ ہیں آپ تو پاکستان کا باقاعدہ حصہ ہی نہیں وغیرہ وغیرہ۔

اسی طرح  وفاق کے زیرِ انتظام سات قبائلی ایجنسیوں (باجوڑ، مہمند، خیبر، اورکزئی، کرم، جنوبی و شمالی وزیرستان) اور پشاور، کوہاٹ، بنوں، لکی مروت، ٹانک و ڈیرہ اسماعیل خان سے متصل چھ فرنٹیر ریجنز کے پچاس لاکھ قبائلیوں کو  ویسے تو پاکستان کا بازوئے شمشیر زن کہا جاتا ہے۔ انیس سو سینتالیس کی جنگِ کشمیر سے اب تک ان کی عسکری و قومی قربانیاں کو سراہنے میں زمین و آسمان ایک کر دیے جاتے ہیں۔ دہشتگردی کے خلاف گزشتہ سولہ برس سے جاری جنگ اور اس سے بھی پہلے اڑتیس برس سے جاری ڈیورنڈ لائن کے آر پار کی بدامنی سے نمٹنے، ڈرون حملے سہنے اور بے گھری کا بوجھ اٹھانے جیسی قربانیوں کو ہمیشہ یاد رکھنے کے وعدوں کی مسلسل تحسینی بارش بھی نہیں رکتی۔

لیکن یہی قبائل جب مطالبہ کرتے ہیں کہ اگر ہم اتنے ہی اچھے اور پیارے ہیں تو پھر انگریز دور کے ایک سو پندرہ سال سے نافذ فرنٹیر کرائمز ریگولیشنز سے ہمیں نجات کیوں نہیں دلاتے۔ آئینِ پاکستان کے تحت ہمیں بھی بنیادی انسانی حقوق اور انصاف کی اعلیٰ ترین عدالتوں تک رسائی کیوں نہیں۔ ایسے مطالبات کے جواب میں کہا جاتا ہے کہ حضور آپ کی تو ایک مخصوص شناخت و تشخص ہے۔آپ تو آزاد منش ہیں اور ہم چاہتے ہیں کہ آپ کی خود مختاری آپ کے رواجوں کے ساتھ برقرار رہے۔ مگر یہ کوئی نہیں بتاتا کہ ایف سی آر جیسا قانون کس قبائلی رواج کا نام ہے؟ پولیٹیکل ایجنٹ محض شبہے کی بنیاد پر کسی بھی قبائلی کو تین برس کے لیے کیوں نظربند، قید یا علاقہ بدر کر سکتا ہے اور پھر اس سزا میں مزید توسیع کے صوابدیدی اختیارات کیوں رکھتا ہے۔ پولیٹیکل ایجنٹ استغاثہ بھی ہے  جج بھی اور کورٹ آف اپیل بھی۔

فاٹا کو پہلی بار ون مین ون ووٹ کا حق انیس سو چھیانوے میں ملا۔ اس سے قبل محض پینتیس ہزار ملکوں اور عمائدین کو ہی قومی اسمبلی کے لیے بارہ نمایندے چننے کا حق تھا اور پھر منتخب نمایندے آٹھ سینیٹر چنتے تھے اور یہ سارا جمہوری کام بولی لگا کے ہوتا تھا۔

فاٹا میں اصلاحات کی کہانی دو ہزار آٹھ سے سننے میں آ رہی ہے۔ جب سابق چیف جسٹس اجمل میاں کی سربراہی میں ایک کمیٹی تشکیل دی گئی اور اس کمیٹی کی سفارشات کی روشنی میں دو ہزار گیارہ میں ایف سی آر میں یہ ترمیم کی گئی کہ فاٹا ٹریبونل کے اختیارات ہائی کورٹ کے مساوی کر دیے گئے۔ اجتماعی سزا کی شق جس کے تحت ایک شخص کے جرم کا ذمے دار پورے قبیلے کو ٹھہرایا جاتا تھا اس میں تبدیلی کر کے اجتماعی ذمے داری کے عمل سے بچوں، بوڑھوں اور قبیلے کو نکال دیا گیا اور ’’جو کرے وہ بھرے‘‘ کا یونیورسل اصول لاگو کیا گیا۔

اس کے بعد راوی اصلاحات کے معاملے میں گھمبیر خاموشی لکھتا ہے۔ راستے میں قبائلی ایجنسیوں میں طالبان کے خلاف بھر پور فوجی ایکشن، آپریشنِ ضربِ عضب اور شمالی و جنوبی وزیرستان کی آبادی کی بے گھری و بے سرو سامانی تو پڑاؤ کرتی نظر آتی ہیں مگر اصلاحات کا خیمہ دور کسی چوٹی پر گڑا ٹپائی دیتا ہے۔

موجودہ نواز شریف حکومت نے فاٹا اصلاحات کے کچھوے کو اب سے سال بھر پہلے فوج کے دباؤ پر چھ رکنی سرتاج عزیز کمیٹی کے سپرد کر دیا۔ اس کمیٹی نے اس ہفتے جو سفارشات وزیرِ اعظم کو پیش کی ہیں ان میں کہا گیا ہے کہ موجودہ ایف سی آر کی جگہ ٹرائبل ایریا رواج ایکٹ نافذ کیا جائے جو مقامی رواج اور جرگہ سسٹم پر مشتمل ہو اور اس میں جج پولیٹیکل ایجنٹ نہ ہو بلکہ ایک الگ سے جوڈیشل افسر بطور جج کام کرے۔ ایک سفارش یہ بھی ہے کہ سپریم کورٹ اور ہائی کورٹ کا دائرۂ کار فاٹا تک بڑھایا جائے۔ لیکن انفرادی جھگڑے نمٹانے کے لیے جرگہ و رواج سسٹم بھی برقرار رکھا جائے…

یہ تجاویز بالکل ایسی ہیں کہ کوئی کہے کہ تمہارے پاؤں میں جو زنجیر پڑی ہے اس زنجیر کے ساتھ تم جہاں چاہے جانے کے لیے آزاد ہو۔ باقی سفارشات فاٹا میں مالی اصلاحات و بجٹ سے متعلق ہیں اور ایک سفارش یہ بھی ہے کہ فاٹا میں اگلے برس تک بلدیاتی انتخابات کروا دیے جائیں۔

مگر سب سے اہم فیصلہ ہونا باقی ہے۔ یعنی فاٹا کو اصلاحات کے بعد بھی جوں کا توں برقرار رکھا جائے، ایک علیحدہ صوبہ بنا دیا جائے، خیبر پختون خوا میں ضم کر دیا جائے یا پھر گلگت بلتستان کی طرز پر ایک کونسل اور اسمبلی بنا دی جائے۔

فاٹا کی بیورو کریسی اور روایتی معززین چاہتے ہیں کہ موجودہ نظام جوں کا توں رکھا جائے البتہ تھوڑی بہت مرمت و لیپا پوتی اور ڈیکوریشن کر دی جائے۔ پشتون قوم پرست جماعتیں کہتی ہیں کہ فاٹا کے قبائلی عملاً سیاسی، سماجی، املاکی و معاشی طور پر خیبر پختون خوا سے جڑے ہوئے ہیں۔ فاٹا سیکریٹیریت تک پشاور میں ہے۔ امن و امان کے حالات کے سبب زیادہ تر پولیٹیکل ایجنٹ بھی سیٹلڈ ایریاز میں دفتر لگاتے ہیں۔ لہذا اگر فاٹا کو صوبے کا حصہ بنا دیا جائے تو کیا مضائقہ ہے۔

ہونا تو یہ چاہیے تھا کہ سرتاج عزیز کمیٹی کی سفارشات تمام سٹیک ہولڈرز سے مشاورت کے بعد ٹھوس دو ٹوک شکل میں سامنے آتیں، پارلیمنٹ ان پر بحث کرتی اور پھر جو بھی ایکٹ تیار ہوتا اسے نافذ کر دیا جاتا۔ مگر نہیں۔ اب یہ سفارشات عام بحث کے لیے عوام کے سامنے رکھی جائیں گی۔ ان  پر بحث پارلیمنٹ میں ہو گی مگر قانون کی منظوری قبائلی جرگہ دے گا۔ یہ بالکل ایسا ہے کہ منگنی شمائلہ سے ہو گی مگر شادی شہناز سے…

اگر واقعی فاٹا کو پاکستان کے دیگر حصوں کی طرح مساوی آئینی حیثیت و حقوق دینے کی نیت ہوتی تو فاٹا کے عوام کو ایک ریفرنڈم کے ذریعے اپنی آئینی حیثیت کے انتخاب کا حق دینا سب سے آسان راستہ ہوتا۔ اگر وہ عام انتخابات میں بالغ رائے دہی کی بنیاد پر اپنے نمایندے منتخب کر سکتے ہیں تو اپنی قسمت کا فیصلہ کیوں نہیں کر سکتے؟ یا پھر پارلیمنٹ اتفاقِ رائے سے ایک مسودہ منظور کر لیتی جو اکیسویں صدی کے انسانی و آئینی تقاضوں سے ہم آہنگ ہوتا۔ لیکن ایسا محسوس ہوتا ہے کہ اصلاحات کے عمل کو نیلے ٹرک کے پیچھے سے ہٹا کر پیلے ٹرک کی بتی کے پیچھے لگا دیا گیا ہے۔

قانون سازوں کی بلا سے کہ اس وقت فاٹا کی آدھی آبادی دربدر ہے۔ یہاں کے آدمی کی فی کس آمدنی باقی پاکستان سے آدھی، صحت کی سہولتیں آدھی اور خواندگی کا تناسب باقی پاکستان کے مقابلے میں ایک چوتھائی ہے۔

فاٹا میں حقیقی اصلاحات مستقبلِ قریب میں ہوتی نظر نہیں آتیں۔ کیونکہ فاٹا کی پسماندگی اور جغرافیہ اربوں روپے کی صنعت ہے۔ بھلا کون سا پولیٹیکل ایجنٹ، عسکری، قبائلی ملک، سیاستداں، ٹرانسپورٹر اور مافیائی چاہے گا کہ یہ صنعت اتنی آسانی سے ٹھپ ہو جائے اور اس کے پیٹ پر لات پڑ جائے۔

وفاق کے زیرانتظام فاٹاکے 13 قبائلی علاقہ جات ہیں جن کی آبادی لگ بھگ ایک کروڑ ہے، ان میں سے 20 لاکھ دربدر ہیں۔ قبائلی علاقہ جات میں ایف آر پشاور، ایف آر کوہاٹ، ایف آر ڈی آئی خان، ایف آر بنوں، ایف آر لکی، ایف آر ٹانک، باجوڑ ایجنسی، کرم ایجنسی، مہمند ایجنسی، خیبر ایجنسی، اورکزئی ایجنسی، شمالی وزیرستان اور جنوبی وزیرستان شامل ہیں. عام طور پر باقی پاکستان کے لوگ اسے ’’علاقہ غیر‘‘ کے نام سے جانتے اور پہچانتے ہیں۔ اپنے وطن کے کسی حصے کو اگرچہ علاقہ غیر کہنا اوردیار غیر سمجھنا کم سے کم الفاظ میں کوتاہی ہے۔ فاٹا کے معززین اس بات پر افسوس کا اظہار کرتے رہتے ہیں کہ ہمیں پاکستانی بھائی سمجھے جانے کے بجائے’’علاقہ غیر‘‘ کے لوگ تصور کیا جاتا ہے، دوسرے الفاظ میں ہمیں اس ملک کا شہری نہیں سمجھا جاتا۔ اسی تصور کا اثر ہے کہ بچپن میں جب ہمارے گاؤں میں قبائلی بھائی بڑی پگڑی، ویسکوٹ، پشاوری چپل اور ایک عدد چھوٹی موٹی چیزوں سے بھر ا ٹرنک لے کر پھیری لگاتے اور آوازیں لگاتے تھے، کنگھی لے لو، شیشہ لے لو وغیرہ تو محلے والے ہمیں ان کے قریب جانے سے روکتے اور بسا اوقات یہ بھی کہتے کہ یہ لوگ علاقہ غیر کے ہیں، پکڑ کر لے جائیں گے۔

قبائلی علاقوں میں اصلاحات لانے کے لیے ایف سی آر میں ترامیم، فاٹا میں سیاسی سرگرمیوں کی اجازت اور اسے الگ صوبہ بنانے یا خیبرپختونخوا میں ضم کیے جانے کی باتیں ہو رہی ہیں. آزادی کو 70 سال ہونے والے ہیں مگر فاٹا کے عوام اب بھی انگریزوں کے کالے قانون فرنٹیئر کرائمز ریگولیشن تلے پس رہے ہیں اور اس سے نجات کی جدوجہد کر رہے ہیں۔ایف سی آر قانون کی ایک متنازع شق کو ’’اجتماعی ذمہ داری‘‘ کے نام سے یاد کیا جاتا ہے، اس میں کوئی خاص تبدیلی نہیں لائی گئی۔ پہلے اس شق کے تحت پولیٹکل ایجنٹ کو یہ اختیار حاصل تھا کہ وہ پورے قبیلے کو کسی بھی جرم میں گرفتار کر کے طویل عرصے تک پابند سلاسل رکھ سکتا تھا تاہم ایف سی آر 2011 بل کے ترمیمی بل کے بعد ایجنٹ سے یہ اختیار واپس لے لیا گیا اور اب پورے قبیلے کو نہیں بلکہ مرحلہ وار سزاؤں کا سلسلہ روا رکھا گیا ہے جوکہ اب بھی قبائلی عوام سے انتہائی زیادتی ہے۔ قبائلی امور پر نظر رکھنے والے سنیئر تجزیہ نگار ڈاکٹر خادم حسین کا کہنا ہے کہ فاٹا کو ایک سازش کے تحت سیاسی اور معاشی طور پر ایک بلیک ہو ل بنا دیا گیا ہے اور دہشت گردی اور شدت پسندی کو خوامخوا فاٹا سے نتھی کیا جاتا ہے۔ انہوں نے کہا کہ فاٹا کے عوام کو اس وقت سب سے زیادہ ضرورت ترقیاتی سکیموں کی ہے، وفاقی حکومت کو چاہیے کہ فاٹا کے عوام کے لیے پانی بجلی پانی اور پکی سڑکوں کا جال بچھائے۔

فاٹا اصلاحات کے حوالے سے ہونے والے اجلاس اب تک بد قسمتی سے نشستن گفتن برخاستن سے آگے نہیں بڑھ سکے۔ ضرورت اس امر کی ہے کہ قبائلیوں کے لیے2011ء فاٹا اصلاحات میں جو ترامیم کی گئیں، ان میں مزید بہتری کے ساتھ انھیں عملی طور پر نافذ کیا جائے. چند تجاویز پر عمل کر کے قبائلی بھائیوں کے لیے کچھ آسانی کا سامان پیدا کیا جا سکتا ہے۔
1. اعتماد سازی کی فضا قائم کرتے ہوئے قبائلیوں کو بھی اصلاحات کمیٹی میں جگہ دی جائے جس میں قبائلی ممبران قومی اسمبلی، سینیٹر، قبائلی عمائدین، سول سوسائٹی اور دانشور وغیرہ شامل ہوں۔
2. فاٹا کو پاکستان کا حصہ سمجھتے ہوئے قومی دھارے میں لایا جائے۔ جلد از جلد قانونی و انتظامی حیثیت دے کر خیبر پختونخوا میں شامل کیا جائے، یا گلگت بلتستان کی طرح ایگزیکٹو کونسل کا درجہ دیا جائے۔
3. مثبت سرگرمیاں وقت کی اہم ضرورت ہیں، نوجوانوں میں مثبت اور صحت مندانہ سرگرمیوں کے فروغ، امن امان کے قیام اور احساس کمتری سے نکالنے لیے یوتھ فیسٹول، امن گالا، ایگزبیشن گالا، تعلیم گالا اور اس طرح کے مختلف ایونٹس منعقد کرائے جائیں۔
4. کھیلوں کے مقابلے کرائے جائیں۔
5. فاٹا کے عوام کو بنیادی حقوق تعلیم، صحت، انصاف اور روزگار مہیا کرنے کے لیے ہنگامی بنیادوں پر کام کیا جائے۔
(6) ایک بڑے ترقیاتی پیکیج کا اعلان کیا جائے۔
(7) وزیراعظم اپنے صوابدید ی اختیارات استعمال کرتے ہوئے فاٹا میں ایک بڑا ہسپتال، ایک یونیورسٹی، ایک آرٹ کونسل اور ایک سپورٹس کمپلکس قائم کرنے کا اعلان کریں۔

فاٹا میں ریاستی رٹ کی بحالی تقریبا مکمل ہونے کو ہے، مگر اس دوران غیر ملکی ریڈیو چینلز اور بیرونی امداد پر چلنے والی این جی اوز کو یہاں پروپیگنڈہ کرنے میں آزادی حاصل رہی، یہ غیر سرکاری تنظیمیں بیرونی ایجنڈے کے فروغ کے لیے سرگرم رہیں، کسی کو کینیڈا سے ڈیل کیا جاتا رہا تو کوئی جرمنی سے، یورپی اداروں نے اس دوران جاسوسی بھی کی جس کی ایک رپورٹ خود برطانوی نشریاتی ادارے نے چند روز قبل جاری کی ہے. محرومی کا شکار قبائلی جوان براہ راست ٹارگٹ تھے اور ہیں، مصنوعی چکاچوند اور چمک کے ذریعے ان کی برین واشنگ کی جاتی رہی ہے اور اب بھی جاری ہے. فاٹا کے اکثر علاقے الیکٹرونک میڈیا کی سہولت سے محروم ہیں، آج بھی اخبارات اور ریڈیو معلومات اور خبروں کا بنیادی ذریعہ ہیں. ان علاقوں میں ریڈیو کی اہمیت آج بھی ہے، اسی وجہ سے مغربی میڈیا اور بیرونی ممالک کے ریڈیو چینلز نے فاٹا میں اس پر فوکس کیا ہوا ہے. انتہائی فعال ان چینلز کی نشریات پورے دن جاری رہتی ہیں۔ ان پروگرامات میں اکثر کا ٹارگٹ آڈینس قبائلی نوجوان ہیں، غیر محسوس طریقے سے بےحیائی اور فحاشی کو فروغ دیا جارہا ہے. جیسے ہی فجر کی نماز کا وقت ختم ہوتا ہے، یہ ریڈیو جاگ اٹھتے ہیں اور گانے بجانے اور گفتگو کے نام پر قبائلی معاشرے میں رائج جوائنٹ فیملی سٹسم پر ضرب لگانے میں مصروف ہوجاتے ہیں۔

سال میں دو تین بار اپنے آبائی علاقے کرم ایجنسی جانا ہوتا ہے ، اس بار بھی جانا ہوا. یہاں بیرونی دنیا سے رابطے کا ذریعہ یہی غیر ملکی ریڈیو چینلز ہیں، ہمیں بھی ریڈیو کے چینلز کے ذریعے خبریں سننا پڑیں. ایک ہفتے کے دوران یہ محسوس کیا کہ ایک منظم سازش کے تحت قبائل میں پروپیگنڈے اور ایجنڈے کو فروغ دیا جا رہا ہے. ہر چینل کی کوشش ہے کہ نوجوانوں کو بیکار اور لغویات کی جانب لایا جائے اور مزید احساس کمتری میں مبتلا کیا جائے، محرومیوں کو ہوا دی جائے. کیا پیمرا اس سنگین سازش سے بےخبر ہے؟ ان کی نشریات پر کوئی چیک اینڈ بیلنس کیوں نہیں ہے؟ پاکستانی ریڈیو چینلز بھی ان سے متاثر ہیں اور قبائلی نوجوانوں میں آگاہی وشعور کے بجائے بیرونی چینلز کی پیروی کرتے ہوئے ٖفضول پروگرامات نشر کرنے میں مصروف ہیں. ریڈیو فاٹا میں اہم تبدیلی لاسکتا ہے اور اس کے ذریعے تعلیم اور رواداری کو عام کیا جاسکتا ہے. کئی نوجوان ہر وقت ریڈیو لیے نظر آئے، پوچھنے پر بتایا کہ اب عادت بن گئی ہے. ایک اور عجیب بات سامنے آئی، جمعہ کے دن ایک بجے سے دو بجے تک خصوصی فرمائشی پروگرامات ان چینلز سے نشر کیے جاتے ہیں، نوجوانوں کے پسندیدہ گانے نشر کیے جاتے ہیں، نوجوان اپنا نام ریڈیو پر سننے کے لیے انتظار کرتے ہیں، اس طرح ہزاروں نوجوانوں کی جمعہ کی نماز رہ جاتی ہے.

اس ایک اور اہم بات یہ ہے کہ چند برس پہلے قبائلی علاقوں میں سولر توانائی سے چلنے والے لاکھوں ریڈیو سیٹ تقسیم کیے گئے، وہ بھی بالکل مفت، تاکہ شمسی توانائی والے یہ سیٹ آسانی سے ان کے ایجنڈے کے فروغ میں معاون ثابت ہوں. اس کے بعد آگاہی و امداد کے نام پر غیر سرکاری تنظیمیں سرگرم کی گئیں جن کی تعداد میں روز بروز اضافہ ہوتا جا رہا ہے. ان کی آڑ میں کئی غیر ملکی ادارے پختونستان کی تحریک کو فعال کرنے کے لیے سرگرم ہیں، نوجوان خصوصی نشانے پر ہیں، ورکشاپس، سیمینارز، بڑی تنخواہیں، اعلی سرکاری عہدیداروں سے ملاقاتیں. آزادی رائے کے نام پر انھیں گمراہ کیا جارہا ہے، نا پختہ ذہن کے نوجوان بیرونی ایجنڈے کو سمجھنے سے قاصر ہیں. انڈیا سمیت کئی ممالک اس سازش میں ملوث ہیں. اس وقت افغانستان کے صوبہ جلال آباد میں گریٹر پشتونستان منصوبے پر نہایت ہی سرگرمی کے ساتھ کام ہورہا ہے. فاٹا و خیبر پختونخوا سے تقریباً 2500 پڑھے لکھے بیروزگار پختون نوجوان جلال آباد میں مقیم ہیں، جبکہ کئی پڑے لکھے نوجوان کابل میں میڈیا سے منسلک ہوچکے ہیں اور ان کے اندر پاکستان کے خلاف اتنا زہر بھرا جارہا ہے جس کا تصور نہیں کیا جا سکتا. اس منصوبے کے مرکزی کرداروں میں ایک بڑی لسانی جماعت کے چند رہنما اور کچھ دوسرے رہنما اور این جی اوز کے کارندے شامل ہیں. خاموشی سے اس سازش پر زور و شور سے کام ہو رہا ہے، را فنڈز مہیا کر رہی ہے جبکہ افرادی قوت افغان انٹیلیجنس این ڈی ایس فراہم کرتی ہے۔

سوال یہ ہے کہ ریاستی ادارے اس سنگین سازش کو کیوں محسوس نہیں کر رہے؟ مغربی ریڈیو چینلز کے ذریعے کیا جانے والا پروپیگنڈہ ملکی سالمیت کے لیے انتہائی خطرناک ہے. را اور این ڈی ایس کی سازشوں کے سدباب کے لیے چیک اینڈ بیلنس مزید ضروری ہوگیا ہے. یہ قبائلی نوجوان ملک کی ترقی کے لیے قیمتی سرمایہ بن سکتے ہیں، ان کو بیرونی عناصر کے ہاتھوں استعمال ہونے سے بچانے کا فرض ریاست کا ہے. قبائل کو ان کی دہلیز پر سہولیات فراہم کی جائیں، ریاستی توجہ کی فوری ضرورت ہے. قبائل آج بھی پاکستان زندہ باد کا نعرہ لگاتے ہیں، دوسری طرف برہمداغ بگٹی کا تازہ ویڈیو بیان آپ کے سامنے ہے جس میں اس نے مودی کے بیان کو بلوچ عوام کے لیے اچھا قرار دیا ہے. کہیں ایسا نہ ہو کہ فاٹا میں بھی دشمن کی سازش کامیاب ہو، دشمن ہمارے لیے گڑھے کھود رہا ہے، بچنا ہم نے خود ہے، وقت کم ہے اور دشمن چاروں طرف پھیل چکا ہے، فوری طور پر غور کرنے اور لائحہ بنانے کی ضرورت ہے۔