پچھلے کئی دنوں سے بعض سیاسی امور پر میں نے اپنی آرا کا اظہار کیا تو کئی ان دوستوں نے، جو ”علمی“ امور پر بالعموم میرے مؤقف کو پسند کرتے رہے، ان ”سیاسی“ آرا پر سخت حیرت کا، اور بعض نے صدمے کا، اظہار کیا۔ پہلے تو میرا خیال تھا کہ وضاحت کی ضرورت نہیں ہے کیونکہ سارے پڑھے لکھے لوگ ہیں اور مانتے ہیں کہ ہر شخص کو رائے کی آزادی کا حق حاصل ہے لیکن بعض تبصروں نے چند سطور وضاحت کے لیے لکھنے پر مجبور کردیا ہے۔
1۔ سیاسی امور میں فوج کی آمریت کو میں قطعاً ناجائز سمجھتا ہوں اور میری خواہش، کوشش اور دعوت یہی ہے کہ فوج کو سیاسی قیادت کے ماتحت رہ کر ملک کی سلامتی اور بقا کا فریضہ سرانجام دینا چاہیے۔ سیاسی امور کے علاوہ خالص فوجی امور، جیسے سوات آپریشن اور اس سے پہلے اور اس کے بعد قبائلی علاقوں میں آپریشنز ، پر بھی مجھے فوج کے مؤقف اور کردار دونوں پر سخت اعتراضات ہیں۔ ان سے بھی زیادہ سخت اعتراضات مجھے مالیاتی امور میں فوج کی دلچسپی سے ہے اور کرپشن کو میں نے کبھی صرف سیاست دانوں تک محدود فرض نہیں کیا۔ فوج کی قربانیوں کے اعتراف کے باوجود اس طرح کے معاملات پر تنقید میں ضروری سمجھتا ہوں اور کرتا آیا یوں۔
2۔ عمران خان کی سیاست اور پی ٹی آئی کے کلچر پر مجھے سخت تحفظات ہیں لیکن میں عمران خان کو یہودی ایجنٹ یا پی ٹی آئی کو یہودی ایجنڈے پر کارفرما نہیں سمجھتا۔ نہ ہی میں جمعیت علمائے اسلام یا جماعت اسلامی یا کسی اور مذہبی سیاسی جماعت کو ”کشتیِ نوح“ مانتا ہوں۔ مذہبی سیاست کی ضرورت اور مذہبی سیاستدانوں کی بعض خوبیوں کا میں معترف ضرور ہوں لیکن ان جماعتوں کے کردار اور ان کے مؤقف پر کئی اعتراضات بھی کرتا ہوں۔ مذہبی جماعتوں کے اتحاد ایم ایم اے کی پانچ سالہ کارکردگی کا میں نے بڑے قریب سے مشاہدہ کیا ہے اور میری سوچی سمجھی رائے یہ ہے کہ وہ کارکردگی نہایت مایوس کن رہی ہے۔ اسی طرح کے تحفظات مجھے قوم پرستوں اور پیپلز پارٹی کی سیاست پر بھی ہیں۔
3۔ موجودہ سیاسی بندوبست میں میرے نزدیک عمران خان کی حیثیت persistent objector کی ہے اور اس کا سب سے بڑا فائدہ یہ ہے کہ میاں صاحب میرے صوبے کے لیے وہ وحشیانہ طرز عمل اختیار نہیں کر پا رہے جو کبھی ان کا خاصہ رہا ہے۔ صوبہ سرحد پر (جسے اب خیبر پختونخوا کہا جاتا ہے) آٹے کی بندش صرف ایک مثال تھی جو کل ذکر کی ہے اور جس سے ان کے اتحادی قوم پرست عوامی نیشنل پارٹی کے وزرا بھی ان کو نہیں روک پائے تھے۔اگر یہ چیخنے چلانے والے نہ ہوتے تو کیا آج پٹرول 64 روپے فی لیٹر پر بک رہا ہوتا؟ دیکھیے۔ آج بھی حکومت کو سفارش کی گئی ہے کہ وہ پٹرول کی قیمت میں 6 روپے 40 پیسے کا اضافہ کردے لیکن یقین کیجیے کہ حکومت ایسا نہیں کرے گی۔ کیا اس کی وجہ وزیر برائے اپوزیشن امور جناب خورشید شاہ صاحب ہیں؟
4۔ نواز شریف صاحب کو ان کی کرپشن، ان کے آمرانہ مزاج اور میرے صوبے کے خلاف ان کے تعصب کی بنا پر میں کسی طور بھی نہ جمہوری لیڈر مانتا ہوں اور نہ ہی قومی لیڈر۔ یہ میری سو فیصد ذاتی رائے ہے اور ڈھائی عشروں کے سوچ بچار پر مبنی ہے۔ اس مؤقف کی عمران خان یا پی ٹی آئی کے مؤقف سے مماثلت محض اتفاقی ہے۔ ضروری نہیں کہ یہ مؤقف رکھنے والا ہر شخص”انصافی“ ہو، خواہ میں اس مؤقف کو بالکل مبنی بر انصاف کہوں۔
5۔ تو حضور ، آمریت کا میں سخت ترین مخالف ہوں لیکن جب میں میاں صاحب کی آمریت پر اعتراض کرتا ہوں تو آپ اسے لازماً آمریت کی، یا عمران خان کی، حمایت سمجھ لیتے ہیں۔ اسی طرح آپ جمہوریت کی حمایت، یا آمریت کی مخالفت کو نواز شریف کی حمایت کے ساتھ لازم و ملزوم سمجھتے ہیں۔ مجھے اسی سے اختلاف ہے۔ آمریت کی مخالفت کے وجوب سے نواز شریف کی حمایت کا وجوب ثابت نہیں ہوتا۔ ہوسکتا ہے کہ کوئی شخص نواز شریف کا مخالف ہو اور اس کے باوجود وہ عمران خان کا ساتھی نہ ہو؛ یہ بھی ہوسکتا ہے کہ کوئی شخص عمران خان کی کسی بات کی حمایت کرتا ہو لیکن وہ منصف ہو، ”انصافی“ نہ ہو۔
دنیا بلیک اینڈ وہائٹ نہیں ہے۔ بہت سے رنگ اور بھی ہیں۔ یہ تو بش نے کہا تھا کہ اگر آپ ہمارے ساتھ نہیں ہیں تو آپ دہشت گردوں کے ساتھ ہیں۔ ہاں! یاد آیا۔ نواز شریف صاحب کے اولین مربی نے بھی کہا تھا کہ اگر آپ اسلامی نظام کا نفاذ چاہتے ہیں تو مجھے اگلے پانچ سال کے لیے صدر مان لیجیے۔ یہ تو خواہ مخواہ ہی لوگ کہہ رہے ہیں کہ نواز شریف صاحب اپنے اولین مربی کے اثر سے نکل آئے ہیں!
عمران خان تم جیت گئے ہو، جنگ کے آغاز سے قبل ہی ’ن لیگی‘ حکومت کی تزویراتی شکست کا بگل بج رہا ہے۔ جس طرح ان کے لشکر میں افراتفری کے آثار نمایاں ہیں اور جس طرح لیگی تنخواہ یافتہ میراثی سرکاری اور بعض غیر سرکاری ٹی وی پر بیٹھے ٹامک ٹوئیاں مار کر اپنی راتب خوری کا حق ادا کر رہے ہیں تو اس سے تو یہی لگتا ہے کہ ضرب بہت کاری ہے اور بس شکست کا اعتراف ہوا ہی چاہتا ہے۔ جب دلیل کم پڑتی ہے تو پھر تشدد کو راہ دیتی ہے اور تشدد کا آغاز ہوا ہی چاہتا ہے۔
تاریخ کا مطالعہ کریں تو تاریخ ہمیں بتاتی ہے کہ جب بھی کسی قوم پر کڑا وقت آیا ہے تو قوم متحدہوجایاکرتی تھی قوم کے بڑے اپنے تمام اختلافات بھلاکر ایک ہوجایا کرتے تھے۔سلجوقیوں کا دورحکومت تھا سلطان محمد کی حکومت تھی ۔اپنے عہد کے بڑے مشاہیر عمرخیام ،نظام الدین اورفدائیوں کے سربراہ حسن بن صباح بھی اسی دورسے تعلق رکھتے ہیں۔سلطان کا چھوٹا بھائی سنجر جو کہ ایک بہادرجرنیل تھا اس نے کبھی میدان جنگ میں شکست نہیں دیکھی تھی جس جنگ میں گیا فتح نے اس کے قدم چومے۔اسی دور میں تاتاری اٹھے اور ان کے سامنے جو آیا اسے شکست دیتے چلے گئے تاریخ بتاتی ہے کہ سنجر ہی وہ پہلا جرنیل تھا جس نے میدان جنگ میں تاتاریوں کو پسپاہونے پر مجبورکیا۔اور پھر ایک وقت ایسابھی آتا ہے کہ سنجر خانہ بدوشوں سے شکست کھا جاتا ہے۔اصفہان شہر سے باہرخانہ بدوش رہا کرتے تھے جو سلجوقی سلطنت کو خراج دیا کرتے تھے۔لیکن پھر انہوں نے خراج دینا بندکردیا اورسلجوقی سفیرکو بے عزت کرکے واپس بھیج دیا۔اسی دوران سنجر ایک بڑی فوج لیکر تاتاریوں سے مقابلہ کرنے نکلا راستے میں خانہ بدوش بھی آتے تھے چنانچہ سنجر نے آدھی فوج اپنے ساتھ لی اور آدھا لشکر وہیں چھوڑ دیا اورخانہ بدوشوں کو سبق سکھانے کا فیصلہ کیا۔خانہ بدوشوں نے بڑی منتیں کی معافیاں مانگیں اور تین گنا خراج دینے کے وعدہ کیا لیکن سنجر نہ مانا اورتاریخ گواہ ہے کہ جب خانہ بدوشوں نے دیکھا کہ جنگ کے سوا کوئی چارہ نہیں ہے تو وہ ایک ہوگئے انہوں نے طے کرلیا کہ اب مارنا ہے یامرنا ہے۔اورلکھنے والے لکھتے ہیں کہ سنجر جیساجرنیل اورسلجوقیوں جیسی تجربہ کار فوج ان خانہ بدوشوں سے شکست کھا گئی۔یہ اتحاد ہی تو ہے جو قوموں فتح یاب کیا کرتا ہے۔کامیاب کیا کرتا ہے۔
کسی زمانے میں یہ بحث سنا کرتے تھے، کہ رقص غیر اسلامی ہے، یا اسلام اس کی اجازت دیتا ہے، یا نہیں۔ اسی طرح موسیقی کی حرمت کے بارے میں بھی مکالمے سے مناظرے تک سنے، پڑھے۔ اس دوران کبھی یہ موضوع سامنے نہیں آیا، کہ کچھ مخصوص گانوں پر جھومنا اسلامی، یا غیر اسلامی ہوسکتا ہے۔ بھلا ہو اس ذاتی حیثیت کا، کہ ہمارے علم میں آیا، ہندُستانی گانوں ”بیڑی لگئی لے“، ”منی بدنام ہوئی“، جیسے گانوں پہ تھرکنا غیر اسلامی ہے۔
جون کے گرم دن ہیں، بے نظیر بھٹو اپنی حکومت کا آخری ثابت ہونے والا بجٹ پیش کرتی ہیں، مسٹر زرداری مسٹر ٹین پرسنٹ کے نام سے مشہور ہیں، زبان زد عام ہے کہ آبدوزوں سے لے کر جنگلات تک کچھ بھی زرداری صاحب کی کرپشن سے نہیں بچ پا رہا، سناٹے کا عالم ہے، نواز شریف اپوزیشن میں ہوتے ہوئے ہڑتال کی کال دے کر کارکنان کو استعمال کر کے منظر سے غائب رہتے ہیں۔ ایسے میں پہلی مرتبہ دھرنے کا لفظ سننے کو ملتا ہے، اس حال میں کہ جماعت اسلامی کا اسلامک فرنٹ پاکستان بھر میں شکست سے دوچار ہو چکا تھا، دھاندلی کے الزامات اس وقت بھی تھے، لیکن جس کو اپنا کام کرنا ہو وہ کرتا ہے، اٹھاون سالہ عمر رسیدہ قاضی حسین احمد جماعت اسلامی کے کارکنان کو اسلام آباد میں دھرنے کی کال دیتا ہے، دھاندلی اور شکست کے بعد زخم کھائے کارکنان اپنے قائد کی آواز پر لبیک کہتے ہیں، اور پھر دنیا منظر دیکھتی ہے کہ اس قاضی حسین احمد کو راولپنڈی پولیس مری روڈ پر تشدد کا نشانہ بناتی ہے، کارکنان قاضی حسین احمد کے آگے ڈھال بن جاتے ہیں، اٹھاون سالہ قاضی حسین احمد کارکنان سے پہلے پولیس کی لاٹھیوں کی زد میں ہے، سفید ریش بابا جی کی ٹوپی اتر چکی ہے، صوبائی اسمبلی میں جماعت سلامی کا پارلیمانی لیڈر چوہدری اصغر علی گجر سر پر گولی لگنے سے زخمی ہے، چار لوگ پولیس فائرنگ سے جاں بحق ہو چکے ہیں اور پھر دنیا یہ منظر بھی دیکھتی ہے کہ وہ قاضی اکیلا اس محاذ پر ڈٹا ہوا ہے، پورے پاکستان میں وہ ایک ایک کونے میں اپنی تحریک کو پھیلا دیتا ہے، اپنی آنکھوں سے منظر دیکھا کہ وہ نواز شریف جو ہڑتال کی کال دے کر بیرون ملک چلا جاتا تھا، قاضی حسین احمد کی تحریک میں خود شمولیت کا اعلان کرتا ہے. میں نے نون لیگ کے ایم پی ایز کو قاضی حسین احمد کے گھٹنے کو ہاتھ لگاتے دیکھا، لیکن جماعت کسی کے سامنے گھٹنے نہیں ٹیکتی، اور نہ ہی کسی کو تحریک میں شامل ہونے کے لیے منتیں کرتی ہے، تحریک روز بروز شدت اختیار کر رہی ہے اور اس میدان اب بھی قاضی بابا تنہا ہے۔
مقام …. بند گلی.
