Author: آصف محمود

پڑھیے اور سر پیٹ لیجیے۔
نرگسیت کے گھونسلے سے سر نکال کر خان صاحب نے فرمایا:
’’ ناراضی کس بات کی، مارچ کی دعوت دینے جا رہا ہوں، رشتہ لینے تو نہیں جا رہا‘‘۔
گویااخلاقیات کے علمبرداروں نے اپنے کزن طاہر القادری کو بھی نہیں بخشا، حالانکہ کزنز کا ’دادا‘ ایک ہوتا ہے۔

اختلاف ایک چیز ہے ،جسے گوارا کیا جانا چاہیے کہ یہ زندگی کا حسن ہے اور سماج میں شعوری بیداری کی علامت لیکن اخلاقیات سے گری ہوئی گفتگو پست ذہنیت کی علامت ہے۔ شیخ رشید جیسوں کی صحبت صالح نے اب معلوم نہیں عمران خان کو بدل دیا ہے یا صرف بے نقاب کیا ہے، تاہم وہ جو زبان استعمال کر ہے ہیں، وہ ان کے فکری افلاس اور اخلاقی بحران کا اعلان عام کر رہی ہے۔

تحریک انصاف نے اور کچھ کیا یا نہیں بدتمیزی اور گالیوں کو ایک کلچر بنا دیا۔ ہماری صدیوں کی تہذیب و روایت ہے کہ مائیں، بیٹیاں سانجھی ہوتی ہیں۔ اختلاف بھلے دشمنی تک بھی پہنچ جائے، مائوں بیٹیوں کا احترام کیا جاتا ہے۔ عمران خان نے اس تصور کو بیچ بازار پامال کر دیا ہے۔ جب قائد محترم ہی تہذیب نفس سے محروم ہوں تو ٹائیگرز کا تو کیا ہی کہنا۔ بعض تو اسم بامسمی ہیں۔ دکھ ہوتا ہے کہ ان سے ہم نے کیا توقعات وابستہ کر لیں لیکن یہ کتنے چھوٹے اور کتنے بودے نکلے۔

مریم نواز کے بارے میں تحریک انصاف کے عام کارکنان نے نہیں، مرکزی عہدیداروں نے جس زبان میں گفتگو فرمائی اور جس طرح کے ٹویٹ کیے، وہ بتا رہے ہیں کہ تحریک انصاف کا اخلاقی بحران کتنا شدید ہو چکا ہے۔ جواب آں غزل کے طور پر ٹیرن خان کے بارے میں بھی بہت کچھ کہا جا سکتا ہے لیکن یہ بھی ویسی ہی بد تہذیبی اور بد اخلاقی کہلائے گی جس کا مظاہرہ تحریک انصاف کر رہی ہے۔

عمران کا مسئلہ یہ ہے کہ ان کی عمر صالح کا غالب ترین حصہ ’چھڑے‘ کے طور پر گزرا ہے۔گھر، آنگن، چاردیواری میں پنپنے والے رشتوں کی لطافت سے وہ محروم ہی رہے۔ انہیں اس لطیف احساس کی بھی کوئی خبر نہیں کہ بیٹی کیا ہوتی ہے۔ ان کے گھر کا آنگن بیٹی کے قہقہوں اور اور اس کی شرارتوں سے محروم ہی رہا۔ انہیں خبر ہی نہیں باپ اور بیٹی کا رشتہ کیسا ہوتا ہے۔ وہ نہیں جانتے کہ رات گئے جب بیٹی ضد کرے ’’ بابا پیپسی کی بھوک لگی ہے‘‘ تو اس ضد کو پورا کرنے کے لیے گھر سے گاڑی نکالنا کتنا پیارا تجربہ ہوتا ہے۔بیٹی کی مسکراہٹ اور قلقاریوں میں کیسا امرت ہوتا ہے، انہیں معلوم نہیں۔ وہ اس بات سے بھی بے خبر ہیں کہ بیٹی کی آنکھ پر نم ہو جائے تو من کی دنیا کیسے اتھل پتھل ہو جاتی ہے۔ انہیں قدرت نے ایک باپ کی ذمہ داریاں نبھانے کا موقع بھی نہیں دیا۔ عالی ظرف جمائما بھابھی ہی بچوں کا باپ بھی بن گئیں۔ مقبول ترین آدمی کی زندگی کا یہ پہلو آدمی کو اداس کر دیتا ہے۔ وہ اس حوالے سے قابل رحم ہیں۔

لیکن وہ ایک رہنما بھی ہیں۔ انہیں معلوم ہونا چاہیے کہ لاکھوں دل ان کے لیے دھڑکتے ہیں۔ وہ اگر تہذیب نفس سے بےنیاز ہو کر عامیانہ طرز گفتگو اختیار کریں گے تو یہ سماج کی اخلاقی بنیادیں کھود ڈالنے کے مترادف ہوگا۔ اس سما ج پر رحم کیجیے۔

ٹیکسلا میں انتخابی ریلی سے خطاب کر کے، کہا جا رہا ہے کہ، عمران خان نے چوتھی مرتبہ الیکشن کمیشن کے قانون کی خلاف ورزی کی ہے۔ میرے پیش نظر سوال یہ ہے کہ کیا الیکشن کمیشن کے اس ضابطے کو مسلسل پامال کرتے چلے جانا عمران خان کا ایک درست رویہ ہے؟

میں قانون کا ایک طالب علم ہوں اور قانون کی عملداری پر یقین رکھتا ہوں۔ میں نے اس سوال پر بہت غور کیا اور میری رائے یہ ہے کہ عمران خان اور کیا کرتے؟جس قانون کی بنیاد ہی بد نیتی پر ہو اس پر عمل کیسے کیا جا سکتا ہے؟ کیا عمران خان اپنے ہاتھ اور بازو اس لیے کاٹ پھینکیں کہ نون غنیت گاہے قانون کی شکل میں ظہور کرتی ہے؟
قانونی نون غنیت ملاحظہ فرمائیے۔

ایک مسلمہ ضابطہ یہ ہے کہ انتخابات کے دوران اعلی حکومتی شخصیات انتخابی حلقے میں کوئی ایسی سرگرمی نہیں کریں گی جو انتخابی عمل پر اثر انداز ہو۔ حکومت چونکہ تجربہ کاروں کی ہے اس لیے سر جوڑے گئے کہ نواز شریف توکسی انتخابی حلقے میں جا نہیں سکتے تو کوئی ایسا راستہ نکالا جائے کہ عمران خان بھی نہ جا سکیں۔ چنانچہ نیا ضابطہ متعارف ہو گیا کہ جس حلقے میں الیکشن ہوگا وہاں کسی بھی جماعت کا سربراہ نہیں جا سکے گا۔ اس ضابطے کی شان نزول بادی النظر میں بد نیتی ہے۔ اس پر عمل نہیں کیا جا سکتا۔گویا آپ روز بد نیتی پر مبنی قانون بنواتے رہیں اور عمران خان ساری عمر انہیں چیلنج کر کر کے دھکے کھاتا رہے اور پیشیاں بھگتتا پھرے؟

قبلہ پرویز رشید عملا وفاقی وزیر برائے مذمت عمران خان بنے پھرتے ہیں اور اس پر ارشاد فرماتے ہیں کہ الیکشن کمیشن کو عمران کے خلاف کارروائی کرنی چاہیے۔ ساتھ ہی صاحب نے مطالبہ کیا کہ الیکشن کمیشن تمام امیدواروں کو مساوی مواقع فراہم کرے۔ یعنی اگر ن لیگ کا سربراہ انتخابی جلسے میں نہیں جا سکتا تو عمران کو بھی نہ جانے دے۔
ملک نہ ہوا نون غنوں کی خاندانی جاگیر ہو گئی۔
مساوی مواقع، کچھ نہ سمجھے خدا کرے کوئی!

جب جہانگیر ترین کے انتخابی حلقے میں نواز شریف نے کروڑوں کی سکیموں کی رشوت ووٹرز کو پیش کی تھی، اس وقت کیا دونوں امیدواروں کے پاس مساوی مواقع تھے؟
باقی جملہ نون غنوں کو جان لینا چاہیے کہ اگرتحریک انصاف کا سربراہ جلسے میں جا رہا ہے تو آپ بھی کوئی ایسا سربراہ بنا لیں جو وزیر اعظم نہ ہو تو وہ بھی چلا جایا کرے۔ عہدے بھی سارے آپ نے نکے اور وڈے بھا جی ہی کی جیب میں ڈالنے ہیں اور واویلا مچا کر قوانین کو ایک تماشا بنانا ہے۔

پابندی سیاسی جماعت کے سربراہ پر نہیں اصل میں وزیر اعظم پر ہے کہ ان کے جانے سے انتخابی عمل متاثر ہوتا ہے۔ اب نون غنوں نے چونکہ پارٹی سربراہ اور وزیر اعظم کے عہدوں کو ایک ہی شخص کی جیب میں رکھنا ہے اس لیے نیا قانون بنا دیا کہ کسی بھی جماعت کا سربراہ جلسے سے خطاب نہیں کرے گا۔ ایسے میں عمران خان کیا کرے؟

الیکشن کمیشن نے عمران خان کو تو نوٹس جاری کر دیے ہیں. کیا اس میں ہمت ہے کہ وہ ذرا ایک نوٹس نواز شریف کو بھی جاری کرے کہ جہانگیر ترین کے حلقے میں انتخابی عمل کے دوران بھاری مالیاتی پیکیجز کا لالچ ووٹرز کو انہوں نے کیوں دیا۔ (اس پیکیج کا رشوت ہونا اس سے بھی ثابت ہے کہ شکست کے بعد میاں صاحب نے وہاں ایک ٹکہ نہیں دیا جہاں کروڑوں کے وعدے فرما کر آئے تھے)۔

باقی جہاں تک اس دھمکی کی الیکشن کمیشن کے پاس توہین عدالت میں چھ ماہ قید میں ڈالنے کا اختیار موجود ہے تو جناب صرف اتنا عرض کر دوں کہ سماج کو خوف کی لاٹھی سے نہیں، انصاف، دیانت اور مساوات سے چلایا جاتا ہے۔

معرکہ ستمبر کے بارے میں کل تفصیل سے لکھا، لیکن میں سمجھتا ہوں اسے دیکھنے کا ایک اور زاویہ بھی ہے اور وہ بہت اہم ہے۔ یہ ہے معرکہ ستمبر پر انتہا پسند سیکولر بیانیہ۔ یہ معرکہ سیکولر حضرات کی چاند ماری کا تازہ میدان ہے۔ ان کا دعویٰ ہے کہ قوم خواہ مخواہ خوشیاں منا رہی ہے، حالانکہ پاکستان کو اس جنگ میں شکست ہوئی تھی۔ میرے نزدیک اس موقف کا ابلاغ کسی تحقیقی عمل کے نتائج سے زیادہ ان احباب کی نفسیاتی گرہوں کی نشاندہی کرتا ہے۔ سوال یہ ہے: یہ گرہیں کب کھلیں گی؟

سیکولر حضرات کا ایک مسئلہ ہے، یہ دنیا کے ہر معاملے میں معتدل رہیں گے، ہر ذی روح کی دل آزاری برائی تصور کریں گے، ہر مکالمہ پوری شائستگی سے کریں گے، ہر انسان کی آزادی کی بات کریں گے۔ لیکن جب معاملہ اسلام یا مسلمانوں کا آن پڑے گا، یہ اعتدال کا دامن بھی چھوڑ دیں گے اور تہذیب و شائستگی بھی۔ یہ موقع کی تلاش میں رہیں گے کہ کہاں مسلمانوں کے شعور اجتماعی کا مذاق اڑایا جائے، کہاں ان کا تمسخر اڑایا جائے، کہاں تحقیق کے نام پر ان کی دل آزاری کی جائے۔ چنانچہ کبھی تحقیق کے نام پر یہ پورے اہتمام سے ہمیں بتاتے ہیں کہ قرآن پاک کا قدیم ترین نسخہ نبی رحمت ﷺکی پیدائش سے پہلے کا ہوسکتا ہے تو کبھی یہ معرکہ ستمبر سے شکست برآمد کرکے خوشیاں مناتی قوم کو بد ذائقہ کرتے ہیں۔ مکرر عرض ہے کہ یہ تحقیق نہیں ایک نفسیاتی عارضہ ہے۔

فوج طالبان سے لڑے تو یہ خود اس کے قصیدے پڑھیں گے لیکن فوج بھارت کو ناکوں چنے چبوا دے تو یہ اس کی فتح مان کر نہیں دیں گے۔ اس نفسیاتی مسئلے کی تفہیم کے لیے معرکہ ستمبر کے بیانیے کو دیکھنے کی ضرورت ہے۔ معرکہ ستمبر کا سارا بیانیہ مذہبی ہے۔ اس دور میں جو نغمے لکھے گے انھی کو دیکھ لیجیے: ’’اے مردِ مجاہد جاگ ذرا اب وقتِ شہادت ہے آیا، اے راہِ حق کے شہیدو، وفا کی تصویرو!، گئے جو ہوگے شہادت کا جام پی کر تم، رسول پاک ﷺ نے بانہوں میں لے لیا ہو گا، علی تمہاری شجاعت پہ جھومتے ہوں گے، حسین پاک نے ارشاد یہ کیا ہوگا، تمہیں خداکی رضائیں سلام کہتی ہیں‘‘۔

اب کوئی ایسا بیانیہ جس میں مذہب کا حوالہ ہو، ان صاحبان کے لیے قابلِ برداشت نہیں ہے۔ جہاں یہ مذہبی بیانیہ سامنے آئے گا، ان کے ہاں رد عمل پیدا ہوگا کیونکہ یہ اپنی نفسیاتی گرہ کے ہاتھوں مجبور ہیں۔ یہ چاہتے ہیں کہ ایک ایک کرکے ہر اس حوالے کو منہدم، غیر معتبر یا متروک کردیا جائے، جس کی مذہب سے کوئی نسبت ہو۔ انسائیکلوپیڈیا آف تھیالوجی میں سیکولرزم کی اسی نفسیات کا ذکر یوں کیا گیا ہے: ’’سیکولرزم آج کل ایک ایسا طریق عمل بھی سمجھا جارہا ہے جس کے ذریعے انسانی زندگی کے مختلف عناصر (جیسے رسوم، آرا، سماجی طرزِ عمل، حتیٰ کہ اشیاء اور بشر) یا مکمل حیاتِ انسانی کو پابند کیا جائے کہ وہ اپنا تعین مذہب کے ذریعے نہ کرسکے‘‘۔ اب جہاں مذہب کا حوالہ آتا ہے، یہ اپنی نفسیات کے اسیر ہوجاتے ہیں۔ چنانچہ جب انہوں نے دیکھا کہ قوم بھر پور طریقے سے یومِ دفاع منارہی ہے اور اس کا سارا بیانیہ مذہبی ہے اور یہ بیانیہ دو قوموں کے تصور کو مستحکم کررہا ہے تو انہوں نے اس جنگ میں شکست برآمد کرلی۔ یہ نفسیات کے تقاضوں کے ہاتھوں مجبور تھے۔

ان احباب کے ہاں دوسری نفسیاتی گرہ یہ ہے کہ یہ سمجھتے ہیں یہ اس وقت تک جمہوریت پسند اور آئین دوست ثابت نہیں ہوسکتے جب تک یہ فوج کی بطور ادارہ تضحیک نہ کرلیں۔ چنانچہ فوج کے بارے میں عوام میں پسندیدگی کے جذبات پیدا ہونے لگیں تو ان کو جمہوریت خطرے میں پڑتی نظر آتی ہے اور یہ میدان میں اتر آتے ہیں۔ لاشعوری طور پر یہ فوج بطور ادارہ اور فوجی آمر میں فرق نہیں کر پاتے۔ آمریت سے نفرت کا مطلب ہرگز یہ نہیں کہ فوج کو بطور ادارہ بےتوقیر کیا جائے اور فوج سے محبت کا ہرگز یہ مطلب نہیں کہ آمروں کا ساتھ دیا جائے۔ یہ فرق روا رکھا جانا ضروری ہے۔ جہاں یہ فرق ختم ہوا، اعتدال بھی ختم ہوا اور خرابی نے جنم لیا۔ اب عجب تماشا یہ ہے کہ سیکولر احباب بھی، الا ماشاء اللہ، آمریتوں کے ساتھ ہنی مون مناتے رہے ہیں۔ مشرف دور میں کون کہاں کھڑا تھا، ایک فہرست بنا لیجیے، لگ پتا جائے گا۔ فرق صرف یہ ہے کہ مذہبی انتہا پسند ایک آمر کے دست و بازو رہے اور سیکولر انتہا پسند دوسرے آمر کے۔ آمریتوں سے یہ حضرات فیض یاب ہوتے رہے، لیکن ادارے کو سینگوں پر لے لیتے ہیں تاکہ جمہوریت دوستی کے باب میں سند رہے اور بوقت ضرورت کام آئے۔

تیسری گرہ بھی ہے۔ بعض احباب ہر معاملے میں ایک نئی بات کرکے لوگوں کو حیران کرنا چاہتے ہیں۔ یہ گرہ مذہبی طبقے میں بھی ہے اور سیکولر گروہ میں بھی۔ چنانچہ اس سوچ کے تحت بھی یاروں نے ستمبر کی جنگ سے شکست برآمد کرلی۔

غلطیاں کہاں نہیں ہوتیں، ستمبر کی جنگ میں بھی ہوئیں اور انتہائی سنگین۔ آپریشن جبرالٹر سے گرینڈ سلام تک، قیادت کی دانش پر درجنوں سوالات اٹھتے ہیں لیکن ایک کامیاب دفاع کو شکست کہنا کیا ایک صحت مند رویہ کہلائے گا؟ کیا بھارت کا کوئی ایک حملہ کامیاب ہوسکا؟ کیا اس کے جرنیل لاہور جم خانہ میں جام سے شغل فرما سکے؟ کیا اس کی بحریہ کراچی کا رخ کر سکی؟ کیا لاہور اور چونڈہ میں عزم و ہمت کے انمٹ نقوش نہیں چھوڑے گئے؟ کیا دفاع کرنا کامیابی نہیں ہوتی؟

اگر ایم ایم عالم کے کارنامے پر ہم فخر کرتے ہیں، چونڈہ کے معرکے پر اپنے شہدا کی تحسین کرتے ہیں، عزیز بھٹی کی قربانی کو یاد کرتے ہیں، سیسل چودھری کو خراج عقیدت پیش کرتے ہیں، اصغر خان اور نور خان کی قیادت کو سراہتے ہیں جنہوں نے پیشہ ورانہ مہارت سے ایک ادارے کو تشکیل دیا، اور اگر ہم چھ ستمبر کو یوم دفاع مناکر ملک کے دفاع کا عہد کرتے ہیں اور شہدا اور غازیوں کی قربانیوں کا اعتراف کرتے ہیں تو اس میں غلط کیا ہے؟ ہر چیز کی سند کالم نگاروں اور اینکر پرسنوں سے حاصل نہیں کی جاسکتی، کچھ گواہیاں دھرتی پر بہنے والا خون بھی دیتا ہے۔

لیکن پھر بھی ضد ہے تو مان لیتے ہیں۔ چلیں، اب ایک نئی تاریخ لکھتے ہیں۔ ایک ’’روشن خیال‘‘ تاریخ۔ عزیز ہم وطنو، یہ ایم ایم عالم، عزیز بھٹی، اور گمنام قبروں میں دفن ہونے والے ماؤں کے لال ہم نے خواہ مخواہ ہی ہیرو بنالیے۔ اصل کہانی کچھ اور ہے۔ جب دشمن بی آر بی کے اس پار پہنچا تو پاکستان کی جانب سے ایک پروڈیوسر آگے بڑھے اور بھارتی کمانڈر کو کہا: ’’ناہنجار شور نہ کرو، ابھی اینکر صاحب کا شو ریکارڈ ہو رہا ہے‘‘۔ یہ تنبیہ کارگر ثابت ہوئی اور آزادی صحافت کے احترام میں دشمن واپس چلا گیا۔ جب ایک جونیئر بھارتی افسر نے واپسی کا حکم ملنے پر اپنے کمانڈر کو جم خانہ لاہور میں شراب سے جی بہلانے کا وعدہ یاد دلایا تو اس افسر نے اپنے جونیئر سے کہا: جوان ہمارے حصے کا یہ کام اب پاکستان کے’روشن خیال‘ دانشور سنبھال لیں گے۔

ادھر چونڈہ میں بھی یہی ہوا۔ بھارت کی ٹینک اس لیے آگے نہ بڑھ سکے کہ چونڈہ کے اس پار چند روشن خیال دانشور بیٹھے تھے، بھارتی فوجی نے ٹینک سے سر نکال کر پوچھا کیا یہ چونڈہ ہے؟ تو روشن خیال دانشور نے جواب دیا: ’’ہم کسی چونڈہ کو نہیں جانتے، ہم صرف چنڈو خانے کو جانتے ہیں‘‘۔ چنانچہ دشمن نے اپنے غلط نقشوں کو آگ لگائی اور روتا پیٹتا واپس چلا گیا۔

طاہر القادری راولپنڈی میں نہیں رکیں گے۔ وہ اسلام آباد کا رخ ضرور کریں گے۔
ہو سکتا ہے یہ میرا ضعف بصارت ہو لیکن مجھے محسوس ہو رہا ہے کہ تحریک قصاص اور تحریک احتساب کا اصل مقصد وہ نہیں جو بیان کیا جا رہا ہے۔ یہ مقصد کچھ اور ہے ۔ طاہر القادری صاحب مری روڈ سے اسلام آباد کا رخ ضرور کریں گے۔ یوں دارلحکومت میں وہی کھیل شروع ہو جائے گا جو اس سے قبل ناکام ہو چکا۔

چند پہلو اس باب میں انتہائی قابل توجہ ہیں۔
1۔ احتجاج ظاہر ہے جمہوری حق ہے لیکن کیا احتجاج کے نام پر دارالحکومت پر یلغار کرنے کے کلچر کی حوصلہ افزائی کی جا سکتی ہے۔ یہ سلسلہ چل نکلا تو اس کا انجام کیا ہوگا۔ کیا اسلام آباد میں آ کر ڈیرے جمانے سے جیسا ماضی میں ہوا ہے، آپ دنیا میں اپنی ریاست کا مذاق نہیں اڑاتے۔
2۔ اگر کوئٹہ میں ہونے والے دھماکوں کو سی پیک کے خلاف سازش تصور کیا جاتا ہے تو اسلام آباد پر اس طرح کی یلغار کو بھی ایسی ہی ایک سازش کیوں تصور نہیں جا تا۔ اگر ہم سی پیک کی کامیابی کے لیے ہر قیمت دینے کو تیار ہیں تو کیا وجہ ہے کہ ان لشکریوں کو ایک پیغام تک نہیں بھیجا جا سکتا کہ احتجاج ضرور کیجیے لیکن ریاست کا مذاق اڑانے کی اجازت نہیں دی جائے گی۔
3۔ منتخب وزرائے اعظم کو ہمیشہ اس ملک میں ولن بنا کر کیوں پیش کیا جاتا رہا۔ یہ سلسلہ کب ختم ہوگا۔
4۔ بطور ادارہ فوج بہت محترم ہے، اور ہمارا آخری دفاعی حصار بھی۔ اسی طرح پارلیمان بھی بہت محترم ہے اور قومی وحدت کی علامت بھی ہے۔ دونوں کا احترام لازم ہے، اور دستور کی بالادستی پر کوئی سمجھوتہ نہیں ہونا چاہیے۔
5۔ یہ سوچ ختم ہونی چاہیے کہ نواز شریف ملک دشمن ہے اور اسے ملک کی سلامتی اور بقاء سے کوئی دل چسپی نہیں۔ حب الوطنی نصاب نہیں جس کے جملہ حقوق بحق پنجاب ٹیکسٹ بک بورڈ محفوظ ہوں۔ سوچنے کا انداز مختلف ہو سکتا ہے اور ایک جمہوری وزیر اعظم کو اس کا حق بھی ہے۔ اس پر تنقید بھی ضرور ہونی چاہیے لیکن اس کی حب الوطنی کا آملیٹ بنانے کی کوششوں کی تحسین نہیں کی جا سکتی۔ ہمارے دودھ کے دانت اب گر جانے چاہییں۔
6۔ جو چین آف کمانڈ سپاہی سے آرمی چیف تک ہوتی ہے وہی چین آف کمانڈ آرمی چیف سے وزیر اعظم تک قائم ہونے میں کیا چیز رکاوٹ ہے۔
7۔ اس ملک کے نظام قانون و انصاف کی جانب بھی توجہ دینے کی ضرورت ہے۔ قادری صاحب کے لوگ مرے ہیں۔ حکومت نے نہیں مارے ہوں گے۔ سوال یہ ہے کہ پھر کس نے مارے۔ قاتل پکڑنا کس کی ذمہ داری ہے۔ ریاست انسانی جان کی حرمت کے بارے میں اس طرح بے نیازی کا مظاہرہ کیسے کر سکتی ہے۔ کیا اس طرح سماجی توازن قائم رہ سکتا ہے اور انتہا پسندی ختم کی جا سکتی ہے۔
اور آخری بات کسی کو اچھی لگے یا بری، یہ ہے کہ نواز شریف کی جمہوری حکومت اگر غیر فطری طریقے سے گھر بھیجی گئی تو یاد رکھیے معاملات سنبھالنا بہت مشکل ہو جائیں گے۔ جمہوری عمل کو آگے بڑھنے دیجیے۔ یہ راستہ کٹھن سہی لیکن راستہ یہی ہے۔ اور کسی راستے سے تبدیلی نہیں آ سکتی۔ تبدیلی کا یہی ایک فطری راستہ ہے جسے ارتقاء کہتے ہیں۔

سینیٹ کی قائمہ کمیٹی برائے قانون و انصاف نے سفارش کی ہے کہ الطاف حسین کے خلاف آرٹیکل 6 کے تحت کارروائی کی جائے۔ یہ خبر پڑھ کر میں سوچ رہا ہوں کہ دستور پاکستان کی کچھ کاپیاں ان معزز اراکین پارلیمنٹ کو بھجوا دوں تاکہ انہیں یہ تو معلوم ہو کہ آرٹیکل 6 ہے کیا اور اس کا اطلاق کس قسم کی صورت حال پر ہوتا ہے۔

یہ مطالبہ اگر کسی ایسے ادارے یا تنظیم کی جانب سے آتا جو آئینی نزاکتوں سے آگاہ نہ ہوتے تو نظرا نداز کر دینے کے قابل تھا لیکن یہ مطالبہ ایوان بالا یعنی سینیٹ کی اس کمیٹی کی جانب سے سامنے آیا ہے جس کا شعبہ ہی قانون و انصاف ہے اور اعترزاز احسن، بابر اعوان اور فاروق نائیک جیسے قانون دان جس کمیٹی کے رکن ہیں۔ اب اگر سینیٹ کی قانون و انصاف کی کمیٹی کی آئین فہمی کا عالم یہ ہے تو یہ ایک انتہائی افسوسناک صورت حال ہے۔

دستور پاکستان کا آرٹیکل چھ ہائی ٹریزن یعنی صریح غداری سے متعلق ضرور ہے لیکن وہ اس کی تمام شکلوں اور تمام صورتوں کا احاطہ نہیں کرتا۔ یہ آرٹیکل غداری کی صرف اس صورت کا احاطہ کرتا ہے جو آئین شکنی کی مختلف شکلوں اس کی ترغیب اور اس میں معاونت پر مشتمل ہے۔ یعنی اس آٹیکل کا بنیادی طور پر صرف آئین شکنی سے تعلق ہے۔ ہائی ٹریزن ایکٹ کا معاملہ بھی یہی ہے۔ یہ ایکٹ صرف آرٹیکل چھ کی عملی شرح بیان کرتا ہے اور غداری کی کسی بھی دوسری شکل پر اس ایکٹ کا اطلاق نہیں ہوتا۔ قانون اور آئین سے لاعلم ایک عام آدمی یہی سمجھتا ہے کہ غداری کی کوئی بھی صورت ہو اس پر آرٹیکل چھ لگتا ہے۔ یہ بات درست نہیں ہے۔ تاہم ایک عام آدمی کی بات الگ ہے لیکن اگر سینیٹ کی قائمہ کمیٹی برائے قانون و انصاف کی آئین فہمی کا حال بھی یہ ہو تو یہ ایک لمحہ فکریہ ہے۔

الطاف حسین کے جرائم تعزیرات پاکستان کی دفعہ 121 اور (a) 123 کے تحت آتے ہیں۔ دفعہ 121 میں لکھا ہے کہ جو آدمی پاکستان کے خلاف جنگ کرتا ہے یا اس کی ترغیب دیتا ہے یا اس کی کوشش کرتا ہے اسے سزائے موت یا عمر قید دی جائے گی اور ساتھ ہی جرمانہ بھی عائد کیا جائے گا۔ اسی طرح دفعہ (a) 123 کا کہنا ہے کہ جو شخص پاکستان کو گالی دیتا ہے یا قیام پاکستان کے عمل کی مذمت کرتا ہے اور پاکستان کی سالمیت کے خاتمے کی کوشش یا تائید کرتا ہے تو اسے دس سال تک قید کی سزا سنائی جا سکتی ہے اور ساتھ ہی جرمانہ بھی عائد کیا جائے گا۔

الطاف حسین کے جرائم جس نوعیت کے ہیں ان پر تعزیرات پاکستان کی یہی دو دفعات لاگو ہوتی ہیں۔ آرٹیکل چھ کا الطاف حسین کے جرائم سے کوئی تعلق نہیں۔ معلوم نہیں سینیٹ کی قائمہ کمیٹی برائے قانون و انصاف نے کس دلیل اور کس منطق کے تحت الطاف حسین پر آرٹیکل چھ لگانے کا مطالبہ کیا ہے۔ یہ مقام حیرت ہے کہ ایوان بالا کے معزز اراکین جن کا بنیادی کام ہی دستور سازی ہے، دستور کی تفہیم کے باب میں اس رویے کا مظاہرہ کریں گے۔ اگر سینیٹ جیسے ادارے کے محترم اراکین کو آرٹیکل چھ کے دائرہ کار کا علم نہیں ہے اور اس کمیٹی میں ملک کے تین نامور قانون دان بھی شامل ہیں تو یہ جاننے کے لیے ہمیں کسی آئن سٹائن کی ضرورت نہیں کہ آئین کی بالادستی کا خواب اس سماج میں کبھی شرمندہ تعبیر ہو پائے گایا نہیں۔

الطاف حسین کے نامعقول اور مجہول خطاب کے بعداب میرے پیش نظر ایک ہی سوال ہے : ’’ ہماری ترجیح کیا ہے؟ اپنی انا کی تسکین یا ریاست کی سالمیت؟ ‘‘
ملک کو دی گئی گالی قلب و ذہن میں ایسے ہی ترازو ہوتی ہے جیسے ماں کو دی گئی گالی۔ جذبات کا سلگ اٹھنا بالکل فطری امر ہے۔ تاہم امر واقعہ یہ ہے کہ جب کسی فرد کو معاشرے میں سیاسی عصبیت حاصل ہو جائے تو اس کے ساتھ عام مجرم کا سلوک نہیں کیا جا سکتا۔ انصاف کا تقاضا بھلے یہی ہو کہ قانون کسی امتیاز کے بغیر کامل قوت کے ساتھ بروئے کار آئے لیکن کار ریاست کے تقاضے بسا اوقات کچھ اورہوتے ہیں۔ یہ تقاضے نبھانا، ظاہر ہے کہ کوئی معمولی کام نہیں۔ حسیات کا خون کرنا پڑتا ہے، جذبات کا گلا گھونٹنا پڑتا ہے اور خون کے گھونٹ پی کر خاموش رہنا پڑ سکتا ہے۔ یوں سمجھیے کہ یہ وہ کوہ کنی ہے، ابوالاعلی مودودی کے الفاظ مستعار لوں تو فرہاد کا زہرہ جس کے تصور سے آب ہو جائے ۔

الطاف حسین کا معاملہ اتنا سادہ نہیں جتنا سمجھا جاتا ہے۔ یہ ایک غلط فہمی ہے کہ وہ جذبات کے زیر اثر غلط بات کہہ جاتے ہیں اور انہیں خود بعد میں معلوم ہوتا ہے کہ وہ کیا کہہ گئے۔ حقیقت یہ ہے کہ وہ ایک کائیاں آدمی ہیں جسے خوب معلوم ہے کہ وہ کیا کہنے جا رہا ہے۔ کل کا خطاب بھی محض جوش کلام نہ تھا۔ اس میں ایک جہان معنی پوشیدہ ہے۔
الطاف حسین کیا چاہتے ہیں، یہ بالکل واضح ہے۔ ریاست کے بارے میں یاوہ گوئی اور ساتھ ہی رینجرز اور آرمی چیف کے بارے میں اخلاق و شائستگی سے گری ہوئی گفتگو۔ یہ شدت جذبات نہیں تھی۔ یہ کوئی اور ہی کہانی ہے۔ اس کہانی میں الطاف کا کردار فی الوقت ریاست کو اشتعال دلانا ہے تاکہ وہ قوت استعمال کرے۔ ہدایت کار کوئی اور ہے۔الطاف سے وہ یہ کام لینا چاہتا ہے۔ ایک بار یہ کام ہو جائے، اس کے بعد دیگر کردار بروئے کار آئیں گے اور کہانی کا انجام خدا نخواستہ کسے معلوم کیا ہو؟ چنانچہ آپ دیکھیں کہ کل خواتین کو آگے کیا گیا۔ اس وقت رینجرز یا پولیس طاقت استعمال کرتی تو الطاف حسین کے تیار کردہ ڈرامے کا پہلا ایکٹ کامیاب ہو جاتا۔ کہا جاتا کہ پنجاب کی رینجرز اور فوج مہاجر ماؤں بہنوں پر طاقت کا استعمال کر رہی ہے۔ مثالیں دے کر کہا جاتا کہ یہی بات اچکزئی کریں تو کچھ نہیں ہوتا، ہم کریں تو ہماری ماؤں بہنوں پر تشدد کیا جاتا ہے۔
چنانچہ اس وقت ریاست کو ٹھنڈے دل سے بروئے کار آنا چاہیے۔ حسیات کا خون کر کے، جذبات کا گلا گھونٹ کر اور خون کے گھونٹ پی کر۔ حقیقت یہ ہے کہ ابھی بھی الطاف کی سیاسی عصبیت موجود ہے۔ اس عصبیت کو بتدریج کمزور کرنا ہوگا۔ کوئی ایسا اقدام بھلے آئین اور قانون کی رو سے جائز ہی نہیں ناگزیر ہی کیوں نہ ہو، اگر اس عصبیت کو طاقتور کرنے کا باعث بنتا ہو تو اس سے اجتناب کرنا ہوگا۔

دو مثالیں ہمارے سامنے ہیں۔ ایک شیخ مجیب الرحمن کی اور دوسری جی ایم سید کی۔ ریاست نے دونوں سے مختلف طریقوں سے نبٹا۔ ایک سے نبٹتے نبٹتے حادثہ ہو گیا اور دوسرے کا آج سندھ میں نام لیوا ہی کوئی نہیں۔ ضیاء الحق نے جب جی ایم سید کو انگیج کیا تھا تو انہیں دشنام اور طعنوں کا سامنا کرنا پڑا کہ ایک غدار کو پھولوں کے ٹوکرے بھیجتا ہے لیکن اس پالیسی کے نتائج آج ہمارے سامنے ہیں۔

اس وقت الطاف حسین کی طاقت اس کو حاصل عصبیت ہے۔ مشتعل ہوئے بغیر اور کوئی ایسی کارروائی کیے بغیر کہ جس کی آڑ میں مودی کشمیر کے مطلع کے جواب میں کراچی کا مقطع کہنا شروع کر دے، ریاست کو ایک واضح وژن کے ساتھ بروئے کار آنا ہوگا۔ ایک دوٹوک فیصلہ کر کے اسے معمول کی کاروائی سے نبٹانا ہوگا۔ الطاف کو حاصل عصبیت کا خاتمہ بہت ضروری ہے اور لازم ہے یہ کام فطری طریقے سے ہو۔ کبھی الطاف، کبھی آفاق، کبھی عامر اور کبھی مصطفی کمال، یہ فطری نہیں، سب کے سب غیر فطری طریقے ہیں۔ متبادل طریقہ یہی ہے کہ موجود سیاسی عصبیت ( یعنی جماعت اسلامی، ن لیگ، پی پی پی، تحریک انصاف وغیرہ ) الطاف کی عصبیت کی جگہ لیتی جائے۔ آہستہ آہستہ دھیرے دھیرے۔ اور ایک وقت آئے کہ کراچی کو اس عذاب سے نجات مل جائے۔ رستہ کٹھن سہی مگر رستہ یہی ہے۔

فاروق ستار کی پریس کانفرنس کے بارے میں حتمی رائے قائم کرنا فی الوقت مشکل ہے۔
الطاف حسین کی واپسی کا راستہ اب بھی انہوں نے کھلا رکھا ہے۔ ہو سکتا ہے کہ یہ ناسازگار لمحات میں کیا گیا ایک ڈرامہ ہو تاکہ کچھ وقت حاصل کیا جائے اور جب یہ دباؤ کی لہر گزر جائے تو ایک روز کہا جائے کہ اب الطاف بھائی کی ذہنی حالت بہتر ہو گئی، اس لیے آج سے وہی دوبارہ اس جماعت کو چلائیں گے۔
تاہم اس بات کا امکان بھی موجود ہے کہ یہ ایک صدق دل سے اٹھایا گیا قدم ہو اور اس قدم کے ذریعے واقعی ایم کیو ایم کو الطاف کے عفریت سے نجات کی کوئی صورت تلاش کرنے کی کوشش کی گئی ہو۔
حقیقت کیا ہے اس کا فیصلہ فاروق ستار اور ان کے رفقائے کار کے رویے کریں گے۔ انہیں دوٹوک انداز میں سیاست اور جرم کو الگ الگ کرنا ہو گا۔ انہیں چاہیے کہ الطاف حسین کو جانے والی مالیاتی سرچشموں کی نشاندہی کریں۔ ایم کیو ایم کے اندر جو غنڈہ گرد عناصر ہیں ان کی بھی نشاندہی کریں۔ یہ عسکری گروہ ہی الطاف حسین کی اصل قوت ہے۔ اس قوت کا خاتمہ ضروری ہے۔ اسی قوت کے ذریعے الطاف حسین معاملات پر گرفت حاصل کرنے کی ایک کوشش بھی کر سکتے ہیں۔ اور کراچی میں خون کی نئی ہولی اور ٹارگٹ کلنگ کا نیا سلسلہ شروع ہو سکتا ہے۔
تاہم ایم کیو ایم فاروق ستار یا کسی بھی اور رہنما کی قیادت میں ایک سیاسی جماعت کے طور پر زندہ رہنا چاہے تو اس کا خیر مقدم کرنا چاہیے۔ مہاجر ایک حقیقت ہیں جو ملک کے دارالحکومت میں ہجرت کر کے آن آباد ہوئے تھے اور ایک روز انہیں سندھ کا رہائشی بنا دیا گیا۔ اس کے بعد محرومیوں کی ایک طویل داستان ہے، جس کے خاتمے کے لیے مہاجروں کی سیاسی آواز کا زندہ رہنا ایک نعمت سے کم نہیں۔
فاروق ستار مخلص ہیں یا شعبدہ بازی کر رہے ہیں ۔دونوں صورتوں میں وقت کا موسم بدل رہا ہے۔ خوش آئند بات یہ ہے کہ معاملہ کا حل آپریشن کے بجائے سیاسی عمل میں تلاش کیا جا رہا ہے۔ سیاسی قوت سیاست کرے اور مجرموں کے ساتھ آہنی ہاتھوں سے نبٹا جائے۔ سب کچھ معمول کے مطابق ہو۔ایک فطری انداز میں۔