Author: ایڈمن

زریاب شادی شدہ ھے اور کنوارگی کے فوائد گنواتا ھے جبکہ فیصل کنوارھے اور ان فوائد کا انکار کرتا ھے
زریاب : فی زمانہ جو کنوارہ ہے وہ زندگی کی تمام رعنائیوں سے لطف اندوز ہونے کا حق رکھتا ہے
فیصل:جی بالکل ، انسان اگر حرام حلال کی تمیز بھول جائے تو اس چند روزہ زندگی میں لطف ہی لطف ۔ان رعنائیوں کی ویسے ذرا ‘تفصیل’ ھوجاتی تو ھمیں تعاقب کرنے میں آسانی ھوتی !
زریاب: کنوارہ کسی بھی شادی میں سلامی دینے کا مستحق نہیں ہوتا
فیصل : کہاں رھتے ھو بھائی ۔یہاں ھم نے سلامی جیسی فضول رسم کا بائیکاٹ کیا ھے تو باوجود کنوارہ ھونے کے لوگ لٹھ لے کر پیچھے پڑے ھیں ھمارے 🙁
زریاب : کنوارے کا کوئی سُسرال نہیں ہوتا
فیصل : یہ فائدہ ھے یا نقصان ویسے ؟ دیکھا گیا ھے کہ جو عزت سسرال میں ملتی ھے اسکے کیا کہنے ۔اس پروٹوکول سے محروم ھونے کی خواھش کفران نعمت ھے ویسے بی ٹی ڈبلیو.
زریاب : کنوارے کے دونوں تکیے اس کی اپنی ملکیت ہوتے ہیں.
فیصل : اخیر ھوگئی بھائی ۔چار پیسے خرچ کے دو تکیے اور لے آو۔ویسے ایک دوشیزہ پہ آپ تکیے کو ترجیح دیتے ھیں۔اس سے آپ کے ذوق کا اندازہ کیا جاسکتا
زریاب :کنوارے کو کبھی تنخواہ کا حساب نہیں دینا پڑتا
فیصل : حساب تو ویسے بھی نہیں دینا پڑتا۔بندہ اگر سلسلہ زن مریدیہ سے وابسطہ ھو تو اور بات ھے
زریاب :کنوارے کو دوستوں میں بیٹھے ہوئے کبھی فون نہیں آتا کہ ’’آتے ہوئے چھ انڈے
اور ڈبل روٹی لیتے آئیے گا‘‘۔
فیصل :لگتا ھے جناب کی ماں بہن نہیں ورنہ بیوی کو تو پھر بھی انسان ٹال سکتا ھے ۔ماں کے ایسےحکم جو دن رات آتے ھیں انکو اگنور کرنا ناممکن ھے !
زریاب :کنوارے کو کبھی دوپٹہ رنگوانے نہیں جانا پڑتا
فیصل : خدا گواہ ھے کہ جتنے ڈوپٹے میں نے کنوارگی میں رنگوا چھوڑےھیں آپ نے اس سے آدھے بھی نہیں رنگوائے ھوں گے ۔اماں جی کے ،بہن جی کے
زریاب :
کنوارے کا کوئی سالا نہیں ہوتا لہذا اُس کی موٹر سائیکل میں پٹرول ہمیشہ پورا رہتا ہے
فیصل :دوست تو ھوتے ھیں نا اور وہ زیادہ کمینے ھوتے ھیں ۔۔سالا تو پھر رشتے کا لحاظ رکھ لیتا ھے
زریاب :کنوارے کو کبھی روٹیاں لینے کے لیے تندور کے چکر نہیں لگانے پڑتے
فیصل :ھاں ھاں ماں باپ بہن بھائیوں کو تو بھوک ہی نہیں لگتی نا !!
زریاب :کنوارے کو کبھی فکر نہیں ہوتی کہ کوئی اُس کا چینل تبدیل کرکے ’’میرا سلطان‘‘ لگا دے گا‘
فیصل : پی ٹی سی ایل سمارٹ ٹی وی کی ایپ کررکھی ھے ھم شادی سے قبل ہی۔یہ کوئی اشو نہیں
زریاب :کنوارے کو کبھی کہیں جانے سے پہلے اجازت نہیں لینی پڑتی
فیصل : ماں جی سے لینی پڑتی ھے اور میرا گمان ھے کہ اگر سلسلہ زن مریدیہ والوں سےبیعت نہ کی تو شاید شادی کےبعد کسی سے بھی نہ لینی پڑے ، وہ اللہ رکھی ماں جی کو ھینڈل کرلیا کرے گی
زریاب :کنوارے کو کبھی اپنے موبائل میں خواتین کے نمبرزمردانہ ناموں سے save نہیں کرنے پڑتے.
فیصل : یہ تو کنوارے کو بھی نہیں کرنے چاھیئے.کسی سے غیر شرعی رشتہ نہیں رکھنا چاھیئے.اگر کوئی شرعی حاجت ھو تو اور بات ھے
زریاب :کنوارے کو کبھی کپڑوں کی الماری میں سے اپنی شرٹ نہیں ڈھونڈنی پڑتی
فیصل : واحد فائدہ ابھی تک یہی نظر آیا۔ لیکن یہ فائدہ اتنا بھی بڑا نہیں کہ شادی ہی نہ کی جائے ۔ ذرا سی قسمت اچھی ھوئی تو وہ کپڑے ڈھونڈ کر ریڈی بھی کردیا کرے گی
زریاب :کنوارے کو کبھی ٹوتھ پیسٹ کا ڈھکن بند نہ کرنے کا طعنہ نہیں سننا پڑتا
فیصل :چیزوں کو سلیقے سے رکھنا اچھی عادت ھے اسکا شادی سے تعلق نہیں
زریاب :اسے کبھی دیگچی کو ہینڈل نہیں لگوانے جانا پڑتا
فیصل :لگتا ھے شادی سے پہلے آپ قبرستان رھتے رھے ھو۔کچن کے چھوٹے موٹے کام تو ازل سے ھیں
زریاب : کنوارے کو کبھی اپنے براؤزر کی ہسٹری ڈیلیٹ کرنے کی ضرورت نہیں ہوتی
فیصل :ایسی ضرورت کبھی بھی نہیں ھونی چاھیئے۔ظاہری اور چھپے ھوئے دونوں گناہ چھوڑ دینے چاھیئں
زریاب : کنوارے کو کبھی کسی کو منانا نہیں پڑتا
فیصل : پیار میں اتنا تو چلتا ھے پھر
زریاب :اسے کبھی کمرے سے باہر جاکے سگریٹ نہیں پڑتا‘
فیصل :سگرٹ ویسے بھی مضر صحت ھے
زریاب :کنوارے کو کبھی چھت کے پنکھے صاف نہیں کرنے پڑتے
فیصل : کرنے پڑتے ھیں بھائی اگر گندگی میں رھنے کا شوق نہیں ھے تو
زریاب : کنوارے کو کبھی ’’پھول جھاڑو‘‘ خریدنے کی اذیت سے نہیں گذرنا پڑتا‘
فیصل : ہر ماہ خریدتا ھوں۔شادی سے پہلے بھی گھر کو صاف ستھرا رکھنا چاھیئے
زریاب :کنوارے کو کبھی پیمپرزنہیں خریدنے پڑتے
فیصل :بھانجے بھانجیوں بھتجے بھتیجوں کے اکثر خریدتا رھتا ھوں جی
زریاب : کنوارے کوکبھی الاسٹک نہیں خریدنا پڑتا‘
فیصل :میں خود بھی الاسٹک پہنتا ھوں(شرماتے ھوئے)
زریاب : کنوارے کو کبھی سالگرہ کی تاریخ یاد نہیں رکھنی پڑتی‘
فیصل : سالگرہ ویسے بھی میں نہیں مناتا۔شجرہ سلف سے پیوستہ 🙂
زریاب : کنوارے کو کبھی دال ماش اور کالے ماش میں فرق کرنے کی ضرورت نہیں پیش آتی
فیصل :ہرماہ آتی ھے بھائی گھر کی گروسری کرتے ھوئے
زریاب : کنوارے کو کبھی نیل پالش ریموور نہیں خریدنا پڑتا‘
فیصل : بارھا خریدا ھے بھئی
زریاب : کنوارے کو کبھی گھر آنے سے پہلے موبائل کے سارے میسجز ڈیلیٹ کرنے کی فکر نہیں ہوتی
فیصل : ایسے الٹے میسجز کرتے کیوں ھو ویسے ؟
‘۔?
اگلی قسط کے لیئے فیصل کی شادی کا انتظار کیجیئے

مشہور قصہ ہے کہ کسی گاوں میں چار دوست رہتے تھے مگر سب کے سب اندھے تھے ۔ انہوں نے
کبھی ہاتھی نہیں دیکھا تھا ایک دن انہوں نے شہر جا کر چڑیا گھر میں ہاتھی دیکھنے کا
پروگرام بنایا ۔ چڑیا گھر جا کر ہاتھی کے قریب گئے ۔ چونکہ دیکھ نہیں سکتے تھے اس لئے
ٹھٹول ٹھٹول کر ہاتھی کا جائزہ لینے لگے ۔ ہر ایک ہاتھی کے مختلف حصوں پر ہاتھ پھیرنے
لگا ۔ ایک نے ہاتھی کے پیر چھو کر اعلان کیا کہ یہ تو ستون کی طرح ہے ۔ دوسرے نے سونڈ
ہاتھ میں لے کر کہا کہ یہ تو اژدہے کی طرح کا جانور ہے ۔ تیسرے کے ہاتھ دم آئی تو وہ اس
کو رسی جیسا سمجھنے لگا جبکہ چوتھا اس کے کان کو چھو کر اس کو ہاتھ کے پنکھے جیسا ثابت
کرنے لگا ۔

ظاہر ہے ان میں سے ہر ایک کا اندازہ غلط تھا کیونکہ ہاتھی کا ہر حصہ ان کی نظروں کے
سامنے نہیں تھا ۔ یہی حال ہم نے آج اسلام کا بنا رکھا ہے کسی کو اس صرف خلافت نظر آتی
ہے تو کسی کو صرف جمہوریت ، کوئی اس کو صرف اخلاقیات کا دین سمجھ رہا ہے تو کوئی صرف
مسجد تک محدود کرنے پر مصر ہے ۔ غرض جس کو اسلام کا جو پہلو راس آتا ہے اس کو لے کر
بیٹھ جاتا ہے اور دوسرے پر طنز و تشنیع اور گالم گلوچ کی گولہ باری شروع کردیتا ہے ۔

یہی طرزِ عمل پسند کی شادی کے معاملہ میں اختیار کیا گیا ہے ۔ جن حضرات کو عالمی میڈیا
کے زیر اثر اسلام کا صرف یہ پہلو پسند آیا کہ اسلام پسند کی شادی کی اجازت دیتا ہے
انہوں نے باقی تمام پہلووں اور اسلام کے معاشرتی احکام و مزاج اور معاشرے پر اس کے
اثرات کو یکسر نظر انداز کردیا ۔

    اسلام کے ہر حکم میں معاشرے پر مرتب ہونے والے اثرات کا خصوصی طور پر خیال رکھا

جاتا ہے چنانچہ حدیث کی تمام مشہور کتابوں میں یہ واقعہ منقول ہے کہ مشرکین نے جب خانہ
کعبہ کو ازسرنو تعمیر کیا تو انہوں نے آپس میں یہ عہد وپیمان کیا کہ خانہ کعبہ کی تعمیر
میں حرام پیسہ نہیں لگائیں گے چنانچہ حلال کی کمائی ختم ہوگئی اور ایک حصہ باقی رہ گیا
جس کو خانہ کعبہ کے چوکور کمرے کے باہر چھوڑ دیا گیا ۔ اس کے ارد گرد چھوٹی سی دیوار
کھینچی گئی اور اس کو ہم حطیم کہتے ہیں جو کہ خانہ کعبہ کا حصہ ہے مگر عمارت سے باہر ہے
۔ ایک دن حضور صلی اللہ علیہ وسلم نے حضرت عائشہ رضی اللہ عنہا سے فرمایا کہ میرا دل
کرتا ہے کہ خانہ کعبہ کو ان بنیادوں پر تعمیر کروں جن پر حضرت ابراہیم علیہ السلام نے
تعمیر کیا تھا (حطیم کو تعمیر میں شامل کرنے کی طرف اشارہ تھا ) لیکن تمہاری قوم کا نیا
ایمان اس ارادہ کو عملی جامہ پہنانے میں رکاوٹ ہے ۔

حضور ﷺ خود موجود ہیں ۔ جان نچھاور کرنے والے صحابہ کرام ایک اشارہ آبرو کے منتظر ہوتے
ہیں ۔ حضور ﷺ کے عمل پر کسی کو کیا اعتراض ہوسکتا تھا مگر پھر بھی ضعیف الایمان لوگوں
کا خاص خیال رکھا گیا ۔ اس لمحے حضورﷺ نے اپنی دیرینہ خواہش کو معاشرے کی رعایت پر
قربان کردیا ۔

اب پسند کی شادی کا معاملہ لیجئے اس معاملہ میں ہمارے دور کے حضرات حدیث سے مثالیں پیش
کرتے ہیں لیکن یہاں وہ صرف ان احادیث کو دیکھتے ہیں اسلام کے عمومی مزاج کو پس پشت ڈال
دیتے ہیں اگر صرف ان احادیث کو لے کر پسند کی شادی کو ثابت کریں گے تو یہ حضرات ان
احادیث کے بارے میں کیا کہیں گے جو ولی کے اختیار کے بارے میں ہیں ؟ انہیں احادیث کی
روشنی میں بعض ائمہ کرام تو ولی کے بغیر نکاح کے انعقاد ہی کے قائل نہیں ہیں ۔چونکہ
لڑکی کے اولیاء نے اسی معاشرے میں اٹھنا بیٹھنا ہوتا ہے اسی لئے ان کی رعایت کا خاص
اہتمام کیا گیا ہے تاکہ نادان اور نسبتا کم تجربہ رکھنے والی جذباتی لڑکی کی وجہ سے یہ
لوگ معاشرے میں رسوا نہ ہوں ۔ اس لئے اسلام نے بالغ لڑکیوں کے ساتھ ساتھ ان کے اولیاء
کو ظلم سے بچایا ہے ۔آخر ایسا کیوں فرض کیا گیا ہے کہ ہر لڑکی کا فیصلہ صحیح اور اس کے
اولیاء کا فیصلہ غلط ہوتا ہے ۔

جب اولیاء کو نظر انداز کرکے کوئی لڑکی شادی کرے گی اور آپ اس کی حوصلہ افزائی کریں گے
تو اس سے معاشرے پر انتہائی برے اثرات مرتب ہوں گے ۔ یہ شادیاں عموما ناکام ہوتی ہیں
کیونکہ جذباتی جوڑے کے درمیان لڑائی جھگڑے کی صورت میں صلح صفائی کرنے والا کوئی نہیں
ہوتا ۔ اگر لڑکا ظالم ہو یا اس کے گھر کے افراد لڑکی کو بےجا تنگ کر رہے ہوں تو ان پر
لڑکی کے اولیاء کی طرف کوئی دباو نہیں ہوتا چنانچہ لڑکی خاموشی سے ظلم سہتی رہتی ہے نیز
ہمارے معاشرے میں عام طور پر ایسی لڑکی کو وہ عزت نہیں ملتی جو والدین کی مرضی سے شادی
کرنے والی لڑکی کو ملتی ہے ۔ علاوہ ازیں ایسی صورتوں میں بات غیرت کے نام پر قتل تک
پہنچ جاتی ہے ۔ اگر ٹھنڈے دل سے غور کیا جائے تو ان تمام خرابیوں کی جڑ معاشرے پر مرتب
ہونے والے اثرات کو دانستہ یا نادانستہ طور پر نظر انداز کرنا ہے ۔

پسند کی شادی کے معاملہ میں اسلام سے دلائل دینے والے اس وقت کے عرب معاشرے اور ہمارے
موجودہ معاشرے کی نفسیات میں پائے جانے والے فرق کو پس پشت ڈال دیتے ہیں جس سے غلط
فہمیاں جنم لیتی ہیں ۔ یہ بات بالکل واضح ہے کہ اسلام سے پہلے اور بعد میں وہاں عورتیں
نکاح کا پیغام خود بھیجتی اور قبول یا رد کردیتی تھیں ۔ یہ اس معاشرے کی عام سی بات تھی
اور اس کے محرکات آج کے محرکات سے یکسر مختلف ہوتے تھے ۔ ایسے میں حضرت خدیجہؓ کے عمل
سے یہ تاثر دینا کہ یہی عمل ہر معاشرے میں اختیار کیا جاسکتا ہے ناانصافی اور لاعلمی پر
مبنی ہے ۔ یہ بات بھی پیش نظر رہے کہ ایسی عورتوں کو اس معاشرے میں کبھی غلط نہیں سمجھا
گیا جبکہ ہمارے معاشرے میں ایسی لڑکیوں کے بارے میں جو سوچ عام ہے وہ سب کے سامنے ہے ۔
چنانچہ جب معاشرے میں رائج اس سوچ کو پیش نظر نہیں رکھا جائے گا اور گھر سے نکل کر شادی
کرنے والی لڑکیوں کے لئے اسلام کی تعلیمات سے دلیل ڈھونڈا جائے گا تو اس صورت میں یہ ان
لڑکیوں کے ساتھ ظلم بھی ہے اور ان کی زندگیوں سے کھلواڑ بھی ۔

خدارا ! اسلامی تعلیمات کو یوں اپنے نظریات کے لئے کتر و بیونت کی بھینٹ نہ چڑھائے اور
نہ من پسند پہلو کو لےکر دوسرے پہلووں کونظر انداز کریں ورنہ اس کے نقصانات معاشرے میں
بے چینی ،انتشار اور پریشانی کی صورت میں ظاہر ہوں گے جیسا کہ اس کے نتائج ہم روز
دیکھتے ہیں ۔

بیٹی کی شادی کے لئے ان کے پاس دو راستے تھے، یا تو ایک دینی مزاج رکھنے والے پڑھے لکھے مگر not well established لڑکے سے شادی کر دیں، یا پھر دین سے دور مگر امیر اور well established لڑکے سے کردیں۔۔۔۔!!
انہیں پتا تھا کہ رزق دینے والا اللہ ہے، لیکن انہوں نے well established لڑکے کا انتخاب کیا، بات چلی اور پکی ہو گئی، شادی کی تاریخ بھی آن پہنچی،،، چونکہ وہ دین سے دور تھا، تو شادی میں نکاح کے خطبہ کے علاوہ کچھ بھی اسلام کی جھلک نظر نا آئی، لڑکے والوں نے جہیز سمیت دیگر مطالبات بھی رکھے جو پورے کرنے پڑے، خیر ہنسی خوشی شادی ہو گئی،، لیکن شادی کے اگلے مہینے لڑکے کی نوکری ختم ہوئی پھر ان کا خاندانی کاروبار ڈوب گیا، قرضے اتارتے اتارتے، وہ سڑک پر آگئے۔۔۔۔۔! چونکہ اس لڑکے اور اس کے خاندان کا دینی مزاج بھی کوئی خاص نہیں تھا، چنانچہ تازہ شادی کے باوجود گھریلو ناچاکی بھی پیدا ہو گئی۔
۔
دوسری طرف دینی مزاج رکھنے والے مگر not well settled لڑکے کو ایک دینی مزاج رکھنے والی لڑکی کا ہی رشتہ مل گیا، ان کی بھی شادی ہو گئی، لیکن نا تو جہیز ہوا نا ہی مہندی، نا بارات آئی۔۔۔۔۔ سادہ طریقہ سے سنت نبوی ﷺ کے مطابق ،مسجد میں جمعہ کے وقت نکاح ہوا، تمام اخراجات سادگی کے ساتھ لیکن دولہے کے خاندان کی طرف سے ہی ادا ہوئے ۔ بغیر کسی بوجھ اور تکلف کے لڑکی کو رخصتی بھی ہو گئی۔ مغرب کے بعد ولیمہ تھا،جس میں سادگی سے لڑکے اور لڑکی کے قریبی عزیزوں نے شرکت کی. اگلے ہی ہفتے لڑکے کو اچھی خاصی تنخواہ پر نوکری مل گئی؛ چونکہ شادی کی بنیاد مکمل طور پر سنت نبوی ﷺ پر تھی، دونوں میاں بیوی اور سسرال میں محبت و الفت بھی خوب پیدا ہوئی۔۔۔ اور ہنسی خوشی زندگی گزرنے لگے۔

میرے نبی محمد مصطفیٰ ﷺ اور ان کے صحابہ رضی اللہ عنہم نے سچ ہی فرمایا تھا۔۔ کہ
رسول کریم صلی اللہ علیہ وعلی آلہ وسلم نے فرمایا کہ إِذَا خَطَبَ إِلَيْكُمْ مَنْ تَرْضَوْنَ دِينَهُ وَخُلُقَهُ فَزَوِّجُوهُ، إِلاَّ تَفْعَلُوا تَكُنْ فِتْنَةٌ فِي الأَرْضِ، وَفَسَادٌ عَرِيضٌ ::: اگر تم لوگوں سے کوئی ایسا شخص رشتہ طلب کرے جس کا دین اور کردار تم لوگوں کو اچھا لگے تو اس کی(اپنی لڑکی، بہن بیٹی جس کا اس نے رشتہ طلب کیا ہو ، اس سے)شادی کر دو ، اگر تُم لوگ ایسا نہیں کرو گے تو زمین میں فتنہ ہو جائے گا اور بہت بڑا فساد ہو جائے گا ) سُنن الترمذی و سنن ابن ماجۃ

وہ نکاح بہت بابرکت ہے جس کا خرچ کم سے کم ہو۔ (بیہقی)

حضرت عائشہ رضی اللہ عنھا سے مروی ہے کہ نبی صلی اللہ علیہ وسلم نے ارشاد فرمایا سب سے زیادہ بابرکت نکاح وہ ہوتا ہے جو مشقت کے اعتبار سے سب سے آسان ہو(مسند احمد)

ابو بکر الصدیق رضی اللہ عنہ ُ کا فرمان ہے کہ ، اللہ تعالیٰ نے نکاح کرنے کے بارے میں تُم لوگوں کو جو حُکم دِیا ہے اُس میں اُس کی اطاعت کرو ، اللہ نے تُم لوگوں سے تونگری(رزق میں برکت) دینے کا جو وعدہ کیا ہے وہ اُسے پورا کرے گا ، اللہ تعالیٰ کا فرمان ہے : إِنْ يَكُونُوا فُقَرَاءَ يُغْنِهِمُ اللَّهُ مِنْ فَضْلِه ::: اگر وہ غریب ہیں( تو اس سے مت گھبراو) اللہ انہیں اپنے فضل سے مالدار کر دے گا

وَقَالَ عُمَرُ ، عَجِبْتُ لِمَنِ ابْتَغَى الْغِنَى بِغَيْرِ النِّكَاحِ، وَاللَّهُ عَزَّ وَجَلَّ يَقُولُ،،، إِنْ يَكُونُوا فُقَرَاءَ يُغْنِهِمُ اللَّهُ مِنْ فَضْلِه:
اور عُمر (رضی اللہ عنہ ُ ) نے فرمایا ، میں اس کے بارے میں حیران ہوں جو نکاح کیے بغیر تونگری (غنیٰ /رزق میں برکت ) چاہتا ہے ، جبکہ اللہ عَز ّو جَلَّ تو کہتا ہے کہ، إِنْ يَكُونُوا فُقَرَاءَ يُغْنِهِمُ اللَّهُ مِنْ فَضْلِه:::اگر وہ غریب ہیں( تو اس سے مت گھبراو) اللہ انہیں اپنے فضل سے مالدار کر دے گا(معالم التزیل فی تفسیر القران، المعروف بالتفسیر البغوی)

عن عبداللہ بن مسعود،،،التَمِسُوا الغِنَى فِي النِّکاح ،،، يَقُولُ اللہُ تَعالیٰ ،،، إِنْ يَكُونُوا فُقَرَاءَ يُغْنِهِمُ اللَّهُ مِنْ فَضْلِه ::: ابن مسعود (رضی اللہ عنہ ُ)کے بارے میں روایت ہے کہ (انہوں نے فرمایا )نکاح میں تونگری تلاش کرو ،،، اللہ تعالیٰ کہتا ہے،،، إِنْ يَكُونُوا فُقَرَاءَ يُغْنِهِمُ اللَّهُ مِنْ فَضْلِه:::اگر وہ غریب ہیں(تو اس سے مت گھبراو) اللہ انہیں اپنے فضل سے مالدار کر دے گا ، ( تفسیر الطبری)

اللہ نے اپنے رسول کریم صلی اللہ علیہ وعلی آلہ وسلم کی ز ُبان مبارک سے یہ جو خبر کروائی ہے حق ہے کہ
لَوْ أَنَّكُمْ تَوَكَّلْتُمْ عَلَى اللَّهِ حَقَّ تَوَكُّلِهِ لَرَزَقَكُمْ كَمَا يَرْزُقُ الطَّيْرَ تَغْدُو خِمَاصًا وَتَرُوحُ بِطَانًا :::اگر تُم لوگ اللہ پر توکل کا حق ادا کرتے ہوئے توکل کرو تو یقیناً وہ تم لوگوں کو اُس طرح رزق دے گا جِس طرح پرندوں کو دیتا ہے کہ وہ خالی پیٹ صُبحُ کرتے ہیں اور شام کو بھرے پیٹ ہوتے ہیں(سُنن ابن ماجہ)

بیٹی کی شادی کے لئے ان کے پاس دو راستے تھے، یا تو ایک دینی مزاج رکھنے والے پڑھے لکھے مگر not well established لڑکے سے شادی کر دیں، یا پھر دین سے دور مگر امیر اور well established لڑکے سے کردیں۔۔۔۔!!

انہیں پتا تھا کہ رزق دینے والا اللہ ہے، لیکن انہوں نے well established لڑکے کا انتخاب کیا، بات چلی اور پکی ہو گئی، شادی کی تاریخ بھی آن پہنچی،،، چونکہ وہ دین سے دور تھا، تو شادی میں نکاح کے خطبہ کے علاوہ کچھ بھی اسلام کی جھلک نظر نا آئی، لڑکے والوں نے جہیز سمیت دیگر مطالبات بھی رکھے جو پورے کرنے پڑے، خیر ہنسی خوشی شادی ہو گئی،، لیکن شادی کے اگلے مہینے لڑکے کی نوکری ختم ہوئی پھر ان کا خاندانی کاروبار ڈوب گیا، قرضے اتارتے اتارتے، وہ سڑک پر آگئے۔۔۔۔۔! چونکہ اس لڑکے اور اس کے خاندان کا دینی مزاج بھی کوئی خاص نہیں تھا، چنانچہ تازہ شادی کے باوجود گھریلو ناچاکی بھی پیدا ہو گئی۔
۔
دوسری طرف دینی مزاج رکھنے والے مگر not well settled لڑکے کو ایک دینی مزاج رکھنے والی لڑکی کا ہی رشتہ مل گیا، ان کی بھی شادی ہو گئی، لیکن نا تو جہیز ہوا نا ہی مہندی، نا بارات آئی۔۔۔۔۔ سادہ طریقہ سے سنت نبوی ﷺ کے مطابق ،مسجد میں جمعہ کے وقت نکاح ہوا، تمام اخراجات سادگی کے ساتھ لیکن دولہے کے خاندان کی طرف سے ہی ادا ہوئے ۔ بغیر کسی بوجھ اور تکلف کے لڑکی کو رخصتی بھی ہو گئی۔ مغرب کے بعد ولیمہ تھا،جس میں سادگی سے لڑکے اور لڑکی کے قریبی عزیزوں نے شرکت کی. اگلے ہی ہفتے لڑکے کو اچھی خاصی تنخواہ پر نوکری مل گئی؛ چونکہ شادی کی بنیاد مکمل طور پر سنت نبوی ﷺ پر تھی، دونوں میاں بیوی اور سسرال میں محبت و الفت بھی خوب پیدا ہوئی۔۔۔ اور ہنسی خوشی زندگی گزرنے لگے۔

میرے نبی محمد مصطفیٰ ﷺ اور ان کے صحابہ رضی اللہ عنہم نے سچ ہی فرمایا تھا۔۔ کہ
رسول کریم صلی اللہ علیہ وعلی آلہ وسلم نے فرمایا کہ إِذَا خَطَبَ إِلَيْكُمْ مَنْ تَرْضَوْنَ دِينَهُ وَخُلُقَهُ فَزَوِّجُوهُ، إِلاَّ تَفْعَلُوا تَكُنْ فِتْنَةٌ فِي الأَرْضِ، وَفَسَادٌ عَرِيضٌ ::: اگر تم لوگوں سے کوئی ایسا شخص رشتہ طلب کرے جس کا دین اور کردار تم لوگوں کو اچھا لگے تو اس کی(اپنی لڑکی، بہن بیٹی جس کا اس نے رشتہ طلب کیا ہو ، اس سے)شادی کر دو ، اگر تُم لوگ ایسا نہیں کرو گے تو زمین میں فتنہ ہو جائے گا اور بہت بڑا فساد ہو جائے گا ) سُنن الترمذی و سنن ابن ماجۃ

وہ نکاح بہت بابرکت ہے جس کا خرچ کم سے کم ہو۔ (بیہقی)

حضرت عائشہ رضی اللہ عنھا سے مروی ہے کہ نبی صلی اللہ علیہ وسلم نے ارشاد فرمایا سب سے زیادہ بابرکت نکاح وہ ہوتا ہے جو مشقت کے اعتبار سے سب سے آسان ہو(مسند احمد)

ابو بکر الصدیق رضی اللہ عنہ ُ کا فرمان ہے کہ ، اللہ تعالیٰ نے نکاح کرنے کے بارے میں تُم لوگوں کو جو حُکم دِیا ہے اُس میں اُس کی اطاعت کرو ، اللہ نے تُم لوگوں سے تونگری(رزق میں برکت) دینے کا جو وعدہ کیا ہے وہ اُسے پورا کرے گا ، اللہ تعالیٰ کا فرمان ہے : إِنْ يَكُونُوا فُقَرَاءَ يُغْنِهِمُ اللَّهُ مِنْ فَضْلِه ::: اگر وہ غریب ہیں( تو اس سے مت گھبراو) اللہ انہیں اپنے فضل سے مالدار کر دے گا

وَقَالَ عُمَرُ ، عَجِبْتُ لِمَنِ ابْتَغَى الْغِنَى بِغَيْرِ النِّكَاحِ، وَاللَّهُ عَزَّ وَجَلَّ يَقُولُ،،، إِنْ يَكُونُوا فُقَرَاءَ يُغْنِهِمُ اللَّهُ مِنْ فَضْلِه:
اور عُمر (رضی اللہ عنہ ُ ) نے فرمایا ، میں اس کے بارے میں حیران ہوں جو نکاح کیے بغیر تونگری (غنیٰ /رزق میں برکت ) چاہتا ہے ، جبکہ اللہ عَز ّو جَلَّ تو کہتا ہے کہ، إِنْ يَكُونُوا فُقَرَاءَ يُغْنِهِمُ اللَّهُ مِنْ فَضْلِه:::اگر وہ غریب ہیں( تو اس سے مت گھبراو) اللہ انہیں اپنے فضل سے مالدار کر دے گا(معالم التزیل فی تفسیر القران، المعروف بالتفسیر البغوی)

عن عبداللہ بن مسعود،،،التَمِسُوا الغِنَى فِي النِّکاح ،،، يَقُولُ اللہُ تَعالیٰ ،،، إِنْ يَكُونُوا فُقَرَاءَ يُغْنِهِمُ اللَّهُ مِنْ فَضْلِه ::: ابن مسعود (رضی اللہ عنہ ُ)کے بارے میں روایت ہے کہ (انہوں نے فرمایا )نکاح میں تونگری تلاش کرو ،،، اللہ تعالیٰ کہتا ہے،،، إِنْ يَكُونُوا فُقَرَاءَ يُغْنِهِمُ اللَّهُ مِنْ فَضْلِه:::اگر وہ غریب ہیں(تو اس سے مت گھبراو) اللہ انہیں اپنے فضل سے مالدار کر دے گا ، ( تفسیر الطبری)

اللہ نے اپنے رسول کریم صلی اللہ علیہ وعلی آلہ وسلم کی ز ُبان مبارک سے یہ جو خبر کروائی ہے حق ہے کہ
لَوْ أَنَّكُمْ تَوَكَّلْتُمْ عَلَى اللَّهِ حَقَّ تَوَكُّلِهِ لَرَزَقَكُمْ كَمَا يَرْزُقُ الطَّيْرَ تَغْدُو خِمَاصًا وَتَرُوحُ بِطَانًا :::اگر تُم لوگ اللہ پر توکل کا حق ادا کرتے ہوئے توکل کرو تو یقیناً وہ تم لوگوں کو اُس طرح رزق دے گا جِس طرح پرندوں کو دیتا ہے کہ وہ خالی پیٹ صُبحُ کرتے ہیں اور شام کو بھرے پیٹ ہوتے ہیں(سُنن ابن ماجہ)

جمہوری معاشرے کا حسن ہے کہ اس میں مشاہیر کوخراج عقیدت پیش کرنے کے لیے ان کے ایام ولادت ووفات کو منایاجاتاہے۔پاکستان میں بھی اس کے قیام کے بعد سے تاہنوز یہ سلسلہ جاری ہے ۔مشاہیر کے دنوں کو منانے کی وطن عزیزمیں ایک سب سے زیادہ رائج صورت یہ ہے کہ ان کے ایام وفات وولادت پر عام تعطیل کا اعلان کیا جاتاہے۔اس دن تعلیمی اداروں سمیت دفاتر کو تالالگتاہے۔یوں مشاہیر کے یہ ایام تفریح وآرام یا میل ملاقات کے ایام بھی بن جاتے ہیں کہ چھٹی کا فائدہ اٹھاتے ہوئے ملازمت پیشہ لوگ اس دن اپنے بچوں کے ساتھ تفریح پر نکل جاتے ہیں یااپنے جاننے والے دوست احباب اور بزرگوں سے ملاقات کی غرض سے ان کے ہاں چلے جاتے ہیں۔ان ایام میں چھٹی کایہ اضافی فائدہ ہے ،ورنہ اس کا جو اصل مقصدہے یعنی مشاہیر کو خراج عقیدت پیش کرنا،یہ بھی کسی نہ کسی حد تک یوں پوراہوجاتاہے کہ ان کی شخصیت اور خدمات کے حوالے سے ٹی وی چینلز پروگرام نشر کرتے ہیں،مذاکرے اور سیمینارزمنعقد کیے جاتے ہیں ،تقریبات کا اہتمام ہوتاہے،اور کم ازکم درجے میں اتنا توضرور ہوتاہے کہ خلاف معمول چھٹی ہوجانے پر بچے اپنے بڑوں سے پوچھتے ہیں کہ آج ویک اینڈ بھی نہیں ،پھربھی چھٹی کیوں ہے؟جس کے جواب میں انھیں چھٹی کی وجہ بننے والی شخصیت سے متعارف کرادیاجاتاہے۔چھٹی کے ان فوائد کے پیش نظر ان کی کسی نے مخالفت نہیں کی اور وطن عزیزکے ہر طبقے سے تعلق رکھنے والے لوگ ان چھٹیوں کے قائل ہیں ۔
ذوالفقار علی بھٹو کے بعدمیاں محمد نواز شریف وطن عزیزکے وہ دودسرے جہاندیدہ وانقلابی سربراہ ہیں جن کا نام تاریخ میں جہاں دوسرے متعددحوالوں سے یاد رکھاجائے گا،وہاں چھٹیوں کے حوالے سے بھی ان کی ’’اصلاحات‘‘بھلائی نہ جاسکیں گی۔یہ میاں صاحب کی خوبی ہے کہ انھوں نے دوسرے ایشوزکی طرح اس معاملے میں بھی اصلاحات فرمائیں۔ورنہ دوسرے حکم رانوں نے اس جانب توجہ نہ دی۔اپنے پہلے دورحکومت میں میاں صاحب نے جمعے کی چھٹی ختم کرکے اس کی جگہ اتوار کی عام تعطیل کافیصلہ کیا۔اس پر کئی حوالوں سے اعتراضات بھی کیے گئے ۔ایک قوی اعتراض تویہ سامنے آیاکہ چوں کہ جمعے کی چھٹی ذوالفقار علی بھٹوکا کارنامہ ہے،جس کی وجہ سے وہ تاریخ میں یاد رکھے جاتے،اس ڈر سے میاں صاحب نے اس کارنامے کی شکل مسخ کردی ہے۔مذہبی ودینی طبقات کی طرف سے جمعۃ المبارک کے تقدس واحترام اور فضیلت وانفرادیت کو سامنے رکھتے ہوئے اعتراضات کیے گئے۔قصہ کوتاہ ہرقسم کے اعتراضات ہوامیں تحلیل ہوکر رہ گئے اور میاں صاحب نے اپنے فیصلے کو برقراررکھا۔اسی طرح گزشتہ سے پیوستہ برس انھوں نے ترجمان حقیقت علامہ محمد اقبال ؒ کے یوم ولادت کی عام تعطیل ختم کرنے کا اعلان کیا۔اس اعلان کو جانے کیوں ٹھنڈے پیٹوں ہضم کیا گیا اور سیاسی ایوانوں میں کوئی ہلچل نہیں ہوئی،شاید اس لیے کہ علامہ اقبال ؒ کے نظریات کے برعکس آج کل سیاست دانوں کی اکثریت لبرل ازم کی دل دادہ ہے۔خیر وجہ یہ تھی یا کوئی اور،بہر حال یہ فیصلہ بھی نافذالعمل ہوگیا۔اس موقع پر پیپلز پارٹی اپنے بانی قائد کو بھی بھول گئی،کہ یوم اقبال ؒ کی تعطیل بھی ان کا فیصلہ تھا۔سب سے پہلے بھٹو صاحب نے 1977 کو سالِ اقبال ؒکے طور پر منانے کا فیصلہ کیاتھا، پاکستان میں یوم اقبالؒ کی تقریبات اس وقت تک 21اپریل کویعنی شاعر مشرق کے یوم وفات پر ہوا کرتی تھیں ،مگر قومی سطح پر فیصلہ ہوا کہ اب 9نومبر کو یوم اقبال کے طور پر منایا جائے گا۔ہم یہ عرض کررہے تھے ’’وسیع ترقومی مفاد‘‘میں پی پی کویہ بات یاد نہ رہی اور اس نے میاں صاحب کے اس فیصلے کی،جوانھوں نے امرکاواپسی کے فوری بعد کیا تھا،قبول کیا۔چھٹیوں کے حوالے سے تیسری انقلابی اصلاح جومیاں صاحب نے کی ،وہ گزشتہ برس قلیتو ںکے مذہبی تہواروں پرچھٹی کی قراردادکی منظوری ہے،اب وطن عزیزمیں یوم پاکستان،یوم دفاع،یوم قائداعظم کی طرح ہولی،ایسٹر اوردیوالی بھی قومی دن ہیں ،ان میں بھی تعطیل کی جاتی ہے اور ذرائع ابلاغ ان تہواروں کے حوالے سے معلوماتی پروگرام نشر کرتے ہیں۔اس قراردادپر بحث کرتے ہوئے اوروں کے ساتھ ساتھ وفاقی وزیراطلاعات جناب پرویز رشید کابھی یہ مانناتھا کہ پاکستان میں چھٹیوں کی تعداد دنیا میں سب سے زیادہ ہے۔اس کایہ حل نہ نکالاگیاکہ اس قراردادکومسترد کیاجاتا،بلکہ یہ انوکھاحل پیش کیاگیاکہ پاکستان میں چھٹیوں کے معاملہ پر نظرثانی کرکے اقلیتوں کے تہواروں کی چھٹیوں کے لیے راہ نکالی جائے،سووہ راہ نکالی گئی اور اس کی زد میں مسلمانوں کے بڑے مذہبی تہواریعنی عیدین کی چھٹیاں آئیں۔
جب بھی دین اسلام کی کسی اہم شخصیت کے ایام ولادت یاوفات وشہادت قریب آتے ہیں تویہ آواز اٹھتی ہے کہ ان کے دن کو بھی سرکاری سطح پر منایاجائے اور عام تعطیل کااعلان کیا جائے۔اٹھارہ ذی الحجہ حضرت سیدنا عثمان غنی ؓکا یوم شہادت ہے۔اس مناسبت سے ایک بار پھر یہ آواز اٹھائی گئی۔مطالباتی جلوس نکالے گئے۔ریلیاں نکالی گئیں۔اگرچہ مطالبہ کرنے والے بھی بخوبی یہ بات جانتے ہیں کہ ان کے اس مطالبے کو وفاقی حکومت کبھی بھی منظور نہیں کرے گی۔اس کی وجوہات کیاہیں؟یہ بات نہیں کہ حضرت عثمان غنی ؓ کی شخصیت اس کا استحقاق نہیں رکھتی،یہ بھی وجہ نہیں کہ وہ کوئی متنازع شخصیت ہیں،یہ وجہ بھی نہیں کہ ان کی چھٹی منظور کرنے سے ملک کسی قسم کی انارکی کا شکار ہوجائے گا۔ایسی کوئی وجہ نہیں،اس کے باوجودیہ چھٹی نہیں دی جاسکتی،یہ مطالبہ منظور نہیں کیا جاسکتا،یہ بیل منڈھے نہیں چڑھ سکتی۔
مطالبہ کرنے والوں سے اس کامدعامعلوم کریں تووہ بھی کہتے ہیں کہ ہم اسے کوئی دین کا حصہ نہیں سمجھتے۔ہم ایک جمہوری معاشرے میں رہتے ہیں اور جمہوری طریقے سے ایک مطالبہ پیش کرتے ہیں۔اگرشکاگوکے غیر مسلم مزدوروں کی قربانی کوخراج عقیدت پیش کرنے کے لیے تعطیل کی جاسکتی ہے توایک خلیفہ راشد اور نبی اکرم ﷺ کے دوہرے دامادکے لیے یہ اقدام کیوں بروئے کار نہیں لایاجاتا؟ان کی چھٹی سے جب ملک کو معاشی طور پر نقصان نہیں ہوتایاہوتاہے مگر ان کی محبت میں گواراکرلیاجاتاہے،تویہاں پیمانے کیوں بدل جاتے ہیں؟ان کی بات میں کتناوزن ہے یہ ہم قارئین ہر چھوڑتے ہیں،ہمارانقطہ نظر مگر مشاہیر کے ایام پر تعطیل کے حوالے سے ذرامختلف ہے،وہ یہ کہ ان کے ایام پر دفاترمیں توچھٹی ہو،لیکن تعلیمی اداروں میں چھٹی نہ ہو،بس معمول کے تعلیمی وتدریسی عمل کو معطل کرتے ہوئے اس دن اور اس شخصیت کی اہمیت اجاگر کی جائے۔اس سلسلے میں ہم صرف عصری تعلیمی اداروں کی بھی بات نہیں کرتے،شکوہ ارباب وفاکے طور ہر اہل مدارس سے بھی یہ گلہ کرتے ہیں ،کہ آپ کے ہاں بھی اس حوالے سے غفلت کی جاتی ہے۔اگر سرکاران دینی شخصیات کے ایام پر تعطیل نہیں کرتی توآپ کے ہاں اس حوالے سے کون سی بیداری پائی جاتی ہے؟آپ کی حب الوطنی شک وشبہ سے کوسوں دور،لیکن یوم پاکستان،یوم دفاع،یوم قائد جیسے قومی تہواروں پر آپ کے ہاں چھٹی کیوں نہیں کی جاتی،چھٹی نہ سہی،ان دنوں کے حوالے سے کون سی آگہی فراہم کی جاتی ہے؟الاماشاء اللہ!اس سال یوم پاکستان کی مناسبت سے مدارس میں ہونے والی ہلچل کوسراہاجاناچاہیے،جونہیں ہوسکا،لیکن مدارس کو بھی اپنے طرز عمل میں تبدیلی لانی ہوگی۔
حاصل یہ کہ حضرت عثمان غنی ؓ ہوں یاکوئی اور دینی شخصیت،ان کے ایام کو سرکاری سطح پر منانے کااہتمام کیا جاناچاہیے۔ذرائع ابلاغ میں اس حوالے سے معلوماتی پروگرامزاور اخبارات کے خصوصی ایڈیشن ایک اچھاآغاز ہیں،اس کے ساتھ ساتھ تعلیمی اداروں میں بھی تقریبات منعقد کی جانی چاہییں،چاہے وہ اسکولز،کالجز اور یونیورسٹیز ہوں یامدارس۔سیاسی جماعتوں کو بھی اس سلسلے میں تقریبات کا انعقادکرنا چاہیے،کیوں کہ خلفائے راشدینؓ،صحابہ کرامؓ ،اہل بیت اور بزرگان دین رحمھم اللہ ،کسی خاص طبقے کے نہیں ،ہم سب کے ہیں ۔

مولانامحمد جہان یعقوب
ریسرچ اسکالر وانچارج شعبہ تخصص فی التفسیر،جامعہ بنوریہ عالمیہ
ڈپٹی ایڈیٹر: ہفت روزہ’’ اخبارالمدارس ‘‘کراچی،پاکستان

جیسے جیسے ہم ایک سے بڑھ کے ایک سماجی، سیاسی اور اقتصادی بحرانوں کا سامنا کر رہے ہیں، دنیا میں اسلام فوبیا بھی شدت اختیار کرتا جا رہا ہے. جواب میں مسلم دنیا کے اندر امریکہ مخالف مہم میں بھی شدت آئی ہے. اسلام یا مسلمانوں سے نفرت کرنے والے لوگ اور امریکہ سے نفرت کرنے والے لوگ ایک دوسرے سے اجنبی ہیں، نہ ایک دوسرے سے شناسا ہیں اور نہ ہی ایک دوسرے سے کوئی واسطہ ہے. اجنبیوں سے نفرت کی یہ روایت دراصل لبرل ازم کی ناکامی ہے. اور مزید گہرائی میں جائیں تو یہ لبرل ازم ہی کی پھیلائی ہوئی نفرت ہے. اسلام فوبیا دراصل تمام مسلمانوں سے بلاسبب و بلاوجہ ڈرنا اور نفرت کرنا ہے. اِسی طرح امریکی ریاستی پالیسیوں کی وجہ سے امریکی عوام کیخلاف بڑھتی ہوئی نفرت بھی بےبنیاد ہے.

لبرل ازم “اسلام فوبیا” کی وجہ سے دوہرے منافع میں ہے. ایک فائدہ تو یہ ہے کہ عراق، افغانستان، پاکستان، یمن اور شام میں جاری سامراجی جنگوں کا عالمی سطح پہ ایک صاف اور آسان جواز مل رہا ہے. دوسرا یہ کہ محنت کشوں اور غریبوں کو مذہبیت کی بنیاد پہ تقسیم کر کے اُن کو یک جا ہو کر طاقت بننے سے روکا جا رہا ہے. اِس کی تازہ مثال پاکستان اور بھارت کے مابین حالیہ بےبنیاد کشیدگی کے دوران پاکستانی اور بھارتی عوام کے مابین پائی جانے والی نفرت میں دیکھی جا سکتی ہے. کیسے میڈیا کے زور سے ریاستی سرپرستی میں انسانی آبادیوں سے نفرت سکھائی جاتی ہے. وگرنہ بھارت اور پاکستان کی عوام کی آپس میں لڑائی یا نفرت کی کوئی وجہ بنتی ہی نہیں ہے.

امریکہ میں دائیں بازو کا رجحان اور سابقہ نوآبادیاتی ممالک کی کرپٹ حکمران اشرافیہ سامراج کی گھناؤنی سامراجیت کو جواز فراہم کرنے کیلیے تیسری دنیا کے ممالک اور خاص طور پر اسلامی ممالک میں پائی جانے والی امریکی مخالفت کو بڑھا چڑھا کر پیش کرتے ہیں. بالکل اِسی طرح مسلم دنیا کے شدت پسند عناصر اپنی رجعتی پالیسیوں کے جواز کے طور پر امریکہ اور مغرب میں پائی جانے والی اسلام دشمنی کو پیش کرتے ہیں. تاہم جدلیاتی مادیت کے علمبردار مارکس وادیوں کو اِن مظاہر کے پیچھے طبقاتی اختلاف کو اجاگر کرنا چاہئے، کیونکہ اِس بےبنیاد تقسیم کے نتائج دنیا کی ورکنگ کلاس کو بھگتنے پڑتے ہیں.

ہمیں یہ سمجھنے اور سمجھانے کی کوشش کرنی چاہیے کہ نسلی، قومی، جنسی اور مذہبی خطوط پر استحصال اور تقسیم حکمران طبقے کا آزمودہ ترین، قدیم ترین اور کامیاب ترین طریقہ کار ہے. یہ تعصبات محنت کش اور غریب طبقے کی بنیاد نہیں ہیں، بلکہ یہ تعصبات سرمایہ دار طبقہ اپنے منظم طریقے کو استعمال کرتے ہوئے اوپر سے نیچے کی پرتوں تک پہنچاتا ہے اور یوں یہ تعصبات منظم نظریات کی شکل اختیار کر لیتے ہیں. اِس کے ثبوت موجود ہیں سی آئی اے اور NYPD انٹیلیجنس یونٹ کیسے اور کیونکر یہ “فرائض” سرانجام دیتے رہے ہیں. Weird.com نے ایف بی آئی کا ایک تربیتی ڈاکومنٹ “Leak” کیا تھا جس میں ایجنٹوں کو سکھایا گیا کہ کیسے ہر مسلمان پہ شک کرنا ہے، خاص طور پر کسی بھی متقی مسلمان کیسے خطرناک ہو سکتا ہے.

ہم مارکس وادی سمجھتے ہیں کہ مذاہب کوئی جامد نظریہ نہیں ہے کیونکہ سماجی تعلقات کی مادی بنیادیں ہی کسی بھی سماج کی اقدار جس میں مذہب بھی شامل ہے کا تعین کرتی ہیں. لہذا مذہب دنیا میں موجود تنازعات کی “بنیادی وجہ” (ROOT CAUSE) نہیں ہے. بلکہ اِن تنازعات کی بنیاد طبقاتی اختلافات ہیں. تنازعات کو جان بوجھ کر مذہبی بنیاد مہیا کی جاتی ہے. ہم دیکھ سکتے ہیں کہ 2008ء کے بعد سے امریکی سیاست کے مرکزی دھارے میں مسلمانوں کے خلاف گفتگو میں ایک واضح اضافہ ہوا ہے. حتی کہ اوباما کو اپنی صدارتی مہم کے دوران “مسلمان” ہونے کے “الزام” کا سامنا کرنا پڑا تھا. اوباما میں ایسی اخلاقی جرات نہیں تھی کہ وہ اپنی مہم کے دوران “مذہب” کو ذاتی معاملہ ہی کہہ دیتا، بلکہ اوباما نے اپنے عیسائی ہونے کی گواہی دی. یوں مسلمانوں کو امریکی سماج میں بیگانہ کر دیا گیا.

اُس کے بعد سے رو امریکی میڈیا میں اسلام فوبیا کی باقاعدہ سے مہم جاری ہو گئی. گلین بلیک کانگریس کے مسلمان اراکین سے باضابطہ ٹی وی پہ بیٹھ کر بحث کے دوران ثبوت مانگتا تھا کہ وہ مسلمان دہشت گردوں سے روابط میں نہیں ہیں، حالانکہ کانگریس کے تمام مسلمان اراکین نے جنگ کے حمایت میں ووٹ دیا. سابقہ صدارتی امیدوار ہرمن کین اور موجودہ صدارتی امیدوار ڈونلڈٹرمپ کی علی الاعلان اسلام دشمنی بھی تو ڈھکی چھپی نہیں ہے. یہ لوگ کہتے ہیں کہ اگر وہ کامیاب ہوگئے تو ADMINISTRATION میں کسی بھی مسلمان کو کوئی ذمہ داری نہیں دی جائے گی. ہرمن کین نے تو مساجد کی تعمیر تک پہ بھی پابندی عائد کرنے کی بات کی تھی. جبکہ ٹرمپ کی رائے میں اسلام کوئی مذہب نہیں ہے، بلکہ یہ محض ایک نظریہ ہے. یہ لبرل ایسے عوام کو مذہب اور مذہبی عقائد کی بنیاد پہ تقسیم کرتے ہیں.

ایسی ہی طرز پہ غریب اور ترقی پذیر ممالک میں “امریکہ مخالف” خیالات کو پھیلا کر محنت کشوں کو لاعلم اور الجھا کر رکھا گیا ہے، تاکہ عوام چھوٹے چھوٹے جھوٹے اور بےبنیاد نان ایشوز میں الجھے رہیں اور اِن استحصال زدگان کی کوئی عالمگیر جڑت وجود میں ہی نہ آ سکے. مغربی، امریکی اور یورپی سماج میں موجود اسلام فوبیا کا وہی طریقہ واردات ہے جیسے تیسری دنیا کے ممالک خاص طور پر اسلامی ممالک میں امریکہ مخالف رجحانات پائے جاتے ہیں. یہاں تک کہ غریب اور ترقی پذیر ممالک کے ترقی پسند عناصر بھی امریکہ دشمنی کے جھوٹے نعروں کے سامنے دبکے ہوئے نظر آتے ہیں.

پوری دنیا کی معیشت بحرانوں کا شکار ہے، اور فلاحی بحٹ میں مسلسل کٹوتیاں کی جا رہی ہیں، محنت کش طبقے میں بےچینی بڑھ رہی ہے، لہذا یہ استحصال زدہ طبقہ اپنے حقوق کی جنگ شروع کرے گا. میں وثوق سے کہتا ہوں کہ لبرل طبقہ اپنے بورژوازی (سرمایہ دارانہ) اقتدار کے تحفظ کیلیے محنت کشوں اور غریبوں کی عالمی جڑت میں دراڑ ڈالنے کیلیے اِس مسئلے کو مزید بڑھا چڑھا کر پیش کرے گا. ہم مارکس وادیوں پہ یہ ذمہ داری عاید ہوتی ہے کہ ہم طبقاتی شعور پہ زور دیتے ہوئے محنت کش طبقے کی عالمگیر جدوجہد کی طرف مائل کریں.

مولانا سید ابو الاعلیٰ مودودی بلاشبہ بیسویں صدی کی ممتاز علمی شخصیت تھے۔ ان کے کام اور فکر نے جہاں پڑھے لکے ذہن کو اپنی طرف کھینچا وہاں عام آدمی بھی ان کی فکر اور دعوت سے متاثر ہوا۔ اپنی بے انتہا علمی اور سیاسی مصروفیات کے باوجود مولانا مودودی جب بھی اپنی رہائش گاہ 5-اے ذیلدار پارک اچھرہ لاہور میں موجود ہوتے تو نماز عصر کے بعد ان کے ہی گھر کے باغ میں ایک عام نشست ہوتی جس میں ہر طبقے اور ہر ذہنی سطح کے افراد شریک ہوتے اور یکساں فیض پاتے۔ یہ نشستیں اب تاریخ کا حصہ ہیں جن کی روداد محترم مظفر بیگ صاحب نے ایک کتاب میں سمو دی ہیں جس کا نام ‘5-۔اے ذیلدار پارک ‘ ہے۔ البدر پبلیکیشنز سے شائع ہونے والی یہ کتاب ایک خاصے کی چیز ہے۔ اس میں ساٹھ اور ستر کی دہائی کے پاکستان کی جھلک بھی دکھائی دیتی ہے شرافت اور حمیت کی سیاست جو اب ناپید ہو چکی ہے اس کی عظمت رفتہ بھی دکھائی دیتی ہے۔ مولانا مودودی کی شخصیت کا سحر پڑھنے والے پر آشکارا ہوتا ہے اور معاصر علمی شخصیات کے ساتھ مولانا کے تعلق پر بھی روشنی پڑتی ہے۔ اس دور کے عظیم عالمی و ملکی واقعات پر مولانا مودودی کے تبصرے بھی موجود ہیں۔ ہر طرح کے لوگوں کے سوالات کے جواب مولانا ایسے سمجھانے والے اور عام فہم اندازمیں دیتے کہ معاملے کی ساری نزاکت سوال کرنے والے کے ذہن میں واضح ہو جاتی۔ علمی زعم یا معمولی سوالوں پر سیخ پا ہونے کا انداز جو ہمارے مذہبی اسکالر ز کا طرہ امتیاز بن چکا ہے اس سےمولانا کا دور دور کا بھی واسطہ نہ تھا۔
موجودہ دور میں مولانا مودودی کے متعلق بے شمار غلط فہمیاں اور ابہام پائے جاتے ہیں جن میں سے بیشتر جان بوجھ کر پھیلائے گئے ہیں۔ہمارے دور کے نوجوانوں کی اکثریت جانے بغیر مولانا کی ذات پر کیچڑ اچھالتی نظر آتی ہے۔ اس کالم میں ہم آپ کو اس کتاب کے چند حصوں کی سیر کرائیں گے جس سے مولانا مودودی کی شخصیت ،ان کے انداز فکر اور اس دور کی سیاست کو سمجھنے میں خاطر خواہ مدد مل سکتی ہے۔

ایک موقع پر ایک صاحب نے کہا مولانا آپ کی کراچی اور لاہور آمد پر “پیر مودودی” اور اس قسم کے دوسرے نعرے لگائے گئے ۔ آپ کی اس بارے میں کیا رائے ہےَ؟ تو مولانا نے جواب دیا میں ان تمام خطابات سے خدا کی پناہ مانگتا ہوں۔ میں نے اپنے لئے کبھی ان چیزوں کو پسند نہیں کیا ۔ میں چاہتا ہوں کہ خدا کے دین کی تھوڑی بہت جو خدمت میں کر سکتا ہوں وہ آخری وقت تک کروں اور میرے حق میں دعا کی جائے کہ اللہ تعالیٰ اسے قبول فرما لے ۔ اس سے زیادہ میں اور کسی چیز کا طالب نہیں ہوں۔

قائد اعظم ؒ کے بارے میں مولانا مودودیؒ سے جب پوچھا گیا کہ انہوں نے تحریک پاکستان کے دوران بارہا کہا تھا کہ پاکستان کا نظام اسلام کے مطابق چلایا جائے گالیکن ایسا کچھ ہو نہ سکا۔ اس پر مولانا مودودی نے کہا میں سمجھتاہوں کہ قائد اعظم ؒ نے اس سلسلے میں جو کچھ کہا اس میں وہ پوری طرح مخلص اور ایماندار تھے لیکن جو چیز اس مرحلے پر نہ سمجھی جا سکی وہ یہ تھی کہ کس قسم کی ٹیم اور کیسی سیرت کردار کے لوگ یہ مقصد پورا کر سکتے ہیں۔ یہ اسی کا نتیجہ تھا کہ جب پاکستان بنا تو قائد اعظم اپنے اخلاص اور دیانت کے ساتھ اس ملک کے سب سے مظلوم انسان تھے اور یہی عالم مرکزی اسمبلی میں مولانا شبیر احمد عثمانی کا تھا۔ (اگست 1974)

ایک موقع پر مولانا ابو الکلام آزاد کے متعلق سوال کیا گیا تو آپ نے کہا ” مولانا آزاد ایک شریف النفس اوروسیع ظرف انسان تھے۔ وہ ان حضرات میں سے تھے جو گالیاں سنتے تو ہیں لیکن کبھی کوئی ان کی زبان سے کسی کے لئے گالی نہیں سنتا۔” (1974)

ایک موقع پر ایک عرب طالبعلم نے مقامی اخبارات میں شائع ہونے والی فحش اور عریاں تصاویر کے متعلق عربی میں سوال کیا کہ کیا ایسی صورت میں اخبارات و جرائد کا مطالعہ جائز ہے؟ تو مولانا نے عربی میں ہی جواب دیاکہ آپ حالات حاضرہ سے باخبر رہنے کے لئے اخبارات کا مطالعہ کریں جہاں تک مذکورہ تصاویر کا تعلق ہے اس کی کوئی ذمہ داری آپ پر نہیں ہے۔

ایک اور سوال سے مولانا کی بصیرت ظاہر ہوتی ہے جب فلم انڈسٹری کے ایک صاحب نے سوال کیا کہ جس عورت کی کمائی حلال طریقے سے جمع کی ہوئی نہ ہو کیا وہ حج پر جا سکتی ہے؟ مولانا نے جواب دیا ” بہتر تو یہ ہے کہ حج کے لئے حلال آمدنی اکٹھی کی جائے لیکن اگر وہ ایسا نہ کرے تو آپ اسے حج سے روکنے والے نہ بنیں۔ رسول اللہ ﷺ سے ایک شخص کے بارے میں عرض کیا گیا کہ وہ رات کو چوری کرتا ہے اور دن کو نماز پڑھتا ہے۔ آپﷺ نے فرمایا اس کو اس کے حال پر چھوڑ دو یا تو چوری اس سے نماز چھڑوا دے گی یا نماز اس سے چوری چھڑوا دے گی۔”

سوال کیا گیا کہ کیا انسان اپنے جسم کا کوئی عضو مرنے کے بعد عطیہ کر سکتا ہے؟ مولانا نے جواب دیا کہ “اصل سوال یہ ہے کہ آپ اپنے جسم کے مالک خود کب ہیں؟مذہب ہی نہیں قانون بھی آپ کو اپنے جسم کا مالک قرار نہیں دیتا۔اگر آپ اپنے جسم کے مالک ہیں تو پھر آپ کو خود کشی کی اجازت کیوں نہیں۔ اب جس جسم پر آپ کو اپنی زندگی میں اختیار حاصل نہیں مرنے کے بعد کیوں ہو گا۔ ایسی کوئی اجازت قانون دیتا ہے تو وہ قانون کا سقم ہے مذہب کانہیں۔”

بہت سے سوالات آج کے حالات کے تناظر میں بھی اہمیت کے حامل ہیں ۔

قادیانیت سے تائب ایک نوجوان نے سوال کیا کہ کیا ہم اپنے آنجہانی والد کی قبر پر جا کر دعا کر سکتے ہیں؟ مولانا مودودی نے جواب دیا “آپ قبر پر تو جا سکتے ہیں لیکن دعائے مغفرت نہیں کر سکتے۔” نوجوان نے سر جھکا لیا۔ مولانا نے مزید فرمایا” آپ اس مسئلے کو اس طرح سمجھ لیجئے کہ اگر آپ اپنے والد کی زندگی میں انتقال کر جاتے تو آپ کے والد ہرگز آپ کے جنازے میں شریک نہ ہوتے اور نہ دعا کرتے۔”

ایک نوجوان نے سوال کیا کہ یہ جو طوفان اٹھتے ہیں سیلاب اور زلزلے آتے ہیں کیا انہیں عذاب الٰہی قرار دیا جا سکتا ے؟ جواب دیا اس بارے میں کوئی کچھ نہیں کہہ سکتا۔ لیکن اتنی بات واضح ہے کہ ان کی حیثیت عذاب کی نہ بھی ہو’ یہ تنبیہات ضرور ہوتی ہیں۔انسان کے دماغ میں یہ جو غرہ ہے کہ اس نے بڑی ترقی کر لی ہے ایک زلزلہ آ کر اس پر واضح کر دیتا ہے کہ اس کی حقیقت کیا ہے۔ زلزلہ آنے سے ایک سیکنڈ پہلے بھی یہ نہیں بتایا جا سکتا کہ زلزلہ آنے والا ہے۔ نوجوان نے کہا سوات کے لوگ عموماً نماز روزے کے پابند ہیں پھر وہاں کیوں زلزلہ آیا۔ مولانا نے جواب دیا “جاننا چاہئے کہ اللہ کے اچھے بندوں پر جو مصیبتیں آتی ہیں وہ ان کے درجات بلند کرنے کے لئے ہوتی ہیں۔ بظاہر مصیبت ایک جیسی ہوتی ہے لیکن اللہ تعالیٰ کا معاملہ نافرمان بندوں کے ساتھ وہ نہیں ہوتا جو اپنے فرمانبردار بندوں کے ساتھ ہوتا ہے۔”
پوچھا گیا کہ کہا جاتا ہے امت محمدیہ ﷺ پر کوئی عذاب نہیں آئے گا اس کا کیا مفہوم ہے؟ مسلمانوں پر آفتیں تو آتی رہتی ہیں۔ جواب دیا اس کا مفہوم یہ ہے کہ ایسا کوئی عذاب نہیں آئے گا کہ یہ صفحہ ہستی سے مٹ جائے۔

ایک مرتبہ گھر کے باغ کے چند درختوں کو کٹوا دیا گیا۔ مولانا نے دیکھا تو پوچھا کیوں کٹوائے گئے؟ بتایا گیا کہ ان کے پھل کو کیڑا لگ گیا تھا۔ مولانانے جواب دیا
“ان کے پھل کو کیڑا لگ گیا تھا ان کے سائے کو تو کیڑا نہیں لگا تھا۔”

ایک نوجوان نے سوال کیا جو صاحب ایمان اچانک کسی حادثے میں مر جائے یا کسی ناگہانی آفت زلزلے وغیرہ یا مظلومانہ طریقےسے مارے جائیں کیا انہیں شہید کہا جا سکتا ہے؟ مولانا نے جواب دیا جی ہاں! کہا جا سکتا ہے اگرچہ اس کا درجہ وہ نہیں جو جہاد فی سبیل اللہ میں شہادت پانے والے کا ہے۔نوجوان نے پوچھا پھر انہیں شہید سمجھنے کی کیا وجہ ہو سکتی ہے؟ جواب ملا اللہ تعالیٰ نے اپنے صاحب ایمان بندوں کو جو رعایات دے رکی ہیں ان میں سے ایک رعایت یہ بھی ہے۔ لیکن بہرحال اس کا فیصلہ اللہ تعالیٰ ہی کرے گا کہ کون صاحب ایمان ہے اور کون نہیں۔ وہی بہتر جانتا ہے۔

ایک صاحب نے کہا کیا یہ حقیقت نہیں کہ خدا اس کے ساتھ ہوتا ہے جو حکومت میں ہوتا ہے؟ مولانا نے جواب دیا یہ تو آپ نے بڑی عجیب بات کہہ دی کیا حضرت موسیٰ ؑ اور فرعون کی کشمکش میں اللہ تعالیٰ فرعون کے ساتھ تھا؟ خدا حق کے ساتھ ہوتا ہے’ محض اقتدار کے ساتھ نہیں۔

ایک صاحب نے سوال کیا کیا اسلام نیشنیلٹی کے خلاف ہے؟ جواب دیا اسلام نیشنیلٹی کا نہیں نیشنلزم کا مخالف ہے۔ نیشنیلٹی تو انسانوں کی تقسیم کا فطری اظہار ہے۔ اسلام کی نگاہ میں قوم ہونا کوئی جرم نہیں قوم پرست ہونا جرم ہے۔

ایک نوجوان نے سوال کیا کہ آج یہودی جس طرح عالمی سیاست پر اثر انداز ہو رہے ہیں اس کا سبب کیا ہے؟ مولانا نے جواب دیا اس کی ایک وجہ امریکی سرپرستی ہے۔ آج امریکہ میں برسراقتدار آنے کی کوشش کرنے والے کسی گروہ کے لئے یہ ممکن نہیں رہا کہ وہ یہودیوں کے ووٹوں کو نظر انداز کر سکے۔ چناچہ ان کی حمایت حاصل کرنے کے لئے وہ ان کے مطالبات پورے کرتے ہیں۔ اس طرح انہیں عالمی سیاست پر اثر انداز ہونے کا موقع ملا ہوا ہے۔ لیکن یہ کوئی ایسی چیز نہیں جو ہمیشہ قائم رہ سکے۔ امریکہ کے ہوشمند انسانوں کو اس کااحساس ہو رہا ہے کہ ہم یہودیوں کی خاطر کس سطح پر اتر آئے ہیں۔ یہ نہیں کہا جا سکتا کہ کب لیکن جلد یا بدیر امریکہ میں بھی یہودیوں کا وہی انجام ہوسکتا ہے جو جرمنی میں ہوا۔ وہاں انہوں نے پہلی جنگ عظیم کے دوران اور اس کے بعد جو کردار ادا کیا اور جرمنی کو اس کا جو نقصان پہنچا اس سے ہٹلر کے دل میں ان کے خلاف گرہ بیٹھ گئی۔ بعد میں ان کا جو قتل عام ہوا اس کا پس منظر یہی تھا۔ایک صاحب نے کہا کیا دور حاظر میں کوئی ایسی مثال بھی ملتی ہے جس سے پتہ چلتا ہو کہ یہودی عالم انسانی کی خدمت یا تعمیر میں کوئی حصہ لے رہے ہیں؟ کہا نہیں بلکہ اس کے بر عکس ہم یہ دیکھتے ہیں کہ دنیا میں جو فتنہ بھی اٹھ رہا ہے اس میں بالعموم یہودی دماغ اور یہودی سرمایہ ہی کام کر رہا ہے۔ سوشلزم اورکمیونزم ایک یہودی دماغ ہی کی تصنیف ہیں۔ فرائڈ کا فلسفہ بھی انہی کے ایک فرد کی اختراع ہے۔ دنیا کی بڑی بڑی خبر رساں ایجنسیاں اور بہت سے کثیر الاشاعت پرچے یہودیوں کے زیر اثر ہیں یا ان کی ملکیت میں ہیں۔ اور اسی لئے مسلمانوں میں سیکولرازم اور فکری انتشار پھیلانے کا کوئی موقع ہاتھ سے جانے نہیں دیتے۔
ایک نوجوان نے کہا مولانا قرآن مجید میں یہودیوں کے لئے ذلت و مسکنت کے الفاظ آئے ہیں ۔ لیکن آج وہ ایک خطہ زمین پر قابض ہیں۔ مولانا نے جواب دیا اگر لٹیرے کسی بستی پر قبضہ کر یں تو اس سے ان کے لٹیرے ہونے پر کوئی فرق نہیں پڑ سکتا؟ یہی ایک حقیقت کہ اس وقت کوئی فتنہ ایسا نہیں ہے جس کے پھیلانے میں ان کا ہاتھ نہ ہو ان کی ذلت کو ظاہر کرتا ہے۔ فتنوں اور سازشوں کے بل پر جینا کسی قوم کے لئے باعث عزت نہیں ہو سکتا اور نہ یہ اس کے بقا کی کوئی مستقل ضمانت ہے۔ اللہ تعالیٰ نے انہیں عبرت کے طور پر دنیا میں باقی رکھ چھوڑا ہے ۔ اس لئے کبھی کبھی انہیں پاؤں جمانے کا موقع بھی دے دیتا ہے۔ لیکن کوئی نہیں کہہ سکتا کہ کس وقت ایسا مرحلہ ختم ہو جائے اور کب سزا کا دوبارہ آغاز ہو جائے۔
پوچھا گیا اس سلسلے میں عالم اسلام کے بچاؤ کی کیا صورت ہو سکتی ہے؟ مولانا نے کہا ہم قرآن و سنت پر عمل پیرا ہوں تو کوئی فتنہ ہمارے لئے فتنہ نہیں بن سکتا۔ قرآن حکیم اور رسول ا للہ ﷺ کی سیرت پاک نے ہر دور میں ہماری رہنمائی کی ہے اور ہماری حفاظت بھی۔عیسائی دنیا جس آسانی کے ساتھ صیہونی عزائم کا شکار ہوئی ہے اس سے بھی یہ بات ثابت ہوتی ہے کہ وہ اس نعمت سے محروم تھی جو قرآن و سنت کی صورت میں مسلمانوں کے پاس موجود ہے۔ (جولائی 1976)

ایک صاحب نے ایک کاغذ سامنے رکھا اور فتویٰ مانگا۔ مولانا مودودی نے کہا کیا آپ کو معلوم نہیں کہ میں فتویٰ نہیں دیا کرتا۔ اگر کوئی صاحب کسی مسئلے پر رائے پوچھتے ہیں تو اپنی رائے بیان کر دیتا ہوں لیکن فتویٰ نہیں دیتا۔

اس دور میں مولانا کی مقبولیت کا اس واقعے سے پتا چلتا ہے کہ عید کے موقع پر لاتعداد خطوط اور عید کارڈز 5۔اے ذیلدار پارک میں موصول ہوئے ان میں ایک عید کارڈ ساتویں جماعت کے بچے کا تھا۔ ایسا معلوم ہوتا تھا کہ اسے مولانا کا ایڈریس معلوم نہیں تھا لہذا اس نے اخبار میں سے مولانا کی تصویر کاٹ کر لفافے پر چپکا دی تھی اور وہ کارڈ بخیریت مولانا تک پہنچ گیا تھا۔

ایک سفید ریش بزرگ نے کہا آپ جب اپنے رب کے حضور حاظر ہوں گے تو خاص طور پر اپنا کون سا کارنامہ اس کے سامنے رکھیں گے؟ مولانا نے کہا ہم تو اس کی رحمت سے امید لگائے بیٹھے ہیں ۔ وہ کسی بات کو قبول فرمالے تو یہ اس کا کرم اور ہماری خوش نصیبی ہو گی۔ ان صاحب نے الفاظ بدل کر اپنا سوال دھرایا تو آپ نے کہا ہمارا تو سارا انحصار اس کی رحمت پر ہے۔ ہم فقط اس کی رحمت کے طلب گار ہیں۔ (جاری ہے)