Tag: شیعہ

فارس کے جنگجو بیڑے یمن کی سمندری موجوں میں اضطراب پیدا کر رہے ہیں۔ ”دور رس“ نگاہیں تہران سے کوفہ اور مدینہ تک خون کا سمندر موجزن دیکھ رہی ہیں۔ نجران اور جیزان کے ساتھ ساتھ چلتی حجاز کی حدوں میں حوثیوں کا ہجوم جمع ہو رہا ہے۔ دوسری جانب آل سعود خوفزدہ نگاہوں سے جاتے ہوئے دن دیکھ رہے ہیں۔ عالمی منڈی میں تیل اور تیل کی دھار چمک کھو رہی ہے۔ ریاض حکومت کا ریونیو لڑکھڑا رہا ہے۔ سعودی عوام کی سبسڈیز اچھے دنوں کی یاد بنتی جا رہی ہیں۔ خارجی مزدوروں کے غلامانہ شب و روز نامراد ہوئے جاتے ہیں، واجب الادا مزدوری تک ملنا محال ہو رہا ہے۔ نسل پرست آل سعود تلے کچھ آسودہ نہیں رہا ہے۔

صاف نظر آرہا ہے، آگ یمن میں بل کھا رہی ہے۔ خلیج عدن کے کنارے عرب و فارس تعصب سے جھلس رہے ہیں۔ ایسا کیوں ہے؟ جواب جتنا سادہ اتنا ہی عام فہم سے دور ہے۔ آگ اور مٹی کا ازلی تماشا ہے۔ روایت شیطان ابلیس سے چلی، اور بنی اسرائیل کي فضیلت سے عرب و عجم کی درجہ بندی پر پہنچ چکی۔ یہی ہے مسلم امہ کا اصل مسئلہ۔ یہی شیطان کا مؤثر ترین ہتھیار ہے، اسی ہتھیار سے مغرب لیس ہے۔

خبریں مسلسل خبردار کر رہی ہیں۔ ایران کے پریس ٹی وی پر فوج کے ترجمان بریگیڈئیر جنرل مسعود جزائری کا بیان نقل ہوا ہے کہ ”ایران سے جنگ سعودی اتحاد کے بس کی بات نہیں، یہ اتحاد ایران کے مقابلہ میں بہت کمزور ہے۔“

فارن پالیسی جریدے نے رپورٹ کیا کہ ایران کے دوجنگی جہاز خلیج عدن پہنچ چکے، جہاں امریکہ کے جنگی بیڑے پہلے سے موجود ہیں۔ ایران کے جہاز الوند اور بوشہر جدید جنگی صلاحیتوں اور ہتھیاروں سے لیس ہیں۔

رائٹرز سے خبر آئی ہے کہ روس نے s-300 میزائلوں کی طے شدہ کھیپ ایران کو مہیا کر دی ہے۔

واشنگٹن پوسٹ کے مطابق امریکہ کے حمایت یافتہ سعودی اتحاد نے غلط معلومات کی بنیاد پر یمن کے دارالحکومت صنعا میں جنازے پر بمباری کی، سو سے زائد افراد ہلاک ہوئے۔ سیکڑوں زخمی ہوئے۔

ان خبروں کے علاوہ دو تجزیاتی پروپیگنڈے بھی مغربی منصوبے کی پیش رفت سمجھنے میں معاون ہوسکتے ہیں۔

دی اکانومسٹ کا مضمون The West should help Saudi Arabia limit its war in Yemen، جیسا کہ عنوان سے ظاہر ہے، یہ مغرب کو جنگی مکر و فریب کی نئی ضرورت سمجھا رہا ہے۔ مضمون مغربی نقادوں کے حوالے سے کہتا ہے کہ ”وقت آگیا ہے کہ مغرب سعودی عرب سے شرمناک اتحاد ترک کر دے۔ اخلاقا اور شاید قانونا امریکہ اور برطانیہ سعودی عرب کی حرکتوں میں برابر کے ذمہ دار ہیں۔ یہ سعودی عرب کو جنگی جہاز اور اسلحہ فروخت کرتے ہیں، اور ہدف کو نشانہ بنانے میں مدد فراہم کرتے ہیں۔“ ( صنعا جنازے پر حملہ کے حوالے سے یہ معنی خیز بات ہے)۔ آگے چل کر مشورہ دیا گیا ہے کہ ”توازن کے لیے ضروری ہے کہ مغرب سعودی عرب کو لگام دے، یمن میں اس کی فضائی کارروائیوں سے ہونے والے نقصان کو کم سے کم کرے، اور حتمی طور پر رکوا دے۔“

اسلامی تہذیب کے احیاء پرگہری نظر رکھنے والے پروپیگنڈسٹ امریکی مصنف ولی رضا نصر کی کتاب Shia Revival اور کچھ عرصہ پہلے کا ضمیمہ نما مضمون War for Islam مغرب کی حالیہ پالیسی کا بیانیہ واضح کر سکتا ہے۔ مضمون کے اختتام پر نصر مشرق وسطی کی صورتحال کا یہ نتیجہ اخذ کرتا ہے، ”مشرق وسطی کو نئے آرڈر کی ضرورت ہے۔ خطے کے زمینی حقائق بدل چکے ہیں۔ اب شیعہ خطے کی سیاست میں بالادست کردار چاہتے ہیں۔ ایران کو محدود رکھنے والی دیوار ڈھائی جا چکی۔ بظاہر، اس صورتحال کو امریکہ کی خاموش رضامندی حاصل ہے۔ سعودی اتحاد چاہتا ہے کہ مشرق وسطی کی صورتحال 2003ء سے پہلے کی سی ہوجائے، مگر وقت آگیا ہے، نئی حقیقت کو تسلیم کر لیا جائے کہ ایران خطے کی غالب قوت بن چکا ہے۔ اسی اعتراف پر امن کا انحصار ہے۔“

مغرب کے پالیسی سازوں کی اسٹریٹجی ایسا کھلا راز ہے، جسے چند مرحلہ وار اقدامات میں سمجھنا راکٹ سائنس نہیں۔ شیعہ سنی تفریق کے باوجود مشرق وسطی کی تاریخ ماضی قریب تک پرامن رہی ہے۔ مگرعراق پر امریکہ نے حملہ کرکے شیعہ اکثریت کا توازن سنی اقلیت کے خلاف دہشت ناک طریقوں سے بگاڑا، پھر سنی اقلیت کی محرومی و مایوسی کو کرائے کے دہشت گردوں کا شکار کر دیا۔ مشرق وسطی میں ایسی شیعہ سنی جنگ چھڑ چکی ہے، جسے روکنا بظاہر مشکل ہے۔ امريکہ اور روس کی قیادت میں مغربی دنیا دونوں کو اسلحے سے لیس کر رہی ہے۔ اقلیت ہونے کے باوجود ایران کے حق میں توازن پیدا کیا گیا ہے۔ امریکہ ایک جانب سعودی عرب کی حمایت کا ڈرامہ کر رہا ہے، اور دوسری جانب تہران حکومت کی پیٹھ تھپتھپا رہا ہے۔

سعودی عرب اور ایران کی خود ساختہ دوقطبی حکومتیں جاہ پرستی و نسلی فضیلت کی جنگ میں کشت و خون پر جُتی ہیں۔ عقلوں پر پردہ پڑا ہے، اور اس پردے پر جو منظر ہے، وہ ایک ایسے میدان جنگ کا ہے جہاں دو لشکر آمنے سامنے ہیں، مگر ایک لشکر میلہ سجائے دوسرے لشکر کے باہمی کشت و خون سے لطف اندوز ہو رہا ہے۔ باہمی خون خرابے میں لت پت لشکر مسلم امہ کا ہے، جبکہ تماشائی لشکر روس، امریکہ اور اسرائیل پر مشتمل ہے۔ کس قدر تعجب کی بات ہے کہ مشرق وسطی میں تمام ہی ممالک جنگی خطرات سے دہشت زدہ ہیں، سوائے اسرائیل کے۔ ریاض سے تہران اور بیروت تک جنگجوؤں کی فوج در فوج پورے خطے کو خاک و خون میں ملا رہی ہے، سوائے اسرائیل کے۔ سعودیہ کو کسی سے خطرہ ہے توایران سے۔ ایران کو کسی سے خطرہ ہے تو سعودیہ سے۔ مسلم امہ کا یہ باہمی خوف دور ہوسکتا ہے۔ آسان سا طریقہ ہے۔ عربی، فارسی، حوثی، سنی، شیعہ، اور ديگر مسلکی پہچان، نسلی فضیلت، قومی تعصب، اور نظریاتی اختلاف کی بنیاد پر شناخت یا تفاخر ترک کر دیں۔ واحد شناخت ”مسلمان“ ہی کو باہمی فخر کا ذریعہ سمجھیں، اور تقوٰی ہی کو واحد معیار کردار ٹھہرائیں۔ باہمی قتل و غارت میں یہاں تک جو ہوا وہ امت وسط کا عظیم نقصان ہے، اگرنسلی تعصب کی یہ دست درازی حجاز میں ہوئی، تو تہران و ریاض ناقابل تلافی نقصان کے مرتکب ہو جائیں گے۔ یہ کسی صورت نہیں ہونا چاہیے۔

آج کل ایک نئے فیشن نے زور پکڑا ہوا ہے کہ ہر کوئی خود کو ”صرف مسلمان“ کہلانے پر بضد ہے۔ مقبول عام جملہ یوں بن گیا ہے کہ ”میں نہ سنی ہوں، نہ شیعہ ہوں۔ نہ دیوبندی بریلوی اور اہل حدیث ہوں، میں صرف مسلمان ہوں“. حد تو یہ ہے کہ فرقہ بندی کی گہری ہوتی ہوئی تقسیم در تقسیم سے وابستہ میرے کچھ دوست بھی سوشل میڈیا پر آ کے ”صرف مسلمان“ بن جاتے ہیں۔ آئیے، دیکھتے ہیں کہ ”صرف مسلمان“ بن کر فرقہ بندی ختم یا کم ہو سکتی ہے؟ اور یہ کہ ”کیا سنی، شیعہ، بریلوی، دیوبندی اور اہل حدیث“ ہونے سے کوئی مسلمان نہیں رہتا ہے؟

آپ نے اپنا فیس بک کھولا ہوا ہے، اور یہ لکھنے جا رہے ہیں کہ آپ ”صرف مسلمان“ ہیں۔ لیکن ٹھہریے، امت کو کنفیوز کرنے سے پہلے خود سے ہی کچھ سوال کریں! کیا امامت اور خلافت دو الگ الگ چیزیں ہیں؟ کیا رسول پاک صلی اللہ علیہ و سلم کی خلافت کے حقدار حضرت علی رضی اللہ عنہ اور ان کے بعد اہل بیت اطہار کے ائمہ ہی ہیں؟ کیا حضرت ابوبکر صدیق، عمر فاروق اور عثمانِ غنی رضی اللہ عنہم کی خلافتوں میں حضرت علی کی حق تلفی ہوئی تھی؟ (سوالات اور بھی ہیں، لیکن ان کو خوفِ فساد خلق سے ناگفتہ رہنے دیتے ہیں۔) ان سوالات کا جواب اگر آپ اثبات میں دیتے ہیں تو مبارک ہو، آپ شیعہ ہیں اور اگر نفی میں دیتے ہیں تو آپ سنی ہیں۔ اپنے اندر ایک بار پھر جھانک لیجیے، کیا فقہی معاملات میں اماموں کی تقلید ناجائز ہے؟ جو آدمی اجتہاد کی صلاحیت نہیں رکھتا اس کے لیے کسی امام کی تقلید کے علاوہ کوئی اور راستہ ہے؟ (یہاں بھی کچھ تلخ سوالات ہیں لیکن وہی فسادِ خلق کا خوف آڑے آ رہا ہے)۔ اگر ان سوالات کا جواب سر کی عمودی حرکت سے دے رہے ہیں تو لاکھ انکار کریں، آپ اہل حدیث ہیں۔ اور اگر افقی انداز میں سر ہلا رہے ہیں تو آپ (پاکستان کے تناظر میں) حنفی ہیں۔ پھرسے خود کو ٹٹولیں! کیا رسول پاک صلی اللہ علیہ وسلم نور ہیں؟ کیا آپ صلی اللہ علیہ و سلم کو علم کل حاصل ہے؟ کیا آپ صلی اللہ علیہ و سلم مختارِ کل ہیں؟ اگر ان سوالات کا جواب ہاں میں ہے تو آپ بریلوی ہیں اور نہیں میں ہے تو دیوبندی! پھر بھی اگر آپ کو ضد ہے کہ آپ، سنی شیعہ، اہل حدیث، دیوبندی، بریلوی کچھ نہیں بلکہ صرف مسلمان ہیں تو ان سوالات کا جواب ”ہاں“ اور ”نہیں“ کے علاوہ دیں۔ اور یقین جانیے اگر آپ کی فکر رسا کوئی درمیانی جنس کا جواب دریافت کر لیتی ہے تو آپ ”صرف مسلمان“ نام کے ایک اور فرقے کی بنیاد ڈال دیتے ہیں۔ یہ کوئی مفروضہ نہیں ہے، تاریخ میں جب بھی کوئی مسلکی شناخت کے خلاف تحریک چلائی گئی ہے اور اسے کامیابی ملی ہے تو اس کا آخری انجام ایک نئے مسلک کی صورت میں ہوا ہے۔ خود ہمارے دور میں جاوید احمد غامدی صاحب یہی آواز لے کر اٹھے تھے، لیکن دیکھیے، آج جتنا جمود غامدی صاحب کے کچھ متبعین میں پایا جاتا ہے، اتنا جمود کسی دور افتادہ گاوں میں بیٹھے ہوئے اس شخص کے اندر بھی نہیں ہوگا جس کا کل علم ”خلاصہ کیدانی“ تک محدود ہے۔

اب آتے ہیں دوسری بات کی طرف! میں اگر حنفی ہوں تو کیا اس کا یہ مطلب ہوا کہ میں نے ”دین کے اندر دین“ قائم کیا ہے جس کا مطلب یہ ہوا کہ اب میں مسلمان نہیں رہا یا اس کا مطلب یہ ہے کہ سوچنے کے دو مختلف زاویوں میں، میں نے ایک زاویے کو منتخب کیا ہے۔ کوئی اگر شیعہ ہے تو کیا اس کا مطلب یوں لیا جائے کہ وہ خود کو مسلمان نہیں سمجھتا؟ یہ مسالک –غلط یا صحیح کی بحث سے ہٹ کر – مختلف فکری و قانونی رجحانات کی نمائندگی کرتے ہیں، جس کا یہ مطلب ہرگز نہیں ہے کہ ان شناختوں کی وجہ سے اسلام پر کوئی حرف آتا ہے۔ اسلام ان تمام مسالک سے وابستہ افراد کی پہلی شناخت ہے۔ لیکن مسلمانوں کے اندر آنے والی فکری تقسیم کو اگر ریت میں سر دبا کر نظر انداز نہیں کرنا ہے تو اپنی وابستگی کا اظہار کرنا ضروری ہے ورنہ ”صرف مسلمان“ کے نام پر خود کو ”معتدل اور روشن خیال“ مسلمان ظاہر کرنے والے یا تو پرلے درجے کے منافق ہوں گے یا پھر ایک نئے فرقے کی داغ بیل ڈال دیں گے۔

مسئلہ کہاں ہے؟
مسئلہ مسلکی وابستگی اور فکری شناخت میں نہیں ہے۔ مسئلہ عدم برداشت والی سوچ میں ہے۔ فکری تنوع ہر معاشرے کا حسن ہوا کرتا ہے لیکن یہ حسن تب تک ہوتا ہے جب تک دوسرےکے وجود کو برداشت، اس کی رائے کا احترام اور اس کے علم کا اعتراف کیا جائے۔ یہاں پر چلن یہ ہوا ہےکہ –چند مستثنیات کو چھوڑ کر– ہر انسان خود کو مکمل ٹھیک اور دوسرے کو مکمل غلط تسلیم کیے بیٹھا ہے۔ اس بیماری کا علاج بھی ہمیں دورِ قدیم سے امام شافعی نے تجویز کیا ہے کہ ”میری رائے درست ہے لیکن اس میں غلطی کا امکان ہے، آپ کی رائے خطا ہے لیکن اس میں درستی کا احتما ل ہے“۔ بس امام شافعی رحمہ اللہ کی اس سوچ کو اپنا کر شیعہ، سنی، دیوبندی بریلوی اور اہل حدیث بن کر رہنے میں ہی عافیت ہے ورنہ ”صرف مسلمان“ نام کے لا تعداد فرقے وجود میں آتے رہیں گے۔

تاریخ کا طالبِعلم حیران و پریشان پڑھ رہا تھاـــ اور مؤرخ کچھ یوں لکھ رہا تھا۔

پریشانی یہ نہ تھی کہ اُمت تفرقوں میں بٹی، تو کیوں بٹی؟ بلکہ پریشانی تو یہ تھی کہ جو کام امت کے ”خواص“ کے کرنے کا تھا وہ ”عوام“ کے درمیان فٹبال بنا ہوا تھا۔ ہر ایرا غیرا نتھو خیرا اس نازک مسئلہ کو موضوعِ سخن بنا کرسسکتی تڑپتی امت کی پیٹھ میں چھرا گھونپنا گویا اپنا فرض منصبی سمجھ بیٹھا تھا۔ اخوت و رواداری شاید کسی خودکش حملہ کی بھینٹ چڑھ چکی تھی، زمیں لہو لہو تھی اور آسمان بھی رو رہا تھا۔

جی ہاں ـــــــ یہ سب ایک المیہ کا شاخسانہ تھا، اور المیہ کیا تھا، آئیے سنیے اور سر دھنیے۔

المیہ یہ نھیں تھا کہ ”علم“ یا ”علم والوں“ کی کمی تھی، بلکہ المیہ تو یہ تھا کہ جنھیں قوم اپنا معلّم و مربّی سمجھ رہی تھی، ان میں سے اکثریت نے تعصب کی عینک چڑھا کرـــــــ ٹسل کا لبادہ اوڑھ کرـــــــ طنز کے نشتر چلا کر ـــــــ حقائق سے منہ موڑ کرـــــــ الحاد سے رشتہ جوڑ کرـــــــ اسلاف کا رستہ چھوڑکر ـــــــ قرآن سے ناطہ توڑ کرـــــــ اور تو اور یہاں تک کہ سب نے اجتماعی طور پر اپنے ضمیر کو آپ ہی چکمہ دے کر خواص کے خالص موضوع کی باریکیوں کو عوام میں کثرت سے اچھالنا اور نفرت کے بیج بونا اپنا وطیرہ بنا رکھا تھا۔

جی۔۔؟ کیا کہا۔۔؟ مؤرخ غلط تھا۔۔؟ ـــــــ نھیں نھیں مؤرخ یقیناً بر حق تھا۔

کیونکہ۔!
ایک طرف وہ متشدد اور اعتدال سے عاری واعظین تھے جن کو”آلِ رسولؐ“ پر بیتی خونچکاں داستانِ الم کو بیان کرتے تو شاید موت آ رہی تھی مگر وہ متفقہ طور پر ظلم کے محرّک ”یزید“ کو ڈھکے چھپے الفاظ میں فرشتہ ثابت کرنے کے واسطے چند ”اش اش“ کرنے والوں کے سامنے ایڑی چوٹی کا زور لگا کر نواسۂ رسول کے کٹے سر سے کھیلنے والے کو فاتحِ قسطنطینہ بنا کر فرمانِ رسولؐ کی ٹھنڈی چھاؤں کا تحفظ فراہم کر کے پتا نہیں کون سا فرضِ منصبی ادا کر رہے تھے؟ ـــــــ حالانکہ ان کے اسلاف نے تو ان کو اس موضوع پر منہ بند رکھنے کا حکم دے رکھا تھا۔

جبکہ۔۔۔!!
دوسری طرف اُن سکہ بند ذاکرین کی فوج تھی جن کے پاس رات گئے سے لے کر صبحِ صادق تک کی لمبی چوڑی تقریروں میں اپنے مصاحب کے سامنے”خانوادۂ رسول“ پر ڈھائے گئے مصائب و آلام بیان کرنے کو تو صرف چند منٹ ہی میسر تھے لیکن ”تبریٰ“ کی شر انگیز داستانیں رقم کرنے کو چارچار گھنٹے بھی ناکافی تھے ـــــــ زمین اس بارسے پھٹنے کو تھی اور آسمان خون کے آنسو رو رہا تھا کہ اپنی ماں کے لیے ننھی سی گالی بھی برداشت کرنے سے انکاری یہ مربی اُمت کی ماں پر تبریٰ کے تیر برسا کرآخر کون سی جنت کے متلاشی تھے؟

ایسے میں طالبِ علم کا حال کچھ یوں تھا۔

کہ ایک طرف
آنکھیں اشک اشک تھیں اِن ”اش اش“ کرنے والوں پر
اور دوسری طرف
عقل بھی ماتم کر رہی تھی اُن ”ماتم“ کرنے والوں پر۔

مؤرخ کا قلم خاموش ہو چکا تھا، لیکن دو انتہاؤں کے بیچ پستا تاریخ کا طالبِ علم کافی دیر سے کسی گہری سوچ میں مستغرق تھا۔

بلآخر طالب علم فیصلہ کن انداز میں ایک نئے جذبے، ولولے اور سچی لگن کے ساتھ تلاشِ حق کی ایک نئی جستجو میں اٹھ کھڑا ہوا تھا کیونکہ اسے قرآن کا پیغام یاد آگیا تھا کہ خلۤاقِ دوعالم کی طرف سے دیا گیا اشارہ وَھَدَینٰہ النۤجدَینِ (البلد-۱۰) ہمیشہ سے کارگر رہا تھاـ

اُسے یقین ہو چلا تھا کہ منزل اب تشدد اور تعصب کی ”پگڈنڈیوں“ پر موجود افراط وتفریط کی خار دار جھاڑیوں سے کھیں دور بہت دور اعتدال کے ”موٹروے“ کنارے بسے اخلاص کے کسی آشیانے پر برداشت کی ٹھنڈی چھاؤں تلے ہی مل سکتی ہے ـــــــ اور ویسے بھی حق اپنے متلاشیوں پر عیاں ہو جایا کرتا ہے بشرطیکہ اندر میں ”طلبِ صادق“ موجود ہو.

شیعہ سنی کے مابین جھگڑا کس بات کا ہے؟ بلاوجہ کی بدگمانیاں اور دوریاں ہیں۔ سینئر صحافی آصف محمود صاحب نے اس اہم موضوع پر قلم اٹھایا ہے۔ دلیل پر شائع ہونے والے اپنے مضمون میں انھون نے فریقین کو باہمی رنجشیں بھلا کر اخوت اور روداری سے رہنے کی تلقین کی ہے۔ بلاشبہ یہ ایک عمدہ کاوش ہے جس کی جتنی تعریف کی جائے کم ہے۔

آصف محمود صاحب نے اہل بیت اطہار کے ساتھ اپنی محبت و نسبت کو بیان کیا اور اس کی چند عام فہم مثالیں بھی پیش کیں جن سے واضح ہوتا ہے کہ اہل سنت بھی اہل بیت سے گہری محبت و عقیدت رکھتے ہیں۔

جناب آصف محمود صاحب! جھگڑے کی وجہ محض بدگمانی ہےتو لیجیے اس کا ازالہ میں کیے دیتا ہوں، میرا تعلق اہل سنت سے ہے جبکہ میرا سلسلہ نسب عم رسول سیدنا عباس رضی اللہ عنہ سے جا ملتا ہے جو اہل تشیع کے ہاں غازی عباس علمدار کے نام سے معروف ہیں۔ اہل بیت سے محبت و عقیدت میرا ایمان ہے اور جو ان سے دشمنی رکھے، وہ اللہ و رسول کا دشمن ہے۔ ان سے محبت وعقیدت کی بنا پر بچوں کے نام انھی سے موسوم کیے ہیں چنانچہ بھانجے اور بھتیجے کے نام حسن و حسین اور بھتیجی فاطمہ ہے جبکہ دوستوں میں قاسم، عقیل، شبیر اور تقی سب پائے جاتے ہیں۔

محرم کے پہلے دس دن عشرۂ فاروق و حسین رضی اللہ عنہم کے طور پر مناتا ہوں اور ان کے نام پر منعقد کردہ مجالس میں جا کر ان کی عظمت و شان کو سننا اور بیان کرنا باعث فخر و سعادت اور ذریعہ نجات سمجھتا ہوں۔

جہاں تک آپ کی اس بات کا تعلق ہے کہ ہمیں بھی امام زین العابدین رح اور امام جعفر صادق رح کے علم و فضل سے مستفید ہونا چاہیے تو اس بارے میں عرض ہے کہ یہ دونوں ائمہ کرام امام ابوحنیفہ رح کے بالواسطہ اور بلاواسطہ اساتذہ میں شامل ہیں تو اس طرح اہل سنت نہ صرف ان کے علم و فضل اور تقوی و ورع کے قائل ہیں بلکہ ان سے علمی و روحانی استفادہ اور کسب فیض بھی کرنے والے ہیں۔

اب آنجناب سے عرض ہے کہ ہماری غلط فہمی کو بھی دور کیجیے تاکہ بدگمانی نہ ہو، اہل تشیع کا کوئی ایسا خاندان بتا دیجیے جہاں بچوں کے نام ابوبکر، عمر، عثمان اور بچیوں کے نام عائشہ اور حفصہ ہوں حالانکہ حضرت علی رضی اللہ عنہ کے فرزندان کے نام ابوبکر، عمر اور عثمان تھے جو حضرت حسین رضی اللہ عنہ کے ساتھ کربلا میں شہید ہوئے۔
کیا خلفائے ثلاثہ حضرت ابوبکر، حضرت عمر اور حضرت عثمان رضی اللہ عنہم کو امام اور خلیفہ تسلیم کیا جائے گا جنہیں حضرت علی رضی اللہ عنہ نے اپنا امام تسلیم کیا اور ان کے حق میں خلافت سے دستبردار ہوئے۔ کیا حضرت معاویہ رضی اللہ عنہ کی سیادت قبول کی جائے گی کہ جن کے ہاتھ پر حضرت حسن رضی اللہ عنہ نے بیعت کی اور انہیں اپنا امام بنایا۔

چلیے نام نہ رکھیں اور برحق کا معاملہ بھی چھوڑ دیں، کم از کم یہ یقینی بنایا جا سکتا ہے کہ خلفائے راشدین، ازواج مطہرات اور صحابہ کرام کا احترام ہو، برسرعام گالی دے کر ان کی توہین نہ کی جائے، اور جو شخص ان میں سے کسی کی توہین کرے، اسے اہل تشیع احباب خود ہی روک دیں تو میں آپ کو یقین دلاتا ہوں کہ کسی مصالحت کی ضرورت نہ پڑے گی، معاملہ خود بخود حل ہو جائے گا، اور پھر وحدت و یکجہتی میں جو روڑے اٹکائے گا، اس سے اہل سنت خود نپٹ لیں گے۔

مجھے میرا کوئٹہ واپس چاہیے کے عنوان سے حسن رضا چنگیزی صاحب کا مضمون دلیل پر دیکھا، محترم انعام رانا صاحب نے بھی اس کو اپنی فیس بک وال پر دردمندانہ اپیل کے ساتھ شیئر کیا ہوا تھا. پہلے تو چنگیزی صاحب کی ہمت و حوصلے کی داد دینی چاہیے کہ انھوں نے کسی لگی لپٹی کے بغیر سچ لکھا اور یہ نہیں دیکھا کہ اس کی زد میں ان کا اپنا فرقہ، قبیلہ اور برادری آ رہی ہے.

یہ وہ مسئلہ ہے جس کا حل ہر دردمند انسان کو چاہیے لیکن مؤدبانہ گزارش یہ ہے کہ وجوہات ختم کیے بغیر مسئلے کو سلایا تو جاسکتا ہے ختم نہیں کیا جاسکتا۔ کیا بے ہوشی کا انجیکشن کسی مرض کی دوا ہوسکتا ہے؟

چنگیزی صاحب اور انعام رانا صاحب کو اپنا کوئٹہ اور لاہور واپس چاہیے جہاں عاشور ہوتا تھا لیکن خوف کے سائے سے پاک، محبتوں سے لبریز اور الفتوں سے معمور۔
بجا!۔ ہم سب کو بھی وہی پاکستان چاہیے جہاں کشت و خون کے بغیر ہم آباد تھے تو ہم اسے پانے کے لیے تھوڑا پیچھے کیوں نہیں چلے جاتے۔
کیا شیعہ سنی علمی و فکری جدال و اختلاف ”ضیادور کی پیداوار“ ہے؟
کیا 13 صدیوں سے شیعہ اپنی کتب میں اہل سنت اور اہل سنت اپنی کتب میں شیعہ کے خلاف فتوے نہیں دیتے چلے آرہے؟
کیا پاکستان میں 80 کی دہائی کے وسط سے پہلے شیعہ سنی کا اختلاف نہیں تھا اور یہ ایک دوسرے کو باطل نہیں ثابت کیا کرتے تھے؟
پھر یہ شیعہ سنی فسادات ابن تیمیہ کے دور میں کیوں نہ چھڑ گئے؟ تحفہ اثنا عشریہ کی تالیف کے وقت کیوں نہ ہوگئے؟ باگڑ سرگانہ خانیوال میں تین دن تین راتیں شیعہ اور سنی ایک ہی میدان میں بیٹھے ابطال شیعیت و سنیت کے دلائل سنتے رہے تو فساد کیوں نہ پھوٹ پڑا؟ وجہ اصل میں وہ ہے ہی نہیں جس کا ڈھنڈورا پیٹا جا رہا ہے اور جسے ختم کرنے کی کوشش کی جا رہی ہے۔

میری داڑھی 70 فیصد سفید ہو چکی ہے، میں نے اپنی زندگی میں کسی سنی عالم کی نہ کتاب میں پڑھا ہے نہ خطبے میں سنا ہے اور نہ مدرسے میں گذرے 33 سالوں میں کسی کو یہ پڑھتے پڑھاتے سنا ہے کہ شیعہ عاشور کے جلوس نکالتے ہیں، اس لیے انہیں مارو، یا شیعہ ماتم کرتے ہیں اس لیے واجب القتل ہیں، یا شیعہ ائمہ کو معصوم مانتے ہیں اس لیے ان کا خون حلال ہے، یا شیعہ ولایت علی کے قائل ہیں اس لیے انہیں مار ڈالو، یا شیعہ کا عقیدہ توحید و عقیدہ رسالت ہم سے مختلف ہے اس لیے انھیں مٹادو، یا شیعہ ذوالجناح کو سجدہ کرتے ہیں اس سے مرادیں مانگتے ہیں اس لیے انھیں قتل کردو۔ مولانا عبدالشکور لکھنوی سے لے کر مولانا عبدالستار تونسوی تک کسی ایک کی ایسی کوئی تقریر و تحریر ملے تو دکھائیے۔

میں نے اپنی حیات مستعار میں یا ماضی کے جھرونکوں میں جب بھی اہل سنت کو شیعہ کے خلاف نکلتے، بولتے، شدت میں آتے اور آپے سے باہر ہوتے دیکھا ہے، صرف ایک مسئلے پر دیکھا ہے، صرف ایک، اور وہ ہے؛
گالی گالی اور صرف گالی۔
وہی گالی چنگیزی صاحب نے اپنے مضمون میں جس کا ذکر کیا ہے. جب بھی کوئی مسئلہ ہوا، اسی وجہ سے ہوا۔ ہندوستان میں دارالعلوم دیوبند اگر احتجاجا لکھنؤ کی طرف چل پڑا تو اسی گالی کے ردعمل میں اور پاکستان میں جو کچھ ہوا، کرنے والوں کے اپنے بیان شاہد ہیں کہ انہیں چڑ کسی کے وجود سے نہیں، گالی سے ہے۔ مرنے مارنے پر اکسانے والوں نے اسی گالی کو بنیاد بنایا نہ کہ کسی کے عقیدے یا عمل کو.

کیا وجہ ہے کہ سیدنا مولا علی و سیدنا امام حسین کا مقدمہ سنی لڑتا ہے۔ اپنوں سے بھی اور غیروں سے بھی۔ مضبوط دلیل کی بناء پر لڑتا ہے اور مسکت انداز میں لڑتا ہے اور جب ادھر دیکھتا ہے کہ گالیاں ہی گالیاں، جیسے انھیں عبادت کا درجہ حاصل ہو گیا ہے، تو برداشت ضرور جواب دیتی ہے۔

دست بستہ درخواست ہے کہ ”گالی“ بند کروائیے۔ میں اس کوئٹہ اور پاکستان کی واپسی کےلیے آپ کے ساتھ مل کر جدوجہد کروں گا۔ میں اور آپ قتل و مقاتلے کے قائل نہیں ہیں، ہم بھی دلیل کے ساتھ مکالمہ چاہتے ہیں، مگر جس بنیاد پر عام و خاص کو اکسایا جاتا ہے، وہ وجہ ختم کروانے کے لیے سب دوست مل کر کام کیجیے، سوشل میڈیا پر، اپنی ویب سائٹس کے ذریعے، اپنی محافل اور حلقہ احباب میں توجہ دلائیے. یاد رکھیے کہ یہ مسئلہ روتے رلاتے افسانے لکھنے، مذمتی قراردادیں پاس کرنے سے نہیں، اسباب مٹانے سے حل ہوگا۔

شیعہ اور سنی میں جھگڑا کس بات کا ہے؟ لہو رنگ زمینی حقیقتوں کے باوجود میرے پیش نظر چند دنوں سے یہی ایک سوال ہے۔
میں شیعہ نہیں ہوں ۔اللہ نے مجھے دو بیٹیوں کی نعمت کے بعد بیٹے سے نوازا تو میں نے اس کا نام علی رکھا۔ ہمارے گھر میں آنے والا پہلا ننھا وجود میری بھتیجی کا تھا، اس کا نام فاطمہ ہے۔ میری چھوٹی بہن کے خاوند کا نام حسن ہے۔ اپنے خاندان میں ادھر ادھر نظر دوڑاؤں تو شبیر، عباس، حسن اور حسین کے ناموں کی ایک مالا سی پروئی نظر آتی ہے۔ حسین ؓ کا ذکر آئے تو دل محبت اور آنکھیں عقیدت سے بھر جاتی ہیں۔ میری پہلی کتاب شائع ہوئی تو اس کا انتساب میں نے ’اپنے آئیڈیلز سیدنا عمر ؓ اور سیدناحسین ؓ ‘ کے نام کیا۔ یہ کتاب سی ٹی بی ٹی پر تھی اس کے صفحۂ اوّل پر میں نے یہ شعر لکھوایا:
جب بھی کبھی ضمیر کا سودا ہو دوستو
قائم رہو حسین کے انکار کی طرح

میری شریکِ حیات کا تعلق اعوان قبیلے سے ہے۔ وہ بھی شیعہ نہیں لیکن ان کے ہاں یہ روایت ایک فخر کے ساتھ بیان کی جاتی ہے کہ ان کی نسبت سیدنا علی ؓ سے جا ملتی ہے۔خواجہ معین الدین چشتی نے کس وارفتگی سے کہا تھا:
’’حقاکہ بنائے لا الٰہ است حسین۔‘‘
والہانہ پن تو دیکھیے اقبال کہتے ہیں:
اسلام کے دامن میں اور اس کے سوا کیا ہے
اِک ضرب ید اللہی ، اک سجدہِ شبیری

مجھے بچپن کے وہ دن آج بھی یاد ہیں جب ہم سب مسجد میں اہتمام سے جایا کرتے تھے جہاں ہمارے خاندان کے قابلِ قدر بزرگ پروفیسر صفدر علی واقعہ کربلا سناتے، نہ سنانے والا شیعہ تھا نہ سننے والے اہلِ تشیع، لیکن دکھ اور درد ہڈیوں کے گودے میں اترتا محسوس ہوتا تھا۔ دیوبندیوں کے حسین احمد مدنی ہوں یا جماعت اسلامی کے قاضی حسین احمد، نام ہی پکار پکار کر کہہ رہے ہیں کہ ’’ہمارے ہیں حسین ؓ، ہم سب کے ہیں حسین ؓ ۔‘‘ ہمارے تو بابائے قوم ہی محمد علی جناح ہیں، سفر آخرت پہ روانہ ہوئے تو جنازہ شبیر احمد عثمانی نے پڑھایا۔ سوچتا ہوں پھر جھگڑا کیا ہے؟ سوائے بدگمانی کے؟ شیعہ بھائی دل پر ہاتھ رکھ کر بتائیں کہ کیا اہلِ بیت کی محبت کے یہ مظاہر ہمیں ایک مالامیں نہیں پرو سکتے؟ کیا یہ بدگمانی مناسب ہے کہ ہر غیر شیعہ کو یزیدی سمجھا جائے؟ کیاآج پاکستان میں کوئی ایک آدمی بھی ہے جس کی ماں نے اس کا نام یزید رکھا ہو؟ سپاہِ صحابہ میں بھی ہمیں علی شیر حیدری کا نام ملتا ہے۔ کیا اتنی نسبتوں کے صدقے ہم مل جل کر نہیں رہ سکتے؟

بات اب کہہ دینی چاہیے، گھما پھرا کے بات کرنے سے مسئلہ حل نہیں ہوگا۔ اصل مسئلے کو زیرِبحث اب لانا ہی پڑے گا۔ اس کو مخاطب کیے بغیر محض امن امن کہنے سے کچھ نہیں ہوگا۔ نفرتوں کی آگ دہلیز تک پہنچ چکی ہے۔ کیا گھر جل جانے کا انتظار ہے؟ اہلِ تشیع بھائی کیسے ہمیں اہلِ بیت کی محبت میں خود سے پیچھے سمجھ سکتے ہیں۔
حسین ؓ میرے بھی اتنے ہیں جتنے ان کے۔ ہاں یہ ضرور ہے کہ محبتوں کا انداز جدا جدا ہے لیکن ’حسین مِنی وانا من الحسین‘ کے ارشاد مبارک کے بعد کونسا دل ہوگا جس میں حسین ؓ کی محبت نہ ہو گی۔ رہے ان کے اختلافی معاملات تو اتنی مشترک محبتوں کے صدقے کیا ان معاملات کو اللّٰہ پر نہیں چھوڑا جا سکتا؟ کیا ایک دوسرے کی دل آزاری ضرور کرنی ہے؟ زندہ معاشروں میں اختلافات ہوتے ہیں، ان اختلافات کو ایک دائرے میں رہنا چاہیے اور ان اختلافات کے ساتھ زندہ رہنے کا ڈھنگ آنا چاہیے۔ مسئلہ اس وقت بنتا ہے جب یہ اختلافات بدگمانی میں ڈھل جاتے ہیں۔ بدگمانی پھر حادثوں کو جنم دیتی ہے۔ اختلافات تو امام خمینی اور بنی صدر میں بھی ہو گئے تھے۔ اور ابھی کل کی بات ہے ہم نے حسین موسوی، ہاشمی رفسنجانی، محسن رضائی، اور مہدی کروبی کو احمدی نژاد صاحب کے خلاف احتجاج کرتے دیکھا۔

سنی حضرات کو بھی اپنے رویوں پر غور کرنا چاہیے۔ میں اکثر سوچتا ہوں کہ شیعہ کے آئمہ کرام سے کیا ہمارا کوئی تعلق نہیں۔ کیا امام زین العابدین سے ہمیں کوئی نسبت نہیں؟ کیا امام جعفر صادق سے ہمارا کوئی رشتہ نہیں؟ کبھی ہم نے غور کیا یہ ہستیاں کون تھیں؟ کس عظیم اور مبارک خانوادے سے ان کا تعلق تھا؟ یہ ہمارے ہی بزرگ تھے۔ یہ بھی ہماری ہی شان اور آبرو ہیں۔ ہم نے انہیں کیوں بھلا دیا؟ ہم نے انہیں کیوں نظر انداز کر دیا؟ ان کی تعلیمات ہمیں کیوں نہیں بتائی جاتیں؟ ان کی دینی خدمات سے ہم محروم کیوں؟ان کے فہم دین سے ہم فیض کیوں نہیں حاصل کرتے؟ ہم ان کے علمی کام سے اجنبی کیوں ہیں؟ یہ بیگانگی کیوں ہے؟ دین کے فہم کے باب میں انہوں نے بھی تو زندگیاں صرف کر دیں، یہ بھی تو ہمارا اجتماعی اثاثہ ہیں۔ کیا ہماری باہمی نفرتیں اور جھگڑے اب اتنے منہ زور ہو گئے ہیں کہ ہم نے اپنے بڑے بھی بانٹ لیے، ہم نے ان سے بھی منہ موڑ لیا، ہم اپنے ہی چشمہ ہائے علم سے محروم ہو گئے؟

میری ہر دو اطراف کے بزرگان سے التجا ہے: آئیے اس کلمے کی طرف جو ہم سب میں مشترک ہے۔

زمانہ طالب علمی کی بات ہے۔ میں اور میرے دوست عام لا ابالی نوجوانوں کی طرح گھومنے پھرنے بلکہ بقول والدین آوارہ گردی کے شوقین تھے۔ ہمارے گروپ میں شیعہ اور سنی دونوں مسالک کے دوست شامل تھے۔ مجھے یاد نہیں کہ ہم نے کبھی آپس میں مسلکی موضوعات پر کوئی گفتگو کی ہو۔ زندگی بڑے نارمل انداز میں بسر ہو رہی تھی۔ ان دنوں میرے کئی شیعہ دوست شیروانیاں زیب تن کر کے ایک مقامی مدرسے میں دینی تعلیم حاصل کرنے جاتے تھے جبکہ سنی دوست شام کے اوقات میں ٹوپیاں پہنے علاقے کی مساجد میں قرآن پڑھنے جایا کرتے تھے۔ اس بات کی کسی کو پرواہ نہیں تھی کہ کون شیعہ ہے اور کون سنی، نہ ہی ہم ان موضوعات پر کبھی آپس میں بحث کیا کرتے۔

اس کے برعکس ہم نہ صرف اکھٹے پکنک منایا کرتے بلکہ محرم کی رسومات میں بھی مل جل کر شرکت کرتے۔ حتیٰ کہ بعض اوقات ہمارے سنی دوست بھی ہمارے ساتھ محرم کی مجالس میں باقاعدگی سے شریک ہوتے۔ دوسری طرف محلے کی مساجد کے طالب علم بچے جب شام کے وقت ہر دروازے پر دستک دے کر ”ٹکی راوڑی خیر یوسی“ کی آواز لگا کر مسجد کے طالب علموں کے لیے کھانا جمع کرتے تو محلے کی دیگر ماؤں کی طرح میری ماں بھی ان کے برتن میں ہمیشہ کھانے کی کوئی نہ کوئی چیز ڈال دیتی۔ تب مساجد اور امام بارگاہوں میں لاؤڈ اسپیکر پر بلند آواز میں خطبہ دینے کا چلن عام نہیں تھا۔ عاشورہ کے دن شیعہ ماتم کرتے تو سنی نذر و نیاز اور سبیل کی ذمہ داریاں سنبھالتے۔ علمدار روڑ پر واقع حاجی رفیق کا ”چکوال گرم حمام“ عاشورہ کے دن بال سنوارنے اور شیو بنانے سے یکسر انکار کردیتا لیکن اسی حمام میں صبح سے ہی پانی گرم کرنے کی تیاری شروع ہوتی تاکہ ماتمیوں کو مفت غسل کرنے کی سہولت میسر ہو۔

لیکن پھر بڑے غیر محسوس طریقے سے سارا نظارہ بدلنے لگا۔ جنرل ضیاءالحق کی پالیسیوں اور ایرانی انقلاب کی حشر سامانیوں کے باعث مساجد اور امام بارگاہوں میں لاؤڈ اسپیکر کی آوازیں بلند سے بلند تر ہونے لگیں۔ داڑھیوں کے سائز میں اضافے کے ساتھ دلوں میں کدورتیں بھی بڑھتی گئیں اور زبانیں محبت کا پرچار کرنے کے بجائے زہر اگلنے لگیں۔ ہمیں پہلی بار اس بات کا احساس دلایا گیا کہ چونکہ ہم شیعہ ہیں، اس لیے حق پر ہیں، جبکہ ہمارے سنی دوستوں کو اس بات کا یقین دلایا گیا کہ جنت صرف ان کے لیے بنی ہے۔

انہی دنوں پاکستان میں فقہ جعفریہ نافذ کرنے کی مہم چل نکلی اور پاکستان خصوصاَ کوئٹہ کو لبنان بنانے کی باتیں کی جانے لگیں۔ مجھے یاد ہے کہ تب کچھ امام بارگاہوں کے منتظمین میں محرم کے دس دنوں کے لیے پنجاب اور سندھ کے پیشہ ور خطیبوں اور ذاکرین کو بھاری معاوضوں کے عوض ”بک“ کرنے کی ایک دوڑ سی لگ جاتی۔ مجالس میں لوگوں کی زیادہ سے زیادہ بِھیڑ جمع کرنے کی خاطر ان خطیبوں کے بھاری معاوضوں کی خصوصی تشہیر کی جاتی۔ ان دنوں امام بارگاہ کلان میکانگی روڈ میں پنجاب سے آئے ایک خطیب ضمیر الحسن نجفی کا بڑا شہرہ تھا جو اس وقت کا سب سے ”مہنگا“ خطیب تھا۔ وہ بڑے مضحکہ خیز انداز میں اصحاب رسول ﷺ کا مذاق اڑایا کرتا تھا۔ وہ ان اصحاب کے خلاف بولنے اور تبریٰ بھیجنے میں اپنا ثانی نہیں رکھتا تھا۔ تب اسے محرم کے دس دنوں میں خطابت کے عوض چالیس ہزار روپے ملتے تھے جو شاید آج کے آٹھ دس لاکھ روپے کے برابر ہوں۔
ہم سارے شیعہ دوست ان کے شیدائیوں میں شامل تھے۔ ایک دن میرے کسی دوست نے ایک پرچی پر ان کے لیے سوال لکھ بھیجا کہ ”ہم نماز کے وقت سجدہ گاہ ( مہر) کیوں استعمال کرتے ہیں؟“ ضمیر الحسن نجفی نے اس سوال کے جواب میں ایک لمبی چوڑی کہانی سنائی۔ کہنے لگے ”ایک دن میں پنجاب کے کسی گاؤں سے گزر رہا تھا تو نماز کا وقت آن پہنچا۔ میں نماز پڑھنے ایک قریبی مسجد میں گھس گیا جو سنیوں کی تھی۔ میں نے مصلیٰ بچھایا اور سجدہ گاہ رکھ کر نماز پڑھنے لگا۔ اس دوران مجھے محسوس ہوا کہ مسجد کا امام بڑی بے چینی اور غصے میں ادھر ادھر ٹہل رہا تھا۔ میں نے نماز ختم کی تو امام مسجد میرے پاس آیا اور پوچھنے لگا کہ تم اس ’ٹکیا‘ پہ سجدہ کیوں کرتے ہو؟ میں نے جواب میں کہا کہ کربلا کی اس مٹی پر سجدہ کرنے سے شیطان کو غصہ آتا ہے، کہیں آپ کو تونہیں آیا؟“ نجفی صاحب کا یہ کہنا تھا کہ امام بارگاہ نعرہ حیدری سے گونج اُٹھی۔ کہنے کی ضرورت نہیں کہ اس نعرے میں میری بلند آواز بھی شامل تھی۔ تب دوسروں کی طرح میں بھی یہ بات نہیں سمجھ سکا کہ مولوی صاحب نے بڑی چالاکی سے ہمارے دوست کا سوال ایک من گھڑت قصے میں لپیٹ کر ہماری عقل پر دے مارا تھا۔

انھی دنوں ہم نے پہلی بار ”ایک ، دو ، تین پر لعنت“ کا نعرہ اور جواب میں ”بےشمار“ کی تکرار سنی۔ اور انھی دنوں شاید پہلی بار سامنے کی مسجد سے امام بارگاہ کلان پر پتھراؤ کیا گیا۔ مجھے یاد ہے کہ جب اگلے دن ایک شخص نے مولوی (ضمیر الحسن نجفی) سے کہا کہ آپ تو اپنا کام کر کے چلے جائیں گے لیکن آپ کی ان تقریروں کی وجہ سے جو نفرت پھیل رہی ہے، اس کے باعث آج کے بعد ہمیں اسلحہ لے کر گھومنا ہوگا تو جناب کا جواب تھا کہ ”میں نےاپنا کام کردیا، اب آپ لوگ جانیں اور آپ کا کام جانے“۔ موصوف اگلے کئی سالوں تک بھاری بھر کم فیس لے کر نوجوانوں کے اذہان کو زہر آلود کرتے رہے۔

پھر ایک سال محرم کے دوران پنجابی امام بارگاہ میں پنجاب کے ایک اور آتش سخن خطیب کو دعوت دی گئی اور محرم کے آغاز سے قبل ہی بڑے منظم طریقے سے موصوف کی تشہیر کا سلسلہ بھی شروع کردیا گیا۔ ان کی پہلی خاصیت یہ بتائی گئی کہ وہ پہلے ایک دیوبندی مولوی تھے لیکن اب شیعہ مذہب کی حقانیت قبول کر کے ”راہ راست“ پر آگئے ہیں۔ ان کی دوسری خوبی جو ان کی مقبولیت میں اضافے کا باعث بنی ان کی بھاری بھرکم فیس تھی۔ اس بات کی خصوصی تشہیر کی گئی کہ انہیں محرم کے دس دنوں کے دوران خطابت کے عوض 90 ہزار روپے دیے جائیں گے جو اس سیزن میں کسی بھی خطیب کو دی جانے والی سب سے بڑی رقم تھی۔ میں اس خطیب کا نام شاید زندگی بھر نہ بھول سکوں۔ اس کا نام مظہر دیوبندی تھا۔ وہ بلا کا خطیب تھا۔ اس کا یہ جملہ بڑا مشہور ہوا تھا کہ ”مجھ سے پوچھو میں بتاتا ہوں کہ سنیوں میں کیا خرابیاں ہیں، کیونکہ میں 45 سال تک سنی تھا اور ابھی ابھی شیعہ ہوا ہوں۔“

اس وقت اس ”نو شیعے“ کو جتنا معاوضہ اورعزت ملی، اتنی عزت کبھی کسی مقامی شیعہ عالم کے حصے میں نہیں آئی۔ انہی دنوں ایک موقع پر جب دیوبندی صاحب نفرتیں پھیلا کر اور اپنی روزی حلال کر کے منبر سے اترے تو ہم دوست بھی ان کے پیچھے پیچھے پنجابی امام بارگاہ کے مختصر سے حجرے میں چلے گئے۔ سلام دعا کے بعد ہم نے ان سے سجدہ گاہ سے متعلق وہی سوال پوچھا جو اس سے قبل ہم ضمیرالحسن نجفی سے پوچھ چکے تھے۔ پہلے تو انہوں نے تھکاوٹ کا بہانہ بنا کر ہم سے جان چھڑانے کی کوشش کی لیکن ہمارے اصرار پر انہوں نے جو جواب دیا، وہ آج بھی میرے حافظے میں محفوظ ہے۔ فرمانے لگے ”بیٹے میں تو ابھی ابھی شیعہ ہوا ہوں، اس لیے اس بارے میں کچھ نہیں جانتا، بہتر ہوگا یہ سوال آپ اپنے کسی جید عالم سے پوچھ لیں۔“ ہماری سادگی دیکھیے کہ ہم تب بھی یہ بات نہیں سمجھ سکے کہ ہمارے ہی چندوں پر پلنے والے یہ پیشہ ور ”علماء“ جو اپنی کمائی کی خاطر مسلک بدلنے پر ہمیشہ تیار رہتے ہیں، جن کو دین کی معمولی سمجھ بوجھ بھی نہیں اور جو ہمارے اذہان میں اُبھرنے والے بنیادی سوالوں کے جواب دینے کے بجائے انہیں ہنسی مذاق میں اڑا دیتے ہیں، ہمیں مستقبل میں کن آزمائشوں میں مبتلا کرنے والے تھے۔

وقت گزرتا گیا اور ساتھ ہی سنی امیرالمؤمنین ضیاءالحق کے نظام مصطفیٰ اور شیعہ امام خمینی کے ایرانی انقلاب کی بدولت خطے میں مذہبی جنون بھی بڑھتا گیا۔ نتیجہ یہ نکلا کہ محبت کی جگہ نفرت نے لے لی، دلائل کے بجائے پستول، کلاشنکوف اور بموں کے ذریعے بات کرنے کا سلسلہ چل پڑا، گھروں کی دیواریں اونچی ہونے لگیں، اپنی حقانیت ثابت کرنے کی خاطر سعودی عرب اور ایران سے طاقتور لاؤڈ اسپیکر منگوانے کی ریت چل پڑی۔ فتووں کا بازار گرم ہوا، معصوم لوگوں کو ذبح کرنے کی رسم چل پڑی اور میرے سنی ہمسائیوں نے محرم کے دنوں میں نذر و نیاز کا سلسلہ بند کر دیا۔ ساتھ ہی ”ٹکی راوڑی خیر یوسی“ کی آوازیں بھی آنا بند ہو گئیں۔ ماحول پر آسیب کا سایہ پڑ گیا۔ حاجی رفیق اپنا چکوال گرم حمام بند کر کے پنجاب چلا گیا۔ ہمارے اسکول کے کلین شیو استاد ماسٹر عزیز نے اپنی ساری توجہ داڑھی بڑھانے پر مرکوز کر دی اور میرے بچپن کے سنی دوست مجھ سے دور ہوتے چلےگئے۔

پھر تو ہر گزرتے دن کے ساتھ ملک بھر سے قتل و غارت کی خبریں آنے لگیں۔ لوگ امن کی تلاش میں ملک سے بھاگنے لگے۔ سینکڑوں لوگ برف زاروں اور سمندروں کی نذر ہونے لگے، بم دھماکے ہونے لگے، ٹارگٹ کلنگ اپنے عروج پر پہنچ گئی، بچے اور عورتیں خون میں نہلانے لگیں اور مائیں اپنے بچوں کو گھر سے رخصت کرتے وقت ان پر دعائیں پڑھ کر پھونکنے لگیں تاکہ وہ خیریت سےگھر لوٹ سکیں۔ لیکن امن ایسا روٹھا کہ اس نے پلٹ کر دیکھنے کی زحمت ہی گوارا نہیں کی۔

میں آج بھی ماضی کے مزاروں میں جھانک کر ایک ایسے پرسکون معاشرے کی تلاش میں ہوں جہاں میں اپنے سنی دوستوں کے ساتھ پھر سے پکنک پر جا سکوں۔ مجھے ایک ایسے معاشرے کی تلاش ہے جہاں عقیدے کی بنیاد پر کسی کو قتل نہ کیا جاتا ہو اور جہاں لوگ شیعہ، سنی یا ہندو، مسلمان اور عیسائی بن کر نہیں بلکہ انسان بن کر رہیں۔ مجھے میرا کوئٹہ واپس چاہیے۔ میں ہزاروں ریاض، تہران اور لبنان اپنے کوئٹہ پر قربان کرنے کو تیار ہوں۔ لیکن کیا کوئی ہے ایسا جو میرا پرانا کوئٹہ مجھے واپس دلا سکے؟
ہے کوئی جو میری مدد کرے؟ ہل من ناصر ینصرنا؟