Tag: تحریک آزادی

کشمیر کو کرہ ارض پر جنت قرار دیا گیا ہے. یہ مشاہدہ جس نے بھی بیان کیا وہ فطرت کی حنا بندی کا فن خوب جانتا ہو گا. مگر المیہ یہ ہے کہ انسانوں کی غالب اکثریت فطرت سے زیادہ مادیت پر یقین رکھتی ہے. کشمیر کا جغرافیہ موسم اور قدرتی حسن اپنی مثال آپ ہے. یہاں بہتے دریا خوبصورت جھیلیں سرسبز و شاداب پہاڑ میٹھے پانی کے چشمے کنول کے پھول اور زعفران کے کھیت جہاں بے پناہ کشش رکھتے ہیں وہیں خوبصورت و شاداب چہرے اچھی قد قامت اور اچھے اخلاق کے حامل مرد و زن اضافی خوبی ہیں. لیکن کیا خوشگوار زندگی کے لیے یہی کافی ہے؟ یقیناً نہیں انسانی زندگی کے نکھار اور اسے دیگر معاشروں سے مقابلہ کرنے کے لیے بہت سے دیگر عوامل کی ضرورت ہوتی ہے. جیسے حقیقی جنت میں جانا آسان نہیں ہے ویسے ہی اس تصور کی گئی جنت میں بھی داخلہ آسان نہیں. کشمیر کا ذکر آتے ہی بھارتی مظالم بارود کی بدبو خون کی ندیاں خواتین کی عصمت دری کے واقعات آنکھوں کے سامنے کسی فلم کی صورت شعور کے پردے پر نمایاں ہو جاتے ہیں. کیا واقعی کشمیر کو اسی مسئلے کا سامنا ہے؟ میرے خیال میں یہ ایک بڑا اور سب سے حل طلب مسئلہ ہے. لیکن یہ واحد مسئلہ ہر گز نہیں ہے. کشمیر کے مسئلے کو از سر نو سمجھنے کی ضرورت ہے. اس پر حد سے زیادہ حساسیت پیدا کر لی گئی ہے. جس سے بحث محدود ہو گئی ہے. کشمیر محض متنازعہ علاقہ کا مسئلہ نہیں ہے بلکہ یہ مکمل طور پر انسانی مسئلہ ہے. سب سے بھیانک بات کشمیریوں کی عدم شناخت ہے. تین نسلیں بغیر شناخت کے درگور ہو گئی ہیں اور آگے بھی آثار نظر نہیں آ رہے جس سے مایوسی اور بد دلی کا پیدا ہونا ایک فطری بات ہے.

بھارت کے حوالے سے بہت کچھ لکھا گیا ہے اور ابھی بہت کچھ لکھا جانا ہے اس ذیل میں بہت یکسانیت پائی جاتی ہے لہٰذا آج کے مضمون میں اس پہلو کو نظرانداز کرتے ہوئے ازادکشمیر کے مسائل اور یہاں پر بسنے والے افراد کی جانب سے مسئلہ کشمیر کے حل میں عدم دلچسپی کو موضوع بحث بنایا جائے گا. کشمیر کا جہاں بھی ذکر آتا ہے اس میں کشمیریوں پر بات کم اور جغرافیہ پر بات زیادہ ہوتی ہے. بالخصوص آزاد کشمیر کے باسی تو اس ذیل میں کہیں نظر ہی نہیں آتے ہیں. اس کی وجوہات مختلف لوگوں کی نظر میں مختلف ہوں گی. میرا مشاہدہ عمومی نوعیت کا ہے اور اسے عمومی انداز میں ہی پیش کروں گا. میں کوشش کروں گا کہ کہ ان مسائل کی جانب توجہ مبذول کراؤں جن کی بنیاد پر ہم لوگ اپنے اولین مسئلہ سے پہلو تہی کرتے ہیں. سیاسی پس منظر، معاشی مسائل، نظام تعلیم اور عدم تسلسل وہ بنیادی عوامل ہیں جنہوں نے لوگوں سے غور فکر کا ہتھیار چھین لیا ہے. اب فرداً فرداً ان امور کا اجمالی جائزہ پیش کرتا ہوں.

سیاسی پس منظر ریاست کے ابتدائی ماہ و سال میں شرح خواندگی خوف ناک حد تک کم تھی اس لیے ایک بڑی اکثریت اپنے نفع و نقصان سے نابلد تھی. یہ جہاں ایک بہت بڑی کمزوری تھی وہیں اگر اسے درست انداز میں استعمال کیا جاتا تو یہ بہت بڑی طاقت بن سکتی تھی. نظریاتی وحدت کے لیے اس سے سازگار کیفیت کوئی نہیں ہو سکتی کہ آپ کے مخاطب افراد آپ کو پوری یکسوئی کے ساتھ سنتے ہوں اور آپ کی ہر بات پر یقین کرتے ہوں. لیکن بدقسمتی سے اس کمزوری کو کشمیریوں کی بیوقوفی سے تعبیر کیا گیا. قدرت اللہ شہاب مشتاق گورمانی کی تقریر کا حوالہ دیتے ہوئے لکھتے ہیں کہ انہوں نے ایک کتابچہ لہراتے ہوئے لوگوں کو کہا کہ یہ قرآن ہے اور ہم کشمیر کو وہ تجربہ گاہ بناتے ہیں جہاں رب کی دھرتی رب کا نظام ہو گا. لوگ انتہائی جذباتی ہو کر یہ سب سن رہے تھے اور زیادہ تر آبدیدہ تھے. واپسی پر جب انہوں نے گورمانی سے دریافت کیا کہ کیا یہ واقعی قرآن تھا تو مسکرانے لگے. ان لوگوں کو سازش کے ذریعے اپنا گرویدہ بنانے کی کوشش کی گئی جو بدگمانی کا سوچ بھی نہیں سکتے تھے. اس کے بعد ایک مسلسل سلسلہ شروع ہو گیا اور جو اختلاف کی جسارت کرنے کی کوشش کرتا وہ غدار سمجھا جانے لگا. تحریک آزادی کشمیر کے کئی ہیرو گمنام ہو گئے. یہاں تک کہ شیخ عبداللہ جیسا فرد بھارتی وزیر اعظم پنڈت جواہر لال نہرو کا سرکاری مہمان ہو گیا. اور کشمیری عملاً بھارت نواز اور پاکستان نواز میں تقسیم ہو گئے اور یہ تقسیم ہنوز برقرار ہے. اس کا سب سے بڑا اثر یہ ہوا وہ دونوں جانب کے کشمیریوں کے درمیان رابطوں کا سلسلہ منقطع ہو گیا اور وقت کے ساتھ ساتھ دونوں جانب مقیم لوگ ایک دوسرے کے لیے غیر ہو گئے.

بعد ازاں جنگ بندی لائن کو کنٹرول لائن تسلیم کر لیا گیا اور رہتی امیدیں بھی دم توڑ گئیں. اس کے بعد ایکٹ انیس سو چوہتر کے نفاذ نے ریاست کو باقاعدہ کالونی بنا دیا گیا اور چیف سیکریٹری اور وزارت امور کشمیر و گلگت بلتستان کو وائسرائے کی حیثیت حاصل ہو گئی. کشمیریوں کی نمائندگی ان کے ہاتھوں سے نکل گئی. موجودہ نظام اسی انتظام کے زیر سایہ پھل پھول رہا ہے.

معیشت اگر جغرافیہ کے تابع ہو تو وہ فطری انداز میں آگے بڑھتی ہے جس طرح پنجاب اور سندھ میں زراعت نے ایک بڑی اکثریت کو خوشحالی بہم پہنچائی ہے. ساحلی علاقوں میں صنعت نے ترقی کی ہے. سرحدی علاقوں میں تجارت نے فروغ پایا ہے ویسا کوئی انتظام کشمیر میں نظر نہیں آتا. ہم نے اگر جغرافیائی اہمیت کو استعمال نہیں کیا ہے تو ساتھ ہی ثقافت کو پس پشت ڈال کر جو تھوڑی بہت معاشی سرگرمیاں تھیں انہیں بھی مسدود کر دیا ہے. فی الحال کشمیر کا معاشی نظام کسی طفیلی معاشرے جیسا ہے. محکمہ تعلیم، برقیات پولیس اور کسی حد تک سول سروس میں نوکری اختیار کرنے کے علاوہ ذرائع آمدنی کے بہت ہی محدود ہیں. ریاست کے زیادہ تر لوگ بیرون ملک روزی کماتے ہیں. صنعتوں کی عدم موجودگی میں بہتر ہنر مند پیدا نہیں ہو رہے. پولی ٹیکنیک اور ووکیشنل ٹریننگ سینٹر کی تعداد بھی آبادی کے تناسب سے مطابقت نہیں رکھتی جس کی وجہ سے لوگ انتہائی نچلے درجے کی ملازمت اختیار کرتے ہیں. اس لیے عموماً لوگ فیصلہ سازی کے عمل میں دلچسپی نہیں رکھتے.

نظام تعلیم کو اگر شرح خواندگی کے تناظر میں دیکھیں تو اس کو پاکستان کے دیگر حصوں سے بہتر قرار دیا جا سکتا ہے. لیکن اگر فکری تناظر میں دیکھا جائے تو یہاں بھی حالت الحفیظ و الامان والی ہے. دس دس کلومیٹر پیدل چلنے کے بعد طلباء و طالبات کو بنیادی تعلیم حاصل کرنا پڑتی ہے. اساتذہ کی غالب اکثریت سیاسی جماعتوں کے دم چھلوں کی صورت اختیار کر گئی ہے. نصاب تعلیم کے حوالے سے صورتحال مزید ابتر ہی کہلائی جا سکتی ہے. پہلی جماعت سے لے کر دسویں جماعت تک کی ساری کتابیں حفظ بھی کر لی جائیں تو مجھے یقین ہے کہ ہمارا طالب علم کشمیر کی تاریخ اور جغرافیہ پر ایک مضمون لکھنے کے قابل بھی نہیں ہو گا. ہمیں اس میدان میں توجہ کی اشد ضرورت ہے.
عدم تسلسل ہمارا سب سے بھیانک معاشرتی رویہ ہے. جنگ آزادی کشمیر سے لے کر آج تک ہر میدان میں ادھورے کام ہمارے گلے کی ہڈی بنے ہوئے ہیں. تکمیل پاکستان کی منزل اگر مقصود ہے تو ہمیں انسانی وسائل کو بروئے کار لانے کی محنت کرنا ہوگی. جب تک ہم اپنے نوجوانوں کی فکری تربیت کا بندوبست نہیں کریں گے آپیں تپسی تے ٹھس کر سی والی جگہ پر کھڑے رہیں گے.

حزب المجاہدین کے کمانڈر برھان وانی کی شہادت کے بعد کشمیر میں تین ماہ سے جاری عوامی تحریک اور حال ہی میں سرحدی علاقہ اوڑی میں 18فوجیوں کی ہلاکت نے بھارت میں جہاں ایک طرف جنگی جنون برپا کر دیا ہے ، وہیں چند ہوشمند افراد حکومت اور میڈیا پر بھروسہ کرنے کے بجائے حالت کی تہہ تک جانے کی کوششیں بھی کررہے ہیں‘جس کا ادراک مجھے دہلی میں روزانہ ہو رہا ہے۔پچھلے دنوں ایک ہندی جریدہ سے وابستہ خاتون صحافی میرے آفس میں آدھمکی اور ایک ہی سانس میں پیلٹ گنوں کی طرح کشمیر پر سوالوں کی بوچھاڑ کر دی۔ میں نے مشورہ دیا کہ میرے جوابات پر انحصار کرنے کے بجائے وہ کشمیر جاکر حالات کا خود مشاہدہ کرے اور واپس آکر مجھے بھی باخبر کرے۔ اسی طرح چند ہفتہ قبل ہندی اور مراٹھی کے معروف صحافیوں سنتوش بھارتیہ اور اشوک وانکھڑے بھی معلومات حاصل کرنے کے خواہش مند تھے۔ ان کی بے چینی اور حیرانی کی وجہ یہ تھی کہ آخر کشمیری بھارت کے جمہوری نظام کے خلاف کیوں صف آرا ہیں؟ میں نے ان کوبھی یہی مشورہ دیاکہ حقائق جاننے کیلئے وہ خود کھلے ذہن کے ساتھ سری نگر کا دورہ کریں اور ہوسکے تو جموں کے چناب ویلی اور پیر پنچال‘ علاقوں میں بھی جائیں۔

آخرکار ا ن دونوں صحافیوں اور ایک معروف تجزیہ کار پروفیسرابھے دوبے نے چار دن کشمیر میں گزارے۔ سنتوش بھارتیہ پارلیمان کے رکن بھی رہ چکے ہیں اور موجودہ حکمران بھارتیہ جنتا پارٹی کے لیڈروں خصوصاً مرکزی وزیر اور سابق آرمی چیف جنرل (ریٹائرڈ) وی کے سنگھ کے قریبی جاننے والے مانے جاتے ہیں۔ واپسی پر بھارتیہ جی نے اپنے پرانے رفیق وزیراعظم نریندر مودی کو ایک طویل خط لکھا ہے ۔سنتوش بھارتیہ کے ہندی میں لکھے خط کے مندرجات میں یہاں نقل کرتا ہوں۔”پیارے وزیر اعظم صاحب! میں ابھی چار دن کے بعد جموں و کشمیر سے لوٹا ہوں۔ اور چاروںدن میں کشمیر کی وادی میں رہا اور مجھے یہ لگا کہ میںآپ کو وہاں کے حالات سے واقف کروں۔ مجھے یہ پورا یقین ہے کہ آپ کے پاس جموںو کشمیر کو لے کر خاص طور سے وادی کشمیر کو لے کر جو خبریںپہنچتی ہیں، وہ سرکاری افسروں کے ذریعہ اسپانسر شدہ خبریںہوتی ہیں، ان خبروں میںسچائی کم ہوتی ہے۔ اگر آپ کے پاس کوئی ایسامیکانزم ہو جو وادی کے لوگوں سے بات چیت کرکے آپ کو سچائی سے آگاہ کرائے تو میرا یقینی طور پر ماننا ہے کہ آپ ان حقائق کو نظر انداز نہیںکر پائیں گے۔ میں وادی میںجاکر مضطرب ہوگیا ہوں۔ زمین ہمارے پاس ہے، کیونکہ ہماری فوج وہاں پر ہے، لیکن کشمیر کے لوگ ہمارے ساتھ نہیں ہیں۔ اور میںپوری ذمہ داری سے یہ حقیقت آپ کے سامنے لانا چاہتا ہوں کہ 80 سال کی عمر کے شخص سے لے کر 6سال تک کے بچے کے دل میں بھارتی نظام کے بارے میں بہت زیادہ غصہ ہے۔ اتناغصہ ہے کہ وہ اس نظام سے جڑے کسی بھی شخص سے بات نہیں کرنا چاہتے۔

اتنا زیادہ غصہ ہے کہ وہ ہاتھ میں پتھر لے کر اتنے بڑے میکانزم کا مقابلہ کررہے ہیں۔ اب وہ کوئی بھی خطرہ مول لینے کے لیے تیار ہیں جس میںسب سے بڑا خطرہ قتل عام کا ہے اور یہ حقیقت میںآپ کو اس مقصد کو سامنے رکھ کر لکھ رہا ہوں کہ کشمیر میں ہونے والے صدی کے سب سے بڑے قتل عام کو بچانے میںآپ کا کردارسب سے اہم ہے۔ ہماری سکیورٹی فورسز اورہماری فوج میںیہ سوچ پنپ رہی ہے کہ جو بھی کشمیر میں نظام کے تئیںآواز اٹھاتا ہے‘ اسے اگر ختم کردیا جائے ، اس کی جان لے لی جائے ، اسے دنیا سے وداع کردیا جائے، تو یہ علیحدگی پسند تحریک ختم ہوسکتی ہے۔ہمارا نظام جسے علیحدگی پسند تحریک کہتا ہے، دراصل وہ علیحدگی پسندتحریک نہیںہے، وہ کشمیر کے عوام کی تحریک ہے۔ اگر 80 سال کے ضعیف سے لے کر 6 سال کا بچہ تک‘ آزادی، آزادی ، آزادی کہے، تو ماننا چاہیے کہ گزشتہ 60 سالوںمیںہم سے بہت بڑی غلطیاں ہوئی ہیں ۔۔ سکیورٹی فورسز پیلٹ گن چلاتی ہیں، لیکن ان کا نشانہ کمر سے نیچے نہیں ہوتا ہے، کمر سے اوپر ہوتا ہے، اس لیے دس ہزار لوگ زخمی پڑے ہیں۔ وزیر اعظم صاحب !میں کشمیر کے دورے میں اسپتالوں میں گیا‘ مجھ سے دہلی میں کہا گیا کہ سکیورٹی کے چار پانچ ہزار افراد بھی زخمی ہوئے ہیں۔ یہ ہزاروں کی تعداد ہمارے پرچار کا نظام بیان کرتا ہے جس پرکوئی یقین نہیں کرتا اور اگر ہے تو ہم صحافیوں کو ان جوانوں سے ملوائیے جو ہزاروں کی تعداد میں کہیں زیر علاج ہیں۔ ہم نے بچوں کو دیکھا جن کی آنکھیں چلی گئی ہیں، جو کبھی واپس نہیں آئیں گی۔ لہٰذا میں یہ خط بڑے یقین اور جذبے کے ساتھ لکھ رہا ہوں۔ ہم تینوں کئی بار کشمیر کی حالت دیکھ کر روئے۔ کشمیر کے لوگو ں کو اس بات کا رنج ہے، اس بات کا دکھ ہے کہ ہریانہ صوبہ میں اتنا بڑا جاٹ احتجاج ہوا، گولی نہیں چلی، کوئی نہیں مرا۔ راجستھان میں گوجر آندولن ہوا، کوئی آدمی نہیں مرا، کہیں پولیس نے گولی نہیں چلائی۔ ابھی دریائے کاویری پانی کو لے کرکرناٹک میں، بنگلورو میں اتنا بڑا اندولن ہوا ، لیکن ایک گولی نہیں چلی۔لیکن کشمیر میں گولیاں چلتی ہیںاور کیوں کمر سے اوپر چلتی ہیںاور چھ سال کے بچوں پر چلتی ہیں؟‘‘

سنتوش بھارتیہ کے مطابق کشمیر میں پولیس والوں سے لے کر تاجر، طلبہ، سول سوسائٹی ، قلم کار، صحافی، سیاسی پارٹیوں کے لوگ اور سرکاری افسروں ‘سب نے ان سے کہا کہ کشمیر کا ہر آدمی ہندوستانی نظام کے خلاف کھڑا ہوگیا ہے۔ ”جس کے ہاتھ میںپتھر نہیںہے اس کے دل میں پتھر ہے۔ یہ تحریک عوامی تحریک بن گئی ہے ٹھیک ویسی ہی جیسی 1942 ء میں انگریزوں کے خلاف بھارت چھوڑو تحریک تھی یا پھر جے پرکاش تحریک تھی جس میں لیڈر کا کردار کم تھا اور لوگوں کا کردار زیادہ تھا۔ ــ‘‘ اس وفد نے وزیر اعظم ، مرکزی وزیروں اور حکمران بی جے پی کے لیڈران کی طرف سے بار بار پاکستان پر الزام تراشی کے بارے میں بھی سوالات اٹھائے۔ بھارتیہ کے بقول‘ کیا پاکستان اتنابڑا ہے کہ وہ پتھر چلانے والے بچوںکو روز پانچ سو روپے دے سکتا ہے اور کیا ہمارا نظام اتنا خراب ہے کہ اب تک ایک شخص کو نہیںپکڑ پایا جو وہاں پانچ پانچ سو روپے بانٹ رہا ہے؟ انہوں نے مودی کو خط میں لکھا وہ خود سوچیںکہ جب کرفیو ہے ، لوگ سڑکوں پر نہیںنکل رہے تو کون محلے میں جارہا ہے پانچ سو روپے بانٹنے کے لیے۔ پاکستان کیا اتنا طاقتور ہے کہ پورے کے پورے 60 لاکھ لوگوں کو بھارت جیسے 125کروڑ کی آبادی والے ملک کے خلاف کھڑا کرسکتا ہے؟ ان کا کہنا ہے کہ یہ بیانات اور پاکستان پر الزام لگانا ان کو مذاق لگتا ہے اور کشمیر کے لوگوں کو بھی یہ مذاق ہی لگتا ہے۔

بھارتی میڈیا کا ذکر کرتے ہوئے وہ لکھتے ہیں‘”ہمارے ساتھی راجیہ سبھا میںجانے یا اپنا نام صحافت کی تاریخ میں فرسٹ کلاس میںلکھوانے کے لیے اتنے اندھے ہوگئے ہیں کہ وہ ملک کے اتحاد اور سالمیت سے بھی کھیل رہے ہیں‘ لیکن وزیر اعظم صاحب تاریخ بے رحم ہوتی ہے، وہ ایسے صحافیوں کو محب وطن نہیں غدار مانے گی، کیونکہ ایسے لوگ جو پاکستان کا نام لیتے ہیں یا ہر چیز میں پاکستان کا ہاتھ دیکھتے ہیں، وہ لوگ دراصل پاکستان کے دلال ہیں،وہ ذہنی طور پر ہندوستان کے لوگوں میںاور کشمیر کے لوگوں میںیہ جذبہ پیدا کررہے ہیں کہ پاکستان ایک بڑا مضبوط، بڑا قادر اور بہت باریک بین ملک ہے۔ وزیر اعظم صاحب! ان لوگوں کو جب سمجھ میں آئے گاتب آئے گا یا سمجھ میں نہ آئے، مجھے اس سے تشویش نہیںہے۔ میری تشویش ہندوستان کے پیارے وزیر اعظم نریندر مودی کو لے کر ہے۔ نریندر مودی کو تاریخ اگر اس شکل میںدیکھے کہ انھوںنے کشمیر میں ایک بڑا قتل عام کرواکر کشمیر کو ہندوستان کے ساتھ جوڑے رکھا،شاید وہ آنے والی نسلوں کے لیے بہت افسوسناک تاریخ ہوگی۔ کیا یہ بہتر نہیں کہ تاریخ نریندر مودی کو اس شکل میں جانے کہ اس نے کشمیر کے لوگوں کا دل جیتا۔ انھیں وہ سارے وعدے پورے کرنے کی یقین دہانی کرائی جوساٹھ سال سے کشمیریوں کے ساتھ کیے جا رہے ہیں۔ کشمیر کے لوگ سونا نہیںمانگتے ، چاندی نہیںمانگتے بس ان وعدوں کی تکمیل چاہتے ہیں ، جو ہم نے ان کے ساتھ کئے ہیں۔‘‘

بھارتیہ جی کے مطابق کشمیر میں اس بار بقرعید نہیں منائی گئی، کسی نے نئے کپڑے نہیں پہنے، کسی کے گھر میں خوشیاں نہیںمنائی گئیں۔ ـ”کیا یہ ہندوستان کے ان تمام لوگوں کے منہ پر طمانچہ نہیں ہے جو جمہوریت کی قسمیں کھاتے ہیں۔ آخر ایسا کیا ہوگیا کہ ساری تحریک وہاں کی سیاسی قیادت کے خلاف ایک بغاوت کی شکل اختیار کرگئی۔ جس کشمیر میں 2014ء میں الیکشن ہوئے، لوگوں نے ووٹ ڈالے، آج اسی کشمیر میںکوئی بھی شخص ہندوستانی نظام کے تئیں ایک لفظ ہمدردی کا کہنے کے لیے تیار نہیں ۔ میںآپ کو یہ سارے حالات اس لیے بتارہا ہوںکہ آپ پورے ہندوستان کے وزیر اعظم ہیں، آپ اس کا کوئی راستہ نکال سکیں۔ ‘‘ وفد نے مشاہدہ کیا کہ کشمیر کے گھروں میں لوگ شام کوایک بلب جلاکر رہتے ہیں، زیادہ تر گھروں میں یہ مانا جاتا ہے کہ ہمارے یہاں اتنا دکھ ہے، اتنے قتل ہورہے ہیں، دس ہزار سے زیادہ پیلٹ گن سے زخمی لوگ ہیں، پانچ سو سے زیادہ لوگوں کی آنکھیںچلی گئی ہیں۔ ایسے وقت میں ہم چار بلب گھر میںجلاکرکیسے رہ سکتے ہیں۔” وزیر اعظم صاحب! میںنے دیکھا ہے کہ لوگ گھروں میںایک بلب جلا کر رہ رہے ہیں۔ میںنے کشمیر میںیہ بھی دیکھا کہ کس طرح صبح آٹھ بجے سڑکوں پر پتھر لگا دیے جاتے ہیں او رشام کو 6 بجے وہی لڑکے جنھوں نے پتھر لگائے ہوئے ہیں اپنے آپ سڑکوں سے پتھر ہٹادیتے ہیں۔ دن میں وہ پتھر چلاتے ہیں،شام کو وہ اپنے گھروں میں اس خدشے میں سوتے ہیں کہ نہ جانے کب سکیورٹی فورسز کے لوگ انہیںاٹھاکر لے جائیں، پھر وہ کبھی اپنے گھروں کو واپس لوٹیں یا نہ لوٹیں۔

ایسی حالت تو انگریزوں کے دور حکومت میں بھی نہیں تھی۔ لیکن آج پہلی باریہ تحریک آزادی دیہاتوں تک پھیل چکی ہے۔ ہر پیڑ پر ہر موبائل ٹاور کے اوپر ہر جگہ پاکستانی جھنڈا ہے ۔ یہ کہتے ہوئے بہت سے لوگوں کے دل میں کوئی پشیمانی نہیں تھی کہ کشمیر کے لوگ ہندوستان کے نظام کو، اقتدار کو چڑانے کے لیے جب ہندوستان کی کرکٹ میںہار ہوتی ہے، تو جشن مناتے ہیں وہ صرف پاکستان کی ٹیم کی جیت پر جشن نہیں مناتے خوش نہیں ہوتے اگر ہم نیوزی لینڈ سے ہار جائیں، اگر ہم بنگلہ دیش سے ہار جائیں، اگر ہم سری لنکا سے ہار جائیں، تب بھی وہ اسی طرح خوشی کا اظہار کرتے ہیں‘ کیونکہ انھیں یہ لگتا ہے کہ ہندوستانی نظام کی کسی بھی کامیابی کو مسترد کرکے اپنی مخالفت کا اظہار کررہے ہیں۔ وزیر اعظم صاحب !کیا اس نفسیات کو ہندوستان کی سرکار کو سمجھنے کی ضرورت نہیںہے؟ کشمیر کے لوگ اگر ہمارے ساتھ نہیں ہوں گے، تو کشمیر کی زمین لے کر کے ہم کیا کریں گے۔‘‘ دعا ہے کہ سنتوش بھارتیہ اور ان کے ساتھیوں کی باتیں بھارتی راہنماوٗں کے دلوں میں اتر جائیں، تاکہ جنوبی ایشیا واقعی امن کا گہوارہ بن جائے۔

جب جہاد دہشت گردی کا متبادل بنا دیا گیا، جب آزادی کے لیے مسلح مزاحمت کو انتہا پسندی کے عنوان سے جوڑ دیا گیا ، جب کشمیر کی تحریک آزادی کو کیا اپنے کیا پرائے سبھی فراموش کرچکے تھے، جب نحیف و نزار سید علی گیلانی بھولی بسری یاد بننے لگا تو ایسے میں برہان الدین وانی وادی کے افق پہ روشن ستارے کی طرح نمودار ہوا اور دیکھتے ہی دیکھتے اپنی سحر انگیز شخصیت کے سبب نوجوانوں کے دلوں پہ راج کرنے لگا. زمین کا بیٹا ہونے کے سبب کشمیریوں کو اس پہ بڑا مان بھی تھا، جلد ہی ہنسنے کھیلنے والے اس حریت پسند نے اپنی خوبصورت جوانی ہند کے خلاف تحریک پہ لٹا دی اور یوں ہوا کے دوش پہ کئی دیے جلا گیا، وہ سرینگر میں پاکستان کا پرچم بن کر ابھرا تھا، وہی پاکستان جو بدلے حالات میں کشمیریوں کو یوں بھلا چکا تھا جیسے امریکا ہمیں۔ لیکن اس جوان سال شہید نے لہو سے جو دیپ روشن کیا، اس نے ہر صاحب دل کو نئی راہیں سجھا دیں۔ یہاں تک کہ نواز شریف سرکار نے برہان وانی کو سرکاری سطح پر شہید قرار دیا، طویل عرصے بعد مؤقف اختیار کیا کہ بات ہوگی تو صرف کشمیر پر!

اور تو اور، عاصمہ جہانگیر جیسی ہند دوست شخصیت نے بھی مجبور ہوکر سول سوسائٹی کو متحرک اور لبرل حلقوں سے اپیل کی کہ اس معاملے کو لے کر اٹھ کھڑے ہوں، انہوں نے مودی کو چالاک لومڑ سے تشبیہ دی. یہ بھی یاد رہے کہ خوفناک چھروں کے استعمال سے بینائی کھونے والے کشمیریوں کے معاملے کو جبران ناصر نے اس شاندار انداز سے نمایاں کیا کہ عالمی میڈیا بھی اس کا نوٹس لینے پہ مجبور ہوا، بلاشبہ وہ متاثر کن کاوش تھی جس میں ہندی سماج و سیاست کے بڑوں کے چہرے چھروں سے نشان زدہ دکھائے گئے تھے۔ اسی طرح ایک پاکستانی نوجوان گلوکار نے ایک زبردست گانا تخلیق کیا ہے جسے بی بی سی کے مطابق یوٹیوب پہ لاکھوں کشمیری دیکھ و سن چکے ہیں اور کشمیری اس گانے ” کشمیر کی آزادی تک انڈیا کی بربادی تک جنگ رہے گی“ کی رنگ ٹون موبائل فون پہ دھڑا دھڑ لگا رہے ہیں۔

کشمیر کا معاملہ ایک بار پھر نمایاں ہے تو اس میں صرف اور صرف کشمیریوں کی قربانی ہے، ہمارا کوئی کردار نہیں، یہی وجہ ہے کہ کشمیری نوجوان آج بھی نعرہ لگاتا ہے کہ ”ترقی نہیں آزادی چاہیے۔“

ہم پاکستانیوں کی جانب سے کشمیری عوام کو محبتوں بھرا سلام قبول ہو، خاص طور پہ وانی کے والد محترم کو جو یہ کہہ کر اس تحریک کی نظریاتی اساس کو واضح کرتے ہیں کہ ”پہلے اللہ پھر بیٹا، پہلے رسول پھر بیٹا، پہلے قرآن پھر بیٹا“۔ ہے کوئی اس جیسا باپ بیٹا؟

میرے کشمیر! ہم شرمندہ ہیں کہ ہم تیرے خلوص کا قرض نہیں چکا سکتے، ہمارے ارباب اختیار تو تجھ سے دامن چھڑانے کا ہر اوچھا ہتھکنڈہ آزما چکے، مگر سلام ہے تیری استقامت کو، کہ نہ ہم نے بےوفائی کی روش بدلی اور نہ تو نے رسم وفا چھوڑی۔
میرے کشمیر! تیری وادیاں مثل جنت ہیں اور ہم نے کبھی جنت کمانے کا سوچا ہی نہیں۔ تم نے ہم سے امید لگا لی تھی اور ہم ٹھہرے تاجر، ہوس زر ہمارے قلوب و اذہان پر سوار ہے۔
سن اے میرے کشمیر سن! یہاں سب ارباب اختیار تاجر ہیں، بہنوں کے تاجر، بھائیوں کے تاجر، خام مال کے تاجر، اور تو اور اپنے ہاتھوں سے تراشے ہیرے بھی کوڑیوں کے مول فروخت کردیتے ہیں۔

میرے کشمیر تو نہ سمجھ سکا، یہ تیری نہیں ہماری بدنصیبی ہے کہ ہم جنت کے خواہشمند نہیں۔ جن دو دھڑوں کے درمیان تم پھنس گئے ہو، انھوں نے تجھے کمائی کا ذریعہ بنا لیا ہے۔ تجھے شہ رگ اور اٹوٹ انگ قرار دینے کا نعرہ صرف بجٹ بڑھانے کا حیلہ ہے۔ عوام کے جذبات سے کھیلتے ہیں یہ کم ظرف۔

ہاں یاد ہے جب تیری آزادی کے لیے لڑنے والوں کو بےیار و مددگار چھوڑ کر سمجھا گیا کہ اب ختم ہوجائیں گےمگر ماں کے مجروں کا قصہ گو آٹھ سال تک یہ نہ سمجھ سکا کہ جہاد تو بس اللہ کے لیے ہے اور تاقیامت ہے۔ پھر ساتھ کٹھ پتلیوں کو ملا کر تجھے ٹکڑے کرنے کا منصوبہ بنایا گیاتھا۔ عادت جو ہوگئی تھی لڑے بغیر ٹکڑے کرانے کی، مگر اللہ سایہ سلامت رکھے بزرگ شیر گیلانی کا، جو اللہ کی مدد سے اس چال کو بھانپ گیا اور رب کی عطا کردہ فراست سے یہ چال واپس انھی پر پلٹ دی۔

میرے کشمیر تو ہم سے امید لگائے بیٹھا تھا، ہم کہ جنھوں نے تیری وادیوں کو تصویروں کی صورت بیچا، تیرے حسین مناظر کو سپنوں کا رنگ دے کر ان خوابوں کی تجارت کی، تیرے سینے پر تیری بیٹیوں کی لٹتی عصمتیں، بزرگوں کے ناتواں و لاغر تشدد زدہ جسم اور تیرے نوجوانوں کے لاشے، ہم نے انھیں عالمی منڈی میں رکھ کر بھائو خوب بڑھایا۔ جب ضرورت پڑی جہاد کشمیر کا نعرہ لگایا اور جب دل چاہا جہاد روک دیا اور سیاست کا نعرہ لگا دیا۔ کشمیر کمیٹی کے مال سے پیٹ کو دوزخ بناتے یہ حالت ہوگئی کہ شدید بارش میں نہ پائوں کی انگلیاں گیلی ہوتی ہیں اور نہ ایڑیاں۔

ہم نے تیری سسکیاں بیچیں، تیری آہیں بیچیں، تیری فریادیں بیچیں، اور پھر تو جاگ اٹھا. میرے کشمیر! تو جاگ اٹھا، تجھے جاگنا تھا۔ تیری ایک نسل ہماری بےوفائی کی بھینٹ چڑھ گئی، مگر اب تیری اگلی نسل تیار ہے۔ بنیے کے سروں کی پکی فصل کاٹنے کے لیے تیار ہے، اپنے بزرگ کمانڈر سید علی گیلانی کے زیر سایہ تیار ہے۔

60 دنوں کی کامیاب ہڑتال کے ساتھ ایک ایک گھر کی خبر گیری کرکے تیرے بیٹوں نے نئے سرے سے منظم ہونے کا ثبوت دے دیا، دنیا کو حیران کردیا۔ ان ساٹھ دنوں میں جدوجہد عروج پر رہی، بنیا سٹپٹا گیا اور اناپ شناپ بکنے لگا۔ سخت کرفیو، مواصلاتی نظام منقطع، بیرونی رابطے ختم، مگر تحریک جاری، پورے زوروشور سے جاری، بغیر کسی ”حمایت و سپورٹ“ کے جاری۔ تنظیم کی شکل تو تمہارے بیٹوں نے دوسری ”تنظیموں“ کو سمجھائی۔ اسی ہنگامی صورتحال میں اشیائے خوردونوش مہنگی ہونے کے بجائے سستی ہوگئیں، ضروریات زندگی گھر گھر پہنچانے کا انتظام انتہائی منظم طریقے سے کیا گیا، مواصلاتی نظام نہ ہونے کے باوجود آپسی رابطے انتہائی مضبوط کرلیے گئے۔ کسی گھر میں چولہا بجھنے دیا نہ امیدکی لو۔ تم نے پسپائی کے خوف کو پسپا کردیا۔

میرے کشمیر بس تیرے لیے ہاتھ اٹھا کر دعا گو ہیں، تیری تحریک کے لیے تیری آزادی کے لیے دعا گو ہیں، تیری تحریک بغیر ”سہارے“ کے منزل کی جانب گامزن ہے۔ بس اب جو تیری ان کامیابیوں کو پھر سے اپنے کندھوں پر سجا کر فروخت کرنے کے خواہشمند ہیں، ان سے بچنا ہے۔ ان شاء اللہ اب تیرے ہزاروں برہان وانی تیار اور عملی جدوجہد میں مصروف ہیں، تجھے کرائے کے پیشہ وروں کی ضرورت نہیں۔
اللہ تیرا حامی و ناصر ہو۔ آمین

آج اخبار پڑھنے کو کھولا تو دو بیانات پڑھ کر قابلِ مسرت حیرانگی ہوئی۔ دو بھارتیوں کے بیانات دیکھ کر اندازہ ہوا کہ جموں و کشمیر کی صورتحال اب جے بھارت کے کیل کانٹے سے لیس بےرحم سورمائوں کے کنٹرول میں نہیں ہے۔ حالیہ پرتشدد واقعات میں کشمیر نے قربانی کی نئی مثال قائم کی ہے۔ برہان وانی رحمتہ اللہ علیہ کی شہادت (ان شاءاللہ) پر اٹھنے والی حریت کی سرشار لہر مہینوں گزرنے کے باوجود تاحال نہیں بیٹھی۔

پہلا بیان کانگریس کے سینئیر عہدیدار مانی شنکر کا ہے جو فرماتے ہیں کہ ”کشمیری بھارت سے آزادی چاہتے ہیں، فوجی ایکٹ اور سختیاں کشمیریوں کی جدوجہد نہیں روک سکتیں.“ جبکہ دوسرا بیان بھارت خفیہ ایجینسی را کے سابق سربراہ نے مشہور جریدے اکنامکس ٹائمز کو انٹرویو دیتے ہوئے کہا کہ ”برہان وانی کشمیریوں کا آئیکون تھا۔ کشمیر کی صورتحال سن 1990ء والی ہوچکی ہے جو کسی طور بھارت سے سنبھل نہیں پا رہی.“ فیاللعجب۔ واضح رہے کہ کشمیر کا سودا کرنے والے مہاراجہ ہری سنگھ کے بیٹے نے پچھلے دنوں میڈیا کو انٹرویو دیتے ہوئے کہا کہ ”کشمیر کسی طور پر بھارت کا اٹوٹ نہیں۔ وہ ایک الگ خطہ ہے۔ اسے بھارت کا حصہ نہیں سمجھنا چاہیے.“

ایک طرف بھارت کی طرف سے مظالم کا سلسلہ جاری ہے اور اٹوٹ انگ کی گردان ہو رہی ہے. نریندر مودی کی ہٹ دھرمی بھی باقی ہے، موصوف شاید احمقوں کی جنت سے باہر نہیں آئے۔ اب بھی اٹوٹ انگ کا راگ الاپنے والے مودی کو اندازہ نہیں کہ کشمیری بھارت سے صرف ایک چیز چاہتے ہیں اور وہ ہے ”آزادی“. اس اٹل حقیقت کی گونج اب خود بھارت کے ایوانوں اور میڈیا ہائوسز سے لے کر سیاستدانوں اور سول سوسائٹی تک سنائی دے رہی ہے۔ پاکستان کے مسئلہ کشمیر پر آواز اٹھانے پر مودی نے معاملہ سے توجہ ہٹانے کے لیے پہلے بلوچستان کے معاملے کو چھیڑ دیا جو شاید کارگر ثابت نا ہوا تو پھر کراچی را اور اس کے کارندوں کو آگے کر دیا۔

کشمیری روز بروز تقویت پکڑنے والی تحریک کی للکار اب مین سٹریم میڈیا اور عام آدمی تک پہنچ گئی ہے۔ شاید یہ بھارتی تاریخ میں پہلی دفعہ ہوا ہے کہ کشمیریوں کے معاملے پر بھارتی خود آواز اٹھانے پر مجبور ہوگئے ہیں۔ کرفیو کے 2 ماہ، 60 ارب کا نقصان، شہداء کی طویل فہرست، اور لاتعداد زخمی۔ مگر کشمیریوں کا جذبہ سرد نہیں ہو رہا. اب بھی ہر جگہ ایک نعرے کی گونج ہے ”ہم کیا چاہتے، آزادی“
دنیا جان گئی ہے، بھارت کو بھی جان لینا چاہیے کہ یہ تحریک اب نہیں تھمنے کی۔ ان شاءاللہ منزل سے ہمکنار ہو کر رہے گی.

مسئلہ ہمارا یہ ہے کہ ہم اپنی ٹیم کو میدان میں اترنے سے پہلے ہی شکست دینے کی بھرپور تیاری کر لیتے ہیں۔ بات صرف کرکٹ ٹیم کی نہیں۔ وہ کرکٹ ٹیم ہو یا سفارتی میدان میں پاکستان کی بقا کی جنگ لڑنے کیلئے اتری کوئی سفارتی ٹیم۔ اس کے سب سے پہلے مدمقابل ہم خود ہوا کرتے ہیں۔ پھر ہم سادہ لوح مگر زود رنج توقع کرتے ہیں کہ ہم اپنا کیس بین الاقوامی سطح پر جیت کر آئیں گے۔ این ایس جی کا معاملہ ہو یا مسئلہ کشمیر۔ بین الاقوامی طاقتوں کو اپنے موقف سے کائل کر کے، دلیل کی جنگ جیت کے آئیں گے۔ ہم، ہمہ وقت حالت جنگ میں رہنے والوں کو معلوم ہونا چاہئے کہ ہمارا بولا، لکھا گیا ہر لفظ بین الاقوامی میٹنگوں میں میزبان کی فائل میں موجود رہتا ہے۔ سو ہمارا مقدمہ دلیل کی جنگ میں بے وزن ہی رہتا ہے۔ ہمارے وفود اسی لئے ناکام لوٹتے ہیں۔ اس کے باوجود کہ ہمارا مقدمہ بالخصوص کشمیر پر نہایت مضبوط اور ہمارا موقف سچا ہے۔

وزیراعظم پاکستان نوازشریف نے مسئلہ کشمیر کو اجاگر کرنے کیلئے ایک نیا اقدام کیا۔ 20 سینئر پارلیمانی ارکان کی ایک ٹیم بنائی۔ اس ٹیم کو مختلف ممالک بھی الاٹ کر دیے گئے۔ یہ ممبر الگ الگ اور گروپوں کی شکل میں گلوبل ویلج کے مختلف ممالک کا دورہ کریں گے اور مسئلہ کشمیر کو نئے انداز سے اجاگر کریں گے۔ ایک طرح کی ٹریک ٹو ڈپلومیسی سمجھ لیجئے۔ سفارت کاروں کی حیثیت تو سرکاری ملازم یا نمائندے کی طرح ہی ہوا کرتی ہے۔ سو ان کی رائے، دلائل اور آرگومنٹ کو سرکاری حیثیت میں ہی لیا جاتا ہے۔ جبکہ ٹریک تو ڈپلومیسی میں ایسا نہیں ہوتا۔ معاشرے کے نمایاں افراد، سابق جج، ریٹائرڈ جنرل، دانشور، شاعر، سابق کھلاڑی، معروف آرٹسٹ اور عوام کے منتخب نمائندے۔ سب اپنے ملک کے عوام کا موقف لیکر کسی دارالحکومت میں اترتے ہیں تو ان کی رائے کو بغور سنا جاتا ہے۔ ان کی باتوں کو وزن دیا جاتا ہے۔ سول سوسائٹی ان کی بات سنتی ہے۔ تھنک ٹینکس اور رائے عامہ مرتب کرنے والے ادارے ان کو دعوت دیکر بلاتے ہیں۔ ایسی ایکسرسائز سے، بیرون ملک میں ایک موافق لابی جنم لیتی ہے اور آہستہ آہستہ ایسے افراد اور طبقات جنم لیتے ہیں جو مستقبل میں کام آتے ہیں۔

ہمارے ہاں عام طور پر یہ توقع کی جاتی ہے کہ جونہی ہماری جانب سے مسئلہ کشمیر پر کوئی بیان داغا جائے۔ دنیا بھر کے ممالک اور ان کی حکومتیں لشکر لیکر بھارت پر چڑھ دوڑیں اور بھارتی حکمرانوں کے کان پکڑ کر مقبوضہ کشمیر کو ہمارے حوالے کر دیں۔ ایسا کبھی نہیں ہوا، نہ ہوگا۔ اپنا کیس جیتنے کیلئے بین الاقوامی برادری میں اپنے حمایتی پیدا کرنا ہوتے ہیں۔ رائے عامہ کو اپنے حق میں بیدار کرنا ہوتا ہے۔ جمہوری ممالک میں رائے عامہ کی اہمیت بہت زیادہ ان کے حکمران اپنے عوام، اپنے ووٹر کی بات کو توجہ سے سنتے اور ان پر عمل کرتے ہیں۔ وہ ان کی رائے کو نظرانداز کرنے کا سوچ بھی نہیں سکتے۔ کیونکہ جمہوری حکومتیں، عوام کے ٹیکس سے چلتی ہیں۔ جمہوری ملکوں میں حکومتیں انگلی کے اشارے سے نہیں اٹھتیں۔ بلکہ عوام کے ووٹوں سے وجود میں آتی ہیں۔ وہ دھرنوں کے ذریعے نہیں بنتیں۔ بلکہ الیکشن کے راستے پر چل کر ایوان اقتدار میں داخل ہوتی ہیں کیونکہ وہ عوام کو جواب دہ ہوا کرتی ہیں۔ لہٰذا ایسے اقدامات ہمیشہ سودمند اور بارآور ہوا کرتے ہیں۔ لیکن برا ہو اس تعصب اور سیاست کا۔ اس خواہ مخواہ کی سیاست کا۔ جس میں ہر حال میں مخالفت کی جاتی ہے۔ سو! ادھر وزیراعظم پاکستان نے سینئر ارکان پارلیمنٹ پر مشتمل اپنی بین الاقوامی ٹیم کا اعلان کیا تو فوری طور پر میدان سیاست کی انڈر نائنٹین ٹیم میدان میں آ گئی۔ یہ بھول کر کہ مسئلہ کشمیر ایسے حساس اور قومی ایشو پر بنائی گئی ٹیم سرکاری نہیں۔ پاکستانی ٹیم ہے اب حکومت نمائندگی نہیں کرتی۔ بلکہ پارلیمان کی ٹیم ہے جو عوام کی نمائندہ نہیں۔ میرے خیال میں تو ٹیم کے ارکان نام پڑھے بغیر اس پر تنقید کر دی گئی۔ حالانکہ اس میں اپوزیشن کی نمائندگی بھی ہے۔ حکومت کو چاہئے کہ تنقید کے کوڑے برساتی زبانوں پر تالا لگانے کیلئے اس میں پی ٹی آئی کو نمائندگی دے تاکہ اس ٹیم کو حب الوطنی اور افادیت کا سرٹیفیکیٹ مل جائے۔

اب اس ٹیم کی کمپوزیشن ہی کو دیکھ لیں۔ کیسے کیسے ایکسپرٹ اس ٹیم میں شامل ہیں۔ ایسے افراد جو کسی دوسرے ملک جائیں گے تو ان کو غور سے سنا جائے گا۔ مولانا فضل الرحمن نہ صرف چیئرمین کشمیر کمیٹی ہیں بلکہ اعلیٰ سطح کے نامور عالم دین بھی ہیں۔ مسلم ممالک بالخصوص عرب ممالک میں ان کے گہرے روابط ہیں۔ نمایاں بین الاقوامی مسلم تنظیموں تک ان کی رسائی ہے۔ بین الاقوامی سطح پر ان کی رائے کا احترام ہے۔ لیکن ان کی مخالفت کی جاتی ہے تو صرف سیاسی بنیاد پر۔ سیاسی حریف سمجھ کر۔ لیفٹیننٹ جنرل (ر) عبدالقیوم خان نہ صرف کئی وزرائے اعظم کے ساتھ بطور ملٹری سیکرٹری کام کر چکے ہیں بلکہ سٹیل ملز اور واہ آرڈیننس فیکٹریز کے سربراہ رہ چکے ہیں۔ انہوں نے بین الاقوامی سفارت کاری کو بغور دیکھا ہے۔ بڑے اداروں کی سربراہی کے طور پر بین الاقوامی معاہدوں کو ڈیل کیا ہے۔ دفاع اور خارجہ امور کے شعبوں میں انہوں نے تعلقات استوار کئے ہیں۔ ان کا وہ تجربہ یقینی طور پر کام آئے گا۔ رضا حیات ہراج کئی دفعہ وفاقی وزارتوں پر فائز رہے ہیں۔ کامرس اور ٹریڈ کے وزیر کے طور پر ان کی ایک موثر لابی ہے۔ وہ بین الاقوامی طور طریقوں سے واقف ہیں۔ اسی طرح مخدوم خسرو بختیار خارجہ امور کے وزیر مملکت کے طور پر کام کر چکے ہیں۔ سفارتی ذمہ داریوں نے ان کو بین الاقوامی تھنک ٹینکس کا آشنا بنا دیا ہے۔ اس طرح معروف تاجر رہنما قیصر شیخ ہیں۔ تاجروں کی سیاست اور بین الاقوامی تجارتی تنظیموں سے روابط ان کا خصوصی شعبہ ہے۔ یقین سے کہا جا سکتا ہے کہ ان کی یہ محارت مسئلہ کشمیر کو اجاگر کرنے میں کام آئے گی اور پھر مشاہد حسین ہیں جو صحافت سے ایڈیٹری، پھر سیاست۔ وہ ہمہ جہت شخصیت ہیں۔ عالمی سطح کے دانشور اور لکھاری ہیں۔ سینٹ آف پاکستان کے ممبر ہیں۔ وفاقی وزیر بھی رہ چکے ہیں۔ بین الاقوامی ادارے ان کو دعوت دیکر بلاتے اور ان سے رہنمائی لیتے ہیں۔ وہ علاقائی سیاست، سفارت کا معتبر نام ہیں۔ ان کا لکھا ایک ایک لفظ پڑھا سنا جاتا ہے۔ اعجاز الحق سینئر رکن پارلیمنٹ ہیں۔ ان کے والد مرحوم ضیاء الحق گیارہ سال پاکستان کے آرمی چیف اور صدر مملکت رہے۔ کون سا ایسا ملک ہے جہاں ان کی جان پہچان نہ ہو۔ ایک زمانہ ان کے بین الاقوامی کردار کا متعرف ہے۔ سو ایسی ٹیم کی خدمات سے فائدہ اٹھانا چاہئے تاکہ ان کو طنز کے نشتر چھبوئے جا سکیں۔

مقبوضہ کشمیر میں تحریک آزادی کی نئی لہر کو جاری و ساری ہوئے آج 56 واں روز ہے۔ اس عرصہ میں مقبوضہ کشمیر کے عوام 64 ارب کا معاشی خسارہ برداشت کر چکے۔ مقبوضہ وادی میں خوراک، ادویات اور ایندھن کی شدید کمی ہے۔ بچوں کیلئے دودھ ناپید ہے۔ سو سے زائد افراد کو شہید کیا جا چکا۔ سات ہزار مکانات کو منہدم کیا جا چکا۔ ایک ہزار سے زائد افراد نابینا ہو چکے۔ 18 لاکھ سے زائد پیلٹ گن کے چھرے فائر کئے جا چکے۔ اب بھارتی میڈیا رپورٹ کر رہا ہے کہ مرچیں اور سپرے کرنے والی گن کے استعمال پر غور کیا جا رہا ہے۔ پاکستانی سفارتی کوششیں رنگ لا رہی ہیں۔ پرائم منسٹر یو این اسمبلی میں دبنگ خطاب کرنے جا رہے ہیں۔ ان کے خطوط کے جواب میں اقوام متحدہ کے سیکرٹری جنرل بانکی مون نے بھارتی مظالم پر اظہار تشویش کیا ہے۔ او آئی سی تاریخ میں پہلی مرتبہ بآواز بلند بولی ہے۔ مقبوضہ کشمیر کو بھارت کا داخلی معاملہ تسلیم کرنے سے انکار کر چکی ہے۔ ایمنسٹی انٹرنیشنل اپنے دفاتر بھارت سے کلوز کر چکی۔ ہیومن رائٹس واچ کا ایشیا چپٹر مودی پر برس رہا ہے۔ بھارتی اپوزیشن علی الاعلان کہہ چکی کہ مقبوضہ کشمیر کے حالات کا ذمہ دار پاکستان نہیں۔ مودی اور بی جے پی ہے۔ ایسی صورت حال سے فائدہ اٹھاتے ہوئے بھارت پر سفارتی یلغار وقت کا تقاضا ہے۔ کشمیر کا حل قومی اتفاق رائے پر مبنی مسئلہ ہے۔ اس پر سیاست نہ کی جائے۔ سیاست کیلئے اور کئی موضوع ہیں۔ وہاں طبع آزمائی کی جائے۔ اپنی ہی ٹیم کے خلاف کھیلنے سے کچھ ہاتھ نہیں آئے گا۔

مہذب دنیا میں عامۃ الناس کی بالادستی، فیصلے اور اختیارکی قوت عوام کے پاس ہونا، سیاسی اور سماجی طور پر آزاد اور باشعور ہونا جمہوریت کہلاتا ہے۔ جمہوریت کے دعویدار ہمیشہ سے یہ دعوے کرتے آئے ہیں کہ عوام کی سوچ، فکر، سیاسی اور سماجی سرگرمیوں کی آزادی جمہوریت سے بہترکوئی نہیں دے سکتا۔ مگر ایک ایساملک بھی ہے جو اپنے آپ کو دنیا کی سب سے بڑی جمہوریت گردانتا ہے اور دن رات یہ راگ الاپتا ہے کہ دنیا میں اگر کسی جگہ پر عوام کو شخصی آزادی اور فیصلے کی قوت حاصل ہے تو وہ اس ملک میں ہے۔ یہ ملک دنیا میں بھارت کے نام سے جانا جاتا ہے۔ اس دعوے کی روشنی میں جب ہم بھارت کی درون خانہ سیاست و معاشرت اور شخصی و سماجی آزادی کا بغور جائزہ لیتے ہیں توحالت اس دعوے کے بالکل برعکس نظر آتی ہے۔

حقیقت یہ ہے کہ بھارت وہ ملک ہے جہاں ذات پات، نسل و برادری، مذہب اور رسم و رواج کے نام پر انسانی حقوق کی جی بھر کر تذلیل کی جاتی ہے۔ حقوق انسانی کے چارٹرز کی دھجیاں اڑائی جاتی ہیں۔ مذہب، عقیدہ اور ذات پات کی بنیاد پر لوگوں کو ہراساں کرنا، ان کا قتل عام کرنا، کاروبار اور جائیداد کو نذر آتش کرنا، معمول کی بات ہے اور ستم یہ کہ یہ سارے کام حکومت کی محفوظ چھتری تلے سرانجام دیے جاتے ہیں. نتیجتاً خوف و ہراس اور تشدد و غارت گری کی ایک فضا تشکیل پاتی ہے اور مجبور و مقہور قومیں اپنے حقوق کے تحفظ کے لیے جمہوری انداز اپناتے ہوئے اٹھ کھڑی ہوتی ہیں۔ مظاہروں، ہڑتالوں اور احتجاج کاسلسلہ شروع ہوتا ہے، مگر جمہوری حکومت پر جمہوری انداز گراں گزرتا ہے، اور وہ بزور قوت دبانے اور جڑ سے ختم کرنے کی کوشش کرتی ہے، بےبس اور لاچار لوگوں کا ناحق خون بہایا جاتا ہے۔ جب لوگ اپنے پیاروں کے تڑپتے لاشے اور کاروبار اور جائیداد کو نذرآتش ہوتا دیکھتے ہیں تو ان کی برداشت جواب دے جاتی ہے اور وہ ہتھیار اٹھاکر اپنے حقوق کے لیے مسلح تحریک کا آغاز کر دیتے ہیں۔

عام طور پر خیال کیا جاتا ہے کہ بھارت کے زیر انتظام علاقوں میں فقط کشمیر میں ہی انسانی حقوق کی پامالی ہو رہی ہے اور صرف کشمیر سے ہی آزادی اور علیحدگی کی صدائیں بلند ہو رہی ہیں مگر یہ تاثر درست نہیں ہے۔ حقیقت یہ ہے کہ اس وقت پورا بھارت آتش فشاں بنا ہوا ہے جو کسی وقت بھی پھٹ سکتا ہے۔ کشمیر کے علاوہ مشرقی پنجاب (خالصتان)، تامل ناڈو، آسام، ناگا لینڈ، تری پورہ، منی پورہ، میزورام سمیت شمال مشرقی بھارت کی کئی ریاستوں میں آزادی کی مضبوط تحریکیں چل رہی ہیں۔ حال ہی میں دلت کمیونٹی بھی اپنے ساتھ ہونے والی زیادتیوں کے خلاف اٹھ کھڑی ہوئی ہے اور اس نے بھی احتجاج اور مظاہروں کا رستہ اپنا لیا ہے۔ وہ بھی لاکھوں کی تعداد میں سڑکوں پر آ رہی ہے۔ اگرچہ بھارت نے افسپاجیسے کالے قوانین بنا کر ان تحریکوں کو بزور قوت دبانے کی کوشش کی ہے مگر
ظلم پھر ظلم ہے بڑھتا ہے تو مٹ جاتا ہے
لہو پھر لہو ہے بہتا ہے تو جم جاتا ہے
کے مصداق یہ تحریکیں تیزی کے ساتھ ابھر رہی ہیں۔ حالیہ دنوں میں جہاں کشمیرکی تحریک میں تیزی آئی، وہیں پورے بھارت میں آزادی کی دیگر تحریکوں میں بھی تیزی دیکھنے کو آئی ہے۔ ناگالینڈ کے معاملے میں تو بھارت ان کو پاسپورٹ اور جھنڈا تک علیحدہ دینے کو تیار بیٹھا تھا۔ ان تحریکوں میں بھارتی کالجوں اور یونیورسٹیوں میں پڑھنے والوں نوجوانوں نے حصہ ڈالا ہے، تعلیمی اداروں میں ان تحریکوں کے حق میں جلسے جلوسوں اور سرگرمیوں سے ان کی آواز باہر کی دنیا تک پہنچ رہی ہے۔ جواہرلال نہرویونیورسٹی اوراس کے بعد ملک کی دیگر بڑی یونیورسٹیز میں ان تحریکوں کے حق میں ہونے والے احتجاج کی بازگشت پوری دنیامیں سنی گئی اور دنیا بھر میں تبصرے ہونے لگے کہ بھارت انسانی حقوق کی مسلسل خلاف ورزیاں کر رہا ہے۔ سوشل میڈیا اور اپنی تعلیم کے مؤثر استعمال کے ساتھ ان نوجوانوں نے آزادی کی تحریکوں کو اس سطح پر پہنچا دیا ہے کہ بھارتی افواج اپنے تمام تر مظالم اور قوت کے ساتھ بھی ان تحریکوں کے سامنے بے بس نظر آتی ہیں۔

کشمیر کے علاوہ بھارت کے160سے زائد اضلاع پر ماؤنواز باغیوں اور نکسل باڑیوں کاقبضہ ہے۔ آندھراپردیش، جھاڑ کھنڈ، اڑیسہ، مغربی بنگال، چھتیس گڑھ، مہاراشٹرا اور بوج مرہ وغیرہ کے92 ہزار مربع کلومیٹر پر ان باغیوں کی حکومت ہے۔ ان کی اپنی عدالتیں اور اپنا پولیس کانظام ہے۔ حکومت کا کوئی کارندہ وہاں پر نہیں مار سکتا۔ پوری انتظامیہ قتل کر دی جاتی ہے۔ خود بھارت کے سرکاری ذرائع ابلاغ کے مطابق ان ماؤنواز باغیوں کی تعداد60 ہزار سے تجاوز کرچکی ہے اور ان کے پاس جدید ترین اسلحہ ہے، اب تک یہ ہزاروں بھارتی فوجیوں کو موت کے گھاٹ اتارچکے ہیں۔ بھارت کی انتظامی اور فوجی مشینری ان کے سامنے مکمل طور پر بےبس ہو چکی ہے۔ گزشتہ ماہ مہاراشٹر کے ایک ضلع میں سترہ فوجی ان کے ہاتھوں ہلاک ہوئے۔ اسی طرح بہار میں نکسلوں نے گھات لگا کر بھارت کے بیس کوبرا کمانڈوز کو قتل اور دس کو شدید زخمی کر دیا۔ باغیوں کی طرف سے بھارتی فوج اور انتظامی مشینری پر یہ ایسی کاری ضرب ہے جو ابھی تک ہضم نہیں ہو رہی ہے۔

کشمیرکے بعد دوسری لمبے عرصے تک چلنے والی تحریک خالصتان کی ہے جو بھار ت میں بسنے والے سکھوں نے اپنے اوپر ہونے والے مظالم کے خاتمے کے لیے شروع کی اور بالآخر یہ خالصتان کے مطالبے پر منتج ہوئی۔ سکھوں کی بےشمار تنظیمیں ہیں جواس تحریک میں شعلہ جوالا کا کام کر رہی ہیں۔ ان میں اکالی دل، ببرخالصہ وغیرہ قابل ذکر ہیں۔ سکھ بھی اب یونیورسٹیوں اوراسی طرح دیگر کئی ممالک میں اپنی تحریک کوزندہ رکھے ہوئے ہیں۔ چنددن قبل برطانیہ میں ہونے والے مظاہرے میں خالصتان تحریک کے لیے احتجاج کرنے والوں نے اس طرح کے نعرے لگائے:
پنجاب خالصتان کا
کشمیرپاکستان کا
ان کے علاوہ آسام میں مسلم یونائٹیڈ لبریشن ٹائیگرز آف آسام اور تری پورہ و منی پورہ وغیرہ میں بھی لوگ مسلسل آزادی کے لیے کاوشوں میں مصروف ہیں۔ کشمیر کی حالیہ تحریک میں آنے والی شدت کا اثر دوسری تحریکوں پر بھی پڑا ہے اور لوگ پہلے سے زیادہ شدت کے ساتھ بھارت سے علیحدگی کا مطالبہ دہرانے لگے ہیں۔ بھارت گیس کے اس غبارے کی مانند بنتا جا رہا ہے جو پریشر سے کسی بھی لمحے پھٹ سکتا ہے۔