Tag: مہاجر

کراچی میں ایک ہفتے سے جو کچھ ہو رہا ہے، وہ کسی بھی آزاد اور خودمختار ملک میں نہیں ہوتا. کوئی پاگل بھی اپنے ملک کے خلاف نعرے نہیں لگواتا، کوئی جاہل بھی قومی پرچم نذر آتش نہیں کرواتا، کوئی گھٹیا ترین انسان بھی دشمن ملک سے مدد نہیں مانگتا مگر ہمارے پیارے پاکستان کے سب سے بڑے شہر کراچی میں یہ سب کچھ ہوا اور افسوس کہ ہو رہا ہے. یہ سب کچھ غداری کے زمرے میں آتا ہے.

فاروق ستار نے رینجرز کی قید سے آزادی کے بعد ’’بھائی‘‘ کی مشاورت سے خود کو متحدہ کا قائد بنایا، اور لاتعلقی کا اعلان کیا، اگر یہ سب کچھ نہ کیا جاتا تو کم از کم سزا ایم کیو ایم پر پابندی بنتی تھی مگر فاروق بھائی نے چال چلتے ہوئے معاملات کو وقتی طور پر ٹھنڈا کیا. یہ بات اب کھلا راز ہے کہ ’’بھائی‘‘ نے پاکستان مخالف نعرے اپنی نہیں’را ‘ کے حکم پر لگوائے، پاکستان مخالف تقریر ’را‘ کی ہدایت کے مطابق تھی. باوثوق ذرائع کے مطابق’’بھائی‘‘ نے بھارتی انٹیلی جنس ایجنسی کے اعلی افسران سے مشاورت کے بعد پاکستان کے خلاف ہرزہ سرائی کی اور وہاں یہ فیصلہ کیا گیا کہ تقریر کے بعد اگر کسی قسم کی پابندی لگی تو ایم کیو ایم کی قیادت بھائی کی بیٹی کرے گی. پہلے بھی جب متحدہ پر کوئی آفت آئی تو ’’بھائی‘‘ کی بیٹی کے قائد بننے کی خبریں آتی رہیں مگر اب چونکہ حالات کچھ زیادہ خراب ہیں، اس لیے امکان یہی ہے کہ شاید جلد ’بیٹی‘ میدان میں آجائے.

حالات و واقعات نے ثابت کیا ہے کہ ’بھائی‘ کا راج ابھی تک برقرار ہے. ایم کیوایم کے سینئر رہنما بابر غوری نے پاکستان زندہ باد کا نعرہ لگانے پر’بھائی‘سے معافی مانگ لی، ریکارڈنگ بھی سامنے آچکی ہے جس میں معذرت کرتے ہوئے بابر غوری کو پاکستان مخالف نعرے لگاتے سنا جاسکتا ہے۔ بابر غوری کے الفاظ کچھ یوں تھے کہ میں نے پاکستان زندہ باد کا ٹویٹ کیا، اگر آپ اس کو درست نہیں سمجھتے تو میں ایسی غلطی پر معافی مانگتا ہوں، اس کے بعد پاکستان مخالف نعرے لگائے گئے، وہاں موجود سب لوگوں نے باری باری پاکستان مخالف نعرے لگائے.

اس صورتحال کے تناظر میں پاک سرزمین پارٹی کے سربراہ مصطفیٰ کمال متحرک ہو گئے ہیں اور کوئی موقع ہاتھ سے جانے نہیں دے رہے، اطلاعات ہیں کہ وہ دبئی پہنچ چکے ہیں اور ایم کیوایم کے رہنمائوں سے ملاقات کر کے اپنی پارٹی میں لانے کی کوشش کر رہے ہیں، عامر لیاقت سمیت کئی رہنمائوں نے پہلے ہی پارٹی سے منہ موڑ لیا جبکہ کئی رہنما منحرف ہوکر پاک سرزمین پارٹی میں شامل ہوچکے ہیں.

فاروق ستار رہنمائوں کی بغاوت کو روکنا اور مصلحت کے ساتھ آگے بڑھنا چاہتے ہیں، وہ ایم کیو ایم کے سخت گیر اور نرم گفتار طبقے کو ملاکر چلنا چاہتے ہیں لیکن موجودہ صورت حال میں یہ ناممکن دکھائی دے رہا ہے. فاروق ستار کے لیے مشورہ ہے کہ جلد از جلد ایم کیو ایم کے آئین میں ترمیم کر لیں تاکہ ’’بھائی‘‘کی ’’بیٹی‘‘جماعت پر قبضہ کر کے باپ کے نقش قدم پر نہ چل پڑے، اسی میں فاروق ستار اور متحدہ کی بھلائی ہے، کیونکہ پاکستان ہے تو ہم ہیں.

برصغیر پر جب انگریز حاکم بنے تو شرح خواندگی90 فیصد تھی۔ دلی کے بازاروں میں خوب رونق ہوا کرتی، اگرچہ عام لوگوں کے پاس زمینیں نہ ہونے کے برابر ہوتیں لیکن پھر بھی لوگ خوشحال تھے. انگریز سیاح اس بات کا اعتراف کرتے ہیں کہ بھکاری ڈھونڈنے سے بھی نہ ملتے تھے۔ یہی انگریز جب سو سال حکومت کرنے کے بعد رخصت ہوا تو برصغیر کی صرف 5 فی صد آبادی خواندہ تھی اور جامع مسجد دہلی کی سیڑھیوں پر نمازیوں سے زیادہ بھکاری ہوتے تھے۔

چونکہ انگریزوں نے حکومت مسلمانوں سے چھینی تھی اور مسلمان بھی خود کو برصغیر کا جائز حکمران سمجھتے تھے اس لیے عتاب زیادہ تر مسلمانوں پر ہی گرا۔ اس کے ساتھ ہی انہوں نے برصغیر کی سب سے بڑی آبادی ہندئووں اور مسلمانوں میں نفرت کے بیج بھی بونا شروع کر دیے. نتیجہ یہ نکلا کہ انیسویں صدی کے آخر اور بیسویں صدی کے شروع میں مسلمانوں کا سوچ سمجھ رکھنے والا طبقہ یہ محسوس کرنا شروع ہو گیا تھا کہ ہندو اور مسلمانوں کا ایک ملک میں نباہ کرنا اب تقریباً نا ممکن ہو گیا ہے۔ کانگریسی وزارتوں کے دور میں مسلمانوں کے ساتھ روا رکھے جانے والے رویے نے اس رائے کو اور تقویت دی اور ہندو مسلم اتحاد کے داعی قائداعظم جیسے مدبر شخص نے بھی مسلمانوں کے لیے الگ وطن کا فیصلہ کر لیا۔

پاکستان اپنے قیام کے روز سے ہی اس لحاظ سے بدقسمت رہا ہے کہ حصول کے وقت کیے گئے وعدے پورے نہیں ہو سکے۔ یہ کہا جاتا ہے کہ مسلمانوں نے یہ ملک اس لیے حاصل کیا تھا کہ یہاں وہ اپنے عقائد اور نظریات کے مطابق آزادانہ زندگی گزار سکیں بلکہ ہندوئوں کے معاشی جبر سے بھی آزاد ہوں۔ اگر چہ یہ مسلمانوں کے اجتماعی مفاد کا فیصلہ تھا لیکن پھر بھی اس دور کے مومنین صالحین نے کھل کر اس کی مخالفت کی، چنانچہ اس اصول پرست اور دیانتدار شخص پر فتوے لگائے گئے جو ایک غلام قوم کا مقدمہ لڑ رہا تھا۔ کوئی ایسی قوم بھی ہوگی جس کے رہنما خود اسے یہ بتا رہے ہوں کہ آزادی تمارے مفاد میں نہیں، تم غلام ہی ٹھیک ہو۔ جب یہ بات واضح ہوگئی کہ پاکستان بن کر ہی رہےگا تو راتوں رات وہ تمام لوگ جو قیام پاکستان کے لیے سد راہ تھے، توبہ تائب ہو کر مسلم لیگ میں شامل ہوگئے۔ جی ہاں وہ تمام راجے مہاراجے، نواب، جاگیردار، زمیندار اور سرمایہ دار جو گزشتہ سو سالوں سے انگریزوں کے تلوے چاٹ رہے تھے، عین آزادی کے وقت وہ بھی آزادی والی ٹرین میں سوار ہو گئے۔ قائد اعظم نے اگرچہ ایسے لوگوں کو عہدے نہ دینے میں عافیت جانی لیکن ان کی وفات کے فوراً بعد یہ لوگ اپنے اثر و رسوخ کا فائدہ اٹھا کر نوزائیدہ مملکت میں اہم عہدوں پر فائز ہو گئے اور اس کے بعد سے پاکستانی عوام آزادی کے بہلاوے میں ابھی تک غلام ہی ہیں۔ مثال کے طور پر خان عبد الغفار خان کی عوامی نیشنل پارٹی اور جمیعت علمائے ہند پاکستان کے مخالاف تھے لیکن اسی پاکستان کے ایک صوبے میں ان کے وارثوں نے کئی دفعہ جم کر حکومت کی۔ پنجاب میں سکندر حیات کی اولاد مخدوموں، کھروں اور ٹوانوں کی کہانیاں بھی کچھ ایسی ہی ہیں۔

ایک ملک بنانے کے بعد جب ایک قوم بنانے کی باری آئی تو اس قوم کی باگ دوڑ ان ہاتھوں میں چلی گئی جنہیں اس قوم سے تو کیا ملک سے بھی دلچسپی نہ تھی چنانچہ سب سے پہلے تو انہوں نے بنگالیوں سے جان چھڑائی جو اس وقت تک پاکستان میں سب سے باشعور طبقہ تھا اور تحریک آزادی میں جس کا کردار ناقابل فراموش رہا تھا۔ اس کے بعد بھی چین نہیں ملا تو انہوں نے باقی ماندہ پاکستان کو ایک اکائی کے طور پر مضبوط کرنے کے بجائے لوگوں کو پنجابی، بلوچی، سندھی، پختون، مہاجر، سرائیکی وغیرہ میں بانٹ دیا اور ایسے اسباب مسلسل فراہم کیے جاتے رہے کہ یہ لسانی گروہ ایک دوسرے سے باہم دست و گریبان ہی رہیں ۔

سب سے بڑی بدقسمتی یہ رہی کہ قائداعظم کے بعد کوئی رہنما نہ ملا جو بھیڑ بکریوں کے اس گلے کی نگہبانی کے ساتھ رہنمائی کرتا۔ اور اس سے بڑا المیہ یہ ہوا کہ ایشیا کا ڈیگال، قائد عوام، مرد مومن اور مشرق کی بیٹی تو آج بھی زندہ ہے لیکن حضرت قائداعظم صاحب انتقال کر گئے۔ آج حال یہ ہے کہ ایک ملک جسے کوئی اس کا حق دینے کے لیے تیار نہیں لیکن سارے اس سے اپنا حق مانگ رہے ہیں۔ سوال مگر یہ ہے کہ اس ملک کا کیا قصور ہے؟ کیا جب ہم الیکشن میں بار بار آزمائے ہوئے لوگوں کو، کرپٹ ترین لوگوں کو ووٹ دیتے ہیں تو یہ پاکستان کا قصور ہے؟ ہمارے اپنے بھائی ہمارے خاندان کے لوگ جو پولیس، فوج اور اسٹیبلیشمنٹ کا حصہ ہیں، کرپشن اور لوٹ مار کے ذریعے محرومی و ناانصافی کو جنم دے رہے ہیں، کیا یہ بھی پاکستان کا قصور ہے؟ ہماری عدالتیں انصاف نہیں کرتیں، ہمارے منصف سرعام بک جاتے ہیں، کیا یہ بھی پاکستان کا قصور ہے؟ ہمارا تعلیمی نظام عوام میں شعور و بیدار کرنے میں ناکام ہے تو کیا اس میں بھی پاکستان کا قصور ہے؟ اس ملک نے تو ہمیں یہ موقع دیا تھا کہ ہم اپنے نصیب خود اپنے ہاتھوں سے لکھیں لیکن وہ نصیب لکھنے والا قلم ہم نے اپنی مرضی سے غلاموں کے ہاتھوں میں تھما دیا تو یہ بھی پاکستان کا قصور ہے؟ نوجوان جو 14 اگست کو سڑکوں پر پاکستان کی جھنڈیاں سجا کر ناچتے نطر آئے، تعلیمی اداروں میں لسانی جھگڑوں میں بھی سب سے آگے ہوتے ہیں، کیا یہ بھی پاکستان کا قصور ہے؟ کبھی انڈیا میں پیچھے رہ جانے والے مسلمانوں کی حالت زار پر غور کیا ہے؟ سفر کرتے ہوئے آنکھیں بند کر لیں اور جس علاقے سے بدبو آنا شروع ہو جائے سمجھ لیں کہ مسلمانوں کا علاقہ شروع ہوگیا ہے۔ کیا پاکستان میں بھی ایسا ہی ہے؟ کیا کسی نے سچر کمیٹی کی رپورٹ پڑھنے کی کوشش کی ہے وقت نکال کر؟

آج تک پنجابی، سندھی، بلوچی، مہاجر اور پٹھان بن کر تو سوچتے رہے تو آئیے آج ایک لمحے کے لیے پاکستانی بن کر سوچتے ہیں کہ آخر پاکستان کا کیا قصور ہے؟ ہم پاکستان سے کیوں ناراض ہیں؟ آئیے ایک دفعہ پاکستانی بن کر سوچتے اور عمل کرتے ہیں.

’’جی بیٹا! تو کہاں سے تعلق ہے آپ لوگوں کا؟‘‘
احمد صاحب نے بڑی شفقت سے پوچھا تھا۔
’’جی یہیں کراچی سے، میں سندھی ہوں۔‘‘
’’سندھی.‘‘
احمد صاحب نے بری طرح چونک کر مجھے دیکھا اور میں بھی ہکا بکا علی کو دیکھنے لگا۔
’’یہ کیا مذاق ہے علی؟‘‘
میں نے کسی قدر غصے میں مگر دھیرے سے کہا۔
’’نہیں میں سچ کہہ رہا ہوں فیصل بھائی !میں سندھی ہی ہوں بلکہ اول مسلمان ہوں، پھر پاکستانی، پھر سندھی!‘‘
’’مسلمان اور پاکستانی تو ٹھیک ہے مگر تو سندھی کب سے ہوگیا؟ کیوں میری بات خراب کر رہا ہے، اگر شادی نہیں کرنی تھی تو یہاں تک آنے کی ضرورت کیا تھی.‘‘
میں نے غصے سے دانت چباتے ہوئے کہا تھا۔
احمد صاحب جو اچانک سنجیدہ نظر آنے لگے تھے، کہہ اٹھے:
’’بہت معذرت بیٹا! بےشک سندھی ہمارے مسلمان بھائی ہیں مگر ہماری بٹیا کو تو ایک لفظ سندھی کا نہیں آتا، پھر رسوم و رواج اور ثقافت کے بھی ہزار مسائل ہو جاتے ہیں، آپ لوگوں کو ہی تکلیف ہوگی۔ ویسے اس میں کوئی مضائقہ نہیں کہ ہماری بٹیا کے لیے کسی بھی مسلمان کا رشتہ آئے، مگر ہم فیصل میاں سے پہلے ہی اس بابت صاف کہہ چکے تھے، آپ برا نہیں منانا مگر…‘‘
انہوں نے رک کر مجھے شکایتی انداز میں دیکھا، مجھے علی پر شدیدغصہ آنے لگا۔
’’مم مگر انکل! بات یہ ہے کہ تھوڑی بہت سندھی مجھے آتی تو ہے، مگر میں سندھی نہیں، اوہ مم میرا مطلب ہے کہ میں سندھی تو ضرور ہوں، کچھ سندھی بول بھی لیتا ہوں، مگر وہ سندھی نہیں ہوں!‘‘
علی نے لڑکھڑاتی ہوئی زبان سے کہا تو مجھے اس کی ذہنی حالت پر شک ہونے لگا۔ ادھر احمد صاحب چہرے پر شدید حیرت کے آثار لیے علی کو اور مجھے دیکھ رہے تھے۔ مجھ سے اور برداشت نہ ہوا اور اٹھ کھڑا ہوا۔ میں نے احمد صاحب کو سلام کیا، معذرت چاہی اور تیزی سے علی کا ہاتھ پکڑ کر بیٹھک سے باہر نکل آیا۔
باہر آتے ہی اس نے میرے خطرناک ارادے بھانپ کر جلدی سے کہا:
’’ایک منٹ فیصل بھائی جان! آپ لوگ میری بات سمجھ نہیں ر ہے. وہ فلاں دانشور نے فیس بک پر فلسفہ بگھارا تھا کہ آپ سندھ میں پیدا ہوئے ہوتو سندھی ہو، اردو اسپیکنگ یا مہاجر کا ٹائٹل نہ لگاؤ، اپنے آپ کو سندھی کہلواؤ. میں تو اس لیے بولا۔‘‘
’’کیا؟؟ حمق! تو نے ان دانشوروں کی باسی دانش کی وجہ سے مجھے اتنے اچھے پڑوسی کے سامنے شرمندہ کر دیا. ابے ادھر آ. ‘‘ میں اسے اگلی گلی میں لے آیا۔
سامنے میرے بہت پیارے پڑوسی دوست محسن بھائی کھڑے ہوئے تھے. ’’ اب سن‘‘
میں علی کو ان کے پاس لے گیا۔
’’محسن بھائی! مجھے معلوم ہوا ہے کہ آپ سندھی ہو؟‘‘
’’ہائیں…‘‘ وہ حیرت سے مجھے دیکھنے لگے۔
’’کک کیا کہہ رہے ہو فیصل بھائی! جیسے ہمیں جانتے ہی نہیں، کوئی بیس سال سے آپ کا پڑوس ہے، اب ہم سندھی ہو گئے سائیں، واہ چھا تو کرے میرا میڈا سائیں‘‘
محسن بھائی نے مزاحیہ انداز میں سندھی بولنے کی کوشش کرتے ہوئے جواب دیا۔
’’پھر آپ کون ہو؟‘‘
’’کیا ہوگیا بھائی؟ ہم پنجابی ہیں، پیچھے سے فیصل آباد ی ہیں. کیا آپ ہمارے ساتھ رائیونڈ اجتماع کے بعد ہمارے گاؤں گئے نہیں تھے کیا؟‘‘
اب ان کے چہرے پر الجھن کے آثار نمودار ہو چلے تھے۔
’’بس ٹھیک ہے.‘‘ میں مسکرایا اور انہیں الجھتا چھوڑ کر علی کا ہاتھ تھامے کونے میں بنے کوئٹہ وال چائے ہوٹل پر چلا گیا۔
’’ہاں عبدالرحمن! میں نے سنا ہے تم سندھی ہو؟‘‘
میں نے چائے بناتے کھلنڈرے سے عبدالرحمن سے پوچھا۔
عبدالرحمن نے حیرت سے مجھے دیکھا، پھر گویا مذاق سمجھتے ہوئے بولا:
’’زڑ خہ منہ کن خرژیش …مچ مچ ٹشن دا ڈغہ … زہ تا سرا مینا کوم پیسل بھائی!‘‘
وہ مخصوص کوئٹہ کے لہجے میں پشتو کے پھول نچھاور کرنے لگا۔
’’آداب آداب میرے چھوٹے خان… میری طرف سے بھی زہ تا سرا مینا کوم…‘‘
میں نے مسکرا کر جواب دیا اور آگے بڑھ گیا۔
قصہ مختصر سرائیکی خالد اعظم نے سرائیکی ہی کہا. ہزارے وال طاہر عابد نے ہزارے وال کی نسبت ہی بتلائی. اور ادھر علی کا چہرہ برابر رنگ بدل رہا تھا۔
’’دیکھا تو نے یہ سب ہمارے بھائی یہیں پیدا ہوئے، یہ سب سندھی نہیں ہوئے تو کمینے تو کہاں سے سندھی ہو گیا؟‘‘
’’بے شک ہم سندھ میں رہتے ہیں مگر ہمارے جو مہان دانشور دو چار دنوں سے گاہے یہ فلاسفی جھاڑ رہے ہیں ناں کہ سندھ میں رہتے ہو تو سندھی کہلاؤ، تو بیٹا یہ صرف تمہارے میرے لیے لارے لپے ہیں. ان سے پوچھو، باقی ہمارے دوسری زبان سے نسبت رکھنے والے بھائیوں کے لیے بھی یہی لالی پاپ ہے یا نہیں؟! بیٹا یہاں کی بات تو چھوڑو، خود پنجاب میں رہنے والے سرائیکی بیلٹ کے ساتھی خود کو پنجابی نہیں کہتے. ہزارے وال خود کو پنجابی نہیں کہتے.
ارے پیارے یہ لفظ مہاجر اب صرف پہچان کے لیے بولا جاتا ہے نہ کہ لغوی واصطلاحی طور پر کہ آگے سے یہ جاہلانہ سوال پوچھا جائے کہ اچھا بتاؤ تم نے کب ہجرت کی؟ پھر چلولفظ مہاجر کو چھوڑو، اگر اس سے تکلیف ہوتی ہے تو’اردو اسپیکنگ‘کی اردو انگریزی مخلوط معصوم سی ترکیب سے کیا مسئلہ ہے جسے اب قبول خاص و عام حاصل ہو گیا ہے، مگر دانشور اس پر بھی چیں بجیں ہیں، کس وجہ سے؟ صرف متحدہ جیسی فسطائی دہشت گرد تنظیم کی وجہ سے، جبکہ حقیقت یہ ہے کہ خود متحدہ برسوں قبل لفظ مہاجر سے جان چھڑا چکی، جس کے نتیجے میں ایم کیو ایم حقیقی وجود میں آئی!
ڈئیر! قبیلے، علاقے اور زبان پہچان کے لیے ہوتے ہیں اور شادی بیاہ اور ہزار معاملات میں لوگ علاقہ یا زبان کے بارے میں عام سوال پوچھتے ہی ہیں. یہ کہاں کا انصاف ہے کہ آپ تو اپنی لسانی پہچان امریکا جا کر بھی برقرار رکھو، پنجابی مسلم سوداگران تنظیمیں بناؤ اور ہم اپنے ہی ملک میں اپنی پہچان تلاشتے رہیں.!
کیا یہ بات سراسر اکرام مسلم کے خلاف نہیں کہ ایک مسلمان جس بات کو پوچھنا چاہ رہا ہے، آپ اس کو سمجھنے کے باوجود اپنے فیس بکی دانشوروں کی ہدایت پر مسلمان ہوں، پاکستانی ہوں، سندھی ہوں کی تکرار کرتے رہیں، اور نتیجے میں کنوارے ہی رہ جائیں!
٭٭٭
اس کہانی میں بات بہت وضاحت سے آ گئی. مزید کنفیوژن دور کرنے کے لیے بات کو اس طرح سمجھیے:
دیکھیں اپنی پہچان اور تعارف کے لیے مختلف دائرے ہوتے ہیں. ہر دائرہ پہلے سے چھوٹا ہوتا چلا جاتا ہے۔
٭پہلا دائرہ:
آپ کسی غیر مسلم کے مقابل اپنی پہچان مسلمان کہہ کر کرواتے ہیں. بس یہی پہچان و تعارف کا سب سے بڑا اور بنیادی دائرہ ہے اور یہی دائرہ دنیا آخرت دونوں کو وسیع ہے. اسی دائرے کا حق ہے کہ اسے اللہ کے شکر کے ساتھ بیان کیا جائے!
٭دوسرا دائرہ:
آپ پاکستان سے باہر ہیں تو آپ دوسرے ملک والوں کے سامنے اپنی وطنیت کی پہچان کروائیں گے، یعنی پاکستانی! یہ دوسرا دائرہ ہے جس میں دوسرے ملکوں سے تعلق رکھنے والے مسلمان گویا مائنس ہو گئے!
٭تیسرا دائرہ:
آپ پاکستان میں ہیں تو آپ اپنے شہر کے توسط سے اپنی پہچان کرواتے ہیں یعنی لاہوری، کراچی والے، ملتانی، کوئٹہ وال، پشاوری وغیرہ، آپ چاہے کوئی بھی زبان بولتے ہوں، اپنے شہر کی خوبیاں، اپنے شہر کی تعریف، اپنے شہر پر فخر اور کبھی کبھار اپنے شہر کی وجہ سے تعصب بھی اپنائیں گے، یہ بھول کر کہ آپ پختون ہیں، پنجابی بولتے ہیں یا اردو! یہ ہے پہچان و تعارف کا تیسرا دائرہ اس میں پاکستان کے دوسرے شہر والے گویا مائنس ہو جاتے ہیں۔
٭چوتھا دائرہ:
یہاں آ کر ایک عجیب بات مگر یہ سامنے آتی ہے کہ پاکستان میں صوبائی پہچان کرانے کا رواج بالکل بھی نہ چل سکا، پاکستان کے اندر اول شہر کی پہچان ہے، اس کے بعد براہ راست زبان کی پہچان ہے!
پنجابی بولنے والے پنجابی اسپیکنگ، سرائیکی بولنے والے سرائیکی اسپیکنگ، سندھی بولنے والے سندھی اسپیکنگ، ہزارہ وال ہزارہ کی زبان بولتے ہیں، پشتو بولنے والے پختون اور اردو بولنے والے اردو اسپیکنگ!
٭ یہ ہے پہچان اور تعارف کا چوتھا دائرہ اس میں دوسری زبان والے مائنس ہو گئے۔
اس سے چھوٹے بھی کئی دائرے ہیں، ذات یا علاقائی وغیرہ کے، جیسے پنجابی بھائیوں میں جٹ اور کھوکھر وغیرہ اور اردو بولنے والوں میں بہاری، دہلی والے، الہ آبادی، حیدرآبادی وغیرہ کے، لیکن انہیں چھوڑیے۔
مندرجہ بالا چار دائرے کسی قسم کے تعصب کے بغیر بیان کیے جاتے ہیں اور ان میں کوئی مضائقہ نہیں۔ ان دائروں کو کوئی جھٹلا نہیں سکتا۔ یہ حقیقت ہے۔ اس کے خلاف کوئی ’نکتہ شناس‘ زبردستی یہ کہے کہ جس صوبے میں رہتے ہو، اس سے اپنی پہچان کروائو تو یہ زمینی حقائق کے بالکل خلاف بات ہے۔
جب ہمارے دفتر کے سرائیکی بھائی جو کراچی میں ہی پیدا ہوئے، اپنی پہچان سرائیکی کہہ کر کراتے ہیں تو ہم بھلا کیوں سندھی کی پہچان کروائیں؟!
٭٭٭

کیا اب بھی وقت نہیں آیا کہ بانیان پاکستان کی اولاد کہلانے والے خود سے سوال کریں، اپنے گریبان میں جھانکیں اور سوچیں کہ انہوں نے قائد کے لیے کیا کیا نہ کیا۔۔۔ قائد نے کہا کہ ٹیلی ویژن ریفریجریٹر بیچ کر کلاشنکوفیں خریدو۔۔۔ اردو بولنے والے نوجوانوں نے بستے اتار کر کلاشن کوفیں اُٹھالیں۔

قائد نے کہا کہ پٹھان، پنجابی، سندھی دشمن ہیں تو شہر لسانی طور پر تقسیم ہوگیا۔ لالو کھیت لیاقت آباد میں رکشہ ٹیکسی والوں نے جانا چھوڑ دیا۔ سندھی ٹوپی پہننے والا غلطی سے چلا جاتا تو ’’بھائی‘‘ کے چاہنے والے ’’غلطی‘‘ نہ کرتے۔

قائد کو پیر ہونے کا شوق ہوا تو ’’پیر صاحب‘‘ کی تصویریں کروٹن کے پتوں پر نمودار ہونے لگیں۔ لوگ قطاریں باندھ کر زیارت کے لیے آنے لگے۔ مسجد کے سنگ مرمر پر بھائی کی شبیہہ کا شبہ ہوا تو مرید پورا سلیب ہی اکھاڑ کر لے گئے۔

قائد کی سالگرہ ہوئی تو کئی منزلہ کیک کاٹنے کے لیے ہاتھ میں سونے کی تلوار دی گئی۔
قائد جو جو کہتے رہے، ’’قوم‘‘ وہ وہ کرتی رہی۔ مولانامحمد علی جوہر، شبلی، نعمانی، حسرت موہانی، نواب وقار الملک کی قوم میں کن کٹے، دادے، لولے لنگڑے اور پنواڑی ہونے لگے۔

پھر قتل وغارت گری شروع ہوئی۔ قانون نافذ کرنے والے ادارے حرکت میں آئے۔ قائد نے بھی حرکت کی اور برطانیہ پہنچ گئے۔ قوم نے اسے جلا وطنی کہہ کر نعرہ لگایا:
’’وہ دور ہے تو کیا ہوا دلوں میں ہے بسا ہوا‘‘

قوم یہاں آپریشن بھگتتی رہی اور قائد وہاں لند ن میں دنیا کے مہنگے ترین علاقوں میں مزے سے قوم کا دکھ ’’محسوس‘‘ کرتے رہے۔

پھر قائد نے برطانیہ کی شہریت لی۔ ملکہ برطانیہ سے وفاداری کا وہاں حلف اٹھایا۔ حلف یافتہ کارکنوں نے جشن یہاں منایا۔

قائد نے ایک قدم آگے بڑھایا۔ سندھ تقسیم کرنے کی بات کی۔ کارکنوں نے بھی کہا:
سندھ میں ہوگا کیسے گزارا۔۔۔ آدھا تمہارا آدھا ہمارا

پھر بات بڑھی اور بائیس اگست کی سہ پہر قائد کی نظر میں پاکستان ناسور اور عذاب ہوگیا۔

میرے خیال میں اب بانیان پاکستان کی اولادوں کو سوچنا ہوگا کہ اس اسکرپٹ کے سامنے فل اسٹاپ لگا دینا چاہیے، لیکن ایسا جذباتی ہوکر نہ کیا جائے، سوچا جائے، سمجھا جائے۔ 80ء کی دہائی میں مہاجر تحریک کن اسباب پر اٹھی تھی؟

محصورین وطن کی واپسی
سندھ میں کوٹا سسٹم کا خاتمہ
حکمرانی کا حق
لسانی شناخت

اب یہ سوال کس سے پوچھا جائے کہ محصورین کی واپسی کے لیے قائد نے کیا کیا؟ بنگلہ دیش کے مہاجر کیمپوں میں جانوروں سے بدتر زندگی گزارنے والے محصورین پاکستان کہاں ہیں؟ ایم کیو ایم چار دہائیوں سے وفاقی اور سندھ حکومت کا حصہ رہی ہے، پیپلز پارٹی سے لے کرمسلم لیگ نون تک ،جو جماعت بھی اقتدار میں آئی، ایم کیو ایم اس کی گود میں آبیٹھی۔ اہم وزارتیں،اہم مناصب ان کے پا س رہے، بس محصورین پاکستان پاس نہ رہے۔

سندھ میں دیہی اور شہری سندھ کو تقسیم کرنے والا کوٹا سسٹم آج بھی اسی شکل میں موجود ہے، ایم کیو ایم نے اسے ختم کیوں نہ کیا؟

آج سوچا جائے کہ حکمرانی میں حصہ ملنے کے بعد مہاجر وں کو کیا ملا؟ بار بار تصادم کی راہ پر مہاجروں کو کس نے ڈالا اور مشکل وقت میں قائد صرف زبانی جمع خرچ کے کیا کرسکے؟

خود سے پوچھا جائے کہ لسانی شناخت نے مہاجروں کو کیا دیا؟ ملک کا سب سے پڑھا لکھا مہذب سمجھا جانے والے لوگ اب کیا سمجھے اور کیا کہے جاتے ہیں؟ اُردو داں طبقے کو پہلے کس نظر سے دیکھا جاتا تھا اور اب مہاجروں کو کس نظر سے دیکھاجاتا ہے؟ پہلے اُردو بولنے والوں کی شناخت شستہ لہجہ، تہذیب، شائستگی، رکھ کھاؤ ہوا کرتی تھی، اب وہ شناخت کہاں گئی؟ مہاجروں نے چار دہائیوں کی لسانی سیاست میں کیا پایا اور کیا کھویا؟ قائد تو اپنا الو سیدھا کرکے لندن سدھار گئے، قوم یہاں راستوں کی پیچیدگیوں میں بھٹک گئی اور جانے کب تک بھٹکتی رہے گی.

الطاف حسین نے نفرت پر مبنی جس سیاست کا آغاز 1978ء میں پاکستان کا پرچم جلانے سے کیا تھا، 38 سال بعد 2016ء میں پاکستان کے خلاف نعرے لگا کر اس کو منطقی انجام تک بھی خود ہی لے آئے۔ اے پی ایم ایس او سے کے قیام سے شروع ہونے والی یہ تلخ کہانی جس میں مہاجر قومی موومنٹ اور متحدہ قومی موومنٹ کی صورت میں کئی پیچ و خم آئے، اب ایم کیو ایم پاکستان اور ایم کیو ایم انگلستان کے دھڑوں کی صورت میں اس کا ڈراپ سین ہو رہا ہے۔

نفرت کے شجر کی تشدد سے آبیاری کی گئی تو ایم کیوایم پروان چڑھی جس میں ظلم کے کسیلے پھل نمودار ہوئے۔ یہ سب کچھ کیسے اور کیوں کر ہوا؟ اس کے لیےایم کیو ایم کی سیاست کا تجزیہ بھی ضروری ہے، الطاف حسین کی شخصیت کا جائزہ بھی ناگزیر ہے، مہاجر قوم کی نفسیات کا ادراک بھی لازم ہے، اور حکمرانوں اور اسٹیبلشمنٹ کے رویے کو پرکھنا بھی اہم ہے۔

قوموں کی نفسیات ہوتی ہیں اور مہاجر قوم کی بھی نفسیات تھیں جس میں علم دوستی، نفاست، نستعلیق گفتگو، چوڑی دار پاجامہ، حب الوطنی نمایاں تھے۔ جنگ و جدل، تشدد، اسلحہ، بوری بند لاش جیسے الفاظ تو کبھی ان کی لغت کا حصہ نہ تھے۔ کیا وجہ ہے کہ الطاف حسین نامی ایک فرد جو نہ تو کرشماتی شخصیت کا مالک تھا، نہ غیرمعمولی خطابت کا حامل تھا، نہ علم و ہنر میں ید طولیٰ تھا اور نہ ہی بادی النظر میں کوئی قائدانہ خوبی ایسی اس میں نظر آتی ہے لیکن اس نے ایک قوم کی نفسیات تک بدل ڈالی۔ اس ایک شخص نے اپنے انتقام اور احساس محرومی کی آگ میں ایک پوری قوم کو جھونک ڈالا۔ مہاجروں کو پاکستان میں صرف شناخت کی ضرورت تھی اور الطاف حسین نے مہاجروں کو مجتمع کر کے یہ شناخت تو ان کو عطا کردی، البتہ اس شناخت کی بہت بھاری قیمت ادا کرنا پڑی۔ ٹارگٹ کلنگ، بوری بند لاش، بھتہ خوری، ٹارچر سیل، فیصل موٹا اور اجمل پہاڑی کی صورت میں ان کو شناخت تو نصیب ہوئی لیکن بدقسمتی سے یہ ان کی حقیقی شناخت نہ تھی۔ یہ ایک مسخ شدہ شناخت تھی، جیسے کسی خوبصورت لڑکی کے چہرے پر تیزاب انڈیل دیا گیا ہو۔

انتہائی سطحی تجزیہ ہوگا اگر صرف الطاف حسین کو ان تمام حالات کا مورد الزام ٹھہرادیا جائے۔ یہ بات کرتے ہوئے تو سب کے ہی پر جل جلتے ہیں کہ یہاں تک آنے میں اسٹیبلشمنٹ کا کردار بھی کم نہیں رہا۔ ملک کے حقیقی خیر خواہ ہونے کے دعویدار گر تو اتنے بے خبر تھے کہ اتنےطویل عرصے میں اس فتنے کا ادراک ہی نہ کر سکے تو پھر یہ ان کی پیشہ ورانہ صلاحیت پر ایک سوال ہے۔ اور اگر ایم کیو ایم کی ملک دشمن سرگرمیوں کے بارے میں معلوم ہونے کے باوجود وہ ان سانپوں کو دودھ پلاتے رہے کہ کراچی میں کوئی حقیقی اسلام پسند قوت نہ ابھر سکے تو پھر انھیں بری الذمہ کیسے قرار دیا جا سکستا ہے۔ یہ بات یاد رہنی چاہیے کہ 2013ء کے الیکشن میں ایم کیو ایم نے سرعام دھاندلی کی جبکہ مقتدر حلقے کھلی آنکھوں اور بند ضمیر کے ساتھ سب کچھ دیکھتے رہےتھے۔

برسراقتدار جماعتوں مانند مسلم لیگ اور پیپلز پارٹی سے جب ہمیں توقع ہی کوئی نہیں تو پھر ان سے گلہ کیسا۔ اقتدار جن کا مطمع نظر، شکم پرستی جن کا مسلک اور کرسی جن کی منزل ہو، ان سے ملک و قوم کی بہتری اور رہنمائی کی امید لگا کر ہم ان کا تو کچھ نہیں بگاڑیں گے، اپنے آپ کو ہی بیوقوفوں کی فہرست میں شامل کرلیں گے جو کہ پہلے ہی خاصی طویل ہے۔

سچ یہ ہے کہ اذانوں اور نمازوں کے دیس پاکستان کو تا قیامت قائم رہنا ہے۔ اشفاق احمد کہا کرتے تھے کہ پاکستان حضرت صالح ؑ کی اونٹنی کی طرح اللہ کی نشانی ہے، جس نے اس اونٹنی کونقصان پہنچایا، اس پر اللہ کا عذاب نازل ہوا، اور جس نے پاکستان کو نقصان پہنچانے کی کوشش کی، وہ ذلت کا حقدار ٹھہرا۔

قدرت کا قانون ہے کہ ہر عروج کو زوال ہے، ہر ظلم کو خاتمہ ہے، ہر جاندار کو فنا ہے، ہر تشدد کوموت ہے، ہر شب کی سحر ہے لیکن اس کے لیے انصاف کو پروان چڑھانا ہوگا، عصبیت کا خاتمہ کرنا ہوگا، محبت کے نغمے گانے ہوں گے، عدل کو فروغ دینا ہوگا تاکہ پھر کوئی الطاف حسین پیدا نہ ہو اور پھر کوئی نسل برباد نہ ہو۔
خدا کرے کہ مری ارض پا ک پر اترے
وہ فصل گل جسے اندیشہ زوال نہ ہو
خدا کرے کہ مرے اک بھی ہم وطن کے لیے
حیات جرم نہ ہو، زندگی وبال نہ ہو

پاکستان ساری دنیا کے لیے ایک ناسور ہے
پاکستان دنیا کے لیے ایک عذاب ہے
پاکستان ساری دنیا کے لیے دہشت گردی کا ایک سینٹر ہے
اس کا خاتمہ عین عبادت ہوگا
کاہے کو پاکستان زندہ باد
پاکستان مردہ باد، پاکستان مردہ باد
یہ وہ الفاظ ہیں جو کوئی مہاجر کہنا تو درکنار سننا بھی برداشت نہیں کرسکتا لیکن کل رات الطاف حسین نے کارکنوں کے اجتماع میں کہے اور جن کی گونج میڈیا میں مسلسل سنائی دے رہی ہے جبکہ سننے والے مہاجر سن ہو کر رہ گئے ہیں. اس سے پہلے کئی برس پہلے الطاف نے پاکستان دشمن بھارت کی سرزمین پہ کھڑے ہو کر قیام پاکستان کو تاریخ کی عظیم ترین غلطی قرار دیا اور کہا تھا کہ بھارت یہاں سے جانے والے مہاجرین کو واپس قبول کرلے جبکہ خود بھارت میں رہنے والے مسلمانوں پہ عرصہ حیات تنگ ہے اور مشرقی پاکستان سے بھارت جانے والے بنگالی مسلمان آج بھی آسام میں کشتہِ ستم بنے ہوئے ہیں.

پاکستان مہاجروں کا فخر، ان کی پہچان اور ان کا رومانس ہے. پاکستان نے انہیں وہ سب کچھ دیا جو ایک آزاد وطن کا شہری حاصل کر سکتا ہے اور مہاجروں نے بھی پاکستان پہ اپنا تن من دھن واردیا، اپنی بہترین صلاحیتیں اس کی ترقی اور استحکام کے لیے صرف کرتے رہے.

الطاف حسین کی اپنی تقریر سے ثابت ہو گیا کہ وہ غدار ہے، وطن دشمن ہے، را کا پروردہ اور پالتو ہے. اس کی تقاریر وطن دشمنی اور تعصب کا ملغوبہ ہوتی ہیں، وہ پاکستان دشمن طاقتوں کا ہتھیار ہے، وہ آمریت کا شاہکار ہے اور متعدد بار فوج کو اقتدار سنبھالنے کی ترغیب دے چکا ہے اور اس کا یہ رویہ دنوں اور مہینوں پہ محیط نہیں بلکہ کئی عشروں کی داستان ہے
تو پھر آخر کیوں
•افواجِ پاکستان کے سابق کمانڈو سربراہ اور ملک کےسابق صدرنے اسے سینے سے لگائے رکھا؟
•ملک گیر سیاسی پارٹی جو ملک پہ گاہے گاہے حکمراں رہی، کیوں اسے شریک اقتدار اور اتحادی بناتی رہی اور رحمٰن ملک اس کی چوکھٹ پہ سجدہ ریز رہا؟
• کیوں خود کو پاکستان کی بانی جماعت کہلوانے والی اور پنجاب کی دعویدار مسلم لیگ کے رہنما مرکز اور صوبوں میں اسے اپنا حلیف اور شریکِ کار بناتے اور اس کے گرد طواف کرتے رہے؟
کیا اقتدار کی خواہش اور دولت کی ہوس ملکی وفا اور سلامتی سے زیادہ نہیں سمجھی گئی؟

اب وہ بات جو ہمارے ٹی وی اینکر اور ان کے تجزیہ کار بقراط اکثر پوچھتے ہیں کہ اگر مہاجر محب وطن ہیں اور بانیانِ پاکستان کی اولاد ہیں تو پھر وہ ایم کیو ایم کو ووٹ کیوں دیتے ہیں؟ پہلی بات تو یہ ہے کہ ایم کیو ایم کے ووٹوں کا تناسب ببشتر جعلی ووٹوں اور پرویز مشرف دور میں ان کی خواہشات پہ مبنی حلقہ بندیوں کے سبب ہے، دوسرے ایم کیو ایم اردو بولنے والوں کی مجبوری ہے اور اس سے شدید اختلافات کے باوجود کوئی نہیں چاہتا کہ وہ فنا ہوجائے اور اس کا کوئی سیاسی کردار نہ رہے. یہاں مہاجروں اور اردو بولنے والوں پہ تعصب اور تنگ نظری کا الزام لگانے والے یہ بھول جاتے ہیں کہ اس ملک میں مہاجر اسٹوڈنٹس آرگنائزیشن سب سے آخری لسانی بنیادوں پہ بننے والی طلبہ تنظیم تھی، اس سے پہلے پختون اسٹوڈنٹ، بلوچ اسٹوڈنٹ، سندھی اسٹوڈنٹ اور پنجابی اسٹوڈنٹ نام کی طلبہ جماعتیں موجود تھیں اور تعلیمی اداروں میں پوری طرح سرگرم تھیں جن پر کسی نے اعتراض نہیں کیا لیکن مہاجر اسٹوڈنٹس آرگنائزیشن کے خلاف اعتراضات کا ایک طوفان کھڑا ہوگیا.

آخر مہاجروں یا اردو بولنے والوں میں یہ جوابی تعصب کیوں اور کب پیدا ہوا؟ اس کے لیے ہمیں ذرا پیچھے جانا پڑے گا. پاکستان بنا تو اس کے قیام کے لیے اقلیتی صوبوں کے مسلمان پیش پیش تھے. مسلم لیگ وہیں سے الیکشن جیتی تھی ورنہ سرحد میں کانگریس، پنجاب میں یونینسٹ اور بلوچستان میں سرداروں کی حکومت تھی. پاکستان کی معاشی بنیادوں کو مستحکم کرنے والے حیدرآباد دکن کے نظام، حبیب بینک، آدم جی، باوانی وغیرہ سب مہاجر تھے. اسی طرح اسے سیاسی اور انتظامی طور پہ اپنے پاؤں پہ کھڑا کرنے والے وہ مہاجر تھے جو اپنا سب کچھ چھوڑ کر اس وطن کی تعمیر کا جذبہ لے کر آئے تھے اور انہوں نے پورے خلوص اور تن دہی سے یہ کام کیا لیکن لیاقت علی کی شہادت کے ساتھ ہی ان کے خلاف حسد اور تعصب پہ مبنی سازشوں کا سلسلہ شروع ہوگیا. ایوب خان نے اسکندر مرزا سے ساز باز کر کے سیاسی حکومت کا دھڑن تختہ کرنے کے بعد جن اعلٰی سول حکام کو ناجائز طور پہ ان کے عہدوں اور ملازمت سے برطرف کیا، وہ نیک نام، باصلاحیت اور خاندانی لوگ تھے جن میں سید ہاشم رضا، اے ٹی نقوی، عباس خلیلی اور فضل احمد کریم فضلی جیسے لوگ شامل تھے. ایوب خان کے پورے دور میں کراچی میں ایک بھی آئی جی، ڈی آئی جی، کمشنر یا ڈپٹی کمشنر کراچی کا مقامی نہیں رہا، انتہا یہ کہ بلدیہ کراچی کا ایڈمنسٹریٹر حبیب اللہ خان تک ایوب خان کا سمدھی مقررہوا. سارے تھانیدار پنجابی یا پٹھان تھے اور ان کا رویّہ انتہائی جارحانہ اور غیر مہذبانہ تھا.

اہلِ کراچی اورسندھ کے مہاجر اکثریتی علاقوں نے ہمیشہ جمہوریت اور پاکستانیت کا ثبوت دیتے ہوئے ملک گیر اور مذہبی رجحانات رکھنے والی جماعتوں کو ووٹ دیا. ایوب خان کے مقابلے میں مادرِ ملت کو کامیاب کرایا لیکن ایوب خان نے جلسہ عام میں انہیں دھمکی دی کہ آپ لوگ اور کہاں جائیں گے. آگے تو سمندر ہے. قائداعظم کے مقرر کردہ دارالحکومت کو تبدیل کر کے اربوں روپے کے اسراف سے اسلام آباد تعمیر کیا گیا. ایوب خان مادر ملت کے مقابلے میں دھاندلی اور دھونس سے جیت گئے تو گوہرایوب اہلِ کراچی کو ایوب مخالفت کی سزا دینے کے لیے اسے مہاجر پٹھان قضیہ بنا کر لاؤ لشکر لے کر کراچی پہ چڑھ دوڑا اور پہلے لسانی فسادات نے جنم لیا.

مشرقی پاکستان کے مسلسل استحصال اور بنگالیوں کے حقوق کی پامالی کے نتیجے میں جب بنگلہ دیش وجود میں آیا تو فوج کے ہتھیار ڈالنے کے باوجود وہاں مہاجروں نے پاکستان کا پرچم بلند کیے رکھا، انہیں بدترین تشدد کا نشانہ بنایا گیا، ان کی جان و مال اور عزّت و آبرو سب کچھ لٹتا رہا لیکن وہ خود کو پاکستانی کہتے رہے اور یہاں جب بھٹو نے اقتدار سنبھالنے کے بعد پہلی بار ریڈیو اور ٹی وی سے خطاب کیا تو انہوں نے میرے ہموطنو یا پاکستانیو نہیں بلکہ پنجابیو، پٹھانو، سندھیو، بلوچیو کہہ کر مخاطب کیا تو مہاجروں نے حیرانگی سے سوچا کہ ہماری شناخت کیا ہے. بنگلہ دیش میں وہ لٹ رہے تھے، کٹ رہے تھے، ان کی بہنیں اور بیٹیاں پاکستانیت کے جرم میں پامال ہو رہی تھیں، اور یہاں بہاری نہ کھپن کے نعرے لگتے رہے. اس میں نصرت بھٹّو سے لے کر پیپلز پارٹی کےعام کارکن تک یک زبان تھے.

پھر یہاں دولسانی بل پیش کرکے سندھی مہاجر فساد کی آگ بھڑکا کر اندرون سندھ سے مہاجروں کو نقل مکانی پر مجبور کیا گیا. غیر منصفانہ شہری اور دیہی کوٹہ سسٹم پندرہ سال کے لیے نافذ کیا گیا لیکن وہ آج تک قائم و دائم ہے. ملازمتوں کے دروازے پہ ان پہ بند کر دیے گئے. ان کے بنک، انشورنس کمپنیاں اور اسکول قومیانے کے نام پہ ہتھیا کر روزگار کے دروازے بند کردیے گئے. عدالتوں میں من پسند افراد کو کس طرح کھپایا گیا اس کی ایک مثال سندھ ہائیکورٹ کے سینئر ترین جج جسٹس نور العارفین کے استعفے سے اندازہ ہوسکتا ہے. ان حالات میں وہ جن ملک گیر جماعتوں کی حمایت کرتے تھے، وہ ان کے حقوق کی آواز اٹھانے سے قاصر تھیں کیوں کہ اس سے اندرون سندھ اور ملک کے دوسرے حصوں میں ان کی سیاسی حیثیت مجروح ہوتی اور ان پہ مہاجر پرستی یا تعصب کا الزام لگتا.

جنرل ضیاءالحق کو اس لاوے کے کھولنے اور آتش فشاں کے پھٹ پڑنے کا اندازہ تھا. اس زمانے کے ہفت روزہ تکبیر کے شمارے گواہ ہیں کہ اس کے مدیر سید صلاح الدین نے اس خطرے کا ادراک کرتے ہوئے تواتر سے مضامین لکھے. ضیاءالحق نے جماعت اسلامی اور جمیعت علمائے پاکستان کی جانب سے اپنی مخالفت کی وجہ سے سندھ کے شہری علاقوں پہ ان کی گرفت اور حمایت ختم کرنے کے لیے مہاجروں کی بے چینی اور عدم تحفظ کے احساس سے فائدہ اٹھاتے ہوئے سید غوث علیشاہ کے ذریعے ایم کیو ایم کی داغ بیل ڈالی. ان حالات میں جبکہ سندھ اسمبلی میں اندرون سندھ سے منتخب اراکین کھلم کھلّا یہ کہتے رہے کہ مہاجر وزیراعلٰی نہیں ہوسکتا، بلدیاتی اداروں کے اختیارات چھین لیے گئے، کراچی کے وسائل اور زمینوں کو وڈیروں نے اپنی داشتہ اور مفتوحہ اور باجگزار بنا رکھا ہے، ایم کیو ایم کی تمام تر غلط کاریوں، پہاڑ جیسی سیاسی غلطیوں اور چیرہ دستیوں کے باوجود کوئی نعم البدل نہیں ورنہ آپ ایک دوکاندار سے لے کر رکشہ ڈرائیور تک سے بات کریں تو وہ ایم کیو ایم کا شاکی ملے گا. ایم کیو ایم کے فسطائی نظام اور ہر بار اقتدار میں اس کی شرکت نے خوف کی ایسی فضا قائم کر رکھی ہے کہ اس کے ہر کارکن اور لیڈر کو اپنے سر پر قضا کی تلوار لٹکتی نظر آتی ہے. جس طرح اس کے خلاف آپریشن میں شریک ایک ایک پولس افسر کو چن چن کر قتل کیا گیا وہ سامنے کی بات ہے.

اردو بولنے والے ملک کے باصلاحیت تعلیم یافتہ اور محب وطن شہری ہیں لیکن ان کے حقوق اور عزّت نفس کی پامالی کا ازالہ اور ان کے زخموں کا اندمال نہ کیا گیا تو کوئی بھی آپریشن اس زہرناکی کا مکمل سدِّباب نہیں کر سکے گا.

میں ایک افغانی ہوں، میرا خاندان 37 سال سے پاکستان میں مہاجر ہے۔ میں یہاں پیدا ہوا، یہیں پلا بڑھا، یہی تعلیم حاصل کی، ابھی پشاور میں پروفیشنل اکاؤنٹینسی کی ڈگری کی ہے ، اور اب میں اس ملک کو الواداع کہہ رہا ہوں۔

مجھے پاکستان سے محبت ہے۔ یہاں میری زندگی گزری۔ میرا کرکٹ ہیرو شاہد آفریدی ہے۔ میرے دوستوں نے شاہد آفریدی کو ہنسی مذاق میں برا بھلا کہنا میری چھیڑ بنا رکھی ہے، کیونکہ میں فوراً ان سےلڑنا شروع کر دیتا ہوں۔ یہاں پولیس کبھی کبھار ہمیں تنگ کرتی تھی لیکن عوام نے کبھی ہمیں برا نہیں کہا، تنگ نہیں کیا۔ اکا دکا لوگ ہم پر جملے کستے تھے، لیکن ایسا تو بلوچ پنجابیوں کو، پنجابی پٹھانوں اور باقی ایک دوسرے کو بھی کہتے ہیں۔ مجموعی طور پر لوگوں نے ہم سے بہت اچھا سلوک کیا اور ہم ان کے تہہ دل سے احسان مند ہیں۔

ابھی کچھ عرصے سے بعض لوگوں نے ہمیں برا کہنا شروع کیا ہے۔ کہتے ہیں کہ تم لوگ نمک حرام ہو، تم نے ہمارے دشمن انڈیا سے دوستی کر رکھی ہے۔ تم لوگ پاکستان سے نفرت کرتے ہو، تم نے پاکستان کا جھنڈا جلایا، تم نے ہمارا میجر شہید کیا۔ اور میں جب یہ سنتا ہوں تو اس سطحی سوچ پر ہنسی بھی آتی ہے اور افسوس بھی ہوتا ہے کہ ایک مسلمان کو دوسرے مسمان کے خلاف ورغلانا کتنا آسان ہے.

اولا تو میں’’تم اور میں‘‘ کی بات سے ہی متفق نہیں۔ میں اور تم کیا ہوتے ہیں؟ میں تم ہوں اور تم میں ہو۔ یہ میرے رب نے کیا ہے کہ ہم میں سے کوئی بھی چاہے تو ہمیں ایک دوسرے سے الگ نہیں کر سکتا۔ پھر ہمارا تو خون کا رشتہ ہے۔ آدھے پاکستانیوں کی نسل افغانستان سے ہے۔ تمہارے ہیرو غوری، ابدالی اور غزنوی ہیں۔ یہی ہمارے بھی ہیرو ہیں۔ ایک انگریز مسٹر مونٹیمر ڈیورنڈ کیسے ہمارا رشتہ توڑ سکتا ہے۔ ہم بےشک ایک دوسرے سے ناراض ہو جائیں، برا بھلا کہیں، لیکن ہمیں کوئی جدا نہیں کر سکتا۔ ہمیں طعنے دینے والے بھی نہیں!!

ان طعنوں کو سمجھنے کیلئے ’’آپ اور میں‘‘ کی چند باتیں کر لیتے ہیں۔ آپ ہمیں کہتے ہیں کہ ہم آپ کے دشمن انڈیا سے دوستی کر رہے ہیں۔ آپ یہ کیوں بھول رہے ہیں کہ ہمارے ملک کا حاکم جان کیری ہے اور اس کے دو وزیر اشرف غنی اور عبداللہ عبداللہ ہیں۔ یہ دونوں امریکہ کے ویسے ہی پٹھو ہیں جیسے کہ آپ اپنے حکمرانوں کے بارے میں کہتے ہیں۔ انڈیا سے دوستی کا پلان امریکہ کا ترتیب دیا ہوا ہے جیسا کہ آپ کی حکومت بھی اسی پلان کے تحت مذاکرات کی بات کرتی ہے اور آپ کے ادارے امن کی آشائیں چلاتے ہیں۔ یہ امریکی منصوبہ ہے۔ ہمارے لوگ تو جنگوں کے مارے ہوئے ہیں، انھیں کوئی سہولت دیتا ہے تو قبول کر لیتے ہیں۔ انڈیا سے کسی افغان کو پیار نہیں ہے۔ بھلا ان گائے کا پیشاب پینے والوں سے کیوں پیار کریں گے جو مسلمانوں کے قاتل ہیں، اور جن سے صدیوں پہلے ہماری لڑائی رہی ہے، جن پر ہم نے حکومت کی ہے۔ یہ ہندو 2001ء، 2002ء میں افغانستان آئے تھے، آج دیکھ لیں کہ آنے والوں میں سے کتنے باقی رہ گئے ہیں۔ ہم مسلمان ہیں اور ہمارا ان کے ساتھ کوئی گزارہ نہیں۔ لیکن کوئی ہمیں بھی تو یہ بتائے کہ آپ نے ہمارے دشمن سے کیوں دوستی اور اتحاد کیا۔ اسے ہم پر حملہ کرنے کا راستہ دیا، تیل سپلائی کیا، اڈے دیے جس کے ذریعے اس نے ہمارے ملک پر ہزاروں ٹن بارود برسایا، ہمارے بچوں، بوڑھوں اور مردوں کو قتل کیا اور نسلیں تک معذور ہو گئیں۔ آخر کوئی ہمیں نمک حرامی کا طعنہ کیسے دے سکتا ہے؟

آپ ایک میجر کو روتے ہیں، ہمارے تو 3 کروڑ لوگ اس جنگ سے لہو لہو رس رہے ہیں۔ آپ کا ٹی وی آپ کو ایک میجر اور اس کا خاندان دکھاتا ہے، اور ہمارا ٹی وی ہمیں پاکستانی سرحد سے آنے والا راکٹ اور توپ کا گولہ دکھاتا ہے جس سے درجنوں شہری اپنی زندگی سے ہاتھ دھوتے ہیں، اور جب ہمارے سادہ لوگ اس کے خلاف مظاہرہ کر کے پاکستانی جھنڈے کی بےحرمتی کرتے ہیں تو آپ کے انٹرنیٹ کے صفحات وہ لاشیں نہیں دکھاتے بلکہ جھنڈے کی بےحرمتی دکھاتے ہیں جبکہ ہمارے ٹی وی ہمیں پاکستانیوں کا مہاجروں سے سلوک دکھاتے ہیں۔ ایک منصوبے سے یہ نفرت بڑھائی جاتی ہے۔ وہی بات کہ کتنا آسان ہے ہم مسلمانوں کو ورغلانا.

آج میں اس وطن سے جا رہا ہوں ، دل میں ایک کسک سی ہے۔ اپنے مسلمانوں کی سادگی کا افسوس بھی ہے۔ اس بات کا افسوس ہے کہ ہمیں ہمارے مقبوضہ ملک بھیجا جا رہا ہے، جبکہ اللہ نے صلاحیت والے لوگوں پر یہ فرض کیا ہے کہ اگر ایک قوم اپنے آپ کو قبضے سے نہ چھڑا سکے تو اس کی مدد کرنا ان پر فرض ہے۔ مجھے ان پاکستانیوں سے کوئی گلہ نہیں، جنہوں نے مجھ سے زیادتی کی، اور میں ان افغانیوں کے عمل سے بری ہوں جنہوں نے پاکستانیوں سے بدسلوکی کی۔ میرا وطن آپ کا ہے اور آپ کا وطن میرا ہے۔ کوئی ہم سے حق نہیں چھین سکتا، ہمیں ایک دوسرے سے دور نہیں کر سکتا. ہم سب ایک ہیں، ایک رہیں گے. ہمیں ان حکمرانوں اور اس استعماری ڈھانچوں سے نجات ملے گی. ان شاء اللہ