Tag: مقبوضہ کشمیر

تمام افراد‘ تمام اقوام‘ سبھی کوقدرت مواقع مہیا کرتی ہے‘ مگر اپنے قوانین کبھی کسی کے لیے تبدیل نہیں کرتی۔ حسنِ خیال‘ حسنِ عمل کی ابتدا ہے اور حسنِ عمل کے تسلسل سے وہ معجزے رونما ہوتے ہیں چین‘ ملائیشیا اور ترکی میں جن کا ہم نے نظارہ کیا۔
بار بار انکشاف ہوتا ہے کہ ہماری سیاسی پارٹیاں کس قدر تنگ دائرے میں سوچتی ہیں۔ بار بار کھلتا ہے کہ نام نہاد سول سوسائٹی کس قدر مردہ ہے اور غیر ملکیوں نے کتنا رسوخ اس میں پیدا کر لیا ہے۔

دو بڑے واقعات ہوئے ہیں‘ جن سے مشکلات میں گھرے پاکستان کے لیے نہایت ہی شاندار مواقع نے جنم لیا۔ ان مواقع کو ضائع کیا جا رہا ہے۔ انفرادی اور اجتماعی زندگی اس کے سوا کیا ہے کہ قدرت امکانات تخلیق کرتی ہے‘ بیدار لوگ ان سے استفادہ کرتے ہیں۔
مون سون کی بارشیں زمین کو نم کرتی ہیں تو جاگتا کسان ہل چلا دیتا ہے۔ دُھوپ میں بخارات بن کر اُڑ جانے کی بجائے‘ یہ نمی محفوظ ہو جاتی ہے۔ ماہِ نومبر طلوع ہوتا ہے تو نیلے آسمان کی وسعت پہ نگاہ کرتے ہوئے‘ گندم کے دانے‘ وہ اس میں بکھیر دیتا ہے‘ حتیٰ کہ دسمبر کی کسی نرم سویر اکھوے پھوٹ پڑتے ہیں۔ جنوری کے وسط تک سندھ کے ساحل سے پختون خوا کی بلندیوں تک دھرتی سبز پیراہن اوڑھ لیتی ہے۔ کہیں کہیں‘ جس میں سرسوں کے زمردیں قطعات مسکراتے ہیں۔ زمین نے گویازیورپہن لیے ہوں۔ بہار کی نرم ہوا گیہوں کی بالیوں کو جھولا جھلاتی ہے اور آغاز گرما میں سونے کے ڈھیر دکھائی دیتے ہیں۔

وادیٔ کشمیر میں مدتوں سے جیسے خزاں کا راج تھا۔ برہان وانی کی شہادت سے خوابیدہ بستیاں جاگ اٹھیں۔ قابض بھارتی فوج کا آہنی حصار ٹوٹنے لگا۔ افغانستان کی خانہ جنگی اور حکمرانوں کی بے حسی سے فائدہ اٹھا کر برہمن سامراج بلوچستان اور قبائلی پٹی میں اپنے مہرے آگے بڑھا رہا تھا۔ دہشت گردوں کا پشت پناہ ہو گیا۔ آگ اور خون کا کھیل کھیلنے لگا۔ دشمن کے عزائم کا ادراک کرنے کی بجائے حکمران دوستی کا راگ الاپتے رہے۔ انتہا یہ ہے کہ برسر اقتدار خاندان کی شوگر مل میں 56 بھارتی ملازمین کی موجودگی کا انکشاف ہوا۔ 56 ہیں یا 26۔ انٹیلی جنس ایجنسیوں کو ان کے کوائف بتائے گئے یا نہیں۔ بجائے خود یہ کس قدر حیرت انگیز ہے کہ ملک کے جو امین ہیں‘ وہ تباہی پھیلانے پر تلے حریف کے لیے رسائی کے مواقع ارزاںکریں؟

اندریں حالات، کشمیر میں عوامی طوفان اٹھا اور برصغیر کا ماحول یکسر بدل گیا۔ کل بھوشن یادیو کی گرفتاری سے جو حکومت نہیں جاگی تھی، اسے جاگنا پڑا۔ بہت قیمتی وقت وزیراعظم نے ضائع کردیا تھا کہ عالمی رائے عامہ کو دہلی کے عزائم سے آگاہ کرتے۔ اب یکایک انہیں بات کرنا پڑی مگر بے دلی کے ساتھ ؎

نیند سے گو نماز بہتر ہے
اثرِ خواب ہے اذاں میں ابھی

بائیسں عدد ارکان اسمبلی کو انہوںنے سفیر بنانے کا فیصلہ کیا ہے کہ دنیا بھر کے دارالحکومتوں میں جائیں۔ صدیوں سے غلامی کے ستم سہتے کشمیر کا مقدمہ پیش کریں۔یاللعجب ان سب کا تعلق حکمران پارٹی سے واقع ہوا ہے۔ اپوزیشن پارٹیوں کا گویا اس مقدس خواب سے کوئی تعلق ہی نہیں۔ پھران میں ایسے ہیں، جو انگریزی تو کیا، اردو میںاظہارِ خیال کی قدرت بھی نہیں رکھتے۔ یہ گزشتہ تیس برس میں پھلنے پھولنے والی مخلوق ہے۔ نیم خواندہ لوگ، جائیداد کا کاروبار، زمینوں پر قبضے اور سرکاری سرپرستی میں جنہوں نے قیادت پر قبضہ جمالیا ہے۔ لاہور کے اخبار نویس فقط جنابِ افضل کھوکھر کے کارنامے مرتب کریں تو حیرت زدہ رہ جائیں۔

کچھ لوگ دفترِخارجہ سے چنے جاتے، کچھ دوسرے سرکاری افسر، اپوزیشن کے ایسے رہنما جو ہنر رکھتے اور دنیا بھرمیں پہچانے جاتے ہیں۔ کچھ دانشور جن کی زندگیاں خارجہ امور پر ریاضت میں بیتی ہیں۔ محترمہ شیریں مزاری، محترمہ نسیم زہرہ،تنہا مشاہد حسین کو ذمہ داری سونپی جاتی، وہ ان بائیس ارکان پہ بھاری ہیں۔ برطانیہ اور ان دوسرے ممالک میں بات کرنے کے لیے عمران خان سے کہا جاتا، جن میں کرکٹ کھیلی جاتی ہے۔ شاہ محمود اور اسحاق خاکوانی کو شامل کیا جاتا کہ تجربہ رکھتے ہیں۔ سعودی عرب میں چودھری شجاعت کو روانہ کیا جاتا۔ کچھ اخبار نویس، جن کی زبان میں لکنت نہیں اور جو مرعوبیت کے بغیر بات کرسکتے ہیں۔ ترکی میںجماعتِ اسلامی کا وفد روانہ کیا جاتا۔کہیں پیپلز پارٹی کے رہنما بھیجے جاتے۔ حکومت کو کیا ہوا کہ ایسی افتاد اور ان مشکلات میں بھی اپنے پسندیدہ ارکان کو سیاحت کے مواقع ارزاں کرنے کا فیصلہ کیا۔ خود اپوزیشن کو کیا ہوا؟

اپنے لہو سے چراغ جلاتے کشمیریوں کے لیے جو سب سے بڑے اور سب سے سچے پاکستانی ہیں، کراچی، لاہور، پشاور ، راولپنڈی اور کوئٹہ میں کل جماعتی جلوس نکالے جاتے۔ حکومتی جماعت اگر شامل نہ ہوتی تو باقی جماعتیں ہی۔ کشمیر میں عوامی عتاب کا شکار‘ بھارت نے اپنے مہروں کو آگے بڑھایا ہے۔ پہلے محمود اچکزئی بروئے کار آئے‘ اب اسفند یار ولی نے انگڑائی لی ہے۔ ان سے توخیر اخبار نویس نمٹ لیں گے‘ مگر حزبِ اختلاف نے کشمیر کے لیے کیا کیا؟

کراچی میں آخر کار مطلع صاف ہو گیا۔ وہ کام جو عشروں کی تگ و دو سے ممکن نہ ہوا تھا‘ الطاف حسین کے ایک بیان سے ہو گیا۔ خبث باطن ایسا آشکار ہوا کہ اب وہ اور اس کا ٹولہ کبھی نہ سنبھل سکیں گے۔ ان کا مقدمہ لڑنے والے اول تو کم ہوں گے اور جو لڑیں گے انہیں پذیرائی نصیب نہ ہو گی۔ وہ دن کبھی لوٹ کر نہ آئیں گے۔ خوف کا کاسنی رنگ دھلتا چلا جائے گا۔ فاروق ستار اینڈ کمپنی اپنے آقا کی مدد نہ کر سکے گی۔ کوشش کرے گی تو خاسرو پشیمان ہو گی۔ اندازہ یہ ہے کہ کچھ لوگ مصطفی کمال کے ساتھ چلے جائیں گے‘ جو لفظ نہیں چباتے اور ڈنکے کی چوٹ سچ بولتے ہیں۔ نون لیگ کے دانشوروں کو فاروق ستار سے ہمدردی ہے اور گہری ہمدردی۔ مفادات کا غلیظ سلسلہ کسی دیو ہیکل مچھلی میں پھیلے کانٹوں کے کسی جال کی طرح ہوتا ہے۔ زہر آخری سرے تک پھیل جاتا ہے۔ فاروق ستار اینڈ کمپنی کی مدد وہ صرف اس قیمت پر کر سکتے ہیں کہ خود ان کا محدود سا اعتبار اور بھی کم ہوتا جائے۔ ان کا بھی جو اللہ‘رسولؐ کا نام لے کر وزیر اعظم کے لیے دلائل تراشتے ہیں۔ فاروق ستار کے لیے اگر کوئی جائے پناہ ہے تو پورے سچ میں‘ مگر پورا سچ وہ کیونکر بول سکیں گے۔ فرمایا:صدق نجات دیتا اور جھوٹ تباہ کرتا ہے۔ اپنے سامنے رسول اکرمؐ کے قولِ مبارک کی تجسیم ہم دیکھ رہے ہیں۔

ایک رہنما سے گزارش کی کہ کراچی میں ”زندہ باد پاکستان ریلی‘‘ نکالیے۔ دوسری پارٹیوں کو شرکت کی دعوت دیجیے۔ صاف صاف کہہ دیجیے کہ اس دن کو اپنی جماعت کے لیے میں استعمال نہ کروں گا۔ کراچی کے اہلِ خیر تشہیر اور انتظامات کے لیے وسائل کا ڈھیر لگا دیتے۔ ہزاروں نوجوان بے تاب ہو کر نکلتے۔ دن رات ایک کر دیتے۔ بات ان کی سمجھ میں آئی نہیں‘ فقط ایک جلسے پراکتفا کرنے کا ارادہ کیا ؎

تو ہی ناداں چند کلیوں پر قناعت کر گیا
ورنہ گلشن میں علاجِ تنگیٔ داماں بھی ہے

مشکلات اور مصائب بھی ہیں مگر امکانات زیادہ ہیں۔ دانشور اور لیڈر قوم پہ اگر رحم کریں اور مایوسی پھیلانے سے گریز کریں تو زیادہ سے زیادہ پانچ برس میں ملک دلدل سے نکل جائے۔ دہشت گردی ختم ہو رہی ہے‘ سول اداروں کی بہتری اور پاک افغان سرحد پہ نگرانی کا عمل مستحکم کرکے ایک بڑی چھلانگ لگائی جا سکتی ہے۔ 2018ء تک لوڈشیڈنگ ختم ہو جائے گی یا برائے نام ہوگی۔ تجارتی راہداری کی تکمیل ہو رہی ہوگی۔ منصوبہ بندی کی جائے اور اس خطے کے لیے الگ سے ضروری قوانین بنا دیئے جائیں تو گوادر کے دوسرا دبئی بننے کا عمل شروع ہو چکا ہوگا۔

تمام افراد‘ تمام اقوام‘ سبھی کوقدرت مواقع مہیا کرتی ہے‘ مگر اپنے قوانین کبھی کسی کے لیے تبدیل نہیں کرتی۔ حسنِ خیال‘ حسنِ عمل کی ابتدا ہے اور حسنِ عمل کے تسلسل سے وہ معجزے رونما ہوتے ہیں چین‘ ملائیشیا اور ترکی میں جن کا ہم نے نظارہ کیا۔
پسِ تحریر: اگر بھارت نواز اخبار نویسوں کی فہرست مرتب کرنا ہو تو آج یہ بہت آسان ہے۔ اُس وقت جب مقبوضہ کشمیر اور ایم کیو ایم زیر بحث ہے‘ وہ بلوچستان کے بارے میں لکھ رہے ہیں۔ بھارتی حکومت بھی اسی موضوع پر بات کرتی ہے۔

بہت سے لوگ مجھے پوچھتے ہیں کہ پرویز مشرف کے متعلق آپ کا لہجہ اکثر تلخ کیوں دکھائی دیتا ہے؟ میرا ہمیشہ یہی جواب ہوتا ہے کہ مشرف صاحب سے میری کوئی ذاتی پرخاش نہیں۔ میری ان کے ساتھ شناسائی اس وقت شروع ہوئی جب وہ کور کمانڈر منگلا تھے۔ جس زمانے میں چوہدری نثار علی خان اور شہباز شریف انہیں آرمی چیف بنوانے کیلئے لابنگ کررہے تھے تو حمید اصغر قدوائی صاحب نے مجھے بھی اس لابنگ میں شامل کرنے کی کوشش کی۔ قدوائی صاحب کو یہ خوش فہمی تھی کہ مشرف صاحب کبھی مارشل لا نہیں لگائیں گے لیکن آرمی چیف بننے کے بعد مشرف صاحب نے مجھ جیسے صحافیوں کے ساتھ دل کی باتیں کرنا شروع کیں تو اندازہ ہوا کہ نوازشریف انہیں آرمی چیف بنا کر اپنے پائوں پر کلہاڑی مار چکے ہیں۔

یہ وہ زمانہ تھا جب نوازشریف حکومت بیک وقت عدلیہ، میڈیا، اپوزیشن جماعتوں اور فوج کے ساتھ محاذ آرائی میں مصروف تھی۔ یہی وجہ تھی کہ جب 12اکتوبر 1999ء کو نوازشریف حکومت کو ہٹایا گیا تو فوج نے اسمبلیاں ختم نہیں کیں اور پارلیمنٹ کے اندر سے تبدیلی لانے کی کوشش کی۔ یہ کوشش کامیاب نہ ہوئی تو اسمبلیاں ختم کردی گئیں۔ محترمہ بے نظیر بھٹو پہلے ہی جلا وطن تھیں کچھ عرصے بعد نوازشریف بھی سعودی عرب چلےگئے اور غداری کے مقدمات بھگتنے کیلئے مسلم لیگ (ن) کو جاوید ہاشمی کے حوالے کردیا۔ پرویز مشرف کے ساتھ میرا پہلا براہ راست اختلاف رائے بلوچستان کے مسئلے پر ہوا۔ 2004ء میں انہوں نے مجھے جیو نیوز کے لئے انٹرویو دیا جس میں اکثر بگٹی کا نام لئے بغیر کہا کہ یہ ستر کی دہائی نہیں ہے تمہیں پتہ بھی نہیں چلے گا کہ کب اور کہاں سے تمہیں کون سی چیز آکر لگی ہے۔

انٹرویو ختم ہوا تو میں نے مشرف صاحب سے کہا کہ آپ کا یہ انٹرویو بلوچستان میں نفرتوں کی نئی آگ لگا سکتا ہے آپ کو محتاط لہجہ اختیار کرنا چاہئے لیکن مشرف صاحب طاقت کے نشے میں سرشار تھے۔ ان کے وزیراعظم میر ظفر اللہ جمالی بلوچستان میں طاقت کے استعمال کے خلاف تھے لہٰذا ان سے استعفیٰ لے لیا گیا۔ 2006ء میں بلوچستان کے بزرگ سیاسی رہنما اکبر بگٹی ایک کارروائی کا نشانہ بن گئے جس کے بعد بلوچستان میں احتجاج شروع ہوگیا۔ اسی سال پرویز مشرف کی کتاب ’’ان دی لائن آف فائر‘‘ منظر عام پر آئی جس میں انہوں نے اعتراف کیا کہ انہوں نے 369 افراد کو پکڑ کر امریکا کے حوالے کیا اور کروڑوں ڈالر کی انعامی رقم حاصل کی۔ ان کے اس اعتراف کے بعد راولپنڈی کی ایک خاتون آمنہ مسعود جنجوعہ لاپتہ افراد کی آواز بن کر سڑکوں پر آگئیں۔

قومی اسمبلی میں اس خاتون کے حق میں پہلا بیان عمران خان اور خواجہ محمد آصف نے دیا۔ 2007ء میں آمنہ مسعود جنجوعہ اور عمران خان نے جیو نیوز کے پروگرام کیپٹل ٹاک میں لاپتہ افراد کو عدالتوں میں پیش کرنے کا مطالبہ شروع کیا تو مشرف کے حامیوں نے یہ کہنا شروع کردیا کہ ہم دہشت گردوں کے وکیل بن گئے ہیں اور ہم ملک دشمنوں کے ہاتھوں میں کھیل رہے ہیں۔ پھر میں ڈاکٹر عبدالمالک بلوچ نے بلوچستان میں لاپتہ افراد کیلئے آواز اٹھانی شروع کی۔ ڈاکٹر مالک نے یہی گفتگو کیپٹل ٹاک میں کی تو حب الوطنی کے ٹھیکیداروں نے یہ الزام لگا دیا کہ ہم بلوچستان کے لاپتہ افراد کی بات کرتے ہیں لیکن مقبوضہ جموں و کشمیر کے لاپتہ افراد کی بات نہیں کرتے۔ میں نے بار بار یہ کہاکہ مقبوضہ کشمیر اور بلوچستان میں بہت فرق ہے ان کا آپس میں موازنہ نہیں ہوسکتا لیکن غداری کے سرٹیفکیٹ بانٹنے والے پاکستان میں آئین و قانون کی بالادستی کی بات کرنے والوں کو بھارتی ایجنٹ قرار دیکر نجانے کس کو خوش کر رہے تھے حالانکہ پاکستان میں سب سے زیادہ لاپتہ افراد خیبرپختونخوا اور سندھ میں ہیں بلوچستان میں نہیں۔

مقبوضہ جموں و کشمیر اور بلوچستان میں صرف ایک چیز مشترک ہے۔ کشمیریوں اور بلوچوں کی اکثریت پرویز مشرف سے سخت ناراض ہے۔ کشمیر کی حریت پسند قیادت مشرف کو تحریک آزادی کا دشمن سمجھتی ہے اور بلوچوں کی اکثریت کا خیال ہے کہ مشرف دور میں بلوچستان کو پاکستان کے قومی دھارے سے نکال کر خانہ جنگی میں جھونک دیا گیا۔ مشرف دور میں جو بھی بلوچستان میں ناانصافی کے خاتمے کی بات کرتا تھا وہ غدار کہلاتا تھا اور اسے یہ سننا پڑتا تھا کہ تم بلوچستان میں ظلم کی بات کرتے ہو لیکن مقبوضہ کشمیر میں ظلم پر کیوں خاموش ہو؟ آج بھارت کا وزیراعظم نریندر مودی بھی وہی باتیں کررہا ہے جو مشرف کے حامی کیا کرتے تھے۔ مودی نے 15 اگست کو ایک تقریر میں کہا ہے کہ بلوچستان، آزاد کشمیر اور گلگت کے لوگوں نے وہاں ہونے والے ظلم کیخلاف آواز اٹھانے پر میرا شکریہ ادا کیا ہے۔ کچھ جلاوطن بلوچ رہنمائوں نے مودی کے بیان کا خیرمقدم کیا ہے لیکن بھارت میں مودی کے اس بیان پر بہت تنقید ہورہی ہے۔ بھارتی اخبار انڈین ایکسپریس میں نیروپوما سبرامنیم نے لکھا ہے کہ کشمیر اور بلوچستان کا کوئی موازنہ نہیں ہوسکتا، کشمیر دو ایٹمی طاقتوں کے درمیان ایک تنازع ہے جبکہ بلوچستان کا معاملہ بالکل مختلف ہے۔

اس خاکسار نے بلوچستان میں ریاستی جبر اور ناانصافی کی ہمیشہ مذمت کی ہے اور بلوچوں کو ان کے سیاسی و آئینی حقوق دینے کا مطالبہ کیا ہے میں اپنے موقف پر بدستور قائم ہوں لیکن بھارتی وزیراعظم مودی نے بلوچستان اور مقبوضہ کشمیر کا موازنہ کر کے بلوچوں کے حقوق کی بات کرنے والوں کو نقصان پہنچایا ہے۔ سب جانتے ہیںکہ 1947ء میں ایک مسلم اکثریتی ریاست جموں و کشمیر کا حکمران ہری سنگھ غیر مسلم تھا۔ اس نے لارڈ مائونٹ بیٹن اور نہرو کی ملی بھگت سے بھارت کے ساتھ الحاق کا اعلان کیا لیکن الحاق کی اس دستاویز کو پریم شنکر جھا جیسے بھارتی مصنفین نے متنازع قرار دیا ہے۔ دوسری طرف 29جون 1947ء کو بلوچستان کے شاہی جرگہ اور کوئٹہ میونسپلٹی نے بغیر کسی جبر کے پاکستان سے الحاق کا فیصلہ کیا۔ اکبر بگٹی سمیت دستور ساز اسمبلی کے رکن نواب محمد خان جوگیزئی اور میر جعفر خان جمالی نے بھی پاکستان کے حق میں فیصلہ دیا۔

ریاست مکران کے حکمران میر اعظم خان بلوچ، ریاست خاران کے حکمران نواب حبیب اللہ نوشیروانی اور لسبیلہ کے حکمران جام میر غلام قادر نے بھی اپنی مرضی سے پاکستان میں شمولیت اختیار کی البتہ قلات کی ریاستی اسمبلی نے 15اگست 1947ء کو اپنی آزادی برقرار رکھنے کا فیصلہ کیا۔ آزادی کے حق میں تقریر کرنے والوں میں میر غوث بخش بزنجو بھی شامل تھے لیکن سات ماہ کے بعد خان آف قلات نے بھی پاکستان کے ساتھ الحاق کا اعلان کردیا۔ کچھ لوگوںکے خیال میںیہ اعلان پاکستان کے ریاستی دبائو کا نتیجہ تھا لیکن مت بھولئے کہ قلات کی جس ریاستی اسمبلی نے آزادی و خودمختاری کا اعلان کیا تھا اسی اسمبلی کے ارکان نے بعد میں پاکستان کی بقاء اور سالمیت کیلئے گرانقدر خدمات سرانجام دیں۔ میرغوث بخش بزنجو نے شیخ مجیب الرحمان کے سامنے ہاتھ جوڑ کر کہا کہ خدارا پاکستان مت توڑو۔ آج ان کا بیٹا میر حاصل بزنجو سینیٹ کا رکن اور وفاقی وزیر ہے۔

مقبوضہ جموںو کشمیر کے تنازع کو بھارت اقوام متحدہ میں لیکر گیا اوراس پر سلامتی کونسل کی قراردیں موجود ہیں۔ بلوچستان کے بارے میں ایسی کوئی قرارداد نہیں۔ مقبوضہ جموں و کشمیر کے بارے میں بھارتی آئین کی دفعہ 370 نے اسے خصوصی حیثیت دی ہے۔ غیر کشمیری مقبوضہ ریاست میں زمین نہیں خرید سکتے۔ بلوچستان کے بارے میں پاکستان کے آئین میں ایسی کوئی دفعہ نہیں۔ کشمیر پر پاکستان اور بھارت میں تین جنگیں ہو چکی ہیں۔ بلوچستان پر ایسی کوئی جنگ نہیں ہوئی۔

مقبوضہ کشمیر کی حریت پسند قیادت کشمیر میں موجود ہے۔ بلوچ علیحدگی پسند لیڈروں کی اکثریت بیرون ملک بیٹھی ہے اور بھارت کو خوش کرنے کیلئے کشمیر کی تحریک آزادی کو دہشت گردی قرار دے رہی ہے حالانکہ یہ تحریک 1947ء سے نہیں 1931ء سے جاری ہے۔ مقبوضہ کشمیر میں جگہ جگہ پاکستانی پرچم لہرایا جاتا ہے بلوچستان میں ناراض عناصر کی موجودگی سے انکار نہیں لیکن وہ بھارت کا پرچم نہیں لہراتے۔ بلوچستان کے علیحدگی پسندوں کو ویسی عوامی تائیدو حمایت حاصل نہیں جو کشمیر کی حریت پسند قیادت کو حاصل ہے۔ مودی نے بلوچستان کے ساتھ آزاد کشمیر اور گلگت سے نیک تمنائوں کی وصولی کا دعویٰ کر کے اپنے جھوٹ کا خود ہی پول کھول دیا۔

مقبوضہ کشمیر میںسید علی گیلانی، آسیہ اندرابی اور دیگر آزادی پسند روزانہ ’’کشمیر بنے گا پاکستان‘‘ کا نعرہ لگاتے ہیں مودی صاحب بلوچستان، آزاد کشمیر یا گلگت بلتستان میں موجود کسی ایک شخص کا نام بتا دیں جو بھارت سے الحاق کا حامی ہو؟ مودی کا یہ بیان دراصل بھارت کے خلاف ایک چارج شیٹ کی حیثیت رکھتا ہے۔ آئندہ بلوچستان، آزاد کشمیر یا گلگت بلتستان میں دہشت گردی کا کوئی واقعہ پیش آیا تو دنیا یہ یقین کرنے میں حق بجانب ہوگی کہ اس کے پیچھے بھارت کا ہاتھ ہے کیونکہ مودی کے بیان کے بعد مزید کسی ثبوت کی ضرورت نہیں۔

پچھلے کچھ عرصے سے آزاد کشمیر کے نومنتخب وزیر اعظم راجہ فاروق حیدر خان جب اپنی حکومت کے ایجنڈے کا ذکر فرماتے ہیں اور بالخصوص جب میرٹ اور انصاف کی بات کرتے ہیں توان کا درد ان کی بیٹھی ہوئی آواز اور چھلکتی آنکھوں سے عیاں ہوتا ہے۔ ان کا یہ رویہ دل و دماغ میں ارتعاش پیدا کر دیتا ہے کہ ایسی کون سی بے بسی ان کو نظر آرہی ہے کہ ان کے پاس رونے کے علاوہ کوئی آپشن نہیں بچتا۔ انسان ایسے حالات میں دو ہی صورتوں میں روتا ہے، اول تو جب اسے کسی اہم مسئلے کا حل سرے سے مل ہی نہیں رہا ہوتا اور دوم جب مسئلے کا حل تو نظر آ رہا ہوتا ہے لیکن اس کے نتائج اس قدر بھیانک ہوتے ہیں کہ وہ اس خاص مسئلے سے بڑا مسئلہ کھڑا کر دیتے ہیں۔ سوال یہاں یہ پیدا ہوتا ہے کہ آیا آزاد کشمیر کے ادارے اس قدر کھوکھلے ہو چکے ہیں اور لوگ اس قدر نا انصافی کا شکار ہیں کہ ان کی بہتری نا ممکن ہو اور ان کو درست سمت پر لانا اتنا بڑا مسئلہ ہو کہ وزیراعظم کے پاس اس پر آنسو بہانے کے علاوہ کوئی چارہ نہ ہو؟ نہیں بظاہر بلکہ حقیقت میں ایسا نہیں ہے۔ اس میں کوئی شک نہیں کہ میرٹ اور انصاف پامال ہوتا ہے، لوگوں کو انصاف کی فراہمی میں تاخیر ہوتی ہے لیکن یہ مسائل تو دنیا کی ترقی یافتہ ترین قوموں کو بھی درپیش ہیں، اس میں بھلا آنسو بہانے والی کیا بات، آزاد کشمیر تو ایک چھوٹا سا خطہ ہے، اس کے سارے اداروں کو صحیح سمت میں لانے کے لیے کچھ دنوں کا وقت چاہیے ہے، تو سوال یہ پیدا ہوتا ہے کہ وہ کون سا انصاف ہے جس کا حصول اس قدر مشکل ہے کہ راجہ فاروق حیدر کی آنکھوں سے درد بن کر بہہ رہا ہوتا ہے۔
بے خودی بے سبب نہیں غالب
کچھ تو ہے جس کی پردہ داری ہے

مجھے بالکل نہیں اندازہ کہ راجہ صاحب کون سے انصاف کا نعرہ بلند کیے ہوئے بےبسی کا رونا رو رہے ہیں لیکن ماضی کے کچھ تجربات اور اپنی ناقص سمجھ بوجھ کے مطابق جب اپنے ذہن پر زور ڈال کر خود کو راجہ فاروق حیدر کی جگہ رکھ کر سوچتا ہوں تو کچھ ایسی ناانصافیاں نظر آتی ہیں کہ مجھے بھی رونے کے علاوہ کوئی چارہ نطر نہیں آتا بلکہ میرے جیسے کمزور اعصاب والا بندہ تو رونے سے بھی اگلی بات یعنی خود کشی کے بارے میں سوچنے پر مجبور ہو سکتا ہے۔ ظاہر ہے جب لوگوں کے سامنے آپ کو اتنا بڑا عہدا تو دے دیا گیاہو، پوری قوم آپ سئ توقعات وابستہ کیے ہوئے ہو لیکن آپ کے ہاتھ پاؤں باندھ دیےگئے ہوں تو پھر آپ کے پاس آنسو بہانے کے سوا کون سا آپشن بچتا ہے؟
خدا ملا نہ وصال صنم
ادھر کے رہے نہ ادھر کے

ایک اہم بات جس کا ذکر یہاں دلچسپی سے خالی نہیں ہوگا، وہ راجہ فاروق حیدر خان کا ایک معنی خیز فقرہ ہے جو وزیراعظم بننے کے بعد ان کی پہلی تقریر کا حصہ تھا اور جو شاید انہوں نے سردار سکندرحیات کے نام سے منسوب کرتے ہوئے یہ کہا تھا کہ مقبوضہ کشمیر کی عوام کو آزادی اور آزاد کشمیر کی عوام کو انصاف چاہیے۔ بڑا معنی خیز فقرہ تھا، بڑی گہرائی تھی ان چند الفاظ میں۔ آزادی اور انصاف کو ایک ہی ترازو کے دو پلڑوں میں تولنے کا مطلب یہ ہے کہ دونوں یکساں اہمیت کے حامل ہیں، دونوں کے لیے ایک ہی طرح کی جدوجہد کی ضرورت ہے اور دونوں کے حصول کےلیے کشمیری پچھلے 70 سال سے نبردآزما ہیں۔ آزادی اور انصاف میں کوئی زیادہ فرق نہیں ہوتا بلکہ دونوں میں گہری مماثلت پائی جاتی ہے۔ بلکہ یہ کہنا غلط نہیں ہوگا کہ انصاف ہی ایک ایسا آلہ ہے جو آزادی کی راہ ہموار کرتا ہے کیونکہ آزادی انصاف کی کوکھ سے جنم لیتی ہے۔ مقبوضہ کشمیر کے عوام کے لیے انصاف یہ ہوگا کہ ان کو خودارادیت کا حق دیا جائے تاکہ وہ اپنی آزادی کا فیصلہ خود کر سکیں۔ اگر انصاف مل جائے تو آزادی خود بخود مل جاتی ہے۔ آزادی کا فیصلہ لوگ خود کرتے ہیں بشرطیکہ حکمران ان کے ساتھ انصاف کرتے ہوئے ان کوفیصلہ سازی کا حق دے دیں۔

اگر ہم انصاف کے مفہوم کو سامنے رکھیں تو آزادی کا مفہوم اس کے اندر ہی سما جاتا ہے۔ اس منطق کے مطابق تو آزاد کشمیر کے عوام بھی آزاد نہیں ہیں اور نہ ہی ان کو انصاف مل رہا ہے۔ انصاف تو یہ ہے کہ آزاد کشمیر کے عوام کے منتخب نمائندوں کے سر سے کشمیر کونسل اور ایکٹ 74 کی لٹکتی تلوار کو ہٹا دیا جائے تاکہ وہ آزاد حثیت سے اپنے فیصلے کر سکیں۔ ان کو قانون سازی کا اختیار کہنے کی حد تک تو دے دیا گیا ہے لیکن سیکشن 56 سے ان کے ہاتھ باندھ دیے گئے ہیں کہ نہیں بھائی اگر ہماری مرضی سے ہٹ کر کوئی فیصلہ کیا گیا تو سیکشن 56 کے تحت آپ کی حکومت کو چلتا کر دیا جائے گا۔ انصاف کا تقاضا تو یہ بھی ہے کہ آزاد کشمیر سے پیدا کی جانے والی پن بجلی جو کہ تقریبا اب 2 ہزار میگاواٹ تک پہنچ جائے گی، اس کا نیٹ ہائیڈرل پرافٹ آزاد کشمیر کو دیا جائے اور این ایف سی ایوارڈ میں باقی صوبوں کی طرح آزاد کشمیر کو بھی خاطر میں لایا جائے کیونکہ کالاباغ ڈیم کی تعمیر اس لیے نہ ہو سکی کہ پاکستان کے کچھ خیرخواہوں نے اس کی بھرپور مخالفت کی لیکن دوسری طرف کشمیری عوام نے پاکستان کو روشن کرنے کے لیے اپنے اجداد کی قبروں تک کی قربانی دے دی۔ نیلم جہلم پروجیکٹ سے آزاد کشمیر کا دارالحکومت قدرتی خوبصورتی اور ایک بڑی آبادی پانی سے محروم ہو گئی لیکن کشمیری عوام نے پھر بھی اسے قبول کیا۔

مقبوضہ کشمیر کے لوگ آج بھی 8 لاکھ فوج کے ہوتے ہوئے پاکستان کا پرچم بڑے فخر سے لہراتے ہیں تو کیوں لہراتے ہیں؟ کیونکہ وہ پاکستان سے انصاف کی توقعات وابستہ کیے ہوئے ہیں، وہ دو قومی نظریے پر ابھی بھی ڈٹے ہوئے ہیں، اپنی مائوں بہنوں کی عصمتوں کو اپنے سامنے لٹتے دیکھتے ہیں لیکن پاکستان کا جھنڈا مضبوطی سے تھامے ہوئے ہیں۔ ہم کون سے محاذ پر ان کے لیے لڑ رہے ہیں، ہم تو شملہ معاہدے کے تحت سفارتی محاذ کا اختیار بھی کھو چکے ہیں۔

یہی وہ انصاف اور میرٹ ہے جس کا ذکر کرتے ہوئے راجہ فاروق حیدر کے آنسو چھلک پڑتے ہیں۔ تو کیا کریں پھر جب انسان خدا ہو جائیں۔ اس بار آزاد کشمیر کے عوام نے راجہ فاروق حیدر خان کو ایک بھاری مینڈیٹ اس لیے دیا ہے کہ وہ اسی انصاف کی بات کرتے تھے۔ آزادکشمیر کے عوام کو اب اس بات سے کوئی دلچسپی نہیں کہ جب اس پار کشمیر میں کوئی ظلم ہو تو ہم قومی اسمبلی میں بیٹھ کر ایک مذمتی قرارداد پاس کروا دیں اور یہ سمجھیں کہ حق ادا کر دیا۔ جس کا دل کرے وہ پیسے دے کر کشمیر کونسل کا ممبر بن کر کشمیریوں کی توہین کرے اور عوام کے وسائل لوٹے۔ ان سب باتوں سے اب کشمیریوں کو کوئی دلچسپی نہیں رہی بلکہ وہ سخت ترین مزاحمت چاہتے ہیں۔ اگر وہ آزادی کے لیے تن تنہا ڈوگروں سے لڑ سکتے ہیں تو انصاف کے لیے کسی ایسی تیسری قوت کے حق میں بھی حق رائے دہی استعمال کر سکتے ہیں جو ان کی نسلوں کو انصاف فراہم کر سکے۔ یہی انصاف کا تقاضا ہے کہ آزاد کشمیر کی فانون ساز اسمبلی کو بااختیار بنانے کے لیے ایکٹ 74 کا خاتمہ کیا جائے۔ آزاد کشمیر کے وسائل کے منصفانہ استعمال کا طریقہ وضع کیا جائے۔ نیلم جہلم پراجیکٹ کے ماحولیات پر اثرات کو سامنے لاتے ہوئے کوئی جامع حکمت عملی مرتب کی جائے۔ کشمیر کونسل کے اختیارات کو محدود کرتے ہوئے آزاد کشمیر اسمبلی کے اختیارات کو وسیع کیا جائے۔ آزاد کشمیر کی دیرینہ پسماندگی کو ختم کرنے کے لیے ہنگامی بنیادوں پر تعمیر و ترقی کے منصوبے لائے جائیں۔ مسجلہ کشمیر کے حل کے لیے عملی اقدامات کیے جائیں۔ یہی کشمیری عوام کے دیے گئے مینڈیٹ کے ساتھ انصاف ہوگا اور اس سے تحریک آزادی کشمیر کو تقویت ملے گی۔ یہی آزاد کشمیر کے عوام کا نعرہ ہے، یہی ان کا منشور ہے اور اسی مقصد کے حصول کی خاطر کشمیری عوام نے راجہ فاروق حیدر کو اپنا قائد چنا ہے۔