واہ ، کیا لہجہ تھا ، کتنی ملائمت تھی لہجے میں، اور بات کرنے کا انداز کتنا دلکش تھا؟ حامد تو شام سے ہی اسی سحر میں کھویا ہوا تھا۔ اس کی بیوی نے کھانا لا کر سامنے رکھ دیا تو اس نے چپ کر کے کھا لیا، نہ کوئی اعتراض نہ غصہ۔ چائے لا کر دی تو چپ کر کے پی لی، نہ چینی کم کا واویلا اور نہ زیادہ کی شکایت۔ حمنہ حیران تو بہت ہوئی مگر کہا کچھ نہیں۔ آج میاں صاحب کہیں اور ہی گم تھے۔
قصہ کچھ یوں تھا کہ 6 ماہ پہلے وہ اس کی فرینڈ لسٹ میں شامل ہوئی تھی۔ پہلے تین ماہ تو لائکس اور کمنٹس تک ہی بات رہی، پھر ان باکس میں ہلکی پھلکی سلام دعا شروع ہوئی جو روزانہ کی گپ شپ میں بدل گئی۔ اب کام سے واپس آ کر کھانا کھاتا، چائے پیتا اور موبائل پر فیس بک کھول کر بیٹھ جاتا۔ جونہی حلیمہ آن لائن ہوتی تو وہ اسے سلام بھیج دیتا اور بس، پھر وہ ہوتا اور حلیمہ۔ باتوں میں دو گھنٹے گزر جاتے اور جب دونوں تھک جاتے تو ایک دوسرے کو خداحافظ کرتے۔ اس دوران کسی قسم کی ڈسٹربنس اسے غصہ دلا دیتی اور بیوی کو خواہ مخواہ کی جھاڑ پلا دیتا۔
حمنہ اس کے بدلتے رنگ ڈھنگ دیکھ رہی تھی۔ کچھ دن تو خاموش رہی لیکن ایک دن حامد کا اچھا موڈ دیکھ کر پوچھ ہی لیا کہ ”کیا وجہ ہے، آپ اب میری طرف بہت کم دھ یان دیتے ہیں، بہت غصہ کرتے ہیں اور روزانہ اتنا وقت موبائل پر لگا دیتے ہیں.“ حامد نے کہا ”دیکھو ڈئیر! تم بہت اچھی ہو، میں تم سے بالکل بھی ناراض نہیں ہوں۔ بس ڈسٹرب کرتی ہو تو غصہ آ جاتا ہے۔ میں تمہارے سارے کام تو کرتا ہوں۔ سودا سلف بھی لا دیتا ہوں، بچوں کے ساتھ بھی وقت گزارتا ہوں، تمہارے حقوق بھی پورے کرتا ہوں اور اگر اس کے بدلے میں شام کا کچھ وقت موبائل پر مصروف رہتا ہوں تو مجھے اس کی اجازت تو ہونی چاہیے نا.” حمنہ یہ سن کر خاموش ہو گئی۔ لیکن اس کے دل کی خلش نہ گئی۔
دن گزرتے گئے حامد، حمنہ اور بچوں کی طرف سے لاپرواہ ہوتا گیا اور گھر پر توجہ کم ہوتی گئی۔ حلیمہ سے بات کا دورانیہ بڑھنے لگا۔ حلیمہ نے اسے بتایا کہ وہ اکیلی رہتی ہے، اس کا آگے پیچھے کوئی نہیں، شام کو فیس بک پر وقت گزارتی ہے۔ دن میں آفس میں ہوتی ہے۔ دن گزرتے گئے، شناسائی بڑھتی گئی۔ پھر تصاویر کا بھی تبادلہ ہوا۔ حامد نے اسے 30 سال کی عمر والی تصویر بھیجی اور خوب داد سمیٹی۔ حلیمہ کی عمر بھی کوئی 22، 23 سال کی ہوگی. حامد تو دل و جان سے اس پر فدا ہو گیا۔ اسے حمنہ بری لگنے لگی۔ نہ پہننے کا سلیقہ، نہ اوڑھنے کا۔ بڈھی مائی کی طرح سر ڈھانپی رکھتی ہے۔ رنگ دیکھو جیسے مہینوں منہ نہ دھویا ہو۔
اب وہ حلیمہ سے میسنجر پر بات کرنا چاہتا تھا۔ حلیمہ نے بھی کوئی خاص پس و پیش نہ کی۔ اور یوں آج ان کی بات ہوئی اور بس تب سے حامد ہواؤں میں اڑ رہا تھا۔ اس کی آواز کی ملاحت اس کے کانوں میں ابھی تک رس گھول رہی تھی۔ اب تو روزانہ وہ موبائل لے کر چھت پر چڑھ جاتا اور اس سے باتیں کرتا رہتا۔ حمنہ یہ سب دیکھ رہی تھی اور سمجھ بھی چکی تھی کہ کسی عورت کا چکر ہے۔ وہ رونے کڑھنے کے علاوہ صرف اللہ سے میاں کی واپسی کی دعا کر سکتی تھی جو وہ کر رہی تھی۔
حامد جس فرم میں کام کرتا تھا، اس کی طرف سے اسے آج لاہور جانا تھا، وہ دشمن جاں بھی لاہور میں ہی رہتی تھی۔ حامد نے سوچا، لاہور پہنچ کر اسے بتاؤں گا اور ملنے کے لیے کہوں گا۔ ڈوسرے دن وہ ڈائیوو سے لاہور پہنچ گیا۔ کام سے فارغ ہو کر وہ اور اس کا دوست شام کو فورٹریس کی طرف گھومنے پھرنے نکلے۔ ان سے آگے آگے ایک فیملی چل رہی تھی۔ خاتون کے کپڑے چڑمڑ ہو رہے تھے جیسے بغير استری کے پہن لیے ہوں۔ اور بال بندھے ہونے کے باوجود ادھر ادھر سے ہوا میں لہرا رہے تھے۔ اس نے بچہ اٹھایا ہوا تھا، وہ کبھی ایک ہاتھ سے بچے کو سنبھالتی اور کبھی دوسرے ہاتھ سے لٹ کو کان کے پیچھے اڑستی۔ مرد نے ایک بچے کا ہاتھ پکڑا ہوا تھا اور تیسرا بچہ ساتھ ساتھ چل رہا تھا۔ اچانک بچہ ہاتھ چھڑا کرایک آوارہ اڑتے غبارے کے پیچھے بھاگا۔ خاتون چیخی۔”احسن پکڑو اسے۔ ایک بچہ نہيں سنبھالا جا رہا تم سے۔ مجال ہے جو کوئی فکر ہو۔“ حامد کو آواز کچھ جانی پہچانی لگی۔ لیکن وہ اسے وہم سمجھا۔
وہ فیملی دکان میں گھس گئی۔ حامد کا دوست بھی اسی دکان ميں داخل ہوا تو حامد کو بھی جانا پڑا۔ اچانک اپنے پیچھے سیلزمین سے بات کرتی خاتون کی آواز اس کے کانوں سے ٹکرائی، وہی لہجہ، وہی آواز، وہی انداز۔ چونک کر مڑا تو دیکھا کہ وہی بچوں والی خاتون سیلزمین سے بات کر رہی تھی اور اب تو وہ سائیڈ سے چہرہ بھی دیکھ سکتا تھا۔ یہ تو وہی تھی، حلیمہ۔ لیکن یہ ویسی تو نہ تھی جیسی تصویر میں تھی۔ تصویر تو شاید 22 سال کی عمر کی تھی اور اب وہ کم ازکم 40 کے آس پاس اور قدرے موٹی تھی۔ رنگ بھی شاید کچھ سنولا گیا تھا۔ حامد تو حیران پریشان اپنے خوابوں کے محل ٹوٹتے دیکھ رہا تھا۔ اس نے تو نجانے کیا کیا پلان کر لیا تھا، اپنی توند اور گنجے ہوتے سر اور 40 کی عمر کو بھلا کر وہ خود کو 28، 30 سال کا جوان سمجھ بیٹھا تھا اور حلیمہ کو سہارا دینا چاہتا تھا۔
وہ دوست کو اشارہ کر کے باہر نکل آیا۔ اب وہ جلد از جلد یہاں سے دور جانا چاہ رہا تھا مبادا وہ اسے دیکھ لے۔ دوسرے دن وہ گھر پہنچا۔ حمنہ اسے اسی طرح ملی انتظار کرتی ہوئی، تیار، سر پر دوپٹہ رکھے، مسکراتی ہوئی۔ آج اسے حمنہ پہلے کی طرح سمارٹ اور خوبصورت دکھائی دی۔ اس نے بچوں کے گفٹس ان کو دیے، مل کر کھانا کھایا اور گپیں لگاتے رہے. اور اس کے بعد حمنہ نے اسے کبھی موبائل پر لمبے وقت کے لیے مصروف نہیں دیکھا۔
ممکن ہے کچھ لوگوں کو یہ افسانہ لگے لیکن یہ وہ تلخ حقیقت ہے جس کا شکار آج کل کے کئی شادی شدہ جوڑے بن رہے ہیں۔ خدا کے لیے موبائل، انٹرنیٹ کو اپنی زندگی پر اتنا اثر انداز نہ ہونے دیجیے اور نہ ہی دوسروں سے وہ رشتے بنائیں جس کی نہ اسلام میں اجازت ہے نہ معاشرتی لحاظ سے۔ اور ان رشتوں کی قدر کیجیے جو آپ کے آس پاس، آپ کے ساتھ ساتھ ہیں۔
ہوش سنبھالنے سے پہلے سے آنکھوں نے عورتوں کو مظلوم کی دیوی اور مرد کو ظلم کا دیوتا دیکھا. کیا مرد مظلوم نہیں ہو سکتا؟ یہ سوال ذہن میں کئی بار آیا اور اتنی ہی تیزی سے ختم بھی گیا کیونکہ سوال ہی پیدا نہیں ہوتا کہ مرد مظلوم ہو کہ اس کے نام کے ساتھ ظلم جڑا ہوا ہے. ’’خواتین کا احترام کرو‘‘ جگہ جگہ پڑھنے کو ملتا ہے، تو کیا مرد حضرات کا کوئی احترام نہیں؟ یہ جملہ کیوں پڑھنے میں نہیں آتا کہ ’’مردوں کا احترام کرو‘‘ یا پھر ان کی عزت کوئی معنی نہیں رکھتی۔ اکثر ’’لیڈیزفرسٹ‘‘ پر عمل ہوتا دیکھنے کو ملتا ہے لیکن پھر بھی خواتین ہر جگہ شکایت کا دفتر کھولے ہوئے نظر آتی ہیں. کہا جاتا ہے کہ ہمارا تو معاشرہ ہی مردوں کا ہے لیکن جائزہ لیا جائے تو حقیقت یہ سامنے آتی ہے کہ مرد انتہائی بے چارہ ہوتا ہے اور ساری زندگی یہ بےچارگی ختم نہیں ہوتی. اس کے پیدا ہونے پر بہت خوشیاں منائی جاتی ہیں، آنکھوں کا تارا بنا رہتا ہے، مگر یہی قید بن جاتی ہے، اماں زیادہ دور جانے نہیں دیتیں، آنکھوں کے سامنے ہی رکھنا پسند کرتی ہیں، تھوڑا بڑا ہوتا ہے تو بےچارے کا بہت دل چاہتا ہے کہ دوستوں کے ساتھ وقت گزارے لیکن یہ تو ممکن ہی نہیں، اماں اور بہنوں کی پولیس والی نظروں کا سامنا کیسے کرے اور اگراپنی مرضی سے کچھ وقت دوستوں کے ساتھ گزار بھی لے تو ایسے سوالات کے جوابات مطلوب ہوتے ہیں کہ آئندہ مہینے بھر باہرجانے سے پریز ہی کرتا ہے، اور اگر ابا جی نے کسی ایسے لڑکے کے ساتھ دیکھ لیا جو چھالیہ بھی کھاتا ہو، توگھورنے کا وہ سلسلہ شروع ہوتا ہے کہ آنکھ بچانے پر ہی عافیت نصیب ہوتی ہے. اسکول کالج یونیورسٹی تک اپنے ہی گھر میں قیدی بنا رہتا ہے. اور تو اور بےچارہ اپنی شریک سفر کا انتخاب بھی نہیں کر سکتا کیونکہ جو اسے پسند ہوتی ہے، اس میں ہزاروں کیڑے نکالے جاتے ہیں، اماں جی کو ساری برائی اس ایک لڑکی میں نظر آنا شروع ہوجا تی ہے، بہنوں کو بلاواسطے کا بیر رہتا ہے. بےچارہ مرد یہاں بھی قربانی دیتا ہے اور اماں بہنوں کی مرضی کے مطابق گھوڑی نہیں بلکہ سولی چڑھ جاتا ہے.
اماں ، اماں۔
میں شادی شدہ ہوں اور ایک عدد بیوی گلبدن بانو کا شوہر ہوں. یوں تو میں بہت مطیع و فرمانبردار قسم کا شوہر ہوں مگر میری بیوی مجھ سے ہمیشہ بدگمان رہتی ہے. اس کا خیال ہے کہ میری زندگی میں بہت سی رنگین اور اہم کہانیاں ہیں جس سے میں نے اسے آگاہ نہیں کیا۔ دراصل غلطی میری ہے. میں نے اپنے رشتے داروں میں نوجوانی میں اپنے بارے میں تاثر کی کبھی پروا نہیں کی تھی بلکہ اسے اپنے لیے قابل فخر خیال کرتا رہا. مجھے کیا علم تھا کہ اس نے خانگی معاملات میں اتنے مسائل پیدا کرنے ہیں اور مجھے عمر بھر وضاحتیں دینی ہیں تو میں ایسا کبھی نہ کرتا۔ اگرچہ میرے کزن، لڑکے اور لڑکیاں ہی میرا دماغ خراب کرنے کا سبب بنے، جب ملتے پوچھتے تو بھائی جان تازہ شکار کون ہے اور کیا ہو رہا ہے؟ میں اسے اپنی جواں مردگی خیال کرتا اور پھول جاتا، افسانہ طرازی کا شوق تو تھا چنانچہ ایک نئی زبردست کہانی تیار کر لیتا، پھر وہ کہانی حقیقت بن کر پورے خاندان میں پھیل جاتی اور میں سمجھتا کہ میری شہرت میں اضافہ ہوا ہے حالانکہ بدنامی میں اضافہ ہوتا، اور جس سے سچ مچ عشق بھی تھا اس نے بھی سمجھا شاید اپنی شہرت یافتہ بدنامی کی وجہ سے اس کا شکار کرنے آیا ہوں اور اوپر سے میری کزنوں کے مرچ مسالے اس تک پہنچے تو وہ صاف بولی کہ میں اس ٹائپ کی نہیں اور یوں میری زندگی میں ایک المیہ بھی ہوا، اور کزنوں نے یہ مشہور کر دیا کہ میں نے فلاں پر بھی ہاتھ صاف کرنے کی کوشش کی تھی۔ یہ کہانی میں نے نہیں پھیلائی، یہ تو اس موصوفہ نے خود میری کزنوں کو بتلائی اور انھوں نے نشر کردی۔ یوں جو کہتے ہیں کہ محبت کو بدنام نہیں کرتے، اس کا باعث بھی میں نادانستگی میں بنا۔
اللہ کے رسول صلی اللہ علیہ و سلم زیارتِ قبور اور مُردوں کے استغفار کے لیے وقتاً فوقتاً قریب کے قبرستان ’جنۃ البقیع‘ جایا کرتے تھے. ایک مرتبہ جب آپ کی باری ام المئومنین حضرت عائشہ رضی اللہ عنہا کے یہاں تھی، آپ نے رات میں وہاں جانا چاہا، آپ نے انتظار کیا، یہاں تک کہ جب آپ کو لگا کہ عائشہ رض سو گئی ہیں تو آپ انتہائی خاموشی سے اٹھے، چپکے سے اپنی چادر اٹھائی، آہستہ سے جوتا پہنا، تاکہ ذرا بھی آہٹ نہ ہو، دھیرے سے دروازہ کھولا، باہر نکلے، اتنی ہی آہستگی سے دروازہ بند کیا اور جنۃ البقیع کی طرف روانہ ہوگئے.
“صاب اب میرا کام ہو جائے گا نا”