Tag: الحاد

جب سے انسان پیدا ہوا ہے تب سے اس میں ایک صلاحیت پائی جاتی ہے جس کو ہم شک و شبہ، حیرت یا سوال کرنے کی صلاحیت کہتے ہیں۔ لیکن انسانوں کے ایک بڑے ہجوم میں جس کی تعداد کم و بیش 7 ارب سے بھی زیادہ ہے اور ہر انسان کے پاس اپنا دماغ، اپنی سوچنے کی صلاحیت موجود ہے، یہ کیسے اندازہ کیا جا سکتا ہے کہ کون سا انسان عقل و فہم میں بہتر اور خیر والا ہے، اور کون سا انسان عقل و فہم میں برائی والا یا شر والا ہے؟ یہاں پر لازم آئے گا کہ اختلاف جنم لے۔ لیکن یہ اختلاف ایک ایسے شخص کے سامنے پیش کر دیا جائے۔ جو عقل و فہم کا بے دریغ استعمال کرتا ہے، اور خود کو نمایاں رکھنے کی کوشش میں لوگوں کے سامنے ایسے سوالات رکھتا ہے جس کا کوئی سر ہو نہ پاؤں تو آپ کبھی بھی اس شخص کو کسی نتیجہ پر نہیں پائیں گے۔ اس کی چند مثالیں آپ کے سامنے پیش کرتا ہوں۔

ملحد آپ سے سوال کر سکتا ہے کہ اگر ’’اللہ نے انسان کو پیدا کیا ہے‘‘؟ تو انسان کو ’’ آنکھیں‘‘ سامنے کی جانب کیوں عطا کیں؟ ایک آنکھ آگے اور ایک پیچھے کیوں نہ عطا کیں؟ تاکہ وہ آ گے اور پیچھے دونوں جانب دیکھ سکتا؟
اب اہل منطق یہ سوال اٹھائیں گے کہ یہ فیصلہ کون کرے گا کہ انسان کا آگے والا حصہ کون سا ہے اور پیچھے والا حصہ کون سا؟ پھر یہ سوال بھی کیا جائے گا کہ اگر انسان کی ایک آنکھ آگے اور ایک پیچھے ہوگی تو لازم بات ہے کہ انسان کے ناک کا ایک سوراخ بھی پیچھے ہونا چاہیے تھا؟ تا کہ وہ جس طرف سے بھی کسی بدبو دار چیز کو دیکھتا تو اس کی طرف اسی سمت میں متوجہ ہوتاَ؟
پھر یہ سوال کیا جائے گا کہ لازم آتا ہے کہ ’’انسان کے آگے اور پیچھے 2 منہ بھی ہونے چاہیے تھے؟‘‘ تاکہ وہ اپنی خوراک کو جس طرف کی آنکھ سے بھی دیکھتا اسی طرف سے اس کے خیر و شر یعنی وہ خوراک اس کے کھانے کے لیے درست ہے یا نہیں سمجھ کر کھانا دونوں جانب سے کھا سکتا؟ پھر یہ سوال بھی تو کیا جا سکتا ہے؟ گردن کیوں دی گئی؟ کیا صرف کھانا نگل لینے کے لیے دی گئی؟ نہیں بلکہ اس کو اردگرد کے ماحول کو دیکھنے کے لیے حرکت کی طاقت عطا کی گئی؟ کیا وجہ ہے کہ انسان کو ایک کان کے ساتھ ساتھ دائیں اور بائیں بھی دو آنکھیں دی جاتیں تا کہ گردن کی حرکت کی حجت و علت ختم ہو جاتی۔ اور انسان کی یہ محتاجی ختم ہو جاتی؟
نوٹ: آپ اندازہ کریں کہ ملحد کے ایک سوال نے کیسے کیسے سوالات کو جنم دیا۔ اور پھر تصوراتی طور پر اگر ان سوالات کو حقیقی تجزیہ سے عمل میں لایا جائے تو سوچیں کہ انسان اگر مندرجہ بالا خصوصیات کا مالک ہوتا تو کتنا بےڈھنگا اور بد صورت تصور ہوتا۔

ملحد اس بات کے قطع نظر کہ انسانی آنکھیں 180 ڈگری میں اپنے سامنے کی طرف سے دیکھ سکتی ہیں اور گردن کے مڑنے سے انسان اپنے اردگرد 180 ڈگری اینگل کے وژن سے دیکھ سکتا ہے۔ انسان کا ’’نضام انہضام، نظام دماغ، نظام پیشاب‘‘ فطری طور پر آنکھوں والی جانب اس لیے رکھا گیا ہے کہ وہ اپنے اندر پائی جانے والی تبدیلیوں کو محسوس کر سکے۔ پیٹ کا درد، گردوں کا درد، دل کا درد سب کچھ سامنے کی طرف ہی انسان کو محسوس ہوتا ہے۔ ہندؤں کے بگھوان کی مورتی کو دیکھیں جس کے 6 منہ یا 4 ہاتھ ہیں؟ کیا وہ ایک کامل تخلیق ہے؟ یا ہم یہ کیسے مان لیں کہ جو مورتی خدا ہونے کا دعویٰ کرتی ہو وہ اتنی بد صورت ہواور اس میں اتنی قدرت موجود نہ ہو کہ وہ دو ہاتھوں، ایک منہ، اور دو ٹانگوں کے ساتھ ہوتے ہوئے ہر کام کو بجا لائے؟ کیا خدا بدصورت بھی ہوتا ہے؟ معاذ اللہ، کیا دنیا میں ایسے انسان نہیں پائے جاتے جن کو ایک دکھائی دینے والی چیز اچھی اور دوسروں کو بری لگتی ہے؟ اس بات سے قطع نظر کہ وہ یہ بات مانتا ہے کہ انسان ایک حادثاتی کرشمہ ہے۔ لیکن یہ ماننے کو تیار نہیں کہ اس قدر پیچیدہ انتظام کسی خالق کے بنائے بغیر تخلیق پا ہی نہیں سکتا۔

اہل مذہب یہ کہنے میں حق بجانب ہیں کہ جو اعتراض آپ نے اہل مذہب اور خدا کے ماننے والوں پر کیا اسی کا اطلاق ہم آپ پر کرتے ہیں کہ انسان نے ارتقائی مراحل طے کرتے کرتے بے شمار تبدیلیاں اپنے اندر دیکھیں. آخر کیا وجہ ہے کہ انسانی شعور ان تبدیلیوں پر قابو نہ پا سکا؟ یعنی ماحول سے اخذ شدہ تبدیلیوں کا محتاج نہ رہتا؟ اور اپنی مرضی سے اپنے جسم کو ڈھال لیتا؟ اور جو سوال آج کے جدت پسند انسان کے ذہن میں پائے جا رہے ہیں وہی سوالوں کا حل انسانیت کے لیے خود پیش کرتا؟ ملحدین اس کا جواب کبھی بھی نہیں دے سکتے۔ حتیٰ کے قیامت آ جائے گی لیکن یہ لوگ شکوک و شبہات کی ایسی دلدل میں پھنسے رہیں گے اور موت کا سامنا کرنا پڑ جائے گا۔ یعنی سوالات کا ایسا سلسلہ شروع کر دیا جائے جس سے نفس مسئلہ کی خوب اکھاڑ بچھاڑ ہو، اور ہر سوال سے کئی نقطے اور پہلو کھلتے چلے جائیں۔ پیچیدہ در پیچیدہ علم اس شخص کے حصے میں آئے جو دوسری جانب فریق مخالف کے پاس موجود نہ ہو۔ یہ وہ طریق کار ہے جو صدیوں سے چلا آ رہا ہے، اور اس نے دہریت کے پھیلاؤ میں اہم کردار ادا کیا ہے۔

قارئین کرام! اگر انسان واقعی میں ماحول سے اخذ شدہ تبدیلیوں کا حامل ہے تو آگ اس ماحول کا حصہ ہے، کیا وجہ ہے کہ ہندو ہزاروں سالوں سے انسان کو جلا رہے ہیں اور انسان جلتا جا رہا ہے؟ اگر واقعی جینیاتی تبدیلیاں انسان کی جسمانی تبدیلیوں کا باعث بنتی ہیں، اور ابتدائی طور پر مادہ نے انسان کی پہلی حالت ہونے کا شرف حاصل کیا ہے اور ماحول سے چھپکلی، پھر ڈائینو سارس ، پھر بڑے دیوقامت بن مانس اور پھر بندروں کی شکل اختیار کر کے موجودہ انسانی شکل تک پہنچا ہے؟ تو لازم طور پر ہمیں یہ بات سمجھ لینی چاہیے کہ وقت کی رفتار انسان کو ایسا کرنے سے روک رہی ہے ورنہ ان تبدیلیوں پر اربوں سال نہ لگتے۔
ہم ان سے سوال کر سکتے ہیں کہ انسان کو دوڑنے سے سانس کیوں چڑھ جاتا ہے کیا یہ خامی نہیں؟ یا پھر یہ پوچھ سکتے ہیں کہ انسانی آنکھ بھی تو اسی ماحول کی عطا کردہ ہے، پھر کیا وجہ ہے کہ انسانی آنکھ سورج کے نیچے یا سامنے کھڑے ہو کر اسے دیکھنے سے قاصر ہے؟ یہ بھی ممکن ہے کہ یہ سوال کر دیا جائے کہ انسان یا مادہ کی میل اور فی میل سیکس کیوں تشکیل پائے؟ کیا وجہ ہے کہ جو ملحدین انسانیت کا نام لے لے کر عورت کو مرد کے برابر حقوق دینے کی بات کرتے ہیں، یہ ماحول انسان کو صرف مرد رہنے دیتا یا پھر صرف عورت یعنی فی میل، آج کی یہ ہل چل جس میں عورت کے حقوق کے نام پر عورت کو جگہ جگہ ذلیل کیا جاتا ہے وہ نہ ہوتی؟

کیا آپ یہ بات سمجھنے کو تیار ہیں کہ اگر دنیا میں صرف مرد ہی مرد پیدا ہوتے اور مرد ہی میں بچہ جننے کی طاقت ہوتی تو جنگوں میں لڑنے والے حاملہ مردوں کو تلواروں، گولیوں اور دوسرے ہتھیاروں سے جب قتل کیا جاتا تو کتنے مرد اولاد سے محروم ہو جاتے؟ کیا ملحد بتا سکتے ہیں کہ مردوں کو کیا کہا جاتا؟ ماں یا باپ؟ ملحدین اگر بیس سوال کر سکتے ہیں تو یقین مانیں کہ ان کے خلاف بیس ہزار سوال کیے جا سکتے ہیں۔ یہ صرف اس لیے ہے کہ ان کے دماغ کو منتشر کر دیا جاتا ہے۔ ملحد کا کوئی سوال آپ کو کسی نتیجہ پر نہیں پہنچا سکتا جبکہ مذہب آپ کو کسی نہ کسی نتیجہ پر پہنچا دیتا ہے۔

مثلاً: ملحدین آپ سے سوال کرتے ہیں کہ ’’ہم آپ کے نبی محمد ﷺ کو نہیں مانتے کیونکہ یہ سب قصے کہانیاں ہیں (معاذاللہ )، تاریخ میں کسی محمد ﷺ کا یا عیسی علیہ السلام کا کوئی وجود نہ تھا۔ تو اہل مذہب جواب دیں گے کہ اللہ کے انبیاء کو دیکھنے والی ایک بہت بڑی جماعت موجود تھی۔ محمد ﷺ کو دیکھنے والے ایک لاکھ سے زائد مسلمان صحابہ رضی اللہ عنھم موجود تھے، جن سے ان کے لاکھوں تابعین اور تبع تابعین نے نقل کیا کہ رسول اللہ ﷺ کو اللہ نے نبی بنایا۔ ان کے خاندانوں اور ان کا سلسلہ نسب موجود ہے۔ آج بھی ان کی اولادیں موجود ہیں۔ جن سے تاریخ کی ضمانت لی جاتی ہے۔
جبکہ ملحدین کے پاس اپنی تاریخ کا کوئی بھی پہلو محفوظ نہیں۔ وہ نہیں بتا سکتے کہ انسان نے سب سے پہلے کیا الفاظ بولے ؟ وہ نہیں بتا سکتے کہ ان الفاظ کو سننے والے کتنے تھے؟ یا تھے بھی یا نہیں؟ ان کے پاس اس سوال کا جواب نہیں کہ ان میں کتنے میل اور کتنے فی میل تھے؟ انہوں نے علم کی ترسیل کس طرح کی، کوئی حتمی جواب موجود نہیں؟ سب سے پہلے جس انسان نے لباس پہنا اس کا کیا نام تھا؟ سب سے پہلے جس انسان نے آگ جلائی وہ کون تھا؟ یا کس انسان نے کس انسان کا نام رکھا؟
نوٹ : یہ موازنہ نہیں ہے بلکہ تاریخ کے خیر و شر کو سمجھنے کی ایک مثال ہے۔
یعنی کوئی بھی ملحد جو دین کو نہیں مانتا وہ آپ کو کسی نتیجہ تک نہیں پہنچا سکتا۔ لیکن مذاہب نتیجہ خیز ہوتے ہیں اور دین اسلام نے مسلمانوں کو جن نتائج سے آگاہ کر دیا ہے اس کی مثال کسی مذہب میں موجود نہیں۔

مسلمان جانتے ہیں کہ اللہ نے کائنات کی تخلیق سے 50 ہزار سال پہلے تقدیر یعنی پلان مرتب کیا۔ پھر کائنات اور اس میں موجود اشیاء کی تخلیق کی۔ پہلا انسان آدم تھا، وہ ایک مرد تھا، اس کی پسلی سے حوا کو پیدا کیا گیا۔ آدم علیہ السلام کے ذریعے شیطان اور شیطان کے ذریعے آدم علیہ السلام کو آزمایا گیا۔ پھر ان کو جنت میں رکھا گیا۔ جنت میں اللہ نے ان کو ایک ابتلاء یا آزمائش میں مبتلا کیا۔ آدم سب سے پہلے بولے۔ آدم علیہ السلام کو علم دیا گیا۔ آدم علیہ السلام کو کثیر اولاد حوا علیھا السلام کے ذریعے عطا کی گئی۔ آدم علیہ السلام کو مٹی سے پیدا کیا گیا۔ آدم علیہ السلام کو زمین میں موجود تین رنگوں کی مٹی سے پیدا کیا گیا۔ یعنی سرخ، سیاہ اور سفید ۔ آدم علیہ السلام سے اب تک کے لوگ سب اسی ابتلاء میں مبتلا ہیں۔ موت اس لیے دی جاتی ہے کہ انسان کے اعمال کا محاسبہ آخرت میں دیا جا سکے۔ قیامت قائم ہو۔ سب سے پہلی موت آدم کی اولاد کو ہی آئی۔ سب سے پہلے آدم کی اولاد ہی کو دفنایا گیا۔ انسان کو اس امتحان کا نصاب دیا گیا۔ وہ دین اسلام ہے۔ انسان کو اسی پر عمل پیرا ہو کر اللہ سے اپنے گناہوں سے نجات حاصل کرنی ہے۔ یہ ہے وہ نتیجہ جس تک دین رہنمائی کرتا ہے۔

ملحد یہ سوال بھی کرتا ہے کہ انسان کو آگ میں کیوں ڈالا جائے گا، اگر آگ ہی میں ڈالنا تھا تو پیدا کیوں کیا۔ جبکہ اگر آپ بغور جائزہ لیں تو وہ یہ سوال تب کرتے ہیں جب انہوں نے دین کی طرف سے پیش کردہ فلسفہ آزمائش کو پس پشت ڈال دیا ہوتا ہے اور اس کے بارے میں کوئی ملحد کچھ بھی علم نہیں رکھتا۔
ملحد آپ سے یہ سوال کر سکتا ہے کہ اللہ نے عورت کے حیض کو پلید قرار دیا ہے، وہ عورت کو اس کے بغیر بھی تو پیدا کر سکتا تھا جبکہ یہی سوال ہم ماحول کو خدا ماننے والوں سے کر سکتے ہیں کہ آپ کا نظریہ حقیقت پر مبنی ہے تو اس مسئلہ پر انسان نے اپنے ارتقاء میں جن بری تبدیلیوں سے اپنے جسم میں اچھی تبدیلیاں پیدا کیں، اس میں عورت بھی حیض سے نجات حاصل کر لیتی۔ آج کا ملحد سائنس کا ڈنکا بجانے میں مگن ہے، میڈیکل سائنس پر فخر کرتا ہے لیکن اربوں سالوں سے موت جیسی بیماری پر آج تک قابو نہ پا سکا؟

آپ جانتے ہیں کہ اگر انسان واقعی ماحول کا بیٹا ہوتا اور اپنے اندر کی تبدیلیوں کا مالک خود ہوتا تو آج یہ دنیا جس کے 7 براعظم ہیں، انسانوں کے جم غفیر کے لیے تھوڑی پڑ جاتی۔ جو انسان آج 5یا 10مرلہ کی زمین کے لیے ایک دوسرے کو قتل کر دیتا ہے، وہ کتنا جھگڑالو ہوتا۔ افزائش نسل کے لیے جانوروں کی حد تک اپنی طاقت کا استعمال کرتا۔ ممکن ہے ماں ، باپ ، بیٹی اور بہن بھائی جیسے مقدس رشتے وجود میں نہ ہوتے۔ جو توازن موت نے انسان اور اس کی زندگی اور اس کے معاشرے میں پائی جانے والی بے شمار تبدیلیوں کی وجہ سے قائم رکھا ہے، وہ زندہ انسانوں کا وہ ہجوم جو شاید ایک کے اوپر ایک رہتا۔ اور کائنات کتنی غیر متوازی ہوتی۔

ملحدین کا طریقہ واردات علوم فلاسفہ کی بنیاد پر ہے۔ ’’فلسفہ‘‘ کا معنی ’’عقل و دانش‘‘ سے محبت ہے، لیکن فلسفہ کی کوئی جامع تعریف موجود نہیں ۔مسائل کی تحقیق کے نام پر دوسرے علوم کے ’’قوانین‘‘ اور ’’اصول و ضوابط‘‘ کا ناقدانہ انداز میں جائزہ لے کر اپنی مرضی کی تردید کر دینے کا نام ’’فلسفہ‘‘ ہے۔ فلسفہ کا مسئلہ یہ ہے کہ ’’دلیل‘‘ کسی چیز کو نہیں مانتے۔ اگر آپ کسی فلسفی کو دلیل کے طور پر قرآن کی آیت یا رسول اللہ ﷺ کے فرمان کو پیش کریں گے تو فوری طور پر دلیل کو ایک مغالطہ کہے گا۔ لیکن جب آپ سائنسی حوالے سے کسی بھی اصول پر دلیل مانگیں گے، وہ تجربہ کو مثال بنا کر دلیل مانے گا۔ فلسفیوں کا یہ انداز فکر ان پر کڑی تنقید کرتا ہے جیسے ’’تجزیاتی فلسفہ‘‘ جس میں اشیاء کے اجزاء کو سمجھ کر کل کی تعریف کی جاتی ہے۔ اس میں بے شمار خامیاں ہیں، اور اس کو مندرجہ ذیل مثال سے بیان کیا جا سکتا ہے۔
آپ کے سامنے قرآن کا ایک جز لکھ دیا جائے گا۔ [pullquote]ومکرو مکر اللہ واللہ خیر الماکرین[/pullquote]

ملحداس آیت پر اعتراض کرے گا کہ اللہ قرآن میں خود کہہ رہا ہے کہ ’’ اور جو مکر کرے گا اللہ اس کے ساتھ مکر کرے گا اور اللہ بہتر مکر کرنے والا ہے.‘‘
اس سے تو ثابت ہوا کہ اللہ مکر کر سکتا ہے بلکہ کرتا ہے، اس لیے اس قرآن میں جو بھی ہوگا اس کو ہم مکر بھی تسلیم کریں گے۔ اب ایک اہل دین’’اصول ترجمہ اور تفسیر‘‘ کو مدنظر رکھ کر سورۃ آل عمرآن کی اس آیت کا ’’سیاق و سباق‘‘ دیکھے گا۔ اس کے بعد لغوی اعتبار پر ’’مدعی معترض‘‘ کے پیش کردہ لفظ کا اصطلاحی معنی پیش کرے گا کہ عربی زبان میں ’’مکر‘‘ سے مراد تدبیر کرنا بھی ہے۔ پھر وہ اس آیت کے شان نزول کو بیان کرے گا۔ اس کے بعد سمجھائے گا کہ بنی اسرائیل کے مکر کو واضح کرنے کے لیے اللہ نے قرآن میں اس آیت کو نازل کیا۔ اس کے بعد وہ اس آیت سے قبل اور بعد والی آیات پیش کر کے معاملہ صاف کر دے گا کہ بھائی یہ آیت تو سیدنا عیسیٰ علیہ السلام کے رفع آسمانی پر دلالت والی آیت سے قبل اللہ نے نازل فرمائی، اور معاملہ صاف ہو جائے گا۔ اب یہاں پر سوال یہ پیدا ہوتا ہے۔ آپ ملحدین سے ایسا سوال کر سکتے ہیں کہ ’’تجزیاتی فلسفی‘‘ کے پاس ’’دین‘‘ کے علم میں ’’دین کی تاریخ‘‘ کا علم بھی موجود ہے؟ کیا اس کے پاس ’’اصول حدیث اور اصول تفسیر‘‘ کا علم بھی موجود ہے؟ اور کیا اس کے پاس ’’عربی ادب اور گرامر‘‘ کا علم بھی موجود ہے؟ جس سے یہ بات ثابت کی جا سکے کہ ’’تجزیاتی فلسفی‘‘ کسی بھی مذہب یا دین جس کو ’’فلسفی‘‘ ایک کل کے طور پر مانتے ہیں اور اجزائے دین سے اپنی عقل کے تحت ’’کل‘‘ پر جو تجزیہ کرے گا وہ بالکل درست کرے گا؟ یہ ایک نہایت احمقانہ اور جاہلانہ بات ہے۔

فلسفی یا ملحدین دین کے ماننے والوں کے بد اعمال کو بنیاد بنا کر بطور حجت پیش کرنے کی کوشش کرتے ہیں۔ مثال کے طور پر اگر بد قسمتی سے ایک عالم دین شراب پیتا ہے تو وہ کسی بھی دیندار کے سامنے یہ اعتراض رکھ سکتے ہیں کہ شراب کے حلال و حرام کا تصور بالکل غلط ہے۔ (معاذ اللہ ) کیونکہ میں نے ایک عالم کو شراب پیتے دیکھا ہے۔ لیکن جب اس سے سوال کیا جائے گا کہ بھائی یہ بتاؤ؟ کیا اللہ نے دین اسلام میں شراب کو کسی جگہ بھی حلال کہا ہے تو وہ اس کا جواب دینے سے قاصر ہوگا۔ اسی طرح اگر کوئی زنا کرتا ہے، ڈاکہ ڈالتا ہے، اور وہ نمازی بھی ہے تو شریعت نے کبھی اس کو نہ زنا کرنے کا حکم دیا ہے نہ ہی ڈاکہ ڈالنے کا۔ وہ اس کے اپنے نفس کی بد اعمالی ہے۔ اس کا تعلق کسی صورت دین سے نہیں ہے۔

آج کے دور میں’’ملحدین‘‘ کے کام میں جتنی جدت موجود ہے، پہلے موجود نہ تھی۔ ملحدین عیسائیوں، قادیانیوں، منکرین حدیث، ہندوؤں، بدھ مت، یہودیوں اور دیگر مذاہب کے کیے گئے اعتراضات کو جمع کرتے ہیں اور اس کو انٹرنیٹ، سوشل میڈیا کے ذریعے عوام زد عام کرتے ہیں۔ ان نظریات کو پھیلانے سے ملحدین کو یہ فائدہ ہوتا ہے کہ کالج، یونیورسٹیوں کے طلبہ و طالبات جو دین سے کوسوں دور ہوتے ہیں، وہ ان کے ورغلاوے میں آ جاتے ہیں، اور آہستہ آہستہ دین سے مکمل دور ہو کر دہریے ہو جاتے ہیں۔ آج کی دہریت کو کیمونزم، سوشلزم، مارکس ازم، بدھ ازم، ہندو ازم جیسے نظریات کی بہت سپورٹ حاصل ہے۔ ایسے دہریوں کو ’’سیاسی فلسفی‘‘ کہتے ہیں۔ ان کا کام صرف اور صرف اسلام کو نشانہ بنانا ہے۔ دینی ریاستوں میں رائج نظام کو بنیاد بنا کر اس کو بےجا ’’اسلام‘‘ پر تھوپنے کی کوشش کرتے ہیں مثلاً ’’ کرنل قذافی‘‘ نے اپنے ساتھ ’’خواتین گارڈ ز‘‘ رکھی تھیں۔ اب اس کو بنیاد بنا کر اسلام کو غلط ثابت کرنے کی کوشش کی جائے گی۔ ’’داعش‘‘ جیسی تنظیموں کو خود پروان چڑھاتے ہیں، اور ان سے مسلمانوں کا ہی قتل عام کروا کر یہ ثابت کرنے کی کوشش کرتے ہیں کہ اسلام ایک عدم برداشت اور دہشت گردی والا مذہب ہے۔ اسلام قتل و غارت کا درس دیتا ہے۔ میڈیا میں اربوں روپیہ انویسٹ کرتے ہیں، طالبان سے خود کش حملہ کی قبولیت کا ڈھونگ رچاتے ہیں اور اسلام کو بدنام کرتے ہیں۔ اسلام نے کبھی کسی مسجد، کسی جلسہ یا جلوس یا کسی دوسری عبادت گاہ کو تباہ کرنے سے گریز کا حکم دیا ہے۔ لیکن اگر آپ ان ملحدین سے پوچھیں تو وہ تاریخ کی من گھڑت روایات بیان کرنے کے علاوہ کچھ جواب نہیں دے پاتے۔

آج کے الحاد کو ’’تعلیمی فلسفہ‘‘ کی بہت سپورٹ حاصل ہے۔ کچھ عرصہ قبل ہی یہ دیکھنے میں آیا کہ امریکہ اور کینیڈا کی یونیورسٹیوں میں ’’الحاد کیا ہے یا دہریت کیا ہے‘‘ کے عنوان سے کتب شامل کی گئی ہیں۔ اور یہ نچلی سطح پر سکولوں میں بھی رائج کی گئی ہیں۔ ایشیائی ممالک میں ان کتب کو صرف روس اور چائنہ کے چند اداروں میں ہی مقبولیت حاصل ہوئی ہے۔ اس کا ایک انداز یہ دیکھنے کو ملا کہ افغانستان، پاکستان اور ہندوستان کے تعلیمی بورڈ میں اسلام سے پھیلنے والی تعلیمات کو متشدد ثابت کیا گیا ہے۔ اور ایسی شخصیات جن کا تعلق صرف دین سے ہو اور خاص دین کی تعلیم دینا ان سے منسوب ہو ان شخصیات کے نام کتب نصاب سے نکال دیے گئے ہیں۔ جیسے پاکستان کی مثال لی جائے ’’خالدبن ولید‘‘ کا نام کتب نصاب سے نکالا گیا ’’ملالہ یوسفزئی‘‘ کا نام ڈال کر، اور ’’سیدہ عائشہ رضی اللہ عنہا یا سیدہ خدیجہ رضی اللہ عنہا‘‘ کا نام نصاب سے نکالا گیا۔ ’’نیلسن منڈیلا‘‘ کا نام نصاب میں ڈال دیا گیا۔ سورۃ الانفال، سورۃ الاحزاب جیسی سورتیں نصاب سے نکالی گئیں جس کا مقصد یہ بتایا گیا کہ اس سے بچوں میں انتہا پسندی اور دہشتگردی پھیلنے کا خطرہ ہے۔ لیکن اس طرف توجہ نہیں دی گئی کہ اس نصاب کو پڑھانے والے کیا یہ قابلیت رکھتے ہیں کہ ساتھ ساتھ بچوں کی مثبت تربیت کو بھی مد نظر رکھیں کہ کل کو ان کے دلوں میں اسلام کے متعلق کوئی منفی خیال نہ آئے۔

چھوٹی چھوٹی چیزوں کو نظرانداز کر دیا جاتا ہے لیکن یہ تمام چھوٹی چھوٹی چیزیں بہت بڑے بڑے مسائل پیدا کرتی ہیں۔ ایمانیات اور دینیات نفس میں نتیجہ اخذ کرنے کی صلاحیت پیدا کرتے ہیں۔ الحاد بندے میں تشکیک، شبہات اور غیرسنجیدگی، جلد بازی اور عدم ٹھہراؤ پیدا کرتا ہے۔ اس بات سے قطع نظر کہ کوئی ملحد اللہ کو نہیں مانتا، یہ بات سمجھ لیں کہ آپ جب بھی کسی ملحد سے بات کریں گے تو آپ کو اس میں خود پسندی سے زیادہ کچھ نظر نہیں آئے گا۔
اللہ مجھے اور آپ کو دین پر زندہ رکھے اور خاتمہ بالایمان فرمائے۔ آمین ۔

تمام مذاہب کو اس وقت فکری محاذ پر سب سے بڑا چیلنج لامذہبیت کا درپیش ہے۔ پرنٹ، الیکٹرانک اور سوشل میڈیا کے ذریعے ایک منظم انداز میں آسمانی مذاہب کے خلاف شکوک و شبہات کی یلغار کی گئی ہے۔ ملحدین وجود باری تعالیٰ، تصوررسالت، عقیدۂ آخرت، کتاب اللہ اور انبیائے کرام علیہم السلام کی تاریخی حیثیت کو جھٹلاتے اور طرح طرح کے سوالات کے ذریعہ ذہنوں کو پراگندہ کرنے کی کوشش کرتے نظر آتے ہیں۔ جو مذاہب ان عقائد و مسائل میں پہلے ہی تضاد کا شکار اور کمزور بنیادوں پر کھڑے تھے، وہ ان کے فلسفیانہ وساوس کی یلغار کے سامنے زیادہ دیر نہ ٹھہر سکے اور الحاد ان کے معاشروں میں بہت آسانی سے جڑ پکڑتا چلا گیا۔ یہودیت، عیسائیت، ہندومت کا دہریت کے سامنے اتنی آسانی سے سجدہ ریز ہوجانا دہریوں کو اعتماد بھی دلا گیا، وہ یہ سمجھ بیٹھے کہ شاید تمام مذاہب ہی ایسے خودساختہ اور متضاد نظریات کی بنیاد پر کھڑے اور مکر و فریب کے ذریعے پیروکار جمع کیے ہوئے ہیں، لیکن الحادی نظریات کو مسلم معاشروں میں سخت مزاحمت کا سامنا کرنا پڑا اور پڑ رہا ہے۔ ملحدین کے لیے قرآن اور حضرت محمد صلی اللہ علیہ وسلم کی تاریخی حیثیت کو چیلنج کرنا علمی، عقلی اور تاریخی طور پر ممکن نہیں تھا ۔ باقی عقائد توحید، آخرت وغیرہ کا تعلق مابعد الطبیعات سے ہے جنہیں مشاہداتی اور تجرباتی علم کی روشنی میں مکمل طور پر ثابت یا رد نہیں کیا جاسکتا، اور اسلام ان مسائل میں دوسرے مذاہب کی نسبت بہت واضح اور محکم دلائل و براہین بھی رکھتا ہے، اس لیے انہوں نے اسلام پر حملہ کرنے کی دوسری راہ نکالی مثلا کمزور اور من گھڑت روایات کا سہارا لے کر اکابرین اسلام کی کردار کشی، اسلام کا تمسخر، اسلامی سزاؤں کے خلاف پراپیگنڈہ، عقائد میں فلسفیانہ انداز میں شکوک و شبہات پیدا کرنا، مسلمانوں کے اختلافات کو ہوا دینا، مسلمان علماء کی کردار کشی کرنا وغیرہ۔ یہ ہر ملحد کے خاص موضوعات ہیں۔ یہ اسلام اور مسلمانوں کی بدنامی کا کوئی موقع ہاتھ سے جانے نہیں دیتے اور ان کی دل آزاری کے لیے انتہائی گری ہوئی حرکات کرنے سے بھی باز نہیں آتے۔ پرنٹ میڈیا میں یہ تجزیہ نگاروں، کالم نگاروں، صحافیوں اور شاعروں کی شکل میں موجود ہیں جو مسلمانوں کو مختلف طریقوں سے اسلام کے متعلق شکوک و شبہات میں ڈالتے، زہریلے مضامین، جھوٹی کہانیاں پیش کرتے اور معمولی قصے کو بڑھاچڑھا کر مذہبی منافرت پھیلاتے ہیں، سوشل میڈیا دیکھیں تو اسلام کے خلاف ایک پورا محاذ نظر آتا ہے۔ مختلف پیجز اور عجیب و غریب ناموں کی فیک آئی ڈیز سے اسلام اور مسلمانوں کے خلاف جھوٹا پراپیگنڈہ، فریبی اور گمراہ کن تحاریر اور ان سے بھی بڑھ کر گستاخانہ جملے، تصاویر تقریبا روز دیکھنے کو ملتی ہیں۔

گزشتہ دو سال سے میری دلچسپی کا محور یہی لوگ رہے ہیں۔ سوشل میڈیا پر ان کے پیجز لائک کیے، ان کے گروپس میں شمولیت اختیار کی، ان سے دوستیاں لگا کے ان کے رویوں، نفسیات کا مطالعہ کیا۔ الحاد کے فروغ کے لیے کام کرنے والوں میں سیکولر، لبرل فاسشٹ، عیسائی، قادیانی لوگوں کے علاوہ کچھ ایسے مسلم جوان بھی نظر آئے جو اپنے دینی عقائد و نظریات کے علمی دلائل سے ناواقفیت اور ان کے خلاف جھوٹے پراپیگنڈے کی وجہ سے دین سے بدظن اور بےزار ہوئے یا سہل پسندی اور عیاشی کے حصول میں دین سے دور نکلتے چلے گئے اور چند ایسے بھی دیکھے جو تعلیم یافتہ اور منصف مزاج ہیں اور جن شکوک و شبہات کا وہ شکار ہیں، ان موضوعات پر غیرجانبداری سے لکھنے کی کوشش کرتے ہیں، ان کا انداز بھی باقیوں سے کافی بہتر اور علمی ہے۔ مجھے دینی راستے سے ان کے بھٹک جانے کی جو سب سے بڑی وجہ یا وہ کمی جس کی وجہ سے یہ مطالعہ اور تحقیق کے باوجود حق تک نہیں پہنچ سکے یا کنفیوژن کا شکار ہوئے، نظر آئی، وہ ایک صالح، علم و عمل والے شخص کی صحبت، ایک امین ناصح کے مشورے اور راہنمائی کا نہ ہونا تھی۔ بہت سے ایسے ہیں جنہوں نے سینکڑوں بڑی اچھی اور تحقیقی کتابوں کا مطالعہ کیا، لیکن ہدایت نہیں پاسکے بلکہ الٹا مزید گمراہ ہوتے چلےگئے۔ ایک ایسے ماحول میں جہاں ایک طرف الحاد کی محنتیں عروج پر ہوں اور جدید سیکولر تہذیب کی چمک دھمک آنکھیں خیرہ کر رہی ہو اور دوسری طرف خود مذہب کا یہ حال ہو کہ کئی قسم کے مسالک و مکاتب فکر پیدا ہوگئے ہوں، بھانت بھانت کی بولیاں بولی جا رہی ہوں اور کتابیں تصنیف کی جا رہی ہوں، اس افراتفری کے ماحول میں اپنی مرضی سے چند اچھے برے رائٹرز کی اہم دینی موضوعات پر کتابیں منتخب کر کے ان کا مطالعہ شروع کر دینا، ہرگری پڑی کتاب کو پڑھ لینا، کتاب کا محض ٹائٹل اور پرنٹنگ خوبصورت دیکھ کر اسے پڑھنے بیٹھ جانا، نہ کتاب کے انتخاب میں کسی مربی اصلاح، اچھے علم والے سے مشورہ کرنا اور نہ شکوک و شبہات پیدا ہونے کی صورت میں کسی مصلح کی رہنمائی کی سعی کرنا، ایسی خشکی اور بوریت ہی پیدا کرسکتا ہے جو مذہب سے ہی بد دل یا بےزار کردے۔

یہ بےلگام مطالعہ کی عادت ہمارے معاشرے میں بہت عام ہے حالانکہ غور کیا جائے تو یہی فتنوں کی اصل جڑ ہے۔ ایک بزرگ عالم لکھتے ہیں ”جتنے گمراہ فرقے پیدا ہوئے، ان کے بانی سب اہل علم ہیں، لیکن سب کے سب بغیر استاد اور رہبر والے، پس شروع شروع میں تو ٹھیک چلتے ہیں، لیکن جب موڑ یا چوراہا آتا ہے، وہیں بھٹک جاتے ہیں اور عجب و کبر میں مبتلا ہو کر کسی کی سنتے بھی نہیں ہیں۔“ (مجالس ابرار ج:۱،ص:۴۷) ایک اور جگہ لکھتے ہیں” ہر فتنے کے بانی پر غور کیجیے تو یہی معلوم ہوگا کہ یہ کسی بڑے کے زیر تربیت نہیں رہا ہے۔ جب آدمی بے لگام ہوتا ہے اور کوئی اس کا مربی اور بڑا نہیں ہوتا تو بگاڑ شروع ہوجا تا ہے اور وہ جاہ اور مال کے فتنے میں مبتلا ہوجاتا ہے۔“ (مجالس ابرار ج:۲،ص:۲۵)

مولانا عبدالماجد دریابادی رحمہ اللہ کی مثال سب کے سامنے ہے۔ مولانا ایک ایسی نابغہ روزگار شخصیت کے مالک تھے جنھوں نے جس موضوع پر قلم اُٹھایا حق ادا کردیا۔ مولانا ایک جید عالم دین، بے مثل ادیب، مرثیہ نگار، آب بیتی نگار، عظیم کالم نویس، صحافی اور مفسر قرآن تھے۔ کالج کے زمانے میں اسی آزاد اور بےلگام مطالعہ کی عادت میں کسی لائبریری میں موجود مستشرقین کی چند مشہور کتابیں پڑھ بیٹھے، پھر ایسے ملحد بنے کہ حضورصلی اللہ علیہ وسلم کی شان میں بھی گستاخیاں کرتے رہے، قابل گردن زنی قرار پائے، سالوں مذہب کے خلاف لکھا اور کھل کر لکھا۔ پھر علامہ شبلی نعمانی، سید سلیمان ندوی جیسے علم و عمل والے دوستوں کی صحبت اور کتابوں سے روشنی ملنی شروع ہوئی۔ ایک دوست نے مولانا اشرف علی تھانوی رحمہ اللہ کے ”مواعظ“ پڑھنے کو دیے، ان کو پڑھ کر بہت متاثر ہوئے۔ تھانوی رحمہ اللہ سے مراسلات شروع ہوئے، ایک سال تک مراسلات پر رہنمائی لیتے رہے، پھر خود تھانہ بھون پہنچ گئے۔ طویل نشستیں رہیں، بیعت کے لیے درخواست کی لیکن حضرت تھانوی نے ان کا میلان دیکھتے ہوئے مولانا حسین احمد مدنی رحمہ اللہ کو کہا کہ وہ عبدالماجد کو بیعت کر لیں، آپ دیوبند گئے اور حضرت مدنی کے ہاتھ پر بیعت ہوئے۔ (مولانا کے دہریہ ہوجانے کی مکمل داستان اگلی تحریر میں پیش کی جائے گی۔ ان شاء اللہ)

آپ نوٹ فرمائیں کہ ایک جید عالم کو اپنی اصلاح کے لیے مستقل بیعت ہونا پڑا، عوام کو اس کی کتنی ضرورت ہوگی، حالانکہ یہ تو آج سے ستر اسی سال پہلے کی مثال ہے۔ اب تو حالات مزید بدتر ہوچکے ہیں۔ اس دور میں اتنی آزاد خیالی اور فتنے نہیں تھے، مطالعہ اور دینی تعلیم و تربیت کا رواج تھا جبکہ آج کے دور میں نہ دینی تربیت کا کوئی نظام ہے اور نہ مطالعے کا کوئی رجحان، لوگ علمی لحاظ سے بالکل کورے اور کھوکھلے ہیں، دوسری طرف کتابوں اور میڈیا کے ذریعے ایسے فتنے سامنے آ رہے ہیں جو علماء کو بھی پریشان کر دیں، ایسے ماحول میں تو عوام کو خصوصی طور پر پڑھنے، سننے میں بہت احتیاط اور بڑوں سے مشورے کی ضرورت تھی، لیکن افسوس پہلے سے بھی زیادہ بےاحتیاطی کا مظاہرہ کیا جا رہا ہے۔ ایک عالم شیخ جمال زرابوزو لکھتے ہیں کہ
” آج کے دور میں بہت سے مسلمان ایسے ہیں جنہوں نے مغرب میں پرورش پائی یا پھر اپنی تعلیم مغرب سے حاصل کی۔ یہ لوگ جو لٹریچر پڑھتے ہیں وہ زیادہ تر غیر مسلم مصنفین کا ہوتا ہے۔ اس لٹریچر میں بہت سے ایسے افکار بیان کیے جاتے ہیں جو بظاہر تو بہت مفید، بےضرر اور اسلامی تعلیمات کے عین مطابق نہ سہی تو اسلامی اصولوں سے زیادہ دور بھی نظر نہیں آتے۔ لیکن اگر ان افکار کا بغور جائزہ لیا جائے اور ان کے پسِ پشت فلسفہ کو سمجھا جائے تو کسی بھی سلیم فطرت انسان پر یہ بات واضح ہو جائے کہ ان کا اسلامی تعلیمات سے کوئی تعلق نہیں بلکہ بسا اوقات یہ آپ کو گمراہی اور الحاد کی طرف لے جاتے ہیں۔“

اس دور میں علم و عمل والوں کی صحبت کی اہمیت اور ضرورت پہلے سے زیادہ ہے لیکن بہت سے لوگوں کو ہم دیکھتے ہیں کہ انہیں بیعت، اصلاح، تصوف کے الفاظ سے ہی سخت چڑ ہے، وہ صوفیاء کی کرامات، شطحیات، جعلی صوفیاء کے واقعات اور تصوف کی مخصوص اصطلاحات کو اپنی مرضی کے مطالب اور معانی کے ساتھ پیش کرکے تصوف کا رد کرتے نظر آتے ہیں۔ ہم مانتے ہیں کہ اسلامی تصوف میں غیر اسلامی عقائد و نظریات کی آمیزش ہوئی اور جعلی خانقاہوں اور پیروں کی آمد سے بہت نقصان ہوا، بہت سی خانقاہیں جہاں مسلمانوں کو ایزد پرستی کا درس دیا جاتا تھا، ان کی روحانی اصلاح ہوتی تھی، آج شخصیت پرستی بلکہ قبر پرستی کا مرکز بنی ہوئی ہیں اور جہاں ہر طرف اتباع رسول صلی اللہ علیہ وسلم کے جلوے نظر آتے تھے، آج وہ خانقاہیں قوالی کی محفلوں میں تبدیل ہوگئی ہیں بلکہ شرک و بدعت کا مرکز بن گئی ہیں، شاید اقبال نے بھی اسی حالت کو دیکھ کر فرمایا تھا۔
یہ معاملے ہیں نازک جو تری رضا ہو تو کر
کہ مجھے تو خوش نہ آیا یہ طریق خانقاہی

لیکن دوسری طرف ہمیں یہی اقبال مولانا اشرف علی تھانوی اور مولانا روم کے متعقد بھی نظر آتے ہیں اور ان کی شاعری میں بھی تصوفانہ رنگ نظر آتا ہے۔ اصل میں ضرورت افراط و تفریط سے بچنے کی ہے۔ سوال یہ کیا جاسکتا ہے کہ کیا جعلی ڈاکٹر وں کی وجہ سے کسی نے ڈاکٹروں کے پاس جانا اور علاج کروانا چھوڑا؟ جس طرح روحانی علاج کے شعبے میں ہزاروں جعلی ڈاکٹر موجود ہیں، اسی طرح جسمانی علاج کے شعبے میں بھی ہیں، جنہیں علاج یا اصلاح کی طلب ہوتی ہے، انہیں کوئی مسئلہ نہیں ہوتا، وہ اپنامعالج ڈھونڈ ہی لیتے ہیں۔ مزید جب دین کے کسی دوسرے شعبہ پر غلط لوگوں کے قبضےاور کمیوں کوتاہیوں کی وجہ سے اس شعبے کو نہیں چھوڑا جاسکتا، تزکیہ و احسان یا تصوف و سلوک تو دین اسلام کی روح اور جان ہے، اس کو کیسے چھوڑا جاسکتا ہے۔ اس کی اہمیت کا اندازہ تو اس بات سے لگایا جاسکتا ہے کہ یہ ایک ایسا رکن ہے جس کی تکمیل حضور صلی اللہ علیہ وسلم کی بعثت کے مقاصد میں شامل تھی، اس کا انکار کیسے کیا جاسکتا ہے؟ اس گئے گزرے دور میں بھی ایسی خانقاہیں اور مراکز موجود ہیں جہاں اہل علم وعمل بالکل اسلامی طریقہ پر لوگوں کی اصلاح فرما رہے ہیں۔

یہ اللہ کی سنت بھی ہے کہ جب بھی کوئی کتاب بھیجی ساتھ ایک رسول لازمی بھیجا جو لوگوں کو اس کی تعلیم دیتا اور ان کا تزکیہ کرتا۔ اسی طرح لوگ جب رسول اللہ صلی اللہ علیہ وسلم کی صحبت میں رہے تو صحابہ بن گئے اور جو صحابہ کی صحبت میں رہے تابعین بن گئے، تابعین کی صحبت میں رہے توتبع تابعین بن گئے، یہ سلسلہ علم و دین ابھی تک چل رہا ہے۔ مولانا تھانوی رحمہ اللہ کی کتاب سے ایک اقتباس پیش کرکے بات ختم کرتا ہوں۔ لکھتے ہیں:
”ہر شبہ کا جواب دینے سے شبہات رفع نہیں ہوسکتے، تم منشاء کا علاج کرو، جیسے ایک گھر کے اندر رات کو اندھیرے میں چوہے، چھچھوندر کودتے پھرتے تھے،گھر والا ایک ایک کو پکڑ کر نکالتا مگر پھر وہ سب کے سب دوبارہ اندر آجاتے۔ ایک عاقل نے کہا کہ میاں! یہ سب اندھیرے کی وجہ سے کودتے پھرتے ہیں، تم لیمپ روشن کر دو، یہ سب خود ہی بھاگ جائیں گے، چنانچہ لیمپ روشن کیا گیا تو وہ سب اپنے اپنے بلوں میں گھس گئے۔ اسی طرح یہاں بھی سمجھو کہ یہ وساوس و شبہات جو آپ کو پیش آتے ہیں، ان کا منشاء ظلمت قلب ہے، جس کا علاج یہ ہے کہ قلب میں نور پیدا کر لو۔ وہ نور نورمحبت ہے۔ یہ محبت و عشق وہ چیز ہے کہ جب یہ دل میں گھس جاتی ہے تو پھر محبوب کے کسی حکم اور کسی قول و فعل میں کوئی شبہ وسوسہ نہیں پیدا ہوتا۔ اگر ایک فلسفی پروفیسر کسی عورت پر عاشق ہو جائے اور وہ عورت اس سے یوں کہے کہ سر بازار کپڑے اتار کر آئو تو میں تم سے بات کروں گی، ورنہ نہیں! تو فلسفی صاحب اس کے لیے بھی تیار ہوجائیں اور یہ بھی نہ پوچھیں گے کہ بی بی! اس میں تیری مصلحت کیا ہے؟ اب کوئی اس سے پوچھے کہ آپ کی وہ عقل اور فلسفیت اس عورت کے سامنے کہاں چلی گئی؟
عشق مولی کے کم از لیلی بود
گوئے گشتن بہر او اولی بود
میں نہایت پختگی سے دعوے کے ساتھ کہتا ہوں کہ جن مسلمانوں کو آج کل مذہب میں شکوک و اوہام پیدا ہوتے ہیں، ان کے اس مرض کا منشاء قلت محبت مع اللہ ہے، ان کو اللہ و رسول کے ساتھ محبت نہیں اور محض برائے نام تعلق کو تعلق کہا جاتا ہے۔ تعلق مع اللہ کے حاصل ہونے کا واحد طریق صرف یہ ہے کہ اہل اللہ کی صحبت حاصل کی جائے، اہل محبت کی صحبت میں یہ خاصیت ہے کہ ا س سے بہت جلد محبت پیدا ہوجاتی ہے جیسا کہ اہل غفلت کی صحبت سے غفلت پیدا ہوتی ہے، پھر جب محبت اور تعلق مع اللہ حاصل ہوجائے گا، یہ لم و کیف باطل اور وساوس و شبہات سب جاتے رہیں گے۔“ (اشرف الجواب از مولانا اشرف علی تھانوی صفحہ 561، 562)

بات بظاہر کچھ بھی نہیں تھی مگر میں اندر تک لرز گیا تھا۔ میں نے اپنی دونوں بیٹیوں کی طرف دیکھا وہ جوس اپنے اپنے بیگوں میں ٹھونس رہی تھیں۔ بسکٹ کے ڈبے وہ بیک پاکٹ میں رکھ چکی تھیں، مجھے گاڑی چلانا مشکل ہو رہا تھا۔ پائوں کلچ پر رکھتا تو بریک دب جاتی اور بریک دباتا تو ریس بڑھ جاتی۔ یہ بالکل اچانک ہوا تھا۔

بہت برس ہوئے میں نے جانا کہ کسی کو اچانک خوشی عطا کرنے سے کائنات کا رب بہت خوش ہوتا ہے۔ کسی کی توقع سے زیادہ عطا، کسی کی آرزو اور تمنا سے ذرا زیادہ تحسین، بن مانگے مدد کے ساتھ احسان جتائے بغیر بہتر رویہ، مسکراتے ہوئے لفظ، اچھی مہمانداری، بروقت عیادت، غرض اپنے تئیں خوشی کے کئی راستے سوچ لیے تھے اور برسوں سے جب جب موقع ملتا، چاہے وہ لمبے وقفے بعد میسر آتا، اللہ اور اس کے رسول ؐکے لفظوں کو محبوب جان کر محبوب رکھا۔ انسانی زندگی کی تعمیر کو اپنا مقصد زندگی جانا تاکہ میرے اللہ جی مجھ سے راضی رہیں، گھر میں کسی صبح جب سکول وین والا نہ آئے تو بیٹیوں کو اسکول چھوڑنے کی ذمہ داری میری ہوتی ہے، ایسے میں سکول جاتے ہوئے میں سبزہ زار کے جی بلاک کی مارکیٹ ضرور رُکتا ہوں۔ انشراح کو روپے دے کر کہتا ہوں آج کیا چاہیے؟ حالانکہ جانتا ہوں کہ دونوں کو جوس چاہیے ہوتا ہے۔ پھر وہ انتظار کرتی ہے کہ بابا کہیں گے جو جو دل چاہے لے آئیں۔ 8سالہ انورے تزمین زیادہ ایکسپریسو ہے۔ اپنی توقع سے زیادہ چیزیں پا کر پچھلی سیٹ سے اُٹھ کر میرے ماتھے یا گالوں پر پیار کرنے آئے گی اور اس بار بھی ایسا ہی ہوا۔ اس کے اظہارِ تشکر یا اظہارِ محبت کے ساتھ ہی ایک روز میں نے بڑے مان سے پوچھا
’’بیٹا دنیا میں سب سے زیادہ کس سے پیار کرتی ہو؟‘‘
اس نے لمحہ بھر کی تاخیر کیے بغیر کہنا شروع کیا
سب سے زیادہ ماما۔ پھر مم (نانو)، پھر ابو (نانا) پھر بابا۔‘‘
اپنی بیٹی کے پیاروں کی لسٹ میں چوتھے نمبر پر آنا یقینا خوشگوار احساس نہیں تھا۔ مجھے اس لمحے تن بدن میں آگ لگنے والی کیفیت ہی کا سامنا تھا۔ میں ان سے اتنی محبت کروں اور نمبر ملے آخری۔

دس سالوں میں، میں شعوری طور پر تین باتیں ضرور سکھاتا رہا ہوں:
پاکستان کی کم سے کم پانچ بڑی یونیورسٹیوں میں گزرے دس بارہ سالوں میں، میں شعوری طور پر اپنے طلبہ کو تین باتیں بڑی محبت سے سمجھاتا رہا ہوں۔
اول۔ اپنی زندگی کا مقصد اور ہدف (Goal Setting) ابھی سے طے کرو ورنہ خالی ہاتھ رہ جائو گے۔ زندگی گزر جائے گی اور کسی مقصد کے پانے کی خوشی چھو کر بھی نہیں جائے گی۔
دوم۔ محبت ضرور کرو مگر اس کی ترتیب ٹھیک رکھو ورنہ یہ بےترتیبی تمھیں کبھی ٹھیک نہ رہنے دے گی۔ جب جب کسی نئی کلاس کا ٹیسٹ لینا ہوتا تو ضرور پوچھتا، دنیا میں سب سے زیادہ کس سے محبت کرتے ہو؟ کس کے بنا جی نہیں سکتے؟ کس کے بنا ادھورے اور نامکمل رہ گئے؟ پچانوے فیصد جواب ماں باپ آتا، کہیں کہیں بہن بھائی۔ کسی دوست یا کبھی کبھار کسی اُستاد کا نام آجاتا تو ضرور پوچھتا کہ جب وہ زندہ نہیں رہیں گے تو پھر خوشی کہاں سے ڈھونڈو گے، محبت کس سے کرو گے؟
سوم ۔کتابیں پڑھو، انگریزی، اُردو، فارسی، عربی، ترجمہ شدہ جس زبان کی بھی ملے۔ علم و دانش سے بھری۔ کہانیوں اور افسانوں سے سجی یا افکار کے پھول پتے لیے۔ بس اتنا یاد رکھو کہ قرآن کے علاوہ کوئی کتاب حرفِ آخر نہیں۔ پڑھو اور ذہن میں اسے چیلنج کرو۔ آنکھیں بند کرکے کبھی کسی کی مت مانو، چاہے مقامی ہو یا عالمی طور پر مشہور و معروف۔اس کو حق ہے سوچنے، رائے دینے اور کوئی نتیجہ نکالنے کا، تو آپ کو بھی اتنا ہی حق ہے، اس کو رد کرنے، اس سے مختلف سوچنے، اس کے نتائج کا انکار کرنے کا۔ یہ کسی کی حق تلفی نہیں، بطور قاری آپ کا حق ہے، استحقاق ہے، اسے مت چھوڑو۔ یہ نہیں کرو گے تو’’ دولے شاہ کے چوہے‘‘ بن کر زندگی گزارو گے اور ہر لکھنے والا قلم کار، کالم نگار تمھیں تختہ مشق سمجھ کر استعمال کرے گا۔ کچھ عرصے بعد اس کی رائے اور محبوب بدلیں گے تو ساتھ ساتھ آپ بھی کسی ہپنا ٹائزکیے جانے والے معمول کی طرح بن سوچے، بن غور کیے بدلتے جائو گے۔ بےاثر اور بےوقعت ہوتے جائو گے۔ روبوٹ بھلا کسی کی کیا راہنمائی کرسکتے ہیں۔ اس ذہنی کیفیت میں کیا کسی کے دل میں جگہ پائو گے۔ اس لیے یاد رکھو کہ ہیں تو یہ صرف تین کام مگر محبت کی ترتیب سے کرنے والے ہیں۔

کیا انسانی ذہن کی بُنَّت اور مزاج تھانیدار جیسا ہوتا ہے:
بیٹی کی بات سن کر لمحہ بھر کو میں دہل گیا کہ ملک بھر کے نوجوانوں اور اداروں کے مینیجرز کو گیان دیتے، علم و دانش کی باتیں سکھاتے سکھاتے اپنی ہی نورِ نظر، نورِ چشم کو بھول گیا، اس وقت بتانا اور سمجھانا مشکل تھا۔ اب میں موقع کی تلاش میں رہنے لگا، یہ موقع ایک روز ہاتھ آگیا جب مجھے بھی ہفتہ وار چھٹی تھی۔ اس سے پہلے وہ اپنی ماما سے پڑھتی رہیں یا اپنی ٹیوٹر سے میں نے کبھی اپنے پاس پڑھنے کے لیے نہیں بلایا یا بٹھایا، اپنے بچوں کو پڑھانا مشکل ہی نہیں بہت مشکل ہے، اسی لیے میں نے اسے بھاری پتھر سمجھ کر کبھی چھیڑنے کی کوشش ہی نہیں کی۔

ناشتے سے ذرا پہلے ان کو ساتھ لے کر گورمے بیکرزگیا۔ ان کی مرضی کی آئس کریم کے بعد اضافی خوشی کے طور پر چاکلیٹ اور زنگر برگر دلایا۔ واپسی پہ وہی سوال پھر ان کا منتظر تھا۔ ان کے جواب میں بھی رَتی برابر فرق نہیں تھا۔ تب ان کو بتانا شروع کیا کہ ماں باپ اس لیے اچھے ہوتے ہیں کہ انھیں دنیا کے سب سے اچھے انسان ﷺ نے اپنے بچوں کو محبت کرنے کا کہا اور انہیں یہ خیال خود سے نہیں آیا۔ ساری دنیا کے انسانوں کے مہربان رب نے سکھایا۔ سو محبت کرنے کی ترتیب یہ ہوگی کہ سب سے زیادہ محبت اس رب سے ہوگی جس نے اس جہان کے علاوہ ہمیں بھی بنایا، ہمارے پیارے بنائے اور ہمیں ان سے رشتوں میں جوڑا، پھر ہمیں اچھا بنانے کے لیے سب سے اچھے انسان ﷺ کو اپنا نمائندہ اور پیغمبر بنایا، رسول ٹھہرایا اور اس کے ذریعے زندگی کو خوب صورت اور اچھا بنانے والی اچھی اچھی باتیں سکھائیں، اس کے بعد ماں باپ کی باری آئے گی، بہن بھائی اور باقی رشتے دار اور عزیز و اقارب جو جتنا عزیز اور دل کے قریب ہو پھر ان کا نمبر ہوگا ‘‘۔

ایک دو باتیں بتا کر مجھے لگا میرے سمجھانے پڑھانے کا کوٹہ ختم ہوگیا۔ میں آرام سے اخبار لے کر بیٹھ گیا اور وہ اپنا چھٹیوں کا کام کرنے لگیں۔ انسانی ذہن کی بُنَّت اور مزاج تھانیدار جیسا ہوتا ہے جو پہلے بات کرلے، وہی ذہن میں اٹکی رہتی ہے، اسی پر رائے بنتی ہے اور اسی کے حق میں منہ سے بات اور آواز نکلتی ہے۔

چھٹیاں ختم ہونے میں چند روز باقی تھے جب رائے ونڈ روڈ پر یونیورسٹی آف لاہور کے بالکل ساتھ واقع پرائیڈ پبلک اسکول اینڈ کالج کے سربراہ جناب ظفر اقبال نے یاد کیا۔ مجھے وہ اس لیے بھی بہت عزیز ہیں کہ اپنے اسکول کے بچوں کے علاوہ اس کی اساتذات کا بہت خیال رکھتے ہیں۔ 100 سے زائد اساتذات دن بھر کی ٹریننگ کے لیے سامنے تھیں اور موضوع تھا ’’بچوں کی کونسلنگ کیوں کی جائے؟ کیا کتابیں پڑھانا کافی نہیں‘‘؟

وقت وقت کی بات ہے. چند سال قبل لاہور کے پانچ ستارہ ہوٹل میں ایچ آر کے مشہور کنسلٹنٹ جناب عامر صدیق نے کونسلنگ اینڈ منٹارنگ (Mentoring) پر ایک روز کی ورکشاپ کرائی تو اس کی رجسٹریشن فیس 30 ہزار روپے تھی۔ ان کی محبت بھری دعوت پر میں دن بھر وہاں شریک رہا، جہاں ملک کی ہر اہم کمپنی سے ایک ایک دو دو لوگ یہ خطیر رقم خرچ کرکے آئے ہوئے تھے۔ آپ نے کبھی کچھ اچھا پڑھا ہو۔ سیکھا ہو توبنک اکائونٹ میں پڑی رقم جیسا ہوتا ہے۔ چیک کاٹتے ہوئے آپ کو علم ہوتا ہے کہ اصل رقم ہے کتنی اور کس قدر خرچ کی جاسکتی ہے۔ اس صبح وہ ساری باتیں میرے اکاؤنٹ میں موجود تھیں۔ پرائیڈ اسکول کی اساتذات کی اکثریت بہت نوجوان لڑکیوں کی تھی۔ ان میں کچھ سیانی اور سمجھدار سپروائزر اور رابطہ کار بھی اپنی پرنسپل مس افشاں کے ساتھ موجود تھیں۔ اپنی بیٹی کا ذکر کرتے ہوئے ان کی زندگی کی محبتوں کا پوچھا تو جواب دینے والوں کی اکثریت نے اپنے والدین کو ہی مرکز زندگی بتایا۔ ایسے لوگوں کے لیے میں نے بارہا دیکھا کہ جب یہ مرکز محبت زندہ نہیں رہتا تو زندگی نیو کلیس اور گرِڈ اسٹیشن کے بنا رہنے جیسی اور بےوقعت ہوجاتی ہے۔ اللہ معاف کرے لوگ اپنے پیاروں کی لاشوں کو حنوط کر کے رہنے لگتے ہیں کہ ان کے بنا ان کی زندگی کا کوئی مطلب ہی نہ رہا تھا۔

انسانی رشتوں سے محبت مستقل ہو نہیں پاتی :
محبت کی ترجیحات کی عدم درستی کے معاملات سے مجھے بارہا واسطہ پڑا، کہیں سمجھانے سے بات بنی تو کہیں ڈرانے سے۔ انسانی رشتوں سے محبت مستقل ہو نہیں پاتی۔ والدین سے محبت چند ہی سالوں بعد کسی لڑکے اور لڑکی کی محبت تلے دب کر کچلی جاتی ہے۔ اس سال گھروں سے بھاگنے والی 8 ہزار لڑکیوں نے بھی تو کبھی اپنے والدین سے محبت کا دم بھرا ہوگا۔ بھاگ کر شادی کرنے والوں کی محبت کی سوئی کب کہیں اور جا کر اٹک گئی۔ وہ خود بھی نہیں بتا سکتے۔ نوکری، عمدہ تنخواہ، اعلیٰ منصب، بااختیار پوزیشن، امیر رشتہ دار، خوبصورت دوست، اپنی اولاد، اپنا گھر، اپنی جائیداد، اپنی دنیا اور اپنی آخرت۔ عمر گزرنے کے ساتھ ساتھ محبت کے مراکز اس تیزی سے بدلتے ہیں کہ خود حیرت ہونے لگتی ہے کیونکہ بظاہر ہر محبت اس وقت سچی، بے لوث، غیر مشروط اور پائیدار لگتی ہے، مگر اپنی اصل سے ہٹ کر کوئی تعلق اور محبت کیسے مستقل اور پائیدار ہوسکتی ہے۔

زیادہ تو نہیں جانتی آپ نے خودہی بتایا تھا:
ایک اَن جانے نمبر سے فون آیا تو میں خوشی اور حیرت سے اسے سننے لگا، یہ میری چھوٹی بیٹی کی ٹیچر کا فون تھا، اس نے بتایا کہ میں نے مائی سیلف پر بھری کلاس میں بولنے کو کہا توآپ کی بیٹی نے پورے اعتماد سے آنکھیں ٹپٹپاتے ہوئے کہا:
’’دنیا میں سب سے زیادہ محبت اللہ تعالیٰ سے، پھر محمدﷺ سے، پھر آدم سے، پھر نوح سے، پھر اپنی ماما سے، پھر مم سے، پھر ابو سے، پھر بابا سے۔‘‘
ٹیچر نے پوچھا’’ یہ آدم اور نوح کون ہیں؟‘‘
بولی’’زیادہ تو نہیں جانتی آپ نے خودہی بتایا تھا اللہ کے پیغمبر تھے‘‘۔
اب ٹیچر نے اُٹھ کر اسے پیار کیا، سینے سے لگایا اور پوچھا:’’یہ محبت کی ترتیب کہاں سے سیکھی؟ ‘‘ اس نے جواب دیا۔
’’میرے بابا کہتے ہیں، اچھی بیٹیوں کو یہ ترتیب خود سے آتی ہے‘‘۔
پرائیڈ اسکول کی ٹیچرز نے اس روز پورے دل سے محبت کی یہ ترتیب اس لیے سیکھی تھی کہ وہ اپنے بچوں کو کتاب سے ہٹ کر بھی پڑھا اور بتا سکیں۔ دوسروں کے بچوں کو ان کی ذاتی، سماجی اور تعلیمی مسائل میں وقتاً فوقتاً راہنمائی کرسکیں جنھوں نے بچوں کی زندگی کو مشکل میں ڈال رکھا ہے۔

کبھی کوئی خود سے سوچنا، پڑھنا، غور کرنا اور نتائج نکالنا نہیں سکھاتا:
ایسی ہی مشکل میں، میں نے یونیورسٹیوں میں آکر فلسفے یا نفسیات کی کتابیں اور مضامین پڑھنے والوں کو پایا۔ انھیں کبھی کوئی خود سے سوچنا، پڑھنا، غور کرنا اور نتائج نکالنا نہیں سکھاتا۔ یہ مضامین لکھنے والے مغربی دانشوروں کے ان خیالات پر مشتمل ہیں جنھیں اکثر انھی کے شاگردوں نے غلط ٹھہرایا۔ مگر چونکہ ہمارے ہاں نصاب سے ہٹ کر کچھ پڑھنے کی عادت ہے نہ حاجت کہ کوئی بتائے تو ہی ذہن اس طرف چلے۔ نتیجہ یہ ہوتا ہے کہ دو دو چار چار نامکمل اسباق پڑھنے والے بھی یوں رب کے ہونے اور ان کے خالق ہونے سے انکار کردیتے ہیں جیسے اللہ نے خود انھیں اس امر کی اطلاع دی ہو کہ میں اب نہیں رہا اور دنیا میرے بنا ہی بنی اور چل رہی ہے۔ یہ ’’انکار‘‘ شروع میں ایک محدود پیمانے پر’’فیشن‘‘ میں چل رہا تھا، پھر انٹرنیٹ نے اس کو پر لگا دیے، بنگلہ دیش کے کچھ لوگوں نے اس مہم کو مہمیز دی ہے جن میں سے اب تک آٹھ مارے جا چکے ہیں اور اس کی فہرست کا ذکر آ رہا ہے۔ ایسی بدقسمت روحیں ہمارے ہاں اس لیے فوراََپیدا ہو جاتی ہیں کہ انہوں نے کسی کو کسی نئی بات پر بات کرتے سنا ہوتا ہے۔

منکر سے ہاں کرانی بہت مشکل ہو جاتی ہے:
جب جب کوئی ایسی دُکھی روح میرے پاس آئی، اسے سمجھانے اور راہ راست پر لانے میں بڑی تگ و دو کرنی پڑی۔ منکر سے ہاں کرانی بہت مشکل ہو جاتی ہے۔ اثبات سے نفی میں جانا تو اونچائی سے گہرائی میں اُترنا ہے۔ اکثر انسان یہ سفر دوڑ کر طے کر لیتے ہیں اور محبت کے رشتے کے علاوہ کوئی اسے نہیں روک سکتا۔ ایف سی کالج سے تعلق رکھنے والے صابر چودھری جو اب دبئی میں ماہر نفسیات ہیں، بارہا اس تکلیف دہ صورتِ حال سے گزرے جب ان کے استاد بھری کلاس میں اللہ سے انکار کر دیتے اور اس کے لیے مغربی مصنفین کے حوالوں سے اپنا دل شاد اور صابر کا ناشاد کرتے۔ صابر کی پوری بات سُن کر بھی کبھی کبھی دل کہتا مسلمان ماں باپ کے گھر پیدا ہونے والا کوئی کتنا بھی ناخلف ہو جائے یوں منہ کھول کر کیسے کہہ سکتا ہے۔ وہ پروفیسر صاحب گزشتہ دنوں فوت ہوئے تو جنازے میں 13 لوگ شریک تھے اور ان میں سوائے ایک کے کسی نے زندگی میں کبھی کسی کی نماز جنازہ پڑھنا تو دور کی بات کسی جنازے میں گئے بھی نہیں تھے۔ وہ پریشان تھے کہ جس خدا کا برسوں انکار کیا، اب دفن کرتے ہوئے اس سے کیا اور کیسے مانگیں۔ نتیجتاً بغیر کسی جنازے کے دو اصحاب نے مردے کو اٹھایا اور قبر میں یوں گرا دیا جیسے کھاد کی بوری پھینکتے ہیں۔ ان گرانے والوں میں ایک ان کا اپناصاحبزادہ بھی شامل تھا، جو مٹی ڈال کر یہاں دوبارہ کبھی واپس نہ جانے کے لیے گھر واپس آ گیا۔

اس کتاب نے خدا پر یقین اور ایمان ختم کرنے میں بہت آسانی پیدا کی:
چند روز ہوئے اسکیم موڑ کے قریب واقع ’ایک فلیکس شاپ‘ جانے کا اتفاق ہوا۔ جہاں مجھے دو فلیکس بورڈز بنوانے تھے۔ کمپوزر کی شیو بڑھی ہوئی تھی اور بےنیازی کے اس کے چہرے پر ڈھیر لگے تھے۔ کام کے دوران اچانک اس نے نیٹ سے ایک کتاب کھولی اور بتانا شروع کر دیا کہ میں فارغ وقت میں ایسی نایاب کتابیں پڑھتا ہوں۔ اس کتاب پر پابندی ہے، یہ بہت پرانی ہے مگر بہت اچھی ہے۔ کتاب کی خوبی یہ بتائی کہ اس نے خدا کی ذات سے یقین اور ایمان ختم کرنے میں بہت آسانی پیدا کی۔ پھر اس نے کہا یہاں میں اکیلا نہیں ہوں۔ ایتھیٔسٹ (Athiest) دہریہ خیالات کے حامل لڑکوں کا ایک بہت بڑا گروپ ہے نیٹ پر بھی اور لاہور میں بھی۔ ہم کتابیں آپس میں شیئر کرتے ہیں، ملتے ہیں، دلائل کا تبادلہ کرتے ہیں۔ ہماری کمیونٹی ابھی ’گے‘ (ہم جنس پرست مردوں) کمیونٹی کی طرح چھوٹی ہے مگر تیزی سے اس میں اضافہ ہو رہا ہے۔ پھر اس نے فخر سے بتایا کہ پچھلے سال میری شادی ہوئی تھی۔ چھ ماہ میری بیوی بہت تنگ رہی، اب وہ بھی ہماری کمیونٹی کا حصہ ہے اور سرگرمیوں میں بڑھ چڑھ کر حصہ لیتی ہے۔

کوئی اور ہوتا تو منکر اور مرتد کہہ کر فارغ ہو جاتا:
ہم عام طور پر مسائل کو اسی طرح نمٹنے کے نام پر پھیلاتے آئے ہیں، کوئی اور ہوتا تو منکر اور مرتد کہہ کر فارغ ہو جاتا۔ ان بےچاروں کو تو استاد بھی ایسے ملتے رہے ہیں کہ خدا کے حوالے سے کوئی بات پوچھ لیں تو وہ چڑ کر کہتے ہیں:
’’پڑھائی پر دھیان دو، اِدھر اُدھر کی باتیں چھوڑو!‘‘
جبکہ خود خدا یہ کہتا اور یاد دلاتا ہے کہ جیسے تم اپنے آبائو اجداد کا ذکر کرتے ہو، مجھے پسند ہے کہ میرا بھی ویسے ہی ذکر کرو بلکہ اس سے بھی زیادہ مگر ہماری زندگی میں سب کچھ زیر بحث آتا ہے سوائے اپنے رب کی عظمت اور اس سے بے لوث محبت کے، وہ محبت جو کبھی کم نہیں ہوتی، جس کا مرکزِ نگاہ موجود رہتا ہے اور محبت سے دیکھتا اور خیال سے تھام کر رکھتا ہے۔ ایک منکر اپنی بیوی بیچاری کو اس عذاب میں گھسیٹ لے گیا، ہم اللہ سے محبت کا دعویٰ کرنے والے کم ہی اس طرح کا تکلف کرتے ہیں۔
جب جب گھر اور اسکول میں اپنے بچوں سے رابطے کی کمی ہوتی ہے، انھیں زندگی کے مقصد سے آگاہی نہیں دی جاتی۔ آخرت میں کامیابی کا ہدف ہی واضح نہیں ہوتا، اس کا ذکر ہی نہیں ہوتا نہ ویلیوز کا تعین ہو پاتا ہے نہ گول سیٹنگ ہو پاتی ہے۔ محبت کی ترتیب بتانے، سمجھانے میں کوتاہی بہت بھاری پڑتی ہے۔ کٹی پتنگ جیسے ذہن کسی بھی بےبرگ و بار سوکھی شاخ سے اٹک اور لٹک سکتے ہیں۔ فیشن کے طور پر غیر ملکی کتابوں کے ترجمے پڑھنے سے شروع ہونے والی کہانی اب کم پڑھے لکھے نوجوانوں تک آن پہنچی ہے اور یہاں پہنچتے پہنچتے دامنِ دل خالی کر جاتی ہے۔ دوسروں کی لکھی اور کہی باتیں جو پڑھنے والوں کے ایمان، اعتقاد، اخلاق پر کبھی چھُپ کر دھیرے سے اور کبھی اعلانیہ اور سامنے سے حملہ کرتی ہیں۔ ہم اپنے بچوں کو ان کے مقابلے کا نہ گُر بتا پاتے ہیں نہ انھیں رد کرنے کا سلیقہ سکھاتے ہیں، چونکہ خود ہم نے ان پر کبھی سوچا نہیں ہوتا۔ ہم سڑک پار کرنا سکھا دیتے ہیں، موٹر سائیکل چلانا، اپنی عزت بچانا، اعلیٰ درجے کی کامیابی کو پانا، امیر اور خوب صورت لوگوں کو شادی کے لیے قابو کرنا، کون سا گُر ہے جو ہم سے چھُوٹا ہوا اور بھولا ہوا ہے۔ مگر لمحہ بھر کو سوچیے تو سہی دل کو دُکھی کرنے والی یہ بڑھتی کمیونیٹیز آخر کسی والد، کسی اُستاد کی کوتاہی کا ہی تو ثمر ہیں جو نہ انھیں زندگی کا مقصد بتا پائے، نہ محبت کی صحیح ترتیب سکھا پائے۔ کسی روز آپ بھی تو اپنے بچوں، دوستوں اور شاگردوں سے پوچھ لیں کہ’’بیٹا دنیا میں سب سے زیادہ کس سے پیار کرتے ہو؟‘‘
اور وہ لمحہ بھر کی تاخیر کیے بغیر کہنا شروع کرے کہ
سب سے زیادہ ماما۔ پھر مم (نانو)، پھر ابو (نانا) پھر بابا۔‘‘

اپنی بیٹی کے پیاروں کی لسٹ میں چوتھے نمبر پر آنا کسی طور خوشگوار احساس نہیں تو میرے رب کو ہمارے پیاروں کی زندگیوں میں اپنے نام سے محبت کی بے ترتیبی کیونکر اچھی لگے گی۔ اپنے آس پاس دیکھیے، ممکن ہے کوئی خالی دل، کچھ خالی آنکھیں آپ سے راہنمائی کی طالب ہوں، اپنے رب کی محبت اور اس سے جوڑنے کی صورت میں ان کی روح میں ڈالنی ہوگی، ان کے دامنِ دل میں اس سوغات کو ڈالنا ہو گا۔ اللہ کی محبت سے دور یا محروم ہوجانے والوں کو بُرا بھلا کہنے اور کاٹ کر پھینکنے سے تو بات نہیں بنے گی، ہاں بدلتے دنوں میں اب ہمیں نئے بیان کی بھی ضرورت ہوگی اور بیانیہ کی بھی، نئے دلائل درکار ہوں گے اور نئی ڈکشن اور نئے انداز بھی، تبھی ان دلوں میں اس کی جگہ بنے گی جس نے یہ دل دیے تھے اور جس کے بنا یہ دلدل بنتے جا رہے ہیں۔ زندگی میں اللہ جی کی محبت اور محبتوں میں اس محبت کی صحیح ترتیب کو سکھائے بنا ہر کہانی نامکمل اور ہر رشتہ ادھورا ہے۔

دلیل ڈاٹ پی کے پر اتنی شاندار تحریریں اور دلائل پڑھ کر جہاں یک گونہ خوشی کا احساس ہوتا ہے وہیں میں کبھی کبھی کانپ بھی جاتا ہوں کہ کسی روز رب نے ان سارے دانشوروں کو سامنے کھڑا کرکے پوچھ لیا کہ تمہارے ہوتے ہوئے میرے نام اور اختیار سے انکار کرنے والوں کی کمیونٹیز بنتی رہیں اور تم ساری دنیا کے کاموں پر دلیلیں لاتے رہے، ایک تم سے دلیل اور محبت کی یہ ترجیح نہ ٹھیک ہو سکی، ان کی خالی روح کی آبادی کا سامان نہ ہو سکا، تو جواب دینا کس قدر مشکل ہوجائے گا۔ ہم اللہ کے بارے میں کسی کا ایک جملہ پڑھ کر سر دھننے کے خواہش مند تو ہیں مگر اس کے بارے میں خود پیار سے سوچنے، پڑھنے، اور بات کرنے تک سے ڈرتے ہیں. ہمیں تو خدا کی تاریخ تک ایک غیرملکی اور غیرمسلم مصنفہ آرم سٹرانگ کی لکھی ملتی ہے، خود ہمیں بےروح سیاسی موضوعات اور شخصیات پر تبصروں اور دلیلوں سے ہی فرصت نہیں ملتی!
٭٭۔۔۔۔٭٭