Category: دنیائے اسلام

’’میرا گھر میری روح ہے۔ اسرائیل نے مجھ سے میرا گھر چھین لیا۔ میں اپنے بچوں کو لے کر کہاں جاؤں گا؟ کیسے سانس لوں گا؟ میں تنہا ان سے کیسے لڑوں؟ آج میں اس قدر کمزور ہوگیا کہ میں اپنی روح کو بچانے کے لیے بس فریاد کر رہا ہوں‘‘۔
یہ الفاظ50 سالہ ایک مظلوم فلسطینی مسلمان کے ہیں، جنہوں نے اپنے آبائی گھر کے اسرائیلی غاصبوں کے قبضے کے خلاف ایک ویڈیو پیغام کے ذریعے اپنے مسلمان بھائیوں سے اپنے دکھوں کی دوا کے لیے فریاد کی۔

المیہ ہے کہ امت مسلمہ پچھلے سترسالوں سے فلسطین کے مظلوم مسلمانوں کے لیے کچھ نہ کرسکی۔ 1946ء میں بحر احمر سے لے کر شمال میں بحر متوسط تک کی ساری پٹی، مصر سے لے کر اردن اور شام کی حدود تک سارا علاقہ فلسطینی مسلمانوں کے پاس تھا۔ اسرائیلی یہودی شمال تک محدود تھے جبکہ اِس وقت صرف غزہ کی چھوٹی سی پٹی، اور مغربی کنارہ جس کا رقبہ 5655 سکوائر کلومیٹر ہے، اس میں بھی صرف 18 فیصد زمین فلسطینیوں کے پاس ہے۔ تاریخی طور پر دیکھا جائے توفلسطین پر اسرائیل کے قبضے کی عملا ابتدا 1855ء میں اس وقت شروع ہوئی جب عثمانی فرمانروا نے فلسطین بالخصوص ’’قدس‘‘ کی زمین فروخت کرنے کے لیے پابندی اٹھائی، اور مشہور برطانوی یہودی بینکار ’’موسی مونٹیفوری‘‘ نے امریکی یہودی سے مل کر، قدس میں غیر مسلم شخص سے ایک باغ اور پھر ایک بہت بڑا پلاٹ خریدا۔ یہ جگہ آج بھی یہودیوں کے ہاں ’’دیوار مقدس‘‘ کے قریب دوسری مقدس جگہ ہے۔ پھر رفتہ رفتہ یہودیوں کی آبادی فلسطین میں بڑھتی گئی اور 1948ء میں برطانیہ کے آشیرباد سے یہودیوں نے ’’ریاست در ریاست‘‘ کے تحت اسرائیل نام سے فلسطینی ریاست میں اپنی ’’غاصب ریاست‘‘ کا اعلان کردیا، جس کے ساتھ ہی فلسطین میں انسانیت کی تذلیل کا بھیانک کھیل شروع ہوگیا۔

افسوس کہ اُس وقت امت مسلمہ باہمی رسہ کشیوں میں مصروف رہی اور اسلامی ممالک کے حکمران محض اپنی کرسیاں بچانے کے لیے رسمی مذمتی بیانات سے زیادہ کچھ نہ کرسکے۔بجا کہ پاکستان سمیت اقوام متحدہ کے ممبر 31 ممالک نے اسرائیل کو اب تک تسلیم نہیں کیا۔ لیکن ایک طرف اسرائیل کو تسلیم نہ کرنا اور دوسری طرف اسرائیل کے اتحادی امریکہ اور برطانیہ سے قریبی دوستی، ( اسرائیل کو امریکہ کی طرف سے حالیہ دنوں دی جانے والی 38 بلین امریکی ڈالرز کی فوجی امداد جو لامحالہ اسرائیل فلسطینی مظلوموں پر گولہ بارود گرانے میں استعمال کرے گا) اس پر خاموشی سے، یقینا اسرائیل کو تسلیم نہ کرنے والے ممالک کی اصل حقیقت بخوبی واضح ہوجاتی ہے۔ سفارتی تعلقات کی اہمیت سے انکار نہیں کیا جاسکتا، مگر اپنے نظریے، سوچ، عقیدے حتی کہ اپنے مسلمان بھائیوں کو قربان کرکے تعلقات بنانا پست اور کمزور قوموں کی علامت ہے۔ اسرائیل کو دی جانے والی حالیہ امریکی امداد پر او آئی سی ایسی اسلامی ممالک کی نمائندہ تنظیموں کی خاموشی بھی بے بسی کی علامت ہے، جس سے اسرائیلی جارحیت کو مزید پھیلنے کا موقع مل رہا ہے۔

عالم اسلام کی مشترکہ بےحسی اور غفلت ہی کا نتیجہ ہے کہ دوماہ پہلے دنیا کے مشہور سرچ انجن گوگل، جو دنیامیں نقشہ جات کے حوالے سے گوگل میپس کے ذریعے منفرد اور آسان سہولت فراہم کرتا ہے، اور جسے پوری دنیا میں استعمال کیا جا رہا ہے، نے فلسطین کو دنیا کے نقشے سے غائب کرکے سارا علاقہ اسرائیل میں شامل دکھایا۔گوگل کا یہ دوہرا سلوک ہنوز برقرار ہے۔ اسی طرح چند دن پہلے سوشل میڈیا کی مشہور ویب سائٹ فیس بک سے اسرائیل نے ایک معاہدہ کیا، جس میں اسرائیلی وزیرداخلہ گلڈ اردن اور وزیر انصاف آئیلٹ شیکڈ نے فیس بک انتظامیہ سے میٹنگ کی، اور انہیں اس بات پر مجبور کیا کہ فیس بک پر اسرائیل کے خلاف کسی بھی قسم کا کوئی مواد اپلوڈ کیا جائے یا فلسطین کی حمایت میں کوئی بھی شخص کسی بھی قسم کا ڈیٹا اپلوڈ کرے تو اسے فورا ڈیلیٹ کردیا جائے۔ فیس بک انتظامیہ نے اسرائیل کو مکمل تعاون کا یقین دلایا۔ آئیلٹ شیکڈ نے کہا کہ پچھلے چارہ ماہ میں اسرائیل مخالف مواد ہٹا نے کے لیے 158 درخواستیں فیس بک کو اور 13 درخواستیں یوٹیوب کو بھیجیں، جن کا 90 فیصد مثبت جواب ملا۔

مذکورہ تین واقعات سے بخوبی اندازہ لگایا جاسکتا ہے کہ عالم اسلام کس قدر بےحسی اور غفلت کا شکار ہے۔ امریکہ نے تاریخ میں پہلی مرتبہ کسی بھی ملک کو 38 بلین ڈالرز کی فوجی امداد دی ہے، اس پر کسی اسلامی ملک کی طرف سے کوئی مذمت سامنے نہیں آئی۔ جب ہمارا یہ حال ہے تو دیگر غیرمسلم ممالک کیوں کر فلسطینی ایشو پر مسلمانوں کے حمایت کریں گے؟ اسرائیلی جنگی جرائم پوری دنیا کے سامنے ہیں کہ کیسے فلسطینیوں کو آئے روز گولیاں مارکر شہید کیا جاتاہے، کیسے ان کے گھروں اور زمینوں پر قبضہ کیا جا رہا ہے۔ لیکن اس کے باوجود انسانی حقوق کے نام نہاد علمبرداروں کے منہ پر اسرائیل کو مزیددی جانے والی یہ امریکی امداد ایک طمانچہ ہے۔ پھر گوگل اور فیس بک انتظامیہ کا باوجود مساوات اور آزادی اظہار رائے کا نعرہ لگانے کے، اسرائیل کی حمایت میں فلسطینوں کے ساتھ دوہرا سلوک بدترین خیانت اور بھونڈے انداز میں تاریخ مسخ کرنے کا بھیانک حربہ ہے، جس کی جتنی مذمت کی جائے کم ہے۔

فلسطین یعنی قبلہ اول کی حفاظت امت مسلمہ کی مشترکہ ذمہ داری ہے۔ تبھی عمر بن الخطاب رضی اللہ عنہ سے لے کر صلاح الدین ایوبی ؒ تک مسلمانوں نے مل کر قبلہ اول کی سربلندی اور حفاظت کے لیے جان لڑائی۔ آج اگر ستر سالوں میں ہمارے سامنے فلسطین کے اکثر حصے پر یہودیوں نے قبضہ کرلیا، تو شاید کل تک گریٹر اسرائیل کی حدود حرمین شریفین تک وسیع ہوجائیں، جو اسرائیل سے تقریبا پندرہ سو کلومیٹر کے فاصلے پر واقع ہیں۔ یاد رہے کہ گریٹر اسرائیل کا یہ ہدف شام، عراق اور یمن کے راستے پھیلایا جا رہا ہے۔اس لیے بروقت جاگنا امت مسلمہ کی ذمہ داری ہے۔ سوشل میڈیا سے لے کر بین الاقوامی میڈیا اور امریکہ تک سارے ذرائع اسرائیل استعمال کررہاہے، تو پھر کیوں عالم اسلام بالخصوص او آئی سی دنیا کے دیگر ممالک کو ساتھ ملا کر امریکہ اور اسرائیل کے حالیہ گٹھ جوڑ کے خلاف اقوام متحدہ کے پلیٹ فارم پر آواز بلند نہیں کرتا؟ بحیثیت مسلمان یہ ہر ایک کا فرض ہے کہ وہ فلسطینی مسلمانوں اور قبلہ اول کی حفاظت و مدد کرے ،ان پر کیے جانے والے مظالم دنیا کے سامنے آشکار کرے، اور گوگل، فیس بک، یوٹیوب سمیت امریکہ اور اقوام متحدہ کے فلسطینی مظلوموں کے ساتھ روا رکھے جانے والے دوہرے سلوک کو واضح کرے۔

خبر یہ تھی کہ الحمدللہ ثم الحمد للہ شام کے شہر حلب میں شامی مجاہدین نے بشاری اور روسی فوج کا گزشتہ دو سال سے کیا گیا محاصرہ توڑ دیا۔ داعش حسب روایت بشار اور روس کے خلاف لڑنے کے بجائے پیچھے سے حملے کرتی رہی. درد اور غم کی اس بستی میں یہ خبر اک امید کی کرن بن کر نمودار ہوئی اور غمزدہ چہروں پر خوشیاں بکھیر دیں.
اللہ کا شکر بھی ادا کیا اور یہ احساس بھی ہوا کہ میرے آقائے دوجہاں نے اپنی امت کو جو اک جسم کی مانند کہا تو بےشک سچ کہا. ایسے مواقع پر اس کا احساس شدت سے ہوتا ہے. چاہے ہم کوسوں میل دور ہوں مگر اپنے مسلمان بہن بھائیوں پر ڈھائے گئے ظلم کو دل کی گہرائی سے محسوس کرتے ہیں.

ہم بے بس ہوتے ہیں مگر
بخدا تمھارے بہتے لہو کے ساتھ ہمارے بھی اشک بہتے ہیں
ہماری دعائوں اور آہ و زاریوں میں تمھارا بھی حصہ رہتا ہے
تم پر ڈھایا جانے والا ہر ظلم ہم اپنے دل پر محسوس کرتے ہیں
تمھاری ہر چوٹ پر ہم بھی سسک سسک جاتے ہیں
تمھارے بچوں کی اک اک سسکی ہمارے کانوں میں گونجتی اور نیندیں اڑا دیتی ہے

شام میں ایٹمی و کیمیائی ہتھیاروں کا نشانہ بنتے ہزاروں تڑپتے دم توڑتے بچے ہمارے دن کا سکون اور رات کی نیندیں چھین لیتے ہیں
تمھارے بچوں کی سمندری پانیوں پر پر تیرتی لاشیں ہمارے دلوں کو زخم زخم کردیتی ہیں.
تمھارا جلتا ہوا ’حلب‘ ہمیں بے چین بے سکون کر دیتا ہے
تمھیں فلسطین میں زخم لگتا ہے، ہم پاکستان میں تڑپ اٹھتے ہیں
تم پر مصر میں ٹینک چڑھائے جاتے ہیں، ہمارے پاکستان میں صف ماتم بچھ جاتی ہے
تمھاری اسماء بلتاجی شہید ہوتی ہے، یہاں ہماری مائیں اپنی بیٹی کو اسماء بنانے کی خواہش کرلیتی ہیں
تمہھں برما میں زندہ جلایا جاتا ہے، اس آگ کی تپش ہمیں یہاں اپنے دل پر محسوس ہوتی ہے
تم بنگلہ دیش میں پھانسیوں پر لٹکائے جاتے ہو، ہم پاکستان میں بہتے اشکوں کے ساتھ تمھارے جنازے پڑھتے ہیں
تم پر استنبول میں شب خون مارنے کی سازش ہوتی ہے، ہماری رات مصلے پر اس کی ناکامی کی دعائیں کرتے گزرتی ہے
تمھارے لاشے کشمیر میں اٹھتے ہیں مگر کاندھے ہمارے بوجھ سے ٹوٹنے لگتے ہیں

تمھارے دکھ جہاں ہمیں رلاتے ہیں، وہیں تمھاری تمہاری چھوٹی چھوٹی خوشیاں ہوں یا بڑی فتح، ہمیں بھی خوشی سے نہال کر دیتی ہیں
تمھاری فاطمہ مصر کے کالجوں میں اول آتی ہے اور اپنے اسیر والد کے ساتھ جیل میں اپنی خوشیاں شیئر کرنے جاتی ہے تو ہم بھی یہاں اس خوشی کا سرور محسوس کرتے ہیں
تمھاری باغیوں کو کچل کر سازش کو ناکام بنانے کی فتح کی خوشی میں تم استنبول میں جشن مناتے ہو، ہم یہاں کراچی میں اس کا ساتھ دیتے ہیں
تمھارے حلب میں ٹوٹتا محاصرہ ہمارے دلوں کو باغ باغ کر دیتا ہے

پھر کون کہتا ہے کہ ہم تم سے الگ ہیں؟
بخدا ہم تم سے ہرگز دور نہیں
ہم ویسے ہی تمھارے درد پر تڑپتے ہیں جیسے ہاتھ کے درد میں آنکھ بہنے لگتی ہے
جیسے کٹی ہوئی ٹانگ ہو تو جسم کا کوئی عضو نہیں سو پاتا، ہر اک ساتھ جاگتا، اور تکلیف میں اس کا ساتھ دیتا ہے۔
ہم بھی تمھارے ساتھ ہیں
ہمارے دل تمھارے لیے دعا گو ہیں
اور ہمارے کان تمہاری فتح کے ہر دم منتظر
ہماری آنکھیں تمھیں فتح یاب دیکھنے کی خواہش مند

اے امت کے جسم کے حصو!
تمہیں یہ کامیابیاں مبارک ہوں
خدا تمھیں ہر قدم پر کامیاب و کامران ٹھہرائے. آمین

۱۹۶۷ء میں اسرائیل سے عربوں کی شکست کے بعد مولانا سید ابوالحسن علی ندویؒ نے عالمِ عرب کے مختلف شہروں میں اہم تقریبات سے خطاب کیا، مولانا نے ان تقاریر میں عالمِ عرب اور عالمِ اسلام کے حقیقی المیہ اور اس کے اسباب کے موضوع پر سیر حاصل گفتگو فرمائی، مولانا کی یہ تقاریر ’’عالمِ عربی کا المیہ‘‘ کے نام سے کتابی صورت میں موجود ہے۔

مولانا کی یہ تقاریر آج بھی سیکولر اور روشن خیال حکمرانوں کی نفسیات کے مطالعہ و تجزیہ اور اُمت کی بیداری کے سلسلہ میں اہم نوعیت کی حامل ہیں۔ ہم مولانا کی صرف دو تقاریر کی تلخیص پیش کر رہے ہیں۔

واقعات سے سبق حاصل کرنے کی نفسیات

حالیہ واقعات جو کسی توضیح و تشریح یا کسی حاشیہ آرائی کے محتاج نہیں، ہم میں سے ہر ایک اس کو اچھی طرح جانتا ہے، اس کی تلخی کو محسوس کرتا ہے اور ایک مسلمان کی حیثیت سے میں بھی آپ لوگوں کے تمام مصائب و تکالیف میں شریک ہوں، ان حادثات کی اگر کوئی قیمت ہو سکتی ہے تو یہی کہ ہم ان سے سبق حاصل کریں اور ان سے صحیح، یقینی، صاف اور بے غبار نتائج اخذ کریں۔ یہ المناک حادثہ جس کی ہم نے اپنی عزت و وقار اور اپنے علاقہ سے بڑی سے بڑی قیمت ادا کی ہے، اس کا کوئی فائدہ اگر ہو سکتا ہے اور اس میں کوئی روشن پہلو نکل سکتا ہے تو یہی کہ ہم اس سے عبرت، نصیحت اور سبق حاصل کریں، میں اس کے اسباب کی تفصیل نہیں بیان کرنا چاہتا، نہ اس موضوع پر کوئی لمبی بات کرنا چاہتا ہوں، یہ بہت پامال اور مشہور و معروف موضوع ہے، ممکن ہے اس سے اُکتاہٹ پیدا ہو جائے۔

ان المناک حادثات کا سب سے پہلا نتیجہ جس کو اچھی طرح ذہن نشین کر لینا ضروری ہے، یہ ہے کہ لادینی اور ملحدانہ قیادتیں ناکام ہو چکی ہیں۔

لادینی اور ملحدانہ قیادتوں کی ناکامی

ان حادثات نے روزِ روشن کی طرح واضح کر دیا ہے جس میں شک و شبہ کی کوئی گنجائش نہیں رہ گئی ہے کہ لادینی قیادتیں جو عربوں و مسلم اقوام پر مسلط ہو گئی تھیں، اپنے تجربہ میں ناکام ہو گئیں۔ اگرچہ میں اس کو تجربہ نہیں سمجھتا بلکہ یہ طے شدہ پروگرام، سوچے سمجھے منصوبے، دانستہ اور ارادی کارستانیوں اور سازشوں کا نتیجہ ہے۔

یہ قیادت صرف فلسطین کا مسئلہ حل کرنے ہی میں ناکام نہیں ہوئی ہے بلکہ اپنی قوم کی سلامتی، اس کی حفاظت اور ملک کی عزت و وقار اور ان کے حدود کی حفاظت میں بھی ناکام رہی۔

لادین قیادتوں کی طرف سے اپنے ترکش کے آخری تیر کا استعمال

کہا جاسکتا ہے کہ ان ترقی پسندانہ نظریات پر مبنی قیادتوں کو کچھ رعایت ملنی چاہیے جو ترقی یافتہ، متمدن اور انقلابی عہد کے تقاضوں کے ساتھ ہم آہنگی کی کوشش کر رہی ہیں اور غیرمرئی اور غیبی عوامل کو تسلیم نہیں کرتیں بلکہ صرف موجود اور مرئی حقائق پر یقین و اعتماد رکھتی ہیں، ان کو اس کا موقع ملنا چاہیے کہ وہ درپیش مسائل اور عرب قوم کی قیادت کے میدان میں اپنا کردار ادا کر سکیں۔ تو یہ بھی ہو چکا، اﷲ نے ان کو میدان میں آنے اور اپنی صلاحیتوں کو آزمانے کا پورا پورا موقع دیا، دانا و بینا پروردگار کی اس میں بھی ایک حکمت ہے کہ یہ قیادتیں اپنے ترکش کا آخری بہترین، تیز ترین اور قوی ترین تیر بھی استعمال کر کے دیکھ لیں، اﷲ کی مشیت یہ رہی کہ یہ قیادتیں ان تمام بہتر سے بہتر وسائل سے مستفید ہوں جن کا ذکر تاریخ کے کسی زمانہ میں بھی ملتا ہے یا جن تک فکرِ انسانی کی رسائی ہو سکتی ہے اور جن کا وجود روئے زمین پر ممکن ہے اور ان تمام اسلحہ سے لیس ہوں جن سے روئے زمین کی کوئی بھی طاقت بہرہ ور ہو رہی ہے، قدرت نے کسی چیز میں بخل نہیں کیا، ان کی آرزوئوں میں رکاوٹ نہیں ڈالی، رائے عامہ کی تشکیل، ادب و صحافت کے استعمال، اداروں کی تنظیم اور نظریات و خیالات کی ترویج و اشاعت کے لیے ان کو جدید، بہتر اور موثر ذرائع و وسائل مہیا کیے گئے، اﷲ کی حکمت بالغہ جس کی گہرائی اور گیرائی کا کوئی اندازہ نہیں لگا سکتا، کا تقاضا یہی تھا کہ وہ طاقتیں جو اپنے کو اس عہد کی قیادت کا اہل سمجھتی تھیں اور قوم کی رہنمائی کی دعوے دار تھیں، اس زمانہ کی بہترین ایجادات و اختراعات ان کی دسترس میں ہوں اور وہ ان کو استعمال کر کے بھی دیکھ لیں، قیادت کا میدان ان کے لیے خالی ہو اور بغیر کسی خطرہ یا رکاوٹ کے پورے ساز و سامان، ذہن و دماغ اور اعلیٰ صلاحیتوں کے ساتھ ان کو اپنے جوہر دکھانے کا موقع ملے لیکن اس کے باوجود ان کو انتہائی شرمناک شکست ہو۔ یہ مثال اگر انسانی تاریخ نہ کہا جائے تو بھی، کم از کم مسلم تاریخ میں نہیں ملتی۔

امت پر جبراً غلبہ حاصل کرنے اور اپنے سردارﷺ سے رشتہ توڑنے والوں کا حشر

محمدﷺ کے پیغام کی مخالفت کرنے والوں، آپ کی عالمی اور ابدی قیادت کو چیلنج کرنے والوں اور نبوت کا دعویٰ کرنے والوں کا ہمیشہ یہی انجام ہوا ہے، قرآنِ کریم میں ہے کہ:

ان شانئک ھو الابتر ’’بیشک آپؐ کا دشمن ہی بے نام و نشان ہونے والا ہے‘‘۔

اس آیت کو میں رسول اﷲﷺ سے بغض و حسد رکھنے والے اور آپ کی قیادت سے اختلاف کرنے والے قریش کے کسی اُجڈ اور اکھڑ شخص کے لیے مخصوص نہیں مانتا، اسی طرح ’’ابتر‘‘ میرے خیال میں صرف نسلی اور نسبی انقطاع ہی کا نام نہیں بلکہ اس کا مفہوم اس سے بہت وسیع ہے، اس کا پورا مفہوم یہ ہے کہ:

’’اے محمد(ﷺ) جو بھی آپ کا مخالف ہو، آپ سے دشمنی رکھے، آپ کی عالم گیر قیادت کو چیلنج کرے، آپ کی قیادت سے قوم کا تعلق منقطع کر کے ان کی گردنوں پر خود مسلط ہو جائے اور قوم کے ذہن و دماغ سے روحانیت کے مبارک عنصر کو خارج کرنا چاہے، اس کا انجام ہے بدتوفیقی ناکامی، ذلت، گمنامی اور بے نشانی‘‘۔

یہی انجام ہوا مسلیمہ کذاب کا، اسود عنسی کا، طلیحہ اسدی کا، سجاح کا، ابو طاہر جنابی کا، عبید بن میمون کا، حسن بن صباح کا، بہاء اﷲ ایرانی اور غلام احمد قادیانی کا اور اسلام سے بغض و عداوت رکھنے والے انتہا پسند قوم پرست لیڈروں کا بھی ہر زمانہ میں یہی انجام ہوا ہے اور جو شخص بھی اس اُمت پر ناجائز طور سے اور زبردستی غلبہ حاصل کرے گا اور اُمت کو محمدﷺ کی ابدی قیادت سے الگ کرنے کی کوشش کرے گا، اس کا انجام بھی وہی ہو گا، قرآن نے جس کی خبر دی ہے اور تاریخ سے جس کی ابدیت ثابت ہے۔

مفسرین کو اﷲ تعالیٰ جزاے خیر دے، انھوں نے اس آیت کی تشریح میں جو کچھ لکھا ہے، اس کے اعتراف و احترام کے ساتھ میں اس آیت کے مفہوم کو اس قدر محدود نہیں سمجھتا، میرے نزدیک اس کا مفہوم وسیع ہے اور یہ آیت اعلان کرتی ہے کہ ’’محمدﷺ کے ہر حریف و رقیب اور آپ کی قیادت کو چیلنج کرنے والے ہر بدنصیب کا یہی انجام ہو گا‘‘۔

تاریخ، عقلِ سلیم اور حوادث سے صحیح نتائج اخذ کرنے والا باشعور ذہن ان رہنمائوں کو اس ناکام تجربہ کو دوبارہ دہرانے کی اجازت اور اس کا موقع ہرگز نہیں دے سکتا، انسان کی انفرادی زندگی میں بھی ناکام تجربات کا دہرانا خطرناک ثابت ہوا کرتا ہے اور قوم کے قائدین کی غلطیوں کا اعادہ تو قوم کے مستقبل اور اس کے انجام کے لیے انفرادی زندگی کے محدود نقصان سے کہیں زیادہ مضرت رساں اور تکلیف دہ ہو گا۔

چکنی چپڑی باتیں کرنے والے سیکولر حکمران اور ان کی سرگرمیوں کا نتیجہ

خود غرض اور مفاد پرست رہنمائوں کا یہ طریقہ جو اپنے نفس کی پرستش اور اقتدار کی اونچی کرسیوں کے سامنے سجدہ ریزی کو اپنا شعور بنائے ہوئے ہیں جو اپنے اغراض اور اپنی خواہشات کی تکمیل میں کسی بھی چیز کو معیوب نہیں سمجھتے، جنھیں نہ دین و مذہب کا خیال ہے، نہ انسانیت کا پاس، نہ افراد کی آزادی کا لحاظ، نہ آخرت پر یقین، نہ اپنے ذاتی فوائد کے سامنے کسی قومی و ملکی مصلحت کی فکر، نہ دوسروں کے خیالات و نظریات اور اصول و ضوابط پر اعتماد، نہ ان کا لحاظ جو خود ’’اعلیٰ اقتدار‘‘ اور افکار و نظریات کے بت تراشتے ہیں، پھر انہی کے سامنے سربسجود ہو جاتے ہیں اور ان کے سامنے رائے، کسی نظریہ کو خاطر میں نہیں لاتے، اس قسم کے رہنما اور سربراہ اپنی قوم کے گناہوں کا نتیجہ ہیں اور اس کی پاداش میں ان پر مسلط کر دیے گئے ہیں، قرآن ان کی صحیح اور سچی تصویر کشی کرتا ہے:

ترجمہ: ’’بعض انسان ایسے ہیں جن کی بات دنیا کی زندگی میں بڑی بھلی لگتی ہے، وہ اپنے دل کی باتوں پر اﷲ کو گواہ بناتے ہیں حالانکہ وہ سخت جھگڑالو ہیں اور جب وہ قابو پاتے ہیں تو زمین میں ان کی سرگرمیاں اس لیے ہوتی ہیں کہ اس میں فساد پھیلائیں اور جانوں اور کھیتوں کو برباد کریں اور اﷲ فساد پسند نہیں کرتا اور جب ان سے کہا جاتا ہے کہ اﷲ سے ڈرو تو غرور ان کو گناہ پر آمادہ کرتا ہے، ان کے لیے تو بس جہنم ہی کافی ہے اور وہ بہت ہی بری جگہ ہے‘‘۔ (البقرۃ:۲۰۴۔۲۰۶)

ان لیڈروں کی اس سے بہتر اور سچی تصویر اور کیا ہو سکتی ہے؟ اس کا ایک ایک جزو ان پر منطبق ہو رہا ہے، ان کی چکنی چپڑی باتیں سنیے، انسانیت، آزادی، جمہوریت، اشتراکیت، انسانی حقوق اور معاشرتی انصاف جیسے موضوعات پر ان کی، ان کے حواریوں اور ان کے گرگوں کی رواں اور فصیح و بلیغ عبارتیں پڑھیے، عرب ممالک کے کسی بھی مرکز سے بہترین اور دل نواز نشریات سنیے، اخبارات میں شائع ہونے والی ان کی وجیہہ و شکیل تصویریں دیکھیے، آپ تعجب کریں گے کہ یہ وجیہہ اور بارعب سورما کیا اسرائیل سے شکست کھا سکتے ہیں؟

اگر آپ قرآن کی تصدیق اور اس کی عملی تفسیر چاہتے ہیں تو ذرا اخبارات میں گذشتہ واقعات کی تفصیل پر ایک نظر ڈال لیجیے اور ان حادثات سے ان رہنمائوں کے دل و دماغ پر جو اثرات مرتب ہوئے ہیں، اُن پر غور کیجیے اور اسی طرح قرآن کی یہ آیت پڑھیے:

ترجمہ: ’’اگر تم ان کو دیکھو تو ان کے جسم تم کو بھلے لگیں گے اور وہ کچھ کہیں تو تم ان کی باتیں سنو گے جیسے وہ ٹیک لگائی ہوئی لکڑیاں ہیں، وہ سمجھتے ہیں کہ ہر آواز ان ہی کے خلاف ہے، وہی دشمن ہیں، ان سے محتاط رہو‘‘۔ (المنافقون:۴)

قرآن کی اس آیت میں ان کی صحیح اور حقیقی تصویر پوری طرح اور مجسم شکل میں آجاتی ہے، یہ قرآن کا ابدی معجزہ ہے۔

حالیہ واقعات سے ملنے والا یہ دوسرا سبق ہے۔

قرآن کہتا ہے کہ ’’جب یہ قابو پاتے ہیں تو ان کی ساری سرگرمیاں زمین میں فساد پھیلانے اور جان و مال برباد کرنے کے لیے ہوتی ہیں‘‘۔ ذرا ان ملکوں میں جان و مال کی بربادی پر نظر ڈالیے جہاں یہ خود سر اور خوفِ خدا سے آزاد حکمرں مسلط ہو گئے ہیں جو جدید فلسفوں اور شیطانی نظریات کا پرچار کر رہے ہیں، انھوں نے اپنے ملکوں کو بالکل خالی کر دیا ہے جیسے موسمِ خزاں میں سرسبز و شاداب درخت پھولوں اور پتیوں سے بالکل خالی ہو جاتے ہیں، مصیبت کے مارے یہ ممالک بالکل ویران ہو گئے ہیں، تمام دینی و دنیاوی نعمتوں سے خالی ان میں نہ بڑے بڑے علما رہ گئے ہیں، نہ وہ ماہرین جن پر علاقہ فخر کرتا تھا۔ ان ممالک میں نہ آزادی ہے، نہ خود اعتمادی۔

روشن خیال قیادت کا کارنامہ، قوم کو اس کی خوداعتمادی سے محروم کرنا

خوداعتمادی جو انسان کی بہترین دولت ہے اور ہر زمانہ میں انسان اس سے متمتع ہوتا رہا ہے، یہاں تک کہ قدیم فرمانروائوں اور ظالموں نے بھی ان سے یہ دولت نہیں چھینی لیکن نام نہاد ’’جمہوریتوں‘‘ اور ’’ترقی پسند قیادتوں‘‘ نے مسلم اور عرب اقوام کو اس دولت سے بھی محروم کر دیا، ان کی خوداعتمادی جاتی رہی، ان کو اپنی صلاحیتوں پر اعتماد ہے، نہ اپنی عقل پر، نہ اپنی کارگزاریوں پر۔ طالب علم میں اگر خوداعتمادی نہ ہو تو کتنا ہی ذہین ہو، امتحان میں کامیاب نہیں ہو سکتا، فوج کا ایک سپاہی اگر تلوار نہ رکھتا ہو تو کوئی زیادہ فکر کی بات نہیں، بندوق نہ ہو، کوئی حرج نہیں، گولیاں ختم ہو جائیں، جب بھی کوئی پریشانی کی بات نہیں لیکن اگر اسے اپنے اوپر اعتماد نہ ہو، اپنے اصول و نظریات پر اعتماد نہ ہو، اپنے دین پر اعتماد نہ ہو تو اس کے پاس کچھ بھی نہیں۔

اس قوم کو پہنچنے والا سب سے بڑا نقصان یہی ہے جس کی تلافی نہیں ہو سکتی۔

اقوام و ملل کی مثال رواں دواں نہروں جیسی ہے، اس میں جھاگ اٹھتا ہے، پتھر آتے رہتے ہیں، لکڑیاں بھی بہتی رہتی ہیں اور نہر کی روانی میں کوئی فرق نہیں آتا۔

ترجمہ: ’’جھاگ خشک ہو کر اڑ جاتا ہے اور جو انسانوں کے لیے نفع بخش ہوتا ہے وہ زمین پر ٹھہر جاتا ہے‘‘۔ (الرعد:۱۷)

زندگی میں نہ مصائب و آلام کی چنداں اہمیت ہے، نہ شکست و ناکامی کی۔ اہمیت ہے قوم کی خودشناسی اور خوداعتمادی کی، ضمیر کی بیداری کی اور گرد و پیش کے صحیح شعور و ادراک کی۔

لیکن جب قوم کا احساس اتنا مردہ ہو جائے کہ اسے فتح و شکست کا فرق ہی نہ محسوس ہو، اس کا شعور اتنا خام ہو کہ دوست و دشمن میں تمیز نہ کر سکے، اسے نہ دشمن سے عداوت ہو، نہ دوست سے محبت تو ایسی قوم خود ہی اپنے لیے خطرہ اور اپنے آپ کی دشمن بن جاتی ہے۔

ہماری موجودہ قیادت نے ہم کو اس صلاحیت اور اس قوت کے خزانہ سے عاری اور بے بہرہ کر دیا ہے حالانکہ اسی کی بدولت ہم نے تاریخ کے ہر دور میں ایسے حملوں اور مصیبتوں کا سامنا کیا ہے کہ کسی دوسری قوم کو ان سے سابقہ پڑتا تو وہ صرف تاریخ کے صفحات کی زینت بن کر رہ جاتی لیکن اس امت نے پختہ ایمان، زندہ شعور اور اسی خوداعتمادی ہی کی وجہ سے تاریخ کے ہر موڑ پر بڑے بڑے مہیب اور مہلک حملوں کا مقابلہ کیا ہے، ایک شکست خوردہ فوج بھی اگر ایمان اور ایمانی و نبوی تربیت کے پیدا کردہ اسلحہ سے عاری نہ ہو تو اس کی اہمیت پست نہیں ہو سکتی اور بالآخر کامیابی اس کے قدم چومے گی، کیا آپ نے غزوۂ حمراء الاسد کا واقعہ نہیں پڑھا؟ رسول اﷲﷺ اور آپ کے اصحاب (رضوان اﷲ اجمعین) زخموں سے چور غزوۂ احد سے واپس ہوتے ہیں، انھوں نے ابھی میدانِ جنگ کی گرد بھی نہیں جھاڑی ہے، اسی کٹھن موقع پر رسول اﷲﷺ آگے بڑھ کر قریش سے دوبدو ہونے کا حکم دیتے ہیں، کامیابی کے نشہ میں جن کے دماغ آسمان پر پہنچ رہے تھے۔

دنیا کی کسی بھی فوج کو اتنے زخم لگے ہوئے ہوں تو وہ دوبارہ حملہ کرنے کی جرأت نہیں کر سکتی تھی لیکن وہ لوگ دوبارہ مقابلہ کے لیے بڑھے، اگرچہ مقابلہ نہیں ہوا کیونکہ قریشی الٹے پیروں واپس ہو گئے۔

کشتی کے سوراخ کی صورت میں بچائو کی واحد صورت

ان حوادث سے ہمیں اندازہ ہوتا ہے کہ ہماری زندگی غلط پٹری پر پڑ گئی ہے اور ضروت اس امر کی ہے کہ پہلی فرصت میں اس غلطی کو تلاش کر کے اس کی تلافی کریں۔ جب تک یہ غلطی باقی ہے، جب تک کشتی میں کوئی سوراخ ہے جس سے پانی اُبل رہا ہے، زندگی کی کشتی خطرہ سے باہر نہیں آ سکتی۔ آج عرب اقوام اور ان قیادتوں کی مثال اسی
کشتی کے سواروں جیسی ہے جس کے پیندے میں سوراخ تھا اور پانی آرہا تھا لیکن کشتی کے سوار خیالی بحری قزاقوں سے بچنے کی فکر میں تو پریشان رہے لیکن اس سوراخ سے غافل رہے، ایسی کشتی اور ایسے سواروں کا انجام کیا ہو سکتا ہے؟

حکومتوں اور انسانی معاشرہ کی تاریخ کا مطالعہ کیجیے، ایک قوم اٹھتی ہے اور ایک طاقتور اور شان و شوکت کی حکومت قائم کرتی ہے۔ ابتدا میں اُن کی طبائع پر جرأت، بہادری، استقلال اور متانت کا اثر غالب رہتا ہے، وہ دھن کے پکے اور محنت و مشقت کے عادی ہوتے ہیں، پھر ان میں کمزوری پیدا ہونے لگتی ہے، ان کی ہمتوں اور ان کے عزائم میں گھن لگ جاتا ہے، رفتہ رفتہ یہ روگ رگ رگ میں سرایت کر جاتا ہے، یہ قومیں ہوا و ہوس اور خواہشاتِ نفسانی کو چھوٹ دے دیتی ہیں، عیش و تنعم اور تفریحات کے وسائل و اسباب بہت زیادہ ہو جاتے ہیں، موسیقی، رقص و سرود، تصویریں و جنسی جذبات کو تسکین دینے والی دوسری اشیا کی کثرت ہو جاتی ہے، یہ انکی حکومت اور قومی عزت و شرف کا آخری وقت ہوتا ہے۔ اقبال نے اسی تاریخی حقیقت کو ان الفاظ میں ادا کیا ہے:

آ تجھ کو بتائوں میں تقدیرِ اُمم کیا ہے

شمشیر و سناں اوّل، طائوس و رباب آخر

جب پورا معاشرہ، پوری قوم اور حاکم طبقہ اس فساد کا شکار ہو جائے، وہ لہو و لعب، رقص و سرود اور عیش و عشرت میں ڈوبا رہے، ہنسی مذاق کو سنجیدگی اور متانت اور دل بہلانے والے کاموں کو بہادری، مردانگی، عزیمت اور استقلال پر ترجیح دینے لگے تو اس کا نتیجہ سوائے تباہی کے اور کیا ہو سکتا ہے۔