Author: زبیر منصوری

اے اللہ ہم اپنے گناہوں کا اعتراف کرتے ہیں کیا تو اپنے رحم سے ہماری سزا معاف نہیں کر سکتا؟
اے اللہ کیا ہماری جان ان ”شریفوں“ سے کسی طرح چھوٹ نہیں سکتی؟
اے اللہ ہم کن ظالموں کے اقتدار میں رہ رہے ہیں جو ہماری عورتوں کو سر بازار رسوا کرتے ہیں.
اے اللہ جو سیاسی مخالفین کو موت کے گھاٹ اتار دیتے ہیں.
اے اللہ جن کے لیے انسان کی حثیت ٹشو پیپر سے زیادہ نہیں.
ظالم شہباز شریف اور مستقبل کے بےرحم حاکم حمزہ شہباز! یہ عورت کیا تمہاری رعایا نہیں؟ کیا یہ تمہیں کہیں سے کلثوم اور مریم نواز نہیں لگتی؟ کیا اس کی بار بار سر سے اترتی چادر تمہاری حمیت کو کوئی کچوکا نہیں لگاتی؟
تمہارے تنخواہ دار بوٹ پالشیے اور مالشیے کہیں گے کہ اس نے قانوں ہاتھ میں لیا ہے، قانون کو پتھر مارا ہے مگر مجھے بتاؤ کہ کیا یہ قانون واقعی سنگسار کر دیے جانے کے قابل نہیں؟ معاشرے کی بےبس عورت کیا کرے؟ کیا تم نے اپنے دہائیوں کے اقتدار میں اس کے لیے سستے اور آسان انصاف کا کوئی دروازہ بنایا ہے؟
تم جمہوری حاکموں سے تو وہ بادشاہ اچھے تھے جنہوں نے اپنے دروازوں پر زنجیر عدل لٹکا رکھی تھی، تم نے تو وہ کتے باندھ رکھے ہیں جو کسی کو تمہارے قریب نہیں پھٹکنے دیتے، اسی لیے تم موت کے خوف سے سات پہروں میں بھی سکون سے محروم ہو۔
کوئی بتائے کہ آخر معاشرے کی مظلوم بے بس عورت جائے کہاں؟
ظالمو! ایسے لوگوں کو تو قرآن بھی تلخ نوائی کا حق دیتا ہے تم وہ بھی چھین لینا چاہتے ہو؟
فرض کرو اس عورت کا رویہ غلط تھا، فرض کرو یہ جھوٹ بول رہی تھی۔
تو کیا پھر یہ اس سلوک کی حق دار تھی؟
کیا اس کا ”حق“ اسے گھر کی دہلیز پر دیا گیا تھا کہ اس سے اس کے ”فرض“ پورا کرنے کا مطالبہ کیا جاتا؟
کیا اگر یہ غصہ میں شاہدرہ چوکی آن پہنچی تھی تو کوئی اسے نرمی سے سمجھانے والا نہیں تھا؟
کوئی اس کی بات سن کر اس کے دکھ کا مداوا کرنے والا نہیں تھا؟
سڑکیں اور پل تعمیر کرنے کو ترقی سمجھنے والو انسانوں کے رویوں کی تعمیر اصل ترقی ہے۔
خدا کے لیے بھارت اور چین کے اسٹریٹجک ایجنڈوں میں رنگ بھرنے سے پہلے اپنے پیارے لوگوں کے کردار میں رنگ بھرنے کے منصوبے بناؤ ورنہ سڑکیں اور راستے بھی بن جائیں گے، ٹرینیں اور پٹڑیاں بھی آباد ہو جائیں گی مگر انسانوں کے کردار اور اخلاق برباد ہو چکے ہوں گے۔
خاتون پر پولیس تشدد کی ویڈیو

https://www.youtube.com/watch?v=2nCHuATFY1k

ہم کریں بات دلیلوں سے تو رد ہوتی ہے
ان کے ہونٹوں کی خاموشی بھی سند ہوتی ہے

سراج الحق کرپشن کو ہدف بنائے،
اس کے لیے اس وقت منصوبہ بندی کرے جب کسی کے وہم و گمان میں نہ ہو،
اپنے سالانہ تنظیمی منصوبہ عمل میں کرپشن پر مہم کو شامل کرے، سال بھر کیا، کرپشن کے خاتمے تک کےلیے تحریک کی جزئیات طے کرے اور پھر اپنی پوری تنظیم کو اس کے حصول پر لگا دے،
سراج الحق کرپشن فری پاکستان کےلیے ٹرین مارچ کرے، جلسے جلوس اور سیمینار کرے،
سراج الحق کرپشن مکاؤ پاکستان بچاؤ کا اعلان کرے، سڑکوں پر اس کےلیے مارچ کرے،
سراج الحق خود امانت و دیانت کا نمونہ ہو، اسے بہترین فنانشل مینجمنٹ اور ایمانداری کے ایوارڈ ملیں،
اس کے کارکن وزراء کرپشن سے دور رہیں، دوسری جماعت کے سربراہوں سے ستائش اور شاباش پائیں،
وہ کرک میں کرپشن پر ضرب لگائے یا کراچی میں اس کے خلاف اعلان جہاد کرے،
وہ کرپشن کے ناسور کے خلاف دھرنے دے یا بار رومز میں جا کر چیخے اور چلائے،
وہ کرپشن کے خلاف سب سے پہلے سپریم کورٹ جائے یا کالی پٹیاں باندھے،
اس کی ساری دلیلیں رد ہوں اور کوئی ابھی ہونٹ بھی نہ کھولے تو خبر پہلے بن جائے؟
کوئی اپنے دائیں بائیں کرپٹ لوگوں اور ضمیر فروشوں کو لے کر کھڑا ہو جائے تو کوئی اسے متوجہ کرنے کو بھی گناہ سمجھے،
تمہی کہو یہ انداز گفتگو کیا ہے؟
میڈیا اپنا اعتبار کھو رہا ہے، ڈیٹا بتا رہا ہے کہ آنے والی نسل ٹی وی سے سوشل میڈیا کی طرف منتقل ہو رہی ہے، الیکٹرونک سے ڈیجیٹل کی طرف رجوع بڑھتا جا رہا ہے،
پھر تیرا کیا بنے گا میڈیا؟
یاد رکھنا میڈیا گرد کا طوفان اٹھا کر زیادہ لوگوں کو کچھ دیر تک دھوکہ تو دے سکتا ہے اور کچھ لوگوں کو زیادہ دیر تک بھی دھوکہ میں رکھ سکتا ہے مگر وہ زیادہ لوگوں کو زیادہ عرصہ تک دھوکے میں نہیں رکھ سکتا.
حال کا لکھنے والا چاہے جو بھی لکھے، وقت کا بے رحم مورخ جب سچ لکھے گا تو وہ سراج الحق کو دیانتداری کا پیمانہ قرار دے گا، وہ سراج الحق کو ان لوگوں میں شامل کرے گا جو دامن نچوڑ دیں تو فرشتے وضو کریں.
وہ لکھے گا کہ جب سراج الحق اور ایک سراج صاحب پر ہی کیا موقوف ہزاروں دیانتداروں پر مشتمل ایک گروہ موجود تھا، اس وقت اس بد نصیب قوم نے اپنے لیے شریفوں زرداریوں اور ترینوں کا انتخاب کیا تھا.
مؤرخ کے ہاتھ اس وقت کپکپا جائیں گے اور اس کی آنکھیں بھیگ جائیں گی، جب وہ دریافت کرے گا کہ سراج الحق کی ٹیم میں وہ نعمت اللہ خان بھی موجود تھا جس نے ساری نظامت کے اختتام پر ایک چیک کاٹ کر ساری تنخواہ صدقہ کر دی تھی اور ایسے دامن جھاڑ کر گھر چلا گیا تھا جیسے منصب و اختیار اور مال و اسباب نہ ہوں کوئی بلا ہو،
مؤرخ اس عنایت اللہ خان کو بھلا کیسے بھولے گا جسے اس کی ایمانداری پر اس کا وزیراعلی ہر اہم اصلاحاتی کمیٹی کا سربراہ بنا کر مطمئن ہو جاتا تھا، جس کی سربراہی میں پولیس، احتساب، بلدیات اور اس جیسے دیگر کئی اصلاحات تجویز اور عمل سے ہمکنار ہوتی تھیں، اور اس کا نام کیا لینا، اس کے کام پر دوسرے اپنی مہر لگا دیتے تھے مگر وہ پھر بھی خدمت کےلیے ہر دم مستعد رہتا تھا.
میری دعا ہے کہ سراج الحق میرا امیر میرا قائد میرا ہمدرد و غمخوار قائد اپنی بے نیازی پر قائم رہتے ہوئے اپنی پارٹی کے غیر معمولی کردار کا پرچارک کر سکے۔
کیونکہ سب کو اپنا ڈھول خود پیٹنا ہوگا کوئی کسی کا ڈھول نہیں پیٹے گا.

عمران خان آج بھی ویسا ہی جی دار ہے،
آج بھی امید بن سکتا ہے!
اگر
وہ سخت گیری، جلد بازی اور ذاتی انا کی بنیاد پر فیصلے کرنا چھوڑ دے،
وہ جان لے کہ سیاست ساتھ لے کر چلنے کے فن کا نام ہے،
بند گلی کے سفر کا نام نہیں،
وہ اپنے اردگرد نظر ڈالے اور ایسے لوگ جمع کرے جو اس کی طرح ایماندار ہوں،
وہ اپنے قیمتی اثاثے اپنی ٹیم کو سیلابی پانی کی طرح ”برباد“ نہیں دریائی پانی کی طرح ”آباد“ کرنے والا بنانے کے لیے تربیت اور ٹریننگ کا سسٹم بنائے،
وہ پلاننگ اور دور رس منصوبہ بنائے،
وہ محض حکمران بننے کے بجائے قائد بننے کے راستے پر چلے،
وہ خیبرپختونخوا کو خوابوں کا نگر بنا کر دکھا دے،
وہ عوامی قوت کو اسٹیبلشمنٹ سے نجات کے لیے استعمال کرے نہ کہ انگلی کے اشاروں کا منتظر رہے۔

میرے عزیز عمران!
دیکھو! لاکھوں لوگ اب مایوسی کے سیلاب میں ڈوبے تو تمہاری دنیا اور آخرت کو بھی لے ڈوبیں گے۔
خدا کے لیے ان کی معصوم امیدوں کو اپنی غیر ضروری جرات اور بڑھک بازی سے ضائع نہ کرو،
خوب سمجھ لو کہ بہادری اور بےوقوفی میں باریک سی لائن ہوتی ہے۔
دیکھو! برسوں بعد پٹواریوں اور زرداریوں کے علمبرداروں سے مایوس قوم کا عام آدمی تمہاری طرف متوجہ ہوا ہے اور تم؟
کریز چھوڑ کر ایمپائر کلب کی طرف دیکھنے لگ گئے؟
کاش تمہیں کوئی قاضی بابا جیسا شفیق اور مخلص سرپرست میسر رہتا،
کاش تم کسی کی سنتے اور مانتے،
یا پھر کاش کچھ بھلے لوگوں کے پاس تمہیں پارٹی وسائل فراہم کرنے اور ہیلی کاپٹر پر سفر کرانے کے اسباب ہوتے۔
عمران لوٹ آؤ!
یہ آخری اوور ہے!
کہتے ہیں کہ عقلمند وہ ہے جو دوسروں کے تجربے سے سیکھ لے،
تم اپنے تجربوں سے ہی سیکھ لو تو عقلمند تو کہلاؤ گے، کامیابی بھی تمھارے قدم چومے گی۔

یاد رکھیے!
اکثر زندگی میں آپ مجموعی طور پر اسی نوے فیصد درست ہوتے ہیں مگر لوگ یا آپ خود اپنی دس بیس فیصد خامیوں کو اتنا بڑھا چڑھا کر، ان کی گارنشنگ Garnishing کر کےان کو اتنا بڑا بنا دیتے ہیں کہ آپ کو لگتا ہے آپ بس برائیوں ہی کا مجموعہ ہیں۔ یہ خامی انسان سے کچھ کر گزرنے کا حوصلہ، ہمت، جذبہ چھین لیتی ہے اور اسے ایک بےمصرف چیز بنا دیتی ہے۔

توازن میرے پیارو توازن!
اللہ نے ہمیں بڑے کاموں کے لیے پیدا کیا ہے اور اس میں خود احتسابی نہایت ضروری ہے مگر اتنی ہی کہ جتنی سالن میں نمک۔
اور ہاں!
ضروری نہیں آپ کا کڑا احتساب کرنے والا آپ کا مخلص اور خیر خواہ ہی ہو، بس آپ کی اصلاح ہی چاہتا ہو، وہ کسی ویب سائٹ کا مالک بھی ہو سکتا ہے، لائیکس اور ویوز سے اس کی روزی روٹی بھی وابستہ ہو سکتی ہے، بےچارے کو اپنی نئی نویلی ویب سائٹ کے ”تقاضے“ بھی پورے کرنے ہوتے ہیں اور یہ تو آپ کو پتہ ہی ہے سوشل میڈیا پر عمران خان، جماعت اسلامی، متحدہ، نون لیگ یا کچھ چھوٹے موٹے دین دار گروپ ایکٹو ہیں، اس لیے آپ ان میں سے کسی کے ”چھتے“ میں بلاگ کا ”پتھر“ مار دیں اور جی بھر کے ویوز سمیٹ لیں وہ کیا کہتے ہیں کہ
”ہینگ لگے نہ پھٹکری۔“
اور ہاں اللہ نے ہر ایک کے حصہ کے بےوقوف پیدا جو کیے ہیں ،
اب آپ اور میں سوچ لیں کہ ہم کس کے حصے کے ہیں؟
کیا کہا نہیں بننا بے وقوف؟
تو بس پھر ایسوں ویسوں کو توجہ دینا ذراچھوڑ دو پھر دیکھو۔
ہاں مگر مخلص، معتدل، دیانتداراور اللہ و رسول کے وفادار لکھاریوں کوضرور پڑھو۔
کہتے ہیں دشمن پر نہیں، اس کی نفسیات پر حملہ کرو۔
تھوڑے لکھے کو بہت جانو۔

خوش آمدید ۔ مگرذرا سنبھل کر!

صاف ستھرا روشن سا چہرہ
اس پر سجی داڑھی
سر پر جالی کی سادہ سی ٹوپی یا کوئی عمامہ
عموما سفید کرتہ اور ٹخنوں سے آوپر تک کی شلوار
کندھے پر ایک بڑا سا رمال رکھے
پاوں میں چپل یا سینڈل پہنے
کسی نوجوان کو دیکھتے ہی پہلا خیال کیا آتا ہے؟
مدرسہ کا طالب علم ہے
درست!
اور دوسرا ،تیسرا ،چوتھا اور پانچواں خیال؟
سچ بتائیں؟
پرانے زمانہ کا نوجوان
دقیا نوسی خیالات
سخت مزاج
ہر بات پر کفر اور اسلام کے فتوے دیتا
اپنے علاوہ باقی سب کو کمتر مسلمان سمجھنے والا
زمانہ سے دور
وغیرہ وغیرہ
ممکن ہے آپ کی باتوں میں وزن بھی ہو مگر خاطر جمع رکھیں اب جلد صورتحال بدلنے جا رہی ہے
ٹی وی تو نہیں مگر موبائل اور انٹر نیٹ نے آس “پرانے زمانے کےنوجوان” کو تیزی سے وقت کے قریب کر دیا ہے اور اس میں ایک بڑا کردار جامعہ الرشید، دار العلوم کورنگی،جامعہ منصورہ سندہ ،جامعہ امجدیہ ،جامعہ بنوریہ اور ایسے ہی دیگر اداروں نے بھی انجام دیا ہے
اب مدارس میں تیزی سے ایک ایسی نسل پروان چڑھ رہی ہے جو آنے والے کل میں سے اپنا پورا حصہ وصول کرنا چاہتی ہے یہ لوگ جان گئے ہیں کہ مقابلہ کی اس دنیا میں خود کو انگریزی اور دیگرزبانوں سے مسلح کرنا کتنا ضروری ہے ؟یہ اب نیٹ استعمال کرتے اور واٹس ایپ کے گروپ بناتے ہیں، فیس بک پر ایکٹو ہیں اور ٹوئیٹر کو جاننے لگے ہیں یہ اب نعمان علی خان کی انگریزی تقریریں سنتے ہیں اور ویسا بننے کے ڈرے ڈرے سہی مگر خواب دیکھنے لگے ہیں
یہ ذاکر نائک کو سنتے اور پسند کرتے ہیں یو ٹیوب اور دیگر سائیٹس نے دنیا کو ان کی انگلیوں کے اشاروں پر کیا پہنچایا یہ اب ان میدانوں میں جیتنے کے جذبوں سے سرشار ہوتے جاتے ہیں۔
ان کے ذہن کھل رہے ہیں اساتذہ کا احترام اب بھی لازم مگر اب یہ سوال بھی کرنے لگے ہیں اور اختلاف بھی
کئی تو آپ کو پرائویٹ یونی ورسٹیون مین ایم فل اور پی ایچ ڈی کرتے ملیں گے
ان کی وضع قطع پر نہ جائیں یہ اندر سے تبدیلی قبول کر رہے ہیں اور کریں بھی کیا؟ تبدیلی کائنات کی بڑی بڑی حقیقتوں میں سے ایک ہے اسے قبول کئے بغیر چارہ بھی تو نہیں ہے نا!
یہ اب وژن اور ٹائم منیجمنٹ کی ورکشاپس بھی اٹینڈ کرتے ہیں اورمسقبل کے خواب بھی دیکھتے ہیں

کالجز اور یونی ورسٹیز کے نوجوانو ہوشیار!
مد مقابل محنتی بھی ہے اور فوکسڈ بھی مستقل مزاج بھی ہے اور سیدھے دماغ کا بھی اور ہر طرح کے حالات کو برداشت کرنے کی صلاحیت بھی رکھتا ہے، اگلے برسوں میں مقابلہ سخت بھی ہو سکتا ہے اور مشکل بھی ۔۔۔

خوش آمدید طلبہ مدارس عربیہ
خوش امدید۔۔
بس یہ سوچ لیجئیے گا تنگ ذہنی کو وہیں اپنے دار الاقامہ کی کسی کھونٹی سے ٹانگ کر آئیے گا،سخت تلخ اور دین کے خلاف کسی کھلی بات کو برداشت کرنے کا حوصلہ ،سننے اور سامنے والے کی سمجھ، اصطلاحات ،سوچ اور زبان میں جواب دینے کا سلیقہ سیکھ کر آئیے گا اور ہاں یہ سلیقہ شاید درسگاہ سے نہ ملے شاید کسی ذاکر نائیک سے مل جائے۔۔۔۔
اساتذہ کا احترام اپنے دل میں ضرور رکھئیے گا مگر اسے دوسروں کے دل و دماغ میں بالجبر اتارنے کی کوشش میں مت لگ جائیے گا
اپنے مسلک کو ہرگز مت چھوڑئیے گا مگر دوسرے کے مسلک کو بھی ہرگز مت چھیڑئیے گا
مطالعہ کفر کا بھی کھلے ذہن سےکرنا سیکھیں اور متاثر اپنے مسلک کی غلط بات سے بھی نہ ہوں
دیکھئیے گا یہ دنیا آپ کا “مدرسہ ” تو ہے نہیں یہاں تو کفر غالب ہے اور مقابلہ “برف کے دماغ “سے دیر تک اور دووووور تک منصوبہ بندی کر کے کرنا ہے ۔۔
آخر ی بات!
دل ،دماغ اور بازو کشادہ کر کے آئے تو چھا جاؤ گے
ورنہ جہاں سے آئے ہو وہیں لوٹا دیے جاؤ گے۔

میں الیاس گھمن کو نہیں جانتا
مگر
میں یہ ضرور جانتا ہوں کہ اس دنیا میں جو بڑے سے بڑا پارسا ہے، وہ بھی اللہ کو چیلنج نہیں کر سکتا کہ وہ پاک صاف ہے، اس لیے بے شک اس پر پڑی ستاری کی چادر ہٹا دی جائے
تو پھر پارسائی اور گناہ گاری میں بس اتنا ہی فرق ہوا ناں کہ میرے رب نے ایک کی چادر ڈھکی ہوئی ہے اور دوسرے کی ہٹا دی۔
یہ نیک نام، وہ بدنام؟
یہ تقی اللہ متقی، وہ بے حیا؟
بھائیو!
افراد کی ذاتی خامیاں اچھالنا دراصل غلیظ کیچڑ میں پتھر مارنا ہے، اس کے نتیجے میں بس گندگی ہی پھیلتی ہے، بدبو ہی بڑھتی ہے، خرابی ہی جگہ پاتی ہے جبکہ ایسے افراد جو اجتماعی معاملات کے ذمہ دار ہیں، ان کی وہ خرابیاں جن کا تعق اجتماعی خرابی سے ہے، انہیں پوری احتیاط سے بیان کرنا اور یہ نیت رکھنا کہ اس سے آپ کا مقصد محض اصلاح ہے، دین تو ہمیں بس یہی اصول سکھاتا ہے۔
ایسے حالات میں کہ جب دین داروں کو سامنے رکھ کر دین کی فضیلت و شرف کی پگڑی کو سر بازار رسوا کیا جا رہا ہو، اس کا حصہ بننا، اس پر مزے لے لے کر تبصرے کرنا، اسے فروغ دینا، اس سے لطف اٹھانا باوجود اس کے کہ سامنے والے فریق نے آپ کے معاملے میں ظلم کی انتہا ہی کیوں نہ کی ہو بہرحال درست نہیں۔
بد قسمتی سے طبقہ علماء نے جس طرح دین کی آڑ میں بدترین دنیا داری کرنے والوں کو کھلا چھوڑا ہوا ہے، اس کی وجہ سے صورتحال یہاں آن پہنچی ہے کہ دین سے محبت رکھنے والے بھی خود کی بورڈ اور ماؤس تھام کر چڑھ دوڑے ہیں اور میرے نبی ﷺ کا دین بیک وقت اندر اور باہر سے شدید تیر اندازی کی زد میں ہے۔
ایسے میں
وصل کے اسباب پیدا ہوں تری تحریر سے
دیکھ کوئی دل نہ دکھ جائے تری تقریر سے
اور ہاں یاد رکھنا انسان اپنے ہر لفظ اور خیال پر آزمایا جائے گا، اسے ثابت کرنا ہوگا، انسان بھول، غلطی، گناہ اور نزغہ، شیطان کا آسان شکار ہے۔ یہ بھی یاد رکھنا کہ زندگی پہیے کی طرح گھومتی ہے، اگر آج کسی کی ”لوز بال“ تمہارے بیٹ کی زد میں ہے تو کل ترتیب تبدیل بھی ہو سکتی ہے، کوئی دوسرا اوپر اور میں اور آپ نیچے ہو سکتے ہیں، اس لیے لفظوں کے تیر برساتے اور حظ اٹھاتے ہوئے ایک لمحہ کو سوچ لیجیے کہ وہ کیا جذبہ ہے جو آپ کو اس پر اکسا رہا ہے، اصلاح یا لطف اندوزی اور ذہنی عیاشی؟
عزیزو!
اللہ کو پردہ پوشی پسند ہے اور وہ کہتا ہے کہ میں پردہ ڈالنے والوں کے عیب ڈھک دوں گا۔
ہے کوئی جسے اللہ کی طرف سے پردہ ڈھکے جانے کی ضرورت ہو؟
اے اللہ مجھے ضرورت سب سے زیادہ ہے۔
اے اللہ میں تجھ سے پناہ مانگتا ہوں۔
اے اللہ میں تیری ستاری کا واسطہ دیتا ہوں۔
اے اللہ میں الیاس گھمن پر کچھ آگے نہیں بڑھاؤں گا، بس تو میرے پردے ڈھکے رکھنا۔
تو نے پردہ اٹھایا تو میں کسی کو منہ دکھانے کے قابل نہیں رہوں گا۔
اے اللہ معافی
میری معافی
میری ہاتھ جوڑ کر معافی۔

آنے والے دن خواتین کے ہیں۔
ہمیں اچھا لگے یا برا معاشرہ بہر حال ماڈرنائز Modernise ہونے جا رہا ہے۔
عورت کو مغرب کا پروردہ میڈیا گھر کے قلعہ سے باہر لا چکا ہے۔
اسے سبز باغ دکھا کر بے باک بنایا جا چکا ہے۔
وہ جو بیچتے تھے دوائے دل وہ دکان اپنی بڑھا چکے ہیں۔
نہایت خاموشی سے ایسے قوانین بن چکے ہیں جن کے بعد گھر سے بھاگنے والی لڑکی عدالت کے ذریعہ باپ کو جیل بھجوا کرآشنا کے ساتھ اس کے گھر جا سکتی ہے۔ (آہ)
حیا، حجاب، وفا، پاکیزگی، شرافت اور اخلاق جیسی روایات و اقدار منہ چھپاتی پھرتی ہیں، انہیں کوئی جائے پناہ نہیں ملتی۔
این جی اوز اور امریکن سفارتخانہ ہاتھ دکھا چکے۔
آنے والے کل میں معاشرے عورتیں چلا رہی ہوں گی، فیصلے ان کی مرضی سے ہو رہے ہوں گے، اہم ادارے ان کے پاس ہوں گے۔
میرے لفظ اگر کچھ آنکھوں کو ناخوشگوار لگ رہے ہیں تو یقین کیجیے لکھتے ہوئے میں بھی آنکھوں کی پتلیاں دھو رہا ہوں مگر آنے والے کل کا یہ منظر بدلنا؟
کاش میرے بس میں ہوتا۔
اس سونامی طوفان سے کچھ بیٹیوں کو بچانے کی ایک ہی صورت ہے۔
جزوی، ضمنی، ذیلی چیزوں کی اصلاح ان پر مسلط کرنے کے بجائے نرمی، محبت اور دلیل کے ساتھ بیٹیوں کو معاشرتی روایات سے نہیں بس اسلام کی بنیادی ہدایات سے جوڑنے کی کوشش کریں۔
1) اس نسل کو ”تحمل“ سے سمجھنے کے بجائے ”تحکم“ سے سیدھا کرنا ممکن نہیں۔
2) قران، رسول حدیث، آخرت کو اس نسل کی نظر سے دیکھیں تو آپ کو اندازہ ہوگا کہ ان کی نظر میں بد قسمتی سے یہ اپنا اثر کھو بیٹھے ہیں اور اس کا آغاز اس روز ہوا تھا جب شرفا نے اپنے گھر کیبل کا کنکشن لگوایا تھا اور اپنے بچوں کو مہنگے سیکولر اسکول میں داخل کروایا تھا یا پھر نیا فون لے کر تنہائی فراہم کی تھی اور پیار سے دعوی کیا تھا کہ ”مجھے اپنی بیٹی پر پورا بھروسہ ہے“
3) طوفان دروازوں سے ٹکرا رہا ہے، محبت اور لہجہ کی نرمی کے” کہف“ بنائیں
4) شیطان کے گھر میں داخلے کے دروازے بند کریں۔
5) متبادل تیار کرنے پر ریسرچ اور ڈیولپمنٹ کے ادارے بنائیں۔
6) گھر کے ڈرائنگ رومز کو ”فری کائونسلنگ سینٹرز“ میں بدل لیں۔
7) چھوٹی چھوٹی چیزوں میں آزادی دیں، سمجھ لیں کہ زمانہ بدل گیا۔
8) جنریشن گیپ کا اعتراف کریں، بچیوں کو سمیٹیں، ان کی صلاحیتوں کو دیکھیں اور راستہ دیں، اس سے پہلے کہ وہ چھین کر لے لیں کیونکہ صرف بند باندھیں گے تو طوفان انہیں بہا لے جائیں گے۔
9) یہ نسل ایموشنل بلیک میلنگ کو سمجھنے لگی ہے، آپ کے آنسو اس کی نظر میں اکثر بس پانی کے چند قطرے ہوتے ہیں، آپ بھی اب سمجھ لیں اور انہیں یوں مٹی میں نہ رولیں۔
10) روایتی اسلام اور محمدﷺ کے اصل اسلام کا فرق سمجھیں۔
سمجھیں اس سے پہلے کہ وقت اور حالات کے تھپڑ ہمیں سمجھائیں۔

محترم دانشور صاحب!
آپ اور آپ ہی کے جیسے اساتذہ سے غیر جانبداری کے لیکچر سنے تھے تو ذرا سا جمعیت کے بارے میں بھی اپنے گلاسز کا کلر چیک کیجیے، کافی دھندلا دکھا رہے ہیں یہ شیشے آپ کو، (یا شاید آپ ایسا ہی دیکھنا چاہ رہے ہیں)
ویسے خیر آپ فرشتوں اور صحابہ کو تو کم ہی مانتے اور ان کی کم ہی سنتے ہیں، ما بعدالطبعیات پر بھی آپ کا یقین نہیں، اکثر مگر کتنی عجیب بات ہے نا کہ جمعیت کو ناپنے کے لیے آپ نے بدترین حالات میں بھی فرشتوں جیسے اونچے ترین معیار سیٹ کر رکھے ہیں۔

جناب! وہ جو ایک چیز ہوتی ہے ناں فکری دیانت، وہی وہی جس کا ڈھنڈورا پیٹتے آپ کا قبیلہ نہیں تھکتا، اسی کا تقاضا ہے کہ جب رائے دیں تو توازن پیدا کریں، مختلف پہلوئوں کا جائزہ لے لیں اور پھر کوئی بات کریں.

اب بھلا بتائیے! آپ کو معلوم ہے کہ جمعیت معاشرے میں کتاب کی محبت پیدا کرنے کے لیے ہر سال کتنے کروڑ روپے کے فنڈ جمع کرتی ہے اور پھر بک فیئرز پر خرچ کر دیتی ہے،
بھلا آپ کو معلوم ہے کہ جمعیت کتنے نوجوانوں کے تعلیمی اخراجات برداشت کرتی ہے، اور انھیں معاشرے کا کارآمد فرد بنانے کےلیے تیار کر رہے ہیں،
بھلا آپ کو معلوم ہے کہ آج بھی کسی طلبہ تنظیم میں مطالعہ کتب، اسٹڈی سرکل کی رویت باقی ہو، ایجوکیشن ایکسپو، ٹیلنٹ گالا، کیرئیر کونسلنگ جیسے امور انجام پاتے ہوں،
بھلا کسی ایک طلبہ تنظیم کا نام تو لیجیے جو ہر سال اپنے ایک ایک روپے کا حساب رکھتی اور اس کا آڈٹ کرواتی ہو اور یہ عمل ساٹھ برس سے مسلسل جاری ہو،
کسی ایک طلبہ تنظیم کا نام تو لیجیے جس میں جمعیت کے نصف جتنی بھی جمہوریت ہو، جی جی وہی جمہوریت جس کا علم آپ کا قلم قبیلہ اونچا تھامے ہوئے ہے، زیادہ دور نہیں، یہ رہا اچھرہ کچھ وقت نکالیے اور جا کر اسی جمعیت کا مرکز دیکھ آئیے، ذرا زیارت کا کا صاحب کے دوردراز گاؤں سے قیادت کے منصب تک پہنچنے والے ناظم اعلی صہیب کاکاخیل سے مل آئیے، ان کے کانفرنس روم دیکھ آئیے، ان کے دفاتر میں چائے کی ایک چسکی لیجیے اور ان سے پوچھیے کہ معاشرے میں جہاں لیڈرشپ ڈیویلپمنٹ کے سارے راستے سختی سی بند کر دیے گئے ہیں، وہاں یہ آپ کی ”ظالم جمعیت“ کس طرح چیچوں کی ملیاں سے گوادر اور پسنی تک اپنے سینکڑوں حلقوں میں انتخاب کے صاف ستھرے پراسس کو عمل میں لاتی ہے اور معاشرے کو قیادت تیار کر کے دیتی ہے،
پورا سال جمعیت کے لیڈرشپ کیمپس میں سے کسی میں شریک ہو جائیں، یہ لوگ کیسے کام کر رہے ہیں،
یہ بے چارے اپنی بنیاد پر خود دس اور بیس روپے جمع کر کے کروڑوں روپے سالانہ اپنی سرگرمیوں پر صرف کرتے ہیں،
آپ امریکن المنائی نیٹ ورک کے سوا کوئی ایک ایسی تنظیم تو بتائیں جو اتنا بڑا فنڈنگ نیٹ ورک چلاتی ہو اور کرپشن کی شرح ۰0000001 فیصد بھی نہ ہو بلکہ خرچ کرنے والے خود پہلے جیب سے دیتے ہوں، بلکہ مزدوری کر کے فنڈ دیتے ہوں،
اور یہ جو جماعت اسلامی، مسلم لیگ، پیپلز پارٹی، تحریک انصاف و دیگر کو لیڈر شپ فراہم کی، یہ کیا چھوٹا کام ہے؟
ملک کا ایک ادارہ بتائیں جہاں جمعیت کے ٹریننگ یافتہ افراد ایمانداری سے کام نہ کر رہے ہوں،
دینی اور اخلاقی بہتری کے لیے جمعیت نے کیا کیا ہے، یہ اگرچہ آپ کی دلچسپی کا موضوع نہیں مگر آپ کی اطلاع کے لیےعرض ہے کہ سال بھر میں ہزاروں درس قران جمعیت کرتی ہے، ایک ایک کلاس اور ہر ہر طالبعلم کو اس کے رب سے جوڑتی ہے، ان میں محبت نرمی اور ملک و قوم سے وفاداری پیدا کرتی ہے، حیا اور ساتھ پڑھنے والی طالبات کو بہن سمجھنا اور ان کی حفاظت کرنا سکھاتی ہے اور یہ جمعیت کا فخر ہے.

اگر ایمانداری وغیرہ جیسی کسی قدر کو آپ لوگ اہمیت دیتے ہیں تو ایک لمحے کو دل پر ہاتھ رکھ کر بتائیے کہ جمعیت کے کارکنان کی عمر کے نوجوان آج بائیک اور موبائل چھین رہے ہیں اور لڑکیوں کو اغوا کر کے ان کا ریپ کر رہے ہیں، ان میں جمعیت کے نوجوان غنیمت نہیں، دس بیس پچیس پچاس نہیں لاکھوں لوگوں کا ڈیٹا ہے جو گواہ ہے کہ جمعیت سوسائٹی کی محسن ہے.

دیکھیں قلم آپ کے ہاتھ میں ہے اور ویب سائٹ کی ریٹنگ کا مسئلہ ہو یا نظریاتی میدان میں دیس نکالا کھانے، این ایس ایف کے خاتمے سے ذرا آگے بڑھ کر سوویت یونین کے ہی بکھر جانے کا غم، کہ وہ جو بیچتے تھے دوائے دل، وہ دکان اپنی بڑھا گئے، آپ کے قبیلہ کا اصل مسئلہ جمعیت سے نفرت ہے جو وراثت میں ملی ہے اور اس نے آپ کو وہ مکھی بنا دیا ہے جو سارا صاف اور صحت مند جسم چھوڑ کر صرف زخم پر بیٹھتی ہے. کاش یہ شہد کی مکھی ہوتی جس سے کوئی خیر برآمد ہو سکتا۔ کاش!