Blog

گاڑی ڈرائیو کرتے ہوئے ڈرائیور گاہے بہ گاہے ٹیمپریچر میٹر کی سوئی پر نظر ڈالتا رہتا ہے اور جب دیکھتا ہے کہ کانٹا خطرناک حد تک انجن گرم ہونے کی خبر دے رہا ہے تو فوراََ گاڑی روک کر ریڈی ایٹر کا پانی وغیرہ چیک کرتا ہے۔

فرض کریں کہ کوئی شخص گاڑی چلا رہا ہے، جب جب وہ ٹیمپریچر کے کانٹے پر نظر ڈالتا ہے، میٹر اسے بتاتا ہے کہ انجن نارمل حالت میں کام کر رہا ہے، جبکہ حقیقت اس کے برعکس ہو، کچھ ہی دیر بعد گاڑی کے بانٹ سے دھوئیں نکلنا شروع ہوجائیں اور انجن بند ہوجائے تو ڈرائیور دوبارہ ٹیمپریچر کی سوئی کو آکر دیکھے جو اب تک نارمل حرارت دکھا رہی ہو تو ڈرائیور کسی مکینک کو بلاتا ہے جو گاڑی چیک کرنے کے بعد بتاتا ہے کہ جناب، گاڑی کا ٹیمپریچر دکھانے والا میٹر خراب ہوگیا ہے جو کہ انجن کی گرمی کو صحیح رپورٹ نہیں کر رہا تھا، مگر اب کیا فائدہ جب انجن انتہائی گرم ہوکر بند ہوچکا اور شاید سیز تک ہوگیا ہو۔

اسی سے ملتا جلتا ایک واقعہ بھی ذہن میں آیا۔ ہمارے ایک عزیز کو ہارٹ پرابلم ہوا، انہیں فوراََ دل کے اسپتال لے جایا گیا جہاں ڈاکٹرز نے انہیں فوراََ ایمرجنسی وارڈ میں داخل کردیا۔ مریض کی حالت بہتر نہیں ہو رہی تھی اس لیے ڈاکٹرز نے انہیں انتہائی نگہداشت میں رکھا ہوا تھا اور بار بار آکر دل کی دھڑکن چیک کر رہے تھے۔ رات کو دیر سے مریض کی حالت بگڑنے لگی، میں دوڑٓ کر ڈاکٹر کو لے آیا، اس نے آکر ای سی جی مانیٹر پر دل کی دھڑکن دیکھی اور مجھے مطمئن کردیا کہ دل کی دھڑکن بلکل نارمل ہے، پریشانی کی کوئی بات نہیں۔ تھوڑی ہی دیر میں مریض کا انتقال ہوگیا۔ جب ڈاکٹرز آئے اور موت کی تصدیق ہوجانے کے بعد انہوں نے ای سی جی مانیٹر کے کنیکشن مریض کے جسم سے الگ کیے تب بھی میں نے دیکھا کہ وہ ہارٹ بیٹ نارمل دکھا رہا تھا۔

یہ سب دیکھ کر ڈاکٹر نے سرد آہ بھری اور کہا کہ ای سی جی مانیٹر کی اسکرین درست رپورٹ نہیں کر رہی تھی اور لگتا ہے کہ مشین کافی دیر پہلے سے خراب ہوچکی تھی۔

خٰیر، ان دو مثالوں کو سامنے رکھتے ہوئے اگر دیکھیں تو اللہ پاک نے انسان کے اندر ایک سینسر رکھا ہوا ہے جو ہر وقت ایکٹو رہتا ہے اور گناہ (خطرے) کا علم ہوتے ہی انسان کی طرف ایک میسج فلوٹ کردیتا ہے۔ وہ انسان کہ جو گناہ کے دلدل میں اتر چکا ہوتا ہے اس کے پورے وجود میں فائر الارم کی طرح گھنٹیاں بجنی شروع ہوجاتی ہیں جو اسے فوری خطری سے آگاہی دے رہی ہوتی ہیں۔ تاکہ اگر انسان کے وجود میں ایمان کی ذرا بھی رمق موجود ہے تو وہ خطرے کی جگہ سے فوری طور پر بھاک کر اپنا ایمان بچا لے۔

مگر یہ بھی ہمارا مشاہدہ ہے کہ مسلسل گناہ کرتے کرتے، انسان کے اندر کا یہ الارم سسٹم خراب ہوجاتا ہے اور اسے نہیں معلوم پڑتا کہ وہ خطرے کی زد میں ہے یا اپنا ایمان کھو سکتا ہے۔ اس کے ایمان کا انجن حدت کے انتہائی گرم زون میں داخل ہوچکا ہوتا ہے مگر چوں کہ اس کو رپورٹ کرنے والا سینسر خراب ہوچکا ہوتا ہے لہٰذا اسے معلوم ہی نہیں پڑتا کہ وہ کتنی خطرناک حالت سے دوچار ہونے والا ہے۔

دوستو! خطرے کا یہ سینسر انسان کا ضمیر ہے، اور اگر ضمیر بھی مر جائے تو پھر انسان کا وجود اس طرح سن ہوجاتا ہے جیسے کسی مریض کے جسم کے کسی حصہ کو انجیکشن لگا کر سن کردیا جائے، پھر چاہے جسم کا وہ حصہ کاٹ ہی ڈالا جائے مگر اسے احساس تک نہیں ہوتا۔

ہم میں سے بہت سے لوگ، اسی کیفیت سے دوچار ہیں۔ غلط راستوں پر چل کر بھی نہیں جانتے کہ ہم غلط جا رہے ہیں۔ اچھائی دیکھ کر کوئی خوشی نہیں ہوتی، برائی دیکھ کر کوئی رنج نہیں ہوتا بلکہ زندگی کے جس راستہ پر ہم دوڑے چلے جا رہے ہیں، سمجھتے ہیں کہ ہم جیسا ہدایت یافتہ تو شاید ہی کوئی ہو۔

حضورﷺ کے ایک فرمان کا مفہوم ہے:
جب نیکی کرکے تمہیں خوشی ہو اور گناہ کرکے غم ہو، تو تم مؤمن ہو۔ (یہ ہے ایمان کا کم سے کم درجہ)۔

اس کیفیت کو قرآن نے بڑے خوبصورت انداز میں بیان فرمایا ہے، کہ:

اے محمدؐ(ﷺ)، ان سے کہو، کیا ہم تمہیں بتائیں کہ اپنے اعمال میں سب سے زیادہ ناکام و نامراد لوگ کون ہیں؟ وہ کہ دنیا کہ زندگی میں جن کی ساری سعی و جہد راہِ راست سے بھٹکی رہی اور وہ سمجھتے رہے کہ وہ سب کچھ ٹھیک کر رہے ہیں۔ یہ وہ لوگ ہیں جنہوں نے اپنے ربّ کی آیات کو ماننے سے انکار کیا اور اس کے حضور پیشی کا یقین نہ کیا۔ اس لیے اُن کے سارے اعمال ضائع ہو گئے، قیامت کے روز ہم انہیں کوئی وزن نہ دیں گے۔ (الکھف: ۱۰۳تا ۱۰۵)

چلیں پہلے آنکھوں سے دیکھے اور کانوں سے سنے دو واقعات سے ابتداء کرتے ہیں ، لاہور کے ایک بڑے صاحب تصنیف بزرگ، جو لاہور کے سب سے بڑے ادارے میں اعلی درجہ کے مدرس تھے، ان کے بڑے بیٹے سے ملاقات ہوئی، والد صاحب کے احوال بتاتے ہوئے کہنے لگے کہ جب والد صاحب کا انتقال ہوا تو اہل مدرسہ نے دو ماہ کا الٹی میٹم دیا کہ مکان خالی کر دیں، اس وقت جو بیتی ہم پر، وہ بیتی ۔ ایک معمر عالم دین کو ذاتی طور پر جانتا ہوں کہ انہوں نے ایک مدرسہ میں 25 سال کے قریب تدریس کی ، دوران تدریس امامت کی نہ کوئی اور مصروفیت، اب جب بدن ساتھ چھوڑنے لگا، تو اہل مدرسہ نے کہا کہ مکان خالی کر دیں، اور گھر کو روانہ ہو، معمر عالم دین نجی مجالس میں روتے ہوئے شکوہ کناں رہتے ہیں کہ میں نے جوانی مدرسہ کے لیے وقف کر دی، اب بڑھاپے میں میرا اتنا حق نہیں بنتا کہ مجھے سر چھپانے کے لیے مدرسہ ایک مکان ہی دے ۔۔۔۔۔۔۔ان واقعات میں قصور اہل مدرسہ کا بھی نہیں کہ جب خالی سیٹ پر متبادل مدرس آئے گا تو لا محالہ پچھلے مدرس کی سہولیات اسے متنقل ہوں گی۔ مدرسین دوران تدریس جس طرح کسمپرسی کی زندگی گزارتے ہیں، وہ تو سب پر عیاں، اس کے علاہ اچانک موت کی صورت میں اہل و عیال یا ناگہانی بیماری کی صورت میں ان پر جو بیتتی ہے ،وہ قیامت سے کم نہیں ،اس حوالے سے “رب مبلغ اوعی من سامع” کو دیکھتے ہوئے چند ممکنہ حل دوستوں کی خدمت میں پیش کروں گا، احباب کی نظر میں جو ممکن ہے وہ بھی شیئر کریں ،شاید اتر جائے “بڑوں “کے دل میں “ہماری ” بات :
حل نمبر ۱:
اس کا سب سے بہترین حل یہ ہے کہ وفاق ایک “چیرٹی فنڈ برائے مدرسین” قائم کریں ،جس کا مقصد صرف اور صرف مدرسین کی کفالت و تعاون ہو ،اور وہ مدرسین کے لیے درجہ ذیل امور سر انجام دیں :
۱۔مخصوص سروس اور عمر والے مدرسین کو آسان شرائط پر کاروبار کے لیے قرضہ دینا
۲۔بڑی بیماری کی صورت میں مدرس اور اس کے اہل خآنہ کا علاج و معالجہ
۳۔ناگہانی موت یامدرس ناکارہ ہونے کی صورت میں مدرس اور اہل خانہ کے لیے مکان و کفالت کا بندوبست کرنا
اب سوال یہ ہے کہ چیرٹی فنڈ میں پیسے کہاں سے آئیں گے ،تو متعدد راستے ہیں ،قائد وفاق ہر سال وفاق کے قائد کی حیثیت سے مختلف ملکوں کے دورے پر رہتے ہیں ،کبھی ترکی ،قطر تو کبھی سعودی عرب ،وہاں سے ایوارڈ لیتے ہیں ،اگر ان ملکوں کی حکومتوں اور شیوخ کے سامنے اس چیرٹی فنڈ کا قضیہ رکھیں ،تو ایک سال میں کروڑوں جمع ہوسکتے ہیں ،دوسری صورت یہ کہ بیرون ملک مخیر حضرات سے ایک تحریک کے ذریعے اس فنڈ کے لیے پیسے جمع کئے جاسکتے ہین ، ،یقین کریں یورپ و امریکہ میں اب بھی ایسے دیندار اور مالدار مسلمان بستے ہیں ،جو یہ اس فنڈ میں لاکھؤں ڈالر بخوشی دینے کو تیار ہونگے ،تیسری صورت حکومت پاکستان سے اس کے لیے مختص رقم کی درخؤاست کی جاسکتی ہے ،ہمارے حکومتی ارکان اتنے گئے گزرے نہیں ،کہ اس حوالے سے کوئی تعاون نہ کریں ۔یہ نہ ہو تو یہ صورت تو موجود ہے کہ وفاق میں رجسٹرڈ مدارس سے ماہانہ یا سالانہ کی بنیاد پر مدارس کے کوائف اور مدرسین کی تعداد کے اعتبار سے پیسے جمع کیا کریں، صرف کراچی کے بڑے مدارس ماہانہ لاکھوں روپے دے سکتے ہیں ،جس مدرسہ میں طلباء کا وظیفہ ہزاروں میں ہو ،جہاں کروڑوں کی عمارات مہینوں میں تعمیر ہو ،ان کے لیے چند لاکھ کوئی مسئلہ نہیں ،بس مسئلہ یہ ہے کہ اس طرف خاطر خواہ توجہ نہیں کی گئی ہے
جب تک اجتماعی فنڈنگ کا معاملہ شروع نہیں ہوتا ،تو مدارس انفرادی طور پر بھی بہت کچھ کر سکتے ہیں ،مدارس اپبے قواعد و ضوابط میں تبدیلی لاتے ہوئے ایک خاص معیار اور مدت سروس مقرر کریں ،اس معیار پر پہنچنے کے بعد مدرس کے لیے مکان کا بندوبست مدرسہ کرے ،جو ان کی ملکیت میں ان کی خدمات کے اعزاز میں دی جائے ۔پوری زندگی ایک مدرسہ میں وقف کرنے کے بعد ایک مدرس کا کم از کم یہ حق تو بنتا ہے کہ اسے سر چھپانے کی جگہ مدرسہ فراہم کرے ۔مدارس کا ماہانہ خرچہ لاکھوں میں ہے ،دس بارہ یا پندرہ سال کے بعد ایک مدرس کے لیے مکان کا بندوبست کرنا مدرسہ کے لیے کوئی چنداں مشکل نہیں ، مدارس خود اپنے چندے میں سے ہر ماہ بنام مدرسین کچھ فنڈ متخص کیا کریں ،تو ایک مدت کے بعد اس میں اچھی خاصی رقم جمع ہوسکتی ہے ۔
حل نمبر۳
مدارس ذاتی طور پر رفاہی اداروں اور فلاحی ٹرسٹس کے سامنے مدرسین کا یہ مسئلہ رکھ سکتے ہیں ،بلکہ اب تو خود دینی طبقے کے کافی سارے فلاحی ادارے کام کر رہے ہیں ،انہیں اس طرح متوجہ کیا جاسکتا ہے ۔اس کے علاوہ عالمی سطح ہر مسلمانوں کے بہت سارے فلاحی ادارے کام کر ہے ہیں ،ان کی خدمات بھی لی جاسکتی ہیں ۔اس سے سب کا نہیں ،پر کافی سارے مدارس کے مدرسین کا مسئلہ حل ہوسکتا ہے ۔اور ان کی کفالت کا اچھابندوبست ہوسکتا ہے ۔ ۔
حل نمبر۴۔
مدارس دوران تدریس ایک خاص معیار مقرر کر کے مدرسین کو آسان شرائط پر قرضہ بھی فراہم کر سکتے ہیں ،جس سے مدرس ایک کاروبار شروع کرے ۔کم از کم اس سے یہ تو ہوگا کہ مدرس کی ذاتی آمدنی کا کوئی ذریعہ ہوگا ۔مدرس کے بیمار ہونے کی صورت میں مزید تدریس جاری نہ رکھنے یا فوتگی کی صورت میں اس کے اہل خانہ کا اس آمدنی سے گزر بسر رہے گا ۔اور دوسروں کے دست نگر نہیں ہوںگے ۔اگر ہر مدرسہ دو سالوں بعد اپنے ایک مدرس کو آمدنی کے حوالے سے خود کفیل کرے ،تو اسے جہاں مدرسین کا مدرسہ کے ساتھ تعلق میں بے پناہ مضبوطی آئے گی ،وہاں مدرسہ کو بھی کافی سہولت مل سکتی ہے کہ تنخواہیں لیٹ ہونے کی صورت میں مدرسین کے حوالے سے کسی قسم کی بڑی پریشانی کا سامنا نہیں ہوگا ۔
حل نمبر ۵
ہر مدرسہ اپنے معاونین کی مدد سے ایک فنڈ تشکیل دے سکتا ہے ،جو مدرسین کی کفالت و تعاون کے لیے مختص ہو ۔اسی فنڈ سے مدرسین کے لیے مکان کا بندوبست اور فوتگی یا بیماری کی صورت میں مدرسین اور ان کے اہل خانہ کی کفالت کا معتد بہ بندوبست ہو سکتا ہے ۔
حل نمبر۶
مدارس میں مدرسین کی درجہ بندی کا رواج بالکل نہیں ہے ،مدرسین کی ترقی اور اس کی تنخواہ میں اضافہ مکمل طور پر مہتمم کی صوابدید پر ہوتا ہے ۔اس کے لیے وفاق ضابطہ بندی کر سکتا ہے ۔ قابلیت ،ڈگریوں ،تجربہ اور دیگر مہارتوں کے اعتبار سے مدرسین کی درجہ بندی ہونی چاہیے ،اور ہر سکیل کی تنخواہ کا ایک معیار ہونا چاہیے ۔کم از کم تنخواہ سے لیکر زیادہ سے زیادہ تنخواہ تک نظام ہونا چاہیے ۔درجہ بندی نہ ہونے کا نتیجہ ہے مدارس کے مدرسین کی تنخواہوں میں بہت بڑا فرق ہے ،آج بھی بلوچستان و خیر پختونخواہ میں ایک اعلی درجہ کے مدرس کی جو تنخواہ ہے وہ کراچی میں ایک ادنی درجے کے قاری صاحب کی تنخواہ ہوتی ہے ۔وفاق کو اس حوالے سے قدم اٹھانا چاہیے اور سرکاری ٹیچرز کے طرز پر ایک نظام ترتیب دینا چاہیے ۔اگر ایک مدرسہ افورڈ نہیں کر سکتا تو وہ تعداد میں کمی کرے ۔بھیڑ اکٹھی کرنے کی کیا ضرورت ہے ؟اللہ نے ہر شخص کو اس کی وسعت کے بقدر دین کی خدمت کا مکلف بنایا ہے ۔پر افسوس ،یہاں کیف کی بجائے تعداد اور کثرت کو ہی ترقی ،قبولیت کا معیار سمجھا جاتا ہے ،سمجھ نہیں آتا ،دینی طبقے جمہوریت کی بھر پور مخالفت کے باوجود کیسے اپنے کو جانچنے کے لیے جمہوریت کو معیار بنا لیتے ہیں ؟اور محض طلباء و اساتذہ کی کثرت کو ہی سب کچھ سمجھا جاتا ہے ،چاہے نتائج نہ ہونے کے برابر ہی کیوں نہ ہو ۔اگر آج بھی مدرسین کو درجہ بندی کے اعتبار سے تنخواہیں ملیں ،تو ان کی کافی ساری مشکلات حل ہوسکتی ہیں؟
حل نمبر۷
ہر مدرس کو اس حوالے سے ذاتی طور پر بھی سوچنے اور ایک طویل منصوبہ بندی کرنی چاہیے ۔حدیث کے مطابق اپنے ورثاء کو فقیر اور دوسروں کا دست نگر چھوڑنے سے انہیں مالی حوالے سے خود کفیل کر کے چھوڑنا کئی گنا افضل اور اللہ کی خوشنودی کا سبب ہے ۔عمومی طور پر ہمارے دینی حلقوں میں مدرسین کے حوالے سے ایک سوچ یہ پھیلائی جاتی ہے کہ اپنی ذاتی آمدنی کے لیے کوشش کرنا “توکل ” کے خلاف ہے اور اسے “خدمت دین “میں رکاوٹ باور کرایا جاتا ہے ،حالانکہ دینی و شرعی حوالے سے یہ فکر و سوچ غلطی پر مبنی ہے ۔ہر آدمی پر اللہ نے اس کے اہل و عیال کا نفقہ واجب کیا ہے ،تو واجب کی ادائیگی کے لیے کوشش کسی بھی حوالے سے “مروجہ خدمت دین “سے کم نہیں ،خصوصا جبکہ مدرس کی نیت ہی اس کوشش سے کار تدریس میں مزید اطمینان ہو ۔مدرس ہر ماہ کی تنخواہ سے کچھ رقم رکھ کر ذاتی فنڈ تخلیق کر سکتا ہے ،کسی واقف سے قرض لیکر کاروبار کھڑا کر سکتا ہے ،پارٹ ٹائم کوئی اور جاب کر کے اپنی آمدنی میں اضافہ کر سکتا ہے ۔اہل مدارس کو چاہیے کہ اس حوالے سے مدرسین کو سپورٹ کرے اور ان کی اس کوشش میں روڑے نہ اٹکائے ۔یہ ایک حقیقت ہے کہ مہتممین حضرات اس حوالے سے مدرسین کا تعاون تو کجا،مزید مشکلات کھڑی کرتے ہیں ،آج بھی ہمارے مدارس میں اعلی درجے کے مدرس کی تنخؤاہ ایک “چپڑاسی”کے برابر ہوتی ہے ،لیکن اس پر خآرجی مصروفیات کے حوالے سے اتنی پابندیاں ہوتی ہیں ،کہ وہ مزید کسی کام کا نہیں رہتا ۔کم از کم اس حوالے سے اکابرین دیوبند کا یہ رویہ نہیں تھا ،خصوصا حضرت تھانوی رحمہ اللہ کے ملفوظات میں اس چیز کی بکثرت مثالیں ملتی ہیں ،نیز ہمارے ہاں تنخواہ بڑھانے کے لیے درخؤاست دینا یا اس کا مطالبہ کرنا بہت معیوب سمجھا جاتا ہے ،حالانکہ حضرت مدنی رحمہ اللہ نے دار العلوم دیوبند میں صدر مدرس لگتے وقت نہایت اعلی تنخؤاہ کا مطالبہ سامنے رکھا تھا ،جسے اہل مدرسہ نے منظور کیا تھا ۔حضرت مدنی کا تنخؤاہ کی زیادتی کا مطالبہ توکل اور بزرگی کے خلاف نہیں ،تو آج کے کسی مدرس کا یہ عمل کیونکر توکل کے خلاف ہوگیا؟؟

ہر مذھب میں خدا ، جنت ، جہنم اور شیطان کے بارے میں تصور موجود ھے ،الفاظ کے اشتراک سے یہ لازم نہیں کہ جو اسلام کا خدا ” اللہ ” ھے وھی اور ویسا ھی خدا ھر مذھب کا ھے اور جیسی جنت ، جہنم اسلام بیان کرتا ھے ویسی ھی جنت جہنم کا ذکر دوسرا مذھب بھی کر رھا ھے ، قرآن کے شیطان اور دیگر مذاھب کے شیطان میں بھی زمین آسمان کا فرق ھے ،، لفظوں یا ناموں کا اشتراک صحرائے گوبی سے بھی بڑا سراب ھے ،، اسی لئے ایمان کی صفت مفصل میں تفصیل سے اسلامی خدا کو دوسرے مذھب کے تصورِ خدا سے جدا کیا گیا ھے ، آمنت باللہ کما ھو بأسمائہ و صفاتہ ،، ھم اللہ کو اس کی کنہہ سے نہیں بلکہ اسماء اور صفات سے جانتے اور مانتے ھیں ،، ھم اسے الحی یعنی زندہ مانتے ھیں یہ اس کا صفاتی نام ھے ،مگر زندہ کیسے ھے ، اس کی حقیقت سے ھم آگاہ نہیں ھیں ،، وہ موجود ھے مگر بغیر موجود کے کیسے موجود ھے اس کی تفصیل نہیں جانتے ،،
جنت کو ھندو سورگ کے نام سے جانتے ھیں مگر ھندو ازم کا “سورگئے ” یعنی جنت باشی پھر جنم لے سکتا ھے ،، وھاں سے نکالا جا سکتا ھے جبکہ اسلام کا جنتی وھاں دائمی رھے گا اور یہی اصل اور حقیقی زندگی ھے ،جس کے لئے یہ فانی زندگی ایک Sample کے طور پر مفت فراھم کی گئ ھے ، کہ اس سے وہ آخرت والی دائمی زندگی کماؤ، زندگی کا یہ دنیاوی فیز ٹرائلز کا مرحلہ ھے جس میں اس حقیقی زندگی کے حقداروں کا تعین کیا جا رھا ھے جو لوگ یہ چند روزہ زندگی امن و سکون اور پیار محبت سے نہیں گزار سکتے وہ بھلا کہاں اس قابل ھیں کہ انہیں ھمیشہ کے لئے ایک دوسرے کے برابر میں بسا دیا جائے اور پھر جنگوں کا نہ ختم ھونے والا سلسلہ وھاں بھی شروع ھو جائے !
قرآن حکیم میں بڑی صراحت و وضاحت کے ساتھ ھندو ازم کے تصورِ جنت کی نفی کی گئ ھے ، ” لا یمسھم فیھا نصب وما ھم منھا بمخرجین ،، نہ وہ وھاں بور ھونگے اور نہ ھی انہیں وھاں سے نکالا جائے گا ،، اسی طرح فرمایا گیا کہ ” یقیناً جو لوگ ایمان لائے اور اعمال صالح کیئے ان کا ٹھکانہ جنت الفردوس ھے وہ اس میں ھمیشہ رھیں گے ،وہ وھاں سے شفٹ ھونا پسند نہیں کریں گے ”
قرآن کی جنت اور جھنم کے بارے میں ھر آیت کسی نہ کسی دوسرے مذھب کے تصور کا بغیر ذکر کئے جواب ھے ،جو لوگ تقابلِ ادیان کے طالب علم ھیں وہ جب قرآن پڑھتے ھیں تو جو مزہ انہیں آتا ھے وہ کسی دوسرے کو آ بھی نہیں سکتا کیونکہ وہ فوراً سمجھ جاتے ھیں کہ یہ کس مذھب کے کس عقیدے کی تردید کی جا رھی ھے ، چاھے وہ آیت اللہ کی صفت بیان کر رھی ھو یا جنت ،جھنم یا شیطان کا تذکرہ ھو رھا ھو ،، ان کے قرآن کو سمجھنے اور عام انسان کے قرآن پڑھنے میں زمین آسمان کا فرق ھے ،،ھندو مذھب جنت سے بھی خوفزدہ ھے کیونکہ ان کے نزدیک ان کے دیوتا 19 ، 19 بار بھی جنت میں جا کر نکال باھر کئے گئے ھیں اور کسی نہ کسی نئے امتحان سے دوچار کیئے گئے ھیں لہذا ھندو مذھب جنت کا متلاشی نہیں بلکہ نروان کا متلاشی ھے ، ایسا خواب جو کہ دائمی ھو، ،، قرآنِ حکیم ایک ھی آیت میں عیسائیت کے تصورِ جنت کی نفی کرتا ھے تو ساتھ ھندو ازم کا قصہ بھی چکا دیتا ھے !

عیسائیوں میں جنت یا Paradise کا تصور موجود ھے مگر انتہائ ناقص تصور ھے ، عیسائیت کی جنت ایک حسین اور مسلسل خواب ھے ،جس میں وہ سب عیش ھو گا جو اس دنیا میں پایا جاتا ھے یا جس کی تمنا انسان کر سکتا ھے ،مگر وہ سوائے خواب کے کچھ بھی نہیں ھو گا، قرآنِ حکیم سب سے زیادہ اس تصور کی نفی کرتا ھے ، قرآن جب یہ بیان کرتا ھے کہ ” وہ تخت پر گھاؤ تکیئے لگائے بیٹھے ھونگے ” تو وہ یہ دلیل دے رھا ھوتا ھے کہ روح نہ تو ٹیک لگا سکتی ھے ، نہ فروٹ وغیرہ کھا سکتی ھے ،، یہ جسمانی جنت ھو گی جو بدن کے ساتھ ھو گی جو ٹیک لگائے بیٹھا ھو گا ، اسی طور جب جب جس جس نعمت کا ذکر کیا گیا ھے ، اس میں انسان کے بدن کو شامل کر کے دلیل کے طور پہ ذکر کیا گیا ھے نہ کہ لالچ کے طور پر ، قرآن جنت کی زندگی کو خواب نہیں بلکہ سب سے بڑی حقیقت اور حقیقی زندگی قرار دیتا ھے ” وَإِنَّ الدَّارَ الآخِرَةَ لَهِيَ الْحَيَوَانُ ” آخرت کے گھر کا جینا ھی آخری جینا ھے ( نہ کوئی کوئی خواب ھے ،کیونکہ خواب کی زندگی چاھے وہ کتنا خوشگوار خواب ھی کیوں نہ ھو ، اسے زندگی کوئی نہیں کہتا ،،خواب ھی کہتا ھے !

جو لوگ ان آیات کو کہ جن میں جنت کی نعمتوں کا ذکر ھے اعتراض کے طور پہ پیش کرتے ھیں وہ اس حقیقت سے بے خبر ھیں کہ یہ ساری نعمتیں جسمانی وجود کے ساتھ ھی استعمال کی جا سکتی ھیں ،، اور ان آیات کو انسانی جسم کے ساتھ آخرت کی زندگی کی دلیل کے طور پہ ذکر کیا گیا ھے نہ کہ لالچ کے طور پہ ،، اخرت میں ھر وہ ضرورت موجود ھو گی جس کا تقاضہ یہ انسانی بدن اس دنیا میں کرتا ھے ،، سوائے اولاد کے جو اسے چھوٹے بچوں کی صورت میں فراھم کر دی جائے گی اور ان میں اولاد کی سی محبت ڈال دی جائے گی ،یہ کفار کے بچے ھونگے جو بچپن میں مر گئے ھونگے اور جن کے والدین خلود فی النار کے مستحق ھونگے ،،،

شیطان سے متعلق بھی سب سے کلیئر کٹ اور واضح موقف اسلام کا ھے اور قرآن نے اس واقعے کو بار بار مختلف انداز میں بیان فرمایا ھے اور ھر جگہ اس کے نئے زاویئے کو استدلال کے لئے استعمال فرمایا ھے ، ھندو عیسائی اور یہود میں بعض لوگوں نے شیطان کو خدا کے مقابلے کی دوسری طاقت کا درجہ دیا ھے ،جس کی باقاعدہ پوجا بھی کی جاتی ھے ، ان کے نزدیک جھنم شیطان کی عملداری کا علاقہ ھے جہاں اس کی اطاعت کرنے والے رکھے جائیں گے جبکہ جنت اللہ کی عملداری کا علاقہ ھے جہاں اس کی اطاعت کرنے والے اکاموڈیٹ کیئے جائیں گے ، اس کی وضاحت انگریزی کی ضرب المثل سے بیان کی جاتی ھے ” Better to reign in Hell, than serve in Heaven. جسے ھم جھنم کا داروغہ مالک کہتے ھیں ،وہ وھاں شیطان کو بٹھاتے ھیں ،،

اللہ کا کرم ھے اور قرآن میں شیطان کے واضح اسٹیٹس کے تعین کا نتیجہ ھے کہ مسلمانوں کے گمراہ ترین فرقوں میں بھی شیطان کے بارے میں کبھی کو ابہام پیدا نہیں ھوا اور اسے اللہ کا مجرم اور باغی ھی سمجھا گیا نہ کہ خدا کے برابر درجے کا کوئی شریک ،کہ شر پر جس کی حکمرانی ھو ،، قرآن کے مطابق شیطان اللہ کا باغی ھے نہ کہ اللہ کے مساوی کوئی قوت ،، شیطان سے پوچھ پوچھ کر حقیقت کو واضح کیا گیا کہ اس نے کن وجوھات کی بنا پر بغاوت کی روش کو ترجیح دی ، اس کی ایک قسم اللہ پاک نے کوٹ کی ھے ،، قال فبعزتک لأُغوینۜھم اجمعین ،، تیری بے نیازی کی قسم میں ان سب کو اغوا کرونگا ،، گویا وہ یہ بات جانتا ھے کہ اللہ پاک اپنی مخلوق سے بےنیاز ھے ، نہ ان کی عبادت اس کا نفع کرتی ھے اور نہ معصیت اس کا نقصان ، سارے جنت چلے جائیں تو بھی اس کا کوئی نفع نہیں اور جھنم چلے جائیں تو اس کا کوئی نقصان نہیں ،، عبادت و طاعت کا نفع اور معصیت و بغاوت کا خسران خود انسان کی ذات سے جڑا ھوا ھے ،، ومن تزکی فانما یتزکی لنفسہ ،،جو پرھیزگاری کی روش اختیار کرے گا اپنی ذات کے لئے کرے گا ،،

اسی طرح فرمایا و من جاھد فانما یجاھد لنفسہ ،، جو جہاد یا جدجہد کرے گا اپنی ذات کے لئے کرے گا ،، شیطان کی حماقت ھے کہ اس نے اپنا ایجنڈا اے بی سی کی طرح کھول کر بیان کر دیا کہ ” کیا کرے گا اور کیسے کرے گا ” اللہ نے حدیں قائم کر دی ھیں جو ان حدوں کے اندر رھے گا شیطان اسے اغوا نہیں کر سکے گا ، جو ان سے نکلے گا شیطان ان کے لئے گھات لگا کر بیٹھا ھے ،، ان حدوں سے نکالنے کے لئے شیطان نے بتایا کہ ” ولاُمنینھم ولأمرنھم ،، میں ان میں تمنائیں پیدا کروں گا ،،تمنائیں وسائل سے بڑھ جائیں گی تو پھر انہیں حکم دونگا یا مشورہ دونگا یا دعوت دونگا کہ ایکسٹرا وسائل کیسے مہیا کرنے ھیں یوں تمناؤں کے باؤلے لوگ میرے پیچھے لگ جائیں گے ،، طاقت نہ شیطان کے پاس ھے کہ کسی کو جھنم لے جائے یا مار کر ٹیکسی میں ڈالے اور شراب خانے لے جائے ،، وہ تو بس خیال ڈالتا ھے کہ ، آج موسم بڑا گلابی ھے ، آج پینے میں کیا خرابی ھے ؟

اسی طرح پیغمبر بھی زبردستی جنت میں لے جانے کا مجاز نہیں ھے ، وہ بھی دعوت دیتا ھے ،، شیطان حشر کے دن فیصلے ھو جانے کے بعد اپنے اوپر لگائے گئے الزامات کا مدلل جواب دینے کی اجازت مانگے گا ،بجائے ایک ایک فرد کے الزام کا جواب دینے اور اپنی صفائی پیش کرنے کے ،،وہ ایک ھی بار ساری انسانیت کو مخاطب کر کے جواب دے گا ،،
وَقَالَ الشَّيْطَانُ لَمَّا قُضِيَ الْأَمْرُ إِنَّ اللَّهَ وَعَدَكُمْ وَعْدَ الْحَقِّ وَوَعَدتُّكُمْ فَأَخْلَفْتُكُمْ ۖ وَمَا كَانَ لِيَ عَلَيْكُم مِّن سُلْطَانٍ إِلَّا أَن دَعَوْتُكُمْ فَاسْتَجَبْتُمْ لِي ۖ فَلَا تَلُومُونِي وَلُومُوا أَنفُسَكُم ۖ
اور شیطان کہے گا جب فیصلے ھو جائیں گے کہ اللہ نے تم سے جتنے وعدے کیئے تھے بےشک وہ سارے سچے تھے اور میں نے جتنے وعدے کیئے تھے ان کو کو پورا نہ کیا ،، میرے پاس نہ دلیل کی طاقت تھی اور نہ جسمانی طور پر مجھے تم پر جبر کی اجازت تھی ،سوائے اس کے کہ میں نے تمہیں دعوت دی جو تم نے قبول کر لی سو مجھے ملامت مت کرو ملامت اپنے آپ کو کرو ( کیونکہ اختیار تمہارے پاس تھا میرے پاس نہیں تھا )