ہارون الرشید صاحب کے تفصیلی انٹرویو کا ”دلیل” ویب سائٹ پرجلوہ گر ہونا باعثِ صد انبساط ہے۔ یہ گویا عامرہاشم خاکوانی صاحب کااپنے سینیئرز کے حق میں ایک طرح کا خراج تحسین ٹھہرا جو پیشہ ورانہ دیانت کا مظہر ہے۔ ہارون الرشید صاحب اپنی علمیّت، تجربہ و مشاہدہ اور زبان و بیان پر غیر معمولی قدرت کی بنا پر صحافتی برادری کے سرخیل اور بلاشبہ دنیائے صحافت کی شان ہیں۔ آپ کا شعری ذوق بھی نہایت اعلیٰ ہے اور شعر فہمی درجہ کمال کو پہنچی ہوئی۔ سحر آگیں نثر کو بہ تسلسل نبھائے چلے جانے والے صاحب اسلوب قلم کار ہیں، جنہیں اللہ نے بے پناہ ریڈرشپ عطا کررکھی ہے۔ آپ کی تحاریر کا نمایاں ترین پہلو اُن میں حبّ اقبالؒ، حبّ اسلام، حبِّ جناح اور حبّ وطن کا چھلک چھلک پڑنا ہے۔ یہی وجہ ہے کہ آپ کی دوستی اور دشمنی با لکل واضح ہوتی ہے۔
کسی نے کہا: ”ہارون صاحب ہر دورمیں ایک ممدوح بھی ساتھ رکھتے ہیں۔ جیسےکبھی اختر عبدالرحمن، کبھی حمیدگل اور کبھی جنرل کیانی۔ فوجی جرنیلوں کی نسبت عمران خان سےوابستہ توقعات شاید پوری نہیں ہوپائیں -کہ حضرت پی ٹی آئی کے کنگ میکر بننا چاہتے تھے۔“
میری رائے میں یہ انداز نظر کی بات ہے۔ زندگی یوں بھی انداز نظر ہی تو ہے۔ شاید اس نگری میں کچھ بھی ‘قطعاً غلط یا ”قطعاً“ صحیح نہیں پایا جاتا۔ نیّات اور مقدارِ خلوص ہی پیمانہ ہے جس کا حتمی علم صرف خالقِ حیات کے پاس محفوظ ہے جسے یوم الجزا کے موقع پر ہی ایکسپوژ کیا جائے گا۔ آپ فقط اسی نظر سے دیکھنے پر مصر نہ ہوں تو ایک اانداز نظر یہ بھی ہوسکتا ہے کہ ہارون صاحب کی اصل نسبت یا نسبتیں چونکہ اسلام، پاکستان، جناح ؒاور اقبالؒ ہیں، اب انہیں ان کے اپنے فہم کے مطابق ان نسبتوں کی خوشبو جہاں میسّر آئے گی، ان کے تحفظ کا زیادہ تر احساس جس ہستی میں دِکھے گا، اس کی پیروی، اس کی ہم نشینی ان کا واحد اطمینان بن جائے گا۔ یہی ہوتا رہا۔
آپ کو تسلیم کرنا ہو گا کہ مجھ سمیت اس دھرتی پر بے شمار لوگ ہیں جوروس افغان جنگ میں جنرل ضیاء اور جنرل اختر عبد الرحمن کے کردار و خلوص والے بیانیے پر کامل اعتماد رکھتے ہیں (جنرل ضیاء مرحوم کے دور میں در آنے والی بعض خرابیوں اور ان کے بیشتر دیگر فیصلوں سے قطعِ نظر جن کے ہم بھی اتنے ہی بڑے نقاد ہیں)۔ یہ ہمارا اندازِ نظر ہے۔ امریکی ڈالرز سمیٹنے والا بیانیہ کسی کی نظر میں وقیع ہے تو ہو۔ تو بات انداز نظر یا زاویہِ نگاہ کی ہے۔ جیسے بھٹّو مرحوم بعضوں کی نظر میں فخر ایشیا ہیں توبعض دوسروں کی نظر میں دو چار بڑے کارناموں سے ہٹ کر جنرل ضیاء سے بھی بڑے ڈکٹیٹر، خود پسند، اور لا ابالی انسان وغیرہ (راقم الحروف کی نظر میں بھٹو مرحوم اس اعتبار سے لائقِ احترام ہیں کہ انہوں نے ہمیں تہتّر کا آئین دیا۔ ایٹمی ری ایکٹر کی بنیاد رکھی۔ عوام الناس میں سیاسی شعور پھونکا۔ ہزاروں پاکستانیوں کے لیے بیرون ملک روزگار کمانے کی سبیل کی جس سے بے شمار گھرانوں کی معاشی حالت میں انقلابی تبدیلی رونما ہوئی۔ اور یہ حقیقت بھی اپنی جگہ قائم ہے کہ بھٹّو مرحوم سے کچھ فاش غلطیاں بھی سرزد ہوئیں، شاید جن کی پاداش میں انہیں خدا کی طرف سے گرفت نے آن لیا۔)
موضوع کی طرف پلٹتے ہیں۔بات چلی تھی زاویہ نگاہ سے۔ تو یہ سب اندازِ نظر کی بات ہے۔ اگر آپ کسی کے خلوص کے قائل نہیں تو سب سیاہ دِکھے گا۔ قائل ہیں تو بادی النظر میں کچھ برا نظر آنے والا بھی اصلاً سفید اور اجلا ہی دکھائی دے گا۔ یوں نا چیز کی رائے میں عمران خان کے حوالے سے ہارون صاحب کے رومانس کا سرچشمہ بھی اصل میں پاکستان سے بے پناہ محبت ہی تھا- پاکستان جہاں وہ تبدیلیِ حالات کے دیرینہ خواب کی تعبیراپنی آنکھوں واقع ہوتا دیکھنا چاہتے تھے اور چاہتے ہیں، اور جہاں پے در پے ناکردہ کار حکمرانوں اور سیاستدانوں کو دیکھ دیکھ وہ بری طرح اکتا چکے تھے۔ ان میں خلوص و وفا کی کوئی چنگاری نہ پاکر وہ تحریکِ انصاف کی صورت عمران خان ایسے سٹار کو اس میدان میں لے کر اترے، اور ان کے بقول پھر اس تحریک کی اپنے بچوں کی طرح پرورش کی۔ اسے ملک گیر شہرت دلانے، اور خان پر ان کے بطورِ سیاستدان اہالیانِ وطن کے اعتماد کو قائم کرنے میں دامے، درمے، سخنے بے پناہ معاونت مہیّا کی۔ ایک زمین استوار کی۔ تحریر و تقریر سے اس تحریک کے دفاع میں سینہ سپر رہے۔
ہارون صاحب چاہتے تو عرفان صدیقی و دیگران کی مانند ہدیہ و مراعات کے عوض کسی بھی ”بڑے“ سے وابستہ رہ کر چین کی بنسری بجاتے۔ آخر تکلیف کیا تھی؟ کتنا آسان آپشن تھا! لیکن وہی سر پھرا پن۔ خواب دیکھنے اور مثالیے پالنے کی ”خوئے بد“۔ وہی دیوانگی و وارفتگی جو اللہ کی طرف سے تفویض کی جاتی ہے— محض چند افراد کو تاکہ جناحؒ ایسے خلوص و وفا کے نمایندگان ہر مرحلہِ تاریخ میں خاک نشینوں کے بیچ بسیرا کیے رہیں، اور انہیں ان کی اصل سے جوڑے رکھیں۔ خان صاحب سے وابستگی بھرے اس تمام عرصہ و مدّت میں وہ خان کو تبدیلی کا استعارہ بنائے رہے۔ یہ رومانس آگے چل کر ٹوٹ گیا۔ یہ رومانس اگر ٹوٹا بھی تو اصولی بنیاد پر کہ عمران خان بہرحال 30 اکتوبر کے جلسہ کے بعد- کہ جب حسبِ تمنّا ایک سیلابی قسم کا پبلک رسپانس آگیا تھا- خاصے بدل گئے۔ پلٹ کر دیکھنا بھول گئے کہ وہ خواب و خیال جنہیں ابتداً لیکر چلے تھے، کیا ہوئے؟
خان بعض ایسے مشیروں میں گھر گئے کہ جن کے زیر سایہ تحریک انصاف کا قافلہ ِ عظیم مزید منظم ہو نے کی بجائے انتشار کا شکار رہ کر اپنی طاقت کھو بیٹھا، یا اس سے مطلوبہ نتائج اخذ کرنے کی امید موہوم ہوتی چلی گئی۔ یہی وہ منظر تھا جو مستقلاً تحریک انصاف کے آسمان پر چھا گیا، اور جسے دیکھ دیکھ ہارون صاحب بالآخر عمران خان اور پی ٹی آئی دونوں سے بیزار ہوگئے۔تنقید کرتے ہیں، لیکن اب بھی گاہے اسی کے حق میں بولتے ہیں۔ یوٹوپیا اور رومانس کا طلسم جب ٹوٹتا ہے تو زخم تو لگتا ہے۔ذرا ساعت بھر کے لیے تصوّر کریں کیا کرتے آپ اگر ان کی جگہ ہوتے؟
بوجوہ راقم الحروف یہ کہنا چاہے گا کہ یہ بھی تو ہارون صاحب کا ایک انداز نظر ہی ہے، جو غلط بھی ہوسکتا ہے۔ ممکن ہے ہارون الرشید صاحب سے قدرت نے خان اور تحریک کے حق میں جتنا کام لینا تھا، سو لے لیا۔ اب اگلی منزلوں کی مسافتیں طے کرانے کو آسمانوں میں یہی مقسوم ٹھہرا ہو (بشرطیکہ خان صاحب اور ان کے رفقائے کار آسمان والے سے باطنی طور پر جڑے ہوئے ہیں)۔ دعا ہے کہ خان صاحب اپنے حسن نیت کو انہی رفیقان کار کی ہمراہی میں نبھا جائیں اور اہلِ وطن کے حق میں تبدیلی کے خواب کی تعبیر کومجسّم کر دکھائیں۔
مولانا عمار خان ناصر ایک بڑے دینی علمی خانوادے سے تعلق رکھتےہیں، ان کے محترم دادا مولانا سرفراز خان صفدر(مرحوم) دینی حلقوں، خاص کر دیوبندی علمی روایت میں بہت احترام کی نگاہ سے دیکھے جاتے ہیں، ان کے والد محترم مولانا زاہد الراشدی دینی،علمی اور سیاسی حلقوں میں محترم ہیں۔ ان کے اعتدال، حلم اور توازن کے ان کے مخالف حلقےبھی معترف ہیں۔ عمار خان ناصر نے اپنےاجداد کی شاندار روایات کو آگےبڑھایا ہے۔ ان میں اپنے نامور دادا کا تحقیقی ذوق اور اپنے والد کا توازن، برداشت اور اعتدال جھلکتا ہے۔ جناب جاوید احمد غامدی کےسکول آف تھاٹ سےبھی ان کی نسبت ہے اور عمار ناصر کی فکر پر غامدی صاحب کےگہرے اثرات محسوس کئے جاسکتے ہیں۔ مولانا عمار ناصر نے اپنے اس مضمون میں بڑے اہم موضوع کو چھیڑاہے۔ اسلامی دنیا کے ساتھ ساتھ پاکستان کے دینی حلقوں میں کئی اہم مباحث جاری ہیں۔ شدت پسند تنظیموں کے ماسٹر برین اپنے نقطہ نظر کو سپورٹ کرنے والے لائحہ عمل کی وکالت کرتے اور نوجوان ذہنوں کو اپنی طرف راغب کرنے میں لگے ہیں۔ عمار ناصر نے اس تناظر میں برصغیر کے بہت اہم دینی سکالر اورجماعت اسلامی کے بانی سید مودودی کے تجویز کردہ لائحہ عمل وفکر کا جائزہ لینے کی کوشش کی ہے۔ دو حوالوں سے یہ اہم ہے، ایک تو دینی حلقوں میں جاری بحث میں سید مودودی کا استدلال نہایت طاقتور انداز میں شامل ہوا ہے، مولانا نےبڑے مدلل انداز میں نفاذ اسلام کی جدوجہد کی مختلف صورتوں کو زیربحث لاکر ثابت کیا کہ پر امن آئینی جدوجہد ہی سب سے بہتر اور درست راستہ ہے۔ اس مضمون کی دوسری افادیت یہ ہےکہ پچھلے کچھ عرصے سےہمارےہاں بعض حلقوں کی جانب سے سید مودودی کے بیانیےپر تنقید کا سلسلہ جاری تھا اور ہمارے لبرل عناصر یہ تاثر دے رہے تھے کہ مودودی بیانیہ شدت پسندی کو پروموٹ کررہا ہے۔ ایسی رائے رکھنےوالوں کو ہم دعوت دیں گے کہ وہ کسی حتمی رائے پر پہنچنے سےپہلے عمار ناصر کا مضمون ضرور پڑھیں۔ یہ مضمون اس قابل ہے کہ اس پر سنجیدہ بحث ہو اور مختلف فورمز میں اس پر بات کی جائے۔ (ادارہ دلیل)
” مذہبی طبقے کا اخلاقی بحران” ہی کیوں؟ شدت پسند دونوں طرف ایک جیسے ہیں، کہ اس طرح کی lower strata of جَنتا دونوں طرف برابر پائی جاتی ہے اور اخلاقی ذمہ داری بھی دونوں پر یکساں عائد ہوتی ہے کہ لبرلز یا سیکولر حضرات و خواتین بھی انسان ہیں اور تہذیب و اخلاق ایسی انسانی قدروں کا اطلاق ان پر بھی اتنا ہی ہو گا۔ وہ بھلے کسی خدا کے ہاں جوابدہ نہیں، مگر انسانی ضمیر، معاشرتی قدروں اور ضابطوں کے تو ہیں ہی۔ یوں، یہ ٹائٹل ناانصافی پر مبنی ہے۔ اگرچہ درونِ تحریر دونوں کا اخلاقی بحران غیر جانبداری سے ڈسکس ہوتا نظر آیا، تاہم تحریر کو یہ ٹائٹل عطا کرنا غماز ہے کہ مصنف مذہبی طبقے کو زیادہ تر قصور وار سمجھتا ہے۔
افکار و نظریات کی تاریخ بتاتی ہے کہ جب بھی کسی معاشرے کے فکری زاویوں کو تبدیل کرنے کا آغاز ہوا، ذہنوں میں موجود صدیوں کے افکار کو تبدیل کرنے کی مہم شروع ہوئی، عقیدت کے مراکز سے تعلق ختم کرنے کی جدوجہد کی ابتداء ہوئی، مانے ہوئے عقائد میں دراڑیں ڈالنے کا عمل شروع ہوا تو اس مہم، جدوجہد اور کوشش کی ابتداء خوش کن نعروں اور دلکش اصطلاحات سے ہوئی. مارٹن لوتھر نے ٹریڈیشنل عیسائیت پر کاری وار کا آغاز “اصلاح ” اور “پاپائیت سے نجات” کے خوشنما نعروں سے کیا. ماڈرن ازم کے علمبرداروں نے انسان کو جملہ مراکز عقیدت سے دور کرنے کی مہم “آزادی” کے مقدس نام سے شروع کی. مارکس نے اشتراکیت کا آمرانہ دیو مسلط کرنے کے پلان کا آغاز “آمدنی میں مساوات ” اور “سرمایہ داروں سے نجات” کے دل موہ لینے والی آوازوں سے کیا. الغرض خوشنما نعرے، دلکش آوازیں، دل آویز نغمے، دل میں اترنے والی صدائیں اور ابہام کے دبیز پردوں میں لپٹی اصطلاحات ہمیشہ “اصلی مقاصد” کو پس پردہ رکھنے کے لیے کارگر ثابت ہوتی ہیں۔
اسلام” کے نام پر وجود میں آئی ؟ ایک خطہ زمین میں دین کو روبہ عمل لانے کے لیے کس طرح ایک پوری نسل نے اپنی جانیں پیش کیں؟ ایک “مذہبی نعرے” کے لیے کس طرح ایک نسل اپنے آبائو اجداد کی سر زمین چھوڑنے پر آمادہ ہوئی؟ پھر جب یہ مملکت وجود میں آئی تو کس طرح اس کے ماتھے کا جھومر “لا الہ الا اللہ” کی صدا ٹھہری؟ کس طرح اس کے آئین نے “اللہ کی حاکمیت” کو اپنا ماٹو قرار دیا حالانکہ انسان کی حاکمیت کا دور دورہ ہے. کس طرح یہاں مذہب بیزاروں کا ناطقہ آئینی و قانونی طور پر بند کیا گیا؟ پون صدی گزرنے کے باوجود کیسے یہ ملک جیسے تیسے اپنی اصل،بنیاد، اساس اور بانیان پاکستان کے نعروں سے جڑا ہے؟ یہ منفرد اعزاز اور مملکت خداداد کی یہ شناخت گوارا نہیں؟
عورت کو صرف اور صرف تجارتی مال اور مرد کی جنسی تسکین کا ذریعہ سمجھنے کے اس دور میں کیسے اسلام عورت کو ماں، بہن، بیٹی اور بیوی میں تقسیم کر کے اس کو ایک باوقار معاشرتی مقام دیتا ہے؟ سرمایہ دارانہ عفریت کے اس دور میں کیسے اسلام ہر امیر کو ہر غریب کا رکھوالا قرار دیتا ہے؟ جنسی ہیجان کے اس دور میں کیسے اسلام حیا، شرم اور عورت کی تکریم کا سبق دیتا ہے؟ رشتوں کی پامالی کے اس دور میں کس طرح اسلام رشتہ داری کو جوڑنے کی پرزور تعلیم دیتا ہے؟ اسلامی طرز زندگی کے یہ سب اعزازات، خصوصیات اور امتیازات گوارا نہیں ؟ انسان کی “خدائی ” کے اس دور میں انسان کی “بندگی “برداشت نہیں ؟
میں اعتراف کرتا ہوں کہ پروفیسر احمد رفیق اختر سے ملاقات کے بعد میری زندگی کا رخ ہی بدل گیا۔ 96ء سے پہلے میں روایتی دائیں بازو کا ایک اخبار نویس تھا۔ پروفیسر صاحب نے مجھے سوچنا سکھایا اور تناظر وسیع کر دیا۔ ان کی عنایت ہے کہ مجھے دوست کہتے ہیں، حالانکہ ان کا ایک عام شاگرد ہوں۔ وہ واحد شخص ہیں ،جن سے تیرہ برسوں میں میرا دل نہیں بھر سکا۔ ان کا علم ایک سمندر کی مانند لگتا ہے۔ پروفیسر آدمی کو خدا کی طرف بلاتے اور تناظر وسیع کرتے ہیں۔ ان کا قول ہے کہ عقیدت اور جہالت دو سگی بہنیں ہیں۔ اسی لیے وہ عقیدت مند نہیں بڑھانا چاہتے۔ پروفیسر اپنے دوستوں اور شاگردوں سے محبت کرتے ہیں۔ آپ ڈٹ کر اختلاف کریں مگر ان کے ماتھے پر شکن نہیں آتی۔ کبھی دل میلا نہیں کرتے۔ میں نے ہزاروں کتابیں تو پڑھی ہی ہوں گی مگر وہ سب ایک طرف اور پروفیسر سے سیکھا ہوا ایک طرف۔ وہ خالص علمی انداز میں مباحثہ کرتے ہیں۔ پروفیسر صاحب کی فکر کا نچوڑ چند فقروں میں یوں ہے، ’’اصل چیز مذہب نہیں اللہ ہے ۔جب اللہ کی شناخت کر لیں تو ہم پر لازم ہے کہ اس نے جو طریق کار وضع کیا ہے اس پر بھی عمل کریں۔ قرآن پر غور کرنا چاہیے۔ مسلمان میں بتدریج دوسرے انسانوں کی خیرخواہی بڑھنی جبکہ عناد، بغض اور حسد کم ہونا چاہیے۔ اسی طرح ہیجان سے پاک ہونا، ایثار بڑھنا اور خوف و پریشانی ختم ہونی چاہیے۔ اللہ کے راستے پر چلنے والا شخص آہستہ آہستہ غم و حزن سے نجات پا لے گا۔ اللہ کو ہمیشہ یاد کرو، محبت کے ساتھ، اللہ کو اس کے ناموں سے پکارو۔ بڑے سے بڑے سکالر کی رائے پر بھی غور کرو۔ قرآن کی مختلف تفسیروں پر غور کر کے اپنی رائے قائم کرو، خواہ وہ تمھارے استاد سے مختلف کیوں نہ ہو۔ بحث کے درمیان تلخی اور طنز نہیں آنا چاہیے‘‘۔
بالکل سچا آدمی ہے۔ وہ آدھی سے زیادہ آمدنی غریبوں پر خرچ کرتا ہے۔ کینسر ہسپتال‘ نمل یونیورسٹی اور غریبوں کی مدد کے لیے وہ سال میں کم ازکم پون کروڑ کے عطیات دیتا ہے۔ میں نے ایسا بہادر آدمی کم ہی دیکھا۔ اس میں اعتدال اور سیکھنے کی خواہش ہے۔ اس نے اپنے غصے پر قابو پایا ہے۔ اب اس پر ناروا تنقید بھی کی جائے تو وہ برداشت کرتا ہے۔ عمران خان ملک کی تقدیر سنوارنے کے لیے سیاست کر رہا ہے۔ ایشیا کا سب سے بڑا مسلمان لیڈر مہاتیر محمد عمران کا اتنا ہی مداح ہے جتنا کہ میں۔ وہ ایک گلیمرس کھلاڑی تھا۔ پھر اس نے توبہ کی اور اس کی زندگی بدل گئی۔ اس میں ایک خوبی یہ ہے کہ وہ خود کو پارسا نہیں سمجھتا۔ عمران کی شخصیت کو ایک فقرے میں یوں بیان کیا جا سکتا ہے کہ وہ ناقابل علاج امید پرست ہے۔ میں اکثر حوصلہ لینے کی خاطر اس سے ملنے جاتا ہوں۔ عمران محبت تو کرتا ہے مگر اظہار پر قادر نہیں۔ میں نے اس کی عائلی زندگی بڑے قریب سے دیکھی۔ وہ نہایت اچھا شوہر اور باپ تھا۔ عمران اور جمائما کی طلاق کے موقع پر اس کے وکیل نے کہا کہ اگر وہ طلاق دینے سے انکار کر دے تو جمائما کی جائیداد میں سے تین بلین ڈالر کے قریب اسے مل جائیں گے۔ عمران نے دو سو ارب روپے کی اس بات کو سنی ان سنی کر دیا اور صرف یہ کہا کہ طلاق دونوں کی رضامندی سے ہو رہی ہے۔ وہ اپنی زندگی پر اسی قدر کم رقم خرچ کرتا ہے جس کا کوئی تصور نہیں کر سکتا۔ اس کے کپڑے میرے ڈرائیور سے بھی معمولی ہوتے ہیں۔ عمران میں سیاسی بصیرت کا فقدان ہے کہ اس نے بیالس سال کی عمر میں پہلی بار عام آدمی سے ملنا جلنا شروع کیا۔ اگر کبھی وہ وزیر اعظم بنا (جس کے امکانات کچھ زیادہ نہیں) تو اس ملک کی تقدیر بدل کے رکھ دے گا۔ اس کی ترجیحات واضح ہیں۔ صاف پانی‘ تعلیم‘ روزگار‘ خارجہ پالیسی‘ فوج اور پولیس کی ری کنسٹرکشن سب بالکل واضح ہیں۔ عمران حکمران بنا تو ملک میں سسٹم بنا کر دے جائے گا۔ اس کے بعد میں آنے والوں کے لیے بیشتر کانٹے صاف ہو جائیں گے۔
احساس ہوا کہ یہ تو کالم لکھ دیا ہے۔ وہ کالم جمیل اطہر صاحب نے چھاپ دیا۔ مولانا مودودی جماعت کی امارت سے سبکدوش ہوئے تو میں نے دوسراکالم لکھا۔ ان دنوں چھ ،آٹھ مہینے کے بعد ایسے کسی انسپائرنگ واقعہ پر میں کالم لکھ دیتا۔ مدتوں سمجھتا رہا کہ میں فطری رائٹر نہیں ہوں۔ کسی واقع سے انسپائریشن کے بغیر میرے لیے لکھنا مشکل ہو جاتا تھا۔ 2001ء کے بعد آہستہ آہستہ اور پھر 2006ء میں یقین ہو گیا کہ اچھے برے سے قطع نظر، میں لکھ بہرحال سکتا ہوں۔ میں نے طویل عرصے تک بڑے بڑے کرب میں لکھا۔ مجھ میں شدت احساس بہت ہے۔ کئی بار لکھتے ہوئے میرے اوپر رقت طاری ہو جاتی۔ کالم کے فارمیٹ اور الفاظ کے مناسب ہونے کی بھی بڑی فکر رہتی ہے۔ میرے خیال میں کالم کا فارمیٹ پرفیکٹ ہونا چاہیے. کسی اچھے سلے سوٹ کی طرح۔ میں مدتوں منو بھائی سے متاثر رہا کہ وہ فارمیٹ سے انحراف نہیں کرتے۔ پہلے میں بڑے ہیجان اور دباؤ میں لکھا کرتا تھا۔ پروفیسر احمد رفیق سے ملنے کے بعد انکشاف ہوا کہ ہیجان اچھی چیز نہیں، بندے کونارمل لکھنا چاہیے۔ پروفیسر سے ملنے کے بعد احساس کی شدت تو باقی ہے مگر اس کی اذیت کم ہو گئی ۔آج کل تو بعض اوقات چالیس منٹ میں کالم لکھنا پڑ جاتا ہے۔ مشتاق یوسفی صاحب نے مجھ سے پوچھا کہ کتنی دیر میں کالم لکھ لیتے ہو۔ میں نے جواب دیا تو وہ بڑے حیران ہوئے۔ میں نے کہا کہ ڈیڈلائن کا دباؤ آپ پر ہو تو آپ بھی اتنی دیر میں لکھ لیں گے۔ عالی رضوی میرے استادوں میں سے ہیں۔ ان سے سیکھا کہ کبھی ادنیٰ لفظ نہیں لکھنا چاہیے، اسی طرح بازار کی زبان اور بول چال کی زبان میں کیا فرق ہے؟ میں نے ہمیشہ کالم لکھتے وقت یہ سوچا کہ میری ماں اسے پڑھ سکے۔ ایک آدھ بار ہی ایسا ہوگا کہ اپنا لکھا پڑھ کر شرمندگی ہوئی۔ مختلف اخبارات میں کالم لکھے۔ ایک اخبار میں مہینوں میرے کالم نہیں چھپے مگر تنخواہ ملتی رہی۔
تعمیری سوچ کی پرورش و پرداخت کے لیے ’دلیل ‘ کے نام سے ویب سائٹ کا اجرا کر دیا گیا ہے ۔ کیا سعادت ہے کہ انسانیت کی آخری گائیڈ بک قرآن اور پھر اسلامیان ِ عالم کی دھڑکنوں میں سمائے پاکستان ہی کو نہیں، مقاصدِ قرآن و پاکستان کی ’د لیل‘ کے نزول کو بھی شبِ قدر ہی کی برکت و رحمت سے پُرآغوش میسر آئی ہے. یہ بجائے خود بڑی نیک فال ہے. دراصل شبِ قدر ہی وہ رات ہے کہ جس میں مدبر ِ کائنات فرشتوں کو مخلوق کی آئندہ سال بھر کی تقدیر کا شیڈول فراہم فرماتا ہے۔ صدی بھر (83سال سے بہترین کو صدی ہی کہیے) کی مسلسل بندگی سے بہتر ی کی حامل یہ شب، غروبِ آفتاب سے طلوع فجر تک سراسر سلامتی والی اور امن بھری ہوتی ہے۔ پھر یہ کہ روح الامین جبریل علیہ السلام اس رات زمیں پر اتنے نورانی فرشتوں کی معیت میں نزول کرتے ہیں کہ جتنے زمیں پر کنکر یا ریت کے ذرات ہو سکتے ہیں، توبہرحال ثابت یہ ہوتا ہے کہ عین اسی مبارک اور سلامتی والی رات آسمانوں پر یہ فیصلہ ہو چکا تھا کہ اب کے ٹھیک ستائیسویں شب اہلِ زمیں کو’ دلیل‘ فراہم کر دی جائے گی اور کر دی گئی. وللہ الحمد.
مجھے امام ابن تیمیہ( رح) سے متعلق قاری حنیف ڈار کی تازہ تحریر میں سطحیت، لعن طعن اور فرقہ ورانہ عناد کے سوا کوئی دوسری شے نظر نہیں آئی۔ دولت اسلامیہ کی فکر کو امام ابن تیمیہ رحمہ اللہ کی فکر قرار دینا، دراصل دونوں ہی معروف افکار سے لاعلمی کا بین ثبوت ہے۔ ابن تیمیہ نے ہرگز ایسی زبردستی کی خلافت، خارجی طرز تکفیر اور شدت پسندی پیش نہیں کی، جیسی داعش نے فی زمانہ اختیار کر رکھی ہے۔ ابن تیمیہ کی چھ سو سال قدیم فکر سے صرف روایتی حنبلی، وہابی اور سلفی علماء ہی نہیں ابوالکلام آزاد، سید مودودی اور سید قطب ایسے جدید ذہن رکھنے والے علماء نے بھی استفادہ کیا ہے۔ ہمارے یہاں کے روایتی دیوبندی اور بریلوی علماء بھی اپنے حنفی اور صوفی پس منظر کے باوجود ابن تیمیہ کا ذکر عزت اور احترام سے ہی کرتے ہیں۔ خود قاری صاحب کے موجودہ مربی جاوید احمد غامدی صاحب تصوف کے باب میں فکر تیمیہ سے ہی متاثر ہیں۔اصطلاحات اور بیانیے چھوڑیں صاحب!اپنا مدعا واضح کریں
اگر کوئی شخص ہر وقت یہی کہتا رہے کہ میں عاقل وبالغ ہوں تو اس کا عاقل وبالغ ہونا مشکوک ہوجائے گا۔یہی حال پاکستانی ترقی پسندوں کا ہے جن کی ترقی پسندی کی عمارت زبانی دعوئوں پر قائم ہے۔ ہم نے آج تک کوئی رجعت پسند یا زوال پسند ایسا نہیں دیکھا جو اپنی زبان سے اپنی رجعت پسندی یا زوال پسندی کا ڈھنڈورا پیٹے۔ڈاکٹر گوپی چند نارنگ ہوں یا انتظار حسین،لکھنے پڑھنے کے کاموں میں مصروف رہتے ہیں،رجعت پسندی یا زوال پسندی کے فوائد پر گفتگو کرکے اپنا وقت ضائع کرتے ہیں نہ دوسروں کا۔
کتاب کا پہلا باب علی سردار جعفری کی بات چیت پر مشتمل ہے۔ جعفری صاحب احتجاجی شاعری پر گفتگو کرتے ہوئے احتجاجی لہجے میں فرماتے ہیں:’’تو جناب ہم نے احتجاجی شاعری ضرور کی ہے لیکن بے ایمانی کی بات یہ ہوئی کہ ہم نے ساتھ ہی دائمی شاعربھی کی،جسے آپ اچھی شاعری کہتے ہیں۔اب آپ کرتے یہ ہیں کہ ہماری اچھی شاعری کو تو نظرانداز کردیتے ہیں اور پکڑ لیتے ہیں اس شاعری کو جو ہم نے ہنگامی ضرورتوں کے تحت کی تھی۔لیکن یہ تو کوئی ادبی دیانت نہیں ہوئی۔خیراس کو چھوڑیے میں تو یہ بھی کہتا ہوں کہ جناب ہماری وہ ہنگامی نوعیت کی شاعری آپ کی اس مہمل شاعری سے بدرجہا بہتر تھی جس کا کوئی مقصد،کوئی رخ اور کوئی مافی الضمیر نہیں ہوتا‘‘۔
مسائل ہیں ان کا کیا حل ہے‘‘؟اقبال نے جواب دیا:’’سوشلزم‘کوئی نہ کوئی شکل سوشلزم کی اپنانی ہی پڑے گی‘‘۔قطع نظر اس سے کہ سید سبط حسن سے علامہ اقبالؒ کی ملاقات ان کی زندگی میں ہوئی تھی یا بعد میں‘ یہ واقعہ سید صاحب کو اس وقت کیوں یاد نہ آیا جب انھوں نے اپنا مشہور مضمون ’’فلسفہ شاہین ‘‘تحریر کیا تھا جس میں انھوں نے اس قسم کی باتیں لکھی ہیں:’’اقبال اقتدار پرست ہے اور دیوانگی کی حد تک اقتدار پرست۔وہ ہر قوت کا استقبال کرتا ہے۔ہر صاحب اختیار سے متاثر ہوتا ہے۔قوت واقتدار کی مدح سرائی اس کی شاعری کا اضطراری پہلو ہے اور اس دھن میں وہ تحقیق وجستجو اور عقل وتمیز کو بھی خیرباد کہہ دیتا ہے‘‘۔