Tag: یورپ

کچھ دیر پہلے ایک تازہ خبر پڑھ کر خوشی ہوئی کہ اسلام، لاکھوں مسلمانوں کے قاتل ملک اور عیسائیت کے گڑھ امریکا میں تیسرا بڑا مذہب بن چکا ہے اور آبادی کے لحاظ سے مسلمان چوتھے نمبر پر آگئے ہیں۔ سنسس بیورو کے اعداد و شمار کے مطابق کل امریکی آبادی کا ایک فیصد مسلمانوں پر مشتمل ہے، جو لگ بھگ 33 لاکھ بنتے ہیں، تاہم مسلمان تنظیموں کے مطابق اصل تعداد 70 لاکھ سے بھی زاید ہیں تو صرف نیویارک سٹی میں ہی 8 سے 10 لاکھ مسلمان آباد ہیں۔ یہ خبر پڑھنے کے بعد مجھے ایک بار پھر اس آفاقی سچائی پر یقین آگیا کہ حق ہمیشہ غالب آ کر رہتا ہے اور باطل مٹ جاتا ہے، کیونکہ حق آیا ہی غالب ہونے کے لیے ہے۔ اسلام کی پراثر تعلیمات کی وجہ سے مسلمانوں کی تیزی سے بڑھتی ہوئی تعداد کے خوف سے اہل مغرب یکجا ہوکر ایک عرصے سے اسلام کے خلاف محاذ سنبھالے بیٹھے ہیں، لیکن ان کو ہمیشہ منہ کی کھانی پڑی ہے،کبھی کامیابی حاصل نہیں ہوئی، بلکہ ہر بار اسلام کے خلاف ان کے پروپیگنڈے کا فائدہ مسلمانوں کو ہی ہوتا ہے، کیونکہ اہل مغرب اسلام کے خلاف جتنا پروپیگنڈا کرتے ہیں، اتنا ہی زیادہ اسلام موضوع بحث بنتا ہے۔ لوگ اسلام کی جانب متوجہ ہوکر اس کا مطالعہ کرتے ہیں اور اسلام سے متاثر ہوکر اسلام قبول کر لیتے ہیں۔

نائن الیون کے بعد ایسا ہی ہوا۔نائن الیون کے بعد امریکا نے تین درجن ممالک کے ساتھ ملک کر اسلام کو مٹانے کے لیے اسلامی دنیا پر دھاوا بول دیا اور بیشتر مسلم ممالک کی اینٹ سے اینٹ بجا کر رکھ دی۔لاکھوں مسلمانوں کو قتل کیا۔ ان کا سکون چھین لیا۔دنیا بھر میں مسلمانوں کو بزور طاقت دبانے کی ہر عسکری کارروائی کو حق بجانب قرار دیا گیا، لیکن خدا کو کچھ اور ہی منظور تھا۔ اسلام دشمنوں کا خیال تھا کہ ”غلبہ اسلام“ کی مالا جپنے والوں کا مکمل خاتمہ کر کے ”نیو ورلڈ آرڈر“ نافذ کر دیا جائے گا۔ اہل مغرب نے پوری قوت سے مسلمانوں کے خلاف پروپیگنڈا شروع کردیا، جس کا نتیجہ یہ نکلا کہ مسلمان ساری دنیا میں موضوع بحث بن گئے۔ اسلام امریکا و یورپ کے عوام کی توجہ و دل چسپی کا محور بن گیا۔ تاریخ میں پہلی باربھاری تعداد میں قرآن کریم کے نسخے اور اسلامی کتب امریکی و یورپی مارکیٹوں میں کثرت سے فروخت ہوئیں۔ یونیورسٹیوں میں اسلام اور مسلمانوں کے متعلق پی ایچ ڈی کرنیوالوں کا تانتا بندھ گیا۔ یورپ وامریکا کے سیکڑوں اداروں نے اسلامک اسٹڈیزکے شعبے قائم کیے، اسی مطالعہ وتحقیق کی بدولت اسلام سے متاثر ہوکر مغرب کے ذہین اور اعلیٰ دماغ اور مختلف شعبوں سے تعلق رکھنے والی یورپ کی بڑی بڑی شخصیات نے اسلام کے دامن عافیت میں پناہ لے لی۔

اسلام کے خلاف یورپ کے پروپیگنڈے کا ہی نتیجہ ہے کہ وہاں سب سے زیادہ لفظ ”محمد“ اور ”اسلام“ کو سرچ کیا جاتا ہے۔ ایک رپورٹ کے مطابق عالمی شہرت یافتہ بلاگ پیپل کین چینج دی ورلڈ نے انکشاف کیا ہے کہ رمضان المبارک میں دنیا بھر میں استعمال ہونیوالے سرچ انجن گوگل پر صارفین کی طرف سے سرچ کیے جانے والے الفاظ میں لفظ ”محمد“ کوسب سے زیادہ سرچ کیا گیا، جب کہ عالمی شہرت یافتہ سوشل میڈیا ایجنسی میڈیا ڈورکی ایک تحقیقاتی رپورٹ کیمطابق عالمی مذاہب میں لفظ ”اسلام“ انٹرنیٹ پر سب سے زیادہ سرچ کیا گیا۔ پوری دنیا میں اسلام، قرآن مجید اور سیرت النبی صلی اللہ علیہ و سلم کے بارے میں تحقیق و مطالعے کا شوق عام ہوا اور غیر مسلموں میں اسلام کو جاننے کی لگن پیدا ہوئی۔ امریکا، برطانیہ، فرانس، اسپین، جرمنی، ہالینڈ اور دیگر ممالک کے ہزاروں فلم اسٹار، سائنس دان، کھلاڑی، ڈاکٹر، انجینئر اور سیاستدانوں نے دائرہ اسلام میں داخل ہو کر دنیا کو یہ پیغام دیا کہ ترقی یافتہ تہذیب و تمدن، خیرہ کن سائنسی و سماجی ترقی اور عہد حاضر کی قیادت کے علمبردار امریکا و یورپ کا اسلام اور مسلمانوں کے خلاف پروپیگنڈا مذہبی تعصب، نسلی امتیاز اور اقتصادی و معاشی مفادات کا آئینہ دار ہے اور تمام تر مفادات سے بالاتر اور تمام خوبیوں کا مجموعہ صرف اور صرف اسلام ہی ہے۔ سلام کے خلاف تمام کوششوں کے باوجود آج اسلام مغرب میں سب سے زیادہ مقبول اور تیزی سے پھیلنے والا مذہب بن گیا ہے۔

اسلام سے خوفزدہ امریکا اور اہم مغرب نے اپنے ممالک میں بھی مسلمانوں کی زندگی اجیرن کردی، لیکن یہ بھی اسلام کی قبولیت میں کمی کا باعث بہ بن سکا۔محمد علی کلے ایک امریکی باکسر تھے، وہ امریکی ریاست کنیکٹی کٹ کے شہر لوئسویل میں پیدا ہوئے۔ انھوں نے تین مرتبہ باکسنگ کی دنیا کا سب سے بڑا اعزاز”ورلڈ ہیوی ویٹ باکسنگ چیمپیئن شپ“جیتا اوراولمپک میں سونے کے تمغے کے علاوہ شمالی امریکی باکسنگ فیڈریشن کی چیمپیئن بھی جیتی۔ وہ تین مرتبہ ورلڈ ہیوی ویٹ باکسنگ چیمپیئن شپ جیتنے والے پہلے باکسر تھے۔ محمد علی کلے نے باکسنگ میں اس وقت کے عالمی چیمپیئن سونی لسٹن کو شکست دی۔ اس کے بعد مسلسل سات مقابلوں میں اس وقت کے مایہ ناز باکسروں کو زیر کیا۔ باکسنگ میں محمد علی کی زندگی 20 سال رہی جس کے دوران انھوں نے 56 مقابلے جیتے اور 37 ناک آو¿ٹ اسکور کیا۔ اس طرح وہ 20 ویں صدی کے عظیم ترین کھلاڑی قرار پائے۔ محمد علی کلے اپنے کیریئر کے آغاز میں عیسائی تھے، نام تھا کیسیس کلے۔ عیسائیت چھوڑ کر اسلام قبول کیا اور ان کا نام محمد علی رکھا گیا۔ جب محمد علی نے اسلام قبول کیا تو یورپی معاشرے نے اس عظیم ترین قابل قدرکھلاڑی کو اسلام لانے کی پاداش میں طرح طرح سے زچ کرنا شروع کردیا۔ جس دن انھوں نے پریس کانفرنس کے سامنے مسلمان ہونے کا اعلان کیا تو ایک امریکی صحافی نے پوچھا کہ کیا تم واقعی مسلمان ہوگئے ہو؟ انھوں نے کہا ”ہاں“ تو صحافی نے طنزاً کہا:
”A BLACK MUSLIM ایک کالا مسلمان“
محمد علی کلے نے فوراً کہا کہ تم لوگوں نے کبھی کسی کو کالا عیسائی یا کالا یہودی کیوں نہیں کہا؟صرف مسلمان کو ہی کہتے ہو۔

انھی دنوں امریکا ویت نام میں قتل عام کررہا تھا، امریکا میں ہر صحت مند نوجوان پر فوج میں بھرتی ہوکر ویت نام جانا ضروری تھا۔چرچ کے پادری اس سے مستثنیٰ تھے۔محمد علی اس وقت اپنے محلے کی مسجد میں امامت کرتے تھے۔ ایک دن اس عالمی چیمپیئن کو کہا گیا کہ تمہیں آرمی میں جانا ہوگا، انھوں نے جواب دیا کہ میں امریکا کے قانون کے مطابق فوج سے مستثنیٰ ہوں، کیونکہ میری حیثیت بھی مذہب اسلام میں ایک پادری کی طرح ہے۔ لیکن امریکا کا تعصب اور مسلمانوں سے نفرت ان کے پیچھے پڑگئی۔محمد علی کلے کو فوج میں جانے سے انکار کرنے پر پانچ سال قید اور دس ہزار ڈالر جرمانے کی سزا سنائی گئی۔ محمد علی سے باکسنگ کا اعزاز بھی واپس لے لیا۔ 11ستمبر کے بعد ایک دن محمد علی نیویارک میں ورلڈ ٹریڈ سینٹرمیں مرنے والوں سے یکجہتی کرنے کے لیے آئے تو ایک صحافی نے ان سے پوچھا ”تم کیسا محسوس کرتے ہو کہ تمہارا اور دہشت گردوں کا مذہب ایک ہے؟“ انھوں نے جواب دیا ”تم کیسا محسوس کرتے ہو کہ تمہارا اور ہٹلر کا مذہب ایک ہے؟“ محمد علی کو ایک عظیم کھلاڑی ہونے کے باوجود صرف اسلام قبول کرنے کے جرم میں مختلف طریقوں سے پریشان کیا جاتا تھا۔

امریکا و یورپ میں اسلام کی بڑھتی ہوئی طاقت سے اہل مغرب انتہائی خوفزدہ ہیں۔ یورپ کے لوگ اسلام کو انتہائی طاقتور، دل کش اور اثرانگیز محسوس کرتے ہیں، اسی لیے اسلام کے پھیلاوکے خوف میں مبتلا رہتے ہیں اورآئے روز مختلف طریقوں سے اپنے اسی خوف اور ڈرکا اظہار بھی کرتے رہتے ہیں۔ یورپ میں اسلام فوبیا کی وجہ یہ ہے کہ یورپی ملکوں میں نو مسلموں کی تعداد میں تیزی سے اضافہ ہورہا ہے اور اسلام کو خطے کا سب سے زیادہ تیزی سے پھیلنے والا مذہب قرار دیا جارہا ہے۔ محمد حسن عسکری لکھتے ہیں”یورپ میں جو مسلمان ہیں، وہ عموماً اپنے اسلامی نام نہیں لکھتے اور نہ اپنے اسلام کا عام طور پر اعلان کرتے ہیں۔ جیسے ہی یورپ کے لوگوں کو پتہ چلتا ہے کہ فلاں شخص مسلمان ہوگیا ہے، فوراً اس کی مخالفت شروع ہوجاتی ہے۔“

اس وقت دنیا کی آبادی 7 ارب کے قریب پہنچ چکی ہے جس میں سے ایک ارب 60 کروڑ سے زائد آبادی مسلمانوں کی ہے، عالمی سطح پر اسلام دنیا کا دوسرا بڑا مذہب جب کہ دنیا کا ہر چوتھا فرد مسلمان ہے ، دنیا کی آبادی کا25 فیصدحصہ مسلمانوں پر مشتمل ہے جس میں آیندہ 20 برس میں 35 فیصد اضافہ ہو جائے گا۔ مختلف عالمی اداروں کی رپورٹس کے مطابق دنیا بھر میں مسلمانوں کی تعداد میں اضافہ ہور ہا ہے۔ اس وقت کینیڈا میں 9 لاکھ 40 ہزار مسلمان آباد ہیں جو 2030ء تک 20 لاکھ 70 ہزار تک پہنچ جائیں گے۔ امریکا میں اس وقت مسلمانوں کی آبادی 30 لاکھ کے قریب ہے جو 2030ء تک بڑھ کر 60 لاکھ 20 ہزار تک پہنچ جائیں‌گے۔ شمالی امریکا میں 1990ء سے 2010ء تک مسلمانوں کی آبادی میں 91 فیصد کی رفتار سے اضافہ ہوا اور مسلم افراد کی تعداد 10 لاکھ 80 ہزار سے بڑھ کر 30 لاکھ 50 ہزار تک پہنچ گئی جبکہ آنے والے 20 سالوں میں شمالی امریکا میں مسلم افراد کی تعداد 80 لاکھ 90 ہزار ہونے کا امکان ہے۔ برطانیہ میں مسلمانوں کی آبادی 20 لاکھ 30 ہزار سے بڑھ کر 50 لاکھ 60 ہزار اور فرانس میں 40 لاکھ 70 ہزار سے بڑھ کر 60 لاکھ 90 ہزار کے قریب پہنچ جائے گی جبکہ فرانس میں اس وقت بھی مساجد کی تعداد کیتھولک چرچ سے زائد ہے۔ 2010 تک یورپ میں مسلمانوں کی آبادی 5 کروڑ کے قریب تھی جو 2030 تک بڑھ کر 6 کروڑ کے قریب پہنچ جائے گی۔

فورم آن ریلیجن اینڈ پبلک لائف نامی ایک امریکی ادارے نے عالمی سطح پر بین المذاہب شرح آبادی کاایک سروے کیا ہے ،جس کے مطابق 2030ء میں جب دنیا کی آبادی تقریباً 8ارب 3کروڑ سے تجاوز کرجائے گی اس وقت دنیا میںمسلمانوں کی آبادی 2ارب20کروڑ ہوگی۔ اسلام کے پھیلتے دائرہ کی وسعت کا یہ عالم ہے کہ مغربی خاتون صحافی اوریانہ فلاسی کہتی ہیں کہ آنے والے بیس سال میں پورے یورپ کے کم از کم چھ بڑے شہر اسلام کی کالونی بن جائیں گے ،کیونکہ ان شہروں میں مسلمان کل آبادی کا تیس سے چالیس فیصد تک ہو جائیں گے۔ حیرت کی بات یہ ہے کہ اسلام قبول کرنے والوںمیں بڑی تعداد عورتوں کی ہے، یورپ میں اگر چار افراداسلام قبول کرتے ہیںتو ان میں تین خواتین ہوتی ہیں۔ یورپ میں مسلمانوں کی اسی بڑھتی ہوئی تعداد سے پورا یورپ خوفزدہ ہے اور مسلمانوں کو مختلف طریقوں سے تنگ کررہا ہے، لیکن یہ حقیقت ہے کہ اسلام دشمن قوتیں اسلام کو دبانے کی جتنی بھی کوشش کرلیں لیکن اسلام اسی طرح بڑھتا جائے گا جس طرح امریکا میں بڑھ رہا ہے۔

آج کل ہمارے خطے کے زیادہ تر نوجوان یورپ کے خواب آنکھوں میں سجائے عمرِ رفتہ کی منازل طے کرتے ہیں۔ کسی کو اپنی ساری پریشانیوں کا حل یورپ میں نظر آتا ہے تو کوئی یہاں کی چکا چوند سے مرعوب ہے۔ کسی کو پیسے کی ضرب تقسیم چین نہیں لینے دیتی تو کوئی آزاد طرزِ زندگی کا دلدادہ ہے۔ اب چونکہ یورپ کا کوئی بھی ملک، عربوں کی طرح، اپنا ویزا نہیں بیچتا تو خواہش مند افراد یقینی طور پر غیرقانونی راستوں کا انتخاب کرتے ہیں۔ جن میں ڈنکی (پیدل اور کشتیوں پر سرحدیں عبور کرنے والوں کے لیئے استعمال ہونے والی عمومی اصطلاح) سب زیادہ معروف اور سستا طریقہ ہے۔ کچھ سیاحتی ویزے پر واپس ناں جانے کی نیت سے سفر کرتے ہیں تو کچھ اور تعلیمی ویزا حاصل کرنے میں کامیاب ہو جاتے ہیں جبکہ ان کا تعلیم حاصل کرنے یا جاری رکھنے کا کوئی ارادہ نہیں ہوتا۔ عام طور پر اس طرح کے سپنے بننے والوں کا مطمع نظر یورپ کی روشنیاں، رنگینیاں اور دولت کی ریل پیل ہوتی ہے اور کسی موڑ پر بھی یہاں کی تکالیف اور مسائل کے بارے میں ناں تو سوچا جاتا ہے اور ناں ہی کسی سے رہنمائی لی جاتی ہے۔ اور نتیجے میں عمومی طور پر، جانے انجانے میں، دنیا کے ساتھ ساتھ آخرت میں بھی اذیت کا سامان کر لیا جاتا ہے۔

ڈنکی لگانے والے بلوچستان سے ایران میں داخل ہوتے ہیں اور ایران سے ہوتے ہوئے ترکی پہنچ جاتے ہیں۔ کچھ ترکی کو ہی منزل بنا کر کام میں جت جاتے ہیں تو باقی سمندر کے راستے یونان کا رخ کرتے ہیں اور وہاں سے اپنے حالات اور رجحان کے مطابق دوسرے ملکوں کا انتخاب کرتے ہیں۔ یہ سارا سفر بنا کسی بھی طرح کی دستاویزات کے کیا جاتا ہے اور نہایت ہی دردناک اور دل دہلا دینے والا ہوتا ہے۔ چونکہ غیر قانونی طور پر سرحدیں عبور کی جاتی ہیں تو لازمی طور پر جنگلوں اور ویرانوں کا راستہ اختیار کیا جاتا ہے جس میں تمام لوگ ایجنٹ کے رحم و کرم پرہوتے ہیں۔ کبھی ایک گھونٹ پانی کی قیمت ہزاروں میں طلب کی جاتی ہے تو کبھی پیچھے رہ جانے پر ڈنڈوں سے عزت افزائی ہوتی ہے۔ کہیں گاڑی میں گندم کی بوریوں کی طرح اوپر نیچے لٹایا جاتا ہے تو کبھی سنگلاخ پہاڑوں اور کانٹوں بھری زمین پر بنا آواز کیئے دوڑنے کا حکم دیا جاتا ہے۔ اور اس دوران اگر کوئی بدقسمت کسی ناگہانی آفت کا شکار بن جائے تو لاش کھلے آسمان تلے جنگلی جانوروں کی لیئے چھوڑ دی جاتی ہے۔ ایجنٹ کے لیئے یہ لوگ صرف ایک “پارسل” کی حیثیت رکھتے ہیں جس کے ناں تو جذبات ہوتے ہیں اور ناں ہی احساسات۔ جہاں کہیں ایجنٹ کو خطرہ محسوس ہو وہ پارسل کو چارہ بنا کر خود نکل جاتا ہے پھر چاہے پارسل آدم خور گدھوں کے ہتھے ہی کیوں ناں چڑھ جائے۔ یہ ساری مشقتیں یہ سوچ کر برداشت کر لی جاتی ہیں کہ یورپ پہنچتے ہی ساری تکلیفوں کا ازالہ ہو جائے گا لیکن جب خواب ٹوٹتا ہے تو اس وقت تک کشتیاں جل چکی ہوتی ہیں۔ جب یہ لوگ تصویر کا دوسرا رخ دیکھتے ہیں تو کفِ افسوس ملتے ہیں اور اپنے ملک کی جو زندگی بے کار نظر آتی تھی وہی شاہانہ روپ اختیار کر لیتی ہے۔ جن گلیوں سے گذرنا توہین خیال کیا جاتا تھا وہی نیندیں اڑا دیتی ہیں۔ جن رشتوں کو درخوئے اعتنا نہیں سمھجا جاتا تھا انہیں کی یاد دل میں کسک بن کر چبھتی ہے اور اوپر سے یورپ میں پہلے سے بسے اپنوں کی سرد مہری، بے اعتنائی اور مطلب پرستانہ مزاج مل کر انسان کو بہت تھوڑے عرصے میں جذبات اور احساسات سے عاری کر کے ایک مشین کا روپ دے دیتا ہے جس کا انتہائی مقصد پیسہ ہوتا ہے پھر چاہے وہ کسی بھی طریقے سے آئے۔

مختلف یورپی ممالک تارکینِ وطن کے ساتھ مختلف رویہ اختیار کرتے ہیں۔ کچھ اپنے ملک میں رہنے کا عارضی اجازت نامہ دے کر کماؤ اور کھاؤ کی بنیاد پر چلتا کر دیتے ہیں تو کچھ رہائش کا انتظام بھی کر دیتے ہیں۔ اور کچھ ایسے بھی ہیں جو رہائش، کھانا اور دوا کے ساتھ ساتھ ماہانہ بنیادوں پر اچھا خاصا جیب بھی دیتے ہیں۔ جرمنی بھی انہیں چند ملکوں میں سے ہے جو اپنے ملک میں داخل ہونے والے تارکینِ وطن کی ذمہ داری قبول کرتے ہوئے ان کی مکمل کفالت کرتا ہے اور دوسری سہولیات کے ساتھ ساتھ ماہانہ جیب خرچ بھی دیتا ہے۔ یہاں پر تارکینِ وطن کو بنیادی طور پر دو حصوں میں تقسیم کیا جاتا ہے۔ ایک وہ جن کی جان کو یقینی طور پر خطرہ ہوتا ہے جیسے کہ جنگ میں مبتلا ملکوں کے باشندے اور دوسرے وہ جو ایسے ملکوں سے آتے ہیں جہاں جنگ وغیرہ کا کوئی خطرہ نہیں ہوتا جیسے کہ پاکستان، بھارت اور بنگلادیش وغیرہ۔ پہلی قسم کے لوگوں کو چونکہ آنے کی دعوت دی جاتی ہے اور ان کے لیئے باقاعدہ طور پر سرحدیں کھولی جاتی ہیں تو ان کو حکومت ہمیشہ سر آنکھوں پر بٹھاتی ہے اور ابتدائی چند ماہ کے بعد ان کو باقاعدہ طور اس شرط کے ساتھ ویزا جاری کر دیا جاتا ہے کہ جب ان کے ملکی حالات درست ہو جائیں گے تو یہ لوگ واپس چلے جائیں گے۔ اس دوران ان کی مکمل کفالت کا انتظام کیا جاتا ہے، خاندان کے افراد کے حساب سے گھر دیئے جاتے ہیں، ہر فرد کا ماہانہ خرچ دیا جاتا ہے اور زبان سیکھا کر قابلیت کے اعتبار سے ملازمت کا انتظام کیا جاتا ہے۔ چند سال بعد قابل لوگ چونکہ معاشرے کا کارآمد حصہ بن جاتے ہیں تو چند نہایت معمولی شرائط کی بنیاد پر ان کو شہریت لینے کی اجازت بھی دے دی جاتی ہے۔

اور دوسری قسم کے افراد چونکہ ذاتی وجوہات کی بنا ہر ملک چھوڑتے ہیں تو ان کی پناہ کی درخواست پر غور و فکر کرنے لے لیئے ان کو مختصر مختصر وقفوں کے اجازت نامے جاری کیئے جاتے ہیں اور اس دوران ان کی کفالت بھی حکومت ہی کرتی ہے۔ ابتدائی چھ ماہ ان کو پناہ گزینوں کے کیمپوں میں رکھا جاتا ہے اور پھر کسی مستقل رہائش گاہ میں منتقل کر دیا جاتا ہے جس کے اخراجات حکومت ادا کرتی ہے۔ عدالت میں ان سے آنے کی وجہ پوچھی جاتی ہے جس کے جواب میں ننانوے فیصد جھوٹ بولا جاتا ہے جس میں عموما اپنے ملک اور مذہب کا چہرہ مسخ کر کے دیکھایا جاتا ہے اور پھر اس کی بنیاد پر ویزا کے لیئے اپیل کی جاتی ہے۔ اس دوران چونکہ کفالت کی مکمل ذمہ داری حکومت پر ہوتی ہے تو ان کو قانونی طور پر کسی بھی طرح کا کام کرنے کی اجازت نہیں ہوتی اور پھر یہاں سے ظلم، بربریت اور ذلت کا ایسا دور شروع ہوتا ہے کہ الامان والحفیظ۔
غیر قانونی تارکینِ وطن (حصہ دوم)

جو افراد ذاتی وجوہات کی بنا پر ان ملکوں سے آتے ہیں جہاں عمومی طور پر جمہوریت اور امن ہوتا ہے۔ ان کے لیئے پناہ کا طریقہ کار کچھ مختلف ہوتا ہے۔ یورپی اتحاد میں پناہ کی درخواست کا ٖفیصلہ جس قانون کے تحت کیا جاتا ہے وہ “ڈبلن ریگولیشن” کے نام سے جانا جاتا ہے جس کی بنیاد تو جون ۱۹۹۰ میں رکھی گئی لیکن باقاعدہ عمل سیتمبر ۱۹۹۷ سے شروع ہوا۔ اس قانون کے تحت دنیا کے ہر انسان کو یہ حق حاصل ہے کہ وہ جان کا خطرہ ہونے کی صورت میں یورپی اتحاد کے کسی بھی ملک میں پناہ کی درخواست دائر سکتا ہے۔ اور بیان کی گئی وجوہات کی تصدیق ہونے پر نہ صرف یہ کہ باعزت طریقے سے سکونت کی اجازت دے دی جاتی ہے بلکہ صلاحیت، قابلیت اور دلچسپی کی بنیاد پر مناسب روزگار کا انتظام بھی کیا جاتا ہے۔ پناہ کی درخواست کا طریقہ کار انتہائی سادہ اور آسان ہےجس کے مطابق پناہ کے متلاشی کو ملک میں داخل ہونے کے فوری بعد حکومتی نمائندوں جیسے پولیس وغیرہ کے پاس جانا ہوتا ہے اور متعلقہ اشخاص چند بنیادی سوالات اور اندراج کے بعد اس شخص کو قریب ترین واقع پناہ گزینوں کے کیمپ میں بھیج دیتے ہیں جہاں اس کو نہ صرف یہ کہ رہائش دی جاتی ہے بلکہ کھانے پینے کے ساتھ صحت کا بھی مکمل خیال رکھا جاتا ہے۔ چند دنوں میں طبی معائنے کے بعد ان کو مرکزی کیمپ میں منتقل کر دیا جاتا ہے اور وہاں ان سے باقاعدہ طور پناہ کی درخواست دلوائی جاتی ہے جس کی مکمل رہنمائی حکومتی نمائندے کرتے ہیں اور بوقتِ ضرورت ترجمان کا انتظام بھی کیا جاتا ہے۔ عموما ابتدائی تین سے چھ ماہ مختلف کیمپوں میں رکھا جاتا ہے (آجکل چونکہ پناہ گزینوں کی بہت بڑی تعداد جرمنی آرہی ہے تو اکثر لوگوں کو اس سے زیادہ وقت بھی گزارنا پڑ جاتا ہے) اور پھر کسی مستقل رہائش گاہ میں منتقل کر دیا جاتا ہے جہاں نہ صرف یہ کہ کھانا پکانے کی سہولت موجود ہوتی ہے بلکہ پرائویسی کا بھی خیال رکھا جاتا ہے۔ کیمپوں کے اندر بنیادی مسئلہ کھانے کا ہوتا ہے کہ وہاں حلال کھانے کی سہولت میسر نہیں ہوتی۔ ہر کیمپ میں باقاعدہ طور پر رہائشیوں کو بتایا جاتا ہے کہ گوشت حلال نہیں ہے لیکن افسوس کہ اس کے باوجود اکثریت اس کو بڑی رغبت سے کھاتی ہے۔ چونکہ درخواست کی سماعت کی باری عموما کئی سالوں میں آتی ہے تو اس دوران حکومت رہائش اور کھانے پینے کے علاوہ دیگر ضروریات کے لیے ہر ماہ نقد رقم بھی ادا کرتی ہے۔

سماعت کی باری آنے پر متعلقہ شخص کو عدالت میں طلب کیا جاتا جہاں ترجمان کے ذریعے اس سے بیالیس سوال کیئے جاتے ہیں جن کا لبِ لباب ذاتی شناخت اور پناہ کی درخواست کی وجہ جاننا ہوتا ہے۔ چونکہ پناہ کی درخواست صرف اسی صورت میں قبول کی جاتی ہے جب جان کو خطرہ ہو تو اس مقام پر عموما جھوٹی کہانیاں سنائی جاتیں ہیں جن کی بنیاد زیادہ تر مذہب اور ریاست کو بنایا جاتا ہے۔ کثرت کے ساتھ جو چند وجوہات بتائی جاتی ہیں ان میں طالبان کی طرف سے دہشت گرد بننے پر اصرار، حکومتی خفیہ اداروں کی طرف سے خود کش بمبار بننے پر مجبور کیا جانا، اور علماء کی طرف سے جہاد پر جانے کے لیئے مجبور کرنا شامل ہیں۔ بہت سارے لوگ مذہبی تنظیموں جیسے کہ جماعۃ الدعوہ وغیرہ کی طرف سے شدت پسندی پر مجبور کیئے جانے کو بنیاد بناتے ہیں تو بہت سے ایسے بھی ہیں جنہوں نے لال مسجد کو کیش کروانے کی کوشش بھی کی ہے۔ خاص طور پر وہ لوگ جن کا کبھی پولیس یا فوج سے تعلق رہا ہو تو وہ عموما یہ بیان دیتے ہیں کہ چونکہ لال مسجد کے واقعہ میں ہم حکومت کے حمایتی تھے تو اب “مولوی” ہمارے دشمن بن چکے ہیں اور سزا کے طور پر ہمیں زندگی سے محروم کرنا چاہتے ہیں۔ اس طرح کے بیان دیتے ہوئے کبھی یہ سوچنے کی زحمت نہیں کی جاتی ہے کہ ان کا ملکی کردار پر کیا اثر پڑے گا اور اس کے نتائج کیا نکلیں گے۔ اگر سوچا جاتا ہے تو صرف یہ کہ وہ کونسا ایسا بیان ہے جو ان کے حق میں بہتر ہو گا پھر چاہے وطن کی عزت کی دھجیاں ہی کیوں نہ اڑانی پڑیں۔

چونکہ زیادہ تر بیانات جھوٹ پر مبنی ہوتے ہیں اور ٹھوس ثبوت نہ ہونے کی بنیاد پر درخواست رد کیئے جانے کے واضح امکانات ہوتے ہیں تو ہر کوئی چور راستوں کی تلاش میں رہتا ہے جن میں سب سے مختصر جرمن بچے کا باپ بننا ہوتا ہے۔ جرمنی چونکہ بچے کی پیدائش پر ویزا جاری کرتا ہے تو حتی المقدور ہر کوئی اسی کوشش میں لگا رہتا ہے اور عموما پہلا بچہ بنا شادی یا نکاح کے پیدا کیا جاتا ہے کہ یورپی لڑکیاں شادی کے لیئے بہت “بعد” میں تیار ہوتی ہیں۔ یہاں ایسے لوگوں کی بھی کافی تعداد پائی جاتی ہے جو اسی طرح کا بچہ پیدا کر کے ویزا لینے میں تو کامیاب ہو گئے لیکن اب یہ نہیں جانتے کہ وہ بچہ کہاں ہے۔ کیوں کہ جرمن خواتین صرف ان لوگوں کے ساتھ ٹکتی ہیں جو کچھ کما رہا ہو نہ کہ وہ جو خود بھی انہیں کے سہارے بیٹھا ہو۔

اس دوران ان لوگوں کو چونکہ پیسہ بھی کمانا ہوتا ہے تو یہ کام کی تلاش میں نکلتے ہیں۔ جرمن ادارے قانونی کاروائی پوری کیئے بنا کسی کو بھی کام پر نہیں رکھتے اور ان لوگوں کو عموما کام کی اجازت نہیں ہوتی بلکہ لینی پڑتی ہے اور اجازت ملنے کے بعد جب کام مل جائے تو حکومتی امداد بند کر دی جاتی ہے کہ اب خود کمانے کے قابل ہو چکے ہیں۔ جو اگرچہ مستقبل میں قانونی اعتبار سے کافی مددگار ثابت ہوتی ہے لیکن چونکہ فی الفور حکومتی امداد سے ہاتھ دھونے کا خوف ہوتا ہے تو چوری چھپے کام کرنے کو ترجیح دی جاتی ہے جو زیادہ تر پیزا اور برگر وغیرہ کی پاکستانی، ترکش اور انڈین دکانوں میں ملتا ہے۔ جرمن قانون کے مطابق قانونی طور پر کام کی صورت میں ایک گھنٹے کی کم از کم اجرت آٹھ یورو اور پچاس سنیٹ دینا ضروری ہے جو پاکستانی تقریبا ۹۹۰ روپے بنتے ہیں اور اس کے ساتھ ساتھ کام دینے والے کو ملازم کا ٹیکس اور ہیلتھ انشورنس کا کچھ حصہ بھی ادا کرنا ہوتا ہے جو کہ ہمارے لوگوں پر کارِ گراں گزرتا ہے تو وہ ہمیشہ ایسے ہی لوگوں کی تلاش میں رہتے ہیں جو قانونی طور پر کام نہ کرنا چاہتے ہوں۔ اور جن سے کام تو دوگنا لے سکیں لیکن اجرت ناں ہونے کے برابر دینی پڑے۔ نئے آنے والوں کو مختلف طریقوں سے یہ جتلا دیا جاتا ہے کہ ویزا لینے کے لیئے بچہ ضروری ہے اور عقل مندی چوری چھپے کام کرنے میں ہے اور پھر ان لوگوں کو کام پر رکھ کر گدھوں کی طرح ہانکا جاتا ہے اور مزدوری کے نام پر چند ٹکے ہاتھ پر رکھ دیئے جاتے ہیں اور یہ مزدور چونکہ حکومت کے زیرِ کفالت ہوتے ہیں اور دوسری سہولیات کے ساتھ ساتھ حکومت سے ماہانہ اچھی خاصی نقد رقم بھی وصول کر رہے ہوتے ہیں تو جمع تفریق کر کے اپنوں کے ظلم پر راضی ہو جاتے ہیں۔ اور پھر دوسرے مقصد کے طور پر ہر گذرنے والی لڑکی کو چلتے پھرتے ویزے کی شکل میں دیکھنا شروع کر دیتے ہیں۔ مہینے کے آخر میں جب پیسے گھر بھیجنے کی باری آتی ہے تو قانون کی ںظروں سے بچنے کے لیئے ھنڈی اور حوالے کا سہارا لیا جاتا ہے جو بذاتِ خود انتہائی قبیح اور ممنوع عمل ہے اور کسی بھی ملک کی بنیادیں ہلانے میں کلیدی کردار ادا کرتا ہے۔ گویا اپنے ملک سے نکل کر یورپ آنے اور کام کرنے سے گھر پیسے بھیجنے تک ہر قدم پر قانون اور ملکی وقار کو جوتے کی نوک پر رکھا جاتا ہے اور اپنے عہد کو پورا کرو کہ بیشک عہد کے بارے میں (قیامت کے روز) پوچھا جائے گا، کے تحت اللہ کے قوانین کو بھی بے دردی سے روندا جاتا ہے۔

بدقسمتی سے ہمارے معاشرے میں اس پہلو پر نہ تو کسی بھی سطح پر شعور اجاگر کیا جاتا ہے اور نہ ہی اس کی شرعی حیثیت واضح کی جاتی ہے۔ جانے انجانے میں نہ تو مذہبی رہنما اس کو اپنا موضوع بناتے ہیں اور نہ ہی سرکاری سطح پر کوئی شعوری مہم چلائی جاتی ہے۔ جس کا نتیجہ یہ ہے کہ غیر قانونی طریقوں سے سرحدیں عبور کرنا، جھوٹ کی بنیاد پر دوسرے ملکوں میں سکونت اختیار کرنا اور ھنڈی کے ذریعے رقوم کی منتقلی کو نہ تو برا سمھجا جاتا ہے اور نہ ہی کسی بھی درجے میں گناہ تصور کیا جاتا ہے۔ بلکہ طرفہ تماشا تو یہ ہے اس کام کے لیئے باقاعدہ طور پر دعا کی جاتی ہے، کامیابی کے لیئے قرآن خوانی کروائی جاتی ہے، صدقہ اور خیرات کا اہتمام کیا جاتا ہے اور منتیں مانی جاتی ہیں۔ گویا اللہ کی مخالفت پر اللہ ہی سے مدد مانگی جاتی ہے اور جس چیز سے قرآن منع کرتا ہے اس کی کامیابی کے لیئے اسی قرآن کی آیات پڑھی اور پڑھائی جاتیں ہیں۔ جبکہ مذہب کا سیدھا سا اصول ہے کہ ہر وہ دنیاوی قانون اور معاھدہ جو ہمارے ایمان اور ایمانی تقاضوں سے نہ ٹکراتا ہو اس کی پاسداری اور پابندی ہم پر اسی طرح لازم ہے جس طرح دوسرے احکام کی۔ بنا ویزوں کے سرحدیں عبور کرنا جس طرح دنیاوی قانون میں جرم ہے بلکل اسی طرح اللہ کے ہاں بھی گناہ اور جرم ہے۔ اب گناہ تو اللہ کریم توبہ اور استغفار کے تنیجے میں معاف فرما دیتے ہیں لیکن جرم کا تعلق چونکہ انسانوں سے ہوتا ہے تو جب تک متعلقہ افراد سے معاملہ ختم نہ کیا جائے اس وقت تک اللہ کریم بھی اس میں دخل اندازی نہیں کرتے کہ یہی عدل کا تقاضا بھی ہے۔ اور غیر قانونی طور پر سرحدیں عبور کر کے، غیر قانونی طریقوں سے کام کر کے، اور کام ہونے کے باوجود حکومتی امداد وصول کر کے، جو عوام کے ٹیکسوں سے ادا کی جاتی ہے، ہم کتنے ہی لوگوں کا حق مارتے ہیں اور اگر ان کو لوٹانا پڑ گیا، جو کہ یقینا لوٹانا پڑے گا، تو سوچیں ہمارا کیا بنے گا؟ کیا ہمارے پاس انتی نیکیاں ہوں گی کہ سب کا حق ادا کرنے کے لیئے کافی ہوں؟ اور یہ حقوق یقینا ادا کرنا پڑیں گے کہ اللہ کا قانون یہی ہے۔ جو خدا جانورں تک کے آپسی جھگڑوں کا ٖفیصلہ عدل کی بنیاد ہر کرے گا وہ انسانوں کے ساتھ کی گئی زیادتی سے کس طرح صرفِ نظر کر سکتا ہے۔

یہ سوال جتنا آسان ہے، اس کا جواب اتنا ہی مشکل کر دیا گیا ہے جیسے چار اندھے ہاتھی کو اپنے احساسات سے بیان کر رہے ہوں. کسی کے لیے یہ مینار ہے تو کوئی اسے دیوار باور کراتا ہے. لبرلزم کے ہاتھی پر بھی احساسات و خواہشات کی زبان عام ہے.

میرے لیے لبرلزم کی چنداں اہمیت نہ ہوگی، جب تک مجھے کوئی لبرل ہونے کا نہ کہے گا. لیکن جب لبرلزم کو آج کا مروج نظام باور کرایا جائے گا، یہ احساس دلایا جائےگا کہ لبرل ہی سکہ رائج الوقت ہے، یہی کامیابی کی کنجی ہے. تو میں دلیل کا طالب بنوں گا. یہ دلیل کسی کی ذاتی سوچ، پسند نہ پسند پر نہیں. حقائق پر مبنی ہو. حقائق تاریخ کے تواتر میں ملتے ہیں. میں اسلام کو چودہ سو سال قبل کے نزول پر قبول کرتا ہوں. آج اس کی تفسیر ممکن ہے. پر یہ تفسیر جہاں بھی اسلام کی روح سے متصادم ہوگی، میں اسے نزول کی کسوٹی پر پرکھوں گا.

لبرلزم کو آج بیان کیسے کیا جاتا ہے؟ اس کی تفسیر کیا بیان کی جاتی ہے، اس کی کسوٹی کیا ہے؟ کیا یہ وہی ہے جو اس نظریہ کو بنانے والوں نے مقرر کی، یا میرے آج کے دوست اس میں سے کچھ لو کچھ چھوڑ دو کی خواہش پر جیسے پیش کرتے ہیں؟

لبرلزم لاطینی لفظ لیبر سے نکلا ہے جس کا مطلب آزاد خیالی ہے. یہ مکمل اہل مغرب کا فلسفہ ہے، جو وہاں سترھویں (17) صدی میں منظر عام پر آیا، اور اہل مغرب کے سیاسی پس منظر میں یہ ایک بہت پرکشش نعرہ تھا. میں جان لاک سے لے کر جان اسٹورٹ مل تک پھیلے لبرلزم کے دانشوروں کا ذکر نہیں کرنا چاہتا کہ یہ بے وجہ کی طوالت ہے. ہاں میں اس تاریخ سے یہ اخذ ضرور کرنا چاہوں گا کہ آج کے اس لبرلزم کے آنے کا پس منظر کیا تھا.

لبرلزم جس یورپ میں آیا کہ وہ متضاد کیفیات کا حامل ایک معاشرہ تھا، ایک طویل خانہ جنگیوں کا شکار، مذہب نے چرچ کی صورت بالادستی بنائی ہوئی تھی، حکومت کا ایک ستون بن چکا تھا، اور علم کے آگے دیوار بنا ہوا تھا، عام آدمی بادشاہت، جاگیردار، حکومتی اہلکاروں، چرچ کے نظام سب کی بیک وقت غلامی کر رہا تھا، اور مکتی صرف موت ہوتی تھی. دوسری طرف یہی یورپ سائنس میں ترقی کی راہ پر تھا، نئے علوم کے کھوج کا سفر بھی تھا اور اس کی جستجو کی خواہش بھی، اس پس منظر میں آزادی خیالی یا شخصی آزادی کا نعرہ وہاں بہت پرکشش تھا.

سپین کی تاریخ ہو کہ سلطنت برطانیہ کی فرانس کی ہو کہ سنٹرل یورپ کی، اس لبرلزم کو ان کے پس منظر میں دیکھیں تو سمجھ آتی ہے. پر اس لبرلزم نے انیسویں صدی کے اوائل تک لبرلزم سے سیکولرزم کا جو سفر کیا سوالات یہاں اٹھنے شروع ہوئے.

پہلا سوال جو بطور ایک مسلمان ہم سب سے اہم سمجھتے ہیں کہ آیا لبرلزم نے عام آدمی کو چرچ کے شکنجے سے آزاد کیا یا کہ مذہب کے شکنجے سے؟ ہزار سالہ یورپ کی تاریخ میں وہ چرچ اور فرد کی کشمکش تھی. لبرلزم نے عیسائی دنیا کو یہ سوچ باور کرائی کہ فرد مذہبی سوچ پر کامل آزاد ہے، جس طرح چاہے اس پر عمل کرے. لیکن درحقیقت لبرلزم مذہب مخالف ہے کیونکہ مذہب اپنی فطرت میں انسان کو اپنے سامنے جھکنے کا حکم دیتا ہے، کوئی بھی مذہب انسان کو مقتدر قرار نہیں دیتا، مذہب ایک محصوص نظم و ضبط پر زندگی گزارنے کا نام ہے.

یہی وجہ ہے کہ آج کے یورپ میں اسلام انھی اپنی اقدار سے متصادم لگتا ہے. ایک حجاب برداشت نہیں ہوتا، ورنہ یہ فرد کی آزادی پر لیا جاسکتا ہے. ہم جنس پرستی سے لے کر نیچرلسٹ سوچ و اقدار جو مذہب محالف ہیں، ان کی آبیاری وہاں ممکن ہے. پر مذہب پر فرد اگر حجاب کرلے تو یہ لبرلزم میں قابل قبول نہیں.

اس سوچ پر اسلامی معاشرے کے مکمل نظام کو جب ہم دیکھتے ہیں تو وہ اپنی روح پر لبرلزم سے مکمل متصادم ہیں. تاریخ میں لبرلزم نظریہ سے زیادہ بطور ہتھیار استعمال ہوا، ابتدا میں برطانوی سرمایہ دار نے اسے برطانوی جاگیردار کے خلاف استعمال کیا، آگے جاکر فرانسیسی انقلاب میں، یورپ میں اور بھی بہت مثالیں ہیں. عثمانی خلافت کے خلاف اس کا استعمال تو قریب کی معلوم تاریخ ہے. اس کے علاوہ فاشزم و کمیونزم کے خلاف کامیاب استعمال ہوا.

تو ہم یہ کیوں نہ سمجھیں کہ آج یہ اسلامی آئیڈیالوجی کے خلاف بطور ہتھیار استعمال ہورہا ہے؟ مجھے کیا اسلام کافی نہیں؟ مجھے کیا مسلمان ہونا کافی نہیں؟ جو میں مغرب سے لبرل و سیکولر کا خطاب لوں؟

اقبال کے بارے میں ہمیشہ یہ میرا یقین اور ایمان رہا ہے کہ یہ دنیا کا واحد شاعر اور فلسفی ہے جو انسان کی زندگی کے ہر مرحلے میں رہنمائی کرتا ہے۔ بچپن میں ہوش سنبھالتے ہی آپ کی انگلی تھام لیتا ہے اور ایک ایسی دعا آپ کو سکھاتا ہے جو آیندہ آنے والی زندگی کے لیے رہنما اور ہادی ثابت ہو۔

لب پہ آتی ہے دعا بن کے تمنا میری
زندگی شمع کی صورت ہو خدایا میری

زندگی کے ہر مرحلے، معاشرت و سیاست کے ہر موضوع اور فلسفہ و اقتصاد کے ہر نکتے پر آپ کو اقبال کے افکار سے رہنمائی ضرور ملے گی۔ یہ ہنر اور یہ عظمت دنیا میں کسی شاعر کو نصیب نہیں۔ ہر کوئی اپنے محدود موضوعات اور مخصوص تصورات پر مبنی شاعری کرتا رہا ہے۔ کسی کو محبوبہ کے لب و رخسار اور زلف گرہ گیر سے باہر نکلنے کی فرصت نہیں ملی تو کوئی انقلاب کے گیت گانے یا سرمایہ و محنت کے ترانے لکھتے دنیا سے چلا گیا۔ شیکسپئر جسے دنیا بھر میں سب سے زیادہ متنوع اور وسیع الخیال شخص سمجھا جاتا ہے۔

اس کے ہاں بھی روم و یونان کی عظمت رفتہ میں چمکتے کرداروں کے سوا کچھ اور نظرنہیں آتا۔ پورا مشرق جو اس دور میں اس کرۂ ارضی پر جگمگا رہا تھا، شیکسپئر کی آنکھوں سے اوجھل رہا۔ یہی کیفیت ان تمام شاعروں اور مفکروں کی ہے جنھیں آج دنیا جدید تہذیب کے درخشندہ ستارے سمجھتے ہوئے علم کے ماخذ اور منبع گردانتی ہے۔ کسی کے ہاں مشرق ہے تو مغرب نہیں تو کوئی سائنسی اخلاقیات کا قائل ہے اور آسمانی ہدایات سے بے بہرہ۔ کوئی صرف فلسفے کی گتھیاں سلجھاتا ہے اور زندگی کی تلخ حقیقتوں سے ناآشنا ہے۔ یہ صرف اقبال ہے جو بندۂ مزدور کے تلخ ایام کی داستان بھی بیان کرتا ہے اور معراج انسانی کے عظیم واقعے سے درس بھی سکھاتا ہے۔ اس کی بنیادی وجہ صرف اور صرف ایک ہے کہ اقبال کا سارا کا سارا علم قرآن پاک سے مستعار ہے۔ اللہ کا نور ہدایت ہے۔ اس لیے کہ اقبال نے خود یہ دعویٰ کیا ہے۔

گردلم آئینۂ بے جوہر است
گر بجز فم غیر قراں مضمراست
پردۂ ناموسِ فکرم چاک کن
ایں خیاباں زار خارم پاک کن

(اگر میرے دل کے آئینے میں کوئی خوبی نہیں ہے۔ اگر اس دل میں قرآن کے علاوہ کوئی ایک لفظ بھی موجود ہے تو اے اللہ میری عزت کا جو پردہ بنا ہے اسے چاک کردے، ان پھولوں جیسی دنیا سے مجھ جیسے کانٹے کو نکال دے)۔ اس لیے کہ خود قرآن پاک کا یہ دعویٰ کہ ’’اور ہم نے تم پر ایسی کتاب نازل کی ہے جس میں ہر چیز کا بیان مفصل ہے‘‘ (النحل 89)۔ قرآن کے اس علم نے اقبال کو رہنمائی عطا فرمائی اور اس نے تہذیب مغرب اور فرنگی مدنیت کا جس طرح پردہ چاک کیا ہے آدمی کو حیرت میں ڈال دیتا ہے۔

میرے جیسا شخص جسے یورپ میں صرف چند دن میسر آئے ہیں یقینا اس کی آنکھیں اپنے اردگرد کے ماحول کی رنگینیوں اور عیش و آرام کو دیکھ کر خیرہ ہوجاتی ہیں اور آدمی یورپ کی زندگی کو انسانی تہذیب کی معراج سمجھ لیتا ہے۔ لیکن اقبال تو برسوں یہاں رہے اور پھر اس کے سب سے بڑے ناقد بنے۔ سچ بات یہ ہے کہ مغرب کے اس تفصیلی سفر میں اگر اقبال کا کلام میرا ہمسفر اور ہمراہ نہ ہوتا تو میں اس رنگینی کے پیچھے چھپی ہوئی تاریکی بلکہ اتھاہ تاریکی کو نہ سمجھ پاتا۔

یورپ میں بہت روشنیٔ علم و ہنر ہے
حق یہ ہے کہ بے چشمۂ حیواں ہے یہ ظلمات

مادہ پرستی پر استوار اس تہذیب میں علم و ہنر کی روشنی تو نظر آتی ہے لیکن انسانی اخلاقیات اور اجتماعی محبتوں کے اصول سے عاری ہے۔ اس وقت یورپ میں سب سے زیادہ تعداد بوڑھے لوگوں کی ہوتی جا رہی ہے۔ آپ ان بوڑھوں کو عالم تنہائی میں موت کی جانب جاتے ہوئے دیکھتے ہیں۔ کسی موت کی خبر اس کا پڑوسی میونسپل سروس والوں کو دیتا ہے اور کوئی اولڈ ایج ہوم میں چند نرسوں کے ہاتھوں ریاست کے زیر انتظام جنازے کی رسوم کے بعد قبر میں اتر جاتا ہے۔

شام ڈھلے شراب خانوں پر افسردہ و پژمردہ نوجوانوں کا ہجوم ہوتا ہے جو اس غم کے بوجھ تلے دبے جا رہے ہوتے ہیں کہ کسی کو اس کا بوائے فرینڈ چھوڑ گیا تو کسی کو اس کی گرل فرینڈ۔ انھی میزوں پر نئے ساتھی کی تلاش ہوتی ہے جسے ہو سکتا ہے اگلے چند ماہ ہی ساتھ چلنا ہو۔ آیندہ آنے والی نسلوں سے یہ لوگ اس قدر مایوس ہیں کہ کوئی بچے پیدا کرنا نہیں چاہتا کہ اگر زندگی کے آخری ایام اکیلے یا اولڈ ایج ہوم میں گزارنا ہے تو پھر اولاد کا کیا فائدہ۔ لیکن میرے جیسے سیاح ان کے سرخ و سفید تمتماتے چہروں کو دیکھ کر سمجھتے ہیں کہ یہ کس قدر مطمئن لوگ ہیں۔ اقبال نے کہا تھا

چہروں پہ جو سرخی نظر آتی ہے سر شام
یہ غازہ ہے یا ساغر و مینا کی کرامات

جس طرز معاشرت میں آج یورپ زندہ ہے اسے اقبال نے جس طرح بیان کیا ہے، وہ کمال ہے۔

بے کاری و عریانی و مے خواری و افلاس
کیا کم ہیں فرنگی مدنیت کی فتوحات

عریانی و مے خواری تو سب کو نظر آتی ہے لیکن بے کاری و افلاس کے بارے میں لوگ کہیں گے کہ وہ کیسے۔ یورپ میں ایک ایسے سرمایہ دارانہ نظام کی بنیاد رکھی ہے جس میں دولت کی بنیاد پر استحصال کیا جائے۔ تمام بڑی بڑی فیکٹریاں چین، مشرق بعید، لاطینی امریکا اور افریقہ منتقل کر دی گئیں ہیں۔ وہ قومیں اپنا خون پسینہ ایک کر کے بہت ہی کم اجرت پر کام کرتی ہیں اور یورپ کا سرمایہ دار مال دار ہوتا چلا جاتا ہے۔

اس سے وہ جو ٹیکس دیتا ہے وہ سب سے پہلے شہری سہولیات پر خرچ ہوتا ہے اور پھر ان افلاس زدہ لوگوں پر جو اس معاشرے میں سوشل سیکیورٹی کے نام پر وظیفہ کھاتے ہیں۔ دنیا کے سب سے زیادہ منشیات کے عادی انھی معاشروں میں ہیں۔ جو کبھی وظیفے پر جیتے ہیں اور کبھی علاج کے نام پر آبادکاری مراکز میں۔ تیس فیصد کے قریب بوڑھے یا پنشن لیتے ہیں اور اکیلے رہتے ہیں یا پھر اولڈ ایج ہوم میں۔ اسپین سے اٹلی، فرانس سے بلجیئم اور ناروے سے جرمنی تک کے اس سفر میں اقبال بہت یاد آ رہے ہیں۔ پورے کا پورا معاشرہ مادیت کے شکنجے میں جکڑا ہوا اور جس کی بنیاد ایک خون چوسنے والے سودی نظام پر رکھی گئی ہے۔

رعنائی تعمیر میں رونق میں صنعا میں
گرجوں سے کہیں بڑھ کے ہیں بینکوں کی عمارات
ظاہر میں تجارت ہے حقیقت میں جواء ہے
سود ایک کا لاکھوں کے لیے مرگ مفاجات

اس پورے یورپ کا سب سے امیر شہر جنیوا ہے جو دنیا بھر کے چور اور بددیانت حکمرانوں کے پیسوں کو بینک میں رکھ کر سود سے اپنی فی کس آمدنی بڑھاتا ہے۔ یورپ خود کو اس صدی میں ایک مضطرب یورپ کہتا ہے۔ اس کے مفکرین کہتے ہیں یہ ہماری اضطراب ”Anxiety” کی صدی ہے۔ اقبال نے ایک سو سال پہلے کہا تھا ان کے ہاں ترقی کی معراج انسان نہیں سائنسی ایجادات ہیں اور ایجادات جسمانی سکون دیتی ہیں ذہنی اطمینان نہیں۔

وہ قوم کہ فیضان سماوی سے ہو محروم
حد اس کے کمالات کی ہے برق و بخارات

یورپ کی گلیوں میں گھومتے ہوئے آج پانچواں دن ہے۔ انقلاب فرانس کے مرکز پیرس میں اترا تو ٹھیک پانچ سال بعد یہاں آنے کے بعد ایک احساس ایک دم دل و نگاہ سے چھوگیا۔ سب کچھ وہی ہے، ایفل ٹاور، شانزے لیزے، گمنام سپاہی کی  قبر والا وہ دروازہ جو کئی سڑکوں کے بیچوں بیچ ہے، پہاڑی پر قدیم گرجا بھی ویسا ہی ہے اور نوٹرے ڈیم کے چرچ کے مجسمے بھی ویسے ہی قائم ہیں لیکن جو پیرس پانچ سال پہلے نظر آتا تھا اب وہ کہیں کھوگیا ہے۔ خود پیرس کے لوگ حیرت میں گم ہیں۔ جنگ عظیم دوم کی تباہ کاریوں سے جب یورپ نکلا تو یوں لگتا تھا کہ ساری کی ساری آبادی ایک کھنڈر پر کھڑی ہے۔

لوگوں نے مل کر اس اجڑے گھر کو تعمیر کیا۔ ہر ملک برباد تھا اور ہر شہر ویران، یوں تو امریکی اسے اپنا احسان عظیم کہتے ہیں کہ انھوں نے یورپ کی تعمیر نو کے لیے سرمایہ فراہم کیا لیکن اصل بات یہ ہے کہ یہاں کے رہنے والوں نے اسے خود تعمیر کیا۔ اس تعمیر نو میں عمارات تو کھنڈر سے بدل کر اصلی مقام پر آگئیں لیکن سرمائے کی دوڑ نے معاشرے کو ایک دوسرے کھنڈر میں بدل دیا۔ وہ کھنڈر جس میں اقدار، اخلاق، روایات، مذہب اور سب سے بڑھ کر خاندان کی اینٹیں گری پڑی ہیں اور کوئی ان اینٹوں کو اکٹھا کرکے دوبارہ تعمیر میں مصروف نہیں ہے بلکہ صرف اور صرف ماتم کرتا چلا جارہا ہے۔ گزشتہ سو سال سے صرف ایک ہی ماتم ہے، ہمارا خاندان کہاں چلاگیا۔

یہ سب تو پیرس شہر میں گزشتہ سو سال سے چلا آرہا ہے، تو پھر وہ کونسا پیرس ہے جو پانچ سال پہلے تھا اور آج نہیں ہے۔ پانچ سال پہلے کا پیرس نسبتاً مرنجا مرنج یعنی ”Cave Free” پیرس تھا اور آج کا پیرس خوفزدہ ہے، ڈرا ہوا۔ اس شہر کی گلیوں میں جنگ عظیم دوم کے بعد پہلی دفعہ فوج کے دستے گشت کرتے ہوئے نظر آئے۔ شروع شروع میں جب کارٹون بنانے والے اخبار چارلی ہبیڈو پر حملہ ہوا، لوگ مارے گئے تو پیرس میں غم و غصہ تھا۔ پوری قوم یک جہتی کے اظہار کے لیے سڑکوں پر نکل آئی۔ ایسے میں کسی نے اس غصے میں دبی ہوئی حملہ آور کی آواز کو یاد تک نہ کیا کہ ’’میں الجزائر سے ہوں اور یہ میرا بدلہ ہے‘‘ اسلام اور مسلمان دونوں ہدف تھے۔ میڈیا نے اس یک جہتی کو کھول کھول کر بیان کیا اور بار بار دکھایا۔

لوگ چین کی نیند سوگئے۔ لیکن اس کے بعد انھیں پھر کسی زور دار دھماکے میں مرنے والوں کی چیخوں نے جگایا تو کہیں ٹرک ڈرائیور کے انسانوں کے خوفناک طریقے سے کچلنے نے بیدار کیا۔ لیکن اب یہ جاگنا یک جہتی کا جاگنا نہیں ہے۔ یہ ایسے ہے جیسے خوف میں نیند اڑجاتی ہے۔ ٹیلی ویژن پروگراموں میں صرف ایک بحث ہے کہ ایسا ہمارے ساتھ کیوں ہورہا ہے۔ ہم تو پر امن تھے، اپنی دھن میں مگن تھے۔ ہمارے بازاروں میں رونق تھی، لاکھوں سیاح روز ہمارے شہروں کو آباد کرتے تھے۔ دونوں طرف بولنے والے موجود ہوتے ہیں۔ ایک وہ جو اسلام، القاعدہ، داعش اور دہشت گردی کی رٹ لگاتے ہیں۔ لیکن دوسرے وہ ہیں جو اس خطرے سے پورے مغرب کو ڈرا رہے ہیں۔

وہ کہتے ہیں تم نے اسلحہ بیچنے کی ہوس میں جتنے لاکھ لوگوں کو مسلم دنیا میں قتل کیا ہے۔ اگر ان کے دس فیصد لوگوں کی اولادیں اپنا بدلہ لینے تمہاری سمت چل پڑیں تو تم کئی صدیاں امن کوترس جاؤ گے۔ فرانس کا ’’مشعل اکشود‘‘ نامی مصنف جو ٹیلی ویژن چینلوں پر مقبول ہورہا ہے۔ وہ یہی کہتا ہے، تم نے الجزائر میں ایک اسلامی حکومت کے قیام کو روکنے کے لیے لاکھوں انسانوں کا خون بہایا، اب یہ خون تمہارے گھروں میں انتقام کے پتھر لے کر آگیا ہے۔ حیرت میں گم پیرس کے سامنے ایک اور سوال ہے۔ ہم تو سیکولرازم اور لبرل ازم کے بانی تھے۔ ہماری نسلوں نے انقلاب فرانس کے بعد مذہب کو اجتماعی زندگی سے نکال دیا تھا۔ لیکن یہ کیا ہوگیا۔ شام میں جاکر لڑنے والوں میں سب سے زیادہ لوگ فرانس سے جارہے ہیں اور وہاں لڑائی میں مرنے والوں میں دس ایسے فرانسیسی ہیں جو نسل در نسل فرانسیسی ہیں۔ جن کی رگوں میں صدیوں سے فرانسیسی خون دوڑ رہا ہے۔

خوف اور تذبذب کی یہی فضا اگلے دن مجھے برسلز میں نظر آئی۔ جمعہ کی نماز پڑھنے کے لیے ایک مسجد کی تلاش مجھے مولن بیک ”MOLEN BEEK” کے علاقے میں لے آئی۔ یہ بیلجیئم کی اس آبادی کا مرکز ہے جو نسلی طور پر مراکش سے تعلق رکھتی ہے۔ چاروں جانب حجاب اور عبایا میں ملبوس خواتین مسجدوں کی طرف جارہی تھیں اور مرد عربی لباس پہنے نظر آرہے تھے۔ ایک اور حیرت، وہاں آکر آپ کو بیلجیئم میں بولی جانے والی فرانسیسی زبان نہیں آتی تو انگریزی نہیں چلے گی۔ البتہ آپ عربی میں ٹوٹی پھوٹی بات چیت بھی کریں تو آپ کو خوش آمدید کہا جائے گا۔ دونوں ملک اپنے ٹیلی ویژن چینلوں پر ایک دفعہ پھر سے اس سین کو دہرا رہے ہیں کہ 1905ء میں جو سیکولرازم اور لبرل ازم کا دور شروع ہوا تھا، اس میں زوال آگیا ہے۔ ہمیں اپنی اس روح کو اپنے آپ جدا نہیں کرنا۔

اگلے تین دن اٹلی کے شہر میلان اور اسپین کے شہر بارسلونا میں گزرے، ان چاروں شہروں، پیرس، برسلز، میلان اور بار سلونا میں پاکستانی آبادی سے ملاقات اس لیے ہوئی کہ تقریبات میں جمع تھے۔ لیکن ان کا خوف دہرا ہے۔ ان کا المیہ اور دکھ بھی دہرا ہے۔ جس وطن کو چھوڑ کر وہ یہاں آئے ہیں انھیں وہاں تبدیلی کی کوئی امید نظر انھیں آتی۔ میں گزشتہ پندرہ سال سے مسلسل مغرب میں آباد پاکستانیوں سے مل رہا ہوں لیکن یہ پہلی دفعہ ہے کہ ان میں اپنے وطن واپس لوٹنے اور اسے دوبارہ تعمیر کرنے کی خواہش شدید ہے۔

ان کا المیہ دہرا ہے جس یورپ کو وہ خون پسینہ دے کر تعمیر کرہے ہیں وہ ان کو شک کی نظر سے دیکھتا ہے اور جس پاکستان میں وہ خون پسینے کی کمائی بھیجتے ہیں وہاں ان کی کمائی سے عیاشیاں کی جاتی ہیں۔ وہ پاکستان میں ایسا سب کچھ دیکھنا چاہتے ہیں جو انھیں یورپ میں نظر آتا ہے لیکن ایسا خواب وہ یہیں بیٹھ کر دیکھتے ہیں۔ جنگ عظیم دوم کے بعد جس طرح یورپ تباہ ہوا اور یورپ والوں نے اسے تعمیر کیا۔ یہاں کے پاکستانی ویسا کرنے کا حوصلہ نہیں رکھتے۔ البتہ انتظار کرتے ہیں، دعا کرتے ہیں، خواہش کرتے ہیں کہ پاکستان بدل جائے اور وہ واپس اپنے جہلم، گجرات، مردان وغیرہ چلے جائیں۔

جہاں وہ معاشی طور پر مطمئن بھی ہوں اور کوئی انھیں بار بار گفتگو میں اللہ کا لفظ استعمال کرتے سنے اور پیرس میں پولیس کو رپورٹ کرنے کی طرح گرفتار نہ کرادے۔ اسپین کے ساحلوں پر حجاب والی خاتون کے گرد جیسے پولیس والے جمع ہوگئے اور کہا یا تو سوئمنگ سوٹ پہنو یا یہاں سے بھاگو۔ ایسا کچھ اس نئے پاکستان میں نہ ہو۔ ایسا پاکستان ان کی کمائی سے نہیں صرف اور صرف ان کے خون پسینے سے بن سکتا ہے۔ لبنان میں چالیس لاکھ لوگ آباد ہیں جب کہ ایک کروڑ بیس لاکھ لبنانی ملک سے باہر ہیں۔ کما کر ہر سال بیس ارب ڈالر بھیجتے ہیں لیکن لبنان کی حالت نہیں بدلتی۔ قومیں سرمائے سے نہیں انسانوں سے بدلتی ہیں۔

پاکستان میں جب بھی عورت پر ظلم ہوتا ہے تو جرم کو ایک مجرم کی نفسیات سے دیکھنے کے بجائے ایک مخصوص طبقہ اسلام پر چڑھ دوڑتا ہے. انہیں تو جیسے بہانہ چاہیے ہوتا ہے اسلام کے خلاف اپنی بھڑاس نکالنے کا. یہ ثابت کرنے کی کوشش کی جاتی ہے کہ عورت پر ہونے والا ظلم دراصل اسلام کی تعلیمات کا نتیجہ ہے۔ حالانکہ یہ دراصل اسلام کی تعلیمات سے عدم واقفیت، جہالت اور فضول رسوم و رواج سے چمٹے رہنے کا نتیجہ ہوتا ہے ۔حقیقت یہ ہے کہ عورت کے خلاف جرائم کسی رنگ، نسل معاشرے یا نظریے تک محدود نہیں ہیں بلکہ ترقی یافتہ اور تہذیب یافتہ ممالک جو ساری دنیا کو انسانیت، تہذیب برابری کا درس دیتے ہیں، اور حقوق نسواں کے حوالے سے ہر دن ان کا ہاضمہ خراب ہوتا ہے، ان کے ہاں یہ شرح باقی دنیا کے مقابلے میں خوفناک حد تک زیادہ ہے۔

صورتحال کا جائزہ لینے کے لیے آئیے تہذیب یافتہ ممالک کے سرخیل امریکہ میں عورتوں کی حالت زار پر ایک نظر ڈالتے ہیں۔
نیویارک ٹائمز کی (1) رپورٹ کے مطابق ہر پانچ میں سے ایک امریکی لڑکی جنسی زیادتی کا شکار ہوتی ہے۔ ان میں سے بھی ایک تہائی خواتین کو زیادتی کے دوران تشدد کا نشانہ بھی بنایا جاتا ہے۔ رپورٹ کے مطابق ہر سال 13 لاکھ امریکی خواتین جنسی زیادتی کا شکار ہوتی ہیں۔ ان میں سے 12 فی صد لڑکیوں کو اس وقت زیادتی کا نشانہ بنایا گیا جب ان کی عمر 10 سال یا اس سے کم تھی۔ ایک دوسری رپورٹ (2) کے مطابق صرف 2006ء میں 3 لاکھ کالج جانے والی لڑکیوں کو زنا کا نشانہ بنایا گیا۔ مجموعی طور پر 22 لاکھ (3) خواتین کو ان کی زندگی کے دوران زیادتی کا نشانہ بنایا گیا اور ہر 16 میں سے 15 زیادتی کرنے والے مجرم آزادانہ گھوم رہے ہیں، انہیں کوئی سزا نہیں دی گئی۔

2001ء سے 2012ء تک افغانستان میں طالبان کے ہاتھوں مجموعی طور پر 6488 امریکی فوجی مارے گئے جبکہ اسی عرصے کے دوران 11766 امریکی خواتین کو ان کے موجودہ یاسابقہ پارٹنرز کے ہاتھوں قتل ہونا پڑا۔ تقریباً 5 کروڑ خواتین ہر سال اپنے شریک حیات کی جانب سے تشدد کا نشانہ بنائی جاتی ہیں (4)۔ ہر نو سیکنڈز بعد امریکہ میں عورت کو یا تو قتل کر دیا جاتا ہے یا اسے تشدد کا نشانہ بنایا جاتا ہے۔ ہر 3 میں سے ایک امریکی عورت کو اس کا شریک حیات تشدد کا نشانہ بناتا ہے۔ مغرب میں آج بھی کام کرنے والی خواتین کا معاوضہ مردوں سے کم ہے اور تو اور سب سے روشن خیال ادارے ہالی وڈ میں کام کرنے والی اداکارائوں کو اداکاروں کے مقابلے میں کم معاوضہ دیا جاتا ہے۔ 2013ء میں امریکی کانگریس میں خواتین کی نمائندگی محض تین اعشاریہ اٹھارہ فی صد تھی۔

اس تحریر کا مقصد ہرگز پاکستان میں ہونے والے جرائم اور مظالم کا دفاع نہیں ہے۔ بس یہ باور کروانا ہے کہ جرم کو کسی بھی نظریے سے الگ کر کے مجرم کی نفسیات سے سمجھنے کی ضرورت ہے۔ مجرم چاہے ملحد ہو یا عیسائی یا مسلمان اس کی صرف ایک جبلت ہوتی ہے جرم کرنا۔ مشرق میں پھر بھی عورت کو سماجی تحفظ حاصل ہے لیکن مغرب تو عورت کے ساتھ قصائی اور گائے والا سلوک کرتا ہے۔ جب تک گائے دوودھ دیتی ہے اسے چارہ کھلاتا ہے اور جس دن وہ دودھ دینا بند کردیتی ہے، اس کے گلے پر چھری پھیر کر اس کا گوشت بیچ کھاتا ہے۔ مغربی عورت کے جسم میں جب تک کشش ہوتی ہے وہ منڈیوں کی زینت بنتی ہے اور جب یہ کشش ختم ہوتی ہے، وہ کسی اولڈ ہائوس میں یا کسی ہسپتال میں ایڑیاں رگڑ رگر کر مر جاتی ہے۔

حوالہ جات

1. http://www.nytimes.com/2011/12/15/health/nearly-1-in-5-women-in-us-survey-report-sexual-assault.html?_r=0
2.https://www.nsopw.gov/en/Education/FactsStatistics?AspxAutoDetectCookieSupport=1
3. http://www.feminist.com/antiviolence/facts.html
4. http://www.huffingtonpost.com/2014/10/23/domestic-violence-statistics_n_5959776.html
5. http://www.ncadv.org/learn/statistics

یورپ نے بےگھر در بدر ٹھوکریں کھاتے مسلمان پناہ گزینیوں کو اس وقت پناہ دی جب ان پر اپنے ہی ملکوں کی سرزمین تنگ ہو چکی تھی. برادر اسلامی ممالک ترکی اور سعودی عرب وغیرہ نے ان کے لیے اپنی سرحدیں بند کر دی تھیں، تو یہ یورپی تھے جنہوں نے بلا تفریق مذہب محض انسانیت کی بنیاد پر ان مسلمان مہاجرین کے لیے اپنے دروازے کھولے، ان کو ہر ممکن سہولیات مہیا کیں. سول سوسائٹی کے بعض لوگوں کا کہنا تھا کہ یہ لاکھوں مہاجرین یورپی معاشرے میں ایک تباہ کن تبدیلی لائیں گے جو معاشرے کو ہلا کر رکھ دے گی، لیکن پھر بھی یورپ کے حکمرانوں نے مسلمان مہاجرین کو پناہ دی، جس کا صلہ اب یورپ کو دیا جا رہا ہے. کبھی کبھی ہونے والے بم دھماکے اب روز کا معمول بنتے جا رہے ہیں. ہر دھماکہ کئی قیمتی جانیں لے جاتا ہے. یورپ بھی اسی خوف اور دہشت کا شکار ہو رہا ہے جس میں مسلمان ممالک کئی عشروں سے مبتلا ہیں.

اسلامی ممالک میں ان دھماکوں کا رد عمل بہت عجیب مل رہا ہے کوئی اس کو مکافات عمل کہہ رہا ہے تو کسی کے خیال میں یورپی ممالک کو مسلمانوں کے ساتھ روا رکھی گئی زیادتیوں کا بدلہ دیا جا رہا ہےحالانکہ یہ مسلمان حکمرانوں کی پالیسیاں ہیں جن کی وجہ سے یہ مسلمان گھر سے بےگھر ہوئے. بشار الاسد یا داعش عیسائی یا یہودی نہیں لیکن انھی کی کارروائیوں نے لاکھوں مسلمانوں کو بےگھر کر دیا. اس کے باوجود کوئی ایک مسلمان بھی اہل یورپ کے اس سلوک کو اہمیت دینے کو تیار نہیں جس میں انہوں نے لاکھوں بے خانماں مسلمانوں کو پناہ دی. ان کو رہائش کی سہولیات دیں ، ان کے لیے خوراک اور بہترین طبی سہولیات فراہم کیں. لیکن اس احسان کے بدلے میں مسلمانوں نے انہیں کیا دیا؟ یہی جرمنی تھا جہاں نئے سال کی آمد کے جشن پر مسلمان نوجوانوں کی ٹولیوں کی ٹولیوں نے جرمن خواتین کے ساتھ انتہائی بہیمانہ سلوک کیا. یہ ایک نہیں ایسے بے شمار واقعات ہوئے جن میں پناہ گزین نوجوانوں نے یورپ کے شہریوں سے نفرت آمیز سلوک کیا. ہونا تو اس کے برعکس چاہیے تھا لیکن یورپی حکومتوں نے پھر بھی پناہ گزینوں سے کافی نرمی کا سلوک کیا.

1492ء میں سپین کی آخری مسلمان ریاست غرناطہ پر عیسائیوں کا قبضہ ہوا اور سپین پر مسلمانوں کے 800 سالہ عظیم الشان دور حکومت کا خاتمہ ہوگیا. اس کے ساتھ ہی سپین سے مسلمانوں کو نکالنے کا عمل شروع ہوا. چند ہی سالوں میں لاکھوں مسلمان یا تو قتل کر دیے گئے، یا پھر ان کو افریقہ اور دیگر مسلمان ممالک میں پناہ لینا پڑی. کیا آج یورپ میں رہنے والے مسلمان ایک بار پھر سے یہی چاہتے ہیں کہ یورپی یونین مسلمانوں کے بارے میں ویسا فیصلہ کرے کہ ان پناہ گزینوں کو یورپی ممالک سے نکال باہر کیا جائے. پناہ گزینوں کے بعد اگلی باری یورپ میں رہنے والے مسلمانوں کی بھی آ سکتی ہے.

بہتر تو یہ ہوتا کہ یورپ میں رہنے والے مسلمان اپنی صفوں میں موجود دہشت گردوں کی نشاندہی کرتے اور انھیں پولیس کے حوالے کر کے یہ ثابت کرتے کہ عام مسلمان کا دہشت گردی سے دور دور تک کوئی واسطہ نہیں ہے لیکن ایسا نہیں ہو پایا. اب یورپ یہ سمجھنے میں آزاد ہے کہ وہ تمام مسلمانوں کو دہشت گرد سمجھے. اس صورت حال کو یورپی حکومتوں اور یورپی شہریوں کی نظر سے دیکھنے کی کوشش کیجیے. وہ یہ کیوں چاہیں گے کہ مسلمان پناہ گزین ان کے معاشرے کا امن تباہ کرتے رہیں. وہ کیوں ان کو اپنے ملک میں برداشت کریں گے اگر وہاں روزانہ کی بنیاد پر دہشت گردانہ کارروائیاں ہونے لگیں؟ یہ درست ہے کہ مسلمان بھی اس وقت ایسی ہی دہشت گردی کا شکار ہیں لیکن اس میں حکومتوں کے ملوث ہونے سے انکار نہیں کیا جا سکتا لیکن عوام کو جوابی دہشت گردی کا نشانہ بنانا بجائے خود ایک دہشت گردی ہے، جس کا نقصان بہرحال مسلمانوں کو ہوگا. یورپی عوام میں مسلمانوں کے بارے میں جو چند ایک مثبت رائے رہ گئی ہے اب وہ بھی نہیں رہے گی.

اس معاملے میں اسلامی ممالک میں موجود مذہبی جماعتوں نے کسی قسم کا کوئی رد عمل دینے سے گریز کیا ہے. ہونا تو یہ چاہیے تھا کہ دہشت گردی کے ایسے ہر واقعے کی مذمت کی جاتی اور ان دہشت گردوں سے اظہار لاتعلقی کیا جاتا، چاہے ایسا واقعہ یورپ میں ہو ، مشرق وسطیٰ میں ہو یا پاکستان یا کسی بھی دیگر ملک میں، لیکن افسوس کہ جن اسلامی جماعتوں کے ذمے ایک صحیح اسلامی معاشرے کے اصول طے کرنا تھے، وہ بھی تفرقہ بازی کے زیر اثر کسی نہ کسی سطح پر دہشت گردی کی حمایت کرتی دکھائی دیتی ہیں. یہ دین اسلام کا پیغام ہرگز نہیں. دہشت گرد آج جو کچھ بو رہے کل اس کی فصل ہر مسلمان کو کاٹنا پڑے گی.

(نوٹ: صاحب مضمون کو ترکی کے حوالے سے سہو ہوا ہے. ترکی کی سرحدیں شروع دن سے پناہ گزینوں کےلیے کھلی ہیں اور اس وقت صرف ترکی میں چار ملین شامی پناہ گزین آباد ہیں اور طیب اردگان نے انھیں شہریت دینے کے منصوبے کا اعلان کیا ہے.)