Tag: چائنا

صنعتی انقلاب کے بعد سے آج تک عالمی آبادی میں جتنی تیزی سے اضافہ ہوا ہے، اس کی مثال تاریخ میں کہیں نہیں ملتی. لیکن ہم زیادہ پرانی تاریخ کی چھان پھٹک نہیں کریں گے. سنہ 1960ء میں آبادی کا مجموعہ تین ارب تھا، جس میں چودہ سال بعد ایک ارب نئے افراد کا اضافہ ہوا، پھر اگلے تیرہ برس بعد یعنی سنہ 1987ء میں یہ عدد پانچ ارب پر پہنچ گیا. اگلے بارہ برس بعد مزید ایک ارب افراد اس مجموعے کا حصہ بن گئے اور 11 اکتوبر 2011ء کو اعلان کیا گیا کہ آج اس دنیا میں زندہ 7 ارب افراد موجود ہیں. آج اس اعلان کے پانچ برس بعد اس دنیا میں 7 ارب 40 کروڑ افراد کی موجودگی کی نوید مختلف فورمز کے ذریعے سنائی دیتی ہے. ایک پیچیدہ اور محتاط تخمینہ لگایا گیا ہے کہ 2024ء میں یہی عدد 8 ارب کے حدف کو بآسانی عبور کر لے گا. اور 2050ء میں مجموعی آبادی شاید 11 ارب ہو جائے.

آبادی میں اضافہ کے اس خطرناک رجحان پر امریکی ماہر فلکیات اور سائنسدان نیل ٹائسن کا ماننا ہے کہ اگلے پانچ سو سال بعد اگر حالات میں بہتری نہیں آتی تو اس دنیا میں اتنے افراد موجود ہوں گے کہ اگر ان سب کو ایک دوسرے کے ساتھ کھڑا بھی کر دیا جائے تو یہ خشکی کا علاقہ کم پڑ جائے گا. اتنی آبادی کو مینج کرنے کے اول یا تو کوئی اور سیارہ انسان کو رہائش کے لیے آباد کرنا پڑے گا. دوم اس زمین پر ورٹیکل بلڈنگ اور بیسمنٹ ہاؤسز پر اکتفا کرنا پڑے گا. سوئم بہتر ہے کہ حالات کو اس نہج پر پہنچنے سے پہلے ہی کنٹرول کیا جائے جو مقابلتاً کم پیچیدہ اور کم خرچ بھی ہے.

اب آبادی کے فیگرز کو تھوڑا ٹریکل ڈاؤن کر کے کونٹینٹل لیول پر دیکھیں تو پتا چلتا ہے کہ ایشیاء میں پوری دنیا کی آبادی کا 60 فیصد بلک موجود ہے. کینوس کو مزید نیرو کر کے دیکھیں تو دو ملک آبادی کے مجموعے پر ریڈ سگنل کی طرح نظر آتے ہیں. اول چین اور دوم بھارت. چین کی موجودہ آبادی لگ بھگ ارب اڑتیس کروڑ ہے اور بھارت کی آبادی ایک ارب تیس کروڑ ہے. ان دونوں ملکوں میں پوری دنیا کی کل آبادی کا 37 فیصد حصہ آباد ہے. ابھی بھارت دوسرے نمبر پر نظر آ رہا ہے لیکن تعلیم اور آبادی میں اضافہ کی آگاہی کی کمی جیسے مسائل کی وجہ سے اس کی آبادی 2030ء میں ڈیڑھ ارب ہو جائے گی. یوں بھارت زیادہ آبادی والے ممالک کی فہرست میں اول نمبر پر آ جائے گا. دنیا کے متعدد ممالک میں اس مسئلے کو سنجیدگی سے لیا جاتا ہے. خصوصاً وہ ممالک جہاں تعلیم اور ترقی کا معیار بہتر ہے. اس میں چین جو بہت زیادہ اہمیت حاصل ہے. جس نے سنہ 1978ء میں اگلی دہائیوں میں پانی اور دیگر وسائل کی شدید کمی جیسے مسائل کی نشاندہی کی اور اس سے نمٹنے کے لیے ایک سو سال کا لائحہ عمل تیار کیا. تاکہ سنہ 2080ء تک آبادی کے عدد کم 700 ملین افراد تک محدود کیا جائے. اس پلاننگ میں ایک پالیسی ”ون چائلڈ پالیسی“ کے نام سے موسوم ہے. جو سنہ جنوری 1980 سے اگلی تقریباً ساڑھے تین دہائیوں تک لاگو رہی. چونکہ اس پالیسی کو ایک انسٹرومنٹ کے طور پر ایک جنریشن کے لیے ہی بنایا گیا تھا اس لیے اس پالیسی کو سرکاری طور پر سنہ 2015ء کے آخر میں سرکاری طور پر ختم کر دیا گیا. اور جنوری 2016ء سے نئی ”ٹو چائلڈ پالیسی“ کا اطلاق کر دیا گیا ہے.

بنیادی طور پر ون چایلئیڈ پالیسی چین کے آبادی کنٹرول کرنے کے صد سالہ پروگرام کے منصوبے کا ایک انسٹرومنٹ تھا جسے ایک جنریشن کے لیے ہی طے کیا گیا تھا. اس پالیسی کے تحت تمام ریاستوں خصوصاً گنجان آباد علاقوں میں شادی شدہ جوڑوں کو ایک بچہ پیدا کرنے کی اجازت دی گئی تھی. اس منصوبے کو عملی جامہ پہنانے کے لیے نیشنل پیپلز کانگریس کی ایک قائمہ کمیٹی نے ایک کمیشن بنایا جس کے ذمے لوگوں کو اس گھمبیر مسئلے پر بنیادی آگاہی فراہم کرنا، پیدا ہونے والے بچوں کی رجسٹریشن کرنا اور انسپیکشن کرنا شامل تھا. ماؤ زی دونگ کی رہنمائی میں اس منصوبے کے تحت فرٹیلیٹی ریٹ (ایک عورت کے ہاں اوسطاً زندہ بچوں کی پیدائش) کو جو سنہ 1979ء میں 2.8 تک کم کر کے 1.4
پر لایا گیا. اس منصوبے کے تحت حکومتی دعوی ہے کہ 400 ملین بچوں کی ممکنہ پیدائش کو دانستہ طور پر روکا گیا ہے. (گو کہ محقق اس دعوے سے اختلاف کرتے ہیں. کیونکہ اسی وقت میں چین کے پڑوسی ملک تھائی لینڈ اور بھارتی ریاست کیرالہ میں اسی بنا کسی ون چایلئیڈ پالیسی کے فرٹیلیٹی ریٹ اس حد تک کم ہوا ہے جس کا ذکر دھوم سے کیا جاتا ہے. اگر کوئی جوڑا اس پالیسی کے برخلاف زیادہ بچوں کی پیدائش کا مرتکب ہوتا تھا تو دونوں مرد اور عورت کو حکومتی سطح پر جرمانہ عائد کیا جاتا تھا. جو مرتکب جوڑے کی جگہ، آمدنی اور حالات کے مطابق طے کیا جاتا تھا. مزید یہ کہ ایک ملک گیر سروے سنہ 2008 میں کیا گیا جس کے نتائج میں بتایا گیا 70 فیصد لوگ اس پالیسی کو سپورٹ کرتے ہیں. لیکن اس پالیسی کو بیرونی دنیا میں تنقید کا سامنا کرنا پڑتا تھا.

اس پالیسی میں کئی ایسے راستے تھے جن کے ذریعے شادی شدہ جوڑے قانونی طور پر دوسرے بچے کی پیدائش کے لیے اہل قرار پاتے تھے.
اول. اگر کسی کے ہاں پہلے بیٹی کی پیدائش ہو تو نرینہ اولاد کی خاطر ریاستی سطح پر دوسرے بچے کی پیدائش کا حق دیا جاتا تھا.
دوم. اگر پہلا بچہ معذور یا ذہنی طور پر مکمل تندرست نہیں ہے تو تین سے چار سال کے وقفے کے بعد دوسرے بچے کی پیدائش کا حق دیا جاتا تھا.
سوم. تبتی لوگوں اور اقلیتوں کو بھی عمومی چھوٹ دی جاتی تھی. دور دراز دیہاتی علاقوں میں بھی اس معاملے پر نرمی برتی جاتی تھی.
چہارم. اس کے علاوہ اگر کسی جوڑے کے ہاں پہلا بچہ چین کی مین لینڈ کے باہر ہوتی تھی تو اس چینی جوڑے کو بھی چھوٹ دی جاتی تھی.

سیچوان صوبے میں 2008 کے تباہ کن زلزلے کے باعث وہ لوگ جن کے بچے اس آفت میں ان سے جدا ہو گئے انہیں بھی اس چھوٹ کا اہل قرار دیا گیا. لیکن اس وسیع البنیاد منصوبے میں کئی جگہوں پر لوپ ہولز مجود تھے جن کی وجہ سے لوگ حکومت کو چکما دے جاتے تھے. مثلاً ہانگ کانگ کیونکہ مین لینڈ چائنہ کا حصہ نہیں اس لئے پالیسی کا عملی طور نفاذ وہاں اس طرح نہیں ہوتا تھا اس لیے لوگ بچوں کی پیدائش کے وقت ہانگ کانگ کا رخ کرتے تھے. لوگوں میں ملک سے باہر برتھ ٹؤرزم کا رجحان بڑھنے لگا. اور کچھ لوگ اپنے ہاں بیٹی کی پیدائش کا ذکر ہی نہیں کرتے تھے یا پھر اس بیٹی کو کسی دوسرے شخص کو لے پالک کے طور پر دے دیتے تھے. یا اس بیٹی کی پیدائش کے بعد رجسٹریشن میں جان بوجھ کر تاخیر کرتے تھے.

جہاں حکومتی مشینری اس پالیسی کی کامیابی اور بہتر نتائج کا دعوٰی کرتی ہے وہیں کچھ مسائل نے بھی اس معاشرے کو شدید مشکلات کا شکار کیا ہے. اول یہ کہ نرینہ اولاد کی چاہت اور پالیسی رسٹریکشن کے باعث مردوں کی تعداد عورتوں کے مقابلے میں 30 ملین زیادہ ہو گئی. اس صنفی عدم توازن کی وجہ سے بہت سے مرد شادی کے لیے جنس مخالف کی تلاش میں نیم بوڑھے ہو جاتے تھے. چونکہ عورتیں اس معاشرے میں کم ہیں اس لیے شادی کے معاملے میں ان قدر بہت زیادہ ہوتی ہے. تقریباً ہر لڑکی شادی سے قبل اپنے ہونے والے شوہر سے ذاتی کاروبار یا اچھی نوکری کے علاوہ ذاتی گھر اور گاڑی کی بھی آس لگاتی ہے. یوں ایک اوسط چینی مرد شادی کے یہ لوازمات پورے کرنے کے بعد شادی کے وقت کم از کم تیس سال کی عمر تک پہنچ جاتا ہے. اور شادی پر اوسطاً 35 لاکھ پاکستانی روپے کے برابر رقم خرچ کرتا ہے.

ایک چینی باشندے کی اوسط عمر میں جو کہ سنہ 1976ء میں 66 سال تھی آج وہی اوسط عمر 76 برس تک پہنچ گئی ہے. اس اوسط عمر میں اضافے کو جہاں صحت کے شعبے کی ترقی کہا جاتا وہیں یہ حقیقت بھی آشکار ہوتی ہے کہ اس وقت ہر پانچ میں سے ایک فرد ریٹائرڈ کی حیثیت سے اس معاشرے میں موجود ہے. سنہ 2050 تک کم از کم اس آبادی کا ایک تہائی حصہ 60 سال یا اس سے زائد عمر کے افراد پر مشتمل ہو گا. جو عموماً پروڈکٹیو نہیں ہوتے. اور ملکی معیشت پر ایک بھاری بوجھ ثابت ہوں گے. سنہ 2030 تک چین اس پالیسی کی وجہ سے اپنے 67 ملین مزدوروں سے محروم ہو جائے گا. آزاد تحقیقی رپورٹس کے مطابق کم از کم 100 ملین بچیاں مسنگ ہیں. جنہیں کسی حد تک حکومت بھی درد سر کے طور پر دیکھ رہی ہے.

اس پالیسی کے تحت 36 فی صد لوگوں کو ایک بچے کی پیدائش تک محدود رکھا گیا. اور قریب 53 فیصد لوگوں کو انکی درخواست پر دوسرے بچے کی پیدائش کی اجازت دی گئی. پالیسی میں تمام تر خوبیوں، خامیوں اور وقت کو مدنظر رکھتے ہوئے یکم جنوری سنہ 2016ء سے ”ٹو چائلڈ پالیسی“ عملی نفاذ کیا گیا ہے تاکہ معاشی اور معاشرتی لیول پر مطلوبہ توازن کو برقرار کیا جائے. جس کے تحت 31 میں سے 29 صوبوں میں اس نئی پالیسی کا عملی نفاذ کر دیا گیا ہے.

اس وقت ہمارے ملک کی آبادی تقریباً 20 کروڑ نفوس پر مشتمل ہے. جس میں بچوں کی سالانہ پیدائش کا حجم 35 لاکھ ہے. ایک تخمینہ لگایا گیا ہے کہ سنہ 2030ء میں اس ملک کی آبادی لگ بھگ 25 کروڑ تک پہنچ جائے گی، اسی سال شہری اور دیہی آبادی کا تناسب برابر ہو جائے گا جو فی الحال 36 فیصد شہری اور 54 فیصد دیہاتی آبادی پر مشتمل ہے. دنیا میں آبادی کے بے ربط اور بےلگام اضافہ کو روکنے کے لیے مختلف لیولز پر کام ہو رہا ہے. لیکن ایک میڈیم کامن ہے. اور وہ ہے تعلیم. میں یہ جاننا ہوں کہ اس ملک عظیم جس کی شرح خواندگی 60 فیصد ہونے کا دعوٰی کیا جاتا ہے اس میں سرکاری اعداد و شمار کے مطابق 10 فیصد سے کم یونیورسٹی گریجویٹ ہیں. شاید کم از کم گریجویٹ لیول پر ہی آپ ایسی سیر حاصل گفتگو کر سکتے ہیں جو آبادی کے کنٹرول کے متعلق ہو. لیکن ان کے مجموعی تناسب کو ضرور ذہن نشین رکھیں.

واشنگٹن: نیوکلیئر سپلائرز گروپ (این ایس جی) کی رکنیت کے حصول میں امریکا کی جانب سے ہندوستان کی حمایت پر پاکستان کے تحفظات کی گونج بالآخر امریکی کانگریس میں بھی سنائی دی، جہاں سینیٹ کی خارجہ تعلقات کی کمیٹی نے گواہوں کی مدد سے مشاہدہ کیا کہ اس پالیسی سے جنوبی ایشیاء میں نیوکلیئر ہتھیاروں کی دوڑ میں شدت آجائے گی۔ گواہان اور چند قانون سازوں کے مطابق 1990 میں پاکستان پر لگائی گئی پابندیوں سے جوہری ہتھیاروں کے حوالے سے پاکستان کی خودمختاری میں اضافہ ہوا اور اگر یہ پابندیاں دوبارہ لگائی گئیں تو یہی سب کچھ دوبارہ ہوگا۔

کارنیگی انڈوومنٹ فار انٹرنیشنل پیس کے شریک ڈائریکٹر ٹوبی ڈالٹن نے کمیٹی کو بتایا کہ ‘موجودہ امریکی انتظامیہ کی جانب سے این ایس جی رکنیت کے لیے ہندوستان کی غیر مشروط اور غیر معمولی حمایت مسئلے کا باعث ہوگی’۔ واضح رہے کہ پاکستان اور ہندوستان دونوں نے این ایس جی رکنیت کے لیے درخواست دے رکھی ہے، تاہم اسے مسترد کردیا گیا، کیونکہ این ایس جی رکنیت کے لیے جوہری عدم پھیلاؤ کے معاہدے (این پی ٹی) پر دستخط لازمی شرط ہے۔ اگرچہ امریکا سمیت کچھ عالمی طاقتیں ہندوستان کی این ایس جی رکنیت کے حق میں ہیں تاہم چین نے اس کی مخالفت کی اور کہا کہ پاکستان کو بھی ہندوستان کے ساتھ این ایس جی رکنیت دی جانی چاہیے۔

کانگریس کے اجلاس کے دوران پاکستان کے حوالے سے کچھ مصالحتی رویہ دیکھنے میں آیا جبکہ اس سے قبل جون میں ہونے والے اجلاس میں حقانی نیٹ ورک کے خلاف کارروائیاں نہ کرنے پر پاکستان کی فوجی امداد میں 30 کرور ڈالر کی کمی کردی گئی تھی۔ تاہم جمعرات 8 ستمبر کو ہونے والے اجلاس میں امریکی سینیٹرز اور گواہان نے اس بات پر اتفاق کیا کہ امداد میں کمی سے پاکستان کو اپنی پالیسیوں میں تبدیلیوں پر مجبور نہیں کیا جاسکتا، کچھ تجزیہ نگاروں نے اس سماعت کو معطل شدہ امداد کی بحالی کی طرف ‘پہلا قدم’ قرار دیا۔

نیو ہمپشائر سے تعلق رکھنے والے ڈیموکریٹ سینیٹر جیئین شاہین نے مسٹر ڈالٹن سے سوال کیا کہ ‘اپنی جوہری تنصیبات کی حفاظت میں پاکستان کے کیا مفادات ہیں’۔ جس پر ڈالٹن نے جواب دیا، ‘اس میں پاکستانیوں کی بہت زیادہ دلچسپی ہے اور جوہری پروگرام جاری رکھنے کے حوالے سے وہاں مکمل اتفاق رائے پایا جاتا ہے’۔ ان کا مزید کہنا تھا کہ ‘شاید ایٹمی ہتھیار اور کرکٹ وہ واحد 2 چیزیں ہیں، جن پر وہ اتفاق کرتے ہیں’، ساتھ ہی انھوں نے ایٹمی ہتھیاروں کو پاکستان کے ‘شاہی جواہرات’ قرار دیا۔ ڈالٹن نے کہا، ‘انھوں نے اپنے جوہری پروگرام کو محفوظ بنانے کے حوالے سے اہم اقدامات کیے ہیں، وہ تمام خطرات اور چینلجز کو سمجھتے ہیں’۔

کولوراڈو ری پبلکن سے تعلق رکھنے والے سینیٹر کوری گارڈنر نے سوال کیا کہ ‘کیا ڈاکٹر عبدالقدیر خان کے دور میں شمالی کوریا سے استوار کیے گئے پاکستان کے تعلقات اب بھی باقی ہیں’۔ جس پر ڈالٹن نے جواب دیا کہ ‘عبدالقدیر خان کے واقعے کے بعد پاکستان نے اس تعلق کو ختم کردیا تھا اور اس حوالے سے کچھ بھی باقی نہیں، سوائے چند سوشل میڈیا اکاؤنٹس کے، جن کے مطابق یہ نیٹ ورک اب بھی موجود ہے’۔ ان کا کہنا تھا کہ ‘پاکستان یہ سمجھتا ہے کہ اس طرح کا واقعہ دوبارہ نہ ہو’۔

ایک واشنگٹن تھنک ٹینک کے چیئرمین روبرٹ ایل گرینیئر نے نشاندہی کی کہ پاکستان نے 1990 میں شمالی کوریا اور ایران سے اُس وقت رابطہ کیا، جب امریکا نے اس پر پابندیاں عائد کی تھیں۔ ان کا کہنا تھا کہ پاکستان اپنا جوہری پروگرام ہندوستان کی جانب سے ممکنہ لاحق خطرات کی وجہ سے جاری رکھنا چاہتا ہے، ان کا کہنا تھا کہ ‘وہ روایتی ہتھیاروں سے ہندوستان کا مقابلہ نہیں کرسکتے، لہذا انھوں نے یہ راستہ اختیار کیا’۔ گرینیئر نے امریکا پر زور دیا کہ ‘وہ بہت زیادہ محتاط رہے اور حقانی نیٹ ورک پر اختلافات کے باوجود پاکستان کے ساتھ کچھ تعلقات برقرار رکھے’۔ انھوں نے خبردار کیا کہ ‘اگر ہم ان سے ایک اچھوت کی طرح سے سلوک کریں گے تو وہ بھی ایک اچھوت کی طرح ہی برتاؤ کریں گے’۔

سب سے دلچسپ بات
جون ہوپکنز یونیورسٹی سے تعلق رکھنے والے ایک اور گواہ ڈینیئل مارکے نے پاک چین اقتصادی راہداری منصوبے (سی پیک) کو ‘واحد دلچسپ چیز’ قرار دیا، جو پاکستان میں ہونے جارہی ہے۔ ان کا کہنا تھا کہ ‘زیادہ تر پاکستانی اس حوالے سے پرجوش ہیں، صرف اس وجہ سے نہیں کہ اس سے ان کے چین سے تعلقات بہتر ہوں گے بلکہ اس لیے بھی اس طرح کہ ان کے لیے عالمی تجارت کے راستے کھلیں گے’۔ ڈاکٹر مارکے نے مزید کہا کہ ‘پاکستان میں موجودہ عدم استحکام کا تعلق ان کے معاشی عدم استحکام سے ہے اور کوئی بھی چیز جو ان کی معیشت کو مضبوط کرے وہ پاکستان کے لیے اچھی ہے’۔ انھوں نے کہا کہ ‘یہ منصوبہ امریکا کے لیے جزوی طور پر مثبت اور جزوی طور پر تحفظات کا باعث ہے، مثبت اس لیے کیوں کہ اس سے وہاں استحکام پیدا ہوگا اور تحفظات کا باعث اس لیے کیونکہ ہمیں اس حوالے سے اعتراض ہے کہ اس طرح خطے میں چین کا کردار مضبوط ہوجائے گا’۔ سینیٹر مارکے نے مزید کہا کہ ‘پاکستان نے حال ہی میں ہندوستان کو جوہری ہتھیاروں کے حوالے سے دو طرفہ معاہدے کی پیشکش کی ہے’، ساتھ ہی انھوں نے مسٹر ڈالٹن سے اس پیشکش کے خلوص کے حوالے سے سوال کیا۔ جس پر ڈالٹن کا کہنا تھا کہ ‘اس طرح کا معاہدہ ممکن ہے لیکن یہ بہت مشکل ہوگا’۔

(بشکریہ ڈان)

یہ گلوبل ولیج کی چوپال کا منظر ہے۔ چوپال بہت وسیع و عریض اور خوبصورت ہے، جس میں کہیں مخملی گھاس کے قالین بچھے ہیں کہیں میز کرسیاں اور صوفے لگے ہیں. میزوں پر فینسی حقے، سگریٹ پان، چائے کافی سگار سے لے کر پینے کے ہر قسم کے مشروبات کا سامان دھرا ہے۔ گلوبل ولیج کے اکثر باسی شام کو یہاں آتے ہیں اور کچھ اچھا وقت گزار کے چلے جاتے ہیں. کبھی کبھی تلخی اور لڑائیاں بھی ہو جاتیں ہیں.

آج کل بھی چوپال کے حالات کچھ کشیدہ ہیں، ابھی شام ہونے کو ہے. سب سے پہلے سات بھائی چوپال میں داخل ہوتے ہیں۔ ان کے جسموں پر ریشم کے چوغے نما قیتی لباس ہے اور ان کے سروں پر سونے کے تاج چمک رہے ہیں. یہ ساتوں سگے بھائی ہیں، ان میں سے دو بڑے بھائی آگے آگے ہیں۔ یہ ابوظہبی اور دبئی ہیں، ان کے تاجوں میں ہیرے جوہرات بھی جڑے ہوئے ہیں اور ہاتھوں میں قیمتی انگوٹھیاں ہیں، ان کے پیچھے شارجہ اور فجیرہ وغیرہ پانچ بھائی ہیں جو دبئی اور ابوظہبی کی طرح امیر کبیر تو نہیں لیکن اچھے خاصے کھاتے پیتے اور صاحب ثروت ہیں۔ ساتوں بھائیوں کی چوپال میں ایک میز مخصوص ہے جس پر قہوہ، حقہ، کجھوروں سمیت دیگر لوازمات مہیا ہیں۔ سارے بھائی باہمی دلچسپی کے امور پر گفتگو کرتے ہوئے اپنی میز کے گرد بیٹھ جاتے ہیں، تھوڑی دیر میں ایک کرخت چہرے والا لحیم شحیم شخص چوپال میں داخل ہوتا ہے. اس شخص نے کمانڈوز جیسی یونی فارم پہن رکھی ہے، اس کے دونوں کندھوں پر میزائل بندھے ہیں اور پشت پر ایک بیگ ہے جس میں ایٹم بم چلانے کا ریموٹ کنٹرول سسٹم ہے. کرخت شکل شخص کا نام شمالی کوریا ہے، شمالی کوریا کے بوٹ پھٹے ہوئے اور کپڑے خستہ حال ہیں، شمالی کوریا اپنی چھوٹی چھوٹی آنکھوں سے اردگرد دیکھتا ہوا ایک کونے میں جا کے بیٹھ جاتا ہے اور اپنی بندوق کو کھول کے صاف کرنے لگتا ہے.

اس کے ساتھ ہی چوپال میں تھری پیس سوٹوں میں ملبوس، پرفیوموں میں نہائے ہوئے سفید فام لوگوں کی ٹولی داخل ہوتی ہے۔ یہ ہٹے کٹے خوش لباس یورپی یونین کے ممالک ہیں، یہ لوگ تھوڑی دیر کھڑے ہو کے ہیلو ہائے کرتے ہیں، پھر چوپال کی بار کی طرف بڑھ جاتے ہیں، اب چوپال میں لوگوں کی مسلسل آمد جاری ہے، سوکھے سڑے ادھ ننگے افریقی ممالک بھی آ رہے ہیں اور عجیب و غریب لباس میں ملبوس ساوتھ امریکہ کے ممالک بھی جن میں سے کچھ خوش خال دکھائی دیتے اور کچھ مفلوک الحال، اتنے میں سروں پر تاج پہنے دو لوگ اندر داخل ہوتے ہیں، ایک نے ریشمی چوغہ نما لباس پہن رکھا ہے اور ہاتھ میں تسبیح ہے، یہ سعودی عرب ہے، اس کے ساتھ سوٹ میں تاج والا کافی بوڑھا سا آدمی برطانیہ ہے. یہ دونوں بھی مختلف لوگوں سے ملتے ملاتے چوپال میں گھل مل جاتے ہیں۔ اتنی دیر میں سٹیج پر ایک نیم برہنہ سی عورت نمودار ہوتی ہے اور میوزک کی آواز پر تھرکنا شروع ہو جاتی ہے اس عورت کا نام تھائی لینڈ ہے۔ اس کے ساتھ ہی چوپال میں سانولے سے لوگوں کا ایک گروہ داخل ہوتا ہے، سب سے آگے والے شخص کی ٹنڈ ہے بس سر کے بیچ میں بالوں کی ایک لمبی بودی ہے جسے کی چٹیا بن کے اس کی کمر پر لٹک رہی ہے، چٹیا میں ہیرے جوہرات جڑے ہیں، یہ بھارت ہے، بھارت سونے کے زیوارت سے لدا ہوا ہے، ماتھے پر سرخ ٹیکا ہے اور چہرے پر مکاری کے تاثرات ہیں، اوپر والا دھڑ ننگا ہے اور نیچے اس نے بھاری بھر کم سفید دھوتی پہن رکھی ہے. بھارت کے پیچھے ننگ دھڑنگ اور سوکھے سڑے نیپال، برما اور مالدیپ ہیں جو بھارت کی دھوتی کو اٹھائے غلاموں کی طرح چل رہے ہیں. بھارت چہرے پر نخوت آمیز انکساری سجائے سب کو جھک جھک کے پرنام کر رہا ہے۔ عربوں سے گلے مل کے وہ یورپ والوں کے ساتھ کھڑا ہو جاتا ہے

اس کے ساتھ ہی چوپال میں ایک عجیب و غریب شخص داخل ہوتا ہے، اس شخص کا پورا جسم خون آلود ہے اور ایک بازو بھی کٹا ہوا ہے، برانڈڈ ٹی شرٹ کے نیچے شلوار پہنے یہ شخص ننگے پائوں ہے، اس کے پیروں سے بھی خون بہہ رہا ہے لیکن بےنیازی سے چیونگ چباتا شخص اپنے زخموں سے خاصا لاپروا لگ رہا ہے، اس کا نام پاکستان ہے۔ پاکستان کے کندھوں پر بھی شمالی کوریا کی طرح میزائل اور پشت پر ایٹم بم والا بیگ ہے. پاکستان کے چوپال میں داخل ہوتے ہی چہ مگوئیاں شروع ہو جاتی ہیں، ہر کوئی پاکستان کی طرف خوفزدہ نظروں سے دیکھ رہا ہے، پاکستان پیروں سے زمین کو کوٹتا ہوا پہلے عربوں کی ٹیبل پر جاتا ہے، سعودی عرب اپنے سونے کے سگریٹ کیس سے ایک سگریٹ نکال کر پاکستان کو پیش کرتا ہے، سگریٹ سلگا کے پاکستان سونے کو لائٹر اور سگریٹ کیس کو اپنی جیب میں ڈال لیتا ہے، کچھ دور کھڑا بھارت پاکستان کو گھور رہا ہے. اتنے میں پاکستان وہاں سے پائوں گھیسٹتا ہوا یورپ والوں کی طرف بڑھتا ہے، یورپ والے اسے اپنی طرف آتا دیکھ کر تیزی سے منتشر ہو جاتے ہیں، پاکستان کے چہرے پر ایک پھیکی سی مسکراہٹ نمودار ہو کے غائب ہو جاتی ہے اور وہ اکیلے بیٹھے شمالی کوریا کی طرف بڑھ جاتا ہےاور اس سے ہاتھ ملاتا ہے. اتنی دیر میں چوپال میں دھوپ کا چشمہ لگائے اوسط قامت کا ایک انتہائی تیز طرار شخص داخل ہوتا ہے، سپاٹ چہرے والا شخص ہر آدمی سے ملتا ہے، یہ چائنہ ہے، پاکستان دوڑ کے چائنہ سے گلے ملتا ہے، چائنہ کا چہرہ سپاٹ رہتا ہے، وہ نرمی سے پاکستان کو خود سے الگ کر کے حال چال پوچھتا ہے، پھر مشفقانہ انداز میں پاکستان کے خون آلودہ گال پر تھپکی دیتا ہے اور یہ کہتے ہوئے آگے بڑھ جاتا ہے، میں یہی ہوں کسی چیز کی ضرورت ہوئی تو بتانا.

اتنی دیر میں چوپال کی انٹرنس پر کچھ ہلچل کے آثار پیدا ہوتے ہیں. لگتا ہے کسی خاص ہستی کی آمد آمد ہے، وہ خاص ہستی گلوبل ولیج کے چوہدری آمریکہ کے علاوہ کس کی ہو سکتی ہے۔ انتہائی قیمتی سوٹ میں ملبوس دیو قامت امریکہ طاقت کے نشے میں جھومتا ہوا چوپال میں داخل ہوتا ہے. امریکہ کے ہاتھ خون میں لتھڑے ہوئے ہیں اور منہ پر خون لگا ہے، امریکہ کے پیچھے حواریوں کا ایک گروہ ہے. سب سے دلچسپ بات یہ ہے کہ امریکہ کی پشت پر چند رسیاں ہیں جن کے ساتھ انتہائی زخمی اور نیم مردہ لوگ بندھے ہیں، زخمی لوگوں کے منہ سے کراہیں نکل رہی ہیں اور زخموں سے مسلسل خون رس رہا ہے. یہ افغانستان، عراق، اور لیبیا ہیں. امریکہ اور بھارت خوب کٹ کے جھپی لگاتے ہیں، بھارت امریکہ کے کان میں کوئی بات کہتا ہے اور ساتھ پاکستان کی طرف اشارہ بھی کرتا ہے، لگتا ہے پاکستان کی شکایت لگائی جا رہی ہے. امریکہ پاکستان کو گھورتا ہے، قدم بوسی کا خواہشمند پاکستان بےبسی سے انکار میں سر ہلاتا ہے اور ہاتھ جوڑتا ہے. اتنی دیر میں بھارت امریکہ کے پیچھے بندھے زخموں سے چور نیم مردہ افغانستان کو نظروں ہی نظروں میں کوئی اشارہ کرتا ہے، افغانستان اٹھ کے بیٹھ جاتا ہے اور پاکستان کو گالیاں دینے لگتا ہے، اس نے ہم کو برباد کر دیا، آج ہمارا جو حال ہے سب اس کی وجہ سے ہے، میں تو کہتا ہوں دنیا میں سارے فساد کی جڑ یہی شخص ہے۔ چوہدری صاحب اس کو پھانسی چڑھا دو۔ غصے کی شدت سے افغانستان کانپ رہا ہے، اپنی بات مکمل کرکے وہ بیٹھے بیٹھے پاکستان کو مارنے کی نیت سے جھپٹتا ہے لیکن ادھ راستے میں ہی گر جاتا ہے اور زور زور سے کھانسنے لگتا ہے. امریکہ اس کی پشت پر تھپکی دیتا ہے اور بھارت نسوار نکال کر ایک چٹکی اس کے منہ میں ڈالتا ہے، یورپی پانی کا گلاس لا کے پلاتے ہیں تو افغانستان کی حالت کچھ سنبھلتی ہے۔ اتنی دیر میں بھارت کے اشارے پر ایک اور دبلا پتلا غریب صورت شخص آگے بڑھتا ہے، اس کی آنکھوں میں پاکستان کے لیے نفرت کا سمندر موجزن ہے، یہ بنگہ دیش ہے پاکستان کا کٹا ہوا بازو، وہ پاکستان کی طرف اشارہ کر کے کہتا ہے، اس نے ہمیشہ میرے اور بھارت کے ساتھ زیادتی کی ہے. یہ ہر وقت ہمارے خلاف سازشوں میں مصروف رہتا ہے، ہمارا خطہ اسی کی وجہ سے آج جہنم کا منظر پیش کر رہا ہے، اب بھی اگر دنیا نے اس کو لگام نہ دی تو پھر ہمیں خود ہی کچھ کرنا پڑے گا۔

پاکستان بےبسی سے اردگرد دیکھتا ہے کہ شاید کوئی اس کے حق میں بھی بولے، چین چند قدم چل کے پاکستان کے پاس آ کر کھڑا ہو جاتا ہے۔ امریکہ سگار کا ایک طویل کش لگا کے اپنی عینک اتار کے صاف کرتا ہے اور پاکستان کی طرف انگلی اٹھا کے کہتا ہے دیکھو میاں، یہاں رہنا ہے تو شرافت سے رہو، میں جانتا ہوں تم اتنے برے نہیں ہو تمھاری بھی مجبوریاں ہیں، یاروں کے یار ہو، ہماری پیسنے کی جگہ خون بہاتے رہے ہو پر دیکھو دوست بدلے جا سکتے ہیں ہمسائے نہیں، یہ بھارت، افغانستان اور تمھارا برادر ایران یہ ہمسائے ہیں تمھارے، ان کے ساتھ بیٹھو، ان کے تحفظات سنو، ان کو دور کرو، راضی کرو یار ان کو، یہ کہہ کے امریکہ تھوڑا آگے بڑھ کے پاکستان کے دونوں گالوں کو اپنے دیو قامت ہتھلیاں میں لے کے سرگوشی کرتا ہے، میں بھی مجبور ہوں میری جان۔ آئی مین بزنس پھر پاکستان کو آنکھ مار کے آگے بڑھ جاتا ہے، بیشتر ممالک بھی امریکہ کے ساتھ چلے جاتے ہیں، بس پاکستان اور بھارت وہی کھڑے رہتے ہیں، بھارت کی آنکھوں میں فاتحانہ چمک ہے، وہ ایک تمسخر انگیز مسکراہٹ سے پاکستان کو سر سے پائوں تک دیکھتا ہے، پھر منہ سے چخ چخ کی آواز نکالتے ہوئے جیب سے لائٹر نکال کر پاکستان کی شرٹ کو آگ لگانا شروع ہو جاتا ہے۔ یہ تم کیا کر رہے ہو، پاکستان درد سے چلاتا ہے، یہ دیکھو یہ بھارت کیا کر رہا ہے، یہ دیکھو لیکن کوئی بھی اس طرف متوجہ نہیں ہوتا، جو لوگ دیکھتے ہیں وہ دیکھ کے بھی منہ پھیر لیتے ہیں. پاکستان بھارت سے لائٹر چھین لیتا ہے اور اسے دھکا دے کر خود سے دور ہٹاتا ہے اور اپنے کپڑوں پر لگی آگ بجھانے کی کوششوں میں مصروف ہو جاتا ہے اور بھارت قہہقے لگاتا ہوا اپنے حواریوں کے ساتھ وہاں سے چلا جاتا ہے۔

سپاٹ چہرے والا چین پاکستان کے کندھے پر تھپکی دیتے ہوئے کہتا ہے، دیکھو دوست! یہ دنیا ایک جنگل کی طرح ہے، یہاں طاقت اور مفادات کی زبان ہی بولی اور سمجھی جاتی ہے، میرا مشورہ ہے کہ تب تک اپنے دشمن کو نظر انداز کرنا سیکھو جب تک تم ان کا منہ توڑنے کے قابل نہیں ہو جاتے۔ یہ کہتے ہوئے چین پاکستان کو گلے لگاتا ہے اور چپکے سے کچھ پیسے اور اسلحہ اس کی جیب میں منتقل کر دیتا ہے۔ چین کے جانے کے بعد پاکستان اردگرد کا جائزہ لیتا ہے، چوپال کافی حد تک ویران ہو چکا ہے، پاکستان ایک میز سے بچا ہوا ڈرئی فروٹ اُٹھاتا ہے اور اسے کھاتا ہوا چوپال سے نکل جاتا ہے.