آپ فن لینڈ کا ماڈل ملاحظہ کیجیے‘ فن لینڈ یورپ کے شمال میں چھوٹا سا ملک ہے‘ رقبہ تین لاکھ 38ہزار مربع کلو میٹر اور آبادی 55 لاکھ ہے‘ یہ سکینڈے نیویا کا حصہ ہے‘ موسم شدید سرد ہے‘موسم سرما میں درجہ حرارت منفی 45 ڈگری تک گر جاتا ہے‘ لوگ مہذب‘ صلح جو اور نرم خو ہیں‘ جرائم نہ ہونے کے برابر ہیں‘ یہ ملک ٹریفک قوانین میں باقی دنیا سے مختلف ہے۔
پوری دنیا میں آپ کی آمدنی میں جوں جوں اضافہ ہوتا جاتا ہے آپ میں ٹریفک قوانین کی خلاف ورزی کا رجحان بڑھتا جاتا ہے‘ کیوں؟ کیونکہ آپ قانون شکنی کو جرمانے میں تولنے لگتے ہیں‘ غلط پارکنگ کا جرمانہ پچاس ڈالر‘ کوئی بات نہیں‘ اشارہ ٹوٹ گیا جرمانہ دو سو ڈالر‘ نو پرابلم‘ گاڑی لگ گئی کوئی مسئلہ نہیں انشورنس کمپنی پے کر دے گی اور اسپیڈ زیادہ ہو گئی‘ او کوئی ایشو نہیں میرا دفتر جرمانہ ادا کر دے گا وغیرہ وغیرہ چنانچہ آپ ٹریفک قوانین کی خلاف ورزی کرتے چلے جاتے ہیں لیکن فن لینڈ میں ایسا نہیں ہوتا۔
آپ اس ملک میں جوں جوں امیر ہوتے جاتے ہیں آپ ٹریفک قوانین کے معاملے میں اتنے ہی محتاط اور شریف ہوتے چلے جاتے ہیں یہاں تک کہ آپ اگر ارب پتی ہیں تو آپ ذاتی کار چلانا بند کر دیتے ہیں اور آپ ٹیکسی‘ بس‘ ٹرین اور ہوائی جہاز استعمال کرتے ہیں‘ یہ دنیا کا واحد ملک ہے جس میں امراء گاڑی چلانا بند کر دیتے ہیں اور یہ گاڑیاں خریدنا بھی چھوڑ دیتے ہیں‘ کیوں؟ کیونکہ فن لینڈ میں ٹریفک قوانین کی خلاف ورزی پر آپ کا جرم نہیں دیکھا جاتا‘ آپ کی آمدنی دیکھی جاتی ہے‘ آپ اگر مڈل کلاس سے تعلق رکھتے ہیں تو آپ کو ’’اوور اسپیڈنگ‘‘ پر زیادہ سے زیادہ پانچ سو یوروجرمانہ ہو گا لیکن آپ اگر خوش حال‘ امیر یا رئیس ہیں تو آپ کو دس ہزار‘ پچاس ہزار اور ایک لاکھ تین ہزار یورو جرمانہ ہو جائے گا۔
فن لینڈ میں ایسے کیس بھی سامنے آئے جن میں گاڑی چلانے والا اسپیڈ لمٹ سے صرف پندرہ کلومیٹر فی گھنٹہ اوپر گیا اور اسے ایک لاکھ تین ہزار یورو جرمانہ ہو گیا جب کہ پچاس ہزار یورو اور دس ہزار یورو جرمانے کی سیکڑوں مثالیں موجود ہیں‘ ملک میں جس شخص کو پچاس ہزار یا لاکھ یورو جرمانہ ہوجاتا ہے وہ گاڑیاں چلانا بند کر دیتا ہے اور وہ باقی زندگی نہایت شریفانہ گزارتا ہے‘ ایسا کیوں ہوتا ہے؟ اس کی وجہ ذرایع آمدنی ہے‘ فن لینڈ کی حکومت نے 1920ء کی دہائی میں اندازہ لگایا تھا‘ ایک شخص ماہانہ پانچ سو مارکہ کماتا ہے‘ یہ جرم کرتا ہے‘ عدالت اسے پانچ سو مارکہ جرمانہ کر دیتی ہے‘ یہ رقم اس کے لیے بہت بڑی ہے‘ یہ پانچ سو مارکہ حکومت کو دے کر باقی مہینہ شدید مسائل کا شکار رہے گا جب کہ دوسری طرف ایک شخص گھنٹے میں پانچ سو مارکہ کماتا ہے۔
عدالت اسے پانچ ہزار مارکہ جرمانہ کر دے تو بھی اسے کوئی فرق نہیں پڑے گا‘ یہ جرمانہ ادا کرے گا اور بھول جائے گا لیکن اگر اسے پانچ لاکھ مارکہ جرمانہ کردیا جائے تو یہ مستقبل میں یہ غلطی نہیں دہرائے گا چنانچہ حکومت نے قانون بنا دیا جو شخص سڑک پر ٹریفک رولز کی خلاف ورزی کرے اسے جرم کی نوعیت پر جرمانہ نہیں ہو گا‘ وہ اپنی آمدنی کے مطابق سزا بھگتے گا‘ آج پولیس کے پاس تمام شہریوں کا ڈیٹا موجود ہوتا ہے‘ یہ چند سیکنڈ میں شہری کے ذرایع آمدنی دیکھتے ہیں‘ اس کی ٹیکس ریٹرنز‘ پراپرٹیز اور بینک اکاؤنٹس دیکھتے ہیں اور اسے اس کے مطابق جرمانہ ’’ٹھوک‘‘ دیتے ہیں‘ ملزم اعتراض کرے تو پولیس اہلکاروں کے پاس خصوصی اختیارات ہیں۔
یہ اکاؤنٹ سے رقم نکال لیتے ہیں یا پھر اس کی کوئی جائیداد جرمانے کے ساتھ منسلک کر دیتے ہیں‘ وہ شخص جب تک جرمانہ ادا نہ کرے‘ وہ اس وقت تک اپنی پراپرٹی بیچ نہیں سکتا اور اگر اس نے وہ پراپرٹی کرائے پر دے رکھی ہے تو وہ اس کا کرایہ وصول نہیں کر سکے گا‘ حکومت پہلے کرائے سے اپنا جرمانہ وصول کرے گی اور اس کے بعد اسے کرایہ وصول کرنے کی اجازت دے گی چنانچہ یہ اس قانون کا کمال ہے‘ آپ فن لینڈ میں جتنا ترقی کرتے جاتے ہیں آپ اتنا ہی محتاط ہوتے جاتے ہیں‘ آپ اتنا ہی قانون کی پابندی کرتے ہیں‘ آپ جانتے ہیں آپ کی غلطی آپ کی پوری زندگی کی محنت اکارت کر دے گی اور یہ قانون کا وہ خوف ہے جس کی وجہ سے فن لینڈ کے امراء گاڑی چلانے کا رسک نہیں لیتے اور یہ ٹیکسیوں‘ پبلک ٹرانسپورٹ اور ٹرینوں میں سفر کرتے ہیں۔
آپ فن لینڈ سے اب پاکستان میں آئیے‘ ہمارے ملک میں سڑکیں انتہائی غیر محفوظ ہیں‘ آپ اسلام آباد‘ لاہور اور کراچی کی سڑکوں پر نکل جائیں‘ آپ جی ٹی روڈ اور موٹر وے پر سفر کر کے دیکھ لیں‘ آپ کے دائیں بائیں سے گاڑیاں ساں ساں کر کے گزریں گی‘ آپ کو کوئی شخص اسپیڈ لمٹ کا خیال رکھتا نظر نہیں آئے گا‘ کیوں؟ کیونکہ پاکستان میں جرمانے انتہائی کم ہیں‘ آپ اسپیڈ لمٹ سے خواہ پچاس کلو میٹر اوپر چلے جائیں آپ کو اڑھائی سو سے ساڑھے سات سو روپے جرمانہ ہو گا ‘ یہ رقم قانون شکنوں کے لیے مونگ پھلی سے زیادہ اہمیت نہیں رکھتی۔
میں نے موٹر وے پر ایسے مناظر بھی دیکھے ہیں جب ایک شخص قانون توڑتا جا رہا ہے اور اس کے پیچھے موجود اس کی اضافی گاڑیاں اس کے جرمانے ادا کرتی جا رہی ہیں یہاں تک کہ وہ دو گھنٹے میں اسلام آباد سے لاہور پہنچ گیا‘ میں نے یہ بھی دیکھا موٹروے پولیس نے گاڑی کو زبردستی روکا‘ ڈرائیور چالان کروانے میں مصروف ہو گیا‘ صاحب اترے‘ دوسری گاڑی میں سوار ہوئے اور آگے روانہ ہو گئے‘ آپ کسی روز رات کے وقت اسلام آباد کے سیونتھ ایونیو‘ نائنتھ ایونیو اور مارگلہ روڈ پر سفر کر کے دیکھیں‘ آپ کو لوگ نشے میں دھت اوور اسپیڈنگ کرتے دکھائی دیں گے‘ آپ کو بچے ویلنگ کرتے بھی ملیں گے اور ریس لگاتے بھی‘ ایسا کیوں ہوتا ہے؟
یہ اس لیے ہوتا ہے کہ ملک میں جرمانہ جرم پر کیا جاتا ہے‘ مجرم کی پوزیشن پر نہیں‘ موٹروے پر دو سو روپے سے لے کر ساڑھے سات سو روپے جرمانہ ہے‘ یہ رقم ہر معمولی خوش حال شخص آسانی سے ادا کر سکتا ہے لہٰذا پھر یہ اوور اسپیڈنگ کیوں نہ کرے؟ یہ قانون کیوں نہ توڑے؟ملک میں ویلنگ اور ریس بھی بڑے جرائم نہیں ہیں‘ نوجوان معمولی جرمانہ ادا کرتے ہیں یا گڑگڑا کر جان چھڑا لیتے ہیں لہٰذا یہ سلسلہ دراز ہوتا جا رہا ہے‘ پنجاب 20 دن سموگ کا شکار رہا‘ یہ سموگ پچاس جانیں لے گئی مگر گاڑیوں پر فوگ لائیٹس نہیں لگیں‘ کیوں؟ کیونکہ یہ سرے سے جرم ہی نہیں‘یہ درست ہے ہم غریب ملک ہیں۔
ہماری اکانومی بھی ریکارڈ میں نہیں آئی اور ہم فن لینڈ نہیں بن سکتے لیکن ہم بڑی آسانی سے جرمانوں کو گاڑیوں کی مالیت سے تو نتھی کر سکتے ہیں‘ آپ سائیکل اور موٹر سائیکل سوار سے ساڑھے سات سو روپے جرمانہ وصول کریں لیکن آپ مرسیڈیز‘ بی ایم ڈبلیو‘ لینڈ کروزر‘ اڈوی اور پراڈو کے مالک کو لاکھ روپے جرمانہ کریں‘ ہم دیکھتے ہیں یہ لوگ اس کے بعد کیسے اوور اسپیڈنگ کرتے ہیں‘ یہ کیسے اشارہ توڑتے ہیں اور یہ کیسے غلط لائین سے اوورٹیک کرتے ہیں‘ آپ اسی طرح لائسنس کے بغیر ڈرائیو کرنے والوں کی گاڑیاں ضبط کرلیں‘ آپ یقین کریں ملک میں جس دن دو گاڑیاں آکشن ہوجائیں گی‘ لوگ لائنوں میں لگ کر لائسنس حاصل کریں گے۔
آپ اسی طرح ریس اور ویلنگ کرنے والے نوجوانوں کی فلم بنائیں اور ان کی گاڑیاں اور موٹر سائیکل بھی ضبط کر لیں‘ آپ اگلے دن نتیجہ دیکھ لیجیے اور آپ اسی طرح قانون بنا دیں جو گاڑی پندرہ اکتوبر سے 15 اپریل تک فوگ لائیٹس کے بغیر روڈ پر چڑھے گی اسے لاکھ روپے جرمانہ ادا کرنا پڑے گا‘ آپ اس کے بعد رزلٹ دیکھ لیجیے گا‘ آپ اسی طرح انشورنس اور مینٹیننس کو بھی قانون بنا دیں‘آپ اعلان کریں ملک میں کوئی گاڑی انشورنس اور مینٹیننس کے بغیر سڑک پر نہیں آ ئے گی اور اگر آئی تو اسے ضبط کر لیا جائے گا‘ آپ چند ماہ میں اس کا نتیجہ بھی دیکھ لیجیے گا‘ ہماری سڑکیں اور سفر دونوں محفوظ ہو جائیں گے۔
خدا کی پناہ ہمارے ملک میں ہر سال سڑکوں پر اتنے لوگ ہلاک ہو جاتے ہیں جتنے دس برسوں میں دہشت گردی سے مارے گئے ‘ ہم من حیث القوم اس قتال کے ذمے دار ہیں‘کیوں؟کیونکہ ہم نے آج تک ٹریفک کے مسائل سے نبٹنے کے لیے کوئی قانون ہی نہیں بنایا اور اگر قانون ہے تو یہ بہت کمزور اور بہت غریب ہے‘ میری چیف جسٹس سے درخواست ہے آپ یہ نوٹس بھی اپنے نوٹسوں میں شامل کر لیں‘ خلق خدا آپ کو دعائیں دے گی۔
باپ دل کا مریض تھا، بغرض علاج فیصل آباد کارڈیالوجی میں داخل تھا. عید نزدیک آئی تو ماں نے کہا کہ بڑی بہن کو جا کر عید دے آؤ، چھوٹی بہن نے ضد کر دی کہ مجھے بھی لے جاؤ بہن سے ملوانے … بہنیں سہیلیاں بھی تو ہوتی ہیں ناں، اس نے چھوٹی بہن کو موٹر سائیکل پر بٹھایا اور اپنےگاؤں جو مین روڈ پر واقع تھا، سے بیس کلومیٹر دور دوسرے گاؤں، جہاں بہن بیاہی تھی، روانہ ہوگیا. عید دے کر دونوں بہن بھائی واپس آ رہے تھے کہ تیز رفتار بس کی ٹکر لگی، بھائی موقع پر دم توڑ گیا، اور بہن ہسپتال میں زخموں کی تاب نہ لا کر گزر گئی. ابھی کہانی ختم نہیں ہوئی، ماموں اور نانی ان بچوں کے قلوں میں شرکت کے لیے موٹر سائیکل پر آ رہے تھے کہ تقدیر نے پھر ہاتھ دکھایا، اب کی بار بہانہ آئل ٹینکر بنا، ماموں موقع پر ختم ہوگیا اور نانی معذور ہو گئی. یہ صرف ایک واقعہ ہے مگر پنجاب بلکہ پورے پاکستان کے طول و عرض میں ہر جگہ ہر روز یہی کہانی دہرائی جاتی ہے. قصور کس کا ہے. مرنے والوں کا جو موٹر سائیکل کو ہر جگہ آنے جانے کے لیے استعمال کرتے ہیں، بس ڈرائیوروں کا جو کم سے کم وقت میں زیادہ سے زیادہ فاصلہ طے کرنے کے چکر میں بے تحاشا رفتار سے گاڑیاں چلاتے ہیں، ٹرانسپورٹ مالکان کا جنہوں نے لمبے روٹ کی سواری کو ہی اپنا ٹارگٹ بنایا ہوا ہے، اور مضافات اور کم فاصلے کی سواری کے لیے کوئی راستہ نہیں سوائے اس کے کہ وہ موٹر سائیکل یا چنگ چی رکشہ کو استعمال کریں. حکام بالا جو اپنے ٹھنڈے گرم کمروں میں بیٹھ کر صرف مراعات حاصل کرتے ہیں، انھیں اس سے کوئی غرض نہیں ہے.
چوراہے پر ٹریفک پھنسا ہوا تھا کیونکہ رش کا وقت تھا۔ سب لوگ خاموش تھے، ہارن کا شور شرابہ بھی نہیں تھا اور ٹریفک آہستہ آہستہ سرک رہا تھا۔ میری بیٹی بھی صبر کے ساتھ اسٹیرنگ پر بیٹھی تھی۔ چورنگی کے قریب پہنچ کر میں چونکا، دیکھا کہ کوئی پولیس کا سپاہی نہیں ہے، لیکن حیران کرنے والی بات یہ تھی کہ سارا ٹریفک رکا تھا کہ ہمارے بائیں طرف کی سڑک کی قطار سے دو گاڑیاں نکل کر چورنگی کراس کر گئیں اور پچھلی گاڑیاں رک گئیں۔ اس کے بعد ہمارے سامنے کی سڑک کی قطار سے دو گاڑیاں بڑھیں اور نکل گئیں، اس کے بعد ہمارے دائیں جانب کی قطار سے دو گاڑیاں نکل کر چورنگی پار کر گئیں۔ پھر ہماری قطار آگے بڑھی۔ ہر کوئی اپنے سیدھے ہاتھ کے ٹریفک کو راستہ دے رہا تھا اور ہر قطار سے صرف دو گاڑیاں ہی نکل کے جا رہی تھیں۔ اس طرح دیکھتے دیکھتے ہمارا نمبر بھی آگیا اور ہم بھی اس رش سے نکل آئے۔ واہ کیا ڈسپلن اور سوک سینس ہے، میں نے بیٹی کی طرف ستائش بھری نظروں سے دیکھا اور کہا کہ کیا یہاں ٹریفک پولیس چوراہوں پر نہیں ہوتی اور لوگ ایسے ہی دوسروں کا خیال کرتے ہیں تو اس نے کہا کہ جی ہاں رش میں ایسے ہی ہوتا ہے اور پولس آپ کو شاذو نادر ہی کہیں نظر آئے گی۔ اپنے دہ ماہ قیام کے دوران مجھے ٹریفک پولیس کی گاڑی صرف دو دفعہ دستاویزات چیک کرتی ہی نظر آئی۔ روڈپر لگے اسپیڈ کی حد کے نشان کی حد درجہ پابندی دیکھی کیونکہ کیمرے ہر جگہ لگے ہیں۔ لیکن لوگ خود ہی قانون پر عمل کرتے ہیں اور غلط کام کرنے والے کو گھورتے ہیں۔ ایک دوسرا واقعہ یہ ہوا کہ شہر کے باہر سے واپس آتے ہوئے رات میں کافی دیر ہوگئی، اطراف میں جنگل تھا، اچانک تیز روشنی کا جھماکہ ہوا، میرے بھانجے نے فوراً اسپیڈ کم کی، میں نے پوچھا کیا ہوا؟ تو اس نے بتایا کہ دھیان نہیں رہا تھا، اسپیڈ زیادہ ہوگئی تھی، اب تصویر کھینچ لی گئی ہے اور جرمانے کا ٹکٹ تصویر کے ساتھ گھر پر آجائے گا۔ یہ تذکرہ پرتھ آسٹریلیا کا ہے۔ وہاں پر شہری ذمّہ داریاں اسکول سے ہی سکھائی جاتی ہیں۔ قانون کی سختی ہے اور سب کے لیے برابر ہے۔ جس کا نتیجہ ایک مہذّب معاشرے کی صورت نظر آیا۔ اسی دوران کسی نے بتایا کہ وہاں کے سابق چیف جسٹس کو شاید کسی غلط بیانی پر سزا سنادی گئی تو حیرت ہی ہونی تھی۔
اسلام کے نام پر قائد اعظم محمد علی جناح رحمۃ اللہ علیہ کی ان تھک کوششوں سے بننے والا ملک، جس میں بسنے والوں کو قائد نے اچھا شہری بننے کے لیے ’’ایمان، اتحاد، تنظیم‘‘ کا ایک سبق دیا تھا۔ کیا یہ سبق ہم بھولتے جا رہے ہیں؟ ایسا ہم جان بوجھ کر کر رہے ہیں؟ یا ہم اچھا شہری بننا ہی نہیں چاہتے؟ یہ فکر ہم میں کیوں پروان چڑھ گئی ہے کہ کسی بھی اچھے عمل میں پہل دوسروں کو کرنی چاہیے؟ اس کے لیے ہم خود پہل کیوں نہیں کرتے؟ اس سبق کی نفی کرتے ہوئے اس طرح کے کئی اور سوال پیدا ہو گئے ہیں۔
پولیس کا نام آتے ہی تھرڈ ڈگری، طاقت، کرپشن اور بدمعاشی جیسے خیالات جنم لیتے ہیں۔ یہ ہماری مجموعی سوچ ہے۔ آئیے اس سوچ کو منطقی انداز سے پرکھتے ہیں۔ ہم میں سے کتنے لوگوں کو گذشتہ 6 ماہ میں گرفتار ہونا پڑا؟ یا یوں کہہ لیں کہ ہمیں کتنی بار تھانے جا کر رپٹ لکھوانے پڑی۔ یقینا کئی لوگ تھانے گئے ہوں گے لیکن ان سے کہیں زیادہ افراد گذشتہ ایک برس یا اس سے بھی زیادہ عرصہ سے کسی پولیس اسٹیشن کے قریب بھی نہیں پھٹکے۔ ہونا تو یہ چاہیے کہ دونوں کے الگ تجربات اور سوچ ہو لیکن جو شخص کبھی پولیس اسٹیشن نہیں گیا اورکبھی کسی پولیس اہلکار سے اس کا واسطہ نہیں پڑا، وہ بھی پولیس سے نالاں نظر آئے گا۔ سوال یہ ہے کہ ایسا کیوں ہے؟ شاید اس لیے کہ پولیس کے خلاف ہم مخصوص ذہن بنا چکے ہیں اور سوشل میڈیا پر پولیس مخالف سٹیٹس لکھنے سے ریٹنگ ملتی ہے۔
