ارے مراد علی شاہ صاحب۔ آپ تو سنجیدہ ہی ہو گئے۔ یہ وزیراعلیٰ بنتے ہی عوامی خدمت کا نعرہ لگانے کی کیا ضرورت تھی؟ آپ کو عوام سے ایک ہی چیز تو چاہیے ہوتی ہے، ووٹ۔ وہ خدمت کیے بغیر بھی مل رہے ہیں۔ جب آپ کو وزیراعلیٰ بنانے کا اعلان کیا گیا، اس وقت آپ نے کہا تھا وہی کریں گے جو پارٹی لیڈر شپ کہے گی. پھر یہ عوامی خدمت کا اعلان کچھ سمجھ میں نہیں آیا۔ شاید ہمارے کان بجے، امن و امان کے حوالے سے آپ نے قائم علی شاہ کے دور کو سندھ کا بہترین دور قرار دیا۔ اگر آپ کے نزدیک بہتری کا معیار یہ ہے تو خدا جانے بدتری کسے کہیں گے؟
ایک تو آپ نے اپنی تقریر میں انگریزی کے فقرے بار بار استعمال کیے۔ مجھ ان پڑھ کو تو سمجھ ہی نہیں آئی۔ صاف کراچی، ہرا تھر اور محفوظ سندھ۔۔۔ کیا یہی کہا آپ نے؟ کہیں آپ کراچی کا کچرا صاف کرانے کا پروگرام تو نہیں بنا بیٹھے؟ ارے کچھ تو اس کچرے پر پلنے والے اربوں جراثیم کا خیال کیا ہوتا۔ کس چاؤ سے یہ جراثیم عوام کو بیمار کرتے ہیں، اور آپ انہیں ختم کرنے چلے ہیں۔ اور تھر کو ہرا کرنے سے پہلے تھر کے رہنے والوں کو سیراب کرنے کا تو کچھ بندوبست کیجیے۔ سنتے ہیں آپ سے پہلے والوں نے کوئی پانی صاف کرنے کے پلانٹ وغیرہ لگوائے تھے۔ تھر واسیوں کی پیاس بجھانے کے بعد اب آپ کو تھر کی پیاس بجھانے کی بھی سوجھی ہے۔ اللہ کرے تھر کے سبزے میں کوئی سبز قدم حائل نہ ہو۔
انگریزی میں آپ نے کچھ ایسی بات بھی کہی کہ اکیلا چلوں گا تو تیز چلوں گا لیکن سب کو ساتھ ملا کر چلوں گا تو دور تک چلوں گا۔ صاحب سب کو ساتھ ملا لیا تو آپ کو آگے بڑھنے کون دے گا؟ یہ انگریزی کی کہاوتیں انگریزوں کے ہاں ہی اچھی لگتی ہیں۔ دور تک جانا ہے تو اکیلے ہی قدم بڑھائیں۔
آگاہ کیا، بس اتنا پروٹوکول لوں گا جتنا حفاظت کے لیے ضروری ہو۔ اب اس ‘ضرورت’ کا تعین کون کرے گا ؟ اور ساتھ ہی کہا۔۔۔ چاہتا ہوں سندھ کا ہر شہری خود کو محفوظ سمجھے۔ پہلے خود کو تو محفوظ سمجھ لیجیے۔ کرپشن کے ماضی کا ذکر کر کے بھی اچھا کیا۔ کہ یہ تو انیس سو سینتالیس سے ہے۔ قائد اعظم نے بھی اپنی تقریر میں کرپشن کے خاتمے کا ذکر کیا تھا۔ جو چیز جتنی قدیم ہو اس کی قدر تو اتنی ہی زیادہ بڑھ جاتی ہے۔ اور جو چیز قائد اعظم اپنے ایک سالہ دور میں ختم نہ کر سکے، وہ آپ اتنے سال میں کیسے کر سکتے ہیں؟ اس کے لیے تو پالیسی نامی شے بنانا پڑتی ہے۔ لہذا نہ کرپشن کا اعتراف ہوگا، نہ خاتمے کی کوششیں ہوں گی۔ نہ نو من تیل ہو گا، نہ رادھا ناچے گی۔
سندھ والوں کو تعلیم دینے کا خیال بھی خوب ہے۔ کہیں پورا ہو گیا تو ہر کسی کو شعور آ جائے گا۔ یہ شعور کوئی اچھی چیز نہیں ہوتی۔ پرہیز ہی بہتر ہے۔ اور پھر ہر استاد کو بچوں کو پڑھانا پڑے گا۔ وہ جو گھر بیٹھے تنخواہیں لے رہے ہیں، ان بے چاروں کا کیا بنے گا؟
اپنے والدین کو یاد کرتے آپ آبدیدہ ہو گئے۔ وہ بھی آپ کو وزیراعلیٰ بنتے دیکھتے تو کتنا خوش ہوتے۔ اچھا کیا آپ نے صرف اپنے والدین کو ہی یاد کیا۔ سندھ میں بے امنی اور صحت کی سہولیات نہ ہونے سے مرنے والوں کو یاد نہ کیا۔ اس ننھی بیمار بسمہ کو یاد نہ کیا جو آپ کے لیڈر بلاول بھٹو کے پروٹوکول کی نذر ہو گئی تھی۔ زندہ ہوتی تو ایک سال اور بڑی ہو گئی ہوتی۔
خیر چھوڑیں یہ باتیں۔ آئیں بھنگ پیتے ہیں، ایمان سے سرور آ جائے گا۔
کل سے طبعیت کچھ مکدر ہے، دنیا کی بے ثباتی پر یقین مزید پختہ ہوگیا. ثبات صرف تغیر کو ہے، اس فقرے پر اگر ایمان متزلزل تھا تو وہ کیفیت اب نہیں رہی۔ ایک چیز کو آپ اور آپ کے ابائو اجداد دیکھتے آرہے ہوں تو اس کے بچھڑنے کا غم انسان کو کھوکھلا کر دیتا ہے، انسان خالی الذہن ہوجاتا ہے، اسے کچھ سجھائی نہیں دیتا، یہی کچھ میرے ساتھ قائم علی شاہ صاحب کے استعفے کی بات سن کر ہوا ہے۔ یوں لگ رہا ہے کہ کوئی بہت اپنا بہت دور جارہا ہے۔ اس کے بغیر زندگی کیسے ہوگی یہ سوچ ہی محال لگ رہی ہے۔
وزیر اعلی پنجاب میاں محمد شہباز شریف کی بے پناہ محنت اور نتائج پیدا کرنے کی سعی نے اکثر پاکستانیوں کو متاثر کیا ہے اور یہ ثابت کیا ہے کہ وہ ایک محترک سیاسی شخصیت اور قوت فیصلہ سے مالا مال ہیں. اسی خصوصیت نے انھیں دوسرے سیاستدانوں اور وزرائے اعلیٰ سے ممتاز بنا دیا ہے. انہوں نے دوسرے تمام محکموں کی طرح محکمہ پولیس میں بھی بہت سے اچھے اور مثبت اقدامات کیے ہیں، تھانوں کو مظلوں کے لیے دارالامن اور مجرموں کے لیے قید خانہ بنانے کا تصور قابل تحسین ہے مگر افسوس کہ اس کے باوجود جرائم پر قابو پایا جا سکا ہے نہ پولیس کا قبلہ درست ہوا ہے.
سید قائم علی شاہ جیلانی کا شمار پاکستان کے ان سیاست دانوں میں ہوتا ہے جنھوں نے اپنی سیاست کا آغاز نچلی سطح سے کیا اور اللہ نے بہت جلد انھیں عروج دیا مگر انھوں نے اس عروج کو کبھی لوگوں کے استحصال یا انتقام کے لیے استعمال نہیں کیا. اس کی واضح مثال یہ ہے کہ لوگوں نے سید قائم علی شاہ جیلانی کی بزرگی کی تذلیل کرتے ہوئے انھیں کبھی سکندر اعظم اور کبھی فرعون کا ساتھی، کبھی سندھ میں محمد بن قاسم کے استقبالی قافلے کا سالار اور کبھی موہنجو دوڑو کے آثار قدیمہ کا حصہ قرار دیا، یہاں تک کہ عزرائیل سے موت و حیات کے حوالے سے مکالمہ بھی کرادیا گیا مگر اس شریف النفس انسان نے کھی شکوہ یا شکایت نہیں کی۔ لوگوں نے ان کی خلوت اور جلوت کی ذاتی زندگی کو بھی معاف نہیں کیا۔ ان کی بزرگی کی وجہ سے ان کے سونے اور جاگنے کے عمل کو بھی مذاق بنایا گیا، ایسا کرنے والوں میں ان کے اپنے اور بیگانے سب شامل تھے، الیکٹرونک ممیڈیا نے تو حد کردی ۔ کسی نے یہ نہیں دیکھا کہ بزرگی قدرت کا انعام ہے اور اس عمل سے ہر انسان نے گزرنا ہے۔