Category: دلیل

کئی ماہ پہلے کی بات ہے، عالمی شہرت یافتہ موٹی ویشنل سپیکر اور مائنڈ میپ تکنیک کے بانی ٹونی بوزان کا انٹرویو کرنے کا موقع ملا۔ ٹونی کے ساتھ تین چار گھنٹوں کی نشست رہی، جس کے دوران کئی کتابوں کے مطالعہ سے بھی زیادہ باتیں سیکھیں۔ ٹونی بوزان نے سکندر اعظم کا واقعہ سنایا کہ جب وہ کوئی معرکہ جیت جاتا تو تھکا ہارا اور کبھی زخمی ہونے کے باوجود اپنے شاہی خیمے میں نہ جاتا۔ سکندر عام سپاہی کا لباس پہن کر اپنے چہرے پر کچھ کالے نشان لگا لیتا تاکہ پہچانا نہ جائے اور پھر لشکر کے مختلف حصوں میں جاتا۔ عام سپاہیوں کے ساتھ بیٹھتا، ان کی تکلیف کو محسوس کرتا، ان کے مائنڈ سیٹ اور احساسات کا اندازہ کرتا۔ باتوں باتوں میں ان سے جنگ کا فیڈ بیک لیتا اور پھر رات گئے اپنے خیمے میں جا کرغسل کرتا، شاہی لباس پہن کر باہر آتا، سپاہیوں کو جمع کرتا، ایک چبوترے پر کھڑا ہو کر ان سے خطاب کرتا اورکہتا: ”آج ہم جنگ جیت گئے ہیں، مگر مجھے اندازہ ہے کہ لڑائی کتنی سخت رہی، تمہارے کچھ دوست کام آئے، کچھ زخمی ہوئے، تم لوگوں کا بھی لہو بہا، مجھے اس کا اندازہ ہے۔ میں بھی تمہارے ساتھ ہی تھا، میرا بھی خون نکلا، میرے بھی عزیز دوست نشانہ بنے، مگر آخری نتیجہ یہ نکلا کہ ہم جنگ جیت گئے۔ اپنی غلطیوں کو ہم نہیں دہرائیں گے اور اگلی جنگ اس سے بہتر انداز میں لڑیں اور جیتیں گے‘‘۔ اس کے بعد سکندر اعلان کرتا کہ اگلے تین دن جشن کے ہیں۔ کسی سپاہی پر کوئی روک ٹوک نہیں، خوب کھاؤ پیو، جو مرضی آئے کرو، جی بھر کر جشن مناؤ۔ اس انداز میں سپاہیوں کے دلوں کو چھونے، ان کے دکھ درد میں شریک ہونے کی وجہ سے یونانی فوج سکندر کو دیوتا مانتی اور اس کے پسینے پر خون بہانے کو تیار رہتی۔

عمران خان نے بدھ کو یوم تشکر منانے کا اعلان کیا۔ مجھے خیال آیا کہ کیا یوم تشکر منانے سے پہلے گزری رات عمران خان نے بھی اپنی پالیسیوں، حالیہ حکمت عملی کا تجزیہ کیا یا یہ رات بھی عام راتوں کی طرح گزرگئی؟

عمران خان کی حکمت عملی کا تجزیہ کیا جائے تو بعض چیزیں اس نے حاصل کی ہیں اور کچھ نقصانات بھی ہوئے۔

سب سے اہم یہ کہ وہ ایک بار پھر حقیقی اپوزیشن لیڈر بن کر ابھرا۔ اس پورے احتجاج کے دوران ملک بھر پر یہ واضح ہوگیا کہ اچھا یا برا، جذباتی یا دانشمند، کم عقل یا عقلمند کی بحث سے قطع نظر اپوزیشن لیڈر وہ اکیلا ہی ہے۔ واحد شخص ہے جو میاں نواز شریف کی حکومت کو ٹف ٹائم دے سکتا اور اپنی کمزور تنظیم کے باوجود ان پر دباؤ ڈال سکتا ہے۔ اپوزیشن کی دوسری جماعتیں ایک بار پھر پیچھے چلی گئی ہیں، خاص کر پیپلزپارٹی کو شدید دھچکا پہنچا۔ پنجاب سے پہلے ہی فرینڈلی اپوزیشن کی وجہ سے پیپلزپارٹی کا صفایا ہوچکا، اب بلاول بھٹو کو میدان میں اتار کر اور اس سے جذباتی تقاریر کروا کے کچھ ماحول بنانے کی کوشش کی جا رہی تھی۔ پہلے یہ کہا کہ ستائیس دسمبر سے پیپلز پارٹی لانگ مارچ شروع کرے گی، پھر جب دیکھا کہ عمران بہت آگے نکل گیا ہے اور کہیں میدان مار نہ لے تو پھر جلد بازی میں سات نومبر سے احتجاج کرنے کا اعلان ہوا، مگر اب تحریک انصاف کا احتجاج ختم کرنے سے پیپلزپارٹی کے پاس کچھ نہیں بچا۔ جماعت اسلامی کو بھی دھچکا لگا؛ حالانکہ جماعت نے اس حوالے سے کچھ بھاگ دوڑ کی تھی۔ سپریم کورٹ میں وہ سب سے پہلے گئے، سراج الحق واحد سیاسی لیڈر تھے جو یکم نومبر کو سپریم کورٹ پہنچے۔ کرپشن کے خلاف جماعت احتجاجی جلسے بھی کر رہی ہے؛ تاہم سپریم کورٹ میں بڑا فریق تحریک انصاف ہے، کریڈٹ بھی اسی کو جائے گا۔

عمران خان کا دوسرا بڑا کارنامہ یہ ہے کہ وہ پڑھے لکھے پروفیشنلز کو عملی سیاست میں لے آیا۔ یہ پڑھا لکھا طبقہ ہر معاشرے کی کریم ہوتا ہے۔ ڈاکٹر، انجینئر، چارٹرڈ اکائونٹنٹ، آئی ٹی پروفیشنلز، سافٹ ویئر ڈویلپرز، اداکار، فیشن ڈیزائنر، ٹیچر اور دیگر شعبوں کے پڑھے لکھے لوگوں کو صرف تحریک انصاف ہی سیاست کی طرف کھینچ لائی ہے۔ پہلے یہ صرف ووٹر تھے، اب پہلی بار انہیں ماریں کھانے اور پولیس کی آنسو گیس شیلنگ کا بھی تجربہ ہوا۔

تیسری کامیابی ممکنہ پاناما کمیشن کے حوالے سے ہے۔ عمران خان نے اپنے دباؤ کے ذریعے تین چار وہ باتیں حکومت سے منوا لی ہیں جو اس سے پہلے نوازشریف صاحب ماننے کو قطعاً تیار نہیں تھے۔ مثال کے طور پر میاں صاحب اپنی مرضی کا کمیشن بنانا چاہتے تھے، اب یہ کمیشن سپریم کورٹ کی مرضی سے بنے گا۔ حکومت اس کمیشن کا دائرہ کار متعین کرنے پر بضد تھی، اب یہ دائرہ کار سپریم کورٹ طے کرے گی۔ میاں صاحب اور ان کے اتحادیوں کی یہ بھرپور کوشش تھی کہ اگر کمیشن بن جائے تو اس کا فیصلہ حکومت پر بائنڈنگ نہ ہو، سپریم کورٹ نے پہلی شرط ہی یہ منوائی کہ دونوں فریق اس کا فیصلہ مانیں گے۔ پاناما لیکس والے معاملے کو سات آٹھ ماہ ہوگئے، ابھی تک میاں نوازشریف کی طرف سے اس کا کوئی باقاعدہ جواب آیا تھا اور نہ ہی وہ ٹی او آرز طے کرنے دے رہے تھے، اب حکومت یہ جواب دینے کی پابند ہے اور ٹی او آرز کے حوالے سے بھی حتمی فیصلہ سپریم کورٹ کا ہوگا۔

عمران نے خاصا کچھ کھویا بھی ہے۔ سب سے اہم یہ کہ تحریک انصاف کی تنظیمی کمزوریاں بری طرح ایکسپوز ہوئیں۔ درست کہ پنجاب حکومت نے بڑی بے رحمی سے تشدد کیا اور پکڑ دھکڑ کی، مگر کسی بھی احتجاجی تحریک میں ایسا ہی ہوتا ہے۔ اپوزیشن اسے ناکام بنانے کی کوشش کرتی ہے۔ تحریک انصاف ایسا نہیں کر سکی۔ یہ ایک حقیقت ہے جو انصافی کارکنوں کو تسلیم کرنی چاہیے۔ وہ کوئی ایک شہر بھی بند کرنے کی سکت اور استعداد نہیں رکھتے۔ پنجاب سے جتنے لوگ نکلنے چاہیے تھے، نہیں نکل پائے۔ ایک بڑی وجہ یہ بھی تھی کہ جن لیڈروں نے اپنے شہروں سے کارکنوں کو موٹی ویٹ کر کے باہر نکالنا تھا، وہ سب تو بنی گالہ پہنچ گئے تھے۔ وقت سے پہلے ان کے جانے کی کوئی تک نہیں تھی۔ اگر خیبر پختونخوا کے وزیراعلیٰ جلوس لے کر نہ چلتے تو تحریک انصاف کی احتجاجی تحریک کا بھرم بھی رکھنا ممکن نہیں تھا۔ عمران خان کی اپنی پالیسی بھی سمجھ نہ آنے والی تھی۔ انہیں اب عوامی سیاسی لیڈر بننے کے گر سیکھنے چاہییں۔ انہیں باہر نکل کر اپنے کارکنوں کا ساتھ دینا اور پولیس کے ساتھ سینگ پھنسانے چاہییں۔ نجانے وہ کیوں دو نومبر کے چکر میں گھر بیٹھے رہے جبکہ پورے ملک میں کارکن مار کھا رہے تھے،گرفتاریاں دے رہے تھے۔ خاص کر جب بنی گالہ کے باہر خواتین تک کو پولیس پکڑ رہی تھی، تب عمران خان کو باہر آنا چاہیے تھا۔ ان کے اس رویے سے بہت سوں کو مایوسی ہوئی۔ یہ بھی واضح ہوگیا کہ تحریک انصاف کے رہنماؤں کی پہلی، دوسری صف میں خاصی صفائی کی ضرورت ہے۔ علی امین گنڈا پور جیسے لوگوں سے فوری طور پر جان چھڑا لینی چاہیے۔ ایسی بدنامی پر ایک کیا ایم پی اے کی کئی سیٹیں قربان کی جا سکتی ہیں۔ تحریک انصاف کونئے سرے سے اپنی حکمت عملی بنانے کی ضرورت ہے، اس پر ان شاء اللہ تفصیل سے بات ہوگی۔

اس وقت صورتحال یہ ہے کہ میاں نواز شریف صاحب نے پاکستان کے انتخابی نظام میں موجود خامیوں کو پوری طرح سمجھ لیا ہے اور وہ اس پوزیشن میں آ چکے ہیں کہ الیکشن Manipulate کر کے اپنی حکومت قائم کرسکیں۔ انہیں پنجاب کے مخصوص شہروں سے ہی اتنی نشستیں مل جاتی ہیں کہ وہ صوبے کے دیگر حصوں سے تھوڑے سے مفاد پرست سیاست دانوں کو ملا کر حکومت بنا سکتے ہیں۔ اگر کوئی کمی بیشی ہو جائے تو آزاد امیدواروں کی بڑی تعداد کاسہ گدائی ہاتھ میں تھامے ان کے در پر بیٹھی ہوتی ہے۔

1985ء سے پنجاب پر ان کے خاندان کی حکمرانی ہے، جس کی وجہ سے یہاں کے دانشوروں کی ایک بڑی کھیپ وہ خرید چکے ہیں۔ بیوروکریسی ان کے انگوٹھے کے نیچے تڑپ تڑپ کے نیم جان ہو چکی، عدلیہ میں ان کے ممنون احسان لوگوں کی شمولیت کئی دہائیوں سے مسلسل جاری ہے۔ یہی لوگ آگے جا کر ہائیکورٹ اور سپریم کورٹ کے ججز بنتے ہیں۔ یہ تمام عناصر مل کراس پنجابی اشرافیہ کی تشکیل کرتے ہیں جس سے جنوبی پنجاب اور ملک کے تین دوسرے صوبوں میں شدید نفرت کی جاتی ہے۔ اشرافیہ کے اس گروہ میں سرمایہ داروں کو بھی شامل کرلیں تو یہ ایک بہت طاقتور مافیا بن جاتا ہے جس کے لیے نواز شریف کے حق میں انتخابی نظام ہائی جیک کر لینا بائیں ہاتھ کا کھیل ہے۔

تاہم اشرافیہ کا یہ کلب صرف اتنا ہی نہیں کرتا بلکہ نواز شریف کی حکومت کے اردگرد ایک طاقتور حصار بھی قائم کر لیتا ہے۔ یہ حصار ایک کثیرالسطحی (Multi-layered) نظام ہے۔ ہرسطح حکومت پر ہونے والے وار خود پہ سہتی ہے جس کی وجہ سے حملہ آور حصار کی ہر دیوار پر اپنی توانائیاں خرچ کرتے کرتے جب آخری سطح تک پہنچتا ہے تو نیم جان ہو چکا ہوتا ہے۔ اس حصار کا پہلا دائرہ بیوروکریسی ہے جو شہر اور قصبے کی سطح پر طاقتور برادریوں کو اپنے ہاتھ میں رکھتی ہے۔ دوسری سطح پولیس کی ہے جس کے ذریعے مخالفین کی سرکوبی کی جاتی ہے۔ اس نظام کی سب سے آخری سطح عدلیہ ہے جو اس وقت میدان عمل میں آتی ہے جب حملہ آور اپنی توانائیاں خرچ کر کے واپسی کا باعزت رستہ مانگ رہا ہوتا ہے۔ پچھلے دھرنے میں عمران خان نے اس سطح کو بھی روند ڈالا تھا لیکن اس وقت تک اس کا غنیم اس قدر نڈھال ہو چکا تھا کہ نواز شریف پر آخری حملہ کرنے کی طاقت ہی نہیں بچی تھی۔

نوازشریف نے بھی مارٹن لوتھر کی طرح تمام عمر ایک خواب دیکھا ہے مگر اس کی نوعیت یکسر مختلف ہے۔ وہ ہر صورت فوج کو ایک مغلوب حالت میں اشرافیہ کے اس کلب کا حصہ بنانا چاہتا ہے۔ اسے بخوبی معلوم ہے کہ جونہی فوج اس کی گرفت میں آ گئی، اس کے خاندان کو اگلی کئی نسلوں تک حکمران رہنے سے کوئی نہیں روک سکتا۔ باقی صوبے جتنے بھی ناراض رہیں، فوج کے ذریعے انہیں اپنی اوقات میں رکھنا ممکن ہو جائے گا۔ اس کے ساتھ ساتھ اسے چیلنج کرنے والا کوئی بھی ادارہ باقی نہیں رہے گا۔ اس کے برعکس فوج یہ سمجھتی ہے کہ وہ خود اشرافیہ کے اس کلب کا حاکم بننے کا حق رکھتی ہے۔ اقتدار کے کیک کو وہ بطور ایک غالب فریق کے کھانا چاہتی ہے۔ اسے کوئی اعتراض نہیں کہ اس کیک کے کچھ ٹکڑے نوازشریف اور باقی ادارے لے جائیں۔ اقتدار کی غلام گردشوں میں جاری اس کشمکش کی شاخسانے مسلسل ہمارے سامنے احتجاجی تحریکوں کی صورت میں آتے رہتے ہیں۔

نواز شریف کے اس سارے ماڈل میں ایک اہم خامی ہے۔ اقتدار کے کھیل میں شامل دیگر سیاست دان یہ جانتے ہیں کہ انتخابی نظام کی خرابیاں انہیں کبھی اقتدار میں نہیں آنے دیں گی۔ وہ نہ ہی طویل عرصہ سے پنجاب پر حکمران رہے ہیں جس کی وجہ سے بیوروکریسی ان کے حق میں کام کرے اور نہ ہی عدلیہ میں اپنے لوگ شامل کرا سکے ہیں۔ اس کا نتیجہ یہ نکلتا ہے کہ وہ اقتدار میں آنے کے چور رستے تلاش کرنے پر مجبور ہو جاتے ہیں۔ یہی وجہ ہے کہ نواز شریف کا دور اقتدار کبھی بھی پرسکون نہیں ہوتا۔ دیگر سیاست دان فوج سے ہاتھ ملا لیتے ہیں اور حکومت کو مسلسل دباؤ میں رکھتے ہیں۔ نواز شریف پر جب بہت دباؤ آجائے تو وہ فوج سے سمجھوتہ کر لیتا ہے جبکہ باقی سیاست دان صرف وعدہ فردا پر ہی ٹرخا دیے جاتے ہیں۔

عمران خان کی پارلیمنٹ سے بےزاری اور فوج کی طرف واضح رجحان اس بات کی نشاندہی کرتا ہے کہ وہ انتخابی نظام سے اپنی امیدیں ختم کر بیٹھا ہے، تاہم چونکہ وہ خود سر انسان ہے، اس لیے فوج اسے حکومت میں لانے سے ہچکچاتی ہے۔ یہ بات اب یقینی نظر آتی ہے کہ فوج اور نواز شریف ایک فیصلہ کن جنگ کی طرف بڑھ رہے ہیں۔ شاید عمران خان اسی وقت کا منتظر ہے جب اس جنگ کا فائنل راؤنڈ شروع ہو اور اسے اقتدار کی غلام گردشوں میں داخل ہونے کا موقع مل سکے۔

میں اکثر سوچتا ہوں کہ اگر نواز شریف کی جگہ کوئی مدبر سیاست دان اقتدار میں ہوتا تو وہ انتخابی نظام کو شفاف بنانے کی کوشش کرتا اور اداروں کو خودمختاری دیتا تاکہ اقتدار کے دیگر کھلاڑیوں کے پاس اپنی قسمت آزمائی کے لیے ایک ایسا میدان موجود رہے جہاں وہ اپنی کارکردگی کی وجہ سے میچ جیت سکیں۔ اس سے غیر ضروری جھگڑے پیدا نہ ہوتے اور ملک ترقی کی جانب گامزن رہتا۔ لیکن شاید ابھی ایک لمبا انتظار ہمارے نصیب میں لکھا ہے۔ اس وقت تک اس ساری کشمکش کو میں جمہوریت کا نام دینے سے گریزاں ہی رہوں گا۔

شام سے ایک ہی سوال دریچہ دل پر دستک دے رہا ہے، کیا عمران خان ناکام ہوئے؟ پانامہ لیکس پر عمران خان کی ساری جدوجہد کا حاصل کیا ہے؟ وہ کامیاب ہوئے یا بری طرح ناکام؟ عمران خان کو میں نے کبھی’گنجائش‘ نہیں دی بلکہ بعض اوقات تو کچھ زیادہ ہی شدت سے میں نے انہیں تنقید کا نشانہ بنایا ہے لیکن جہاں تک اس سوال کا تعلق ہے، میری رائے میں وہ اپنی جدوجہد کے باب میں کامیاب اور سرخرو ہیں۔ اور یہ کامیابی اتنی غیر معمولی ہے کہ وہ مبارک کے مستحق بھی ہیں۔ ایک ایسے عالم میں جب ان کے تازہ فیصلے پر طنز و تشنیع کے تیر برسائے جا رہے ہیں، اپنے اس ناقد کی جانب سے وہ مبارک قبول فرمائیں۔

عمران خان کی کامیابی کیا ہے؟ میں عرض کر دیتا ہوں۔

1۔ ان کی پہلی کامیابی یہ ہے کہ نظام کی خرابیوں کے خلاف انہوں نے عوام میں جو شعور پیدا کیا اسے آخری مرحلے میں اداروں کی مضبوطی کے قالب ڈھال دیا۔ ایسا نہیں کیا کہ لوگوں کو نظام سے متنفر کر کے کسی انتہا کی طرف دھکیل دیا ہو۔ انقلابی تصورات کے حامل گروہ بالعموم اسی انتہاء کا شکار ہو جاتے ہیں اور بغاوت پر اتر آتے ہیں یا پھر وہ اپنے تصورات کی ایک الگ دنیا آباد کر کے اس میں یوں بسیرا کرتے ہیں کہ معاشرے کے لیے اجنبی ہو جاتے ہیں۔ عمران اس نظام کو چیلنج بھی کر رہا ہے لیکن ان دونوں انتہاؤں سے بھی اپنے وابستگان کو بچا رہا ہے۔ وہ نظام کی خرابیوں کو للکار رہا ہے لیکن اس کی یہ للکار کسی انارکی کی شکل اختیار کرنے کے بجائے سپریم کورٹ کی بات مان کر اداروں کی طاقت میں اضافہ کر رہی ہے۔ وہ نظام کی خرابیوں کا خاتمہ چاہتا ہے لیکن کسی غیر فطری طریقے سے نہیں بلکہ ایک آئینی طریقے سے اور اداروں کو مضبوط کر کے۔ اس توازن کو قائم رکھنا کیا یہ معمولی کامیابی ہے۔

2۔ بعض ناقدین کی جانب سے کہا جا رہا ہے کہ عمران نے حاصل کیا کیا؟ یہ سب کچھ تو وزیر اعظم پہلے ہی آفر کر رہے تھے۔ یہ بات درست نہیں ہے۔ ٹی او آرز پر حکومت مان کر نہیں دے رہی تھی۔ اسے اپنے ٹی او آرز پر اصرار تھا۔ اس نے معاملہ سپریم کورٹ کو بھیجا تو ٹھوس اعتراضات کے ساتھ عدالت نے واپس بھجوا دیا۔ ایسے میں بات آگے کیسے بڑھتی۔اس وقت سپریم کورٹ کہہ چکی ہے کہ ٹی او آرز وہ خود بھی بنا سکتی ہے۔ میں نے دو ہفتے قبل عمران خان سے سوال کیا کہ حکومت آپ کا وہ کون سا مطالبہ مان لے تو آپ اسلام آباد دھرنا منسوخ کر سکتے ہیں۔ ان کا جواب تھا ’’حکومت ا پنے ٹی او آرز پر اصرار نہ کرے، اپوزیشن کے ٹی او آرز مان لے تو دھرنا منسوخ کیا جا سکتا ہے‘‘۔ اس وقت جب دھرنا منسوخ ہوا ہے عملا یہی صورت حال ہے کہ اب معاملہ حکومتی ٹی او آرز کے تحت نہیں دیکھا جائے گا۔ کیا یہ عمران خان کی کامیابی نہیں ہے؟

3۔ عمران خان نے یہ بھی ثابت کر دیا کہ اس کا مقصد تصادم یا لاشے گرا کر جمہوریت کا بستر گول کرنا نہیں بلکہ احتساب کی ایک بامعنی صورت گری ہے۔ انا کا قیدی بن جاتا تو تصادم کرانا اس کے لیے مشکل نہ تھا کہ ہر رہنما اپنے حصے کے بےوقوف ساتھ لے کر پیدا ہوتا ہے لیکن عمران نے دھرنا منسوخ کر کے بتا دیا کہ وہ یہ سب نواز شریف کی نفرت میں نہیں بلکہ بامعنی احتساب کے لیے کر رہا ہے۔ اب احتساب کی ایک صورت نظر آنا شروع ہو گئی ہے۔ اگرچہ اس میں بہت سے قانونی اور فنی مسائل ہیں لیکن بہرحال ایک سمت میں سفر شروع ہو گیا ہے اور قوموں کی زندگی میں تبدیلی دھیرے دھیرے ارتقاء سے آتی ہے، کسی راتوں رات آنے والے انقلاب سے نہیں۔ یہ سفر کبھی بار آور ثابت ہوا تو عمران خان کا شمار اس کے اولین نقوش میں ہو گا۔

احتساب کا جو سفر اب شروع ہوا ہے، یہ اگر سست روی کا شکار ہو جاتا ہے تو کٹہرے میں قاضی ہوگا، عمران خان نہیں۔
عمران خان پر تنقید ہوتی رہی ہے اور ہوتی رہے گی، لیکن فی الوقت اسے دل کی گہرائیوں سے مبارک۔
ویل پلیڈ عمران خان۔ تم ہارے نہیں ہو، تمہارا سفر امید کا سفر ہے۔ تمہاری پہاڑ جیسی غلطیوں کے باوجود یہ سفر جاری رہنا چاہیے۔

حکومتی اہل کار جو بھی کہیں آج سپریم کورٹ نے جو فیصلہ کیا ہے اس پر یقیناً اللہ تعالیٰ کا شکر ادا کرنا چاہیے۔ پچھلے چھ مہینوں سے حکومت جو کچھ کر رہی تھی، اس کے بعد آج جو کچھ ہوا یہ یقیناً حکومت کے لیے بہت بڑا سیٹ بیک ہے۔

جو لوگ یہ سمجھ رہے تھے کہ سپریم کورٹ آج ہی نواز شریف صاحب کو فارغ کر دے گی، وہ عدالتی نظام سے واقف نہیں ہیں۔ کسی بھی وکیل کو اس کی توقع نہیں تھی۔ نہ ہی قانوناً اس کی کچھ گنجائش تھی۔ اگر آج عدالت پٹیشنز خارج کر کے کہہ دیتی کہ معاملہ قابلِ سماعت نہیں ہے تو یہ حکومت کی فتح ہوتی۔ یاد رہے کہ سپریم کورٹ پہلے ایک دفعہ اس معاملے میں پڑنے سے پہلوتہی کرچکی تھی۔

جن کا یہ خیال ہے کہ عمران خان کو کمیشن پر راضی نہیں ہونا تھا، وہ یہ سوچ لیں کہ کیا اس کا مطلب سپریم کورٹ پر عدم اعتماد نہ ہوتا؟ اس کے بعد سپریم کورٹ اس معاملے میں کیا کرسکتی؟ یہ آپشن تو تب آتا ہے جب آپ ریاست کے پورے نظام کا انکار کر دیں۔

جن کا یہ کہنا ہے کہ کمیشن تو حکومت پہلے ہی بنا رہی تھی وہ یا خود ناسمجھ ہیں یا دوسروں کو سادہ لوح سمجھتے ہیں۔
چند پہلو یہ ہیں:
1۔ نواز شریف صاحب اپنی مرضی کا کمیشن بنانا چاہ رہے تھے. کورٹ نے کہا کمیشن ہماری مرضی کا ہوگا۔
2۔ نواز شریف صاحب کہتے تھے اس کمیشن کا دائرہ کار میں متعین کروں گا. کورٹ نے کہا ہم کریں گے۔
3۔ نواز شریف صاحب کی ساری کاوش یہ منوانے کےلیے تھی کہ کمیشن کا فیصلہ ان پر بائنڈنگ نہ ہو. کورٹ نے پہلے ہی ان سے ضمانت لی کہ فیصلہ وہ مانیں گے۔
4۔ نواز شریف صاحب نے آج تک نہ جواب دعوی دیا تھا نہ ہی ٹی او آر. کورٹ نے ان کو پابند کیا کہ پرسوں تک دونوں دینے ہیں ۔

عملاً تو سپریم کورٹ نے شریف صاحب کی ”تلاشی لینے“ کا کام شروع کر لیا ہے! کیس کی پہلی سماعت میں بندہ اس سے زیادہ کیا چاہتا ہے؟ اس لیے مقامِ شکر تو یقیناً ہے۔

جو کہتے ہیں اتنا پریشر بڑھانے کے بجائے آج تک انتظار کرنا چاہیے تھا، وہ اس پر غور کریں کہ اتنا پریشر نہ ہوتا تو شریفوں کی سفاکیت کا مظاہرہ کیسے ہوتا؟ خود غرضی کی یہ بدترین مثال کیسے قائم ہوتی کہ ذاتی مفاد کے لیے ایک صوبے سے دوسرے صوبے تک جانے کے تمام راستے اس دوسرے صوبے کی عین سرحد پر بند کر دیں اور پھر طاقت کا اتنا سفاک مظاہرہ بھی کریں؟ پھر یہ بھی سوچیں کہ کیا پھر کورٹ یہی فیصلہ کرتی؟ کمیشن بنانے کے مسئلے پر کورٹ کے سابقہ رویے اور آج کے رویے پر فرق تو امید ہے کہ اب صاف واضح ہوگا۔

یہی امید کی وہ کرن ہے جو مجھ جیسے رجائیت پسند لوگوں کو شکر پر ابھارتی ہے کیونکہ مجھے محسوس ہو رہا ہے کہ اس دفعہ کورٹ اور ریاستی ادارے واقعی تلاشی لینا چاہتے ہیں۔ یاد ہوگا۔ چند دن قبل میں نے اس خواہش کا اظہار کیا تھا کہ دھرنے کی نوبت بھی نہ آئے اور شریفوں سے جان بھی چھوٹ جائے۔ لگتا ہے کہ اللہ تعالیٰ نے میری سن لی ہے! فالحمد للہ علی ذلک

منگل کی سہ پہر فیس بک کھولی تو ہر جگہ یہی سوال بکھرا نظر آیا۔ کہیں اعلانیہ لفظوں میں اظہار، کہیں پر شاکڈ اور سیڈ کے علامات والے سٹیٹس، کہیں بغیر الفاظ کے حزن برستا نظر آیا۔ ناصر کاظمی کی زبان میں ”اداسی بال کھولے سو رہی تھی“۔ مسلم لیگ ن کے حمایتی جو رات تک گھبرائے ہوئے، چہرے پر مصنوعی مسکراہٹ سجائے تھے، آج ان کی خوشی سمائے نہیں سما رہی تھی۔ پرجوش، خوشی سے سرشار سٹیٹس۔ کہیں پر انصافیوں کو چٹکیاں لی جارہی ہیں تو کسی جگہ طنز کے تیر برسا کر اگلے پچھلے حساب چکائے جا رہے ہیں۔

صاحبو! مسلم لیگ ن کے متوالوں پر تو کوئی حیرت نہیں کہ وہ اپنی خوشی اور غم میاں صاحب بلکہ زیادہ درست یہ کہہ لیں کہ شاہی خانوادے سے وابستہ کر بیٹھے ہیں۔ میاں صاحب کی مسکراہٹ سے ان کے متوالے پرستار کھل اٹھتے ہیں، میاں کے جگمگاتا چہرہ غبار آلود ہوجائے، پیشانی پر پسینہ اور مسکراہٹ غائب ہو تو مسلم لیگی متوالوں کے لیے وہ روز ماتم بن جاتا ہے۔ حیرت تو مجھے تحریک انصاف کے کارکنوں، حمایتیوں پر ہے کہ وہ کس بات پر اداس، فرسٹریشن کا شکار اور خود کو لوزر سمجھ رہے ہیں؟

جہاں تک میں پچھلے دو ہفتوں کے اخباری بیانات، ٹی وی انٹرویوز اور فیس بک سٹیٹس سے سمجھا ہوں، تحریک انصاف کے قائد، رہنما، کارکن اور حامی اپنی احتجاجی تحریک دو تین نکات کی بنیاد پر چلا رہے ہیں۔ بنیادی نکتہ یہی ہے کہ پاناما لیکس کے بعد جوڈیشل کمیشن بننا چاہیے جو وزیراعظم نوازشریف اور دیگر لوگوں کے خلاف تحقیقات کرے، جن کے نام پاناما لیکس میں آئے ہیں۔ تحریک انصاف کا شروع دن سے یہی مطالبہ رہا کہ فوری طور پر جوڈیشل کمیشن بننا چاہیے جس کے ٹی او آرز ایسے ہوں کہ وزیراعظم کا نام تحقیقات کرنے والوں میں لازمی شامل ہو۔

دوسری طرف مسلم لیگ ن کا یہی جواب اور دلیل تھی کہ چونکہ پانامہ لیکس میں وزیراعظم کے بچوں کے نام آئے ہیں، وزیراعظم کا نہیں، اس لیے ان کے خلاف تحقیقات کا کوئی جواز نہیں، مسلم لیگ ن کمیشن بنانے پر تو رضامند تھی، مگر اس کے لیے وہ مطلوبہ قانون سازی کرنے کو تیار نہیں تھی اور وہ کمیشن کے ٹرمز آف ریفرنس (ٹی او آرز) کو دانستہ اس قدر پھیلانے پر اصرار کر رہی تھی کہ تحقیقات کے بعد نتیجہ جلدی نہ نکل سکے اور وزیراعظم کے خلاف کچھ فائنڈنگ نہ ہوسکے، بلکہ اس سے بھی بڑھ کر مسلم لیگ ن اپنے اتحادیوں اور پیپلزپارٹی جیسی فرینڈلی اپوزیشن پارٹی کے ساتھ مل کر ٹی ا و آرز کا معاملہ ہی اس قدر لمبا کھینچ گئی کہ دو تین ماہ اسی میں ضائع ہوگئے، پلاننگ غالباً یہی لگ رہی تھی کہ اس معاملے کو جتنا لمبا کھینچا جا سکے، کھینچا جائے، حتیٰ کہ پارلیمنٹ کی مدت ہی ختم ہوجائے۔

تحریک انصاف نے پارلیمنٹ میں ٹی او آرز ڈرامے میں ڈھائی تین ماہ ضائع کیے، جب اچھی طرح اندازہ ہوگیا کہ یہ سب ڈرامہ بازی ہے، جس میں پیپلزپارٹی بھی کھل کر شامل ہے اور متحدہ اپوزیشن کی چھتری دراصل میاں صاحب کو سپورٹ فراہم کرنے کے لیے ہے تو پھر عمران خان الگ ہوگئے۔ رائے ونڈ میں عمران خا نے ایک الگ جلسہ کیا۔ مزے کی بات ہے کہ اسی روز عمران خان کی خیبر پختون خوا میں اتحادی جماعت اسلامی نے فیصل آباد میں جلسہ رکھا اور تقریروں کا وقت کم وبیش بھی تحریک انصاف کے جلسے والا رکھا۔ عمران کا شو کامیاب رہا اور پھر اس نے اسلام آباد جانے اور شہر بند کرنے کی دھمکی دی اور پھر اس جانب عملی اقدامات بھی کیے۔

عمران خان اور تحریک انصاف پچھلے کئی روز سے ایک ہی بات کہتی رہی کہ میاں صاحب یا تو استعفا دیں یا پھر تلاشی دیں۔ تلاشی کی اصطلاح تحریک انصاف نے خاص طور سے گھڑی، مطلب اس کا یہی تھا کہ میاں صاحب جوڈیشل کمیشن بننے دیں اور اس کی تحقیقات کا سامنا کریں، سپریم کورٹ میں بھی تحریک انصاف اسی لیے گئی تھی، تاہم رائیونڈ جلسے کے بعد اس نے عوامی احتجاج کی پالیسی پر زیادہ فوکس کر دیا۔

اب یہ دیکھا جائے کہ آج ہوا کیا ہے؟ آج تین کام ہوئے۔

سپریم کورٹ نے ایک بڑے خوفناک ٹکراؤ کو روک دیا، حکومت کو کنٹینر وغیرہ ہٹانے کا کہہ دیا، تحریک انصاف کو ایک جگہ دے دی کہ وہاں اپنا احتجاج یا جو بھی کرنا ہے کرو، تیسرا اور سب سے اہم نکتہ یہ کہ پانامہ کی تحقیقات کے لیے کمیشن کا مطالبہ مان لیا بلکہ اس کیس کی تیز رفتار سماعت کا عندیہ بھی دے دیا۔ کمیشن کے لیے حکومت وکیل کو صرف دو دن کا وقت دیا گیا، تین نومبر کو اگلی سماعت ہے اور توقع ہے کہ تیزرفتاری سے ایک بااختیار کمیشن بن جائے گا۔ اب وہ کمیشن کیا تحقیقات کرتا ہے، اس سے کیا ثابت ہوتا ہے، نہیں ہوتا ہے، یہ ایک الگ ایشو ہے، اس بارے میں ابھی کچھ نہیں کہا جا سکتا۔

میرا سوال یہ ہے کہ کیا تحریک انصاف اسی ایشو کو لے کر نہیں کھڑی ہوئی تھی کہ وزیراعظم تلاشی دیں یعنی پانامہ کے لیے کمیشن بنایا جائے۔ عدالت نے ان کا وہ مطالبہ مکمل کر دیا، ان کے لیے پرامن احتجاج کا بھی راستہ نکال دیا، حکومت اور انتظامیہ کو بھی تشدد اور جبر سے روک دیا۔ تو اس کے علاوہ تحریک انصاف اور کیا چاہتی تھی؟ یا عمران خا ن کو یو ٹرن خان کہنے والے کس حوالے سے تنقید کر رہے ہیں؟

یہ درست ہے کہ دباﺅ بڑھانے کے لئے عمران خان نے کئی سخت بیانات دیے، اسلام آباد لاک ڈاﺅن کرنے کی بات بار بار کی، جو کہ قطعی طور پر غلط تھا اور اس فقرے کی وجہ سے عمران خان پر تنقید بھی ہوتی رہی۔ میرے جیسے اس کے نیم ہمدرد بھی لاک ڈاﺅن یعنی شہر بند کرنے، انتظامیہ مفلوج کرنے کے زبانی بیانات کی مذمت اور اس پر تنقید کرتے رہے۔ ہمارا کہنا یہ تھا کہ عمران خان کو صرف جوڈیشل کمیشن کے لیے دباؤ پیدا کرنا چاہیے اور ایسا کچھ نہ کیا جائے، جس سے یہ سسٹم ڈی ریل ہوجائے۔

اگر عمران خان نے عقلمندی اور تدبر کا مظاہرہ کرتے ہوئے عدالتی مداخلت پر ہولناک ٹکراؤ کو روک دیا اور کل کے احتجاج کو یوم تشکر میں بدل دیا تو اس پر ناراضی کیسی؟ یہ تو خوشی کی بات ہے کہ ملک ایک بڑے ٹکراؤ سے بچ گیا اورایک پرامن، جائز، قانونی حل نکل آیا۔ اس پر تحریک انصاف کے حامیوں اور کارکنوں کو بھی خوش ہونا، سجدہ شکر بجا لانا چاہیے اور ن لیگی متوالوں کو بھی خوش ہونا چاہیے کہ کوئی بڑا ٹکراؤ، نقصان نہ ہوا اور پرامن حل نکل آیا۔

یہ یاد رہے کہ اگر کسی کے ذہن میں یہ پانامہ کمیشن بنوانے والا معاملہ نہیں تھا اور وہ ہر صورت میں نواز شریف حکومت کے خاتمے کا متمنی تھا تو پھر یہ بھی علم ہونا چاہیے کہ ایسا صرف اس صورت میں ہوسکتا تھا جب کچھ لاشیں گرتیں، خون خرابہ ہوتا اور فوج مداخلت کر کے یا تو کھلا مارشل لا لگا دیتی یا پھر کوئی غیر آئینی کردار ادا کر تے ہوئے وزیراعظم نواز شریف کو باہر نکال باہر پھینکتی۔ اس کے سوا کوئی بھی قانونی، آئینی، جائز آپشن موجود نہیں۔

اس لیے عمران خا ن کو یو ٹرن کہنے والے، احتجاج ختم کرنے کے اعلان پر مایوس ہونے والے، تنقید کرنے والے کھل کر یہ بتائیں کہ وہ دراصل ملک میں خون خرابے، لاشیں گرنے اور مارشل لا کی خواہش رکھتے تھے۔ میاں نواز شریف سے ان کی نفرت اور بیزاری اس قدر پہنچ چکی ہے کہ وہ میاں صاحب کی حکومت ہٹانے کے لیے یہ سب کشت وخون اور پورا سسٹم ڈی ریل ہوجانا بھی قبول کرنے کو تیار تھے۔

ایسا شخص اگر کوئی ہے تو وہ سامنے آ کر بات کرے۔ خاکسار کی تو کبھی یہ رائے نہیں تھی، اسی لیے ہم عمران خان کے ضرورت سے زیادہ جارحانہ رویے پر تنقید کرتے رہے، دھرنے، شہر بند کرنے کی دھمکی کو غلط کہتے رہے اور اسے پرامن احتجاج کے لیے ہی کہتے رہے۔ عدالت کی مداخلت پر عمران خان کی طرف سے احتجاج ختم کر دینا میرے نزدیک تو بہت اچھا، مثبت اقدام ہے۔

جہاں تک اس پورے معاملے میں تحریک انصاف، حکومت اور دیگر سیاسی جماعتوں کا تعلق ہے، انہوں نے کیا کھویا، کیا پایا؟ یہ الگ سوال ہے، اس پر الگ سے بات ہوگی۔ سردست تو پاکستانیوں کو مبارک ہو۔ اللہ نے رحمت کی اور ملک بڑے ٹکراؤ سے بچ گیا۔ اس میں کسی کی فتح وشکست نہیں ڈھونڈنی چاہیے۔ ویسے اگر اس میں شکست ڈھونڈنی ہی ہے تو وہ تمام فریقوں کو ہوئی ہے۔ فتح البتہ ملک کی ہوئی، آئین، عدلیہ اور جمہوریت کی ہوئی۔ اب آگے بڑھناچاہیے۔ کمیشن والے معاملے میں معمولی سی بھی تاخیر نہ کی جائے اور اس معاملے کو منطقی انجام تک پہنچنا چاہیے ۔

بدقسمتی سے برصغیر کے مسلمان عمومی طور پر اسلام کے قوانین اور احکامات سے ناواقف ہونے کی وجہ سے زندگی کے بہت سے معاملات میں غیر اسلامی قوانین اور رسوم و رواج پر عمل پیرا ہیں اور کئی مواقع پر گناہ کبیرہ کے بھی مرتکب ہوتے ہیں۔ سب سے زیادہ خراب حالت اُن مسلمانوں کی ہے جو اقلیت میں ہونے کی وجہ سے غیر مسلم حکمرانوں کے تسلط میں ہیں اور قانون سازی کے اختیارات میں اُن کا کوئی نمایاں حصّہ نہیں ہے اور عدلیہ بھی اُن لوگوں کے ہاتھوں میں ہے جو اسلام کے ساتھ کوئی سروکار نہیں رکھتے ہیں۔ ان مسلمانوں میں بھارت کے کروڑوں مسلمانوں کے ساتھ ساتھ متنازعہ جموں و کشمیر کے اُس خطّے میں بسنے والے مسلمان بھی شامل ہیں جس پر بھارت قابض ہے۔ بھارت کے سنگھاسن اقتدار پر فی الوقت جس تنظیم کا تسلط ہے وہ اسلام دُشمنی کے لیے بدنام زمانہ ہے اور بھارت کے مسلمانوں کی دینی شناخت کو ختم کرنے کے درپے ہے، اگرچہ اس سلسلے میں کانگریس کے دور حکومت میں بھی مسلمانوں پر کافی ظلم ہوا ہے۔ بر صغیر پاک وہند کی تقسیم سے قبل ہی ہندوستان میں انگریز حکمرانوں نے 1937ء میں مسلم پرسنل لا کے نام سے ایک قانون وضع کیا تھا جس کے تحت مسلمانوں کو اپنے عائلی معاملات میں شرعی احکامات کے تحت عمل کرنے کا اختیار دیا گیا تھا لیکن تقسیم ہند کے بعد آر ایس ایس اور جن سنگھ جیسی ہندوتوا فلسفے کی حامل تنظیموں نے مسلمانوں کی دینی شناخت کے ساتھ ساتھ اُن کے وجود کے خلاف بھی بڑے پیمانے پر سازشیں رچائیں اور ہزاروں کی تعداد میں فرقہ وارانہ فسادات کروا کے لاکھوں مسلمانوں کو تہہ تیغ کیا، اُن کی بستیوں کو تاراج کیا، اُن کے کاروبار کو برباد کروایا، اُن کو زندگی کے ہر شعبے میں پیچھے دھکیل دیا تا کہ وہ مجبور ہو کر اپنی شناخت سے ہی دستبردار ہو کر، آر ایس ایس کے منصوبے کے مطابق ہندو راشٹر کا حصہ بنیں اور ہندوانہ رنگ میں اپنے تہذیب وتمدن کی تشکیل نو کا سلسلہ شروع کریں لیکن اللہ تعالیٰ کے فضل سے یہ ہندو فرقہ پرست تنظیمیں اپنی گھناونی سازشوں کو عملانے میں ناکام رہیں اور مسلمان دینی لحاظ سے دن بدن بیدار ہوتے گئے اور اسلام کے قریب تر آنے لگے۔ اس سلسلے میں جہاں ادارۂ دیوبند اور دیگر مکاتب فکر سے وابستہ علماء اور درسگاہوں کا ایک اہم رول رہا وہیں پر اقامت دین کے نصب العین کی حامل ایک عالمگیر تنظیم ’’جماعت اسلامی‘‘ نے بھی نمایاں کارنامہ انجام دیا۔ درسگاہوں، خطابات اور لٹریچر کے ذریعے مسلمانوں کو اسلام کی اہمیت اور بنیادی تعلیمات سے واقف کرایا گیا۔ اگر چہ اس سلسلے میں قابل قدر کام کیا گیا ہے لیکن ابھی بہت کچھ کرنا باقی ہے۔

دنیا میں چند دین بیزار نظریات کو وقتی طور پر فروغ ملا اور مسلمانوں کا ایک طبقہ ان نظریات کی زد میں آگیا خاص کر جدید تعلیم یافتہ طبقہ ان گمراہ کن نظریات سے زیادہ متاثر ہوگیا اور اس طبقے نے ان دین دُشمن نظریات کو مسلمانوں میں بھی پھیلانے کی جی توڑ کوشش کی لیکن اس محاذ پر جماعت اسلامی علی الخصوص مولانا سید ابو الاعلیٰ مودودیؒ کے تیار کردہ لٹریچر نے وہ کام کیا جو ایک مضبوط بند سیلاب کے وقت انجام دیتا ہے اور اس طرح عام مسلمان اللہ کے خاص کرم سے گمراہی کے اس طوفان سے بچ نکلے۔ اس لٹریچر نے دین بیزاری کے اس طوفان کو توڑ کر رکھ دیا مگر دین بیزاری کے مہلک جراثیم ابھی بھی مسلم معاشرے میں موجود ہیں جن کو اسلام کی حقیقی تعلیمات کی اشاعت سے ہی بے اثر بنایا جاسکتا ہے۔ اس سلسلے میں دین پسند تعلیم یافتہ نوجوانوں کے ساتھ ساتھ علماء کرام اور انشوران ملت کی انتھک اور مخلصانہ کوششوں کی اشد ضرورت ہے تا کہ دور دراز دیہات میں بسنے والے عام لوگ بھی دین کی حقیقی تعلیمات سے آشنا ہوں اور دین مخالف نظریات اور اعمال سے مسلم معاشرے کو پاک کیا جاسکے۔

اسلام ایک مکمل ضابطہ حیات ہے اور جہاں اس میں ایک انسان کی کامیاب اور پُر سکون زندگی گزارنے کی مکمل رہنمائی موجود ہے وہیں پر اس میں معاشی، معاشرتی، عائلی اور سیاسی شعبوں کے لیے بھی اصولی قوانین موجود ہیں۔ عائلی زندگی میں نکاح، طلاق، وراثت، وصیت، نان ونفقہ وغیرہ اہم شعبہ جات کے متعلق مفصل قوانین قرآن وسنت اور تعامل صحابہ کرام ؓ سے اخذ کیے گئے ہیں لیکن ان کے متعلق عامۃ المسلمین کو اتنی جانکاری حاصل نہیں ہے جتنی ہونی چاہیے جس کے سبب ان معاملات میں مسلمان غیر شرعی طور طریقے کے عادی ہوگئے ہیں اور جاہلی رسوم ورواج پر عمل پیرا ہیں۔ آج کل بھارت کے لا کمیشن نے آر ایس ایس کے ایجنڈا کے ایک اہم حصّہ کو عملانے کی خاطر ’’جنسی مساوات اور برابری‘‘ کا ایک گمراہ کن نعرہ کھڑا کیا ہے جس کا اصلی ہدف ’’مسلمانوں کا عائلی قانون‘‘ ہے اور اسی نعرے کی آڑ میں اس قانون کو منسوخ کروا کے، مسلمانوں کی اسلامی شناخت کو زک پہنچانا ہے۔ اس طرح عالم انسانیت میں مسلمانوں کی امتیازی پہچان کو ختم کروانا ہے۔ ایک طرف بھارتی لا کمیشن نے ’’یکساں سول کوڈ‘‘ کے نفاذ کی خاطر تگ و دو کا آغاز کیا ہے دوسری طرف عدالتوں کے ذریعے مختلف بہانوں کے ذریعے مسلمانوں کی دینی شناخت کو ختم کروانے کی سازشوں کو بھی عملانے کا کام شروع کیا گیا ہے۔ کبھی ’’تعداد ازدواج‘‘ کا مسئلہ کھڑا کیا جاتا ہے اور کبھی ’’سہ طلاق‘‘ کا شوشہ چھوڑا جاتا ہے اور عورتوں کے ساتھ امتیازی سلوک کا رونا رویا جاتا ہے۔ اس کے لیے مسلمان سماج میں ایسے افراد تیار کیے جاتے ہیں جن کو نام کے بغیر اسلام کے ساتھ کوئی نظریاتی یا عملی وابستگی نہیں ہوتی ہے اور انہی کے ذریعے اسلامی قوانین کو ہدف تنقید بنایا جاتا ہے۔ کریم چھاگلہ، عارف خان، شاہنواز حسین، سلمان رشدی، تسلیمہ نسرین جیسے نام کے مسلمان استعمال کیے جاتے ہیں جو نہ صرف اسلام کی حقانیت کے منکرہیں بلکہ ایسے لوگوں نے دہریت اور ارتداد کے تمام حدود بھی پار کیے ہوتے ہیں۔

یہ اسلام ہی ہے جس نے عورت کو اس کے حقیقی مقام اور عزت و وقار سے ہم کنار کیا ہے۔ نکاح بھی ان ذرائع میں سے ایک اہم ذریعہ ہے جو عورت کی فطری ترقی اور عزت و ناموس کے محافظ اور ضامن کا کام انجام دیتے ہیں لیکن وہ نکاح جو مرد و عورت کے درمیان محبت و مودّت قائم کرنے میں ناکام ہوتا ہے اور اُن کے وقار و شرف کے لیے باعث ضرر بن جاتا ہے تو انسانی فطرت کا تقاضا ہے کہ ایسا نکاح قائم رکھنا باعث فتنہ و فساد ہی بن جاتا ہے اسی لیے ایسے نکاح سے خلاصی کے فطری طریقے بھی انسانی فطرت کے خالق نے خود عطا فرمائے ہیں۔ انہی طریقوں میں سے مرد کے لیے ایسے باعث ضرر ملاپ سے چھٹکارا حاصل کرنے کی خاطر ’’طلاق‘‘ کا اختیار دیا گیا ہے۔ مخصوص الفاظ کے ساتھ قید نکاح کو فی الفور یا بالنتیجہ اٹھا دینے کو طلاق کہتے ہیں۔ شوہر کی جانب سے اصالتاً یا وکالتاً، نیابتاً یا تفویضاً مخصوص الفاظ کے ساتھ یا بالکنایہ، فی الفور یا بالنتیجہ، رشتۂ ازدواج ختم کرنے کا نام طلاق ہے۔ رسول اللہ صلی اللہ علیہ وسلم نے طلاق کے متعلق یہ خبر دی ہے کہ اللہ کے نزدیک سب سے زیادہ ناپسند حلال (جائز کام) طلاق ہے۔

طلاق کی کئی قسمیں ہیں، بہ لحاظ کیفیت اور بہ لحاظ تاثیر،
بہ لحاظ کیفیت طلاق کی دو قسمیں ہیں، (۱)مسنون طلاق اور (۲) غیر مسنون طلاق
بہ لحاظ تاثیر طلاق کی تین قسمیں ہیں، (۱) طلاق رجعی، (۲) طلاق بائن صغریٰ اور (۳) طلاقِ بائن کبریٰ (مغلظہ) ۔

طلاق سنت کا مطلب یہ ہے کہ طلاق ایسے طریقہ پر دی جائے جس کو آنحضورﷺ اور صحابہ کرامؓ نے پسند فرمایا۔ اس طریقہ پر طلاق دینے سے کوئی ثواب نہیں ملتا البتہ موجب گناہ نہیں بنتا! طلاق دینے کا سب سے بہترین طریقہ یہ ہے کہ شوہر اپنی زوجہ مدخولہ ایسے طہر (حیض سے پاک ہوجانے کے بعد کا زمانہ) میں، جس میں اس سے صحبت نہ کی ہو اور نہ کوئی طلاق دی ہو اور نہ اس طہر سے قبل حیض میں طلاق دی ہو، ایک رجعی طلاق دے، پھر اس کو چھوڑ دے یہاں تک کہ اس کی عدت گزر جائے یا اگر حاملہ ہوتو وضع حمل ہوجائے۔ اس طلاق کو طلاق احسن کہتے ہیں۔ اس کے بعد جو طریقۂ طلاق بہتر سمجھا جا تا ہے وہ طلاق حسن ہے یعنی شوہر اپنی زوجہ مدخولہ کو ایسے طہر میں جس میں اُس سے صحبت نہ کی ہو ایک رجعی طلاق دے۔ پھر دوسرے طہر میں دوسری اور تیسرے طہر میں تیسری طلاق دے۔ اس طرح تین طہر میں تین طلاقیں مکمل ہوں گی۔

طلاق بدعت کا مطلب یہ ہے کہ طلاق ایسے طریقہ پر دی جائے جس کو آنحضورﷺ اور صحابہ ؓ نے پسند نہیں فرمایا ہے۔ ایسی طلاق جمہور مسلمانوں کے نزدیک واقع ہوجاتی ہے البتہ موجب گناہ ہے۔ اگر ایسے وقت میں طلاق دی جائے جب عورت حالت حیض میں ہو تو یہ غیر مسنون ہے مگر جمہور علماء (مذاہب اربعہ) کے نزدیک واقع ہوجاتی ہے۔ اسی طرح ایسے طہر میں طلاق دینا بھی غیر مسنون اور موجبِ گناہ ہے جس میں شوہر اپنی زوجہ سے صحبت کر چکا ہو۔ ایسے ہی ایک ہی طہر میں ایک طلاق دینے کے بجائے دو یا تین طلاقیں دینا بھی بدعی طلاق میں شامل ہونے کی وجہ سے موجب گناہ ہے لیکن جمہور علماء کے نزدیک طلاق ہوجاتی ہے۔ بیک وقت تین طلاقیں دینا عورت کے وقار کے خلاف ہے اور ایسا کرنا عورت کی عزت نفس کو زبردست زک پہنچانے کے مترادف ہے۔ عورت چونکہ ایک انسان ہے جس طرح کہ مرد، لیکن اس طرح طلاقیں دینا عورت کو ایک بازاری کھلونا سمجھنے کے برابر ہے۔ اس کے علاوہ یہ انتہائی توہین آمیز سلوک ہے جو کہ زن و شوہر کے مقدس رشتے کے شایان شان نہیں ہے۔ اس لیے ایسے شخص کے ساتھ رشتہ قائم رکھنا، رشتہ کے تقدس کے خلاف ہے۔ جب کوئی شخص اپنی زوجہ کو بیک وقت تین طلاقیں دے دے تو جمہور فقہا کے نزدیک تینوں طلاقیں واقع ہوجائیں گی لیکن شیعہ زیدیہ کے نزدیک ایک طلاق واقع ہوگی اور شیعہ امامیہ کے نزدیک کوئی طلاق واقع نہ ہوگی۔ اسی طرح ظاہر یہ صرف ایک طلاق واقع ہونے کے قائل ہیں۔ ایک مشہور واقعہ ہے کہ حضرت ابن عمرؓ نے اپنی زوجہ کو بحالت حیض ایک طلاق دی۔ پھر ارادہ کیا کہ باقی دو قروء میں آخری دو طلاقیں دیں کہ حضور اکرم ﷺ کو اس کی اطلاع پہنچی۔ آپﷺ نے فرمایا : اے ابن عمر تم نے سنت کے خلاف کیا، پھر ان کو اپنی زوجہ سے رجوع کا حکم دیا، حضرت ابن عمرؓ نے عرض کیا، یا رسول اللہﷺ ! یہ فرمائیے کہ اگر میں اپنی زوجہ کو تین طلاقیں دے دیتا تو کیا میرے لیے رجوع کرنا حلال ہوتا؟ حضورﷺ نے فرمایا: ’’نہیں! وہ تم سے بائنہ (جدا) ہوجاتی اور یہ عمل معصیت ہوتا ‘‘۔ (السنن الکبری۔ بیہقی)

بیک وقت تین طلاقیں دینا اللہ اور اس کے رسولﷺ کے نزدیک غیر مستحسن اور اخلاقی نقطہ نظر سے بھی ایک بُرا فعل ہے لیکن اس فعل کے کرلینے یعنی تین طلاقیں دینے سے وہ طلاقیں واقع ہوجائیں گی اور اس کا وہ فعل اپنے اثر ونتیجے کے اعتبار سے لازم ہوجائے گا۔

جہاں تک مسلمانوں میں طلاق دینے کے طریقوں کا تعلق ہے تو بیشتر طلاقیں افہام وتفہیم کے ذریعے دی جاتی ہیں۔ فریقین کی طرف سے چند معززین افہام و تفہیم کے ذریعے ازدواجی تعلقات میں پیدا شدہ دراڑوں یا تلخیوں کو دور کرنے کی ہر ممکن کوشش کرتے ہیں اور جہاں ایسا کرنا ممکن نہیں ہوتا اور حالات بھی تقاضا کرتے ہیں کہ ازدواجی تعلقات میں پیدا شدہ تلخی کو ختم کرنا بس سے باہر ہے تو اُس صورت میں باہمی تصفیہ کے ذریعے نکاح کو فسخ کیا جاتا ہے۔ مرد کی طرف سے طلاق کے اختیار کا استعمال بہت ہی کم بلکہ اگر کہا جائے نایاب ہے، تو غلط نہیں ہوگا۔ میاں بیوی کے درمیان مناقشات کو فریقین سے وابستہ ذی عزت لوگوں کی مداخلت کے ذریعے دور کرنے کا طریقہ عام ہے۔ بہت ہی کم معاملات عدالتوں میں جاتے ہیں۔ عدالتی کارروائی کی طوالت سے تنگ آ کر فریقین باہمی رضامندی سے ہی ایسے تنازعات ختم کرتے ہیں۔ یہی طریقہ مسلمانوں میں عام ہے اور احسن ہے۔ فسخِ نکاح کے اسی طریقے کو عوام طلاق کہتے ہیں حالانکہ طلاق دینا مرد کے حدِ اختیار میں ہے اور شریعت نے اس اختیار کے استعمال کا ایک بہترین طریقہ فراہم کیا ہے کہ اگر مسلمان اُس پر عمل کریں تو تمام پریشانیوں سے نجات حاصل کریں گے۔

قرآن مجید میں واضح ہدایت ہے کہ اگر کوئی مرد اپنی زوجہ کو طلاق دینا چاہتا ہے تو اُس طہر میں صرف ایک طلاق دے جس میں اُس نے اپنی زوجہ سے کوئی صحبت نہ کی ہو، پھر اُس کے بعد تین طہروں کا انتظار کرے، پھر یا تو متعلقہ زوجہ کو احسن طریقے سے رکھ لے یا احسن طریقے سے رخصت کرکے اپنے سے جُدا کرلے یعنی عدت کی مدت گزرنے تک وہ مرد اُس عورت کو دی گئی طلاق کو قولاً یا فعلاً رد کرنے کا اختیار رکھتا ہے۔ عدت گزرنے کے بعد بھی اگر دونوں فریق باہم رضامند ہوں تو وہ دوبارہ نکاح کرسکتے ہیں اور ایک خوشحال زندگی بسر کرکے اپنے گھر کو منتشر ہونے سے بچاسکتے ہیں۔ طلاق دینے کا یہ طریقہ سب سے بہتر ہے اور تمام مسلمانوں کو اس طریقے کی حقیقت سے روشناس کرانے کی ذمہ داری علماء کرام اور خطباء حضرات پر عائد ہوتی ہے۔ یہاں یہ بات یاد رکھنے کی ضرورت ہے کہ ایک طہر میں طلاق دینے کے بعد مرد اپنی زوجہ سے صحبت کرتا ہے تو یہ طلاق غیر مؤثر ہوجاتی ہے۔ اسی طرح اگر دوسرے طہر میں دوسری طلاق بھی دے اور دوران مدتِ عدت طلاق دینے والا مرد متعلقہ بیوی سے صحبت کرے تو اُس صورت میں بھی طلاق کالعدم ہوجاتی ہے البتہ اس طرح ایک یا دو طلاقیں دینے کی صورت میں مدتِ عدت گزرنے کے بعد ایسا مرد متعلقہ عورت سے خلوت یا صحبت نہیں کرسکتا ہے جب تک کہ باہمی رضامندی سے یہ دونوں دوبارہ نکاح نہ کرلیں جس طرح عموماً نکاح انجام دیا جاتا ہے۔ نکاح کے بغیرصحبت کرنا، زنا تصور ہوگا۔ یہ بھی ذہن نشین رہنا چاہیے کہ اگر کوئی مرد اپنی زوجہ کو مسلسل تین طہروں میں تین بار (ہر طہرمیں ایک بار) طلاق دے دے تو اُس صورت میں یہ طلاق غیر رجعی مغلظ بن جاتا ہے یعنی جب تک مطلقہ عورت کسی اور مرد سے باضابطہ نکاح نہ کرلے اور وہ مرد (دوسرا خاوند) اُس عورت کو معروف طریقے سے طلاق نہ دے یا وہ عورت اپنے دوسرے خاوند سے منعقدہ نکاح سے شرعی طریقے پر گلو خلاصی حاصل نہ کرلے یا اُس کا دوسرا خاوند مر نہ جائے، تب تک ایسی عورت پہلے خاوند سے دوبارہ نکاح کرنے کی مجاز نہ ہوگی۔ اس لیے مسلمانوں کو اس بات کی جانکاری فراہم کرنے کی اشد ضرورت ہے کہ وہ طلاق احسن کا طریقہ ہی اختیار کرلیں، اگر انہیں کسی وقت اپنی ازواج کو طلاق دینے کی ناگزیر مجبوری ہی ہو۔ یہی مسنون اور پسندیدہ طریقہ ہے اور باقی طریقے اختیار کرنا مصائب ومشکلات کے بھنور میں اپنے آپ کو پھنسانے کے مترادف ہے۔ نیز طلاق کے اختیار کا استعمال صرف اُسی صورت میں ہونا چاہیے جب صلح کی تمام راہیں مسدود ہوں۔

یاد رہے کہ جب شوہر اپنی مدخولہ عورت کو طلاق دے تو اُس طہر جس میں طلاق دی گئی ہو اُس کے بعد تین حیض تک کی مدّت کو عدّت کہا جاتا ہے۔ البتہ وہ مطلقہ عورت جس کو بوجہ کم سنی، کبرسنی، مرض یا کسی اور وجہ سے حیض نہ آتا ہو، اُس کے مدت عدت تین ماہ ہے۔ جس عورت کا شوہر فوت ہوجائے، اُس کی عدت چار ماہ دس دن ہے۔ حاملہ کی عدت وضعِ حمل تک ہے چاہے تین ماہ ہو یا کم یا زیادہ! اگر شوہر نے طلاق رجعی دی اور عدت کے دوران مرگیا تو عورت پر وفات کی عدت واجب ہوگی یعنی تاریخ وفات سے چار ماہ دس دن! یاد رہے کہ عدت تفریق طلاق یا وفات کے وقت سے واجب ہوتی ہے اس لیے یہ ضروری ہے کہ تاریخ تفریق یا وفات اچھی طرح یاد رکھی جائے۔ اگر دورانِ عدت شوہر مر جائے تو عورت اپنے شوہر کی وراثت میں سے اپنا حصہ حاصل کرنے کی حقدار ہے بشرطیکہ طلاق رجعی ہو! دورانِ مدت عدت متعلقہ مطلقہ عورت دوسرا نکاح نہیں کرسکتی ہے البتہ دخول سے قبل طلاق یا تفریق کی صورت میں زوجہ پر عدت واجب نہ ہوگی اور ایسی عورت طلاق یا تفریق کے بعد ہی نکاح ثانی کرنے کی مجاز ہوگی۔ جب تک عدت باقی ہے نکاح بھی باقی رہتا ہے بشرطیکہ طلاق رجعی ہو۔ رجوع کرنے کے لیے نہ معاوضہ کی ضرورت ہے اور نہ عورت کی رضامندی کی۔ مستحسن طریقہ یہ ہے کہ مرد طلاق اور رجوع، دونوں اوقات پر دوگواہ بنالے جس طرح نکاح کے وقت دو گواہ بنائے جاتے ہیں۔ یہی مسنون اور پسندیدہ طریقہ ہے۔ یعنی زبان سے اقرار کر لے کہ وہ طلاق دیتا ہے یا رجوع کرتا ہے اور یہ اقرار کرتے وقت دو گواہ حاضر رکھے۔ یہی سب سے اچھی صورت ہے۔ یہ بھی ذہن نشین رکھنے کی ضرورت ہے کہ طلاق رجعی کی صورت میں تیسرا حیض اگر برابر دس روز کا ہو تو حیض سے پاک ہوتے ہی مرد کے لیے رجوع کا وقت ختم ہوجاتا ہے۔ طلاق رجعی کی صورت میں اگر مرد یا عورت میں سے کوئی دورانِ عدت فوت ہوجائے تو دوسرا وراثت میں سے بحیثیت شوہر یا بیوی کے اپنا حصہ پانے کا حقدار ہوگا۔ طلاق بلا دخول، طلاق بالعوض (خلع) یا طلاق ثلاثہ کے بعد رجوع کا حق نہیں رہتا ہے اور ایسی طلاق کو طلاق بائن کہتے ہیں، پہلی دو صورتوں یعنی طلاق بلا دخول یا خلع کی صورتوں، دونوں کی باہمی رضامندی کے ساتھ نکاح ثانی ہوسکتا ہے۔

دوران حیض طلاق دینا، ایک ہی طہر کی مدت میں ایک سے زیادہ طلاق دینا یا جس طہر میں بیوی سے صحبت (مجامعت) کی ہو اسی طہر کے اندر بیوی کو طلاق دینا، اسی طرح دوران نفاس طلاق دینا، غیر مسنون اور انتہائی ناپسندیدہ طریقے ہیں جن کو اختیار کرنے سے ایک مرد سخت گنہگار ہو جاتا ہے اور اگر اسلامی حکومت ہو تو مستوجب سزا بھی ہوسکتا ہے لیکن ایسی طلاقیں واقع ہوجاتی ہیں اور جمہور علماء کے نزدیک ایسی طلاقیں مؤثر ہیں۔ اسی طرح ایک ہی مجلس میں تین طلاقیں، تین ہی شمار ہوں گی الا یہ کہ طلاق دینے والے کی نیت صرف ایک طلاق دینے کی ہو اور صرف تکرار کی خاطر اُس نے تین بار لفظ طلاق استعمال کیا ہو اور یہ وہ ثابت بھی کردے۔ اسلام سے قبل زمانے میں ایک عورت کی نہ کوئی مستوجب حیثیت تھی اور نہ کوئی سماجی وقار بلکہ اس کو لذت کی شے یا بازاری مال سمجھا جاتا تھا لیکن اسلام نے دنیا کو صاف صاف بتا دیا کہ مرد اور عورت ایک ہی جنس ہیں اور ایک ہی نفس سے پیدا کیے گئے ہیں، مرد عورت کا سہارا ہے اور عورت مرد کے لیے ایک سہارا ہے۔ مرد کے بغیر عورت کی زندگی نامکمل ہے اور عورت کے بغیر مرد کی زندگی نامکملً، بحیثیت انسان دونوں برابر ہیں، البتہ میدان کار الگ الگ ہیں۔ مگر فطری طور پر مرد کو جسمانی اعتبار سے عورت پر فوقیت حاصل ہے اور اسی باعث مرد کو عورت کی نگرانی سونپی گئی ہے، اور اُس کے تمام لوازمات پورا کرنے کی ذمہ داری بھی تفویض کی گئی۔ عورت کو گھر کی ملکہ قرار دیا گیا۔ دونوں کو ایک دوسرے کے لیے امن سکون کا باعث قرار دیا گیا ہے۔ حضور اقدس صلی اللہ علیہ وسلم کے فرمان کے مطابق ماں کے قدموں کے تلے جنت ہے۔ ماں عورت ہی ہوتی ہے اور سب سے زیادہ حق اللہ و رسول صلی اللہ علیہ وسلم کے بعد، ماں کا ہی ہے۔ گھر کے اخراجات پورا کرنے کی خاطر، کمانے کی ذمہ داری بھی مرد پر ہی ہے اور عورت کا کام گھر کا اندرونی نظام سنبھالنا اور بچوں کی صحیح تربیت کرنا ہے۔ اس لیے عورت کا بذات خود واقف کار اور تربیت یافتہ ہونا ناگزیر ہے۔ اسی لیے اُس مسلمان باپ کو جنت کی بشارت دی گئی ہے جو اپنی بیٹیوں کی صحیح اور درست تربیت کرے اور اُن کو دینی و دنیوی علوم سے آراستہ کرے۔

اسلام پر اعتراضات جُڑنے والے اکثر لوگ متعصب، ضدی اور ہٹ دھرم ہوتے ہیں اور وہ مسلمانوں کی اپنے دین سے عدم واقفیت کی بنا پر ان اعتراضات کا ہوا کھڑا کرتے ہیں تاکہ ایسے مسلمانوں کے دلوں میں شک و شبہ کے بیج بوئے جائیں اور اس طرح اُن کی اسلام پر عقیدت کو متزلزل کیا جاسکے۔ یہ شیطان کا پُرانا حربہ ہے، لوگوں کو گمراہی کے دلدل میں پھنسانے کا لیکن شیطانی حربے ہمیشہ ناکام رہ جاتے ہیں بشرطیکہ اہل ایمان اپنے ایمان اور دین کے تقاضوں سے واقف ہوں اور اس بات پر انہیں یقین ہو کہ اللہ کا دین ہی حقیقت ہے اور اس میں کسی کمی یا کوتاہی کا پایا جانا ہر حال میں ناممکن ہے۔ یہاں یہ بات یاد رکھنے کے قابل ہے کہ مسلمانوں میں طلاق کی شرح نہ ہونے کے برابر ہے اور طلاق یا تفریق جب بھی واقع ہوجاتی ہے تو اس میں دونوں فریقین کی باہمی گفتگو بھی شامل ہوتی ہے۔ بیک وقت ایک ہی مجلس میں تین طلاقیں دینے کا غیر مسنون طریقہ مسلمانوں میں شاذ و نادر ہی استعمال ہوتا ہے اور اس کا رواج نہ ہونے کے برابر ہے۔ اس لیے دشمنان اسلام ’’سہ طلاق‘‘ کا ہوا کر کے جس طرح اعتراضات کرتے ہیں اس میں صاف بدنیتی عیاں ہے۔ ہمیں دُشمنوں کا آلۂ کار بننے کے بجائے آپسی اتحاد واتفاق کو مزید مستحکم کرنا چاہیے اور فروعی اختلافات سے بالاتر ہو کر دین کی بنیادوں کو مضبوط کرنے کی طرف متوجہ ہونا چاہیے۔ مسلم پرسنل لا، اسلامی نظام حکومت کے قیام تک ہماری شناخت ہے اور اس شناخت کی حفاظت کرنا ہمارا فرض عین ہے۔
اللہ ہمیں دین کا صحیح فہم عطا کرے، اس پر عمل کرنے کی توفیق عطا فرمائے۔ آمین۔

(زاہد علی ایڈووکیٹ جماعت اسلامی مقبوضہ کشمیر کے ترجمان ہیں اور اس وقت سب جیل کوٹھی باغ سری نگر میں قید ہیں. دوران قید ہی دلیل کےلیے یہ خاص تحریر بھجوائی ہے)