جب پاکستان انگلینڈ ون ڈے سیریز شروع ہوئی تو ایک دوست جنہیں کرکٹ کی بہترین سمجھ اللہ نے عطا کی ہے، ان کا فرمانا تھا کہ اس بار یہ سیریز انگلینڈ یا تو وائٹ واش کرے گا یا 4-1 سے جیت لے گا. ٹیم کی بری ترین حالت کے باوجود میرا گمان تھا کہ مقابلہ بہت قریبی رہےگا اور شاید ہم یہ سیریز بھی جیت سکیں، مگر کل والا میچ دیکھ کر اب مجھے ان کی بات سے اتفاق کے علاوہ کوئی چارہ نظر نہیں آرہا. رات ناصر حسین بھی کہہ رہے تھے کہ پاکستان کی یہ ٹیم کسی طرح بھی ایسا ون ڈے یونٹ نہیں لگتا جو 300 رنز بنا سکے. کبھی ہم سوچتے تھے کہ کوئی بات نہیں، ہماری بیٹنگ 240 تک کر لے تو ہم بائولنگ کے سہارے جیت جائیں گے مگر اب حالات بدل گئے ہیں. اب تو آسٹریلیا اور انگلینڈ میں بھی 300 رنزعام سی بات ہے اور اکثر یہ ہدف کامیابی سے حاصل ہونے لگا ہے.
اصل مسئلہ ٹیم کے انتخاب کا ہے. اظہر علی پر پہلے بھی بات ہوتی ہے، اب بھی انہی سے بات شروع ہوگی. ان کا مسئلہ یہ ہے کہ ٹیم میں بطور کپتان جگہ ان کی پکی ہے مگر وہ سٹرائیک روٹیٹ نہیں کرتے. بہت سے لوگ انہیں مصباح کی طرح کہتے ہیں مگر مصباح اور اظہر میں بہت فرق ہے. مصباح ایک مکمل بلے باز تھے، وہ محتاط بلے بازی ضرور کرتے تھے مگر ان کے پاس سارے شاٹس موجود تھے، جب چاہتے بڑی آسانی سے چھکا لگا لیتے تھے اور اظہر میں سب سے بڑی کمی ہی یہ ہے کہ وہ کبھی بھی بڑا شاٹ لگاتے ہوئے آرام دہ محسوس نہیں ہوتے. ان کے سلو سٹارٹر ہونے کا مسئلہ تو ہے ہی، اس سے زیادہ مگر یہ کہ لمبی باری میں بھی وہ گیندوں کا فرق نہیں نکال سکتے. اس کا مظاہرہ انہوں نے پہلے ون ڈے میں بھی کیا تقریبا 75-80 گیندوں پر 50 مکمل کرنے کے بعد بھی وہ بڑی شاٹ لگانے کے چکر میں بہت مضحکہ خیز انداز میں بلا گھماتے نظر آئے.
شرجیل خان کی بیٹنگ میں اتنی خامیاں ہیں کہ کوئی بھی بڑی ٹیم انہیں دو چار شاٹس میں پکڑ سکتی ہے. فٹ ورک اور وزن ان کا بہت بڑا مسئلہ ہے، پھر شاٹ سلیکشن بھی ان کی بہت بری ہے. ٹاپ آرڈر میں یہ چیزیں کسی ٹیم کو وارا نہیں کھاتیں. ایک اور مسئلہ بیٹنگ آرڈر کا ہے. شعیب ملک کو چھٹے نمبر پر بھیجنے کی تک سمجھ نہیں آتی. ملک کا سب کو پتہ ہے کہ وہ ٹائم لیتے ہیں، آتے ہی بڑے شاٹس نہیں لگا سکتے مگر ان کو نچلے نمبروں پر بطور فنشر بھیجا جارہا ہے جو کہ ہماری ٹیم مینیجمنٹ کی ناقص حکمت عملی کا منہ بولتا ثبوت ہے. ان کی رننگ بٹوین دی وکٹ اچھی ہے، اس لیے مڈل اوورز میں وہ فائدہ مند ثابت ہوسکتے ہیں.
ملک کا انگلینڈ میں ریکارڈ البتہ بہت برا ہے، 17 اننگز میں صرف 168 رنز اور وہ بھی 9.88 کی ایوریج سے جس میں 28 رنز ان کا بیسٹ سکور ہے. اصولا تو اگر ان سے بائولنگ نہیں کروانی تو ان کی ٹیم میں جگہ نہیں بنتی.
شکر ہے کہ سرفراز احمد کو اوپری نمبرز پر بھیجا جا رہا ہے جس کے فوائد بھی سامنے آرہے ہیں مگر ضروری ہے کہ انہیں ایک مستقل نمبر دے دیا جائے. بطور اوپنر انہیں کھلا کر اگر رضوان کو کھلا لیا جائے تو نچلے نمبرز پر ایک ہٹر کی کمی بہت حد تک پوری ہوسکتی ہے. (سرفراز بطور اوپنر 9، تیسرے اور چوتھے نمبر پر7، پانچویں نمبر پر 3 اور چھٹے یا اس سے نیچے کے نمبر پر27 دفعہ بیٹنگ کر چکے ہیں). یہ کسی بھی کھلاڑی کے ساتھ زیادتی ہے کہ جب دل کرے اسے کہیں اٹھو اور بیٹنگ کرنے چلے جائو.
محمد نواز کو دومیچز میں شاندار کارکردگی کے باجود باہر بٹھا دینا سمجھ سے بالاتر ہے. اس طرح کے برتاؤ سے کھلاڑی کیسے تیار ہوگا؟ نواز پر محنت کر لی جائے تو مستقبل کا بہترین بیٹنگ آل رائونڈر ہمیں مل جائے گا. لڑکا دلیر بھی ہے اور تکنیکی طور پر بھی مضبوط ہے.
یاسرشاہ ون ڈے کا کامیاب بائولر نہیں ہے کل پھر یہ بات ثابت ہوگئی. زمبابوے کے خلاف میچز نکال دیے جائیں تو یاسر نے 10 میچز میں 5.7 کی ہائی اکانومی سے صرف 8 وکٹیں حاصل کی ہیں. کل بھی موصوف نے 6.52 کی بھاری اوسط سے مار کھائی ہے اور کوئی وکٹ بھی حاصل نہیں کر پائے. یہاں بری کپتانی کا تذکرہ کرنا بھی ضروری ہے کہ 7 اوورز میں 38 رنز دے کر دو اہم وکٹیں حاصل کرنے والے عماد وسیم سے بعد میں بائولنگ ہی نہیں کروائی گئی اور یاسر شاہ بائولنگ کرتے رہے.
بابراعظم بہترین ہیں مگر دو میچز میں ان کی بلے بازی دیکھ کر لگتا ہے کہ ان پر اپنے کزن عمر اکمل کا خاصا اثر ہے. یہ چیز بہت نقصان دہ ہے، انہیں اس سے پرہیز کرنا ہوگا. ایگریشن اچھی چیز ہے مگر شاٹ سلیکشن بھی اہم ہے. آپ کو ہر حال میں وکٹ کی اہمیت کا احساس ہونا چاہیے. پاکستان کا بیٹنگ آرڈر تبدیل کرنا بہت اہم ہے. اگر شرجیل کی چھٹی (مسلسل کھلانے کا جوا کھیلنا ہے تو آپ کی مرضی) کرکے ان کی جگہ رضوان کو کھلا لیا جائے تو سرفراز بڑے آرام سے ون ڈائون آسکتے ہیں جبکہ ملک بھی پانچویں نمبر پر کھیل سکیں گے اور چھٹے پر رضوان ہو جائیں گے. محمد نواز کو یاسرشاہ کی جگہ ٹیم میں لیا جاسکتا ہے. اس سے بیٹنگ آٹھویں نمبر تک ہو سکتی ہے اور مسائل میں خاطر خواہ کمی آسکتی ہے.
اس ٹیم میں عامر یامین یا حماد اعظم جیسا فاسٹ بائولنگ آل رائونڈر بہت ضروری ہے. عامر یامین اور حماد دونوں کو مناسب مواقع دیے بغیر ٹیم سے نکال دیا گیا. اسی لیے آج ہم آخری اوورز میں اچھے ہٹرز سے محروم ہیں. گزرے سات سال میں پاکستان ٹیم اپنے 45 فیصد ون ڈے میچز میں آل آئوٹ ہوچکی ہے جو کہ ٹیسٹ نیشنز میں زمبابوے کے بعد سب سے زیادہ بار ہے. اس سے ہماری بیٹنگ کا حساب لگا لیں. گزشتہ 11 باہمی مقابلوں میں سے10 انگلینڈ ہمیں ہرا چکا ہے.
اب بھی وقت ہے کہ ہم سوچیں اور فیصلہ کریں. ہمارے ساتھ مسئلہ یہ ہے کہ حفیظ اور اظہر علی جیسے کھلاڑی مسلسل ناکام ہو کر بھی کھیلتے رہتے ہیں جبکہ نئے لڑکوں کو اچھی کارکردگی کے باوجود ٹیم سے نکال دیا جاتا ہے. اگر تو ہمیں اپنی رینکنگ بہتر کرنا ہے تو کپتان سمیت موجودہ ٹیم پر نظرثانی کرنا ہوگی ورنہ پھر رینکنگ میں اس سے نیچے بھی جگہ موجود ہے
کرکٹ بلاشبہ پاکستانیوں کے خون میں رچ بس چکی ہے۔ یہی وجہ ہے کہ قومی ٹیم کی محدود اوورز کے فارمیٹ میں خوفناک حد تک تنزلی کے باوجود لوگ اب بھی یہ کھیل پورے انہماک سے دیکھتے ہیں۔ قومی کرکٹ کو اس سطح تک لانے میں سیاسی مداخلت کا اپنا کردار ہے جس نے رخنہ اندازیوں سے دیگر نفع بخش اداروں سمیت اسے بھی اپنی لپیٹ میں لے رکھا ہے۔ پی سی بی کے اہلکاروں میں اختیارات کی رسہ کشی، ٹیم میں مبینہ گروہ بندی، ٹیلنٹ کا قتل عام اور بعض منظورِ نظر کھلاڑیوں کی اجارہ داری نے اس کھیل کو محض پیسہ کمانے کا ذریعہ بنا دیا ہے جبکہ شائقین آج بھی اس سے جذباتی وابستگی رکھتے ہیں۔
یوں تو پاکستان کھیل اور کھلاڑی کے اعتبار سے انتہائی خود کفیل ملک ہے. اس زرخیز مٹی نے دنیائے کھیل میں ایسے نام پیدا کیے ہیں جن کو ان کے کھیل کے اعتبار سے اس کھیل میں سب سے معتبر لسٹ یعنی ’’ہال آف فیم‘‘ میں جگہ دی گئی ہے. اور ہاں اگر کسی کھیل میں ابھی تک پاکستان نے جھنڈا نہیں گاڑا تو میرا سو فیصد یہ ماننا ہے کہ یہ کھیل ضرور حکومتی عدم توجہ کاشکار ہوگا یا اس کی راہ میں ضرور کچھ ایسے انتظامی امور حائل ہوں گے جنھوں نے کھلاڑیوں کو اپنی صلاحیت کا لوہا نہیں منوانے دیا.
کیا پاکستان کے پاس کچھ بھی پازیٹو نہیں ہے تو اس کا جواب ہے کہ پاکستان کے پاس بھی چند مثبت چیزیں ہیں جن پر بات کی جاسکتی ہے مثلا گزشتہ ٹیسٹ میں انگلش ٹیم کی اچھی کارکردگی کا زیادہ حصہ روٹ اور کک کے کھیل پر مشتمل تھا، ہیلز ابھی تک ٹیسٹ معیار کے بلے باز ثابت نہیں ہو سکے جبکہ گیری بیلنس ایک سال کے بعد آئے ہیں اور ٹیم میں اپنی جگہ پکی کرنے کے چکر میں ہیں، جیمز ونس بھی کیرئیر کی شروعات میں ہیں اور ابھی تک کچھ خاص نہیں کرپائے. (انگلینڈ کا سسٹم اچھا ہے جو کسی نئے لڑکے کو مسلسل موقع دیتا ہے ورنہ کسی اور ملک میں ہوتے تو ونس اب تک ٹیم سے نکالے جا چکے ہوتے) پاکستان کے کوچ نے بھی انگلش ٹیم کے ٹاپ آرڈر کی انھی کمزوریوں پر بات کی ہے. سب سے بڑی بات کہ انگلینڈ کے اہم کھلاڑی بین سٹوکس انجری کی وجہ سے ٹیم سے باہر ہوچکے ہیں. پچھلے کئی دن سے بات چل رہی تھی کہ انگلینڈ ان کی جگہ ٹیم میں عادل رشید، جیک بال یا سٹیون فن میں سے کسی کو شامل کرے گا. زیادہ تر چانس یہی تھا کہ انگلینڈ اپنی سٹرینتھ پر کھیلےگا اور ایک سیمنگ پچ بنائے گا جس کی وجہ سے سٹیون فن کے ٹیم میں شمولیت کا چانس بن جائے گا. وہی ہوا اور انگلینڈ نے فن کو عادل رشید پر ترجیح دی. کرس ووکس اب تک انگلینڈ کے سب سے کامیاب بائولر ہیں اور یہ ان کا ہوم گرائونڈ بھی ہے، یہاں وہ اپنا پہلا ٹیسٹ کھیلنے جارہے ہیں.
ایجبسٹن کی پچ عام طور پر خشک ہوتی ہے جو وقت کے ساتھ سپنر کے لیے سازگار ہو جاتی ہے، اس لیے سیمنگ پچ کے باوجود بھی یاسرشاہ اس میں اپنے لیے کچھ مدد کے منتظر ضرور ہوں گے. یاسر شاہ کا اپنی سپیڈ اور لائن لینگتھ میں تبدیلی کرنا بہت ضروری ہے ورنہ یہ ٹیسٹ بھی ان کے لیے امتحان سے کم نہں ہوگا کیونکہ انگلینڈ اس میچ میں بھی شاید سپورٹنگ پچ بنائے اور ایسی پچ پر ٹاس بہت اہم ہوجاتا ہے. یاسرشاہ کو وکٹ ٹیکنگ آپشن کے طور پر دیکھا جاتا ہے مگر اس چکر میں انھیں جلد بازی بالکل نہیں کرنی چاہیے اور سمجھنا چاہیے کہ پچ کا مزاج کیا ہے. ایک اور بات کہ یاسر کے بارے میں کبھی شک گزرتا ہے کہ وہ بہت سکرپٹڈ بائولر ہیں اور میچ کی صورتحال کے مطابق اپنے آپ کو ڈھالتے نہیں. یہ خیال بھی انہیں غلط ثابت کرنا ہوگا.
وہاب ریاض کو کاش کوئی بتا دے کہ اگر قسمت کی دیوی ان پر مہربان ہو ہی گئی ہے تو وہ کچھ محنت ہی کرلیں، سپیڈ سے کیا ہوتا ہے، گرائونڈ میں کوئی تیز ترین گیند پھینکنے کا مقابلہ نہیں چل رہا ہوتا بلکہ بات تو وکٹ لینے پر ختم ہوتی ہے جس میں وہ بری طرح ناکام ہو رہے ہیں. اور یہ کوئی زمبابوے یا بنگلہ دیش کے سب سٹینڈرڈ بلے باز نہیں جو آپ کی طوفانی بائولنگ سے ڈر کر بیک فٹ پر چلے جائیں گے اور آپ کو وکٹ دے دیں گے. یہ آپ کی 150 کی رفتار سے آنے والی گیند کو 350 کی رفتار سے باہر پھینکنے کی صلاحیت رکھتے ہیں. بظاہر تو وہاب کے کھیلنے کی کوئی وجہ نہیں بلکہ ان کی جگہ عمران خان کو کھلانا چاہیے، ایک تو ٹیم کو رائٹ ہینڈ فاسٹ بولنگ آپشن ملے گا اور فاسٹ بائولنگ میں کچھ ورائٹی آجائے گی، دوسرا یاسر شاہ کو رف پیچز مل جائیں گے جس سے وہ بائیں بازو کے انگلش بلے بازوں کے لیے مصیبت کھڑی کرسکتے ہیں. اس کے علاوہ اگر پچ سپورٹنگ بھی ہوئی تو ٹاس ہارنے کی صورت میں شروع کے دو گھنٹے ملنے والی سوئنگ سے عمران اچھا فائدہ اٹھا سکتے ہیں. راحت ٹھیک ہیں مگر انھیں خراب گیندوں کا تناسب بہت کم کرنا ہوگا اس کی وجہ سے وہ بیٹسمین کا سارا پریشر ختم کر دیتے ہیں اور بہترین سوئنگ کے باوجود بھی وکٹ نہیں لے سکتے.
اظہر علی بھول جائیں کہ ون ڈے اور ٹی 20 میں آپ کی کیا پوزیشن ہے، آپ مستقبل کے ٹیسٹ کپتان ہیں، اس لیے اپنی ذمہ داری پوری کریں. ٹاپ آرڈر کی بہتری آپ کی اچھی کارکردگی سے مشروط ہے اور اگر سٹرائیک روٹیشن بہتر ہوجائے تو پریشر خودبخود ختم ہوجائےگا. سرفراز اور اسد شفیق پلیز اپنی وکٹ کی قدر جانیں 30-40 یا 60-70 کی اننگز سے آگے کا سوچیں اور خراب شاٹ کھیلنے کی عادت سے جان چھڑائیں. ٹیسٹ کرکٹ میں سیٹ ہو کر آووٹ ہوجانا بہت بڑا جرم ہے. مصباح جی آپ کمال ہیں، بس تھوڑی سی ایگریشن اور ہلہ بول کرکٹ دکھائیں، اب آپ کے پاس مکمل اختیار ہے، ان کھلاڑیوں کی بھی کھنچائی کریں. آپ نے پاکستان کرکٹ کا مثبت امیج بحال کیا بلکہ اس میں مزید شاندار روایات شامل کیں مگر اب اپنے آخری سال میں بطورکپتان جارحانہ کھیل دکھائیں تاکہ یہ کمی بھی پوری ہوجائے. دوسرا جب آپ بیٹنگ کررہے ہوں تو نان سٹرائیکر اینڈ پر کھڑے ہوکر صرف دیکھا نہ کریں بلکہ غلط شاٹ کھیلنے پر اسی وقت دوسرے بلے باز کو ٹوکا بھی کریں. بدقسمتی سے اولڈ ٹریفورڈ کی پہلی اننگز میں اسد شفیق اور سرفراز کو آپ نے نہیں سمجھایا جبکہ وہ مسلسل غلط شاٹس کھیل رہے تھے. فیلڈنگ میں بھی چیزوں کے وقوع پذیر ہونے کا انتظار نہ کیا کریں بلکہ ٹرائی کیا کریں اور فیلڈ سیٹنگ یا بائولنگ چینجز سے صورت حال بدلنے کی کوشش کیا کریں. ہم ایجبسٹن میں پہلی دفعہ جیت سکتے ہیں، بس توجہ اور جارحانہ کھیل کی ضرورت ہے صورت حال کچھ بھی ہو ہمیں مثبت کھیلنا ہوگا ورنہ غیرضروری پریشر لینے کی عادت ہمیں ہزیمت سے دوچار کردے گی.
……..شان مسعود…….
ٹیم میں پروفیسر کے نام سے جانے جاتے اس اوپنر کا حال بھی اتنا ہی برا ہے. 2010 سے یہ مسلسل ٹیم میں ہیں اور تب سے ان کی ٹیسٹ میچز میں ایک ہی پرابلم ہے آف سٹمپ سے باہر جاتی یا اندر آتی ہوئی گیند کو کھیلنا. ون ڈے کرکٹ میں چونکہ گیند زیادہ سوئنگ نہیں ہوتی اور پچز بھی فلیٹ ہوتی ہیں اس لیے وہاں تیکنیکی خامیوں کے ساتھ بھی رنز مل جاتے ہیں اس لیے زیادہ مسائل نہیں ہوتے. اگر تو انھیں اگلے میچز میں کھلایا جاتا ہے تو انھیں اپنے آف سٹمپ کا آئیڈیا ہونا بہت ضروری ہے، دوسرا انھیں اپنا گیم پلان بدلنا ہوگا اور ون ڈے موڈ اپنانا ہوگا شاید اس طرح کچھ سکور کرنے میں کامیاب ہوجائیں کیونکہ صرف بلاک کرنے کی نہ ان میں اہلیت نظر آتی ہے نہ ان کی تیکنیک اس قابل ہے.
پاکستان کی ون ڈے ٹیم کے کپتان نے پریکٹس میچز میں دو سنچریاں بنائیں اور اپنے فارم میں ہونے کا ثبوت دیا لیکن لارڈز ٹیسٹ کی پہلی اننگز سے ہی مشکل میں نظر آئے. اظہر نے بھی شان مسعود والی ٹیکنک اپنائی اور سوئنگ کو کنٹرول کرنے کے چکر میں آف سٹمپ کا گارڈ لیا. جس سے وہ آف سٹمپ سے باہر یا لیگ سٹپ پہ گری ہوئی ڈلیوریز کھیلتے ہوئے ہر بار اپنا بیلنس کھو دیتے ہیں اور ایک سے زیادہ بار ایل بی ڈبلیو ہو چکے ہیں. اس سٹانس کا نقصان یہ ہوتا ہے کہ بیک فٹ یا فرنٹ فٹ پہ دونوں طرح کھیلتے ہوئے گیند کی لائن آسانی سے مس ہو جاتی ہے جس سے بالر کے لیے انھیں آئوٹ کرنا بہت آسان ثابت ہو رہا ہے. سٹرائیک روٹیٹ کرنے میں بھی اظہر علی بری طرح ناکام ثابت ہوئے ہیں، ہر گیند کو صرف بلاک کرنے کی نیت سے کھیلنا بھی ان کے سکورنگ چانسز کو بہت محدود کر رہا ہے جس سے بھی بالرز انھیں ٹریپ کر پا رہے ہیں. اپنی فارم حاصل کرنے کے لیے انھیں اپنی پرانی ویڈیوز دیکھنی چاہییں اور اپنی پرانی ٹیکنیک کو اپنانا چاہیے جس سے وہ پہلے رنز کر چکے ہیں.
اپنے آخری دورہ انگلینڈ کو یادگار بنانے میں یونس خان ابھی تک ناکام ہی نظر آرہے ہیں. 4 اننگز میں ابھی تک وہ کسی ایک اننگز میں بھی مکمل کنٹرول میں نظر نہیں آئے. کریز کے باہر گارڈ لینا، اپنا سٹانس بہت نیچا رکھنا اور ہر بار جمپ کر کے گیند تک پہنچنا ان کے لیے مشکلات پیدا کر رہا ہے. اس دورے میں ابھی تک بیٹنگ کا ردھم اور فلو وہ حاصل نہیں کر پائے جس کی ان سے بہت توقع تھی. نمبر 4 پوزیشن پر کھیلتے ہوئے رنز نہ کرپانا ٹیم کے لیے نقصان دہ ثابت ہوا ہے کہ کیونکہ ٹاپ آرڈر کو ساتھ لے کر چلنے میں وہ کافی تجربہ رکھتے ہیں لیکن اس بار ان کی ناکامی سے ٹاپ آرڈر مکمل طور پر ناکام نظر آرہا ہے. انھیں چاہییے کہ کریز کے اندر لیگ سٹمپ پہ گارڈ لیں. اور اپنی ٹرگر موومنٹس کو جتنا کم اور اپنا سر جتنا ساکت رکھ سکتے ہیں رکھ کہ کھیلیں اور سوئنگ اور سیم کو کھیلتے ہوئے اپنا بیلنس برقرار رکھیں اور غیر ضروری جمپ لگانے سے پرہیز کریں. اس سیریز میں وہ جن مختلف طریقوں سے آئوٹ ہوئے ہیں وہ بھی ان جیسے مایہ ناز بلے باز کے لیے لمحہ فکریہ ہے.
اپنے ناقدین کو بلے سے جواب دینا مصباح کو بہت اچھی طرح آتا ہے. اپنی ڈیٹرمینیشن اور گیم پلان سے مصباح ابھی تک ٹیم کے سب سے کامیاب بیٹسمین رہے ہیں. کریز پہ ڈٹے رہنا اور سکور کرنے کا کوئی بھی آسان موقع جانے نہ دینا ہی ان کی کامیابی کا راز رہا ہے. اپنی رینج سے دور بالنگ کو انھوں نے ابھی تک اچھی طرح کنٹرول کیا ہے. ابھی تک انھیں ٹیم کے باقی پلیئرز کی جانب سے خاص سپورٹ بھی نہیں مل سکی. انھیں چاہیے کہ اپنے اس سٹائل کو اپنائے رکھیں اور ٹیم کے لیے سکور بناتے رہیں. انھیں بھی سٹرائک روٹیشن پہ دھیان دینے کی ضرورت ہے. کریز پہ نئے آنے والے بیٹسمین کو سیٹ ہونے کا موقع دینے کے لیے بھی انھیں اپنی گیم کو ایڈجسٹ کرتے رہنا چاہیے. بعض دفعہ کسی خاص بالر کے سامنے کسی بیٹسمین کو اننگز کی شروعات میں نہ آنے دینا بالنگ سائیڈ کے لیے فرسٹریشن کا باعث بنتا ہے.
برطانوی میڈیا نے مصباح الحق کے بعد اس ٹور پہ سب سے زیادہ جس پلیئر کو اپریشیٹ کیا ہے وہ اسد شفیق ہیں. ان کی تکنیک اور اسٹائل کو کافی سراہا گیا ہے. اس سیریز میں جو سب سے خاص بات نوٹ کی گئی ہے وہ ان کا اسٹانس ہے اور انھوں نے اپنی بیٹنگ تکنیک میں جو تبدیلی کی ہے وہ ان کا بیٹ گرپ کو تھوڑا سا اوپن کرنا ہے. جس سے ان کا بیلنس اور سٹروکس کی رینج میں اضافہ ہوا ہے اور ان کے ایل بی ڈبلیو یا انسائیڈ ایج سے بولڈ ہونے کی روایت ختم ہوئی ہے. اس لیے بھی وہ اب آف سائیڈ پہ رنز بنا پا رہے ہیں. انھیں رنز بنانے کا یہ سلسلہ برقرار رکھنا ہوگا. بیٹنگ آرڈر میں انھیں ٹاپ آرڈر میں بھی آزمایا جا سکتا ہے.
یو اے ای اور سری لنکا میں ٹیسٹ کرکٹ میں کافی رنز کرنے والے سرفراز احمد انگلینڈ میں ابھی تک اپنا ٹاپ گیم پیش نہیی کرسکے. کچھ ان کی شاٹ سلیکشن بھی بہت اچھی نہیں رہی. وہ بزی پلیئر ہیں اور ہر بال پہ سٹرائیک روٹیٹ کرنے کا سوچتے ہیں. وکٹ کی جانب آتی ہوئی گیند کھیلنے میں انھوں نے کافی مہارت کا ثبوت دیا ہے اسی لیے اب بالرز انھیں آف سٹمپ کے باہر زیادہ بالنگ کرتے ہیں جس کے مطابق انھیں اچھا گیم پلان بنانا ہوگا اور لوز بال کا انتظار کرنا ہوگا کیونکہ ابھی تک اس تکنیک سے وہ کامیاب نظر نہیں آرہے اور ایک آسان شکار ثابت ہو رہے ہیں.
سیریز میں عامر کی بائولنگ پر ابھی تک 4 کیچز ڈراپ ہو چکے ہیں اورعامر نے اب تک سیریز میں جو 5 وکٹیں حاصل کی ہیں سب کی سب بولڈ کر کے حاصل کی ہیں. فیلڈرز کو عامر کا ساتھ دینا ہوگا
روٹ نے سکوائر کے پیچھے شاٹ نہیں مارے اور واضح طور سے محسوس ہورہا تھا کہ روٹ اپنے جسم سے دور گیند کو نہیں کھیلنا چاہتے تاکہ یاسر کو کوئی ایج نا مل سکے. جب جب یاسر ان کی حکمت عملی کا توڑ کرنے کے لیے مڈل کی طرف آئے، روٹ نے انہیں لیگ پر چوکا مارنے میں کوئی غلطی نہیں کی. یاسر کی 50٪ گیندیں ہاف وولی تھیں جس کی وجہ سے انہیں اتنی مار بھی پڑی. یاسر کو لارڈز ٹیسٹ میں ٹوٹل 17 چوکے پڑے تھے اور کل صرف ایک دن کی باولنگ میں 16 چوکے پڑ گئے. پاکستان نے کل پانچواں بائولر بہت مس کیا. اگر حفیظ کا ٹیسٹ کلیئر ہوجائے تو کمال ہوجائے ورنہ یاسر سے زیادہ کام لینا ان کے لیے نقصان دہ بھی ہو سکتا ہے. حفیظ ویسے بھی لیفٹ ہینڈڈ بلے بازوں کے لیے بہت موثر ہیں. انگلینڈ کے پاس 4 -5 بائیں بازو کے بلے باز ہیں اس لیے ایک آف سپنر بہت ضروری ہے جو کم از کم 15-20 اوورز کروا سکے.
اسٹیڈیم میں آگ لگ چکی تھی. گراؤنڈ دھویں سے بھر رہا تھا. پاکستان اور انگلینڈ کے کھلاڑی گراؤنڈ سے منہ اور آنکھوں پر ہاتھ رکھے بھاگ رہے تھے. یہ 1967-68 ہے.