Author: حافظ یوسف سراج

چائے والے کی نیلی آنکھوں کی بات ہو رہی تھی اور یہ بات کہ کیا کوئی جانتا بھی ہے کہ ان جھیل جیسی نیلی آنکھوں کے پیچھے کیا درد چھپے ہیں؟ دراصل ان کے پیچھے ایک پوری قوم کی بےبسی کی داستان سو رہی ہے اور ان سمندر آنکھوں کے پیچھے ایک پوری قوم کی بےحسی جاگ رہی ہے۔ ان دل فریب نیلی آنکھوں کے پیچھے کرب بھرے کچھ نوحے ہیں اور دل چیر دیتے لہو میں ڈوبے کچھ دوہے ہیں۔ لوگ مگر چہرہ دیکھتے ہیں اور بیبیوں نے ان آنکھوں کی بس خیرہ کن چمک دیکھی ہے۔ اس چہرے کے پیچھے اجڑی بستی دل کی خستگی اور ان آنکھوں کی جھیل میں ڈوبی حسرت بھری کہانیاں کب دیکھتے ہیں ؎
جو تار سے نکلی وہ دھن سب نے سنی ہے
جو ساز پہ گزری وہ کس دل کو پتا ہے

آئیے اِک نظر ان دل فریب نظاروں اور من موہ لیتی بہاروں کے پیچھے انسانیت کو شرما اور صاحبان دل کو لرزا دینے والی کچھ تلخ حقیقتیں بھی جھانک کے دیکھ لیں۔ میر اخیال ہے اس سے آشنائی کے لیے ہمیں جمال عبداللہ عثمان سے ملاقات کر نی چاہیے۔ جمال عبداللہ عثمان ایک نوجوان قلم کار ہے۔ سوات سے آئے اس نوجوان کا لہجہ کشمیری سیبوں کی طرح رسیلا اور اس کا قلم اہل زبان کی طرح البیلا ہے۔

جمال عبداللہ عثمان نے اپنا کیریئر کراچی کے مختلف اخبارات میں لکھنے سے شروع کیا۔ پھر جسارت نے اس کا کالم چھاپا اور پھر یہ کراچی کے جرات مند اخبار ”امت“ کا حصہ بن گئے۔ امت میں انہوں نے کالم نگاری اور فیچر رائٹنگ میں اپنا لوہا منوایا۔ انہی دِنوں سوات میں ہمیں اپنی بقا کی جنگ لڑنا پڑی اور لاتعداد صحافیوں کے استاذ جناب اطہر ہاشمی کو اس نوجوان کے سواتی ہونے کا پتا چلا تو انہوں نے اسے فیلڈ میں بھیج دیا۔ ایک تو اپنے علاقے کی خانہ ویرانی اور پھر سوات کا جنت نظیر خطہ بندوق کی آگ سے جھلسا اور بارود کی بو سے متعفن ہوا اس سے دیکھا نہ گیا۔ خیر ایک صحافی کے لیے آنکھوں کی بندش کے کیا معنی؟ وہی مثل کہ گھوڑا گھاس سے محبت کرے گا تو کھائے گا کیا؟

نہ چاہتے ہوئے بھی اس نے وہ نوحے لائیو دیکھے، اور وہ سب جبر دل پہ سہے۔ انسانوں کو چند بے دردوں کے کیے کی پاداش میں اپنے پیارے گھر گلیارے اور باغ و بازار چھوڑ کے مفلسانہ و مہاجرانہ نکلتے دیکھا۔ اس نے ہنستے بستے گھروں سے انجانی مسافتوں کو نکلتے مسافروں کے اشک بھی گنے اور ان کے پاؤں میں چبھے کانٹے بھی شمار کیے۔ اس نے بعض کم اندیشوں کی اٹھائی گرد کی اس دھول میں کئی نیلی آنکھوں اور کئی شہابی گالوں کی سندرتا اور مستقبل کو گم ہوتے بھی دیکھا۔ اس نے خیموں جیسے برقعوں میں جینے کو سعادت اور عادت سمجھنے والی کئی مہ رخوں کو تپتے سورجوں تلے بے پردہ جھلستے، نانِ جویں کو بلکتے اور اپنوں کی بے بسی کی تڑپ سے تڑپتے اور مچلتے دیکھا۔ یہ دیکھتا رہا، خود سے الجھتا رہا، گاہ روتا اور گاہ دور دیس والوں کے لیے آنکھوں دیکھے احوال لکھتا رہا۔ ستم کی سنگلاخ چکی کے پاٹوں میں آئے انسانوں کی سیاہ بختی پر یہاں کبھی یہ خود رو دیا اور کبھی اس کے قلم نے کچھ آنسو جذب کرکے دور بستے انسانوں کو رلایا۔

پھر ایک رات جب یہ نوجوان سو کے اٹھا تو اس کے چشم دید وہ سارے درد، وہ سارے کرب، وہ سارے نوحے اور وہ سارے جگر خراش کردار ایک کتاب ہوگئے تھے اور یہ کتاب ”لہورنگ داستان“ کے نام سے آج تک میری دراز میں پڑی ہے اور میں اسے کبھی کامل پڑھنے کی جرات نہیں کرسکا۔ کاش! کبھی مجھے اتنا حوصلہ ارزاں ہو کہ میں ایک قوم کے اشک سہ سکنے کا ارادہ باندھ سکوں تاکہ اس نوجوان کو اس کتاب کی رسید دے سکوں۔ بہرحال یہ تاریخ کے ایک حساس عہد کی امانت تھی جو اس شخص نے عہد آیندہ مورخ کے لیے عین چوراہے پر رکھ دی ہے۔

مجھے نہیں معلوم کہ اسلام آبادی چائے والا سواتی ہے، قبائلی ہے یا وزیرستانی یا کسی اور علاقے کا۔ مجھے نہیں معلوم وہ کسی درسگاہ کے اجڑنے سے چائے والا بنا ہے یا اپنے گھرکے لٹنے سے اتوار بازار میں آبسا ہے۔ مجھے نہیں معلوم کہ اس جیسے اور کتنے اپنے لٹے مستقبلوں کے سہانے سپنے، اپنے چکنا چور ہوگئے خوابوں کے ریزے اور اپنے گم ہوگئے سکولوں میں بکھرے بستے تلاش کرتے کرتے کہاں کہاں کاغذ چننے والے، بوٹ پالش والے، چائے والے، ورکشاپ والے چھوٹے بنے ہماری بے حسی کا گلہ ثبوت ہوا کرتے ہیں۔ میں کچھ بھی نہیں جانتا، لیکن شعر و اد ب سے کچھ نہ کچھ تعلق رکھنے کے حوالے سے اپنوں سے اتنا پوچھنا چاہتا ہوں کہ صاحبو! ناصحو! پند گرو! مقتدرو! حکمرانو! اپنے عشاق سے ایسے بھی کوئی کرتا ہے؟

اے میری تقدیر کے بننے اور بگڑنے کے قلمدان تھامنے والو! یہ ایک چائے والا کہ جس کی گالوں اور جس کی آنکھوں نے مصرکے بازار تمہارے فٹ پاتھوں پر سجادیئے ہیں۔ سچ کہوں تو تم نے ان نیلی آنکھوں سے کچھ اچھا سلوک نہیں کیا۔ یہ نہیں کہ انہیں گھروں سے نکال دیا، بلکہ یہ کہ پھر گھروں کو جانے نہیں دیا۔ یعنی جانے دیا؟ مگرریزہ ہوگئی زمیں پر گھر مگر کہاں؟ وہ سڑکیں اور وہ باغ کہاں تھے؟ وہ سکول اور وہ مدرسے کہاں تھے؟ وہ تتلیاں، وہ پھول اور وہ جگنو وہاں کہاں تھے؟ وہ تو اک ایسی اجڑی دلی ہے کہ جسے نوحہ کہنے کو کوئی غالب اور جسے المیہ کہنے کو کوئی شیکسپیئر تک نہیں ملا۔ آئیے اسی نوجوان کے چند روز پہلے کے ایک فیس بک سٹیٹس سے نیلی آنکھوں کا تازہ نوحہ دیکھتے ہیں کہ شاید کسی بنجردل میں ان کے لیے امید کا کوئی گلاب کھل اُٹھے۔

ابھی ایک وزیرستانی دوست آئے۔ چہرے سے شدید تھکاوٹ عیاں تھی۔ میں نے حال احوال پوچھا تو کہنے لگے: ”چار سال بعد اس نیت سے گئے تھے کہ حالات بہتر ہوگئے ہوں گے، لیکن خواب اور سراب کے سوا کچھ نہیں۔ سب ختم ہوچکاہے۔ آبا و اجداد نے جو مکان بنائے تھے، نئی نسل دہائیاں محنت مزدوری کرکے بھی انہیں دوبارہ تعمیر نہیں کرسکتی۔ مٹی کے یہ گھر تو جیسے تیسے بن جائیں گے۔ نہ بھی بنیں گزر ہی جائے گی، مگر سب سے تکلیف دہ بات یہ ہے کہ ہماری پوری کی پوری نسل اَن پڑھ پل رہی ہے۔ جہاں پندرہ سالوں سے گولہ بارود اور شیلنگ کے سوا کچھ نہ برساہو، وہاں تعلیم کیسی؟ علم کیسا؟“

دوسری شادی موضوع بحث ہے۔ اس کے حق میں شرعی دلائل اور کچھ زمینی حقائق پیش ہو رہے ہیں۔ میرا خیال ہے خاکوانی صاحب اور زاہد مغل صاحب کی گفتگو کے بعد بھی اس بحث میں کچھ اضافہ کیا جا سکتا ہے۔ اس میں تو کوئی شک نہیں کہ مردوں کو اور خاص طور پر مذہب سے تعلق رکھنے والے مردوں کو اس موضوع سے اک گونہ دلچسپی ہوتی ہے۔ بعض فارغ الاوقات پروفیسروں کو بھی میں نے اسی جنت ِ پر فریب کے تذکرہ سے اپنی تشنہ آروزؤں کی چنگاری کو ہوا دیتے ہوئے دیکھا ہے۔ پھر جن دوستوں کو مال و دولت کی آسودگی حاصل ہو جاتی ہے، وہ بھی اس حوالے سے جستجو کرتے پائے جاتے ہیں۔ دلچسپ ترین بات یہ کہ اس سلسلے میں آپ نوے فی صداُن لوگوں کو آہیں بھرتے، گفتگو کرتے اور حتمی منصوبے بناتے دیکھیں گے کہ جن کی تین نسلوں میں سے کسی نے دوسری شادی نہیں کی ہوتی اور نہ آئندہ سوا تین نسلوں کو یہ جرات ہوسکنی ہوتی ہے مگر اس کے باجود دوسری شادی کا تذکرہ ان کے لیے ایک وظیفے کا درجہ اختیار کر لیتا ہے۔ یہ ہر فرصت میں مخولیہ انداز میں خیالی منکوحہ کے فیس فیچرز تک کھلے عام تقریری انداز میں بیان کرتے ہیں۔ اگر پروفیسر ہوں تو ہر آئندہ بیچ کی منتخب شاگردات کو اپنی دوسری بیوی کے روپ میں دیکھنے لگتے ہیں، بلکہ وہ پسِ تعلیم عزائم سے قطعی بےخبر ان خوبروؤں کو متوقع نظروں سے منکوحہ، منسوبہ اور مخطوبہ و مطلوبہ سمجھ بیٹھتے ہیں، اور نت نئے نک نیم ایجاد کر کے انھیں مزعومہ حیثیت سے پچکارنے بھی لگتے ہیں۔

ادھر یہ موضوع خواتین کی انا کے غبارے سے ہوا اور ان کے نازک جسم سے جان نکال دینے کی دوا ثابت ہوتا ہے بلکہ بعض دفعہ تو جسمانی و معاشی ہر دو اعتبار سے نکو سے نکو اور نکمے سے نکمے مرد بھی دوسری شادی کی دھمکی کو بیویوں پر بطور نفسیاتی ٹارچر استعمال کرنے لگتے ہیں۔ مشرف کے دور عجائب میں یہ بات بھی سامنے آئے تھی کہ شادی سے پہلے دونوں پارٹیوں کے جسمانی ٹیسٹ کیے جائیں اور ان ٹیسٹوں کے حمایت پر ہی شادی کی اجازت دی جائے۔ یہ ایک اچھا اقدام تھا، اگرچہ اس میں مینٹلی ٹیسٹ کی بات بھی ہونی چاہیے تھی، کیونکہ گھر چلانے کے لیے جسمانی استعداد جتنی ہی ذہنی صلاحیت بھی ضروری ہوتی ہے۔ لیکن اگر ایسا کوئی ٹیسٹ واقعی رکھ دیا جائے تو خدشہ ہے کہ دوسری شادی کے لیے جملہ لسانی طاقت صرف کر دینے والے آدھے سے زیادہ وکیل تو پہلی ہی شادی کے منکر ہو اٹھیں گے۔ سیکس ایجوکیشن سے تو ہم نے اسلام کے نام پر انکار کر دیا حالانکہ خود مدارس کی پہلی جماعت سے بچوں کو سیکس ایجوکیشن دی جاتی ہے۔ ہم ڈرتے شاید اس لیے ہیں کہ ہمارے تمام حساس معاملات کے پیچھے مغرب پوری تیاری سے اپنا ایجنڈا لیے کھڑا ہوتا ہے، اس کا نقصان لیکن یہ ہوتا ہے کہ ہمارے جوان اپنے ضروری ترین سفر پر بھی کچی پکی معلومات لے کر روانہ ہو جاتے ہیں۔ شادی کے بعد وہ ایک دوسرے کے اہم ترین حقوق اور مستقبل سےگہرا تعلق رکھنے والے معاملات سے یا تو قطعی بےخبر ہوتے ہیں یا شرم، شرع یا غفلت کی بنا پر ایک دوسرے کی زندگی اذیت و عذاب کر دینے کا باعث بننے لگتے ہیں۔ ان میں سے بعض مسائل کا تعلق تو براہِ راست خواتین کی صحت اور جان تک سے جڑا ہوتا ہے۔ وہی صحت اور جان کہ جس کی خاطر شریعت کبھی حرام تک کی بھی اجازت دے دیتی ہے۔ میرے علم میں کچھ وہ لوگ بھی آئے کہ جنھوں نے زیادہ بچے پیدا کرنے جیسے مقاصدِ شریعت کو بیمار اور کمزور بیویوں پر بھی نافذ کرکے انھیں ہمیشہ کی مریضہ بنا دیا، بعد میں اپنی روش پر نادم ہوتے دیکھا گیا۔ یقینا دوسری شادی کی اجازت ہے مگر یہ حکم ہرگز نہیں۔ شادی تو مطلق پہلی بھی ہر ایک پر فرض نہیں۔ حدیث ہے کہ اے گروہِ نوجواناں! تم میں سے جو استطاعت رکھے، اسے شادی کر لینی چاہیے۔ یعنی شادی مشروط ہے استطاعت سے۔ توکیا شادی کے لیے ہمارے دماغوں پر چھائی ایک ہی استطاعت ہے؟

ایک اہم چیز جس کی طرف توجہ دینا ضروری ہے، وہ ہے بچوں کی پرورش و پرداخت اور ان کی تعلیم و تربیت۔ یہ بھی شادی کے پیکج سے جڑی ایک ناگزیر چیز ہے۔ یوں نہیں کہ شادیاں توآپ متعدد فرما لیں لیکن بچوں کو خودکش فیکٹریوں کے حوالے کر دیں۔ اولاد کے حقوق کی ادائیگی کا بھی آپ کو شادی کے وقت ہی سوچنا ہے۔ ایک اور چیز جسے شریعت نے ملحوظ رکھاہے، وہ عرف ہے۔ ہمارے کچھ دوست خلوص کی جھونک میں آ کر عرب کلچر کو برصغیر پر نافذ کرنے ہی کو منشائے اسلام یا نفاذِ اسلام سمجھنے لگتے ہیں۔ حالانکہ اسلام انسانوں کے جینز میں رچی بسی مثبت علاقائی چیزوں کو بدل کے اذیت پہنچانے نہیں آیا۔ خوشی اور غم کے سارے طریقے آپ کے دیسی ہو سکتے ہیں بشرطیکہ شریعت کے عمومی اصولوں سے وہ نہ ٹکرائیں۔ مثلاً حدیث میں آیا ہے کہ اگر دن کو کسی کا جانور کسی کی فصل اجاڑ دے تو قصور فصل والے کا ہے اور اگر رات کو یہی کام ہو تو جانور والے کو ہرجانہ بھرنا پڑے گا۔ کیونکہ عموماً دن کو جانور کھلے اور رات کو بندھے ہوتے ہیں۔ عرب علماء نے مگر صراحت کی کہ اگر کسی علاقے میں معمول اس کے برعکس ہو تو اسی کے مطابق کرنے کو حدیث پر عمل گردانا جائے گا۔ سو عمومی اعتبار سے دوسری شادی میں آپ فوائد اور نقصانات کا جائزہ مقامی تناظر میں بھی لیں گے۔ پھر یہ واحد دلیل قطعی مؤثر ہتھیار نہیں کہ چونکہ جائز ہے سو اب کر کے اور مر کے رہا جائے گا۔ جائز تو بینگن کی سبزی کھانا بھی ہے، لیکن جب بےچاری خاتونِ خانہ پکا بیٹھے تو آپ کی تیوریاں چڑھ جاتی ہیں۔ تو بات یہ ہے کہ بہت سی جائز چیزیں بھی، حلال چیزیں بھی، ممکن ہے آپ کو یا آپ کے معاشرے کو موافق نہ بیٹھیں۔ میٹھا حلال ہے اور گوشت بھی مگر پہلے کو شوگر پیشنٹ اور دوسرے کو بلڈ پریشر پیشنٹ نہیں کھاتا۔ کھاتا ہے تو یہ خودکشی سمجھی جانی چاہیے۔ جائز اور حلال میں سے اپنے لیے Suitable تلاش کرنے کو اللہ نے ہمیں الگ الگ عقل دی ہے۔ اب یہ کہاں کی دانشمندی ہے کہ جب آپ کی شوگر کی وجہ سے آپ کی پہلی بیوی پریشان ہو کے دن رات آپ کی صحت کے لیے دعائیں کرتی ہو تو آپ اسے دوسری شادی سے دھمکانے اور خود کو بہلانے لگیں۔ پھر عدل کی بات ہوئی۔ قرآن نے تو خود اسے ناممکن کہا ہے لیکن یہ بھی ذہن میں رہے کہ عدمِ عدل کی خوبی کے ساتھ دوسری شادی کرنے والا قیامت کے دن یوں آئے گا کہ اس کا ایک پہلو مفلوج ہوگا۔

ہمارے معاشرے میں دوسری شادی کی کامیابی کی مثالیں کم از کم میں دیکھنے سے قاصر رہا ہوں۔ الا ماشاءاللہ ! ٹینشن بھری سبک رفتار زندگی میں آپ اولاد اور بیگمات کے مستقل ایکسرے میں رہیں گے۔ خرابی بہرحال آئے گی، بیوی نہیں تو اولاد شاکی رہے گی۔ دیکھیے نبی کریم ﷺ کی نجی زندگی میں بھی سوتن کے جذبات دیکھے گئے ہیں۔ نبی کریم ﷺ سا رحمدل اور عادل کون ہو سکتا ہے لیکن اس کے باجود یہ چیزیں وہاں طلوع ہوئی ہیں۔ سو گزارش یہ ہے کہ شادی پہلی ہو یا دوسری، محض اس کے شریعت میں جائز ہونے سے آپ کے لیے جواز ہرگز نہیں نکل سکتا۔ آپ کو اپنے لیے خالص مقامی اور نجی سطح پر اس کا جائزہ لینا ہوگا۔ اور پھر اس کی ایک قیمت ہے جو بہر صورت ادا کرنی ہوگی۔ ہاں اگر یہ سارے سود و زیاں ذہن میں ہوں اور صرف اپنی ہی عارضی رنگینی کے بجائے معاملے کی دوسری طرف پڑی سنگینی بھی ذہن میں ہو تو پھر بسم اللہ!

گزشتہ کالم پر ملک و بیرون ِ ملک سے کئی طرح کا ردِ عمل یا کہہ لیجیے فیڈ بیک موصول ہوا۔ جن لوگوں نے دعائیں دیں اور جو خوش ہوئے ان کا حساب درِ دل درج ہوا، تاہم جن کا نقطۂ نظر اس کے سوا تھا، ان میں سے ایک امارات کے مستند کالم نگار منیر احمد خلیلی صاحب کا کہنا تھا کہ آپ کے موقف سےگو اتفاق کرتا ہوں مگر علمی مؤقف صرف دلائل اور سنجیدگی سے پیش ہونا چاہیے، عرض کیا، چلیے اگلی نشست یوں سہی، ویسے کاش وہ چیچنیا کے دارالحکومت گروزنی میں ہونے والی اہلِ سنت کانفرنس کون؟ کی ویڈیو دیکھ لیتے۔ یقین کیجیے میں نے اس قدر سنجیدہ موضوع کو اس قدر منظم رقص کے تحت کبھی بروئے کار آتے نہیں دیکھا۔ یادش بخیر، مولانائے محترم مفتی منیب صاحب نے اردو اخبارات کی تاریخ میں اپنے پہلے بااعراب نیم عربی کالم میں لکھا تھا کہ یہ کانفرنس صرف اہل سنت کی تعریف کا حدود اربعہ مقرر کرنے کے لیے منعقد کی گئی تھی۔ یقینا ایسا ہی ہے اور یہ اپنے مقصد میں کامیاب بھی رہی۔ اتنی کہ جب تعریف کا اصلی حدود اربعہ مقرر ہوچکا تو الحمدللہ آدھے اہلِ سنت اپناحقیقی حدود اربعہ کھو چکے تھے۔ ویسے میرے ساتھی الل ٹپ کا کہنا ہے کہ بات اگر صرف تعریف ہی مقرر و متعین کرنے کی تھی تو اس کے لیے تو محض کسی پروفیسر کی نیم پخت پی ایچ ڈی کو تکلیف پہنچا کے بھی کام چلایا جا سکتا تھا، آخر اس کی خاطر گروزنی میں کروڑوں کے اخراجات اٹھا کے پیوٹن کو منظم رقص پیش کرنے کی کیا ضرورت تھی۔ مفتی صاحب نے مزید لکھا تھا کہ تعریف متعین کرنے کے لیے آنے والے مہمان عالمی سطح کے جید سکالر تھے۔ اس بات کی تحقیق اس لیے مشکل ہے کہ وہاں سکالرانہ عالم ِرقص میں معلوم و نامعلوم، شاہد و مشہود اور من و تو میں فرق کرنا بےحد مشکل بلکہ ناممکن ہو گیا تھا۔ اگر آپ وہ مبارک ویڈیو دیکھنے کی سعادت سے واقعی محروم رہ گئے ہیں تواس عاجز پر یقین کرلیجیے کہ اس روح پرور باوردی رقص میں ہر عالِم کا وہ عالَم تھا کہ سبحان اللہ ثم سبحا ن اللہ !یعنی
ایک ہی صفِ (رقص) میں کھڑے ہو گئے محمود و ایاز
نہ کوئی ’عالِم ‘رہا نہ عالم لوہار

ایک قاری کا خیال یہ تھا کہ مجھے محض مفتی صاحب کی عینک کو دیکھ کے کالم سے نہیں بدکنا چاہیے تھا۔ ان کا خیال تھا کہ عینک سے نہیں مجھے صاحبِ عینک سے کوئی معاملہ ہے، میں نے عرض کی کہ ہرگز نہیں۔ مفتی صاحب کے لیے میں نے کل بھی سنجیدہ و متین کے الفاظ استعمال کیے اور آج پھران کی شخصیت کے لیے اپنے انھی الفاظ پر اصرار کرتا ہوں۔ پیر نصیرالدین مرحوم کے بعداپنے مشرب میں آنجناب کا شمار ان چیدہ و چنیدہ شخصیات میں ہوتا ہے کہ جن کا احترام بین المسالک طور پر مسلم ہے۔ پھر مفتی صاحب کی نستعلیق نثر اور شستہ فکر کا میں باقاعدہ مداح ہوں۔ سچ کہوں تو مفتی صاحب جیسا بےباک آدمی پورے مسلک میں شاید دوسرا کوئی نہ ہو۔ کوئی ہے جو نعت جیسی مقدس و مطہر صنف کو سٹیج پر جھومتے نعت خوانوں پر وارے جاتے نوٹوں تلے دبی دیکھ کر بلبلا اٹھے اور اپنے اخباری کالم میں اسے سٹیج کی اُس ذوق مند صنف سے تشبیہ دے ڈالے کہ جسے پہلے شرفا چھپ چھپا کے کوٹھوں پر دیکھتے تھے اور آج کوٹھی میں مع فیملی اکتائے اکتائے دیکھتے ہیں۔ اور یہ بھی مفتی صاحب ہی تھے کہ جنھوں نے انٹرنیٹ پر وائرل ہو جانے والی اپنی ایک ویڈیو میں اپنے ہی ناموروں کو لتاڑ ڈالا کہ یہ جو ان کی غفلت یا تساہل کی بناپر خانقاہوں پر سجدہ ہائے جہالتِ ہو رہے ہیں اور یہ جو اس دنیا کی دیگر خرافات انھوں نے ڈھونڈ نکالی ہیں تو کیا اللہ کے ہاں دینے کے لیے اس کا کوئی جواب ہے ان کے پاس؟

دیکھیے دماغ اللہ نے سبھی کو الگ دیا ہے اور سوچ و فکر کی انفرادیت پر پابندی تو بےدماغوں کا دماغ ہو سکتی ہے اور کچھ نہیں، چنانچہ کسی کی فکر و فقہ سے اختلاف کرنا آپ کا محفوظ حق ہے۔ مگر شخصیات کا احترام بھی میرے ہاں واجب ترین ہے۔ اس کالم کے قارئین گواہ ہیں کہ اس خاکسار نے ممتازقادری کے حق میں اس وقت کالم لکھ ڈالا تھا کہ جب قلم اور کیمرے اور نوا اور وفا سبھی پر سلطانی پابندی عائد تھی۔ ’’سب اچھوں میں کیا اکیلا طاہرالقادری برا ہے؟‘‘ اس عاجز نے طاہرالقادری صاحب کے لیے یہ سوال اس وقت اٹھایا تھا کہ جب مذہبی و مسلکی اور سیاسی لوگ ہی نہیں، قاسمی و صدیقی صاحبان جیسے سرخیلِ صحافت بھی اپنے قلم کی جملہ جولانیاں اور اپنے فکر کی جمیع طغیانیاں بحق نوازشریف اور بخلاف ِ قادری صرفِ درِ میکدہ ٔ محبت کر چکے تھے۔ اور ہاں ٹھیک اس کالم سے پچھلا کالم اِس آدمی نے الزامات کی زد میں آئے اُس مولانا الیاس گھمن کو دستیاب شرعی حقوق کا واویلا کرتے لکھا تھا کہ جس الیاس گھمن صاحب کی تیزی زبان اور نامطلوب شعلے برساتی تقریر اس عاجز کو کبھی خوش نہیں آئی تھی۔ انسان ہوں اور غلطی کا پتلا مگر واقعہ یہ ہے کہ جب سے اخبار کے لیے قلم سنبھالا ہے۔ اسے قومی مفاد کی خاطر گروہی اور ادنیٰ مفادات سے جدا کر لیا ہے اور کم از کم اس کالم پر خدا کے بعد انسانوں میں سے سب سے پہلا حق مظلوم کا خود پر عائد کر رکھا ہے۔ اس سے قطع نظر کہ اس کا رنگ، نسل یا قومیت کیا ہے۔ ویسے توا س سے بڑا جھوٹ بھی کوئی نہیں کہ کوئی اپنے آپ کو غیر جانبدار قرار دینے لگے ؎
ہوس چھپ چھپ کے سینے میں بنا لیتی ہے تصویریں

(ہاں آدمی کی ہمت یہ ہے کہ سینے میں پلتے تعصبات کو امکانی حد تک کم ترین سطح پر لے آئے۔) اور اس سے بڑا جرم اور افسوس بھی کوئی نہیں کہ گھٹیا مفادات کی خاطر آدم کی اولاد اور رسولِ رحمت کی امت کو رنگوں، مسلکوں اور فرقوں میں بانٹ دیا جائے۔ لیجیے احباب آج انھی غیر ضروری اور فضول گزارشات پر اکتفا کیجیے۔ فضول اور غیر ضروری اس لیے کہ اگر ہم انھیں مان ہی لیتے یا ان چیزوں کا اثر ہی لیا کرتے تو بھلا ایسی وضاحتوں کی نوبت ہی کیوں آتی۔ ان شااللہ ا س نوعیت کی چند سنجیدہ اور آخری باتیں اگلی نشست میں پڑھیے گا۔ اللہ حافظ !

قائدِ اعظم سے صحافی نے پوچھا ’’ آپ سیاستدان نہ ہوتے تو کیا ہوتے‘‘ فرمایا۔ ’’صحافی‘‘۔ پھر اس کی وضاحت یوں فرمائی’’ہم جہاز میں سوار ہوکے کسی جگہ اترتے ہیں تو عین دروازے پر ایک صحافی کسی ایسے واقعہ پر ہم سے رائے جاننے کو آ موجود ہوتا ہے کہ جو واقعہ ابھی ابھی کہیں رونما ہوا ہوتا ہے اور جسے ہم نے ابھی قطعا جانا نہیں ہوتا۔ سو میں سیاستدان نہ ہوتا تویقینا ایک صحافی ہونا پسند کرتا۔‘‘

یہ قائدِ اعظم تھے، اور ظاہر ہے، ہماری طرح صحافی نہ تھے، سو ان کی مجبوری تھی کہ واقعہ جانے بغیراس پر رائے نہیں دیتے تھے، ایک صحافی الحمدللہ چونکہ نہ قائدِاعظم ہوتا ہے اور نہ سیاستدان، سو ثم الحمدللہ وہ ایسے ہر واقعہ پر ڈٹ کے رائے بھی دے سکتا ہے اور متعدد کالم بھی رقم فرما سکتاہے۔ تفنن برطرف صحافت واقعی ایک مستعد بیداری، ہمہ وقتی ہوشیاری اور خرد مندانہ خبرداری کا نام ہے، جس سے ہم جیسے کبھی تو دور ہوتے ہیں اور کبھی کوسوں دور۔

صاحبو! ہم بھی عجب ہی صحافی ہیں کہ جب کبھی کسی مصروفیت و غفلت کے جہاز سے اترتے ہیں تو سامنے کوئی مفتی عبدالقوی مد ظلہ العالی یا پھر مولانا الیاس گھمن صاحب اپنی گھمن گھیریوں سمیت ہماری بےخبری کا منہ چڑا رہے ہوتے ہیں۔ اب کے پتا چلا کہ کسی اور نے نہیں، یہ پھول شبلی ہی نے تاک مارا ہے، میرا مطلب چاند چڑھانے والے (مفتی عبدالقوی صاحب) نے نہیں، بلکہ چاند دیکھنے والے سنجیدہ و متین مفتی صاحب کے کالم نے بہت سے مسلمانوں کو خوفزدہ کر رکھا ہے۔ خطِ نستعلیق میں بااعراب عربی (جس میں کہیں کہیں اردو بھی تھی) میں لکھا اور دنیا و دلیل پر چھپا یہ کالم دیکھا تو میں نے بھی تھا مگر پھر اسے مفتی صاحب کو عینک لگنے کی وجہ سمجھ کے چھوڑ ہی دیا تھا۔ پھر مگر گھبرائی گھبرائی سی آتی تفصیلات کے مجبور کرنے پر یہ کالم پڑھنا ہی پڑا۔
جانا پڑا رقیب کے در پر ہزار بار
اے کاش نہ جانتا تیری رہ گزر کو میں

واقعی یہ ایک حیران کن بلکہ پاکستان و عالم اسلام کے موجودہ حالات میں خاصا پریشان کن کالم تھا، جسے شاید مدیر صاحب نے بھی محض عربی سے متاثر ہو کے اور مضمرات کا اندازہ لگائے بغیر چھاپ دیا۔ قصہ یہ تھا کہ چیچنیا کے دارالحکومت میں جمع ہو کر چند بھاری بھر کم غیر ملکی ناموں والے پروفیسروں نے، جو ظاہر ہے کہیں نہ کہیں کسی نہ کسی یونیورسٹی وغیرہ میں زیرِ جاب بھی تھے، ’’اہلِ سنت کون ؟‘‘ کے عنوان کے تحت یہ نیک کام کیا کہ امت کے کچھ لوگوں کو تو ازراہِ مہربانی اہلِ سنت ہی رہنے دیا جبکہ باقی کئی اہم ترین لوگوں کو اس دائرہ سنت و الجماعت سے فی الفور نکال باہر کیا کہ چلو باہرنکلو، کیا رش لگا رکھا ہے۔

اب تک تو ہم نے اسلافِ امت سے یہی سنا تھا کہ فی الاصل اس امت کے دو ہی فرقے یا گروہ ہیں، یعنی اہل تشیع اور اہلِ سنت۔ اگرچہ اس سے آگے یہ دونوں از خود بھی کافی خود کفیل ہیں۔ یہ مگر پہلی دفعہ ہوا کہ صدیوں سے چلی آتی اس تقسیم کو پیوٹن کے زیرِسایہ تقسیم مزید کے عملِ زہ سے بھی گزارا گیا۔ یکلخت میں نےسوچا کہ جب سعودیہ ان دنوں ایران کے مقابل وہابیوں کے علاوہ بھی سبھی اہلِ سنت کو قریب بلکہ قریب تر کر رہا ہے تو پھر اس کانفرنس کومہبطِ وحی مکہ و مدینہ سے اتنی دور لے جانے کی آخر کیا ضرورت تھی؟ یادش بخیر، اقبال کے پاس غالباً مولانا ظفر علی خان پریشان آئے کہ انگریز حجاز میں ہسپتال کھولنے کے بہانے اپنا کوئی اڈا کھولنا اور مسلمانوں سے چندہ بٹورنا چاہتا ہے۔ اقبال نے کاغذ پکڑا اور یہ نسخہ لکھ کے تھما دیا کہ جاؤ اب یہ ہسپتال نہ بنے گا؎
اک پیشوائے قوم نے اقبال سے کہا
کھلنے کو جدہ میں ہے شفاخانہ حجاز
اوروں کو دیں حضور! یہ پیغام زندگی
میں موت ڈھونڈتا ہوں زمین حجاز میں
یاحیرت! اقبال موت بھی حجاز میں ڈھونڈے، اور اقبال کا شاہین اپنا دین بھی پیوٹن کے گروزنی میں جا ڈھونڈے؟ ویسے ظاہر ہے کہ جو چیر پھاڑ پنجۂ عیسیٰ میں آئے ہسپتال میں ممکن ہے وہ مطبِ نبوی کی حکیمانہ حکمت میں کہاں ممکن ہے۔ خیر، لارڈ ماؤنٹ بیٹن کے فارمولۂ تقسیم کی طرح گروزنی کی تقسیم اہلِ سنت کا فارمولہ بھی بڑا سادہ سا تھا۔ یعنی جو مسلمان فلسفہ یونان کی عقلی موشگافیوں کے وضع کردہ نظامِ علم الکلام کے بجائے محدثین کے بتائے سادہ طریقے سے رب کی صفات کو مانے، نکلے یہاں سے، اس کا کوچۂ اہلِ سنت میں بھلا کیا کام؟ لارڈ ماؤنٹ بیٹنی یہ فارمولہ ہے کیا؟ آپ سادہ انداز میں یوں سمجھیے کہ صلح حدیبیہ کے موقع پر قرآنِ مجید، سورہ فتح میں ایک آیت نازل ہوئی۔ ’’وہ جو تمھاری بیعت کرتے ہیں وہ تو اللہ ہی سے بیعت کرتے ہیں، ان کے ہاتھوں پر اللہ کا ہاتھ ہے۔‘‘
( ترجمہ احمد رضا خاں بریلوی)
اب یہاں اللہ تعالیٰ کے لیے استعمال ہوئے لفظ ’ہاتھ‘ (ید)کو سمجھنے میں کچھ مسلمانوں کو مشکل پیش آئی۔ صحابہ کو نہیں، فلسفہ یونان کے علم الکلام کے زیر اثر آنے والے بعد کے کچھ لوگوں کو۔ انھوں نے کہا، ہیں ہیں؟ تو گویا اللہ کا بھی ہاتھ ہے؟ ہرگز نہیں، ہاتھ تومخلوق کا ہوتا ہے، اللہ کا ہاتھ مان لیا توگویا اللہ کو تونعوذ باللہ مخلوق جیسا مان لیا، نہیں جی، ہرگز نہیں، یوں تو ہم نہ مانیں گے، چلیے جلدی کیجیے، اس ید کا معنیٰ کچھ اور کیجیے، جو بھی کرو بس اللہ کا ہاتھ نہیں ہونا چاہیے۔ حالانکہ علاوہ اور علمی دلائل کے علماء نے علم بلاغت (زبان و بیان کے علم) سے بھی انھیں سمجھایا کہ لفظی مشارکت اور تشبیہ سے یہ قطعا ًلازم نہیں آتا کہ جس سے تشبیہ دی گئی ہو، تشبیہ دیا جانے والا بھی سو فی صد ویسا ہی مانا جائے۔ مثلاً ن لیگ والے نواز شریف کو اگر شیر کہتے ہیں تومعاف کیجیے گا کیا اس سے یہ بھی لازم آئے گاکہ اب میاں صاحب بےچارے کی شیر کی طرح دم بھی مانی جائے؟ مثلاً منہ انسانوں کا بھی ہے اور جانوروں کا بھی۔ تو اگر انسان یہ کہیں کہ ہمارے منہ کو آج سے ٹانگ کا پٹ کہا جائے وگرنہ ہماری جانوروں سے مشابہت لازم آئے گی؟ تو کیا ایسا سمجھنا درست ہو گا؟ یقینا نہیں۔ چنانچہ محدثین نے یہ رائے مسترد کردی، انھوں نے کہا کہ بھئی معنیٰ تو ہم وہی کریں گے جو بنتا ہے، البتہ ہم یہ کہیں گے کہ ہے تو ہاتھ ہی مگر یہ ہاتھ مخلوق جیسا نہیں ہے۔ پھر کیسا ہے؟ بھئی جیسا اللہ کی شان کے شایاں ہے۔ ہم نے دیکھا تھوڑی ہے؟ جنت میں دیکھیں گے تو تفصیل بھی بتا دیں گے.

لیجیے صاحب! محدثین کے سچے اور سچے موقف والوں کو آج چند پروفیسروں کے زورِ بیاں نے گروزنی میں قابلِ گردن زدنی ٹھہرا دیا ہے۔ کہیے نعرہ ٔ تکبیر!اللہ اکبر! دیکھا کیسی شاندار کانفرنس تھی!

قارئین! بات لیکن اتنی سادہ بھی نہیں کہ کسی کے پرجوش نعرہ تکبیر میں لپیٹ دی جائے۔ کیونکہ اگر یہی اصرار ہے تو پھر امام بخاری، امام مسلم سمیت سارے محدثین یعنی امام احمدابنِ حنبل، امامِ مالک، امام شافعی کے علاوہ فقہا و علماء امام ابوحنیفہ، امام ابنِ تیمیہ، شاہ ولی اللہ محدث دہلوی، ابو الکلام آزاد، ثنااللہ امرتسری، مولانا داؤد غزنوی، علامہ احسان الٰہی ظہیر، پروفیسر ساجد میر، حافظ سعید، علامہ ابتسام الٰہی ظہیر اور نہ جانے کتنے اور لوگ اسی ایک گروزنی کانفرنس سے اور مفتی صاحب کے ایک کالم سے تا حکمِ ثانی کالعدم اہلِ سنت قرار پائیں گے۔ کیا یہ واقعی اتنا ہی آسان ہے؟ پھر یہ بھی تو سوچیے کہ جو صحابہ و تابعین دور عباسی میں فلسفہ یونان آنے سے پہلے پہلے رب کے پاس جا پہنچے، آیا انھیں گروزنی کانفرنس سے بچا لیا جائے گا یا گئی ان کی بھی اہلِ سنیت؟ شورش یاد آگیا۔ عجیب شخص تھا، ’شب جائے کہ من بودم‘ کے نام سے اپنے سفرِ عمرہ کی روداد لکھی توشاہوں پر اپنے کاٹ دار انداز میں تنقید کی، لکھا کہ وہ بدعت سے خائف ہو کے یا عدم توجہی کی بنا پر سنت کی یادگاریں گم کر رہے ہیں۔ جی اسی شورش نے جب سنا کہ کسی نے قائدِ اعظم کے ساتھی اور مسلک ِاہلِ حدیث کے رہنما داؤد غزنوی کے بارے میں کہا ہے کہ وہ جنت میں نہیں جائیں گے۔ پھر کیا تھا موچی دروازے میں شورش بپھر گیا۔ اپنے خاص طنطنے، دبدبے، دغدغے اور ہمہمے سے کہا، اگر داؤد غزنوی جنت میں نہیں جائے گا تو میں اس کے ساتھ جہنم میں بھی جانے کو تیار ہوں، لیکن تمھارے ساتھ تو میں جنت جانے کو بھی تیار نہیں۔ اللہ اللہ ! کیاخاص ڈکشن، خاص سانچے کےاور خاص طرح کے بڑے اور باصفا لوگ تھے وہ۔ جناب مفتی صاحب! خدارا اتنا تو سوچیے کہ اگر اسلام کے صفِ اول کے یہ سارے متذکرہ لوگ اہلِ سنت نہیں تو پھر اہلِ سنت ہے کون؟

کچھ دن ہوئے سوشل میڈیا اور کالم لکھنے پڑھنے سے دور ہی رہا ہوں، اور مت پوچھیے کہ کیونکر جیا ہوں؎
کچھ وقت تیری یاد سے غافل رہا ہوں میں
کچھ وقت میری عمر میں شامل نہیں رہا

دراصل میرا ڈیپارٹمنٹ ’رینوویٹ‘ ہو رہا تھا اور میری اس میں کچھ ذمے داریاں تھیں۔ جسم کو تھکا اور ذہن کو الجھا دینے والے کچھ کام۔ دراصل عمارت کی تزئین و آرائش ہی نہیں ہونا تھی، کوئی تین لاکھ کی کتب بھی خریدی جانا تھیں۔ کتاب دوستوں سے مشاورت بھی ہوئی۔ جناب عامر ہاشم خاکوانی صاحب نے مفت میں طویل دورانیے کی فونی کلفت اٹھا کر طویل فہرستِ کتب لکھوائی اور سریلی سرائیکی پٹی کے رسیلے یار ِ طرحدار شمس الدین امجد نے کچھ کتب کی مفت فراہمی کا سندیسہ لکھ بھیجا۔ کام توخیر ایک ہی دن میں کسی مکتبے پر کھڑے کھڑے بھی نمٹایا جا سکتا تھا اور بلکہ دفتر سے ایک فون پر بھی کہ الحمدللہ اب اردو بازار میں اتنی تو واقفیت ہو ہی گئی ہے۔ یہاں مگر جبلی بےآرامی اور کتاب سے محبت نے خوار کیا اور الحمدللہ یوں کہ؎
روح تک اتر گئی تاثیر مسیحائی کی

بہت بار ثابت ہو چکا کہ خود ساختہ ذوق کی خواری کے آگے سبھی خواریاں ہیچ ہیں۔ دفتر پہنچا تو دوستوں نے پوچھا، گھمن صاحب والی پوسٹ دیکھی، سبوخ سید نے اسے چھاپ ڈالاہے۔ عرض کی دیکھی تو ضرور مگر پڑھ کے نہیں دیکھی۔ بغیر کسی خاص ضرورت کے اس نوع کی چیزوں پر طبیعت ٹھکتی ہی نہیں۔ خیر میری درخواست پر احباب نے خلاصہ بتا دیا۔ فی الفور عرض کیا کہ سچائی تو خیر ابھی کیا معلوم مگر یہ بات پھیلانے کی تو ہرگز نہ تھی۔ بالفرض یہ سچ بھی ہے تو اسلامی صحافت توخیر چیزے دیگر است مگر عام صحافتی اصول بھی اس کی کہاں اجازت دیتے ہیں؟ ہم لیکن عرصہ ہوا صحافت میں اسلامی کیا انسانی قدروں کو بھی بصد عالم فراموشی چھوڑ چکے ہیں۔ ایک شخص کے بارے کوئی بھی بات کرتاہے اور ہم مجروح و ملزم کا موقف لیے بغیر الزام اچھالتے اور چھاپتے چلے جاتے ہیں۔ ایسے میں بھلا ایک عالمِ دین کی عزت کی کیا قیمت ہو سکتی تھی؟ رعایت اللہ فاروقی صاحب نے مگر اللہ کے اس بندے کے دفاع کا مورچہ لگایا لیا اور میں انھیں اس جراتِ رندانہ پر سلام پیش کرتا ہوں۔ اس کے باوجود پیش کرتا ہوں کہ رعایت اللہ فاروقی صاحب کا بھی ایک مسلک ہے اور گھمن صاحب تو سنا ہے دوسرے اہل مسلک کے لیے زبان بھی خار اشگاف رکھتے ہیں۔ رعایت اللہ صاحب کی مگر میں اکثر علماء کو مثال دیا کرتا ہوں۔ ایک شخص نے کس طرح فیس بک پر بیٹھ کر دینی مدارس سے نکلے سینکڑوں لوگوں کو متحمل، معتدل ، مدلل اور مہذب کر دیا۔ یہ اس عہد کے کسی پٹھان کی ایسی کرامت ہے کہ جس پر فریفتہ ہونے کے علاوہ پی ایچ ڈی کا مقالہ بھی رقم ہونا چاہیے کہ آخر جن پٹھانوں کی کبھی مذکر مونث تک درست نہیں بیٹھتی، انھی میں سے ایک شخص نے ٹھیک اُن لوگوں کی عقل کیسے ٹھکانے بٹھا دی کہ جنھیں آٹھ دس سال لگا کے ایک ہی عقل دی جاتی ہے کہ سوائے تمھاری اپنی عقل شریف کے جہاں میں کسی دوسرے کی عقل کبھی درست نہیں ہو سکتی۔

رعایت اللہ صاحب نے الزام تراشی کی اس فیکٹری کا محرک معاصرت کی مخاصمت اور چندے پر سے کھسکتی اجارہ داری تجویز فرمایا۔ لیکن ظاہر ہے کہ اس کے علاوہ اندھے تعصبات بھی اس کھلی نارِ شیطنت کو یوں ہوا دیتے ہیں کہ پیش قدمی میں شیطان تک کو شرما دیتے ہیں۔ اچھا فرض کریں، یہ سب سچ ہے، حالانکہ یہ فرض کرنا انسانیت کے آخری مسیحا نے ہرگز ہماری من مانی کے مطابق اتنا آسان نہیں رہنے دیا۔ مثلاًایک شخص نے دربارِ رسالت میں حاضری بھر کے اپنی غلط کاری کا اعتراف کر لیا۔ جلد از جلد اس کی جان پر حد کا نفاذ کر دیا جائے۔ یہی اس کی چھلکتی خواہش تھی۔ رسول ِ اطہرﷺ نے لیکن جزئیات پر مشتمل اتنے سوالات کیے کہ کاش صحافت سے وابستہ لوگوں نے بھی کبھی وہ جاننے کی کوشش کر لی ہوتی۔ کر لی ہوتی تو انسانیت کتنی شادماں ہو گئی ہوتی۔ دراصل نوے فیصد لوگ حقیقت سے آشنا نہیں ہوتے مگر مصیبت یہ کہ وہ اپنی اس نارسائی سے بھی آشنا نہیں ہوتے۔ دینی مدرسے کے ایک استاد کے مطابق، عصر کے بعد مدرسے سے چھٹی ملی تو طالب علم مدرسہ سے شہر گیا اور کوئی ایک گھنٹے میں لوٹ آیا۔ اب وہ اساتذہ کے سامنے بیٹھا روتا تھا کہ کس قیامت کی غلطی کا وہ ارتکاب کر بیٹھا ہے۔ پوچھا ، کیا کیا؟ کہنے لگا میں فلم دیکھ بیٹھا ہوں۔ اہلِ صحافت کہاں جانتے ہوں گے کہ مدرسہ کی چار دیواری کے اندر فلم اور ڈائجسٹ سے بڑا کوئی کبیرہ گناہ ابھی تک دریافت نہیں کیا جا سکا۔ اس سے پہلے کہ یہ پٹ جاتا۔ ایک معاملہ فہم استاد نے کہا فلم تو خیر تم نے ہرگز نہیں دیکھی۔ یہ مگر بااصرار بضد کہ فلم ہی دیکھی ہے۔ استاد کہیں اللہ کے بندے ایک گھنٹے شہر جا اور آ کر پوری فلم بھی دیکھ لی۔ ٹائم اینڈ سپیس کے تھم جانے کا یہ واقعہ ہوا تو کیوں کر؟ خیر کہا، چلو مانا فلم ہی دیکھی ہے مگر یہ بتاؤ وہ فلم کیسی تھی۔ کہنے لگا کہ ایک تانگہ تھا اور وہ گلی گلی گھومتا تھا اور اس پر بیٹھے تانگہ بان اعلان کرتے تھے اور اس تانگے پر بڑی سی فلم رکھی تھی اور میں نے ٹھیک وہی فلم دیکھ لی ہے۔ کچھ سمجھے آپ؟ یعنی اس دور کے مطابق تانگے پر تشہیر کے لیے رکھے فلمی پوسٹر کے دیکھنے کو اس ناواقفِ حال نے فلم دیکھنا تصور کر لیا اور چاہتا اب یہ تھاکہ اس جرم کی سزا پا کے پاک ہو جائے۔

قرآنِ مجید نے علم کو تین درجوں میں بانٹ دیا تھا۔ علم الیقین ، عین الیقین اور حق الیقین۔ کسی کے بتانے پر مان لیا تو یہ علم الیقین ہوا، بتانے والے نے بتایا وہاں آگ لگی ہے، بتانے والا جھوٹ بھی بول سکتاہے اور غلطی پر بھی ہو سکتا ہے، سو قرآن نے بتایا، کوئی خبرلائے، تحقیق کر لیا کرو، مبادا پھر مارے شرمندگی سے سر جھکائے پھرو۔ عین الیقین، یعنی آنکھوں دیکھی بات۔ سکرین پر ہم دیکھتے ہیں کہ آگ لگی ہے اور ہیرو اس میں جل کے مر گیا ہے۔ کئی سادہ دل اسی پر رو دیتے ہیں مگر واقفانِ حال ہی جانتے ہیں کہ بظاہر آنکھوں دیکھی فلمی آگ بھی فی الاصل آگ نہیں ہوتی اور یہی جل مرا ہیرو اب کسی اگلی فلم میں پھر سے جل مرنے کی مستعدی فرما رہا ہوتا ہے۔ یعنی آنکھوں کا دھوکہ۔ سراب اس کے لیے کیا مناسب لفظ ہے۔ حق الیقین، یعنی کسی نے آگ کا بتایا، آپ وہاں پہنچے، آنکھوں سے دیکھا مگر پھر اس آگ میں انگلی بھی ڈال دی۔ انگلی جلی تو گویا حق الیقین حاصل ہو گیا۔ افسوس ہم نے اک آوارہ چسکے کی خاطر یہ سب اور دوسرا سب کچھ طاق ِ نسیاں میں رکھ دیا۔ یہ ہمیں یاد تو آتے ہیں مگر جب ہم خود زد پر ہوں۔

ایسے ہی چلنوں میں پسا، مغرب کا ہر شہرت یافتہ آدمی آج اپنی آزادی اور پرائیویسی صحافت کے ہاتھوں گروی رکھ چکا۔ کیا یہ نہ کہا گیا کہ لیڈی ڈیانا کے اصل قاتل موت کی طرح پیچھے لگے تصویروں اور سکینڈلز کے رسیا کیمرہ تھامے وہ صحافی بھی تھے کہ جن سے بھاگتی ڈیانا جان سے ہاتھ دھو بیٹھی؟ مغرب نے نہیں، انسانی پرائیویسی کا تحفظ اسلام نے کیا تھا۔ یعنی عین اس رویے کو مذموم ٹھہرایا اور اس کی طرف کھلتے سب دروازے بھی سختی سے بند کر دیے۔ مثلاً جاسوسی سے روک دیا، مثلاً غیبت سے روک دیا، مثلاً یہ کہا کہ جو مسلمان کا کوئی دنیا کا عیب چھپائےگا، اللہ اس کے عیب کی قیامت کے دن پردہ پوشی فرمائے گا، مثلاً فرمایا کہ آدمی کے جھوٹا ہونے کے لیے یہ کیا کم ہے کہ وہ ہر سنی سنائی بات آگے کر دینے کی عادتِ بد میں مبتلا ہو۔ واقعہ افک میں ایک سبق آسمان سے ہمارے لیے یہ اترا تھا کہ ایسی بات کوسن کے تم نے اگنور کیوں نہ کر دیتے یا پھر اسے سوشلی پھیلا دینے کے بجائے محض اربابِ حل و عقد تک محدود رکھنے کی روش کیوں نہیں برتتے؟ ایک ویب سائٹ یا پیج کو ریٹنگ سے بڑھ کر بھلا کیا عزیز ہو سکتا ہے مگر کیا انسانیت اور اسلامیت سے بھی زیادہ؟ ایک مومن کی عزت سے بھی زیادہ؟ بغیر غلطی کے الزام تو خیر بہتان عظیم ہے، مگر رنگے ہاتھوں پکڑ لینے پر بھی ایسی روش تو اسلام ہمیں ہرگز نہیں سکھاتا۔ سلطانِ مدینہ کی ایک اور وعید ہم بھول بیٹھے ہیں کہ جو بھی کسی کو عار دلاتاہے، تب تک زمیں کے تختے سے وہ زمیں کی آغوش میں سما نہ سکے گا کہ جب تک اسی عیب میں مبتلا ہو کر اس کی رسوائی جھیل نہ لے۔ کیا ہم اتنی سی بات بھی نہیں سمجھتے کہ فحش خبر کی اشاعت بھی اسلام میں اشاعت فحاشی ہی ہے۔ ہمیں مکافات عمل سے بھی ڈرنا چاہیے ؎
جو آج ہم زد پہ ہیں تو خوش گماں نہ ہو
چراغ سبھی کے بجھیں گے ہوا کسی کی نہیں

بخاراور درد بذات خود کوئی بیماری نہیں ہوتے۔ یہ کسی نہ کسی بیماری کے انڈیکیٹر (اشارے) ضرور ہوتے ہیں۔ یہ بتاتے ہیںکہ جسم میں کوئی قابلِ علاج خرابی جنم لے چکی ہے۔ یوں یہ درد دینے کے باوجود انسانی جسم کے خیرخواہ اور محسن ہوتے ہیں۔ اپنی کم اندیشی کے باعث کچھ لوگ اس کے باوجود درد یابخار کو برا کہنے لگتے ہیں۔ یہ بھی مگر طے ہے کہ ایسے لوگ زیادہ عرصہ یہ زبردستی نبھانہیں پاتے۔ یہ اپنی عاقبت نا اندیشی کے ہاتھوں جلد ہی ناقابلِ علاج ہوکر اعزہ و اقربا کو داغِ مفارقت دے جاتے ہیں۔ اس کے برعکس جو لوگ باشعور اور سیانے ہوتے ہیں وہ ڈاکٹر سے رجوع کرتے ہیں۔ جس سے مرض کی تشخیص بھی ہوجاتی اوراس کا واجب علاج بھی ہوجاتا ہے۔

ہمارے جسم کی طرح ہی ہماری زندگی بھی ہے۔ موٹر وے پر کسی تیز رفتار گاڑی کی طرح دوڑتی ہماری زندگی میںبھی نشیب و فراز آتے رہتے ہیں۔ سطحی سوچ والا آدمی اس پر سر پکڑکے بیٹھ جاتاہے، تاہم اگر وہ سیدنا علی ؓجیسی سوچ رکھتا ہو تو پکار اٹھتاہے ”عرفت ربی بفسخ العزائم۔“ اپنے ارادے ٹوٹنے ہی سے تو میں نے اللہ کی قوت کا عرفان پایا ہے۔ بخار ہی کی طرح زندگی میں آ نے والی ایسی چھوٹی موٹی رکاوٹیں بھی اللہ تعالیٰ کی بہت بڑی نعمت بھی ثابت ہوتی ہیں۔ ان کی وجہ سے ہم اپنی سرپٹ اور بگٹٹ دوڑتی زندگی کو چند لمحے روک کراپنا ، اپنی مصروفیات کا او راپنے اعمال و کردار کا جائزہ لے لیتے ہیں۔ اپنی اصلاح کرلیتے اور یوں کسی بہت بڑے اور ناقابلِ تلافی نقصان سے بچ جاتے ہیں۔

قرآن مجید ہمیں بتاتا ہے: ’’ہم تمھیں چھوٹی چھوٹی آزمائشوں میں ڈالتے ہیں تاکہ تم اپنی روش کی اصلاح کرکے بڑے بحرانوں سے بچ جاؤ۔ عہد رسول میں مسلمانوں کو پہنچنے والے کم ازکم دو ایسے بڑے دردناک واقعات پر قرآن مجید نے یہی تبصرہ فرمایا ہے کہ یہ اپنے اثرات میں تلخ ہونے کے باوجود اپنے نتائج میں برے نہ تھے۔ ایک غزوہ احد اور دوسرا واقعۂ افک۔

اگر ہم خود کو غور پر آمادہ کر سکیں توموٹر وے پر پیش آنے والے حالیہ واقعہ میں بھی ہمارے لیے کئی اسباق ہیں۔ موٹر وے پولیس نے سادہ کپڑوں میں ملبوس قانون کی خلاف ورزی کرنے والے ایک آرمی نوجوان کو روکا۔ اس نے گاڑی بھگا دی۔ پولیس آفیسر نے پکڑلیا۔ اب یہاں بات بڑھ کے بگڑ گئی۔ ممکن ہے موٹر وے پولیس کی طرف سے ہی زیادتی ہوئی ہو، بہرحال آرمی آفیسر نے کمک منگوالی۔ جو ہونا تھا ہوا اور اس موٹر وے آفیسر کو وہ لوگ ساتھ لے گئے او ر مناسب ”تواضع“ کے بعد لوٹادیا۔

ممکن ہے اگر یہ کوئی اور دور ہوتا تویہ واقعہ اخبارات یا میڈیا میں رپورٹ ہونے تک قابو کرکے گم کیا جاسکتا۔ یہ مگر میڈیا ہی نہیں، سوشل میڈیا کا بھی دور ہے۔ سوشل میڈیا نے بڑے کرشمے کر دکھائے ہیں۔ عرب بہار میں مشرق وسطیٰ میں بدلتی حکومتیں ہوں۔ کشمیر و فلسطین اور مصر میں سوشل میڈیا کی کارکردگی یا کامیابی ہو یا پھر اپنے آئی فون کی ایک ایپ سے بغاوت کو بھگادیتے طیب اردوان کے حالات و واقعات ہوں۔ یہ بتاتے ہیں کہ ہم بہرحال ایک اور طرح کے دور میں جی رہے ہیں۔ چنانچہ سوشل میڈیا پریہ واقعہ سیکنڈوں میں وائرل ہوگیا۔ یہاں تک کہ آئی ایس پی آر کے ترجمان جنرل عاصم باجوہ صاحب کو اس پر ٹویٹ کرنا پڑا کہ ہم تحقیقات کر رہے ہیں۔یہی ا س واقعے کا پہلا سبق ہے۔ ہمیں سمجھنا ہو گاکہ زندگی پہلے جتنی ہمارے کنٹرول میں تھی اب اس سے مزید کچھ کم ہو گئی ہے۔

اس و۱قعہ پر عوامی ردِ عمل حیران کن تھا۔ لوگ پہلی بارایسے کسی واقعہ میں اپنی پیاری فوج کے آفیسر کے بجائے اپنی پولیس کے ساتھ کھڑے تھے۔ یہ وہ لوگ نہ تھے جو سائیبریا سے آئی ٹھنڈ سے ہوئے اپنے نزلے کوبھی فوج کے خلاف استعمال کرنے کا بہانہ بنالیتے ہیں۔ یہ موٹر وے پولیس کا شعبہ تعلقاتِ عامہ بھی نہ تھاکہ جو اپنی تنخواہ حلال کرنے کی تگ و دو کر رہا ہو۔ یہ وہ لوگ تھے جن کا اپنے ملک کے اس ادارے سے کسی نہ کسی طرح سابقہ پڑچکاتھا اور وہ موٹر وے پولیس کے اخلاق، خدمت اور فرض شناسی کا تجربہ کرچکے تھے۔ حیران کن طور پر مختلف جید لوگوں کی طرف فیس بک وال پر ایسی پوسٹیں نمودار ہونے لگیں، جو معاملے کی ”حساسیت“‘سے قطع نظرموٹر وے پولیس کے دفاع میں بولتی تھیں۔ بڑے بڑے ممتاز، محب وطن اور حالات و واقعات کو سمجھنے والے لوگ اپنے ذاتی واقعات شیئر کرکے موٹر وے پولیس کا کیس لڑ رہے تھے۔

یہ اس واقعہ کا دوسرا سبق ہے۔ یعنی اگر آپ دیانت داری اور فرض شناسی سے اپنا کام کرتے ہیں تو پھر بھلے اپنا تعلقاتِ عامہ کا شعبہ بنائیں یا سرے سے نہ بنائیں وقت پڑنے پر قوم آپ کے ساتھ کھڑی ہوجائے گی۔ یہ سبق فوج، پولیس سیاستدانوں اور حکمرانوں، سبھی کے لیے ہے۔ کچھ لوگ سمجھتے ہیں کہ جب تک فلاں قوت ان کے ساتھ ہے اقتدار کا ہما ان کے سر پر رہے گا اور جونہی وہ قوت ان سے ناراض ہوئی اقتدار ان سے چھن جائے۔ ایسا ہو تا بھی ہے، لیکن یہ واقعہ ہمیں چیخ چیخ کے بتاتا ہے کہ دوامِ اقتدار کا ایک طریقہ خدمتِ عوام سے ہوکر بھی گزرتا ہے اور یہ ایسا فول پروف طریقہ ہے کہ جس کے بعد کسی عارضی اور ضمیر کی قیمت پر ادھار لیے گئے طریقے کی محتاجی نہیں رہتی۔

اس واقعہ پر ہونے والے تبصروں میں کچھ دیر کے بعد ایک اور طبقہ بھی شریک ہوگیا۔ یہ وہ لوگ تھے جو فوج کے ساتھ اپنی بے لوث محبت میں مشہور تھے۔ انہوں نے قرار دیا کہ اس موقع کو فوج کے خلاف برتا جارہا ہے۔ میرا خیال ہے کہ یہ ان لوگوں کی بد ترین غلطی تھی، کسی سادہ سے واقعہ میں قوم کے اجتماعی دھارے سے الگ ہوکر فوج سے محبت کا اظہار فوج کو متنازع بنانے کی کامیاب کوشش ہوسکتی ہے۔ جب آپ ایسے موقع پر کسی فریق کی حمایت پر تل جاتے ہیں کہ جب ایک فریق طاقت ور بھی ہو، وہ سول کپڑوں میں بھی ہو، اس کے مقابل ایک ستھرا ادارہ بھی ہو اور وہ وردی میں بھی اور پھر اپنی ڈومین میں بھی ہو تو ناصرف آپ اپنی طرف انگلیاں اٹھوانے کا خاطر خواہ سامان کرلیتے ہیں، بلکہ بیچارے اپنے ممدوح کو بھی خاصا قابلِ غور بنادیتے ہیں۔ یہی وہ تعصبات ہیں جو معاشروں سے امن، اصلاح اور ترقی کی سپرٹ چھین لیتے ہیں۔

بطورِ مسلمان اور بطور اکیسویں صدی کے باشعور شہری ہونے کے ہمیں صرف انصاف کے ساتھ کھڑے ہونا چاہیے۔ ہمیں کہنا چاہیے کہ جرم ہر گز کسی کا استحقاق نہیں۔ کسی کی اہمیت یا عزت اس کے لیے ظلم کا جواز نہیں ہونا چاہیے۔ اس امت میں صحابہ سے بڑھ کر کوئی قابلِ عزت و دفاع نہیں، اس کے باوجود بطور انسان ان سے ہونے والی کوتاہیوں پر انہیں ملنے والی سزائیں ہمارے نظامِ عدل کی اولیں نظیریں ہیں۔ امہات المومنین کو نبیؐ سے قربت کی بدولت جو مقام ومرتبہ حاصل تھا، اس پر انہیں رعایت یا استثنا دینے کے بجائے کسی بھی ارتکابِ جرم پر قرآن مجید نے دہری سزا کی وعید سنائی ہے۔ خالد بن ولیدؓ جیسابے مثل سپہ سالاراسلامی تو کیا عام تاریخ میں بھی نہیں گزرا۔ معمولی کوتاہی پر اور اصلاً نظم قائم کرنے کی خاطر ان کی معزولی مجمع عام میں کر دکھائی گئی۔ آفریں ہے کہ انھوں نے کسی وقار کی بات نہیں کی۔ گورنرِ مصرعمرو بن عاص ؓکے بیٹے نے کسی معاملے میںایک شخص پرکچھ ظلم کر ڈالا تو خلیفہ عمر ِ فاروقؓ نے ان کے بیٹے کو کوڑے لگانے کے بعد گورنر باپ کو بھی میدان میں طلب کرلیا کہ وہ باپ بھی کوڑوں کا مستحق ہے کہ جس کی گورنری کی شہ پاکر بیٹے کو زیادتی کی جرات ہوئی۔

یہی قوموں کی زندگی میں ترقی اور ایکسی لینس کا موٹر وے ہے اور سنا ہے مغربی قوموں نے بھی اسی سے ترقی کی ہے، واللہ اعلم!

پیاری لائبہ!
ذرا سا ٹھہرنا بیٹا! میں پہلے تمہیں یہ بتادوں کہ آخر میں آپ کویہ خط کیوں لکھ رہا ہوں۔ دراصل آپ بچہ لوگ اتنے ذہین ہوتے ہو اور اتنے اچھے ہوتے ہو کہ ہم جیسے بڑوں سے زیادہ نئی نئی چیزوں کے بارے میں جانتے ہو اور ہر چیز کے بارے میں کئی طرح سے اچھا اچھا اور پیارا پیارا سا سوچتے بھی بہت رہتے ہو۔ اور پھرسوچ سوچ کے سوال بھی ایسے کرتے ہو کہ سچ بتاؤں تو جن کے ہم بڑوں کو بھی جواب نہیں آتے۔ اس پر ہم بڑے شرمندہ ہو جاتے ہیں۔

پیاری بیٹی! اس کا حل ہم بڑوں نے یہ نکالا ہے کہ آپ بچہ لوگوں کے کسی مشکل سوال سے پہلے ہی ہم اپنی طرف سے کوئی نہ کوئی وضاحت دے دیتے ہیں۔ وضاحت کا تو پتا ہے نا آپ کو؟ یعنی Explanation نہیں بیٹا Excuse نہیں Explanation . لگتا ہے کہ آپ کچھ کچھ شرارتی بھی ہو، یعنی بہت ذہین ہو۔ شرارتی بچے بڑے ذہین ہوتے ہیں۔ اور ہاں ویسے سچ کہو تو ہماری یہ Explanationبھی ایک Excuse ہی ہوتی ہے۔

لہٰذا اس سے پہلے کہ آپ دل ہی دل میں یہ سوچ کر اپنے چچا پر پیاری سی ہنسی ہنسنے لگو کہ آپ کے اس والے انکل کے پاس شاید فون کرنے کے لیے موبائل ہی نہیں ہے۔ یعنی شاید 3310والا نوکیا بھی نہیں ہے۔ تو دیکھو، بیٹا ایسا نہیں ہے۔ موبائل تو میرے پاس بھی ہے اور بیٹا! سچ کہہ رہا ہوں، آج تو بیلنس بھی ہے ۔ لیکن پیاری لائبہ! ایک بات بتاؤں؟ بیٹا اصل میں کچھ باتیں کہی تو کئی طرح سے جاسکتی ہیں مگر وہ کسی ایک طرح سے زیادہ اچھی طرح بھی کہی جاسکتی ہیں۔ یہ بات سمجھنا آپ کے لیے بالکل مشکل نہیں ہوگا۔ کیونکہ آپ کو وہ والا طریقہ تو ضرور آتا ہو گا نا کہ جب آپ کو اپنی کوئی اچھی سی فرمائش اپنے پاپا یا مما سے منوانا ہوتی ہوگی تو آپ ضرور کسی خاص طریقے سے ہی بات کرکے، اپنی وہ بات منوالیتی ہوں گی۔ ایسے طریقے آپ بچوں کو اور بچوں کی مما جانوں کو بھی بہت آتے ہیں۔

تو خیر، اب مجھے امید ہے کہ آپ ضرور میری بات غور سے سن لیں گی۔ کیا کہا؟ سن نہیں لیں گی، پڑھ لیں گی؟ اوہ! اچھا اچھا! آپ نے ٹھیک ہی کہا ہے بیٹا۔ سننے کے بجائے آپ تو پڑھیں گی۔ دیکھا! میں نے کہا تھا نا کہ آپ لوگ بہت ذہین بچے ہو اور ہرطرح سے سوچتے بھی بہت ہو۔ تو ٹھیک ہے مجھے یہی کہنا چاہیے تھا کہ آپ میری بات پڑھ لو گی۔ ظاہر ہے خط پڑھا ہی جاتاہے ،سنا نہیں جاتا۔

اچھا تو بیٹاسنو! آپ ایک بہت ہی پیاری سی بیٹی ہو، بہت ہی پیاری۔ اتنی پیاری کہ جس کا بابا اتنا مصروف ہونے کے باوجود بھی اپنی بیٹی کو خط لکھتا ہے۔ اور پھر اتنے پیار سے لکھتا ہے کہ بہت سے بچے اب سوچا کریں گے کہ ان کے بابا بھلا انہیں ایسا اچھا خط کیوں نہیں لکھتے؟ اے بیٹی! ذرا کان پاس لانا، تاکہ میں ایک راز کی بات بتاؤں آپ کو۔ دیکھنا! کہیں آپ کی آنٹی نہ سن لیں ورنہ وہ پھر ایک اور خط لکھ دیں گی۔

بات یہ ہے بیٹا جانی کہ آپ تو اس سے بھی کہیں زیادہ خوش قسمت ہو۔ اس لیے کہ آپ کو ایک بہت پڑھے لکھے اور پیار کرنے والے بابا ملے ہیں۔ دیکھیں وہ آپ بچوں کے ساتھ بیٹھ کر فلم بھی دیکھ لیتے ہیں۔ آپ کو پتا ہے؟ ایسے بابا سب کے نہیں ہوتے۔ پھر بیٹا !آپ کی سب سے بڑی خوش قسمتی تو یہ ہے کہ آپ کے بابا اتنے پیارے ہونے کے ساتھ ساتھ آپ سے ایسی اچھی اچھی باتیں بھی کرتے ہیں کہ جن کا فائدہ آپ کو بہت بعد تک بھی ہوتا رہے گا۔ اور وہاں کی نئی دنیامیں بھی ہوتا رہے گا کہ جہاںہم سب نے چلے جانا ہے۔

آپ یوں سمجھیں کہ یہ ایک پریوں کا دیس ہے اور بڑا ہی خوبصورت دیس ہے۔ وہاں بہت سے رنگ برنگے کھلونے ہیں اور ڈھیر ساری تتلیاں، چاکلیٹیں اور اتنے پیارے پیارے کپڑے، جوتے اور اتنا کچھ ہے کہ بس کیا ہی بتاؤں۔ یہ نا بیٹا! بس آپ ہی جیسے اچھے اچھے بچوں کے لیے دنیا بنی ہے۔ وہ بچے جو اپنے ایسے اچھے اچھے بابا جانوں کی اچھی اچھی باتیں سنتے اور پھر مانتے بھی ہیں۔ ان کے لیے۔

بیٹا! میں دراصل آپ کو یہ خط اس لیے نہیں لکھ رہا کہ آپ کے بابا جان نے آپ کو ایک خط کیوں لکھ دیا۔ وہ آپ کے بابا ہیں اور روز آپ کو خط لکھ سکتے ہیں۔ دراصل میں اس لیے خط لکھ رہا ہوں بیٹا کہ اس کے بعد آپ کی ایک آنٹی نے بھی آپ کے نام ایک خط لکھ دیا ہے۔ جس میں اس پیاری سی آنٹی نے آپ کے پیارے سے بابا کو تھوڑا تھوڑا wrong بھی کہا ہے۔ بھلا آپ ہی بتائیے کبھی اتنے پیارے بابا بھی رونگ ہوتے ہیں؟ ہوتے بھی ہوں تو بیٹا سب کے سامنے اگر انہیں رونگ کہیں گے تو ہماری پیاری سی بیٹی لائبہ ناراض اور پریشان بھی ہوجائے گی نا۔ یہ تو بری بات ہوئی نا بیٹا! کسی آنٹی کو بچوں کو یہ تو نہیں سکھانا چاہیے نا؟

سنو بیٹی جی! آپ ایک بات زندگی میں کبھی بھولنا نہیں، یہی ایک آنٹی ہی نہیں، آپ کو زندگی میں بہت سے دوسرے بھی ایسے کئی لوگ ملیں گے۔ وہ آپ سے بہت پیار کرتے نظر آئیں گے۔ لیکن بیٹا وہ اگر یہ کہیں کہ آپ کے بابا اور ماما سے بھی زیادہ وہ آپ سے پیار کرتے ہیں تو بیٹا یہ جھوٹ ہوگا۔ سنو، بیٹا! ایسی باتوں کی اچھی طرح سمجھ تب آتی ہے، جب اللہ ہمیں بڑے کرتا ہے اور پھر پیارے پیارے سے بچے بھی ہمیں دے دیتا ہے اور ہمیں کہتا ہے کہ اب ان بچوں سے پیار بھی کرو اور انہیں اچھی اچھی چیزیں بھی لا کردو۔

بیٹی جی! اس طرح آپ بھی یہ سب ایک دن جان جائیں گی۔ مگر کافی بعد میں۔ اس لیے ایک تو یہ بات ابھی سے یاد کرلینا۔ پھر بیٹا یہ جو لفظ ہے نا آنٹی۔۔۔! اصل میں یہ پہلے نہیں ہوتا تھا۔ تب نا بیٹا چچیاں، پھپھیاں اور تائیاں، خالائیں وغیرہ ہوتی تھیں۔ اب بیٹا! ان آنٹیوں کے پاس نا، نالج تو بہت ہے مگر بیٹا! نالج کبھی پیار کا بدل نہیں ہوتا اور نہ ماں باپ کی محبت ہی کا۔ ورنہ پڑھے لکھے لوگ اپنے ماں باپ کو کبھی نہ روتے۔

پیاری بیٹی !
آپ کی آنٹی کا خیال ہے کہ آپ کو اپنے بابا کا خط پڑھ کے دکھ ہوا ہوگا۔ لگتا ہے کہ آپ کی آنٹی کو ان کے بابا نے کبھی خط نہیں لکھا۔ ورنہ انہیں پتا چل جاتاکہ بیٹیاں بابا کا پیارا سا خط پڑھ کے خوش ہوتی ہیں، پریشان نہیں ہوتیں۔ انہوں نے لکھا کہ آپ کے بابانے خط میں بیٹوں کو کچھ نہیں لکھا۔ دیکھا آپ نے؟ آنٹی جی کو یہ بھی نہیں پتا کہ جب یہ خط بیٹوں کو لکھا ہی نہیں گیا اور بس آپ ہی کو لکھا گیا تھا تو پھر اس میں کسی اور سے کیسے بات کی جاتی؟ اور بیٹا یہ بھی غور سے سننا کہ جو راز کی باتیں اپنوں سے ہوتی ہیں، وہ سبھی سے نہیں ہوتی ہیں۔ آنٹی نے کہا کہ آپ کے بابا نے خط میں بیٹوں کو حیا نہیں سکھائی۔ مجھے لگتا ہے یہ آنٹی مذاق کررہی ہیں۔ وگرنہ اگر یہاں نہیں لکھا تو بھلا یہ کیسے ثابت ہوگیا کہ انھوں نے بیٹوں کو کلین چٹ دے دی ہے۔ پھر بیٹا اس آنٹی سے پوچھیے گا کہ آپ اپنے پیسے تالے میں رکھنے کی بجائے، چوروں کو کیوں نہیں سمجھاتیں کہ وہ چوری ہی نہ کریں۔ ظاہر ہے اس سے معاشرہ کتنا اچھا ہوجائے گا۔ ویسے پوچھیے گا تو سہی بیٹا کیا پتا آنٹی صاحبہ پیسے واقعی گلے کے بجائے گلی ہی میں رکھتی ہوں۔

بیٹا! آپ تو سکول جاتی ہو، آپ کو تو پتا ہے کہ اپنی چیز کی خود ہی حفاظت کرنا ہوتی ہے۔ خود لاپروائی کریں تو ٹیچر ہمیں بھی ڈانٹ دیتی ہے کہ آپ نے اپنی چیز کا خود کیوں خیال نہیں رکھا۔ ہاں اگر ہم نے خیال رکھا ہو اور چیز گم ہوجائے توٹیچر ہمیں نہیں ڈانتی ۔اور بیٹا! آپ کو پتا ہے ناکہ جوچیز جتنی زیادہ قیمتی ہو، اتنا ہی اس کا زیادہ خیال بھی رکھا جاتاہے۔ بیٹا یقین ماننا کہ آپ کے بابا اور ماما کے پاس آپ سے زیادہ قیمتی چیز اور کوئی نہیں۔ ان کی دولت تو کیا ان کی جان بھی نہیں۔ بیٹا آپ کے اس انکل کی ابھی کوئی بیٹی نہیں۔ مگر اس انکل کے بچوں اسید، حمید اور عزیر کی مما جان بھی ایک بیٹی ہیں۔ آپ کے انکل کی مما بھی ایک بیٹی ہیں۔ میرے بابا کی بھی ایک بیٹی ہے، یعنی میری بہنا۔ بیٹا کیا بتاؤں کہ یہ سب اتنی اچھی ہیں کہ اگر یہ نہ ہوتیں تو آپ کے انکل بالکل بھی نہ ہوتے اور اچھے تو بالکل بھی نہ ہوتے۔ تو دیکھا آپ نے کہ جو بیٹیاں اتنی قیمتی ہوں کہ ان کے ہونے سے ہم زندہ ہوں تو کیا اب ہم ان کی قدر اور ان کا خیال بھی نہ کریں۔

ایک بات اور سننا بیٹا!
آپ کی آنٹی کہتی ہیں ’’دینی تعلیمات اور معاشرتی روایات کا بھی خیال رکھنا۔‘‘ آپ پوچھیے گا تو سہی کہ اچھی آنٹی جی! یہی تو میر ے پیارے بابا جانی نے لکھاہے۔ پھر میرے بابا آپ کے نزدیک غلط کیسے ہیں؟ آنٹی نے کہا کہ آپ کے بابا کی محبت میں ڈر چھپا ہے۔ بیٹا! تو اس میں بھلا برا ہی کیا ہے؟ ڈر نہ ہو توبھلا محبت ہوتی بھی ہے۔ بیٹا! جس کے پاس قیمتی چیز ہو وہ اس کی حفاظت کے لیے چوروں سے ڈرے تو اس میں کیا غلط ہے۔ بیٹا! یہ توبس محبت ہے، ہمارا تو ایمان بھی ڈر کے بغیر مکمل نہیں ہوتا۔ بے ڈر تو بس وہی ہوتا ہے جس میں عقل نہ ہو۔

آپ نے دیکھا ہوگا کہ کئی پاگل لوگ آگ میں ہاتھ ڈال دیتے ہیں۔ اگر آگ سے نہ ڈرنا ہی اچھی بات ہوتی تو ضرور آپ کی آنٹی بھی آگ میں ہاتھ ڈال دیتیں؟ لیکن میں آپ کو بتاتا ہوں کہ وہ کبھی آگ میں ہاتھ نہیں ڈالتیں، وہ بھی آگ سے ڈرتی ہیں۔ وہ چھپکلی سے بھی ڈرتی ہوں گی۔ مگر آپ کے بابا کو ایسے ہی ڈرنے والا کہہ رہی ہیں۔ آنٹی جی نے یہ بھی کہا، آپ آرٹ مووی دیکھیں گی تو آپ کے بابا کے ڈر کا کیا عالم ہوگا؟ انہیں کہیے گا آنٹی جی ہر چیز کا ایک وقت اور ایک عمر ہوتی ہے۔ آپ کے بابا جیسے اچھے لوگوں کی یہ پیاری لائبہ پہلی بیٹی نہیں ہے۔ پوچھیے گا آنٹی جی! کیا آپ بچوں کو پالنے میں ہی آرٹ مووی دکھانے لے جاتی ہیں؟ بیٹا! اپنی اچھی آنٹی کو یہ بھی بتائیے گا کہ اگر کوئی پیاری بیٹی سے اچھی بات کرلے تو ا س کایہ مطلب نہیں ہوتاکہ اب لازماً ہی باپ نے ابو بکر کا راستہ چھوڑ کرکوئی اور راہ اپنالی ہے۔ برے لوگ ہی نہیں اچھے لوگ بھی اچھی بات کرلیتے ہیں۔ یہ ضرور آنٹی کو بتادیجیےگا۔

آنٹی جی سے یہ بھی کہیے گا کہ ضروری نہیں ہوتا کہ ایک ہی گھر میں رہ کے مکتوب اور مکتوب الیہ (مشکل سے لفظ ہیں نا؟ اللہ آنٹی سے سمجھے!) کی تفصیل نہ ہی لکھی جائے۔ بیٹا! یاد ہے نا جب آپ نے کوئی بات منوانی ہو اور پاپا مان نہ رہے ہوں تو آپ کیا کہتی ہیں؟ پاپا! کیا میں آپ کی بیٹی نہیں ہوں؟ تو کیا اس وقت پاپاکو پتا نہیں ہوتا کہ آپ ان کی بیٹی ہی ہیں؟ پتا ہی ہوتا ہے، مگر یہ محبت اور لاڈ کا اظہار ہوتا ہے۔ کچھ چیزوں کا ذکرعلم میں اضافہ کرنے کے لیے نہیں، احسا س دلانے کے لیے کیا جاتا ہے۔

مثلاً: آپ کو پتا ہے ناکہ یہ حج کے دن ہیں۔ انہی دنوں ہمارے پیارے نبی نے مکہ شہر میں اپنے ساتھیوں سے پوچھا تھاکہ یہ کون سا شہر ہے؟ کون سا مہینہ ہے؟ اور کون سا دن ہے؟ اب آپ ہی بتائیے کہ کیا آپ نہیں جانتے تھے یا آپ کے ساتھی یہ سب نہیں جانتے تھے؟ جانتے تھے۔ توبیٹا! یہ جو آپ کے بابا نے آپ کو خط میں بتایا ہے کہ وہ خط کہاں سے لکھ رہے ہیں تو اس پر آپ کے بابا کو ایسی کسی بھی آنٹی سے ٹیوشن لینے کی کوئی ضرورت نہیں۔ ہاں آنٹی جی کو یہ ضرور سیکھنا چاہیے کہ بچے کس سطح کی زبان میں لکھا گیاخط پڑھ سکتے ہیں۔ اور یہ کہ بڑوں کی لڑائی بچوں کے ذریعے لڑنا کم ازکم مہذب گھروں اور پڑھے لکھے لوگوں کا طریقہ نہیں ہوتا۔

آنٹی جی کو یہ بھی بتائیے گاکہ یہ جو انہوں نے آپ کو فرشتوں کی حفاظت کی دعا دی ہے، اس پر ان کا بہت شکریہ، یہ بھی لیکن بتا دیجئے گا کہ فرشتے ان کی حفاظت کبھی نہیں کرتے جو خود اپنی حفاظت کی ضرورت ہی نہ محسوس کرتے ہوں۔

پیاری بیٹی !
خط طویل ہوگیا۔ آپ بور ہوگئی ہوں گی۔ مجھے معاف کردینا بیٹا! اب اس وقت عید شروع ہونے میں چند ہی گھنٹے رہ گئے ہیں، اس لیے مجھے جلدی جلدی لکھنا پڑا۔ جلدی جلدی لکھی بات لمبی ہوجاتی ہے۔ دعاہے کہ اللہ آپ جیسی ساری پھول سی بچیوں اور ان کے پیارے بابا جانوں کو ایسی دوری پیدا کرنے والی آنٹیوں سے بچائے۔ لیجیے اب آپ مزے سے عید کیجیے۔ ہاں یہ بھی بتائیے گا کہ بہاولپور میں گرمی لاہور سے زیادہ تو نہیں ہے؟ اور ہاں وہاں اب اچھے آم تو نہ ملتے ہوں گے۔ سیزن جوختم ہوگیا ہے، اس لیے آموں کی ضد نہ کرنا۔ پتا نہیں اب آپ کے بابا وہاں کیا کھائیں گے۔ خیر، جو بھی کھائیں، انہیں سلام کہنا۔
آپ کا پیارا
ایک انکل (غور سے پڑھنا، دیکھنا کہیں، مجھے اینکل نہ پڑھ جانا!)
اللہ حافظ !

قصور کس کا تھا اور غصہ پرور انا کس کی تھی ، مجھے معلوم نہیں، مگر جب کسی طاقتور کا گھونسہ کسی کمزور پر پڑتا ہے تو میرا ہاتھ بےاختیار اپنے گال کی طرف اٹھ جاتا ہے. ایسے سمے مجھے دل میں درد اور گالوں پر طمانچے کے نشاں محسوس ہوتے ہیں اور میرے کانوں میں سناٹے چیخنے لگتے ہیں.

مجھے یاد آتا ہے کہ نبوت سے پہلے ایک دن میرے رسول اکیلے ہی ایک کمزور کے ساتھ مکہ کے سبھی ناخدائوں سے ٹکرانے نکلے تھے، اور پھر ایک دن آپ نے ارشاد کیا تھا، قومیں اس لیے تباہ ہوگئیں کہ انھوں نے کمزور پر طاقت کا قانون لاگو کیا، اور اشرافیہ کو مگر قانون سے بالاتر کر دکھایا. مجھے یاد آتا ہے کہ کسی دن مدینہ میں، سب سے پیارے ہوتے سفارشی اسامہ سے میرے اس حبیب رسول نے کہا تھا، یہ تو قریش کی ایک فاطمہ ہے، اگر یہ محمد (صلی اللہ علیہ وسلم ) کی لخت جگر فاطمہ بھی ہوتی، اور چوری کر بیٹھتی تو میں سو جان سے اپنی لاڈلی پر قربان رحمہ العالمین باپ، اس پھول سی فاطمہ کی نازک کلائی سے اس کا ہاتھ الگ کر دیتا! ضرور کر دیتا اور کوئی محبت مجھے روک نہ سکتی. اس لیے نہ روک سکتی کہ سب محبتوں بالا میری اک محبت اس ذات سے بھی ہے کہ جس کے حضور اک دن سبھی محبتوں اور طاقتوں کو جوابدہ ہونا ہے.

درد ہے اور اس سے کہیں زیادہ جتنا کسی پھول سے کشمیری پر کسی ظالم بھارتی سینا کے پڑے گھونسے سے ہوتا ہے. اور زیادہ، کہیں زیادہ. اور یہ دو طرفہ بھی ہے. یعنی کچھ اور اذیت ناک!
مظلوم ہی ہمارا ہونا تھا اے کاش! کم از کم ظالم ہی کسی اور کے حصے میں آیا ہوتا! آہ! میری قسمت مظلوم بھی میرا ہے اور ظالم بھی میرا! اور اب جو خسارہ ہونا ہے وہ بھی میرا، جو ہو چکا وہ بھی میرا. کوئی شاعر ،کوئی ادیب مجھے وہ نوحہ بتائے، جسے وہ باپ گا سکے ،جس کا ایک بیٹا قاتل ہو اور ایک مقتول! کیا وہ باپ یہی کہے گا :دو ینگ آفیسرز نے. …. دو ینگ اور اب یعنی انصاف بھی ہوگا! ٹویٹ میں کہا یہ گیا ہے کہ جتنا انصاف دو ینگ آفیسر کر گئے، اس کے علاوہ ابھی کچھ اور بھی”انصاف“ کیا جائے گا. مارے دہشت کے میرے دونوں ہاتھ میرے دونوں رخساروں سے چمٹ گئے ہیں.

اور ہاں آپ سب کو عید مبارک ! کل عید بھی تو ہے نا! سوچتا ہوں کاش موٹر وے کے کمزور کی اس زندگی میں یہ آخری قربانی ہو!