Tag: عمران خان

دنیا میں جب بھی کسی قوم یا مذہب کو دبانے کی کوشش کی گئی، تو وہ مزید مضبوط ہو کر ابھرا۔ تاریخ گواہ ہے کہ جب بھی کسی نے حق کی آواز کو دبانے کی کوشش کی، تو وہ آواز ایک گونج بن کر پوری دنیا میں پھیل گئی۔ یہی معاملہ اسلاموفوبیا کا ہے، جس کی جڑیں صدیوں پرانی ہیں، لیکن نائن الیون کے بعد اسے باقاعدہ ایک سیاسی ہتھیار کے طور پر استعمال کیا گیا۔

مسلمانوں کے خلاف نفرت، پروپیگنڈا، اور انہیں دہشت گرد ثابت کرنے کے لیے مغربی میڈیا اور سیاستدانوں نے ہر ممکن کوشش کی۔ کبھی یہ کہا گیا کہ اسلام تلوار کے زور پر پھیلا، کبھی دہشت گردی کو اسلامی تعلیمات سے جوڑنے کی کوشش کی گئی، اور کبھی آزادی اظہارِ رائے کے نام پر ہمارے نبی کریم صلی اللہ علیہ وسلم کی توہین کی گئی۔ اس سارے کھیل میں ایک خاص طبقہ پوری طاقت کے ساتھ سرگرم رہا، جس کا مقصد دنیا میں اسلام کی شبیہ کو مسخ کرنا تھا۔

یہ کھیل برسوں سے جاری تھا، لیکن مسلم دنیا کی قیادت اس پر مؤثر ردعمل دینے میں ناکام رہی۔ کچھ حکمران مغرب کے سامنے بھیگی بلی بنے رہے، تو کچھ صرف رسمی بیانات دینے پر اکتفا کرتے رہے۔ ایسے میں ایک شخص اُٹھا جس نے اسلامی دنیا کے جذبات کو حقیقت میں دنیا کے سامنے رکھا۔ وہ شخص تھا عمران خان۔

اسلاموفوبیا کوئی نئی چیز نہیں۔ اگر ہم تاریخ پر نظر ڈالیں تو ہمیں صلیبی جنگوں کے دوران بھی یہی رویہ نظر آتا ہے، جب یورپ نے اسلام کے خلاف منظم پروپیگنڈا شروع کیا۔ مغربی دنیا نے ہمیشہ اسلام کو ایک “بیرونی خطرہ” کے طور پر پیش کیا۔ قرونِ وسطیٰ میں جب یورپ میں اسلامی علوم اور تہذیب کا اثر بڑھنے لگا، تو وہاں خوف پیدا ہوا کہ اسلام کہیں یورپ میں نہ پھیل جائے۔ یہی وجہ تھی کہ اسلامی دنیا کو ہمیشہ دشمن کے طور پر پیش کیا گیا۔ نوآبادیاتی دور میں برطانیہ، فرانس، اور دیگر استعماری طاقتوں نے مسلم دنیا کو کمزور کرنے کے لیے اسلام کو “پسماندگی” کی علامت بنا کر پیش کیا۔ نائن الیون کے بعد اسلاموفوبیا ایک باقاعدہ سیاسی اور سفارتی حکمت عملی بن گیا۔ مغربی دنیا نے دہشت گردی کا تعلق براہ راست اسلام سے جوڑ دیا، حالانکہ دہشت گردی کا کوئی مذہب نہیں ہوتا۔

اسلاموفوبیا کی سب سے گھناؤنی شکل ہمارے نبی کریم صلی اللہ علیہ وسلم کی شان میں گستاخی ہے۔ مغرب میں آزادیِ اظہارِ رائے کے نام پر گستاخانہ خاکے، بیہودہ فلمیں اور توہین آمیز کتابیں شائع کی گئیں۔ 2005 میں ڈنمارک کے اخبار “یولاندس پوسٹن” نے گستاخانہ خاکے شائع کیے۔ 2012 میں فرانس میں “چارلی ہیبڈو” نے بار بار نبی کریم صلی اللہ علیہ وسلم کی توہین کی۔ 2020 میں فرانس کے صدر ایمانوئل میکرون نے آزادی اظہارِ رائے کے نام پر گستاخانہ خاکوں کی حمایت کی۔ یہ سب واقعات مسلمانوں کے جذبات کو مجروح کرنے کے لیے کیے گئے، لیکن مغرب میں کوئی بھی ان کے خلاف کارروائی کرنے کو تیار نہیں تھا۔

ایسے میں عمران خان وہ واحد لیڈر تھے جنہوں نے اس مسئلے کو سنجیدگی سے لیا۔ انہوں نے نہ صرف اپنے خطابات میں اس مسئلے کو اجاگر کیا بلکہ عملی اقدامات بھی کیے۔ 27 ستمبر 2019 کو اقوام متحدہ کی جنرل اسمبلی میں عمران خان نے اسلاموفوبیا کے خلاف ایک ولولہ انگیز تقریر کی۔ یہ تقریر تاریخ میں ہمیشہ یاد رکھی جائے گی، کیونکہ اس میں پہلی بار کسی عالمی رہنما نے مغرب کے سامنے مدلل اور جرات مندانہ موقف پیش کیا۔ عمران خان نے مغربی دنیا کو مخاطب کرتے ہوئے کہا: “ہم مسلمان اپنے نبی صلی اللہ علیہ وسلم سے بے پناہ محبت کرتے ہیں۔ جب کوئی ان کی توہین کرتا ہے، تو ہمیں وہی تکلیف ہوتی ہے جیسے کسی ماں کو اس کے بچے کی توہین پر ہوتی ہے۔” یہ جملہ مغربی دنیا کے لیے ایک واضح پیغام تھا کہ مسلمان اپنے نبی صلی اللہ علیہ وسلم کی حرمت پر کوئی سمجھوتہ نہیں کر سکتے۔

عمران خان نے صرف تقریر نہیں کی، بلکہ عملی طور پر بھی اقدامات کیے۔ اقوام متحدہ میں ایک قرارداد پیش کی، جس میں مطالبہ کیا گیا کہ اسلاموفوبیا کو عالمی سطح پر تسلیم کیا جائے۔ اسلامی تعاون تنظیم (OIC) کو متحرک کیا کہ وہ مغربی ممالک پر دباؤ ڈالیں۔ یورپی یونین، امریکہ، اور دیگر عالمی رہنماؤں کو خطوط لکھے جن میں اسلاموفوبیا کے نقصانات اور اس کے عالمی اثرات پر روشنی ڈالی گئی۔ 15 مارچ کو “یوم انسدادِ اسلاموفوبیا” قرار دلوانا سب سے بڑا سنگ میل تھا، جب اقوام متحدہ نے پاکستان کی تجویز پر 15 مارچ کو “عالمی یومِ انسدادِ اسلاموفوبیا” قرار دیا۔

15 مارچ 2019 کو نیوزی لینڈ کے شہر کرائسٹ چرچ میں ایک سفید فام دہشت گرد نے دو مساجد پر حملہ کر کے 51 مسلمانوں کو شہید کر دیا۔ مغربی میڈیا نے اسے دہشت گردی کا واقعہ کہنے سے گریز کیا اور حملہ آور کو “ذہنی مریض” قرار دینے کی کوشش کی۔ عمران خان نے اسی واقعے کو بنیاد بنا کر اسلاموفوبیا کے خلاف عالمی مہم چلائی۔ ان کی کوششوں کے نتیجے میں اقوام متحدہ نے 15 مارچ کو “عالمی یومِ انسدادِ اسلاموفوبیا” کے طور پر منانے کی منظوری دی۔

دنیا کے بڑے بڑے حکمران عزت کے لیے ہزار جتن کرتے ہیں، مگر جو عزت اللہ دیتا ہے، وہی اصل عزت ہوتی ہے۔ آج مغرب اور مسلم دنیا میں عمران خان کا نام عزت و احترام سے لیا جاتا ہے۔ کچھ لوگ انہیں کافر اور لبرل کہہ کر بدنام کرنے کی کوشش کرتے رہے، مگر اللہ نے ان کی کوششوں کو ایسا شرف بخشا کہ آج وہ امتِ مسلمہ کے سب سے مقبول رہنما بن گئے ہیں۔ یہ اللہ کی قدرت ہے کہ جو نبی کریم صلی اللہ علیہ وسلم کی حرمت کے لیے کھڑا ہوتا ہے، اللہ اسے عزتوں سے نواز دیتا ہے۔

عمران خان کی جدوجہد نے دنیا کو یہ پیغام دیا کہ مسلمان اپنے نبی صلی اللہ علیہ وسلم کی عزت پر کوئی سمجھوتہ نہیں کریں گے۔ ان کی کوششوں کے نتیجے میں اسلاموفوبیا کے خلاف ایک عالمی آواز بلند ہوئی اور 15 مارچ کو انسدادِ اسلاموفوبیا کا دن منایا جانے لگا۔ یہ ایک عظیم کارنامہ ہے، اور یہ ثابت کرتا ہے کہ جب نیت خالص ہو، اور مقصد صرف دین کی سربلندی ہو، تو اللہ کامیابی ضرور دیتا ہے۔ عمران خان کی یہ کوششیں تاریخ میں سنہری حروف سے لکھی جائیں گی، اور رہتی دنیا تک ان کے نام کے ساتھ جڑی رہیں گی۔

رمضان المبارک، وہ مقدس مہینہ جس میں آسمان سے برکتیں نازل ہوتی ہیں، زمین رحمتوں سے بھر جاتی ہے، اور گناہوں میں ڈوبے دل بھی روشنی کی کرن محسوس کرتے ہیں۔

یہ مہینہ صبر، تقویٰ، عبادت، اور دوسروں کے ساتھ حسنِ سلوک کا درس دیتا ہے۔ مگر کچھ دل ایسے ہوتے ہیں جن پر نہ عبادات اثر کرتی ہیں، نہ قرآن کی تلاوت انہیں نرم کر پاتی ہے، اور نہ ہی اللہ کا خوف انہیں راہِ راست پر لاتا ہے. کہتے ہیں، کوئلہ اگر ہزار بار بھی دھویا جائے، تو پھر بھی کالا ہی رہتا ہے۔ کچھ لوگ بھی ایسے ہوتے ہیں، جن کی فطرت، ان کا ضمیر اور ان کے اعمال اس قدر سیاہ ہو چکے ہوتے ہیں کہ چاہے ان کے ساتھ کتنا ہی حسن سلوک کر لیا جائے، وہ اپنی خباثت سے باز نہیں آتے۔ وہ ہمیشہ ظلم، فریب، اور دھوکے کے راستے پر چلتے ہیں۔ انہیں دوسروں کے ساتھ ناانصافی کرکے خوشی محسوس ہوتی ہے، انہیں سچ دبانے اور حق کو پامال کرنے میں سکون ملتا ہے۔

پاکستان کی سیاست میں بھی ہم نے ایسے چالاک اور مکار لوگوں کو دیکھا ہے، جو خود کو دودھ سے دھلا ثابت کرنے کی کوشش کرتے ہیں، مگر حقیقت میں سب سے بڑے سازشی ہوتے ہیں۔ ان کا کمال دیکھیں کہ انہوں نے فارم 47 پر جیت حاصل کی، دھاندلی کے ذریعے اقتدار پر قبضہ کیا، اور ساتھ ہی عمران خان اور اسٹیبلشمنٹ کے درمیان نفرت کی دیوار کھڑی کر دی۔وہی وہ لوگ ہیں جو ہمیشہ دو کشتیوں میں سوار ہوتے ہیں۔ ایک طرف یہ فوج کو برا بھلا کہتے رہے، دوسری طرف فوج کو ہی اپنی طاقت بنانے کی کوشش کرتے ہیں۔ ان کی چالاکی دیکھیں کہ خود پیچھے رہے اور فوج کو بُرا ثابت کرنے کے لیے ہر ممکن کوشش کی۔ مگر عمران خان نے ہمیشہ کہا کہ “یہ فوج ہماری ہے، ہم اس کے ہیں۔

یہ وہی لوگ ہیں جنہوں نے ماضی میں گجرانوالہ میں کھڑے ہو کر فوج کے خلاف زہر اگلا۔ یہ وہی لوگ ہیں جن کے کارکنوں نے “یہ جو دہشت گردی ہے، اس کے پیچھے وردی ہے” جیسے نعرے لگائے، مگر پاکستان تحریک انصاف نے آج تک ان نعروں کو اون نہیں کیا۔ کیونکہ تحریک انصاف کا نظریہ واضح ہے: پاکستان کی فوج پاکستان کی محافظ ہے، اور اسے کمزور کرنے کی ہر سازش ملک دشمنی کے مترادف ہے۔ میں نے پہلے بھی اپنے کالم میں لکھا تھا کہ یہ فوج ہماری ہے، کسی کانگریس یا ملا کی نہیں، اور نہ ہی ان لوگوں کی جو ماضی میں فوج کے خلاف زہر اگلتے رہے۔

عمران خان کا سب سے بڑا جرم یہ ہے کہ اس نے پاکستان کے عوام کو غلامی سے نکلنے کا سبق دیا۔ اس نے قوم کو خواب دیکھنے اور ان خوابوں کو حقیقت میں بدلنے کا حوصلہ دیا۔ اس نے اسٹیبلشمنٹ اور روایتی سیاستدانوں کے اس گٹھ جوڑ کو توڑنے کی کوشش کی جو دہائیوں سے ملک کو یرغمال بنائے ہوئے ہے۔جب عمران خان نے کہا کہ پاکستان کو اپنے فیصلے خود کرنے چاہئیں، تو کچھ لوگوں کو یہ بات ناگوار گزری۔ جب عمران خان نے کہا کہ پاکستان کو بیرونی طاقتوں کی کٹھ پتلی بننے کے بجائے اپنے پیروں پر کھڑا ہونا چاہیے، تو سازشوں کے جال بُن دیے گئے۔ جب عمران خان نے کرپشن کے خلاف علم بلند کیا، تو وہی کرپٹ مافیا اس کے خلاف متحد ہو گیا۔

آج وہی شخص جسے قوم نے اپنے ووٹ کی طاقت سے وزیراعظم بنایا تھا، جیل میں قید ہے۔ اور وہ سیاستدان جو ملک کو لوٹ کر کھا گئے، جو قرضے معاف کراتے رہے، جو بیرونی طاقتوں کے اشارے پر حکومت کرتے رہے، وہ اقتدار کے مزے لوٹ رہے ہیں۔ کیا یہی انصاف ہے؟ کیا یہی عدل کا نظام ہے؟ تاریخ ہمیں بتاتی ہے کہ ظلم کا نظام کبھی زیادہ دیر نہیں چلتا۔ فرعون نے خود کو خدا سمجھا، مگر آخرکار دریائے نیل میں غرق ہو گیا۔ نمرود نے تکبر کیا، مگر ایک حقیر مچھر نے اس کا غرور خاک میں ملا دیا۔ شداد نے جنت بنانے کی کوشش کی، مگر اللہ کے عذاب سے نہ بچ سکا۔ یزید نے ظلم کی انتہا کر دی، مگر آج اس کا نام ذلت اور لعنت کے ساتھ لیا جاتا ہے۔

پاکستان کی تاریخ بھی ایسے کئی ظالموں کو دیکھ چکی ہے۔ ایوب خان نے مارشل لا لگایا، مگر عوام نے اس کے خلاف تحریک چلائی اور اسے اقتدار چھوڑنا پڑا۔ یحییٰ خان نے ظلم و جبر سے اقتدار قائم رکھنے کی کوشش کی، مگر مشرقی پاکستان کی علیحدگی کا داغ اس کے نام پر لگ گیا۔ ضیاءالحق نے جبر کی سیاست کی، مگر تاریخ نے اسے آمریت کی علامت بنا دیا۔ مشرف نے جمہوریت کو کچلا، مگر آخرکار اسے بھی اقتدار چھوڑ کر ملک سے بھاگنا پڑا۔ آج بھی پاکستان میں وہی کھیل جاری ہے۔ وہی ظلم، وہی جبر، وہی ناانصافی۔ مگر تاریخ گواہ ہے کہ ظلم ہمیشہ کے لیے نہیں رہتا۔ جو لوگ سمجھ رہے ہیں کہ وہ ہمیشہ اقتدار میں رہیں گے، انہیں یاد رکھنا چاہیے کہ اللہ کی لاٹھی بے آواز ہوتی ہے، مگر جب وہ حرکت میں آتی ہے تو بڑے بڑے ظالم مٹی میں مل جاتے ہیں۔

یہ صرف عمران خان کی آزمائش نہیں ہے، بلکہ یہ پوری قوم کا امتحان ہے۔ کیا ہم خاموش تماشائی بنے رہیں گے؟ کیا ہم بھی ظالموں کے ساتھ کھڑے ہو جائیں گے؟ یا ہم اپنے ضمیر کو جگائیں گے اور حق کا ساتھ دیں گے؟ اگر ہم نے آج ظلم کے خلاف آواز نہ اٹھائی، تو آنے والی نسلیں ہمیں معاف نہیں کریں گی۔ اگر ہم نے ناانصافی کو قبول کر لیا، تو کل کو یہ ناانصافی ہمارے گھروں تک بھی پہنچ سکتی ہے۔ اگر آج ہم نے عمران خان کے ساتھ ہونے والے ظلم پر خاموشی اختیار کی، تو کل کوئی اور اس جبر کا شکار ہوگا۔ یہی رمضان کا اصل پیغام ہے—حق کے لیے کھڑا ہونا، انصاف کی حمایت کرنا، اور ظلم کے خلاف آواز بلند کرنا۔ اگر آج ہم نے اپنی آواز بلند نہ کی، اگر آج ہم نے اس ناانصافی کے خلاف احتجاج نہ کیا، تو تاریخ ہمیں بھی ظالموں کے ساتھ کھڑا دکھائے گی۔

ہم نے تاریخ میں دیکھا کہ کئی طاقتور حکمران آئے اور چلے گئے۔ یزید نے ظلم کیا، مگر وہ زیادہ دیر نہ ٹھہرا۔ فرعون نے خود کو خدا سمجھا، مگر انجام دریائے نیل میں غرق ہونے کی صورت میں ہوا۔ نمرود نے تکبر کیا، مگر ایک مچھر اس کی موت کا سبب بن گیا۔ آج کے ظالم بھی زیادہ دیر نہیں بچیں گے۔ یہ وقت ہے کہ ہم اللہ سے دعا کریں کہ وہ ہمیں حق اور باطل میں تمیز کرنے کی توفیق عطا کرے۔ ہمیں ظلم کے خلاف کھڑے ہونے کی ہمت دے۔ ہمیں ان اندھیروں سے نکال کر روشنی کی راہ دکھائے۔ رمضان میں مانگی گئی دعائیں قبول ہوتی ہیں، تو آئیے دعا کریں کہ اللہ عمران خان سمیت تمام بے گناہ قیدیوں کو رہائی عطا کرے، پاکستان کو عدل و انصاف کی راہ پر لے آئے، اور ہمارے ملک سے ظلم و ناانصافی کے اندھیروں کو مٹا دے۔

اللہ ہمیں وہ قیادت عطا کرے جو پاکستان کو واقعی ترقی، خوشحالی اور عزت کی راہ پر لے جائے۔ اللہ ہمیں غلامی کی زنجیروں سے آزاد کرے اور ہمیں سچ کا ساتھ دینے کی توفیق دے۔آمین یا رب العالمین!

طویل عرصے سے سُنتے آئے ہیں کہ “ریاست ہو گی ماں کے جیسی” . ریاست کو ماں کہا جاتا ہے کیونکہ ماں کا دل نرم گداز ، سمندر جیسا گہرا،ا ور آسمان کی طرح وسیع ہوتا ہے۔ ماں اولاد سے حد درجہ پیار کرتی ہے ، نفرت کا شائبہ تک نہیں ہوتا۔ غلطی در غلطی پر معاف بھی کرتی ہے اور سینے سے بھی لگاتی ہے۔ کبھی کبھار اولاد کا لہجہ تلخ بھی ہو جاتا ہے تو معاف کرنے کا حوصلہ ماں کا ہی ہوتا ہے۔
[poetry]ریاست ہو گی ماں کے جیسی
ہر شہری سے پیار کرے گی [/poetry]

دیکھا جائے تو پاکستان ایک اسلامی جمہوری ریاست ہے اور اس ریاست کو ایک سیاسی جمہوری فیصلے کی صورت حاصل کیا گیا ۔ مگر افسوس کہ گزشتہ کئی دہائیوں سے اس جمہوریت کو آمریت کے شکنجے میں جکڑ دیا گیا ہے۔ ریاست کا بنیادی مقصد اپنے ہر شہری کو تحفظ اور امن و امان فراہم کرنا ہوتا ہے تاکہ وہ اپنی زندگی بلا خوف وخطر گزار سکے ۔پاکستان کے آئین کا آرٹیکل 16 ریاست کے ہر شہری کو پُرامن احتجاج کا حق دیتا ہے، جبکہ احتجاج کو آمریت کی بنا پر ریاست مخالف بیانہ تصور کیا جاتا ہے۔ ریاست جب حقوق غصب کر لیتی ہے تواحتجاج کرنا جرم بن جاتا ہے اور یوں ریاست حقِ آواز بلند کرنے والے کو کچلنے کے درپے رہتی ہے۔

26 نومبر 2024 کا دن بھی کلینڈر پر ایک سیاہ دھبے کی طرح ثبت ہو گیا ہے۔نہتے پرامن سیاسی کارکنوں کے احتجاج کو بزورِ طاقت ختم کیا گیا۔رات کے وقت مکمل بلیک آؤٹ کرتے ہوئے ریاست نےدشمن کا منہ توڑنے کے بجائے اپنے ہی بیٹوں کے جگر چھلنی کر دیے۔ وہ ریاست جو ماں کے جیسی تھی، اسے اجنبی بنتے دیر نہیں لگی۔ فائرنگ اور شیلنگ سے ایک نئی داستان رقم ہوئی.سانحہ 1971 ہو، اکبر بگٹی کا قتل ہو، لال مسجدکا واقعہ، ماڈل ٹاؤن کا سانحہ، بلوچ و دیگر نوجوانوں کا اغوا، ریاست ہر موقع پر ناکام ہی دکھائی دی ہے ۔ اس سے بھی بڑا المیہ تو 26 نومبر کو یہ ہوا کہ حکومت نےلاشوں اور زخمیوں کا ریکارڈ چھپا کر جمہوریت کو زندہ لاش بنا دیا۔

حکومت نے نیشنل میڈیا کو تو کنٹرول کر لیا لیکن انٹرنیشنل میڈیا، ڈیجیٹل میڈیا اور آزاد صحافیوں کو کنٹرول نہیں کر سکے، باضمیر صحافی اور وی لاگرز نے حقیقت کھول کر بیان کر دی۔ جہاں پورا معاشرہ گراوٹ کا شکار ہے وہاں عدلیہ بھی آنکھیں بند کر کے بیٹھ گئی، حالانکہ عدل کا منصب اللہ نے ان منصفوں کو دیا ہے. وائے افسوس کہ قتلِ عام پرآنکھیں موندے ہوئے ہیں۔

جبر کا ماحول ہے ، ظلم کا بازار خوب گرم ہے، جن کے پیارے زندگی کی بازی ہار گئے وہ غم و الم کی کیفیت سے دوچار ہیں۔ اہلِ سیاست کے سینے میں دل تو ہوتا نہیں، مخالف سیاسی رہنما لاشوں اور زخمیوں کی تعداد پر ٹھٹھا اورتمسخر اُڑا رہے ہیں حکومت اور وزراء سرے سے انکار کر رہے ہیں۔افسوس تو اس بات کا ہے کہ حرف کی حرمت کے داعی بھی سچ سے گریزاں ہیں۔ ریاست کی طرف سے طاقت کا استعمال معاشرتی توازن کو بگاڑ دیتا ہے ، نفرت کو بڑھاتا ہے۔ ایسا عمل ریاست کے وجود کو برقرار رکھنے کے قابل نہیں رہنے دیتا۔ ریاست ماؤں کو کیسے دلاسہ دے گی اور زخموں پر مرہم کیسے رکھے گی۔

اب بھی وقت ہے کہ ریاست ماں کا کردار نبھاتے ہوئے حق داروں کو حق ادا کرے، جن سے مینڈیٹ چھینا ہے انہیں لوٹائے۔ ناحق گرفتاروں کو رہا کرے۔ ایسا نہ ہو کہ وقت نکل جائے۔ جب جسم لہو لہو، دامن زخم زخم اور آنکھ اشک اشک ہو تو ایسے میں نفرتوں کے دھارے پھوٹتے ہیں، اور پھر یہی نفرتوں کے دھارے سیلاب بن کر ریاست کو نقصان پہنچاتے ہیں۔ ایسے میں کاش ! کوئی تو ہو جو غمزدوں کی ڈھارس بنے ،انھیں تسلی اور اطمینان کی دولت سے نوازے اور رواداری کو فروغ دے۔

پاکستانی سیاست میں جو نظر آتا ہے، وہ حقیقت نہیں ہوتی، اور جو حقیقت ہوتی ہے، وہ نظر نہیں آتی۔ آج کل ملک میں جو کچھ ہو رہا ہے، اسے دیکھ کر بس یہی کہا جا سکتا ہے کہ یہ بازی عشق کی بازی ہے، جو ہارے گا، وہ جیتے گا، اور جو جیتے گا، وہ ہارے گا۔

عمران خان جیل میں ہیں، ان کی جماعت کٹی پھٹی حالت میں ہے، عدالتوں میں مقدمے، پارٹی میں بغاوتیں، اور مخالفین کا دباؤ۔۔۔۔۔۔لیکن پھر بھی وہ ملکی سیاست کے سب سے بڑے کھلاڑی ہیں۔ سیاسی میدان میں سب سے زیادہ اسکور اس وقت بھی ان کے بیانیے کا ہی ہے۔چاہے عدالتوں کے فیصلے ان کے خلاف آئیں، چاہے پارٹی پر پابندیاں لگیں، عوام کے دلوں میں ان کی جگہ اب بھی قائم ہے۔ مگر سوال یہ ہے کہ کیا وہ اپنی اس مقبولیت کو بچا پائیں گے؟ یا پھر اس کہانی کا انجام وہی ہوگا، جو اسٹیبلشمنٹ چاہتی ہے؟

دوسری طرف، وہی پرانا کھیل جاری ہے۔ مذاکرات کی خبریں گرم ہیں۔ کہا جا رہا ہے کہ بات چیت ہو رہی ہے، کوئی درمیانی راستہ نکالا جا رہا ہے، لیکن سب جانتے ہیں کہ حکومت محض ایک مہرہ ہے۔ اصل فیصلہ کہیں اور ہوگا۔ جنہیں مذاکرات کرنا ہیں، وہ ٹیبل پر نہیں بیٹھے، اور جو بیٹھے ہیں، وہ اصل فیصلے کرنے کی طاقت نہیں رکھتے۔ سب کچھ طے شدہ ہے، بس اسکرپٹ پر عمل ہو رہا ہے۔ اور سنا ہے رائیٹر اب سکرپٹ بدلنے لگا ہے۔

عمران خان جانتے ہیں کہ اگر وہ جیل سے باہر آتے ہیں تو عوام یہ سمجھے گی، کہ یہ کسی معاہدے کا نتیجہ ہے، تو ان کا سارا بیانیہ برباد ہو جائے گا۔ وہ اب تک ایک مزاحمت کار، ایک نظریاتی لیڈر، اور “حقیقی آزادی” کی علامت بن چکے ہیں۔ لیکن اگر یہی شخص ایک دن خاموشی سے باہر آتا ہے، کیسز ختم ہو جاتے ہیں، اور سیاست میں نرمی آ جاتی ہے، تو کیا یہ سب اتفاق ہوگا؟ نہیں! یہ وہی سیاست ہوگی، جو سالہا سال سے چل رہی ہے۔

لیکن کھیل صرف عمران خان کے گرد نہیں گھوم رہا۔ اسٹیبلشمنٹ بھی ایک امتحان میں ہے۔ اگر عمران خان کو مکمل دیوار سے لگا دیا جاتا ہے، تو ملک میں بے چینی بڑھے گی۔ اگر انہیں کھلی آزادی دی جاتی ہے، تو وہ پہلے سے زیادہ طاقتور بن کر ابھریں گے۔ اس صورتحال میں درمیانی راستہ نکالنا سب سے ضروری مگر ایک مشکل کام ہے۔ اسٹیبلشمنٹ چاہتی ہے کہ عمران خان باہر بھی آ جائیں، لیکن یہ تاثر بھی نہ جائے کہ وہ جیت گئے ہیں۔ دوسری طرف، عمران خان یہ چاہتے ہیں کہ وہ باہر آئیں، لیکن ایسا نہ لگے کہ وہ کسی ڈیل کے تحت آئے ہیں۔

یہ وہ مقام ہے جہاں سیاست اور طاقت کا اصل کھیل شروع ہوتا ہے۔ یہ وہ مقام ہے جہاں کچھ فیصلے پس پردہ کیے جاتے ہیں، اور عوام کو ایک اور کہانی سنا دی جاتی ہے۔ سوال یہ ہے کہ اس بار یہ کہانی کس کے حق میں لکھی جائے گی؟ کیا عمران خان ایک نئے انداز میں سیاست میں واپسی کریں گے؟ یا یہ ایک اور سبق ہوگا، جو پاکستانی سیاست کی کتاب میں شامل کر دیا جائے گا؟

یہاں یہ سوال بھی اہم ہے کہ اگر واقعی ایک “سیاسی مفاہمت” ہونے جا رہی ہے، تو اس کے پیچھے محرکات کیا ہیں؟ کیا عمران خان اور اسٹیبلشمنٹ دونوں ایک دوسرے کے بغیر نہیں چل سکتے؟ یا پھر پس پردہ کوئی ایسا دباؤ ہے جو ان دونوں کو دوبارہ کسی نہ کسی شکل میں اکٹھا کر رہا ہے؟ کچھ لوگوں کا ماننا ہے کہ عمران خان کو دیوار سے لگانے کی حکمتِ عملی مکمل طور پر ناکام ہو چکی ہے۔ عوام کا ردعمل، عدالتی فیصلے، اور بین الاقوامی دباؤ، سب نے مل کر ایک ایسی فضا بنا دی ہے جہاں عمران خان کو سیاست سے مکمل طور پر بے دخل کرنا ممکن نہیں رہا۔ دوسری طرف، اسٹیبلشمنٹ یہ بھی نہیں چاہتی کہ عمران خان پہلے سے زیادہ مضبوط ہو کر سامنے آئیں۔

عمران خان کی سیاست میں ایک چیز واضح ہے کہ وہ ایک مقبول لیڈر ہیں، لیکن ان کی مقبولیت ان کی حکمتِ عملی کے ساتھ جُڑی ہوئی ہے۔ اگر وہ اپنے حامیوں کو یہ یقین دلا پاتے ہیں کہ وہ بغیر کسی ڈیل کے باہر آئے ہیں، تو ان کی سیاست مزید مضبوط ہو گی۔ لیکن اگر عوام کو ذرا سا بھی یہ تاثر گیا کہ عمران خان نے کسی ڈیل کے نتیجے میں اپنی مشکلات کم کی ہیں، تو ان کے لیے اپنی موجودہ مقبولیت کو برقرار رکھنا مشکل ہو جائے گا۔ یہی وہ توازن ہے جسے عمران خان اور ان کے قریبی ساتھی سمجھنے کی کوشش کر رہے ہیں۔

دوسری طرف، اسٹیبلشمنٹ کے لیے بھی یہ ایک نازک موڑ ہے۔ اگر عمران خان بغیر کسی واضح سمجھوتے کے باہر آتے ہیں، تو ان کا بیانیہ مزید مضبوط ہو گا۔ لیکن اگر انہیں کسی شرط کے ساتھ ریلیف دیا جاتا ہے، تو عوام میں یہ تاثر جائے گا کہ یہ بھی وہی پرانی سیاسی بساط ہے، جہاں سب آخر میں ایک ہی میز پر آ کر بیٹھ جاتے ہیں۔ یہی وجہ ہے کہ پس پردہ بہت کچھ چل رہا ہے، اور عوام کو صرف اتنا دکھایا جا رہا ہے جتنا ضروری سمجھا جا رہا ہے۔

یہاں ایک اور سوال بھی پیدا ہوتا ہے: اگر عمران خان واقعی باہر آ جاتے ہیں، تو کیا وہ دوبارہ اُسی انداز میں سیاست کر سکیں گے؟ یا پھر ان کے لیے ایسے حالات بنا دیے جائیں گے جہاں وہ محدود ہو کر رہ جائیں؟ کیا ان کی جماعت کو مکمل طور پر بحال ہونے دیا جائے گا؟ کیا انہیں الیکشن میں آزادانہ حصہ لینے دیا جائے گا؟ یا پھر وہ ایک کنٹرولڈ سیاست کا حصہ بننے پر مجبور ہو جائیں گے؟ یہ تمام سوالات اس وقت پاکستانی سیاست کے گرد گھوم رہے ہیں، لیکن ان کے جوابات آنے والا وقت ہی دے سکتا ہے۔

کھیل جاری ہے، اسکرپٹ پر کام ہو رہا ہے، کردار اپنے اپنے ڈائیلاگ یاد کر رہے ہیں۔ بس پردہ اٹھنے کی دیر ہے، دیکھتے ہیں کہ اس بار پردے پر کون ہیرو بن کر آتا ہے۔