ہوم << اپنے وجود کی بازیافت – نعیم اللہ باجوہ
600x314

اپنے وجود کی بازیافت – نعیم اللہ باجوہ

انسان کی زندگی میں ایک مرحلہ ایسا بھی آتا ہے جب اسے محسوس ہوتا ہے کہ اس نے بہت کچھ اٹھا رکھا ہے۔ کچھ بوجھ زمانے نے اس کے کندھوں پر رکھے ہوتے ہیں، کچھ رشتوں نے اس کے دل میں اتار دیے ہوتے ہیں اور کچھ وہ خود اپنی نادانی، اپنی توقعات اور اپنی بے نام خواہشوں کے ہاتھوں جمع کر لیتا ہے۔ پھر ایک دن وہ ان سب سے نجات پانے کے لیے کسی دوسرے راستے کی تلاش میں نہیں نکلتا بلکہ اپنے ہی وجود کی طرف پلٹ آتا ہے۔

اسے پہلی مرتبہ احساس ہوتا ہے کہ جس سکون کو وہ ساری عمر باہر تلاش کرتا رہا، اس کا راستہ تو اس کے اپنے باطن سے ہو کر گزرتا تھا۔یہ واپسی بظاہر بہت خاموش ہوتی ہے مگر اس کے اندر ایک پوری کائنات زیر و زبر ہو رہی ہوتی ہے۔ انسان اپنی ذات کے ان گوشوں میں اترنے لگتا ہے جہاں کبھی دوسروں کی رائے کا شور تھا، کہیں محرومیوں کی گرد جمی تھی، کہیں انا نے اپنے بت تراش رکھے تھے اور کہیں خواہشوں نے احساس کی روشنی کو دھندلا دیا تھا۔ وہ ایک ایک کر کے اپنے اندر کی ان تہوں کو کھولتا ہے جنہیں برسوں سے چھپانے میں اس نے اپنی توانائی صرف کی تھی۔ اسے معلوم ہوتا ہے کہ بعض زخم وقت نے نہیں دیے تھے بلکہ اس کی اپنی ضد نے انہیں تازہ رکھا تھا، بعض رشتے ٹوٹے نہیں تھے بلکہ اس کی توقعات کے بوجھ تلے دب گئے تھے اور بعض دکھ اتنے گہرے بھی نہیں تھے جتنا اس نے انہیں اپنی سوچ میں بنا لیا تھا۔

زندگی کا سب سے مشکل احتساب دوسروں کا نہیں، اپنا ہوتا ہے۔ دوسروں کی غلطیاں گنوانے کے لیے دلیلیں درکار ہوتی ہیں مگر اپنی غلطیوں کو پہچاننے کے لیے حوصلہ چاہیے۔ انسان جب اپنے اندر کی عدالت میں خود کو کٹہرے میں کھڑا کرتا ہے تو وہاں نہ کوئی وکیل ہوتا ہے نہ کوئی گواہ۔ صرف ضمیر ہوتا ہے جو ان تمام حقیقتوں سے واقف ہوتا ہے جنہیں دنیا سے چھپایا جا سکتا ہے مگر خود سے نہیں۔ اس مقام پر انسان کو اپنی نیکیوں سے زیادہ اپنی نیتوں کا جائزہ لینا پڑتا ہے۔ اسے معلوم کرنا پڑتا ہے کہ اس نے کہاں محبت کی آڑ میں اپنی خواہش پوری کی، کہاں خاموشی کو وقار سمجھ کر کسی کے حق سے منہ موڑا اور کہاں اپنی برتری کے احساس میں کسی دوسرے کی عزتِ نفس کو مجروح کیا۔یہی وہ مقام ہے جہاں خود شناسی محض ایک فکری اصطلاح نہیں رہتی بلکہ ایک زندہ تجربہ بن جاتی ہے۔اپنی ذات کی صفائی کا مطلب اپنے وجود کو دوسروں کی نگاہوں میں قابلِ قبول بنانا نہیں بلکہ اپنے باطن کو اس حقیقت کے سامنے قابلِ قبول بنانا ہے جس سے کوئی شے پوشیدہ نہیں۔

انسان اپنے لباس کی گرد جھاڑ سکتا ہے، اپنے چہرے پر مسکراہٹ سجا سکتا ہے، اپنے الفاظ کو شائستگی کا پیرہن پہنا سکتا ہے مگر اپنے اندر موجود حسد، کینہ، خود پسندی اور احساسِ برتری کو محض ظاہری نفاست سے ختم نہیں کر سکتا۔ ان کے لیے ایک ایسی جرأت درکار ہے جو انسان کو اپنی ہی نظر میں بے نقاب ہونے کا حوصلہ دے۔ہم اکثر اپنی زندگی کا بڑا حصہ دوسروں کو سمجھنے، ان کی اصلاح کرنے اور ان کے رویوں کا حساب رکھنے میں گزار دیتے ہیں۔ ہمیں ہر شخص کے کردار میں کوئی نہ کوئی کمی دکھائی دیتی ہے مگر اپنی ذات کے اندر جھانکنے کی مہلت نہیں ملتی۔ شاید اس لیے کہ دوسروں کی اصلاح میں ہماری انا محفوظ رہتی ہے جبکہ اپنی اصلاح میں اسے قربانی دینا پڑتی ہے۔ ہم چاہتے ہیں کہ دنیا ہمارے دکھ سمجھے، ہماری خاموشی پڑھے، ہماری قربانیوں کو تسلیم کرے اور ہماری قدر کرے مگر یہ سوال کم ہی کرتے ہیں کہ ہم نے دوسروں کے لیے کتنی آسانی پیدا کی؟ ہماری موجودگی نے کتنے دلوں کو اطمینان دیا؟ ہماری زبان سے کتنے لوگ محفوظ رہے؟ اور ہمارے رویے نے کتنی روحوں کو بے وجہ زخمی ہونے سے بچایا؟

زندگی کا حسن اپنی ذات کو منوانے میں نہیں بلکہ اپنی ذات سے دوسروں کے لیے آسانی پیدا کرنے میں ہے۔عمر کا ایک مرحلہ ایسا بھی آتا ہے جب انسان کو اپنے جسم کی ناپائیداری کا ادراک ہونے لگتا ہے۔ آئینے میں چہرہ وہی ہوتا ہے مگر اس پر وقت کی تحریر بدل چکی ہوتی ہے۔ قدموں میں پہلے جیسی تیزی نہیں رہتی، یادداشت بعض راستوں پر ٹھہرنے لگتی ہے اور جسم اسے بار بار یاد دلاتا ہے کہ یہ وجود ہمیشہ کے لیے نہیں۔ تب انسان کو ایک عجیب حقیقت سمجھ میں آتی ہے کہ جس جسم کو سنوارنے، سجانے، آرام پہنچانے اور دنیا کے سامنے بہتر دکھانے میں اس نے عمر صرف کی، وہ بھی ایک دن مٹی کی امانت مٹی کے سپرد کر دے گا۔ مگر اس کے ہاتھوں سے نکلنے والی محبت، اس کے کردار سے پیدا ہونے والا اعتماد، اس کی زبان سے ادا ہونے والا سچ اور کسی دکھی انسان کے لیے پیدا کی گئی آسانی اس کی زندگی کے دائرے سے کہیں آگے تک سفر کر سکتی ہے۔

یہی احساس انسان کے ترجیحی پیمانے بدل دیتا ہے۔ اسے شہرت سے زیادہ اثر، نمود سے زیادہ اخلاص، جمع کرنے سے زیادہ بانٹنے اور جیتنے سے زیادہ سمجھنے کی اہمیت معلوم ہونے لگتی ہے۔ وہ جان لیتا ہے کہ ہر بحث میں کامیاب ہونا ضروری نہیں، ہر تعلق کو اپنی مرضی کے مطابق چلانا ضروری نہیں اور ہر شخص سے اپنی قدر تسلیم کروانا بھی زندگی کا کوئی لازمی مقصد نہیں۔ بعض اوقات خاموشی سب سے بڑی دانائی، معافی سب سے بڑی فتح اور کسی دوسرے کی خوشی کے لیے اپنی انا سے دست بردار ہو جانا سب سے بڑی خود مختاری بن جاتا ہے۔لیکن اس تمام سفر کا نقطۂ اختتام محض خود شناسی نہیں۔ اپنی حقیقت کو پہچان لینے کے بعد انسان کے سامنے ایک اور دروازہ کھلتا ہے۔ وہ اپنی محدودیت کو سمجھتا ہے تو اس لامحدود ہستی کی طرف متوجہ ہوتا ہے جس کے سامنے اس کا علم، اس کی طاقت، اس کی عقل اور اس کی تدبیریں سب اپنی اصل حیثیت میں آ جاتی ہیں۔ اسے احساس ہوتا ہے کہ زندگی صرف اپنی ذات کو سنوارنے کا نام نہیں بلکہ اس ذات سے اپنا تعلق درست کرنے کا نام بھی ہے جس نے اسے وجود بخشا۔ یہاں بندگی کسی مجبوری یا رسم کا عنوان نہیں رہتی بلکہ شعور کی سب سے بلند منزل بن جاتی ہے۔ انسان جب اپنی بڑائی کے فریب سے آزاد ہوتا ہے تو اسے اپنے خالق کی بڑائی کا ادراک نصیب ہوتا ہے۔

اور شاید یہی وہ لمحہ ہے جب دل کا اصل بوجھ اترتا ہے۔ انسان دنیا سے اپنی شکایتیں کم اور اپنے حصے کی ذمہ داریاں زیادہ دیکھنے لگتا ہے۔ وہ ماضی کو سزا گاہ نہیں بناتا بلکہ تجربہ گاہ سمجھتا ہے۔ وہ مستقبل سے بے جا مطالبے نہیں کرتا بلکہ حال کو بہتر بنانے کی کوشش کرتا ہے۔ وہ اپنے وجود کو دوسروں سے برتر ثابت کرنے کے بجائے اپنے کردار کو گزشتہ کل سے بہتر بنانے میں لگ جاتا ہے۔زندگی کی سب سے بڑی کامیابی یہ نہیں کہ انسان دنیا میں اپنی موجودگی کے نشان کتنے گہرے چھوڑ گیا بلکہ یہ ہے کہ اس کے گزر جانے کے بعد کتنے دل اس کی وجہ سے نرم، کتنی زندگیاں اس کی وجہ سے آسان اور کتنے انسان اس کی رفاقت سے اپنے اندر کی بہتر صورت دریافت کرنے کے قابل ہوئے۔بالآخر انسان کو معلوم ہوتا ہے کہ اس کا اصل سفر فاصلوں کا نہیں، فاصلے مٹانے کا تھا؛ دوسروں سے نہیں، اپنے اندر کے تضادات سے لڑنے کا تھا۔ اسے اپنی ذات کی عمارت بلند نہیں کرنی تھی بلکہ اس کے اندر سے تکبر، نفرت، خود غرضی اور محرومی کی وہ تہیں اتارنی تھیں جو اس کی اصل انسانی شناخت کو چھپائے ہوئے تھیں۔

وجود کی سب سے بڑی تطہیر یہ ہے کہ انسان اپنے ہونے کا بوجھ بننے کے بجائے دوسروں کے لیے باعثِ رحمت بن جائے۔ یہی وہ مقام ہے جہاں عمر محض گزرے ہوئے برسوں کا حساب نہیں رہتی، زندگی ایک مقصد حاصل کر لیتی ہے اور انسان اپنے جسم کی فنا کے باوجود اپنے کردار میں ایک ایسی معنویت چھوڑ جاتا ہے جسے وقت کی گرد کبھی مکمل طور پر ڈھانپ نہیں سکتی۔

مصنف کے بارے میں

Avatar photo

نعیم اللہ باجوہ

تبصرہ لکھیے

Click here to post a comment