آج ایک طویل عرصے کے بعد اپنے چند دلنواز دوستوں کے ساتھ ملاقات ہوئی۔ مدتوں بعد ماضی کی کتاب کھولی اور اس میں درج کئی قصے دہرائے۔ کئی مزاحیہ واقعات یاد کرکے اس قدر محظوظ ہوئے کہ ہنستے ہنستے پیٹ میں بل پڑ گئے۔ خوشگوار باتوں کا تبادلۂ خیال ہوتا رہا، انہی دل آویز لمحوں میں وقت گزرنے کا احساس ہی نہ ہوا اور مغرب ہوگئی۔ خیر، واپسی کے لیے فتح جنگ اڈے کا رخ کیا۔
آج چونکہ ہفتہ تھا، اس لیے ہمارے اس بین الصوبائی روڈ پر ہفتے اور سوموار کے روز گاڑی مل جانا بھی غنیمت ہی سمجھا جاتا ہے۔ خیر، اڈے کی جانب جاتے ہوئے اس شاہراہ کی زینت، یعنی ’’ناڑہ بس‘‘ دکھائی دے گئی۔ دوستوں کو الوداع کہا اور بمشکل بس کے گیٹ تک پہنچا ہی تھا کہ استاد نے ’’اگلا‘‘ لگا دیا۔ناڑہ بس کی ایک خاصیت یہ بھی ہے کہ ساٹھ ستر نشستوں والی اس بس میں ’’ہزار‘‘ سواریاں بھی سما جاتی ہیں۔ یہ بس سروس بذاتِ خود اتنی کشادہ ظرف ہے یا نہیں، اس کا عملہ بہرحال نہایت فراخ دل واقع ہوا ہے۔ انہیں اگر راستے میں دس روپے کی سواری بھی مل جائے تو اسے بھی مایوس نہیں کرتے۔ ناڑہ سے راولپنڈی تک ہر چھوٹے بڑے اسٹاپ پر بریک لگانا گویا ’’فریضۂ اول‘‘ میں شامل ہے۔ الغرض، عملے کا بس چلے تو راستے میں جاتی ہوئی مرغی کو بھی بس میں سوار کرکے اس کی منزلِ مقصود تک پہنچا دیں۔بس میں سوار ہونے کے بعد گیٹ پر کھڑے کنڈکٹر صاحب نے مجھے آگے جانے کا اشارہ کیا، مگر آگے بس پہلے ہی کھچا کھچ بھری ہوئی تھی۔ ابھی میں سیدھا کھڑا ہونے کی سعی کر ہی رہا تھا کہ اگلے اسٹاپ سے چار مسافر مزید سوار ہوگئے۔ پہلے سے موجود مسافر پیچھے کی جانب اور نئے سوار ہونے والے آگے کی طرف دھکیل رہے تھے، جبکہ میں درمیان میں ان کے رحم و کرم پر تھا۔
فتح جنگ سے نکلتے نکلتے تقریباً دس مسافر مزید سوار ہوچکے تھے، جبکہ اندر ایک مسافر کے کھڑے ہونے کی بھی گنجائش نہ تھی۔ بس چلتی تو میں کبھی آگے اور کبھی پیچھے کی جانب لڑھک جاتا۔ ساتھ والی نشست پر جعفر کے ایک بزرگ مسافر تشریف فرما تھے۔ انہوں نے میری ’’بدحالی‘‘ بھانپ لی اور دلاسہ دیا کہ جعفر تک ذرا صبر کرلو، پھر تم میری نشست پر بیٹھ جانا۔ میں ان کا شکریہ ادا کرنے کے لیے ان کی طرف متوجہ ہوا ہی تھا کہ بے دھیانی میں میرا سر چھت سے ٹکرا گیا اور میرے چودہ طبق روشن ہوگئے۔ آج اپنے طویل قامت ہونے کے نقصانات پوری شدت سے آشکار ہو رہے تھے۔ڈھوک ماڑی اسٹاپ، جس کا آج پہلی مرتبہ نام سماعت سے گزرا تھا، وہاں ایک مسافر نے اترنا تھا جو بس کے عین وسط میں کھڑا تھا۔ اس مسافر کا گیٹ کے قریب پہنچنا ایسا تھا گویا کوئی ریسلنگ کے اکھاڑے میں داؤ پیچ آزما رہا ہو۔ اترنے کے لیے اسے جس قدر تگ و دو کرنا پڑی، یقیناً اس دوران اس کا کھایا پیا ہضم ہوگیا ہوگا۔ اسی اثنا میں دوسرے کنڈکٹر صاحب بھی آن دھمکے اور کرایہ وصول کرنے لگے۔
اب اس ’’پیکڈ‘‘ صورتِ حال میں کوئی شخص جیب سے کرایہ کیسے نکال سکتا ہے، مگر وہ مصر تھے کہ ابھی کرایہ ادا کیا جائے۔ ایک مسافر، جس نے کھنڈہ اترنا تھا، سے کرایے کی مد میں دس روپے زائد وصول کیے گئے تو اس نے کنڈکٹر صاحب کو کھری کھری سنا دیں اور انہیں یاد دلایا کہ پٹرول اور ڈیزل کی قیمتوں میں کتنی کمی ہوچکی ہے۔ کنڈکٹر صاحب کے پاس کوئی معقول جواب نہ ہونے کے باعث دس روپے واپس کرنا پڑے، جس پر مسافر نے فاتحانہ انداز میں اپنے گرد و پیش موجود مسافروں پر ایک نگاہِ فتح ڈالی۔بس کا پچھلا حصہ ’’مردانہ‘‘ جبکہ اگلا حصہ ’’زنانہ‘‘ ہوتا ہے۔ مردانے حصے میں مسافروں کی ’’عزتیں‘‘ آپس میں گڈ مڈ ہو رہی ہوتی ہیں۔ یہاں کسی کو اپنی عزت بچانے کی فکر بھی نہیں ہوتی، بلکہ سب اپنی اپنی جگہ پر پاؤں جمانے کی جنگ لڑ رہے ہوتے ہیں۔ میرے سامنے کھڑے قدرے پست قامت مسافر کا سر عین میرے منہ کے سامنے تھا۔ موصوف نے سر میں سرسوں کے تیل سے باقاعدہ مالش کروا رکھی تھی۔ تیل کی مخصوص خوشبو میرے نتھنوں سے ٹکرا رہی تھی اور میں اس خوشبو سے بلاواسطہ مستفید ہونے پر مجبور تھا۔
جعفر پہنچنے پر وہ بزرگ مسافر اترے تو میں نے سکھ کا سانس لیا اور ان کی نشست پر براجمان ہوگیا۔ اس اسٹاپ پر خاصی تعداد میں مسافر اترے تو بس میں اژدحام کچھ کم ہوا۔ کنڈکٹر صاحب بھی کرایہ وصولی کے فریضے سے قدرے سبک دوش ہوئے تو رقم گن کر اپنی سائیڈ والی جیب میں ڈالی اور حفاظتی تدابیر کو ملحوظِ خاطر رکھتے ہوئے اس جیب کو ’’نیفے‘‘ کے اندر اڑس لیا۔ انہوں نے پاکستان کے قرضوں کے حوالے سے ایک نویدِ مسرت بھی سنائی کہ امریکا میں قرضوں کی معافی کا معاملہ زیرِ غور ہے۔ امید ہے کہ آئندہ دس دنوں میں پاکستان کا قرضہ معاف ہوجائے گا، جس کے نتیجے میں ڈیزل اور پٹرول کی قیمتیں کم ہوں گی اور پاکستان کی گڈی چڑھ جائے گی۔ وہ امریکا میں ہونے والے انتخابات پر بھی اظہارِ خیال کرنے لگے کہ نیا جو بندہ آیا ہے، وہ کمال ہے، ٹرمپ تو بڑا تھا۔ موصوف جس انداز سے اس کا تذکرہ فرما رہے تھے، اس سے تو یہی گمان ہوتا تھا کہ وہ نیا بندہ بھی ’’ناڑے‘‘ ہی کا رہائشی ہے۔
جعفر کے بعد بسال چوک تک بس نے جن مقامات پر اسٹاپ کیے، ان میں کوٹ موڑ، پمپ اسٹاپ، درسکی موڑ، کھنڈہ، ڈھوک پیلا، مرجال فارم، کامپور چوکی، مرجال ہوٹل، ٹاہلی اڈہ، لنک روڈ، کسراں چوک، فاروق بلاک فیکٹری اور بسال چوک شامل تھے۔یہ بس سروس واقعی اس روڈ کی رونق ہے۔



تبصرہ لکھیے