کہتے ہیں بکری جب تک ریوڑ کے ساتھ رہتی ہے، محفوظ رہتی ہے۔ جہاں ریوڑ سے الگ ہوتی ہے، بھیڑیے کی خوراک بن جاتی ہے۔ حقیقتاً ایسا ہی ہے۔
جس طرح بکری ریوڑ سے الگ ہو کر بھیڑیے کے لیے آسان شکار بن جاتی ہے، اسی طرح انسان بھی نیک لوگوں سے الگ ہو کر شیطان کے لیے آسان شکار بن سکتا ہے۔ خدائے پاک نے شیطان کو آدمی کا کھلا دشمن فرمایا ہے۔ اسی لیے وہ ہر آن ہمارے پیچھے پڑا رہتا ہے کہ کس طرح ہمیں جہنم میں اپنے ساتھ لے جائے۔ یقینا وہ اپنے لیے پڑوسی جمع کر رہا ہے۔خدائے پاک نے اس سے بچنے کی آدمی کو تلقین کی ہے، اور اس سے بچنے کا ایک ذریعہ “مجمع المسلمین” کے ساتھ ہونا ہے۔ اسی لیے قرآنِ پاک میں خدائے پاک نے “کونوا مع الصادقین” یعنی سچوں کے ساتھ ہو جاؤ، اور “وارکعوا مع الراکعین” یعنی رکوع کرنے والوں کے ساتھ رکوع کرو، فرما کر گویا مومنین کو یہ سبق دیا کہ آدمی نیکی کے ماحول اور نیک لوگوں سے جڑا رہے، ان کے ساتھ رہے اور ان کے ساتھ نیکی کے کاموں میں شریک ہوتا رہے۔
دن رات فکرِ معاش اور گھر بار میں مصروف ہم لوگ، اس بارش کی طرح برستے فتنوں کے زمانے میں، اپنی استطاعت کے مطابق، ہفتہ، پندرہ دن یا مہینے میں ایک بار، کم از کم کوشش کریں کہ کسی تنظیم، تحریک، ادارے، بزم یا کسی شیخ، مرشد، پیر، استاد سے باقاعدہ خود کو وابستہ کر لیں۔ان کے اجتماعات، محفلوں، حلقوں میں شرکت کرتے رہیں۔اس تنظیم، تحریک، ادارے، بزم کے مقصد کو سمجھیں، اس میں دین و دنیا کی بھلائی دیکھیں اور جڑ جائیں۔یقینا ہر جگہ دودھ سے دھلے لوگ نہیں ہوتے۔ وہ سب بھی آپ کی طرح کوشش کر رہے ہیں۔ ذاتی معاملات سے درگزر کریں اور اپنا مقصد رضائے الٰہی بنا لیں۔یقینا خدا نے ہمیں صرف کھا پی کر مر جانے، یعنی بے مقصد زندگی گزارنے کے لیے تو یہاں نہیں بھیجا۔اپنا حصہ کا کام کریں۔اس سے نہ صرف اس تنظیم، تحریک، ادارے، بزم کو فائدہ ہوگا بلکہ خود آپ کا اپنا ایمان بھی محفوظ رہے گا۔
جڑے رہیں، محفوظ رہیں۔
تبصرہ لکھیے