ہم سمجھتے ہیں کہ میاں بیوی کے درمیان ناچاقی، طلاق یا خلع کی نوبت تب آتی ہے جب گھر میں معاشی مسائل ہوں، شوہر بیوی کی کفالت سے غافل ہو، تعلیم و شعور کی کمی ہو یا خاندان غربت اور تنگ دستی کا شکار ہو۔ بلاشبہ یہ بھی ازدواجی زندگی کو متاثر کرنے والے عوامل ہیں، لیکن کیا ہر ٹوٹتے ہوئے رشتے کے پیچھے یہی وجوہات ہوتی ہیں؟ کیا خوش حال، تعلیم یافتہ اور آسودہ خاندانوں میں ازدواجی زندگی ہمیشہ خوش گوار رہتی ہے؟
رابعہ احسن کے المناک قتل نے ایک بار پھر سوال پیدا کیا ہے۔ اطلاعات کے مطابق ان کے شوہر گریڈ اٹھارہ کے افسر ہیں اور رابعہ خود پیشہ ورانہ صحافت کے ساتھ اسلام آباد کے ایک معروف بیوٹی سیلون چلاتی تھیں۔ بظاہر ایک آسودہ، تعلیم یافتہ اور معاشی طور پر مستحکم خاندان۔ پھر وہ کون سے عوامل تھے جنہوں نے ایک گھر کو اس المناک انجام تک پہنچایا؟یہ واقعہ بتاتا ہے کہ ازدواجی تعلقات کی خرابی کو صرف معاشی مسائل یا جہالت سے منسوب نہیں کیا جا سکتا۔ اس کے پیچھے بے شمار نفسیاتی، جذباتی، اخلاقی اور سماجی عوامل بھی ہوتے ہیں۔ اور سب سے اہم بات یہ کہ ازدواجی اختلاف کسی بھی صورت تشدد یا قتل کا جواز نہیں بن سکتا۔اسی تناظر میں مجھے اپنی وہ دوست یاد ائی جنہوں نے خلع لے لی۔ مجھے خاصی حیرت ہوئی کیونکہ اس سے پہلے کبھی ان کی زبان سے شوہر کی شکایت نہیں سنی تھی۔ وہ کہنے لگیں:
’’ہم دونوں بہت خوش تھے پھر اچانک میرے شوہر کی زندگی میں ایک دوسری لڑکی آگئی۔ ان کا رویہ بدلنے لگا۔ بات بات پر ناراضگی، بے رخی اور بے اعتنائی،طلاق کی دھمکی۔۔۔مجھے محسوس ہونے لگا کہ اب وہ مجھ سے خوش نہیں ہیں۔ میں نے سوچا کہ وہ دوسری شادی کر کے مجھے طلاق دے دیں گے۔ کیوں نہ میں خود ہی عزت کے ساتھ الگ ہو جاؤں؟ کم از کم میرے خاندان کے ریکارڈ میں یہ بات تو رہے گی کہ علیحدگی کا فیصلہ میں نے کیا تھا۔‘‘
یہ بات سن کر مجھے احساس ہوا کہ عورت ہمیشہ غربت، تشدد یا جسمانی اذیت کی وجہ سے ہی علیحدگی کا فیصلہ نہیں کرتی۔ کبھی رشتے میں محبت، اعتماد اور اپنائیت ختم ہو جاتی ہے۔ کبھی عورت کو محسوس ہوتا ہے کہ وہ ایک ایسے تعلق کو تنہا نبھا رہی ہے جس میں دوسرے فریق کی دلچسپی باقی نہیں رہی۔اب سوال یہ ہے کہ کیا ایسی عورت کو صرف اس لیے رشتے میں رہنے پر مجبور کیا جائے کہ معاشرہ کیا کہے گا؟ہمارے معاشرے میں اس سوال کا ایک اور بھی تکلیف دہ پہلو ہے۔ بیٹی کے لیے رشتہ نبھانے کا فیصلہ اکثر اس کے والدین، خاندان اور برادری کی اجتماعی انا سے جڑا ہوتا ہے۔ بیٹی چاہے کتنی ہی اذیت میں ہو، اسے سمجھایا جاتا ہے کہ گھر بسانا عورت کا کام ہے، تھوڑا بہت تو ہر گھر میں ہوتا ہے، بچے ہیں، خاندان ہے، لوگ کیا کہیں گے؟
مجھے اپنی ایک طالبہ یاد آتی ہے۔ اس کے نکاح کے دن میرے بیٹے نے اس کے شوہر کے بارے میں کہا تھا کہ یہ شخص مجھے کچھ نارمل نہیں لگ رہا۔ بعد میں خود اس بچی نے بھی اپنے شوہر کے غیر معمولی رویوں کے بارے میں بتایا۔ میں جب بھی اسے علیحدگی کا مشورہ دیتی تو وہ کہتی:
’’میرے ابا کہتے ہیں کہ میں برادری کو کیا منہ دکھاؤں گا؟جب تم نے علیحدگی کا فیصلہ کرنا ہو تو پہلے مجھے بتا دینا تاکہ میں خود کو شوٹ کر لوں۔‘‘
یہ کیسا جذباتی دباؤ ہے؟ ایک باپ اپنی بیٹی کو اس کے حقِ زندگی اور سکون کے بارے میں فیصلہ کرنے کی آزادی دینے کے بجائے اپنی جان لینے کی دھمکی دے رہا ہے۔ گویا بیٹی کی ازدواجی زندگی کا فیصلہ اس کی خوشی اور تحفظ سے نہیں، باپ کی برادری میں عزت سے مشروط ہے۔آج وہ تقریباً بیس برس سے اسی شخص کے ساتھ زندگی گزار رہی ہے۔ نہ جانے ان بیس برسوں میں اس نے کتنے زخم اپنے دل میں ہی دفن کیے ہونگے۔یہ ایک دو واقعات نہیں۔ ہمارے اردگرد ایسی ہزاروں مثالیں موجود ہیں جہاں بیٹیاں والدین کی عزت، خاندان کی ناک اور برادری کے خوف سے اپنی زندگی کے اہم فیصلے نہیں کر پاتیں۔ہمیں یہ بھی سوچنا ہوگا کہ جب ہم بیٹی کو ہر قیمت پر شوہر کے ساتھ رہنے پر مجبور کرتے ہیں تو بالواسطہ طور پر بعض مردوں کو کیا پیغام دیتے ہیں؟ کیا انہیں یہ احساس نہیں ہوتا کہ بیوی کہیں نہیں جائے گی، خاندان اسے جانے نہیں دے گا، اس کے والدین اسے واپس نہیں آنے دیں گے، لہٰذا وہ جو چاہیں سلوک کر سکتے ہیں؟
اور جب مرد کو یہ یقین ہو جائے کہ بیوی کے لیے گھر سے نکلنے کا راستہ بند ہے تو بعض اوقات اس کے اندر ظلم اور جبر کا حوصلہ مزید بڑھ جاتا ہے۔اس سے بھی زیادہ ہولناک وہ ذہنیت ہے جس میں شوہر بیوی سے چھٹکارے کا راستہ طلاق یا باعزت علیحدگی کے بجائے اس کی موت میں تلاش کرنے لگتا ہے۔ کبھی گھریلو جھگڑے کے دوران گولی چل جاتی ہے، کبھی پستول صاف کرتے ہوئے حادثہ ہو جاتا ہے، کبھی نشانہ اتفاقاً بیوی بن جاتی ہے۔ ہر واقعے کی حقیقت تحقیقات سے ہی سامنے آنی چاہیے، لیکن ہمیں یہ ضرور سمجھنا ہوگا کہ اسلحے کے ذریعے دھمکانا، خوف زدہ کرنا اور تشدد معمولی گھریلو معاملہ نہیں۔اسلام نے نکاح کو سکون، محبت اور رحمت کا ذریعہ قرار دیا ہے۔ قرآن مجید نے میاں بیوی کے تعلق کی بنیاد مودت و رحمت پر رکھی ہے۔ سورۃ النساء میں ارشاد ہے:
فَإِنْ أَمْسَكُوهُنَّ بِمَعْرُوفٍ أَوْ سَرِّحُوهُنَّ بِمَعْرُوفٍ
یعنی انہیں بھلے طریقے سے روک رکھو یا بھلے طریقے سے رخصت کر دو۔ (البقرہ: 231)
یہ آیت ہمیں بنیادی اصول دیتی ہے کہ ازدواجی تعلق میں بھی معروف، بھلائی اور انصاف لازم ہیں۔ رشتہ قائم رکھنا ہو تو اچھے طریقے سے، اور ختم کرنا ہو تو بھی اچھے طریقے سے۔ کسی انسان کو اپنی ملکیت سمجھ کر اس کی زندگی اجیرن کر دینا دین داری نہیں۔یقیناً ہمیں گھر بسانے کی ترغیب دینی چاہیے، معمولی اختلافات پر رشتے توڑنے کی حوصلہ افزائی نہیں کرنی چاہیے۔ خاندانوں کو صلح صفائی، برداشت اور اصلاح کی کوشش کرنی چاہیے۔ لیکن صلح کا مطلب یہ نہیں کہ ایک فریق مسلسل ظلم سہتا رہے اور دوسرے کو اپنی اصلاح کی کوئی ضرورت محسوس نہ ہو وہ فرعون ہوتا چلا جائے۔بیٹیوں کو یہ اعتماد دینا ہوگا کہ اگر ان کی ازدواجی زندگی ناقابلِ برداشت ہو جائے، اگر ان کی عزت، جان اور ذہنی سکون خطرے میں ہو، اگر اصلاح کی سنجیدہ کوششیں ناکام ہو جائیں تو ان کے والدین کا گھر ان کے لیے بند نہیں ہوگا۔ہمیں اپنی بیٹیوں کو یہ بھی سمجھانا ہے کہ نکاح ایک مقدس عہد ہے، اسے نبھانے کی پوری کوشش کریں، لیکن یہ عہد انہیں اپنے وجود، عزت اور زندگی سے دست بردار ہونے کا پابند نہیں کرتا۔
وقت بہت تیزی سے بدل رہا ہے۔ عورت تعلیم یافتہ ہے، اپنے حقوق سے واقف ہے، معاشی طور پر خود مختار بھی ہو سکتی ہے اور زندگی کے فیصلے کرنے کی صلاحیت بھی رکھتی ہے۔ ایسے میں والدین کو بیٹی کے مستقبل کا فیصلہ برادری کے خوف سے نہیں، اس کی زندگی کے حقائق اور اس کے تحفظ کو سامنے رکھ کر کرنا ہوگا۔آخر میں ایک بات بہت واضح ہونی چاہیے:بیٹی کی علیحدگی خاندان کی ناکامی نہیں، اور اس کی ساری زندگی کا سمجھوتہ خاندان کی کامیابی نہیں۔ہمیں بیٹیوں کو گھر بسانے کا حوصلہ ضرور دینا چاہیے، مگر کسی بھی قیمت پر گھر بچانے کا بوجھ صرف ان کے کندھوں پر نہیں ڈالنا چاہیے۔بیٹیاں مجبوری کا نام نہیں ہیں۔ وہ بھی انسان ہیں، ان کے بھی خواب ہیں، احساسات ہیں، عزتِ نفس ہے، جینے کا حق ہے۔
خدارا!
لوگوں کی زبانیں بند رکھنے کے لیے اپنی بیٹیوں کی زندگیوں کو خاموش مت کیجیے۔
تبصرہ لکھیے