خودی کی جلوتوں میں مصطفائی
خودی کی خلوتوں میں کبریائی
زمین و آسمان و کرسی و عرش
خودی کی زد میں ہے ساری خدائی
عظیم مفکر، اسلام عظیم شاعر،علامہ سر محمد اقبال رحمۃ اللہ علیہ کا خودی کا پیغام تمام بڑے بڑے مصنفین نے تفصیل سے لکھاہے۔ اور خوب لکھا ہے۔ کیونکہ اقبال کا فلسفہ سمجھنے، پڑھنے دیکھنے اور سننے کی کے لیے نہیں ہے بلکہ اس عمل پیرا ہونے کا نام ہے۔ لیکن آج کی نوجوان نسل اقبال کے ہر پیغام سے کوسوں دور بھاگ رہی ہے۔ اللہ تعالیٰ ہمیں سب کو عمل کرنے اور عمل پیرا ہونے کی توفیق عطا فرمائے۔ آمین ثم آمین
جب علامہ اقبال کی معرکۃ الآرا کتاب اسرار خودی شائع ہوئی تو پروفیسر آر اے نکسن نے اس کا ترجمہ انگریزی میں کیا۔ تو جرمن مستشرق خاتون این میری شمل نے اپنی کتاب Gabriel’s wings میں لکھا کہ میں اقبال کو پیغمبر نہیں کہہ سکتی کیونکہ نبوت کا سلسلہ ختم ہوچکا ہے۔ لیکن اتنا ضرور کہوں گی کہ جبرائیل کا ایک پر اقبال کو چھو گیا ہے جس کی وجہ سے اقبال میں آفاقیت کی علامتیں عود کر آئی ہیں۔علامہ اقبال نے کہا تھا:
خودی وہ بحر ہے جس کا کوئی کنارہ نہیں
تو آب جو اسے سمجھا اگر تو چارہ نہیں
ایک اور جگہ فرماتے ہیں۔ خودی کا وجود سے خدا کی ذات سے الگ نہیں.
اقبال اور غالب
مرزا اسد اللہ خان غالب اور ڈاکٹر علامہ محمد اقبال اردو اور فارسی شاعری کے وہ دو روشن ستارے ہیں جنہوں نے انسانی شخصیت، خودی، اور انسان کی عظمتِ رفتہ کو اپنے فکر کا مرکز بنایا۔ اگرچہ دونوں کے تاریخی ادوار، سیاسی حالات اور فکری پس منظر میں نمایاں فرق ہے، تاہم انسان کی لاجواب صلاحیتوں، کائنات میں اس کے مرکزی مقام، اور خود شناسی کے حوالے سے ان کے ہاں گہرے فکری اشتراک اور دلچسپ فکری فاصلے پائے جاتے ہیں۔’خودی’ کا لفظ جب ذہن میں آتا ہے تو سب سے پہلے علامہ اقبال کا نام ابھرتا ہے، جنہوں نے خودی کو ایک باقاعدہ فلسفیانہ نظام کے طور پر پیش کیا۔ اس کے برعکس، غالب کے ہاں ‘خودی’ کوئی باقاعدہ مدون فلسفہ نہیں ہے، بلکہ یہ ان کے مزاج، انفرادیت، استغنا اور انا کا فطری اظہار ہے۔ اقبال کے نزدیک خودی سے مراد ‘اثباتِ ذات’، ‘خودی کی بیداری’ اور اپنے اندر خدا کی دی ہوئی صلاحیتوں کو اجاگر کر کے کائنات پر اثرانداز ہونا ہے۔ اقبال کی خودی حرکی (Dynamic)، عمل پیارا اور مقصد آشنا ہے۔ وہ خودی کی ایسی تعمیر چاہتے ہیں جو انسان کو نائبِ حق بنا دے:
خودی کو کر بلند اتنا کہ ہر تقدیر سے پہلے
خدا بندے سے خود پوچھے بتاتا رضا کیا ہے
(کلیات اقبال)
غالب کے ہاں خودی دراصل ان کا وہ ‘فطری استغنا’ اور ‘خودداری’ ہے جو عسرت، مصائب اور دربار کی مجبوریوں کے باوجود کبھی جھکی نہیں۔ غالب کا انسان کائنات کے نظام کے سامنے ہاتھ پھیلانے کے بجائے اپنی ذات پر بھروسا کرتا ہے۔ ان کی خودی عمل کے میدان میں کم اور جبینِ نیاز کے جھکنے سے انکار میں زیادہ نظر آتی ہے:
بس کہ دشوار ہے ہر کام کا آساں ہونا
آدمی کو بھی میسر نہیں انساں ہونا
دونوں شعراء انسان کو کائنات کی حقیر مخلوق ماننے سے انکار کرتے ہیں، بلکہ اسے تمام مظاہرِ فطرت کا نچوڑ اور کائنات کی روح قرار دیتے ہیں۔ غالب کا انسان اپنی تنہائی، بے بسی اور زمانے کی ناانصافیوں کے باوجود اپنی جبلتِ انسانی پر ناز کرتا ہے۔ وہ مادہ اور روح کے امتزاج سے بالاتر ہو کر اپنے تخیل کی بلندی پر فخر کرتا ہے۔ غالب کے نزدیک انسانی عظمت کا راز اس کی فکری گہرائی اور اس کے احساسِ محرومی میں پوشیدہ ہے:
رتبے میں مہر و ماہ سے کمتر نہیں ہوں میں
کہتے ہیں کس واسطے عزیز نہیں جانتے مجھے
اقبال کا انسان محض فکری بلندی پر اکتفا نہیں کرتا، بلکہ وہ عزمِ محکم اور عمل پیہم کے ذریعے کائنات کو مسخر کرنے کی صلاحیت رکھتا ہے۔ اقبال کے نزدیک انسان کائنات کا مقصودِ آخرین ہے:
غافل نہ ہو جو ترے دل میں ہے، وہ طوفان کیا
ستارے جس کی گردِ راہ ہوں، وہ کارواں ہے تو!
انسانی عظمت کا دارومدار اس بات پر ہے کہ وہ تقدیر کے جبر کے آگے کتنا جھکتا ہے یا اس کے خلاف کتنی مزاحمت کرتا ہے۔ اس معاملے میں دونوں کا زاویۂ نگاہ اپنے اپنے فکری ماحول کا عکاس ہے۔غالب کا انسان تقدیر کے فیصلوں سے نالاں بھی ہے اور الجھتا بھی ہے۔ وہ کبھی تقدیر کو تسلیم کرتا ہے اور کبھی خالق سے شکوہ کناں ہوتا ہے کہ انسان کو بے بس کیوں بنایا گیا۔ غالب کے ہاں یہ شکوہ بھی دراصل انسانی عظمت کا ایک استعارہ ہے کہ کمزور ہونے کے باوجود انسان سوال کرنے کی جرات رکھتا ہے:
قفس میں مجھے پاسِ ناموسِ گل ہے
وگرنہ دہن میں زباں کیوں نہیں ہے؟
اقبال جبرِ محض (Fatalism) کے شدید مخالف ہیں۔ انہوں نے اپنی شاعری میں بار بار اس نظریے کی تردید کی ہے جو انسان کو مجبورِ محض کہتا ہے۔ اقبال کا مردِ درویش یا مردِ مومن تقدیر کا شکوہ کرنے کے بجائے اپنی خودی کے زور پر اپنی ‘تقدیر خود بناتا’ ہے:
خودی کو کر بلند اتنا!
دونوں شعراء کے ہاں تصوف کا رنگ پایا جاتا ہے، لیکن اس کے اثرات انسانی شخصیت پر الگ الگ ظاہر ہوتے ہیں۔ غالب کا تصوف شکوک و شبہات، سوالات اور حیرت کا شکار ہے۔ ان کا صوفیانہ رویہ انسان کو کائنات کے اسرار میں الجھا دیتا ہے جہاں ہر شے ایک معمہ معلوم ہوتی ہے۔ اقبال کا تصوف ‘عشقِ مستحکم’ اور ‘عملِ پیہم’ کا درس دیتا ہے۔ اقبال رومی کے اثر تلے انسان کو اسفل سے اعلیٰ ترین مرتبے (خلافتِ الٰہیہ) پر فائز دیکھنا چاہتے ہیں۔ غالب نے انسان کی داخلی تنہائی اور اس کے فکری استغنا کو جس خوبصورتی سے آشکار کیا، اسی بنیاد پر آگے چل کر اقبال نے ‘خودی’ کے اس بلند آہنگ فلسفے کی عمارت تعمیر کی جو عمل اور حرکت کا استعارہ بن گیا۔
تبصرہ لکھیے