Tag: گجرات

میں ایک ایسا سیاح ہوں جو ریل گاڑی، بس، کار اور ہوائی جہاز کے ساتھ ساتھ موٹر سائیکل پر بھی سیاحت کرتا ہوں۔ 2021ء میں مَیں ہفتے بھر کے بائک ٹور پر اسلام آباد سے جہلم، گجرات اور گوجرانوالہ ہوتا ہوا لاہور تک گیا۔ جرنیلی سڑک پر اس سفر میں مَیں کئی مقامات پر گیا، دوستوں سے ملا، مہمان نوازیوں کے مزے لئے، شہر شہر کے کھانے کھائے اور وہ ہفتے بھر کا دورہ کر کے سال بھر کیلئے تازہ دم ہوگیا۔

میں اسلام آ باد سے صبح کو نکلا اور روات، مندرہ، گوجر خان، سوہاوہ، دینہ ، جہلم اور سرائے عالمگیر سے ہوتا ہوا شام تک کھاریاں پہنچ گیا۔ کھاریاں کے قصبے مَنڈیر میں اوورسیز اسکول کے سربراہ چوہدری عبدالمجید صاحب میرے میزبان تھے، رات انہی کے ہاں قیام کیا ۔ اگلی صبح بھرپور ناشتہ کر کے نکلا تو دس بج چکے تھے۔ میں نے سوچا کہ ناشتہ ہی اتنا مرغن ہو گیا، اب دوپہر کا کھانا نہیں کھاؤں گا۔ اس دوران اگر کچھ بھوک لگی بھی تو کوئی ہلکی پھلکی چیز کھا لوں گا۔

میرے دوست احباب جانتے ہیں کہ میں مٹھائی کا بڑا شوقین ہوں۔ اسلام آباد میں تو کوئی خاص مٹھائی نہیں ملتی، البتہ پنجاب کے اکثر شہروں میں بہت اعلیٰ مٹھائی ملتی ہے۔ میں چونکہ اس وقت پنجاب میں ہی گھوم رہا تھا اور اچھی مٹھائیوں کے علاقے میں داخل ہو چکا تھا۔ یہاں ہر مٹھائی، خصوصاً برفی بہت اچھی ملتی ہے۔ اس لئے سوچا کہ اب دوپہر میں کھانا کھانے کی بجائے کسی شہر سے اچھی سی برفی لے کر رکھ لوں گا اور جہاں بھوک لگی وہاں کھا لوں گا۔

بس یہ ایک خیال ہی تھا جو میرے دل میں آیا اور کچھ ہی دیر میں بھول بھی گیا۔ جب میں کھاریاں سے لالہ موسیٰ پہنچا تو میرے دوست عرفان صفی میرے استقبال کیلئے جی ٹی روڈ پر کھڑے تھے۔ قریب ہی ان کا اسکول ہے۔ وہ مجھے اپنے اسکول لے گئے۔ کچھ دیر وہاں گپ شپ ہوئی اور چائے پی۔ جب میں آگے جانے کیلئے اٹھا تو انہوں نے مجھے کتاب کا تحفہ پیش کیا۔ کتاب کے ساتھ پھولدار گفٹ پیپر میں لپٹا ہوا ایک بھاری سا ڈبہ بھی تھا۔میں نے پوچھا کہ یہ کیا ہے تو بولے :
”یہ ہمارے لالہ موسیٰ کی مشہور “نونا حلوائی” کی برفی ہے اور آپ کیلئے تحفہ ہے“

میں تو یہ سن کر حیران ہی رہ گیا۔ مجھے یاد آیا کہ ابھی کچھ دیر پہلے کھاریاں سے نکلتے ہوئے میں یہی تو سوچ رہا تھا کہ اب کھانا نہیں کھاؤں گا، برفی کھاؤں گا۔ لیکن حیرت یہ تھی کہ میری اس خواہش کا صفی صاحب کو کیسے پتہ چلا؟ … یعنی دل کو دل سے راہ والا معاملہ ہو گیا۔ میں نے بڑا شکر ادا کیا کہ میری ایک معصوم سی خواہش کے بدلے میں اللہ نے برفی کی اتنی بڑی مقدار فراہم کروا دی کہ جو میں پوری کھاہی نہیں سکتا تھا۔ میں نے صفی صاحب سے کہا کہ یہ تو بہت زیادہ ہے۔ اول تو میں اتنی برفی کھا ہی نہیں سکوں گا، دوم یہ کہ میرا رخ بھی اپنے گھر کی طرف نہیں کہ یہ ساتھ گھر لے جاؤں۔
”کوئی بات نہیں“ صفی صاحب نے قہقہہ لگایا۔ ”دورانِ سفر دوستوں کو کھلاتے چلے جائیں“

خیر میں نے وہ برفی کا ڈبہ بھی بائک پر سامان کے ساتھ باند ھ لیا اور لالہ موسیٰ کے دیگر دوستوں سے مل کر آگے روانہ ہوا۔ میں اپنے اس سفر کے حوالے سے وقتاً فوقتاً فیس بک پر تصاویر اور اسٹیٹس بھی شیئر کرتا جا رہا تھا۔ میرے اکثر دوست میری پوسٹوں کو فالو کر رہے تھے اور میرے سفر سے باخبر تھے۔

اب اگلا شہر گجرات تھا۔ کنجاہ ضلع گجرات کا بڑا معروف قصبہ ہے۔ کنجاہ ایک مردم خیز شہر ہے۔ یہاں کے ادیبوں اور شعراء کی ملک بھر میں دھوم ہے۔ یہ میجر شبیر شریف شہید، شریف کنجاہی، روحی کنجاہی اور جنرل راحیل شریف کا شہر بھی ہے۔ کنجاہ میں ہمارے دوست عبدالرحمٰن ساہی بھی رہتے ہیں۔ میں لالہ موسیٰ سے نکلنے لگا تو اسی وقت عبدالرحمٰن ساہی کا فون آ گیا۔
”کیہر بھائی ہم آپ کا کنجاہ میں انتظار کر رہے ہیں، آپ ہم سے ملے بغیر آگے نہیں جا سکتے، ہماری شدید خواہش ہے کہ آپ کنجاہ آئیں اور ہم سے مل کر جائیں“
”عبدالرحمٰن بھائی مجھے آج لاہور پہنچنا ہے“میں بولا۔ ”وقت کم ہے اور سفر زیادہ“
”آپ فکر نہ کریں ہم آپ کا زیادہ وقت نہیں لیں گے، بس ہماری چائے پیتے ہوئے جائیں“ساہی نے اصرار کیا۔
میں سوچنے لگا کہ میں تو گھر سے نکلا ہی اس لئے ہوں کہ احباب سے ملتا ملاتا جاؤں، تو چلے جاتے ہیں کنجاہ بھی۔
”اچھا ٹھیک ہے جناب، آتا ہوں کچھ دیر کیلئے آپ لوگوں کے پاس بھی“
میں نے بائک اسٹارٹ کی اور جی ٹی روڈ پر رواں دواں ہو گیا۔

گجرات لالہ موسیٰ سے کچھ ہی دور ہے۔ گجرات شہر کے بائی پاس پر شاہین چوک والے پل کے نیچے سے ایک سڑک دائیں طرف کو جاتی ہے ۔ یہ سرگودھا روڈ ہے۔ اس روڈ پر یہاں سے پانچ کلو میٹر کے فاصلے پہ کنجاہ کا چھوٹا سا خوبصورت شہر ہے۔ میں لالہ موسیٰ سے گھنٹے بھر میں کنجاہ پہنچ گیا۔ یہاں ساہی صاحب کے ساتھ دیگر کئی دوست بھی میرے منتظر تھے۔ زیادہ تر شعر و ادب کا ذوق رکھنے والے علم دوست حضرات تھے ۔ یہاں آ کر مجھے پتہ چلا کہ آج یہاں کے ادیب، شعراء اور صحافبوں نے میرے ساتھ شام منانے کا اہتمام کیا ہے اور اس شام کو ظاہر ہے کہ رات گئے تک جاری رہنا تھا۔ چنانچہ مجھے اندازہ ہو گیا کہ آج کی رات یہیں کنجاہ میں ہی گزرجائے گی۔

”آپ آج رات یہاں رک جائیں۔ رات کو یہاں پر مشاعرہ ہوگا۔ صبح ناشتہ کر کے آرام سے لاہور چلے جائیے گا۔“ ساہی صاحب نے بھی اپنا پلان واضح کیا اور ہم بھی پسر گئے۔ ہم ان کے ڈرائنگ روم میں بیٹھے ابھی یہی باتیں کر رہے تھے کہ ایک دوست بشیر بٹ صاحب چائے کے آنے سے پہلے اٹھ کر اچانک کہیں چلے گئے۔ کچھ ہی دیر میں واپس آئے تو ان کے ہاتھ میں ایک بڑا سا ڈبہ تھا۔ بٹ صاحب نے وہ ڈبہ لا کر سیدھا میرے ہاتھ میں پکڑا دیا۔
”کیہر صاحب یہ آپ کیلئے ہے“
” یہ کیا ہے؟…“میں بولا۔
”یہ یہاں کنجاہ کے “کاکا حلوائی” کی مشہور برفی ہے، یہ میری طرف سے آپ کیلئے تحفہ ہے۔” وہ بولے۔
میں تو اچھل ہی پڑا۔
”لیکن میرے پاس تو پہلے ہی نونا حلوائی کی بہت ساری برفی موجود ہے“
”کوئی بات نہیں، ہماری برفی بھی اس میں شامل کر لیں اور مزے کریں“
بٹ صاحب نے قہقہہ لگایا اور میں ہکا بکا برفی کے اس تقریباً دو کلو کے ڈبے کو دیکھتا رہا۔

”برفی مجھے واقعی بہت پسند ہے“ میں بولا۔ ”اور اتفاق سے آج صبح کھاریاں سے نکلتے وقت میں نے سوچا بھی یہی تھا کہ آج تو برفی کھاؤں گا … تو دیکھیں کہ برفی کس طرح چھپر پھاڑکے آگئی ہے۔“
سب ہنسنے لگے۔
”بس آپ یہ اپنے ساتھ رکھیں، جتنی خود کھا سکتے ہیں کھائیں، بقیہ دوستوں کو کھلائیں اور وہاں سے جو دوسری چیز ملے وہ واپسی میں گھر لے جائیں۔ یہ برفی آپ کا زادِ راہ ہے۔“ عبدالرحمٰن ساہی نے ہنستے ہوئے کہا۔

تو جناب ہم جو نکلے کھاریاں سے یہ خواہش کرتے ہوئے کہ اب کھانا نہیں کھائیں گے برفی کھائیں گے، تو برفی کا ڈھیر لگ گیا۔ پہلے نونا حلوائی کی برفی ، اب کاکا حلوائی کی برفی۔ یہ برفیاں میرے ساتھ لاہور تک گئیں۔ راستے میں جو جو دوست احباب ملے ان کو یہ برفی کھلاتا گیا مگر ختم نہ ہوئی۔ میں نے اللہ کا شکر ادا کیا کہ میری ایک ننھی سی خواہش تھی برفی کھانے کی، اللہ نے برفی کی برسات کر دی۔

وہ خون آلود ہاتھ احمد آبا دکے چار سالہ شہباز کا ہوگا، احمد آبا د کے’’شمشان گھاٹ‘‘ سے ساٹھ کلومیٹر دور مدرسہ بزم صداقت میں بنائے گئے مہاجر کیمپ میں چار سالہ شہباز سے اس فوٹو گرافر کی اس حال میں ملاقات ہوئی تھی کہ اس نے صرف ایک جینز پہن رکھی تھی اور وہ دیوار سے ٹیک لگائے گہری سوچ میں گم تھا، اس کے چہرے پر خوف جم کر رہ گیا تھا بالکل اسی طرح جیسے گال پر چٹاخ کی آواز سے کوئی زوردار تھپڑ مارے تو ہاتھ کا نقشہ گال پر نقش ہو کر رہ جائے۔ میرا خیال ہے کہ لہو میں لتھڑے ہوئے تھپڑ کا نقش احمد آباد کے شہباز کا ہی ہوگا جو احمد آباد کے شمشمان گھاٹ میں زندہ جلنے سے بچ گیا تھا۔
اس سے پہلے کے سیلانی بات آگے بڑھائے، آپ کو احمد آباد کے شمشمان گھاٹ کی کہانی بھی سناڈالے لیکن ایک منٹ، ایک منٹ، بس ایک منٹ! شمشمان گھاٹ میں تو مردے جلائے جا تے ہیں، زندوں کو کب جلایا جاتا ہے؟۔ مجھے ذرا لغت دیکھنے دیں، کسی صاحب علم سے بھی بات کر لینے دیں کہ جہاں زندہ جلائے جائیں اسے کیا کہا جائے گا؟
بڑی معذرت! آپ کو تھوڑا انتظار کرنا پڑا، کم از کم اردو لغت اس معاملے میں چپ ہے، اس کے حافظے میں ایسی کسی جگہ کا نام نہیں جہاں زندہ انسانوں کو جلایا جاتا ہو، سیلانی بھی ایسی کسی جگہ کا نام پتہ ڈھونڈ کر نہیں لا سکا کہ یہ سب انسانیت سے بعید ہے لیکن کیا کیا جائے کہ ایسا انسانوں نے ہی کیا؟ ڈرے سہمے کمزوروں کو گھروں کے کھڑکیاں دروازے بند کر کے پٹرول اور آگ بھڑکانے والا کیمیکل چھڑک کر آگ لگائی گئی اور باہرانسانیت کی چھاتیوں پر ننگے پیروں سے کھڑے ہو کر برچھیاں، ترشول، بندوقیں، خنجر اور تلواریں لے کر پہرہ دیا گیا کہ اگر کوئی آگ کی لپیٹوں سے نکل بھی آئے تو یہیں اس سالے مسلے کو کاٹ کر آگ میں ڈال دیا جائے اور یقین کیجیے ایسا ہی کیا گیا، حاملہ عورتوں کو بالوں سے پکڑ کر گھسیٹتے ہوئے گھروں سے باہر لایا گیا اور ان کا پیٹ چاک کر کے دہکتے الاؤ میں بچے اچھال اچھال کر ’’جے ماتا‘‘ کے نعرے لگائے گئے۔ آپ کو یقین نہیں تونیٹ پر http://muslimmirror.com/eng/can-we-forget-these-images-of-muslims-genocide-of-gujarat-2002/ پر جائیے اور 2002ء میں احمد آباد کے ’’مسلوں‘‘پر کیا بیتی اپنی آنکھوں سے دیکھ لیجیے، ان ہی تصاویر میں آپ کو شہباز بھی دکھائی دے گا، وہی شہباز جس کے خون میں لتھڑے ہوئے ہاتھ کے تھپڑ کا میں ذکر کر رہا ہوں کہ شائد یہ وہی ہاتھ ہو۔
بھارتی گجرات کے شہر احمد آباد میں 2002ء ہندو بلوائی مسلمانوں پر ٹوٹ پڑے تھے، بستیوں کی بستیاں جلا ڈالی تھیں، ہندو انتہا پسند ترشول اور تلواریں لے کر مسلمانوں کے علاقوں میں گھس گئے اور اس وقت تک باہر نہیں نکلے جب تک ان کے ترشولوں کی نوکوں اور تلواروں کی دھاروں سے مسلمانوں کا خون نہیں ٹپکنے لگا۔ یہ سب بھارتی پولیس کی نگرانی میں ہوا، کہتے ہیں کہ ان فسادات میں 2 ہزار مسلمانوں کا قتال ہوا، ان فسادات میں کانگریس کے رکن اسمبلی احسان جعفری بھی زندہ جلا دیے گئے، 28 فروری 2002ء کو چمن پورہ میں ہندو بلوائیوں نے پورے علاقے کا گھیراؤ کیا اور ایک ایک کرکے سب گھروں کو آگ لگاتے گئے، کانگریسی رہنما احسان جعفری کا گھر بھی نہ چھوڑا گیا، ان کا مسلمان ہونا کانگریسی ہونے سے بڑا جرم تھا سو کیسے بخشا جاتا؟ انہیں بھی ان پناہ گزینوں کے ساتھ جلا دیا گیا جو ان کے گھرمیں پناہ لیے ہوئے تھے، بھارت کے موجودہ وزیراعظم نریندرا مودی اس وقت گجرات کے وزیر اعلی تھے، ان فسادات کے بعد ہی انہیں گجرات کے قصاب کا لقب دیا گیا تھا۔
اس خون آلود تھپڑ والے ہاتھ کی تلاش سیلانی کو مقبوضہ کشمیر لےگئی جہاں زندگی کا بوجھ اتارنے کے لیے بھارتی سورما بلاجھجھک بندوقوں کے ٹرائیگر دبا دیتے ہیں، جولائی میں حزب المجاہدین کے کمانڈر برہان وانی کی شہادت کے بعد ہونے والے ہنگاموں میں اب تک سو سے زائد کشمیری شہید ہو چکے ہیں، ایک بار ٹرائیگر دبانے سے 600 چھروں کی بوچھاڑ کرنے والی انتہائی خطرناک پیلٹ گن کے سینکڑوں ز خمی اسپتالوں میں اس حال میں لائے جاتے ہیں کہ یہ چھرے ان کے جسم میں اندر تک گھس چکے ہوتے ہیں، 700 کشمیری ان پیلٹ گنوں کے چھروں سے بینائی گنوا چکے ہیں، ان میں بارہ سالہ عبدالسلام بھی ہے، بارہ مولہ کا عبدالسلام اپنے ماں باپ کا اکلوتا بیٹا اور پانچ بہنوں کا لاڈلا بھائی ہے لیکن اس لاڈلے کا لاڈ کشمیر کی آزادی ہے، ہر کشمیری کی طرح اس کا خواب بھی پاکستان ہے، اس خواب کی تعبیر پانے کے لیے بادامی آنکھوں والا عبدالسلام جدوجہد آزادی کا حصہ ہے، سرخ و سپید عبدالسلام کو جہادی نعرے ازبر ہیں، علاقے کا کوئی جلوس عبدالسلام کے بغیر سجتا تھا نہ نکلتا تھا، حریت پسند نوجوان جلوس نکالنے سے پہلے ہی اسے لینے کے لیے آجاتے یا پیغام بھجوادیتے، یہ کم عمر حریت پسند کشمیری مرغی کے دڑبے میں چھپایا ہوا سبز ہلالی پرچم نکال کر جلوس میں پہنچ جاتا، جہاں اسے کاندھوں پر بٹھا لیا جاتا اور عبدالسلام انگشت شہادت بلند کر کے تکبیر سے جو نعروں کا سلسلہ شروع کرتا تو کشمیریوں کا خون پارہ بن کر دوڑنے لگتا اور خاص کر جب عبدالسلام ماتھے پر سبز رومال باندھ کر ’’پاکستان سے رشتہ کیا۔۔۔‘‘کا نعرہ لگاتا تو دل سینوں سے نکلنے کو آجاتے، 18جولائی کو اس کم عمر حریت پسند کو بھارتی سورماؤں نے پیلٹ گن سے نشانہ بنا کر اس کی دونوں آنکھیں ویران کر دیں ،گن کے چھروں نے وہ بادامی آنکھیں پھوڑ دیں جو پاکستان کے خواب دیکھتی تھیں لیکن عبدالسلام کہتا ہے بھارتیوں فوجیوں نے دیر کردی، خواب میں دیکھ چکا ہوں، میرے خواب مجھ سے یہ کیا مودی کا باپ بھی نہیں چھین سکتا۔ میرا خیال ہے کہ وہ خون آلود تھپڑ اسی بہادر کشمیری بچے کا ہوگا۔
لیکن نہیں! یہ تھپڑ ان بھارتی ناریوں میں سے کسی کا ہوگا جو مودی کے راج میں اپنی عصمت گنوا چکی ہیں، جنہیں شراب کے نشے میں دھت غنڈے اسکول کالج دفتر سے آتے جاتے ہوئے اغواء کر کے لے جاتے ہیں اور وہ چیختی چلاتی رہ جاتی ہیں، ان کے سامنے ہاتھ جوڑتی پاؤں پڑتی رہ جاتی ہیں لیکن کسی کو ترس نہیں آتا، ان کی عصمتیں تار تار ہو جاتی ہیں، اس ظلم کے بعد کتنی ہی لڑکیاں گھر نہیں پہنچتیں، کوئی ریل کے سامنے آکر سینکڑوں ٹکڑوں میں تقسیم ہو جاتی ہے اور کوئی دریا میں کود کر زندگی کا خاتمہ کر لیتی ہے، جو جھکے ہوئے سر اور پھٹے ہوئے کپڑوں کے ساتھ گھر میں داخل ہوتی ہیں وہ ساری زندگی کسی کے سامنے نظر اٹھا کر بات نہیں کر سکتیں۔ بھارت کے سرکاری اعداد و شمار کے مطابق 2015ء میں چونتیس ہزار خواتین کی عصمت دری کی گئی۔ بھارتی اخبار ’’انڈین ایکسپریس‘‘ کے مطابق اوسطا روزآنہ 93 خواتین بھارت کے عیاش فطرت اوباشوں کے ہاتھوں اپنی عزتیں گنواتی ہیں۔ دہلی کا یہ حال ہے کہ اسے اب rape city کہا جانے لگا ہے، خون آلود تھپڑ پرنٹ کرنے والا انڈیا ٹوڈے کہتا ہے کہ دہلی میں کوئی دن نہیں جاتا جب چار خواتین اپنی عزتوں سے نہ جاتی ہوں۔ سیلانی کا خیال ہے کہ خون آلود تھپڑ کا وہ نقش دہلی کی سمیتا راج کا ہوگا، ائیر ہوسٹس بن کر دیس دیس گھومنے کے خواب دیکھنے والی سمیتا کی عزت آبرو کی رکھشا ریاست کی ذمہ داری تھی، وہ ایک معروف اور مصروف ڈاکٹر کی بیٹی تھی، اس کے پتا کے ذہن میں بھی نہیں تھا کہ وہ جہاں لوگوں کے زخموں پر مرہم رکھ رہا ہے، ان کے بیمار کمزور و جسموں سے چن چن کر بیماریاں نکال رہاہے، وہیں اس کی بیٹی کی روح گھائل کر دیا جائے گی، اسکول سے آتے ہوئے اس کی عزت لوٹ لی جائے گی اور یہ کام کوئی اور نہیں نشے میں دھت پولیس اہلکار کریں گے، سیلانی کا خیال ہے کہ وہ تھپڑ قانون کے محافظوں سے عزت گنوانے والی سمیتا راج کا ہی ہونا چاہئے۔
لیکن ’’انڈیا ٹوڈے‘‘سے غلطی ہوگئی، بھئی غلطی کسی سے بھی ہو سکتی ہے، مان لیا کہ بھارت کا بڑا میگزین ہے، 1975ء سے نکل رہا ہے، اچھا خاصا دھندا کر رہا ہے، اب اس کے مالک نیوز چینل کے سیٹھ بھی ہوچکے ہیں لیکن ان سب باتوں سے غلطی کا امکان تو ختم نہیں ہوسکتا ناں. اس میگزین نے ستمبر 2016ء کی اشاعت میں پاکستان آرمی چیف جنرل راحیل شریف کی پورے صفحے کی تصویر شائع کی ہے، سرورق کی تصویر میں راحیل شریف کے گال پر ہتھیلی کا سرخ نشان دکھایا گیا ہے، کہنے والے اسے ہندو بنیے کی پاک فوج سے ازلی نفرت کا اظہار کہہ رہے ہیں، کوئی کہہ رہا ہے کہ بھارت نے پاکستان کو تڑی لگا دی ہے، کسی کا کہنا ہے کہ پاکستان میں انسانی حقوق کی خلاف ورزیوں پر معنی خیز ٹائٹل اسٹوری ہے، بھارت نواز بدبدبا رہے ہیں کہ 15 اگست کو بھارتی وزیر اعظم نریندرا مودی نے اپنی تقریر میں بلوچستان میں انسانی حقوق کی خلاف ورزیوں کا ذکر کرکے پاک آرمی کو تھپڑ مارا ہے۔ لیکن سیلانی کا خیال ہے کہ انڈیا ٹوڈے والوں سے غلطی ہوئی ہے، میگزین والے اپنے گجراتی قصاب کی تصویر لگانا چاہتے ہوں گے جس نے اپنی وزارت اعلی کے دور میں 2 ہزار مسلمان قتل کروائے۔ جو کشمیر ی بچوں بچیوں کی آنکھیں پھوڑ رہا ہے لیکن کشمیریوں کا پاکستان سے رشتہ نہیں توڑ پا رہا، جو سکھوں کی خالصہ تحریک سے پریشان ہے، جو آسام، جھاڑ کھنڈ، منی پور میں آزادی کی تحریکوں کو کچل رہا ہے، جس نے بھارت میں مسلمانوں پر عرصہ حیات تنگ کر رکھا ہے، جو ایمنسٹی انٹرنیشنل کے آئینہ دکھانے پر اس پر پابندی لگاچکا ہے، جو دلتوں، شودروں، اچھوتوں کے برابری کے حقوق کی مانگ سے ذات پات میں بٹے ہندو معاشرے کے بکھرنے سے خوفزدہ ہے، جس کے لیے بھوکا ننگا بھارت ایک چیلنج ہے، جس کے لیے ریل کی پٹریوں پر صبح سویرے لوٹے لے کر اکڑوں بیٹھنے والے بھارتیوں کے لیے بیت الخلا بنانا خواب ہے۔ یقینی طور پریہ تھپڑ احمدآباد کے شہباز، کشمیر کے عبدالسلام خالصہ تحریک میں مارے جانے والے کسی حریت پسند سردار کی بیٹی، دہلی کی سمیتا راج، ایمنسٹی انٹرنیشنل، لاتعلقی کے اظہار کے بعد کلبھوشن یادیو کی اہلیہ کاہوگا، ویسے یہ تھپڑ نریندر مودی کی اہلیہ کا بھی ہو سکتا ہے جسے دھتکار کر اس کا جیون مودی نے نرکھ بنا ڈالا۔ اس تھپڑ کا مستحق نریندر مودی سے زیادہ کون ہوسکتا ہے؟ یقینی طور پر انڈیا ٹوڈے والوں سے’’غلطی‘‘ ہوئی ہو گی، انڈیا ٹوڈے گجرات کے قصاب کو ٹائٹل پر لانا چاہتا ہوگا. سیلانی یہ سوچتا ہوا چشم تصور میں کشمیری عبدالسلام، احمد آباد کے شہباز اور دہلی کی سمیتا راج سے کرارا تھپڑ کھانے کے بعد گجرات کے قصاب کو اپنا سیاہ گال سہلاتا دیکھنے لگا اور کھی کھی کرتا دیکھتا رہا، دیکھتا رہا اور دیکھتا چلا گیا۔