Tag: رمضان

1972ء میں ہم خیرپور سے کراچی منتقل ہوئے تو اس وقت میری عمر تقریباً سات سال تھی۔ اس سال رمضان اکتوبر میں آیا تھا اور عید نومبر میں منائی گئی تھی۔ خیرپور کے چھوٹے شہر سے نکل کر کراچی جیسے بڑے شہر میں یہ ہماری پہلی عید تھی۔ یہاں کی رونق بھی وہاں سے زیادہ تھی اور یہاں کے میلے ٹھیلے بھی خیرپور سے زیادہ پرکشش تھے۔ اب ہماری قسمت کہ کچھ سال بعد جب زندگی کے پہلے روزے رکھنے شروع کئے تو رمضان شدید گرمیوں میں آیا۔ وہ اولین روزے رکھتے وقت تو میں یہی سمجھا تھا کہ اب ساری زندگی رمضان اسی طرح گرمیوں میں ہی آئیں گے اور ہمیشہ اسی طرح شدید پیاس کے ساتھ ہی روزے رکھنے ہونگے۔ لیکن جیسے جیسے وقت گزرا، گریگورین اور ہجری کیلنڈر کا فرق سمجھ آتا گیا اور یہ جان کر بھی بڑی خوشی ہوئی کہ ہماری عید کرسمس کی طرح ہر سال صرف سخت سردیوں میں نہیں آئے گی، بلکہ یہ سارے موسموں میں گردش کرتی ہوئی کبھی گرمیوں میں آئے گی اور کبھی سردیوں کو رونق بخشے گی۔

ہمارے ابا حافظِ قرآن بھی تھے اور ٹیلر ماسٹر بھی، اس لئے رمضان کا مہینہ ان کیلئے دوہری مصروفیت لے کر آتا تھا۔ رمضان کا چاند نظر آتے ہی ان کی مصروفیات عروج پر پہنچ جاتی تھیں۔ وہ دن بھر دوکان پر سلائی مشینوں سے الجھے رہتے کیونکہ عید کے کپڑے سلوانے والوں کی بھرمار ہوتی تھی۔ سارا دن کپڑوں کی سلائی میں مصروف رہتے اور رات کو تراویح پڑھاتے۔ سلائی مشین چلانے کے ساتھ ساتھ وہ دن بھر قرآنی آیات بھی بلند آہنگ سے دہراتے رہتے۔ چنانچہ ہماری بچپن کی یادوں میں سلائی مشینوں کی کھڑکھڑاہٹ کے ساتھ ساتھ قرآن کی تلاوت بھی گونجتی ہے۔
رمضان میں کام زیادہ ہونے کی وجہ سے اماں اور ہم سارے بہن بھائی بھی ابا کا ہاتھ بٹاتے تھے۔ جوں جوں عید قریب آتی جاتی، ہم سب کی مصروفیت بڑھتی جاتی۔ ابا گاہکوں کا ناپ لیتے اور کپڑوں کی کٹائی کرتے، اماں اور بڑے بھائی بہن سلائی میں ان کا ہاتھ بٹاتے اور ہم چھوٹے بھائی کاج بٹن وغیرہ میں ان کی مدد کرتے۔ حتیٰ کہ انتیسویں یا تیسویں رمضان کو چاند کا اعلان ہو جاتا اور وہ رات، چاند رات بن جاتی۔ انتیسویں کا چاند ہمارے لئے بڑا سنسنی خیز ہوتا، کیونکہ ہم پانچوں بہن بھائیوں کے اپنے عید کے کپڑے اسی آخری رات کو سلنے ہوتے جو فجر کی اذان سے کچھ ہی پہلے بمشکل تیار ہو پاتے۔ ان مصروفیات کی وجہ سے عید کا چاند ہمارے لئے کچھ زیادہ ہی اہمیت رکھتا تھا۔

ان دنوں ہمارا گھر قائدآباد کراچی میں ایبٹ کمپنی کے پاس مین نیشنل ہائی وے پر تھا۔ عید کے دن صبح ہی صبح گھر کے سامنے مین روڈ عیدگاہ میں بدل جاتی۔ سڑک پر دور دور تک صفیں بچھا دی جاتیں۔ مقرر وقت پر عید کی نماز ادا کی جاتی اور پھر خطیب صاحب خطبہ ارشاد فرماتے۔ نماز ختم ہوتے ہی لوگ ایک دوسرے سے والہانہ گلے ملنا شروع ہو جاتے۔ ہم نے یہاں لوگوں کو تین تین بار گلے لگ کر عید ملتے دیکھا تو حیران ہوئے کیونکہ خیرپور میں لوگ ایک ہی گلے کی عید ملا کرتے تھے۔

رمضان اور عید کے مختلف موسموں میں آنے والی بات کے ساتھ ایک اور بات بھی تھی جو ہمیں ذرا بعد میں سمجھ میں آئی … اور وہ بات تھی چاند کی۔ اسلامی کیلنڈر اور عیدین کا رویتِ ہلال سے بنیادی تعلق ہے۔ جب تک نیا چاند نظر نہ آئے، نہ نیا مہینہ شروع ہو سکتا ہے اور نہ کوئی عید منائی جا سکتی ہے۔ لیکن ان دنوں تو ہمیں معلوم ہی نہ تھا کہ عید کے چاند میں بھی کوئی اختلاف ہوتا ہے۔ کراچی میں عیدیں مناتے ہوئے چند سال میں ہی ہمیں پتہ چل گیا کہ عید کے چاند کا بھی ایک مسئلہ ہوتا ہے۔ ہم قائد آباد ہی پر تھے کہ ایک سال عید کا چاند متنازعہ ہو گیا۔ جن لوگوں نے سرکاری اعلان والے چاند کو مانا، وہ صبح ہی صبح عید کی نماز کیلئے حکومتی حامی عیدگاہوں میں پہنچ گئے۔ لیکن ایک دن بعد والے چاند کے حامی ان کو نماز پڑھتا دیکھ کر طنزیہ مسکراہٹیں پھینکتے رہے اور انہوں نے اگلے دن عید منائی۔ ہم بچوں کیلئے تو یہ معاملہ بڑا حیران کن تھا کہ کچھ لوگ تو بھوک پیاس برداشت کرتے ہوئے روزہ رکھ کر دن گزار رہے ہیں اور کچھ لوگ ان کے سامنے ہی کھاتے پیتے عید مناتے پھر رہے ہیں۔ اس وقت تو ہم یہی سمجھے کہ یہ منظر ہم پہلی بار دیکھ رہے ہیں، لیکن پھر پتہ چلا کہ عید کے چاند کا یہ مسئلہ بڑا پرانا ہے۔

عید اور رمضان کا انحصار چاند نظر آنے پر ہوتا ہے، جبکہ چاند نظر آنے کا انحصار موسم کے صاف اور آسمان کے شفاف ہونے پر رہتا ہے۔ لیکن یہ ضروری تو نہیں کہ چاند دیکھنے کے وقت ہر جگہ آسمان صاف شفاف ملے۔ چنانچہ اسلامی ممالک میں ہجری کیلنڈر کے مطابق نئے مہینے کی ابتداء جاننے کیلئے ملک کے ہر بڑے شہر میں رویتِ ہلال کا اہتمام کیا جاتا ہے کیونکہ جب تک عاقل و بالغ افراد کی ایک مطلوب تعداد چاند دیکھنے کی گواہی نہ دے، نئے اسلامی مہینے کی شروعات نہیں ہو سکتیں۔

یہ معاملہ صرف ایک ہی دن کیلئے ہوتا ہے کیونکہ اسلامی کیلنڈر کے مطابق مہینہ یا تو 29 دن کا ہوتا ہے یا 30 دن کا۔ اگر انتیسویں شام کو نیا چاند طلوع نہیں ہوا تو مہینہ تیس کا ہوگا اور اس سے اگلے دن خود بخود پہلی تاریخ ہو جائے گی۔ البتہ رمضان اور عید کا معاملہ چونکہ نازک ہے اس لئے اس میں ذرا سی بھی چوک روزے اور عید دونوں کو مشکوک بنا سکتی ہے۔ یعنی اگر چاند صحیح طور پر نظر نہ آیا تو آپ روزہ چھوڑ کر عید نہیں منا سکتے اور نظر آ چکا ہے تو پھر عید چھوڑ کر روزہ جاری رکھنا بھی گناہ ہے۔ اسی لئے ہر سال رمضان کی آمد پر سرکاری سطح پر رویت ہلال کا اہتمام کیا جاتا ہے اور ملک بھر سے چاند دیکھنے کی گواہیاں جمع ہونے پر ہی رمضان کی ابتداء یا عید کا اعلان کیا جاتا ہے۔

چاند دیکھنے کے حوالے سے ویسے تو پاکستان بننے کے پہلے سال ہی سرکاری سطح پر ایک ادارہ بنا دیا گیا تھا جو ملک بھر سے چاند کی شہادتیں وصول کر کے نئے مہینے کا اعلان کرتا تھا۔ لیکن ملک کے دور دراز علاقوں میں لوگ عام طور پر اس کمیٹی کے اعلان پر انحصار کرنے کی بجائے خود ہی چاند دیکھ کر فیصلہ کرتے تھے کہ اگلے دن عید منانی ہے یا نہیں۔ خصوصاً صوبہ سرحد و بلوچستان کے بلند علاقوں اور پنجاب و سندھ کے میدانی خطوں میں عام طور سے چاند دیکھنے کی گواہیوں میں اختلافات کا امکان رہتا ہے۔ ایوب کے دور میں 1961ء میں تو یہ غضب بھی ہوا کہ پشاور والوں نے 17 مارچ کو عید منائی، سرکاری سطح پر 18 مارچ کی عید کا اعلان کیا گیا، جبکہ کراچی کے لوگوں نے 19 مارچ کو عید منائی۔ یعنی ایک ہی ملک میں تین الگ الگ عیدیں ہو گئیں۔

2001ء میں جب میں کراچی سے اسلام آباد منتقل ہوا تو یہاں رمضان اور عید کے حوالے سے ایک عجیب مشاہدہ سامنے آیا۔ اسلام آباد پاکستان کے تمام خطوں سے آئے ہوئے لوگوں کا شہر ہے۔ یہ کراچی، کوئٹہ اور لاہور کے مقابلے میں پشاور سے زیادہ قریب ہے۔ صرف دو ڈھائی گھنٹے کا سفر کر کے ہی اسلام آباد سے پشاور پہنچا جا سکتا ہے۔ اسلام آباد میں حصول روزگار کیلئے پشاور سے خصوصاً اور دیگر قریبی شہروں سے عموماً ایک بڑی تعداد روزگار کے سلسلے میں اسلام آباد آتی ہے۔ چونکہ رویتِ ہلال میں سب سے زیادہ اختلاف عام طور پر پشاور ہی سے آتا ہے، چنانچہ اکثر یہ ہوتا ہے کہ دریائے سندھ کے کنارے اٹک کے مقام پر پنجاب کی حدود میں تو روزہ جاری ہوتا ہے جبکہ دریا پار کرتے ہی نوشہرہ میں دھوم دھام سے عید منائی جا رہی ہوتی ہے۔ چنانچہ ہمارے وہ پختون بھائی جو اسلام آباد میں ملازمت کرتے ہیں، وہ اکثر عید سے دو دن پہلے ہی اپنے شہروں کی جانب لپکتے ہیں تاکہ یہ نہ ہو کہ وہ اسلام آباد سے تو صبح سویرے روزہ رکھ کر نکلیں اور پشاور یا مردان پہنچتے ہی عید کی نماز ادا کرنی پڑ جائے۔ اسی طرح کا اہتمام رمضان سے ایک دن پہلے پہنچنے کا بھی کیا جاتا ہے تاکہ پہلا روزہ قضا نہ ہو۔

قیام پاکستان کے بعد سے یہ اختلافات کئی سال تک تواتر سے سامنے آتے رہے، حتیٰ کہ 1974ء میں بھٹو دور میں قومی اسمبلی نے ”مرکزی رویتِ ہلال کمیٹی“ کا قانون پاس کر دیا اور مولانا احتشام الحق تھانوی کو اس کمیٹی کا سربراہ بنا دیا گیا۔ یہ کمیٹی بننے کے بعد چاند کا جھگڑا کچھ تھما اور اکا دکا اختلاف کے ساتھ ملک بھر میں عام طور سے ایک ہی دن عید منائی جانے لگی۔

شیخ سعدی فرماتے ہیں کہ”نیکی کر،اس سے قبل آواز آئے کہ فلاں شخص اَب اِس دُنیا میں نہیں رہ“۔ نیکی ایک چھوٹا سے لفظ ہے‘مگر اپنے معنی اور مفہوم کے باعث تمام دُنیاوی خزانے اپنے اندر چھپائے ہوئے ہے۔ نیکی میں اتنی خوبصورتی ہے کہ دُنیابھر کی تمام برائیاں ایک چھوٹی سی بھلائی کے سامنے سر نگوں ہو جاتی ہیں۔رمضان امت ِ مسلمہ کے لیے ایک بہترین تحفہ ہے۔ جسے نیکیوں کی فصل ِ بہار کہا جاتا ہے۔ رحمت العالمین ﷺ کی حیات ِ مبارکہ بہترین نمونہ ہے۔ ہم نے اس ماہ ِ مقدس کی آمد کو مال بناؤ پالیسی بنا دِیا۔ایک غریب‘ متوسط کا اس ماہ میں جینا محال ہو چکا ہے۔ وہ مزدور جس کی آمدن کے ذرائع ہی محدود ہیں پہلے ہی جن کے بچے کوڑا کرکٹ سے ٹکڑے چُن کرکھاتے ہیں‘ وہ رمضان میں سحر‘ افطار‘ اور پھر عید کے اخراجات کہاں سے پورے کر سکتا ہے؟ ہر سال ماہ صیام کا آغاز ہوتے ہی خود ساختہ مہنگائی کا طوفان آ جاتا ہے۔ ملک میں روزمرہ کی عام اشیا ء کی قیمتوں میں خود ساختہ اضافہ ہو جاتا ہے۔جب کہ غیر مسلم ان مقدس ایام میں نرخ کم کر دیتے ہیں‘ اور جہاں تک ممکن ہو مسلمانوں کو سہولت فراہم کا اہتمام کرتے ہیں۔ ہم جب رمضان آتا ہے تو اسے زیادہ سے زیادہ کمائی اور منافع کا مہینہ سمجھتے ہوئے ہر چیز کی قیمتوں میں کئی گناء اضافہ کر دیا جاتا ہے اور غریب آدمی اس مہینے میں رحمتوں کو سمیٹنے کے بجائے اپنا نان نفقہ پورا کرنے کی فکر میں مبتلا ہو جاتا ہے اور یہ مہینہ ان کے لئے زحمت سے کم نہیں ہوتا۔ہمارے ہاں وہ تمام اشیاء جن کا تعلق رمضان سے ہے خود ساختہ مہنگی کر دی جاتی ہیں۔خودساختہ مہنگائی کرنا‘ساتھ دینا‘غریبوں کی زیست یوں اجیرن کرنا یہ سب اتحاد المجرمین کے مترادف ہے اور یوں ماہ مقدس کی حرمت پامال کی جاتی ہے۔

دُنیا بھر میں جب کوئی مذہبی یا عوامی تہوار آتے ہیں تو شہریوں کی سہولت کے لیے اشیائے خورونوش کے علاوہ دیگر اشیا ء کی قیمتوں میں بھی خاطر خواہ کمی کر دی جاتی ہے مگر ہمارا باوا آدم ہی نرالا ہے۔رمضان کی آمد کے پیش نظر اشیائے خورد و نوش کی ہوش ربا مہنگائی عوام الناس میں ایک اضطراب اور ہیجانی کیفیت لے آتی ہے۔ اللہ ربّ العزت اور اس کے حبیب حضرت محمد صلی اللہ علیہ وآلہ وسلم نے اس ماہ مبارک کے بے شمار فضائل بیان فرمائے ہیں جن کی اہمیت کے بارے میں آپ صلی اللہ علیہ وآلہ وسلم نے یہ ارشاد فرمایا کہ اگر لوگوں کو یہ معلوم ہوجائے کہ رمضان المبارک کیا چیز ہے تو میری اُمت یہ تمنا کرے کہ پورے سال رمضان ہی رہے۔ اس مبارک مہینے کی فضیلت اس سے بڑھ کر بھلا اور کیا ہوسکتی ہے کہ قرآن مجید فرقان حمید کا نزول بھی اسی مبارک مہینے میں ہوا۔ قرآن حکیم میں باری تعالیٰ کا ارشاد ہے (ترجمہ) رمضان وہ مہینہ ہے جس میں قرآن نازل کیا گیا جو انسانوں کے لیے سراسر ہدایت ہے اور ایسی واضح تعلیمات پر مشتمل ہے جو سیدھی راہ دکھانے والی اور حق وباطل کا فرق کھول کر رکھ دینے والی ہیں۔روزہ ہر مسلمان کے لیے یکساں طور پر فرض ہے خواہ وہ روئے زمین کے کسی بھی ملک یا خطے میں آباد ہو۔ اس کے لیے انھیں اسی طریق کار اور ان ہی اوقات کی پابندی کرنا ہوگی۔ بلاشبہ مختلف مقامات کے سحری اور افطار کے اوقات ان کے جغرافیائی محل و قوع کے اعتبار سے مختلف ہوتے ہیں لیکن نہ تو یہ مہینہ تبدیل ہوسکتا ہے اور نہ وہ احکامات تبدیل ہوسکتے ہیں جن کے مطابق سحری و افطار کے اوقات معین کیے جاتے ہیں۔

رمضان المبارک کی سب سے نمایاں خصوصیت یہ ہے کہ یہ تقویٰ اور پرہیزگاری کی اجتماعی فضا اور ماحول پیدا کرتا ہے جس کے نتیجے میں بستیوں کی بستیوں اور آبادیوں پر خشیت الٰہی کی روح پرور کیفیت طاری ہوجاتی ہے اور روزے داروں کے دلوں میں برائی سے نفرت اور نیکی سے رغبت پیدا ہوجاتی ہے۔ رمضان کے ایام میں بالعموم لوگوں میں گناہوں سے توبہ اور صدقہ وخیرات کا جذبہ بیدار ہوجاتا ہے۔ ہر ایک کی خواہش ہوتی ہے کہ وہ بھوکوں کو کھانا کھلائے‘مساکین کوکپڑے پہنائے اور ناداروں اور ضرورت مندوں کی مدد کرے۔ اس اعتبار سے رمضان کا مبارک مہینہ خیرو ہمدردی کی علامت اور مظہر ہے اور اسلامی معاشرے میں مساوات کے فروغ کا ایک اہم وسیلہ بھی ہے۔اس کے علاوہ یہ مقدس مہینہ مسلمانوں میں ملی وحدت اور یکجہتی کے جذبے کو بھی فروغ دیتا ہے جس کی جانب علامہ اقبال نے یوں اشارہ کیا ہے:جس طرح موسم بہار کی آمد کے ساتھ ہر طرف سبزہ ہی سبزہ آنکھوں کو طراوت اور تسکین بخشتا ہے ٹھیک اسی طرح ہر سال رمضان المبارک کا موسم بہار اپنے دامن میں بے شمار فضیلتوں اور برکتوں کی سوغات لے کر آتا ہے۔ نبی اکرم صلی اللہ علیہ وآلہ وسلم کا فرمان ہے کہ روزہ رکھا کرو، اس کی مثل کوئی بھی عمل نہیں ہے۔ شارحین حدیث نے لکھا ہے کہ آنحضرت صلی اللہ علیہ وآلہ وسلم نے روزے کو بے مثل اس اعتبار سے قرار دیا ہے کہ اس میں نفس امارہ کو مغلوب کرنے اور اس کی خواہشوں کو دبانے کی صفت بدرجہ غایت پائی جاتی ہے۔ روزوں کی یہ صفت عمومی ہے۔ رہی بات رمضان المبارک کے فرض روزوں کی تو ان کے فضائل اور جسمانی و روحانی فوائد کا کوئی شمار ہی نہیں ہے۔

چونکہ روزے کا مقصد تقویٰ کا حصول ہے لہٰذا اس کے فوائد و برکات سے وہی مسلمان مستفیض ہوسکتے ہیں جو اس مقصد کو حاصل کرنے کے لیے مکمل نیک نیتی اور خدا ترسی کے ساتھ خلوص دل سے کوشش کریں۔ ان میں امیروکبیر‘آجر‘مزدور اور کسان سمیت تمام طبقات کے لوگ شامل ہیں۔ ان تمام طبقات میں تاجر کا کردار رمضان شریف کے حوالے سے سب سے زیادہ قابل ِ ذکر ہے کیونکہ تاجر ہمارے معاشرے کا ایک انتہائی اہم عنصر ہے۔ ویسے بھی اسلام میں تجارت کو دیگر تمام پیشوں میں ایک خاص فضیلت و اہمیت حاصل ہے کیونکہ ہمارے پیارے نبی صلی اللہ علیہ وآلہ وسلم نے اس پیشے کو تمام پیشوں سے افضل قرار دیا ہے اور آپ صلی اللہ علیہ وآلہ وسلم نے خود بھی اسی پیشے کو اختیار فرمایا تھا۔ اس اعتبار سے رمضان المبارک میں ایک مسلمان تاجر پر دہری ذمے داری عائد ہوتی ہے۔ ایک تو ان آداب و قواعد تجارت کی سختی سے پابندی جن کا دین اسلام پر مسلمان تاجر سے خصوصی طو رپر تقاضا کرتا ہے۔ مثلاً مال کی خریدوفروخت میں نرمی کا برتاؤ‘ ذخیرہ اندوزی سے گریز‘ ملاوٹ سے مکمل اجتناب‘ ناجائز منافع خوری سے پرہیز‘ مال کا عیب نہ چھپانا‘پورا ناپنا اور تولنا اور مال بیچنے کے لیے قسمیں کھانے سے احتراز‘ دوسرے ان تمام باتوں سے بچنا جو مسلمان کو روزے کے اجروثواب سے محروم کردیتی ہیں مثلاً جھوٹ بولنا‘غیبت کرنا‘بے ہودہ باتیں کرنا‘گالیاں بکنا‘فضول قسم کی گفتگو کرنا، لڑنا جھگڑنا اور خلاف شرع کاموں میں مشغول رہنا۔ہمیں غریبوں‘بے کسوں کی مدد کرنی چاہیے‘خودساختہ مہنگائی‘لغویاں کا ساتھ دے کر اتحاد المجرمین کا حصہ نہیں بنناچاہیے۔

رمضان، جسے ہم صبر، تقویٰ اور روحانیت کا مہینہ کہتے ہیں، آج کل اس کی شکل کسی بڑے میگا شو میں بدل چکی ہے۔ یہ مہینہ جو اللہ کی رضا، غریبوں کی مدد اور دلوں کی صفائی کے لیے مخصوص تھا، اب ٹی وی اسکرین پر چمکتے دمکتے سیٹ، جگمگاتے ملبوسات، اور قیمتی انعامات کے درمیان دم توڑ رہا ہے۔ اصل عبادت پیچھے رہ گئی، اور کاروباری مقابلہ بازی آگے نکل گئی ہے۔

ہر چینل نے رمضان کو ایک منافع بخش موقع سمجھ کر اپنی اپنی دکان سجا لی ہے۔ کہیں مہنگے موبائل فونز بانٹے جا رہے ہیں، تو کہیں گاڑیوں اور عمرے کے ٹکٹوں کی بارش ہو رہی ہے۔ شرط صرف اتنی ہے کہ آپ اسٹیج پر آ کر اچھل کود کریں، مضحکہ خیز سوالوں کے بے تُکے جواب دیں، اور جتنی زیادہ بے عزتی برداشت کریں، اتنا ہی بڑا انعام جیتیں۔ عبادت اور روحانیت کا تقدس بیچ بازار نیلام ہو رہا ہے، اور ہم ناظرین، اس تماشے کو تالیاں بجا کر داد دے رہے ہیں، جیسے یہی رمضان کی اصل روح ہو۔

کبھی رمضان نشریات میں علما اور دینی سکالرز ہوا کرتے تھے، جو قرآن و حدیث کی روشنی میں لوگوں کی رہنمائی کرتے تھے۔ ان کی گفتگو دلوں کو نرم کرتی تھی، ایمان کو تازہ کرتی تھی، اور رمضان کی اصل روح کو اجاگر کرتی تھی۔ مگر آج کے رمضان میں میزبان ایسے چمکتے دمکتے چہرے ہیں، جو باقی سال فحاشی اور بے حیائی کو فروغ دیتے ہیں اور رمضان آتے ہی “روحانی استاد” بن جاتے ہیں۔ کل تک جو اداکار ڈراموں میں ناجائز محبتوں کو پروان چڑھا رہے تھے، وہی آج ہمیں حیا، پردے اور نیکی کا درس دے رہے ہیں۔ کیا یہ منافقت کی انتہا نہیں؟

یہاں تک کہ دین اور کاروبار کا فرق بھی مٹ چکا ہے۔ ہر رمضان نشریات میں “خصوصی وقفہ” آتا ہے، جس میں میزبان جنت اور بخشش کی خوشخبری دینے کے بعد فوراً کسی کولڈ ڈرنک، چائے، یا کچن آئٹم کا اشتہار پیش کرتا ہے اور کہتا ہے، “روزہ کھولیں تازگی کے ساتھ!” یوں لگتا ہے جیسے دین اور بزنس کا نکاح ہو چکا ہے، اور ہم سب اس شادی میں خوشی خوشی شرکت کر رہے ہیں۔

سب سے زیادہ افسوسناک منظر وہ ہوتا ہے جب صدقہ و خیرات کو بھی تماشا بنا دیا جاتا ہے۔ کسی مجبور ماں کو اسٹیج پر بلایا جاتا ہے، اس کے آنسو براہ راست نشر کیے جاتے ہیں، اور پھر ایک “مہربان اسپانسر” آگے بڑھ کر امداد کا اعلان کرتا ہے — مگر یہ امداد بھی اس شرط پر دی جاتی ہے کہ سب کچھ آن ایئر جانا چاہیے تاکہ نیکی کے ثواب کے ساتھ ساتھ برانڈ کی مشہوری بھی ہو جائے۔ یہ وہی خیرات ہے جسے اللہ کے لیے خفیہ رکھنے کا حکم دیا گیا تھا، مگر ہم نے اسے اپنی شہرت کا ذریعہ بنا دیا ہے۔

اب سوال یہ ہے کہ اس “رمضان انڈسٹری” کا اصل مجرم کون ہے؟ وہ چینلز جو رمضان کو بزنس سیزن سمجھ کر بیچ رہے ہیں؟ وہ اسپانسرز جو دین کو پروڈکٹ بنا کر پیش کر رہے ہیں؟ یا ہم ناظرین، جو یہ سب دیکھنے کے باوجود تالیاں بجا کر ان کا حوصلہ بڑھا رہے ہیں؟

سچ تو یہ ہے کہ جب تک ہم یہ تماشے دیکھتے رہیں گے، یہ کاروبار پھلتا پھولتا رہے گا۔ جب تک ہم یہ ڈھونگ برداشت کرتے رہیں گے، رمضان عبادت کا مہینہ کم اور ریٹنگز کا بزنس پراجیکٹ زیادہ بنتا جائے گا۔

کیا اللہ کے سامنے ہمارا روزہ قبول ہوگا، جب ہماری افطاری ایسے شو کی دعاؤں سے ہو، جس میں دعاؤں کے ساتھ اسپانسرز کے لوگو بھی چل رہے ہوں؟ کیا ہمیں ایک نیا “روزہ پیکج” خریدنا پڑے گا، جس میں نماز، دعا اور بخشش کے ساتھ “فری گفٹ ہمپر” بھی شامل ہو؟

فیصلہ ہمارے ہاتھ میں ہے — ہم یہ سب دیکھتے رہیں گے یا اس دھوکے کو مسترد کر کے اصل رمضان کی طرف پلٹیں گے؟ ہم اس تماشے کے ناظر بنے رہیں گے یا اس بازار سے باہر نکل کر عبادت کی اصل روح کو تلاش کریں گے؟

سوچیے گا ضرور!

گلستانِ جوہرکراچی کی سعد آباد سوسائٹی سے سلمان بیگ صاحب کا سوال بالواسطہ موصول ہوا ہے:
”قرآن و حدیث میں تہجد اور قیام اللیل کا ذکر ہے، یہ ’تراویح‘ کا لفظ کہاں سے آگیا؟“

سوال سُن کر خوشی ہوئی۔ ہم بھی ہر لفظ کے پیچھے پیچھے اسی دُھن میں بھاگے پھرتے ہیں کہ دیکھیں تو سہی، ہمارے دیاروں میں یہ لفظ کہاں سے در آیا؟ بس اسی غرض سے اِن کالموں میں ہم الفاظ کا پیچھا کرتے ہیں۔ لیکن اکثر ایسا ہوتا ہے کہ ہمیں پیچھا کرتے پا کر الفاظ ہم سے آگے آگے اورخوب تیز تیز بھاگ لیتے ہیں۔ہم ہاتھ ملتے رہ جاتے ہیں۔ کچھ ہاتھ نہیں آتا، جز آہِ سحرگاہی۔

فقہی اور مسلکی معاملات مفتیانِ کرام جانیں۔ ہم تو اتنا جانے ہیں کہ حافظ ابن حجر عسقلانی رحمۃ اللہ علیہ نے لکھا ہے کہ ’تراویح‘ جمع ہے ’ترویحہ‘ کی۔’ترویحہ‘ کے معنی یوں تو مطلقاً بیٹھنے کے ہیں، مگر بعد میں اس لفظ کے اصطلاحی معنی تراویح کی چار رکعتوں کے بعد تازہ دم ہونے کی غرض سے بیٹھنے کے ہو گئے۔’ترویحہ‘ کا مطلب ’ایک دفعہ آرام کرنا‘ بھی لیا گیا ہے،بالکل اُسی طرح جیسے ’تسلیمہ‘ کا مطلب ’ایک دفعہ سلام پھیرنا‘لیا جاتا ہے۔ مثلاًتراویح کی تکمیل پردو رکعتوں کے بجائے وتر کی تین رکعتوں کے بعد ’تسلیمہ‘ کیا جاتا ہے۔

پر، یہاں تو سوال یہ ہے کہ رمضان مین عشا کی نماز کے بعد پڑھی جانے والی نماز کو ’تراویح‘ کیوں کہاگیا؟ تو صاحب! وجہِ تسمیہ ’تراویح‘ کی یہ بتائی گئی ہے کہ صحابۂ کرامؓ، رمضان المبارک میں جب جماعت کے اہتمام کے ساتھ قیام اللیل کرتے تھے تو ہر دو سلام (یعنی چار رکعتوں) کے بعد ’ترویحہ‘ فرماتے تھے۔مطلب یہ کہ کچھ دیر آرام کرنے کے لیے نماز میں وقفہ کرتے۔ یوں یہ نماز ’وقفوں والی نماز‘ یعنی نمازِ ’تراویح‘ کہی جانے لگی۔تراویح کی آٹھ رکعتیں، بیس رکعتیں، حتیٰ کہ چھتیس رکعتیں بھی پڑھی گئی ہیں۔ان پر وتر کی تین رکعتیں مزید۔

آج بھی ماہِ رمضان میں پورے عالمِ اسلام میں ’تراویح‘ بڑی دھوم دھام سے ادا کی جاتی ہے۔ہر مسجد میں حفاظِ قرآن مہینے بھر میں پورے قرآنِ مجید کی تلاوت مکمل کرتے ہیں۔یوں ’تراویح‘ میں پابندی سے شرکت کرنے والے تمام مسلمان سورۂ فاتحہ سے سورۃالناس تک پورا قرآن مجید ایک بار کم از کم سن تو لیتے ہیں۔بعض مساجد میں ایک اہتمام اوربھی ہوتا ہے، وہ یہ کہ ’آج کی تراویح‘ میں پڑھی جانے والی قرآنی سورتوں کا ترجمہ اور تشریح بیان کی جاتی ہے۔ایسی مساجد کی تراویح میں شریک ہونے والے نمازی، تراویح کی برکت سے قرآنِ پاک کے پیغام سے بھی کسی قدر آشنا ہو جاتے ہیں۔

صاحبو!رمضان وہ ماہِ مبارک ہے جس میں جاپان سے کینیڈا تک قومِ رسولِ ہاشمیؐ ایک ہی رنگ میں رنگی نظر آتی ہے۔ایک مخصوص وقت بیدار ہونا اور سحری کھانا۔ایک مخصوص وقت جمع ہو کر افطار کرنا۔نمازِ عشا کے بعد اہتمام سے تراویح پڑھنا۔ اور سب سے اہم بات یہ کہ اس ماہِ مقدس میں امت مسلمہ کے افراد اور ادارے جتنی بڑی مقدار میں دنیا بھر میں دولت کو گردش میں لاتے ہیں اُس کی مثال دنیا کی کسی دوسری قوم کے ہاں نہیں ملے گی۔اُمت کی صرف خامیوں اور خرابیوں کو کھوجتے پھرنے والی نگاہیں اگر شہد کی مکھی کی طرح پھولوں کی تلاش میں نکلیں تو اُن کی آنکھیں یہ دیکھ کر کھلی کی کھلی رہ جائیں کہ کیا کیا مچی ہیں یارو ’رمضان‘ کی بہاریں۔ تراویح کے بعد مسلم محلّوں کی مساجد کے ارد گرد بڑی رونق رہتی ہے۔بالخصوص جن مساجدکی ’تراویح‘ میں خواتین کی شرکت کا خاص اہتمام ہوتا ہے،اُن کے باہر عورتوں اوربچوں کا ہجوم کسی تقریب کاساسماں بنا دیتا ہے، گلیوں اور راستوں میں چہل پہل ہو جاتی ہے۔

لفظ ’تراویح‘ ہے تو اسمِ جمع، لیکن اُردو میں یہ لفظ بطورِ واحد ہی استعمال کیا جاتا ہے مثلاً تراویح شروع ہوگئی، تراویح ہو رہی ہے یا تراویح ختم ہوگئی۔دلی کے کرخنداروں کے ہاں تراویح کی بھی جمع استعمال ہوتے دیکھی اور سُنی۔ کوئی ’تراوِیاں‘ کہتا ہے اور کوئی ’ترابِیاں‘۔

لفظ ’ترویحہ‘ ہمارے لیے اجنبی سہی، مگر اس لفظ کے خاندان کے بہت سے الفاظ سے ہم مانوس ہیں، کیوں کہ ہمارے ہاں بکثرت بولے جاتے ہیں۔ اجنبی ہو جانے والے الفاظ میں سے ایک لفظ ’راح‘ بھی ہے، جس کے معنی خوشی اور نشاط کے ہیں۔ میرانیسؔ مرحوم نے پسر یعنی اولادِ نرینہ کو بھی ’راح‘ قررا دیا ہے۔ انیسؔ اپنی ایک مسدس کے پہلے بند میں کہتے ہیں:
[poetry]لذت کوئی پاکیزہ ثمر سے نہیں بہتر
نکہت کوئی بوئے گُلِ تر سے نہیں بہتر
راحت کوئی آرامِ جگر سے نہیں بہتر
نعمت کوئی دنیا میں پسر سے نہیں بہتر
صدموں میں علاجِ دلِ مجروح یہی ہے
ریحاں ہے یہی، راح یہی، روح یہی ہے[/poetry]

’راح‘ بھی اسمِ جمع ہے۔اس کا واحد ’راحۃ‘ ہے۔ اُردو میں ’راحت‘ لکھا جاتا ہے۔اس کے معنی ہیں آرام و آسائش، خوش ہونا یا ہشاش بشاش ہو جانا۔مگر اُردوکے شعرائے کرام راحت کی جمع کے طور پر’راح‘ کی جگہ ’راحتیں‘ استعمال کرتے دیکھے گئے ہیں۔فیضؔ کی ایک مشہور نظم ہے”مجھ سے پہلی سی محبت مری محبوب نہ مانگ“۔ اس نظم میں وہ اپنی محبوبہ کو ترکِ محبت کی اطلاع اس طرح دیتے ہیں جیسے کوئی شخٰص اپنے کسی حاسد دوست کو اپنی ملازمت میں تبادلے کی اطلاع دیتا ہے، بالخصوص اُس تبادلے کی جو ترقی کے ساتھ ہوا ہو۔ چناں چہ فیضؔ اپنی محبوبہ کو خوشی خوشی مطلع کرتے ہیں کہ ”راحتیں اور بھی ہیں وصل کی راحت کے سوا“۔

راحت ہی کے قبیلے کا ایک لفظ ہے ’استراحت‘۔ اُردو میں خوب مستعمل ہے۔اس کا مطلب ہے آرام کرنا، تازہ دم ہونایاکہیں آسائش کے ساتھ قیام کرنا وغیرہ۔اختر علی اخترؔجب عشق و عاشقی سے تھک گئے تو تھک کر برسوں سروْ کے پیڑ تلے لیٹے رہے۔ وہیں لیٹے لیٹے دم دے بیٹھے۔ البتہ دم دیتے ہوئے یہ کارِ خیر کرتے گئے کہ لواحقین کو اپنے دم دے بیٹھنے کا سبب بتاتے گئے ورنہ وہ تجسس میں مر جاتے:
[poetry]عاشقِ شیدا کا دم نکلا ہے قد کی یاد میں
استراحت کی ہے برسوں سایۂ شمشاد میں [/poetry]

ہمارے ہاں شمشاد مردوں کا نام بھی ہوتا ہے اور خواتین کا بھی۔شمشاد نامی بعض خواتین و حضرات کا قد دیکھ کر خیال آتا ہے کہ ان جیسے کوئی بیس شمشاداگر اوپر تلے رکھ دیے جائیں تب جا کر سروْ کے کسی کم سِن درخت کے برابر ہو پائیں گے۔اور تب شاید یہ ممکن ہو سکے کہ ’عاشقِ شیدا‘ صاحب ان کے سائے میں استراحت فرمائیں۔ رمضان کی راتوں میں تراویح کے بعد دیر تک سر پر سوار رہنے والا شاگرد بھی جاتے جاتے اکثر یہ احسان دھر جاتا ہے کہ ”حضرت! مجھے اجازت دیجے اور اب آپ بھی اب استراحت فرما لیجے“۔

لغات میں لفظ ’ترویح‘ بھی ملتا ہے، جس کے لغوی معنی سانس لینے یا ہوا دینے کے ہیں۔’ریح‘ ہوا کو کہتے ہیں، اس کی جمع ریاح ہے۔ مگر اردو والوں کی ہر بات نرالی ہے۔ وہ ریاح بھی بطور واحد نکالتے ہیں۔خوش گوار اور خوشبودار ہوا ’ریحان‘ ہے، ایک خوشبودار پودا (تلسی) بھی ’ریحان‘ کہلاتا ہے۔ خوشبو دینے والی شے یا گُل دستے کو ’ریحانہ‘ کہتے ہیں۔ مگر جاتے جاتے ذرا سرفراز شاہد ؔ صاحب کی بھی سنتے جائیے کہ وہ ’ریحانہ‘ کے متعلق کیا بتاتے ہیں۔چوک پر کھڑے ہو کر ایک سمت اشارہ کرتے ہوئے کہتے ہیں:
[poetry]یہی کالج ہے وہ ہمدم جہاں ریحانہ پڑھتی تھی
وہ لڑکی تھی، مگر مضمون سب مردانہ پڑھتی تھی[/poetry]