Author: آصف محمود

جن کا خیال تھا کہ حماس کی مزاحمت کو ختم کر دیا گیا ہے اور اب وہ قصہ ماضی ہے، انہیں خبر ہو کہ اسرائیل کو اسی مزاحمت کے نمائندوں کے ساتھ بیٹھ کر معاہدہ کرنا پڑا ہے اور معاہدہ بھی وہی ہے جس پر فلسطینی مزاحمت پہلے دن سے رضامند تھی مگر نیتن یاہو نے جسے قبول کرنے سے انکار کر دیا تھا۔

جن کا خیال تھا کہ غزہ اب قصہ پارینہ بن چکا، اور یہاں اسرائیل ساحل کے ساتھ اب اپنی بستیاں آباد کرے گا، ان کو خبر ہو کہ معاہدے کی رو سے غزہ، غزہ والوں کے پاس ہے۔ جن کا خیال تھا کہ شمالی غزہ سے فلسطینیوں کو مکمل طور پر بے دخل کر دیا جائے گا، انہیں خبر ہو کہ شمالی غزہ پر اہل غزہ کا حق تسلیم کروا لیا گیا ہے۔ جن کو یقین تھا کہ فلاڈلفیا اور نیٹسارم کاریڈور اب ہمیشہ کے لیے اسرائیلی فوج کے بوٹوں تلے رہیں گے انہیں خبر ہو کہ دونوں کاریڈورز سے اسرائیل کو انخلا کرنا ہو گا۔

جن کا خیال تھا مزاحمت کاروں کو یوں کچل دیا جائے گا کہ ان کی نسلیں یاد رکھیں گے وہ اب بیٹھے سر پیٹ رہے ہیں کہ صرف بیت حنون میں اتنے اسرائیلی فوجی مارے گئے جتنے آج تک کی جنگوں میں نہیں مارے گئے۔ جن کا خیال تھا چند سر پھروں کی مزاحمت کچل دی گئی، انہیں خبر ہو کہ اسرائیلی برگیڈیر عامر اویوی دہائی دے رہا ہے کہ مزاحمت تو آج بھی پوری قوت کے ساتھ موجود ہے لیکن اسرائیل گھائل ہو چکا، مزاحمت کار تو نئی بھرتیاں کر رہے ہیں لیکن اسرائیل سے لوگ بھاگ رہے ہیں کہ فوجی سروس نہ لی جائے۔

غزہ میں مزاحمت متحد ہے۔ لوگوں پر قیامت بیت گئی، بچے ٹھٹھر کر مر گئے، قبریں کم پڑ گئیں، لیکن کوئی تقسیم نہیں ہے۔ سب ڈٹ کر کھڑے ہیں، لہو میں ڈوبے ہیں لیکن خدا کی رحمت سے مایوس نہیں۔ اُدھر اسرائیل ہے جہاں مایوسی اور فرسٹریشن میں دراڑیں وضح ہیں۔ ہرادی یہودی اسرائیلی حکومت کو سیدھے ہو چکے ہیں کہ ملک تو چھوڑ دیں گے لیکن لڑائی میں شامل نہیں ہوں گے۔ اسرائیل کا فنانس منسٹر بزالل سموٹرچ دھمکی دے رہاہے کہ یہ معاہدہ اسرائیل کی شکست ہے، وہ حکومت سے الگ ہو جائے گا۔

نیشنل سیکیورٹی کا وزیر اتمار بن گویر بھی دہائی دے رہا ہے کہ اس وقت ایسا کوئی معاہدہ شکست کے مترادف ہے۔ایرل سیگل چیخ رہا ہے یہ معاہدہ اسرائیل پر مسلط کیا گیا ہے۔ یوسی یوشع کہتا ہے بہت برا معاہدہ ہوا لیکن ہم بے بس ہو چکے تھے، اور کیا کرتے۔ مقامی خوف فروشوں سے اب کوئی جا کر پوچھے، حساب سودوزیاں کا گوشوارہ کیا کہتا ہے۔

اسرائیل کے جنگی مبصرین دہائی دے رہے ہیں کہ جس دن امریکہ کمزور پڑ گیا یا اس نے منہ پھیر لیا اس دن اسرائیل کا کھیل ختم ہو جائے گا۔ اسرائیلی فضائیہ کے افسران گن گن کر بتا رہے ہیں کہ امریکی امداد نہ پہنچتی تو اسرائیل تیسرے ہفتے میں جنگ کے قابل نہ تھا۔ وہ حیران ہیں کہ ایک چھوٹا سا شہر ہے، ہزاروں قتل ہوئے پڑے اور لاکھوں زخمی، دنیا نے منہ موڑ رکھا، کئی ایٹم بموں کے برابر سلحہ ان پر پھونک دیا گیا، کہیں سے کوئی امداد نہیں ملی، اسلحہ تو دور کی بات انہیں کوئی مسلمان ملک پانی ا ور خوراک تک نہ دے سکا، لیکن وہ ڈٹے رہے، کیسے ڈٹے رہے۔ وہ لڑتے رہے، کیسے لڑتے رہے؟

کچھ وہ تھے جن کے سر قضا کھیل چکی، اور کچھ وہ تھے جو اس کے منتظر تھے، قدم مگر کسی کے نہ لڑکھڑائے۔ہبریو یونیورسٹی میں قائم عارضی وار روم میں اب پہلی تحقیق اس بات پر ہو نے لگی ہے کہ ان حالات میں مزاحمت کیسے قائم رہی؟حوصلے کیوں نہ ٹوٹے۔ دنیا اب ویت نام کی مزاحمت بھول چکی ہے۔ دنیا آئندہ یہ پڑھا کرے گی کہ غزہ میں ایسی مزاحمت کیسے ممکن ہوئی؟

جس مزاحمت کا نام لینے پر مغرب کے سوشل میڈیا کے کمیونٹی سٹینڈرڈز کو کھانسی، تپ دق، تشنج اور پولیو جیسی مہلک بیماریاں لاحق ہو جاتی تھیں، اتفاق دیکھیے اسی مزاحمت کے ساتھ مذاکرات کرنا پڑے، معاہدے میں اسی مزاحمت کا نام لکھنا پڑا اور عالم یہ ہے کہ امریکی صدر اور نو منتخب امریکی صدر میں کریڈٹ کاجھگڑا چل رہا ہے کہ سہرا کس کے سر باندھا جائے۔

دنیا اپنے فوجیوں کی تحسین کرتی ہے مگر ادھر خوف کی فضا یہ ہے کہ غزہ میں لڑنے والے اسرائیلی فوجیوں کی شناخت خفیہ رکھنے کا فیصلہ کیا گیا ہے کہ کہیں کسی ملک میں جنگی جرائم میں دھر نہ لیے جائیں۔ ان جنگی مجرموں کے لیے باقاعدہ مشاورتی فرمان جاری ہو رہے ہیں کہ بیرون ملک جائیں تو گرفتاری سے بچنے کے لیے کون کون سے طریقے استعمال کیے جائیں۔خود نیتن یاہو کے لیے ممکن نہیں کہ دنیا میں آزادانہ گھوم سکے۔ قانون کی گرفت میں آن ے کا خوف دامن گیر ہے۔ یہ فاتح فوج کے ڈھنگ ہیں یا کسی عالمی اچھوت کے نقوش ہیں جو ابھر رہے ہیں؟

ادھر اسرائیل میں بائیڈن کے سفیر جیک لیو کا کہنا ہے کہ ا سرائیل نے نہ صرف گلوبل ساؤتھ گنوا دیا ہے بلکہ مغرب بھی اس کے ہاتھ سے جا رہا ہے۔اس کا کہنا ہے کہ ہم تو اسرائیل کے ساتھ ہیں لیکن نئی نسل کچھ اور سوچ رہی ہے اور اگلے بیس تیس سال میں معاملات نئی نسل کے ہاتھ میں ہوں گے۔جیک لیو کے مطابق بائڈن اس نسل کا آخری صدر تھا جو اسرائیل کے قیام کے بیانیے کے زیر اثر بڑی ہوئی۔ اب بیانیہ بدل رہا ہے۔

نیا بیانیہ کیا ہے؟ نیا بیانیہ یہ ہے کہ امریکہ میں ایک تہائی یہودی ٹین ایجرز فلسطینی مزاحمت کی تائید کر رہے ہیں۔ 42 فی صد ٹین ایجر امریکی یہودیوں کا کہنا ہے کہ اسرائیل نسل کشی کا جرم کر رہا ہے۔ 66 فی صد امریکی ٹین ایجر یہودی فلسطینی عوام سے ہمدردی رکھتے ہیں۔ کیا یہ کوئی معمولی اعدادوشمار ہیں؟غزہ نے اپنی لڑائی اپنی مظلومیت اور عزیمت کے امتزاج سے لڑی ہے ورنہ مسلم ممالک کی بے نیازی تو تھی ہی، مسلمان دانشوروں کی بڑی تعداد نے بھی اپنے فیس بک اکاؤنٹ کی سلامتی کی قیمت پر غزہ کو فراموش کر دیا تھا۔

اسرائیل کا مظلومیت کا جھوٹا بیانیہ تحلیل ہو چکا ہے۔دنیا کے سب سے مہذب فاتح کی کوزہ گری کرنے والی فقیہان ِ خود معاملہ طفولیت میں ہی صدمے سے گونگے ہو چکے۔ مرعوب مجاورین کا ڈسکو کورس منہدم ہو چکا ہے۔انکے جو ممدوح مزاحمت کو ختم کرنے گئے تھے، اسی مزاحمت سے معاہدہ کر کے لوٹ رہے ہیں۔ جدوجہد ابھی طویل ہو گی، اس سفر سے جانے کتنی مزید عزیمتیں لپٹی ہوں، ہاں مگر مزاحمت باقی ہے، باقی رہے گی۔مزاحمتیں ایسے کب ختم ہوتی ہیں؟
ڈیوڈ ہرسٹ نے کتنی خوب صورت بات کی ہے کہ غزہ نے تاریخ کا دھارا بدل دیاہے۔

زیتون کے پودے کی چھاؤں میں گڑیا سے کھیلتی میری بیٹی چلائی: بابا! بابا!
میں بھاگ کر اس کے پاس پہنچا تو دیکھا، کھیت کی منڈیر پرایک آنکھ والا کریہہ صورت گدھ بیٹھا تھا۔ اس کے چھ پنجے تھے جو زمین میں اندر ہی اندر کسی آسیب کی طرح گھستے چلے جا رہے تھے۔
”میرے کھیت میں کیوں گھس آئے ہو“؟۔ میں نے اسے للکارا۔
اس نے حقارت سے قہقہہ لگایا، تمہارا کھیت؟“
”ہاں میرا کھیت۔ تم دیکھ نہیں رہے کہ اس مٹی میں جتنے زیتون کے درخت ہیں اس سے زیادہ میرے قبیلے کی قبریں ہیں“۔
گدھ بولا: ”ا ب تیرا یہاں کچھ بھی نہیں۔ گدھوں کی پنچایت نے یہ سب مجھے دے دیا ہے۔یہ کھیت، وہ صحرا، یہ اونٹنیاں، وہ کنویں، یہ باغ، وہ نخلستان، سب میرا ہے۔ تب اب ریت کے ذروں کی طرح بے توقیر ہوچکے ہیں۔ تمہارے گھروں میں صحرا کی ریت اڑے گی اور تمہاری بستیاں اجاڑ بیابان ہو جائیں گی “۔
”ٹھہر، اے دور کی زمینوں کے آسیب!“۔ میں تلوار سونت کر اس کی جانب بڑھا لیکن وہ بھدی سی آواز میں شور مچاتا بھاگ گیا۔
دو موسم گزر گئے۔وہ گدھ نظر نہ آیا۔

پھر بہار کی رت میں ایک صبح، جب میری بیٹی گلاب چن رہی تھی، اور میں گھوڑے پر زین کس رہا تھا، وہ چلائی: بابا! بابا! وہ پھر آ گیا۔
میں نے دیکھا،وہی گدھ کھیت کی منڈیر پر بیٹھا تھا۔لیکن اب کی بار وہ اکیلا نہیں تھا، اس کے پیچھے آسمان پر کالے سیاہ گدھوں کا ایک لشکر چلا آ رہاتھا۔
میں نے بیٹوں کو آواز دی اور گھوڑے پر سوار ہو گیا۔ کمان اور تیر میں نے بیٹی کی طرف اچھال دیے اور عربوں کی بیٹیاں تیروں کو کمان پر یوں چڑھاتی ہیں جیسے ہار پرو رہی ہوں۔اس کے چلائے تیرکتنے ہی کریہہ صورت گدھوں کے سینے سے پار ہو گئے اور وہ کھیت تک پہنچنے سے پہلے ہی مردار ہو گئے۔
میں گھوڑے پر تلوار لیے آگے بڑھا۔ میرے گھڑسوار بیٹے بھی میرے پیچھے تھے۔ ان کے گھوڑے ہرنوں جیسے چابک دست اور شتر مرغ جیسی ٹانگوں والے تھے، وہ بھیڑیے کی طرح دوڑتے ہوئے اپنے سواروں کو لے کر کھیت کی منڈیر پر میرے ساتھ آ کھڑے ہوئے۔
گدھوں کی تعداد بہت زیادہ تھی۔ جانے کن کن زمینوں کے گدھ تھے۔ یہ چیختے چنگھارتے چلے آ رہے تھے۔ ان کی بد صورت چونچوں سے آگ اگل رہی تھی، ان کے پروں میں آسیب تھا، یہ درختوں کے جس جھنڈ پر اترتے، وہ خشک ہو جاتا۔
”بھاگ جاؤ، بھاگ جاؤ“۔ گدھوں نے آواز لگائی۔
”اے کریہہ صورت گدھ ہم پہلے کبھی بھاگے ہیں جو اب بھاگ جائیں“؟

پھر خون کا رن پڑا۔ میرے بیٹے اسی طرح لڑے جیسے ماؤں نے انہیں لوریوں میں لڑنا سکھایا گیا تھا۔ یہ لڑائی بہت طویل تھی۔گھڑ سواروں پر کتنے ہی سورج طلوع ہوئے اور غروب ہو گئے۔ ہماری پور پور لہو ہو گئی مگر ہم نے پیٹھ پر کوئی زخم نہ کھایا۔ نیامیں ہم نے توڑ دیں اور ہم زرہوں کے بغیر لڑے۔ہمارے زخموں نے رجز کہے۔ہاں مگر ہم کم تھے، ہم گھائل ہو گئے۔ ہم نے شکست تو نہیں مانی، ہاں مگر ہم قتل ہو گئے۔ہم نے لہو سے انہیں سیراب کیا مگر ہاں، ہمارے کھیت صحرا ہو گئے۔ میرے بیٹوں کے لاشے یوں بکھر ے جیسے آندھی میں کھجور کا پھل گر جائے۔میری بیٹی کی کمان ٹوٹ گئی، اور اس کے جسم کے ٹکڑے گلاب کے پودں میں جا اٹکے۔

اب میں ہی بچ گیا تھا۔میرے جسم کو جگہ جگہ سے نوچا جا چکا تھا۔میں نہتا تھا، مگر میری تلوار لڑتے لڑتے ٹوٹی تھی۔میرے بازو شل ہو چکے تھے، مگر وہ تیرچلا چلا کر شل ہو ئے تھے۔ میری آنکھیں بند ہو رہی تھیں، مگر ان میں مزاحمت کے الاؤ سرد نہیں ہوئے تھے۔ کھیت کے بڑے حصے پر قبضہ ہو چکا تھا۔میں کنویں کے پاس زیتون کے ایک پودے سے ٹیک لگائے بیٹھا تھا، میرے جسم سے خون رس رس کر زیتون کی جڑوں میں جذب ہو رہا تھا۔

گدھ میرے اوپر منڈلا رہے تھے۔ ان کی شکلیں مزید بد صورت ہو چکی تھیں۔ میں نے ایک چھڑی اٹھا لی کہ عرب جنگجو کو مزاحمت کے بغیر موت نہیں آتی۔
ساتھ والے کھیت میرے بھائیوں کے تھے۔ میری ٹوٹتی نگاہیں ادھر اٹھ گئیں۔
گدھ بولا: ”ادھر کیا دیکھتے ہو؟ یہ ہم گدھوں کا وقت ہے، اب کوئی ابابیل نہیں آئے گا۔یہ جوسب تیرے ہیں،یہ سب تیرے نہیں ہیں“۔
”اے بد صورت گدھ، وہ میرے بھائی ہیں۔وہ ضرور آئیں گے۔ وہ میرا انتقام لیں گے“۔
اتنے میں پڑوس کے کھیتوں سے شور اٹھا، اور تلواروں کے ٹکرانے کی آواز آئی۔”دیکھ میرے بھائی آ رہے ہیں۔ ان کی تلواروں کی آواز سن“۔
”یہ کند تلواریں ہیں، تیری مدد کو نہیں آ سکتیں۔ ان کی بجلیاں برفاب ہو چکیں، اب ان سے صرف رقص کیا جاتا ہے“۔گد ھ ہنستے ہوئے مزید بد صورت ہو گیا۔

میں نے گردن گھمائی، ساتھ والے کھیت میں کند تلواروں کا رقص ہو رہا تھا۔جھنکار بلندہوتی جا رہی تھی۔میں لڑکھڑا گیا، میری آنکھیں بند ہو نے لگیں۔میری سانسیں اب اکھڑ رہی تھیں۔میں نے ہمت جمع کی اور چھڑی ایک گدھ کی اکلوتی آنکھ میں پیوست کرد ی۔ باقی گدھ مجھ پر پل پڑے۔
جاں حلق تک آگئی تھی اور وہاں ایک سوال پھنسا تھا: یہ آگ کیا صرف میرے کھیت کو جلا کر ٹھنڈی ہو جائے گی؟ یہ گدھ کیا آگے نہیں بڑھیں گے؟

مسافر جب لوٹ کر آتے ہیں اور دور دیس کی کہانیاں سناتے ہیں تو دل کی دنیا مچل مچل جاتی ہے۔کبھی لطف آتا ہے اور کبھی وجود سے رائیگانی لپٹ جاتی ہے کہ کاش یہاں بھی ویسا ہی کچھ ہو سکتا۔
میرے دوماموں امریکہ کے شہری ہیں ، وہ بتاتے ہیں کہ راستوں میں کیسے دھند اترتی ہے اور کیسے سڑکوں پر ہرن بے خوف بھاگتے پھرتے ہیں۔ میں سوچتا ہوں دھند تو ہمارے ہاں بھی اترتی ہیں لیکن ہرن تو دور کی بات یہاں تو چڑیوں کو بھی امان نہیں ۔ یہاں تو کسی کو کچھوا نظر آ جائے تو پتھر مار مار کر اس کا حشر نشر کر دیا جاتا ہے۔
ابھی پرسوں اپنے دوست فیصل سید نے مانچسٹر سے ویڈیو کال کی کہ تم مارگلہ کے حسن کے مداح ہو ، یہ دیکھو یہاں کے پرندے اور جانور کتنے بے خوف ہیں ۔ یہ جھیل سے راج ہنس اڑ رہے ہیں۔ ان کے پروں کی آواز سنو۔ یہ دیکھو یہ راستے میں پرندے کتنے بے خوف ہیں ، کیا کبھی مارگلہ میں تم نے کبھی اتنا بے خوف پرندہ دیکھا؟
چند ماہ پہلے آئر لینڈ سے ڈاکٹر انعام الحق صاحب کا سندیسہ آیا کہ مارگلہ کا حسن بہت دیکھ لیا ، اب میرے مہمان بنیں اور آئر لینڈ کے جنگل اور جھیلیں بھی آ کر دیکھیے۔
یہ ایک لمبی داستان ہے اور ہر کہانی سوال بن کر وجود میں اتر جاتی ہے کہ کیا ہم بھی کبھی فطرت کے ساتھ اسی طرح کی دوستی کر پائیں گے؟ سنتا ہوں ، سوچتا ہوں اور تقابل کرتا ہوں مگر دل کی دنیا سے جواب نفی میں ملتا ہے۔ رائیگانی کی کسک اور بڑھ جاتی ہے۔
اب ایک تازہ کہانی جناب وزیر اعظم نے سنائی ہے کہ جاپان کی محنتی اورمہذب قوم جب احتجاج کرتی ہے تو یہ سڑکیں بند کرتی ہے نہ کسی شہر کا گھیرائو کرتی ہے بلکہ وہ معمول کا کام بھی جاری رکھتی ہے اور ساتھ احتجاج کے طور پر ’ اووو‘ کرتی رہتی ہے۔ یہ سنتے ہی میرے دل کی گھنٹیاں بج اٹھیں اور کہیں کہیں لڈو پھوٹنے لگ گئے۔ دل کے نہاں خانوں سے آوز آئی، اے رائیگانی کے احساس سے جھلسے بے بس انسان، تم اپنی جنگلی حیات کا تحفظ نہیں کر سکتے ، تم اپنے ہرنوں کو نہیں بچا سکتے ، تم اپنی جھیلوں میں اڑتے راج ہنسوں کے پروں کی آواز سننے سے بھی محروم ہو ، تو اب کیا تم اتنا بھی نہیں کر سکتے کہ کم از کم کسی مہذب اور محنتی جاپانی کی طرح ’ اُوووو‘ ہی کر لیا کرو؟
میں نے سوچا بات اگر ’ اُوو وو‘ پر ہی آ کر رک گئی ہے تو کم از کم ایک کوشش کی جا سکتی ہے۔ احتجاج کی اس شکل کی تو جناب وزیر اعظم خود اجازت عطا فرما رہے ہیں تو اس کا فائدہ نہ اٹھانا کفران نعمت کے مترادف ہو گا۔
اُووو ہے جناب وزیر اعظم ، ہماری طرف سے اُووو ہے۔دیکھ لیجیے میں کالم بھی لکھ رہا ہوں اور اُوووو کیے جا رہا ہوں ، میرے قاری کالم پڑھ رہے ہیں اور اُووو کیے جا رہے ہیں۔ سچ تو یہ ہے کہ پورا ملک ’ اووووو اووو‘ کر رہا ہے۔
عدالتیں طے کر چکی ہیں کہ پنشن خیرات نہیں ہے ، ریٹائرڈ ملازمین کا حق ہے۔ عدالتیں
یہ بھی طے کر چکیں کہ جو حق دیا جا چکا وہ چھینا نہیں جا سکتا ۔لیکن آپ کی حکومت نے ایک نوٹی فیکیشن سے اس حق کے ساتھ ناحق کر دیا ہے۔ سرکاری ملازم پکار رہے ہیں: ’ اُوووو‘‘۔
عوام کی بات آئے تو آپ کے خزانے خالی ہیں لیکن اسمبلیوں میں آپ کی حکمران جماعت کے مزاج یار میں آئے تو خود ہی اپنی ہی تنخواہوں میں 800 فی صد تک اضافے فرما لیے جاتے ہیں ۔ کبھی نہ بکنے ، کبھی نہ جھکنے والے ، کردار کے غازیوں ، بے داغ ماضیوں والے ، ہمارے ووٹ کے جائز حقداروں کی یہ قانون سازیاں دیکھ کر ووٹرز پکار رہے ہیں:۔ اُووووووو۔
خلق خدا انسانوں جیسی زندگی مانگے تو ارشاد ہوتا ہے خزانہ خالی ہے لیکن پچھلے سال جناب وزیر اعظم نے اپنے وزیر اعظم ہائوس کے ملازمین کے لیے چار اضافی تنخواہوں کی منظوری دی۔ آج تک یہ معلوم نہیں ہو سکا کہ ان ملازمین نے کون سے کمالات کیے تھے کہ ان پر یہ نوازشات فرمائی گئیں۔ ہاں اتنا ضرور معلوم ہوا کہ اس سخاوت شاہی کے لیے بنکوں سے 23 فی صد شرح سود پر قرض لیا جانا تھا۔باقی کے ملازمین اب منہ طرف وزیر اعظم ہائوس کر کے آواز لگا رہے ہیں: اُووووو۔
جوڈیشل الائونس کے نام پر عدالتی اہلکار اپنے سکیل سے کئی گنا زیادہ تنخواہ لے رہے ہیں۔ باقی کے ملازمین سر دھن رہے ہیں کہ :اُوووووو
سپریم کورٹ کا ایک جج ریٹائر منٹ کے بعد بنیادی تنخواہ کا قریب 80 فی صد پنشن اور مراعات کی شکل میں وصول کر تا ہے۔ باقی کے ریٹائرڈ ملازمین سوچتے ہیں کہ انصاف کے یہ جھرنے اس کے آنگن کا رخ کیوںنہیں کرتے۔ وہ گھٹی گھٹی سی آواز نکالتا ہے: اُووووو۔
اسلام آباد کے ایک ہسپتال کو ، جہاں شفا قسمت والوں کو ملتی ہے ، اڑھائی ایکڑ زمین ایک سو روپے مربع فٹ کے حساب سے الاٹ کی گئی جس کی قیمت شاید اربوں میں بنتی ہے۔ مریض اور ان کے لواحقین اس عنایت کو دیکھتے ہیں اور سُر لگاتے ہیں: اُووووو۔
اسلام آ باد کلب کے پاس 224 ایکڑ سرکاری زمین ہے ، یہ اسے صرف ایک روپے فی ایکڑ سالانہ پر الاٹ ہوئی۔ بعد میں شور مچا تو یہ قیمت بڑھا کر گیارہ روپے فی ایکڑ کر دی گئی۔ افسر شاہی کو سرکاری زمین پر مستیاں کرتے دیکھ کر رعایا پکارتی ہے: اُوووووو۔
محکہ تعلیم کی افسر شاہی مری کے سیر سپاٹوں کو ’’ سرکاری دوروں‘‘کا نام دے کر نکلتی ہے۔ راستے میں خطہ پوٹھوہار آتا ہے۔ اساتذہ کو حکم دیا جاتا ہے چھٹیوں میں سکولوں کالجوں میں حاضر ہو جائو کیا معلوم مری جاتے یا آتے صاحب کارروائی ڈالنے کہیں رک ہی جائیں ۔ اساتذہ ان تاجداروں کے ٹی اے ڈی اے کا صدقہ بن جاتے ہیں اوربغلیں بجاتے ہیں : اُووووو۔
جنگلات کی زمین پر ٹائون بن جاتے ہیں ، آزادی صحافت کی آنیاں جانیاں دیکھ کر رعایا سہم سہم جاتی ہے: اُوووووو۔
کہیں سپریم کورٹ کے ملازمین کے لیے سیکٹر بن رہے ہیں ، کہیں آئی بی والوں کے لیے ، کہیں اس وزارت کے لیے کہیں اُس و زارت کے لیے ، سستے پلاٹ ہتھیاکر عوام کو بیچے جاتے ہیں جن کے لیے کوئی سوسائٹی نہیں۔ مجبور عوام جیبیں خالی کر کے چلاتے ہیں: اُوووووو۔
انصاف ملتا نہیں ، افسر شاہی کی گردن میں سریا ہے ، عوام کو ہر جگہ ذلیل کیا جاتا ہے۔ لوگ صبح اٹھتے ہیں تو انگڑائی لیتے ہیں :اُوووووو۔ شام سوتے ہیں تو آہ نکلتی ہے: اُووووو۔
جناب وزیر اعظم ! ساری قوم ’’ اووووئیو اوئی ‘‘ ہوئی پڑی ہے۔اووووووو جناب وزیر اعظم! اوووووووو۔

پرویزمشرف کے انتقال کی خبر سنی تو یوں محسوس ہوا حسیات میں عبرت کے منظر آ کر بیٹھ گئے ہیں۔ ان پر عروج آیا تو ایسے آیا کہ کوئی زوال کبھی آنا ہی نہیں اور ان پر زوال برسا تو ایسے برسا جیسے عروج کبھی تھا ہی نہیں۔

کہاں وہ رعب و دبدبہ کہ عدالت ان کی جنبش ابرو کا مفہوم سمجھ کر فیصلے دیتی تھی اور کہاں وہ بےبسی کہ عدالت انہی کے خلاف فیصلہ سناتی ہے۔ کہاں وہ عالم ناز کہ ملک کی سب سے بڑی عدالت نہ صرف ان کی آئین شکنی تو جواز فراہم کرتی ہے بلکہ انہیں تین سال حکومت کا حق دینے کے ساتھ ساتھ آئین میں تبدیلی کا وہ حق بھی دے دیتی ہے جو خود عدالت کے پاس نہیں تھا، اور کہاں وہ پردیسیوں جیسی بےبسی کہ عدالت انہیں آئین شکنی پر سزائے موت سنا دیتی ہے۔

کہاں وہ قوتِ قاہرہ کہ پاکستان میں ان کی مرضی کے بغیر کسی کی جرات نہ تھی کچھ کر پاتا، پاکستان کے فیصلے کسی قانون اور آئین کی بجائے ان کی مرضی سے ہوتے تھے۔ کہاں وہ دکھ میں لپٹی گھڑی کی ہجرتی کے لیے اس کا اپنا پاکستان ہی اجنبی ہو گیا۔ اسلام آباد میں خوابوں کا جو محل بنایا تھا وہ ویران ہو گیا، اس کی دہلیز دھول سے اٹی پڑی ہے اور مکین کو یہاں رہنا نصیب نہیں ہوا۔ وہ اپنی حسرتیں لیے پرائے دیس میں زندگی کے دن پورے کرتا رہا اور خالق حقیقی سے جا ملا۔

یہ سب کیا ہے؟ کیوں ہے؟ یہ مقام فکر ہے۔ یہ وہ گھاٹی ہے جہاں پڑاؤ ڈال کر زندگی کی حقیقت کو پایا جا سکتا ہے۔ یہ کیسا بھید ہے کہ کبھی کُل خدائی ہاتھ باندھے حرف آشنا ہو جاتی ہے اور کبھی ایسے منہ موڑ لیتی ہے کہ انسان کے لیے آئینہ بھی اجنبی ہو جاتا ہے۔ یہ اصل میں اس بات کا اعلان ہے کہ سارا کرو فر، سارا طنطنہ، ساری قوت، سب خاک ہو جائے گا۔ باقی وہی رہے گا جس کا اخلاقی وجود ایسا ہو کہ تاریخ کے کٹہرے میں اسے سرخرو کر سکے۔

ایک قومی ریاست کے حکمران کا اخلاقی وجود آئین سے جنم لیتا ہے۔ آئین شکنی سے اقتدار تو حاصل ہو سکتا ہے لیکن اس اقتدار کو اخلاقی زادِ راہ نہیں مل سکتا۔ کسی کو اچھا لگے یا برا، لیکن حقیقت ہمارے سامنے ہے اور قدیم زمانوں کے سیانوں کا کہنا تھا کہ جب حقائق بولتے ہیں تو دیوتا بھی خاموش ہو جاتے ہیں۔ حقیقت یہ ہے کہ بھٹو آج بھی قومی زندگی میں غیر متعلق نہیں ہوا، جنرل ضیاء الحق مگر قومی زندگی سے مکمل طور پر غیر متعلق ہو چکا۔

نواز شریف کی سیاست آج بھی باقی ہے لیکن پرویز مشرف اپنی زندگی میں ہی پاکستانی سماج کے لیے اجنبی ہو گئے۔ یہ تاریخ کا سبق ہے مگر تاریخ سے کوئی سبق نہیں سیکھتا۔ پرویز مشرف کا مقدمہ ایسا نہیں کہ پیش نہیں کیا جا سکتا۔ پورے استدلال کے ساتھ پیش کیا جا سکتا ہے۔ دلیل دی جا سکتی ہے کہ اپنے آرمی چیف کو بھلا ایسے بھی کسی نے برطرف کیا جیسے نواز شریف نے پرویز مشرف کو کیا؟ آرمی چیف سری لنکا کے دورے سے واپس آ رہا ہو اور اس کے جہاز کو اترنے ہی نہ دیا جائے؟

سوال اٹھایا جا سکتا ہے کہ جب عدالت نے پرویز مشرف کو تین سال حکومت کا حق دیا تو وہیں دوسرے پیراگرف میں انہیں آئین میں تبدیلی کا حق بھی دیا۔ جہاں آئین میں تبدیلی کا حق دیا وہاں مدت کا تعین ہی نہیں تھا تو پرویز مشرف نے اسی اختیار کے ساتھ ایمرجنسی لگائی تواس میں سزا کیسی؟

سوال اٹھایا جا سکتا ہے کہ آئین کے آرٹیکل چھ کے ساتھ ساتھ آرٹیکل 12 سب کلاز 2 بھی تو ہے جس میں لکھا ہے کہ آئین شکنی کا مقدمہ 23 مارچ 1956 سے شروع ہو گا تو اس کے لیے صرف پرویز مشرف کو کیون چن لیا گیا؟

سوال پوچھا جا سکتا ہے کہ مقدمہ نومبر کی ایمرجنسی پر کیوں چلایا گیا، اکتوبر میں اقتدار پر قبضے کے جرم میں کیوں نہیں چلایا گیا جب کہ وہ بڑا جرم تھا؟

سوال اٹھایا جا سکتا ہے کہ مقدمہ صرف پرویز مشرف پر کیوں بنایا گیا ان کے اقتدار کو جواز بخشنے اور انہیں آئین میں ترامیم کا اختیار دینے والی عدالت نے بھی تو آئین شکنی کی تھی؟

سوال اٹھایا جا سکتا ہے کہ آرٹیکل 6 میں ترمیم کے بعد اب یہ طے ہو چکا ہے کہ عدالت بھی آئین شکنی کو جواز فراہم کرے گی تو ہائی ٹریزن کی مرتکب ہو گی اور آرٹیکل 6 میں ہونے والی ہر ترمیم جب اطلاق بہ ماضی یعنی 23 مارچ 1956 سے لاگو تصور ہو گی تو ایسا ہی مقدمہ ان ججوں پر کیوں نہیں بنا جنہوں نے آمروں کو تحفظ فراہم کیا؟

لیکن وقت کی عدالت نیم خواندہ شہری کی طرح قانونی پیچیدگیوں میں نہیں پڑتی کہ شریف الدین پیرزادہ جیسے قانو ن دان اسے بےبس کر دیں۔ وقت کی عدالت سادہ اور عام فہم اصول پر چلتی ہے اور وہ یہ ہے کہ کسی آمر کو ملک کا آئین پا مال کرنے کا کوئی حق نہیں۔ شعور اجتماعی بڑھتا جائے گا تو وقت کی عدالت کا دائرہ کار سہولت کاروں تک بڑھتا جائے گا۔ اسی کا نام ارتقا ہے۔

بطور حکمران پرویز مشرف صاحب کے فیصلوں کا بھی یہی حال ہے۔ کارگل سے لے کر دہشت گردی کے خلاف جنگ کاحصہ بننے تک، ان کے اقدامات کے دفاع میں سو دلیلیں پیش کی جا سکتی ہوں گی، لیکن سماج کے شعورِ اجتماعی نے ان کے تمام فیصلوں کو رد کر دیا۔ اس کے پیچھے بھی امکان ہے کہ یہی سوچ کارفرما ہو سکتی ہے کہ جو آئین پامال کر کے اقتدار میں آیا ہو، اسے قومی زندگی کے اہم فیصلے کرنے کا آخر حق ہی کس نے دیا تھا؟

جب ایک پارلیمان ہوتی ہے اور اس پر دباؤ آتا ہے تو وہ اس دباؤ کو عوام کی طرف منتقل کر دیتی ہے۔ کچھ حاصل ہو نہ ہو اتنا ضرور ہوتا ہے کہ فیصلہ سازی میں کچھ مہلت مل جاتی ہے اور اس دوران بات چیت سے کوئی بہتر متبادل آپشن نکالا جا سکتا ہے۔ لیکن جب آمریت ہوتی ہے تو سب کو معلوم ہوتا ہے فیصلہ سازی کا گھنٹہ گھر ایک ہی شخص ہے۔ اس لیے دباؤ کے ساتھ فوری عمل درآمد کا مطالبہ بھی ہوتا ہے۔

آمر چونکہ مقامی سطح پر حلقہ انتخاب سے محروم ہوتا ہے اس لیے وہ غیر ملکی قوتوں کو اپنا حلقہ انتخاب بناتے ہوئے ان کی خوشنودی چاہتا ہے اور اس کے لیے وہ ہر عدسے گزر جاتا ہے۔ دہشت گردی کے خلاف جنگ ہو یا ڈرون حملے، پرویز مشرف کی فیصلہ سازی سماج کے شعور اجتماعی کو کبھی بھی قائل نہیں کر سکی تو اس کی وجہ شاید یہی نکتہ ہے۔

پرویز مشرف صاحب کا عروج و زوال ایک عبرت کدہ ہے۔ ایک عشرے کی بادشاہی کے بعد جس طرح اپنا ہی ملک ان کے لیے اجنبی ہو گیا، ایک پردیسی کی طرح ملک سے دور جس طرح ان کی زندگی کی شام ہو گئی، یہ چیز دل کو بوجھل کر دیتی ہے۔

شاید یہ قدرت کا پیغام ہو کہ جو آمر اپنے ملک کے آئین کو فراموش کر دیتا ہے، اس ملک کا شعور اجتماعی اس آمر کو فراموش کر دیتا ہے۔

ہر دور میں یہ آواز آتی ہے: لمن الملک الیوم (آج بادشاہی کس کی ہے)

ہر عہد جواب دیتا ہے: للہ الواحد القھار (اللہ کی، جو سب پر غالب ہے)۔