ہوم << غالب اور مولانا فضل حق خیرآبادی – عرفان علی عزیز
600x314

غالب اور مولانا فضل حق خیرآبادی – عرفان علی عزیز

غالب کی شاعری کیسی بھی رہی ہو ۔ ان کا بہرحال ایک وسیع حلقہ تھا جس میں ان کے احباب اعزا و اقربا ہی نہیں بلکہ ان کے یاران وفا کے علاؤہ ان کے شاگرد مداح بھی شامل ہیں۔ علامہ فضل خیرآبادی ایک جید عالم دین روشن خیال وسیع الاخلاق کریم النفس پاکیزہ آدمی تھے۔ 1857ء کی جنگ آزادی کے سب سے بڑے مجاہد اور ہیرو تھے۔ مرزا غالب کے ابتدائی کلام۔میں کہیں کہیں ربط کی کمی ہوتی تھی جس کی بنیادی وجہ الفاظ کی کمی ہوتی۔ایک۔مرتبہ غالب نے شعر لکھا۔

ہم چناں در تعلق غیب نمودے دارند
بوجودے کہ نداند ز خارج اعیاں

یہ شعر جب مولانا فضل حق خیرآبادی نے پڑھا تو اصلاح فرمائی فرمایا۔ ”نمودے کی جگہ ثبوتے بنادو“غالب ہمیشہ مولانا فضل حق خیرآبادی کو چراغ راہ تصور کیا۔ مولانا غالب کی مربی ہی نہیں بلکہ سرپرستی بھی فرماتے تھے۔فضل حق خیرآبادی کو صاحب مصنف آثار الصناوید مسٹر احمد خان نے فضل حق خیرآبادی کو امرء القیس کی فصاحت و بلاغت سے تشبیہ دی۔ اور ان کی صفت گویائی کے معترف نظر آتے ہیں۔مولانا فضل حق خیرآبادی فاضل عالم اور عدل کے بے عدیل تھے۔شیخ اکرام کہتے ہیں۔

” مولانا فضل حق خیرآبادی غالب کے سب سے بڑے محسن اور محب تھے ۔ انہوں نے نہ صرف مرزا کی شعرو سخن میں راہنمائی کی بلکہ ان کی مالی معاونت بھی کرتے تھے۔“غالب نامہ صفحہ 54

ایک مرتبہ غالب کی ملاقات دہلی میں مولانا فضل حق خیرآبادی سے ہوئی۔ دونوں کے تعلقات نہایت گہرے تھے۔ چنانچہ فضل حق خیرآبادی نے بےراہ روی سے متنبہ فرمایا غالب نے تنقید کو بغور سنا۔ وگرنہ وہ کسی بھی تنقید بھی پروا نہیں کرتے تھے۔ ڈاکٹر محی الدین قادری اپنے مضمون حیات غالب میں لکھتے ہیں۔

” غالب ، مولانا فضل حق خیرآبادی جیسی شخصیت سے بہت کچھ حاصل کیا۔ ان لفظی اور معنوی تعقیدوں سے پرہیز کیا۔ جو ان کے کلام میں بیدل کہ تقلید کا نتیجہ تھی ۔ “

مولانا فضل حق خیرآبادی ان چند نفوس میں تھے جن کا غالب خود بڑھ چڑھ کر احترام کرتے ۔مولانا حق خیرآبادی نے غالب کی جو اخلاقی سماجی اقتصادی مدد کی وہ تاریخ کا حصہ ہے۔ اس سے صرف نظر ممکن نہیں ۔غالب پر یہاں تنقیدیں ہوتی ہیں کہ 1857ء کی آزادی کی جنگ کے بعد مولانا سے کہا سلوک روا رکھا۔ تاریخ شاہد ہے کہ غالب نے بہرحال بےوفائی کی۔یہ بات غالب کے پرستاروں کے لیے یقیناً اچھی نہیں ہے۔ فضل حق خیرآبادی کو بغاوت کے الزام میں جب لکھنؤ کی عدالت نے سزائے موت کا حکم دیا۔ کالا پانی یعنی جزائر انڈمان بھیج دیا گیا۔ غالب نے کوئی خبر گیری نہیں کی۔غالب پر جوں تک نہ رینگی۔ کیا یہاں غالب کی اخلاقی کمزوری کا احساس نہیں ہوتا۔ لیکن تاریخ شاہد ہے نواب رام پور اور دربار رام پور کی سلسلہ میں بھی غالب نے کچھ ایسا ہی رویہ اختیار کیا تھا۔ جنگ آزادی کے آغاز سے لے کر آخر تک غالب نے جس طرح قلعہ معلیٰ اور بہادر شاہ ظفر سے لاتعلقی اور بےحسی کا مظاہر کیا اس کے لیے کم از کم صاحبِ اخلاق تو نہیں کہا جاسکتا۔

یہ اسی لال قلعہ اور بہادر شاہ ظفر کا دربار کا تذکرہ ہے جہاں رسائی کے لیے غالب ہمیشہ آرزو مند رہتے تھے۔ جب رسائی ممکن ہو گئی تو پھر انعامات اور اعزازات، خطابات اور القابات سے نوازا جانا لگا تو غالب کے اندر غرور و تکبر پیدا ہوا گیا۔ لیکن صدائے انقلاب بلند ہوتے ہی غالب سب کچھ بھول گئے۔ اور محض انگریزوں کی خوشنودی اور رضا مندی حاصل کرنے لیے قلعہ سے قطع تعلق کرلیا۔ فرنگیوں کے گن گائے۔ دستنبو میں یہی کچھ تو ہے۔ بیگانگی کا یہ عالم ہوگیا جب بہادر شاہ ظفر کے انتقال کی خبر ملی تو غالب نے جس سرد مہری اور بے اعتنائی سے اپنے مکتوب میں ان کا تذکرہ کیا۔وہ انتہائی شرمناک اور باعث لذت آمیز تھا۔ایسے الفاظ کم از کم غیروں کے لیے بھی نہیں کہے جاتے۔ بہادر شاہ ظفر آخر اپنا تھا۔اس کے علاؤہ دستنبو کا ’جس مختصراً ذکر ہم نے کردیا۔‘ کا ذکر نہ بھی کیا جائے تو حلیم احسن اللہ خان کے ساتھ غالب کے گہرے مراسم اور تعلقات بغیر کسی شک و شبہ کے سنجیدہ اعتراض کے دائرے میں آجاتے ہیں۔

کیونکہ اس حقیقت کے ثابت ہونے میں کوئی گنجائش نہیں رہی ہے۔ کہ حکیم احسن اللہ خان منافق ہی نہیں بلکہ دشمن وطن اور وطن فروش تھے اور وہ انگریزوں کے حلیف ہی نہیں تھے بلکہ باقاعدہ ان کے ساتھ پر سازش میں شریک بھی تھے ۔1857ء کا ہنگامہ فرو ہونے کے بعد حکیم احسن اللہ خان کو انگریزوں نے خوب نوازا۔حکیم احسن اللہ خان نے ہی بیگم زینت محل کو بھی شہزادہ جواں بخت کی ولی عہدی لالچ دے کر انگریزوں سے ساز باز کرنے پر مجبور کیا۔پھر بہادر شاہ ظفر کی گرفتاری میں اعانت اور مقدمہ میں جس طرح حکیم احسن اللہ نے شرمناک بیاں سے غداری واضح ہوتی ہے۔دستنبو میں جس طرح غالب نے حکیم احسن اللہ خان کی طرف داری کی ہے ۔ اس سے ان الزامات سے بری نہیں کیا جا سکتا۔ ہوسکتا ہے عاشقانِ غالب پر یہ بات گراں گزرے ۔ لیکن پھر بھی مضمون لکھنے کا مقصد غالب کی کردار کشی ہرگز نہیں ۔ کیونکہ وہ بہرحال بہت بڑے شاعر ہیں۔ اور تھے۔ متذکرہ بالا مضمون سے غالب کی بلند ترین شاعری کی عظمت پر کوئی آنچ نہیں آئے گی۔

آخر میں رشید احمد صدیقی جیسے دانشور کا قول غالب کی شخصیت کے لیے کافی ہے۔ سلطنت تیموریہ نے ہوسکتا ہے ہندوستان کو کچھ نہ دیا ہو لیکن تین چیزیں ضرور دی ہیں۔ایک اردو دوم تاج محل سوم مرزا غالب جیسا عظیم شاعر اگر غالب اس شعر کے بعد مزید شاعری نہ بھی کرتے تو تو بھی ایک عظیم شاعر ہوتے۔

ہیں اور بھی دنیا میں سخن ور بہت اچھے
کہتے ہیں کہ غالب کا ہے اندازِ بیاں اور

مصنف کے بارے میں

Avatar photo

عرفان علی عزیز

عرفان علی عزیز بہاولپور سے تعلق رکھتے ہیں۔ افسانہ و ناول نگاری اور شاعری سے شغف ہے۔ ترجمہ نگاری میں مہارت رکھتے ہیں۔ مختلف رسائل و جرائد میں افسانے اور جاسوسی کہانیاں ناول شائع ہوتے ہیں۔ سیرت سید الانبیاء ﷺ پر سید البشر خیر البشر، انوکھا پتھر، ستارہ داؤدی کی تلاش نامی کتب شائع ہو چکی ہیں۔ شاعری پر مشتمل کتاب زیرطبع ہے

تبصرہ لکھیے

Click here to post a comment