نیوزی لینڈ چڑھتے سورج کی سر زمین :
نیوزی لینڈ دو بڑے اور سات سو کے قریب چھوٹے چھوٹے جزیروں پر مشتمل دنیا کا خوبصورت ترین چھوٹا سا ملک ہے جو آسٹریلیا کے جنوب مغرب میں بحیرہ تسمانیہ Tasman Sea کے پار بحر الکاہل میں واقع ہے ۔ اور دنیا کے جنوبی نصف کرہ (Southern Hemisphere) اور قطب جنوبی South Pole کے نزدیک ترین آخری آزاد ملک ہے ۔
نیوزی لینڈ کے دو بڑے جزیرے ہیں ۔ جنوبی نیوزی لینڈ Southern New Zealand اورشمالی نیوزی لینڈ Northern New Zealand نیوزی لینڈ کو چڑھتے سورج کی سر زمین بھی کہا جاتا ہے ۔شمالی آئی لینڈ کے مشرقی کونے پر جنوبی بحرالکاہل کی ہکس بے Hicks Bay میں دریائے وائی ماٹا Waimata اور دریائے تاروہیرو Taruheru کے سنگم پر ایک شہر واقع ہے جس کا نام گیز بون Gisborne ہے ۔ گیزبون قطب جنوبی کی جانب دنیا کا آخری شہر ہے ۔ گیز بون کا مشرقی ساحل سپنوج بے بیچ Sponge Bay Beach وہ جگہ ہے جہاں دنیا میں سب سے پہلے سورج نکلتا ہوا نظر آتا ہے ۔پوری دنیا سے ہزاروں سیاح سورج نکلنے کا نظارہ کرنے گیزبون پہنچتے ہیں خاص طور پر ہر سال اکتیس دسمبر اور پہلی جنوری کو یہاں تل دھرنے کی جگہ نہیں ہوتی ۔ گیزبون ہی وہ جگہ تھی جہاں ماوری دیو مالائی کہانیوں کے مطابق کیوا Kiwa کی کشتی واکا Waka چودھویں صدی میں لنگر انداز ہوئی تھی ۔ کیوا ان چند پہلے ماوری بزرگوں میں سے ہے جو سب سے پہلے نیوزی لینڈ پہنچے تھے ۔ اس لئے ماوری روایات میں سمندر کے اس حصے کو کیوا کا سمندر Te moana nui a Kiwa بھی کہتے ہیں ۔گیزبون ڈسٹرکٹ کونسل کی ڈائری کے مطابق 6 اکتوبر 1769 ء کو کپٹن کک کا جہاز ایچ ایم ایس اینڈور HMS Endeavor اپنے نیوزی لینڈ کے سفر کے دوران سب سے پہلے گیزبون میں ہی پہنچا تھا ۔
ویلنگٹن تیز ہواؤں کا شہر
ویلنگٹن شمالی آئی لینڈ کے بالکل نچلے سرے کی طرف جنوبی کنارے پر آباد ہے جہاں بائیس کلو میٹر چوڑی اور 128 میٹر (420 فیٹ ) گہری آبنائے کک Cook Strait جنوبی اور شمالی جزیروں کو ایک دوسرے سے جدا کرتی ہے اور بحیرہ تسمانیہ کو بحرالکاہل سے ملاتی ہے ۔ آبنائے کک اپنی طغیانی موجوں اور اس میں چلنے والی تند وتیز اور بر فانی ٹھنڈی ہواؤں کی وجہ سے مشہور ہے -اسے دنیا کا خطرناک ترین سب سے زیادہ غیرمتوقع اور بے اعتبار مزاج والا سمندر کہا جاتا ہے جس کا موسم کبھی بھی کسی بھی وقت بدل سکتا ہے ۔آبنائے کک میں نیوزی لینڈ نے ان طغیانی موجوں کی وجہ سے پیدا ہونے والی مدوجزر Tides سے بجلی پیدا کرنے کے لئے Tidal Stream station لگا رکھے ہیں۔ ولینگٹن نیوزی لینڈ کا دوسرا سب سے بڑا شہر اور دارلحکومت ہے ۔ جس کی کل آبادی تقریباً سات لاکھ کے قریب ہے ۔
ولینگٹن کو یہ اعزاز بھی حاصل ہے کہ اسے windiest City of the world کہا جاتا ہے کیونکہ یہاں چلنے والی ہوائیں اتنی تند و تیز ہوتی ہیں کہ دنیا کا کوئی اور شہر اس معاملے میں ویلنگٹن کا مقابلہ نہیں کرسکتا۔ دسویں صدی عیسوی میں یہ پہلاشہر تھا جہاں ماروی Māori آباد ہوئے ۔ ماروی نیوزی لینڈ کے قدیم باشندے ہیں ۔ کیپٹن کک کی نیوزی لینڈ میں آمد کے بعد برطانیہ نے نیوزی لینڈ کمپنی کے نام سے ۱۸۳۹ء میں برطانوی باشندوں کو نیوزی لینڈ میں آباد کرنا شروع کیا اور نیوزی لینڈ کمپنی کی طرف سے کیپٹن ولیم مین سمتھ William Mein Smith نے نیوزی لینڈ میں گوروں کی پہلی بستی ولینگٹن میں بسائی ۔ کیپٹن ولیم سمتھ نے ہی ۱۸۴۰ء میں موجودہ ویلنگٹن شہر کی بنیاد رکھی ۔ولینگٹن پہاڑوں کے درمیان آباد ہے اور دنیا کاخوبصورت ترین اور رہائش کے اعتبار سے دنیا کے بہترین شہروں Most livable cities in the World میں شمار ہوتا ہے ۔
ویلنگٹن اور سیشلز کی مماثلت
ولینگٹن کو دیکھ کر مجھے سیشلز Seychelles کا شہر وکٹوریہ ماہی Victoria Mahé بہت یاد آیا ۔ ۱۹۹۹ء میں وکٹوریہ ماہی کے وکٹوریہ ہسپتال سے میں نے اپنی عملی زندگی کا آغاز کیا تھا جب بطور کنسلٹنٹ سرجن میری پہلی تقرری اس ہسپتال میں ہوئی ۔ میں پہلا پاکستانی ڈاکٹر تھا جس نے اس چھوٹے آئی لینڈ پر کام کیا ۔ میں نے اپنی زندگی کے بہترین تین سال یہاں گزارے ۔ وکٹوریہ ماہی اور ولینگٹن میں بہت مماثلت ہے ۔ ویسی ہی گھنے اونچے درختوں سے لدی سر سبز پہاڑیاں ، ویسے ہی پہاڑوں پر ایستادہ اونچے نیچے کلونیل colonial طرز کے لکڑی کے بنے خوبصورت رنگ برنگی چھتوں والے گھر ، ویسی ہی پہاڑیوں پر چڑھتی اترتی تنگ اور خم کھاتی سڑکیں ، گھروں کے باہر لٹکتی بوگن ویلیا کی دلکش پھولوں والی بیلیں ، ہر گھر کے لان کی کیاریوں میں کھلے دلکش پھول ، سمندر کا فیروزی پانی اور اس پر تیرتی خوبصورت رنگوں والی کشتیاں
نیلے آسمان پر چھائے آنکھ مچولی کھیلتے سفید بادل سب کچھ تو وہی تھا ۔ فرق تھا تو صرف تیز اور برفیلی سرد چلنے والی ہوا اور موسم کا تھا ۔ وکٹوریہ ماہی کا موسم خط استوا پر واقع ہونے کی وجہ سے مرطوب اور قدرے گرم تھا جبکہ قطب جنوبی سے آنے والی ولینگٹن کی یہ ٹھنڈی ، سرد ، برفیلی اور تیز ہوا جسم کو نشتر کی طرح چیرتی ہوئی محسوس ہوتی ہے ۔اور ہڈیوں تک کو منجمد کر دیتی ہے ۔ رگوں میں خون جمتا محسوس ہوتا ہے ۔
ویلنگٹن ائیرپورٹ خوفناک ترین ائیرپورٹ :
ولینگٹن ائیرپورٹ بھی ایک عجوبہ روز گار ہے اور اس جیسا ائیرپورٹ دنیا میں کہیں دوسرا نہیں ۔اس ائیرپورٹ کی اپروچ بہت منفرد اور انوکھی ہے اور اس کاILS دو طرفہ ہے ۔ میں نے اس سے پہلے کبھی کسی ائیرپورٹ کی ایسی اپروچ نہیں دیکھی تھی ۔ اپروچ Approach ہوابازی کی زبان میں ایک اصطلاح ہے ۔ جب کوئی جہاز کسی ائیرپورٹ پر اترنے کی تیاری کرتا ہے تو سب سے پہلے ایک مخصوص اونچائی پر پہنچ کر رن وے کی سیدھ میں آتا ہے اور پھر لینڈ کرتا ہے ۔ جسے ہوابازی کی زبان میں اپروچ کہتے ہیں ۔ جو لوگ ہوابازی اور فلائنگ سے واقف ہیں وہ جانتے ہیں کہ کسی ائیرپورٹ پر جہاز کی لینڈنگ کے لئے اپروچ کتنی اہم ہوتی ہے ۔ لینڈنگ کے دوران سامنے سے آنے والی ہوا (Head wind)اور پیچھے سے آنے والی ہوا (Tail wid )اور اطراف سے آنے والی ہوا (Cross wind ) کا بہت اہم کردار ہوتا ہے ۔
ولینگٹن ائیرپورٹ کے دائیں بائیں (مشرق اور مغرب ) دونوں طرف اونچی پہاڑیاں ہیں اور آگے اور پیچھے سمندر ہے ۔ اس کے شمال میں ولینگٹن ہاربر (Evans Bay)اور جنوب میں آبنائےکک (Lyall Bay )ہے ۔ آبنائے کک Cook Strait سے آنے والی انتہائی تیز ہوا کی بدولت due to channelling and Funneling effect of Cook Strait “ یہاں جہاز کی لینڈنگ کا تجربہ کمزور دل مسافروں کے لئے بہت تکلیف دہ اور ڈراؤنا ثابت ہو سکتا ہے ۔ جہاز تیز ہواؤں کی زد میں آئے کسی معمولی تنکے کی طرح ڈولتا اور ڈگمگاتا ہے جس کے ساتھ ہی مسافروں کو اپنا دل بھی ڈوبتا محسوس ہوتا ہے ۔ بقول ہمارے میزبان اطہر اعوان صاحب کے انہوں نے اس لینڈنگ کے دوران بہت سے کافروں اور سخت دل ملحدوں کو بھی خدا یاد کرتے دیکھا ہے ۔ جس پر حمزہ سربلند نے برجستہ اور بر موقع مومن خان مومن کا یہ شعر سنا کر بہت داد سمیٹی ۔
چل دئیے سوئے حرم کوئے بتاں سے مومن
جب رنج دیا بتوں نے تو خدا یاد آیا
میں چونکہ خود بھی پائلٹ ہوں اس لئے میرے لئے ولینگٹن ائیرپورٹ اور اس سے وابستہ یہ ساری چیزیں بہت یادگار اور منفرد تجربہ تھیں ۔ اور سچی بات تو یہ ہے کہ اس لینڈنگ کے دوران خدا ہمیں بھی بہت یاد آیا اور کئی بار لگا جیسے شائد یہ زندگی کی آخری لینڈنگ ہو ۔ یہ ائیرپورٹ دو پہاڑیوں کے درمیان واقع ایک چھوٹی سی اور تنگ سی وادی پر بناہے ۔ جو پہلے کبھی سمندر کا حصہ تھی لیکن کوئی چار سو سال پہلے آنے والے زلزلے اور سونامی کے نتیجے میں یہاں خشکی کا یہ چھوٹا سا ٹکڑا معرض وجود میں آ گیاجو تقریباً ایک سو ہیکڑ پر مشتمل ہے ۔ اس جگہ پر پہلے کسی انگریز آباد کار کا زرعی فارم تھا ۔ لیکن ۱۹۲۹ء میں یہاں پہلا رن وے تعمیر ہوا اور ۱۹۵۹ء میں اسے ولینگٹن ائیرپورٹ میں بدل دیا گیا ۔
ویلنگٹن اور ہالی وڈ
ہم میں سے بہت کم لوگ اس حقیقت سے واقف ہوں گے کہ ویلنگٹن کو ہالی وڈ کی فلم انڈسٹری میں بہت زیادہ اہمیت حاصل ہے ۔ویٹا ایف ایکس Wētā FX نے دنیا کی چند مشہور ترین اور سب سے زیادہ منافع دینے والی فلمیں بنائی ہیں جن میں لارڈ آف دی رنگ Lord of the Ring اور اوتار Avatar سیریز کی فلمیں شامل ہیں ۔ اور دنیا کی بہترین فلموں کے لئے بصری اثرات Visual effect اور CGI Computer-generated imagery دئیے ہیں ۔ یہ کمپنی فلموں کے کاسٹیوم اور لباس بنانے میں بھی ماہر اور بہت مشہور ہے ۔ ویٹا نیوزی لینڈ میں پایا جانے والا سب سے بڑا مکڑی نما کیڑا (جھینگڑ ) ہے جسے اس کمپنی نے اپنا لوگو بنایا ہے ۔ اس جھینگڑ کی بعض اقسام جسامت قدوقامت اور سائز کے اعتبار سے دنیا میں سب سے بڑی ہوتی ہیں ۔ اس کمپنی نے اب تک سات اکیڈمی اور دوسرے بے شمار ایوارڈز جیتے ہیں۔ ان کی بنائی فلموں میں :
King Kong ,
Heavenly Creatures .
The Jungle Book .
Rise of the Planet of the Apes ,
The Adventures of Tintin ،
The Chronicles of Narnia ،
The Hobbit،
Godzilla ,
Predators ،
Gulliver’s Travels،
X-Men،
The A-Team ،
The Avengers,
The Iron Man
اور دوسری کئی مشہور فلمیں شامل ہی ۔ کمپنی کا سٹوڈیو ائیرپورٹ کے قریب میرامار Miramar کے علاقے میں ہے. اس سٹوڈیو کی سیر ہمارے لئے ایک بہت دلچسپ حیرت انگیز اور چشم کشا تجربہ تھا ۔ خاص طور پر کاریگروں کو کاسٹیوم بناتے دیکھنا اور رنگوں سے سپیشل ایفکٹ Special Effect پیدا کرتے دیکھنا اور صوتی اور بصری ایفکٹ sound and visual effects کا مشاہدہ کرنا نہ بھولنے والی یادیں ہیں ۔
ویلنگٹن کا گیلی پولی میوزیم
ویلنگٹن کا میوزیم بھی اپنی مثال آپ ہے ۔ گو نیوزی لینڈ کی تاریخ بہت مختصر ہے اور عالمی اعتبار سے بھی اس تاریخ کی کوئی خاص حثیت نہیں لیکن اپنی بناوٹ ترتیب اور نظم ونسق کے اعتبار سے اتنا شاندار میوزیم میں نے کم ہی دیکھا ہے۔ اس میوزیم کے چار حصے ہیں. پہلا حصہ گیلی پولی کی جنگ سے متعلق ہے جس میں ہونے والے نیوزی لینڈ کے جانی نقصان اور شکست کو بہت خوبصورت اندازمیں محفوظ کیا گیا ہے۔ گیلی پولی کی جنگ نیوزی لینڈ اور آسٹریلیا کی چھوٹی سی تاریخ کا واحد المیہ ہے جس کے گرد ان کی ساری تاریخ گھومتی ہے ۔ جب ۱۹۱۵ء میں اپنے آباؤاجداد کی تقلید میں یہ دونوں نو آموز اور نو آباد ملک ترکی کی آبنائے دانیال Dardanelles Strait پر قبضہ کرنے کے لئے گیلی پولی پر حملہ آور ہوئے اور ترکوں نے مار مار کر ان کا بھرکس نکال دیا تھا ۔ اس جنگ میں شریک ہونے والے بہت تھوڑے فوجی نیوزی لینڈ اور آسٹریلیا واپس پہنچے تھے اور ان میں سے بھی اکثریت زخمیوں کی تھی ۔یہ جنگ تقریباً گیارہ ماہ تک جاری رہی ۔ اس جنگ میں نیوزی لینڈ کے پندرہ ہزار فوجی شریک ہوئے جن میں سے ساڑھے تین ہزار سے زیادہ مارے گئے اور پانچ ہزار زخمی ہوئے تھے ۔
نیوزی لینڈ اور آسٹریلیا ہر سال پچیس اپریل کو Anzac Day مناتے ہیں اور اپنی اس شکست کا ماتم کرتے ہیں . اس جنگ کی یاد میں دونوں ملکوں نے بڑے شاندار میوزیم اور یادگاریں قائم کر رکھی ہیں اور سکولوں میں اپنی آنے والی نسلوں کو بڑے اہتمام اور دلجمعی سےاس شکست کا سبق پڑھاتے ہیں ۔ ویلنگٹن نیشنل میوزیم کے اس حصے میں گیلی پولی کی جنگ میں حصہ لینے والی فوجیوں کے دیو قامت زندگی کے انتہائی قریب مجسمے بنائے گئے ہیں ۔ اس جنگ میں شریک ہونے والی سپاہیوں کی جنگ کے احوال بڑے پر اثر انداز میں پیش کئے گئے ہیں ۔ اس جنگ میں استعمال ہونے والی اصلی اشیاء نمائش کے لئے رکھی گئی ہیں ۔ جنہیں دیکھ کر اتحادیوں سے خوامخواہ ہمدردی پیدا ہو جاتی ہے اور اور ترکوں کو ظالم ماننے کو دل کرتا ہے ۔ حالانکہ اتحادی حملہ آورتھے اور ترک محض اپنے گھر کا دفاع کر رہے تھے۔ میوزیم کا دوسراحصہ نیوزی لینڈ کی آب وہوا یہاں کی سر زمین ، قدرتی ماحول اور یہاں پائے جانے والے جانوروں اور ان کی تاریخ سے متعلق ہے ۔ تیسرا حصہ یہاں کے قدیم باشندوں کی تاریخ اور ثقافت سے تعلق رکھتا ہے ۔
جبکہ چوتھے حصے کا تعلق یورپئین آباد کاروں کی تاریخ ان کی یہاں آمد اور اس نئی سزمین پر آبادکاری میں درپیش مشکلات اور جدوجہد سے ہے ۔ ولینگٹن میں گزارے چار دن بہت خوبصورت اور خوشگوار یادوں سے بھرپور تھے۔ یہاں اگر اپنے میزبان اطہر اعوان صاحب کا ذکر نہ کیا جائے تو زیادتی ہوگی ۔ اطہر اعوان ویلنگٹن میں پاکستانی برادری کے روح رواں اور بہت متحرک اور شاندار شخصیت کے مالک ہیں ۔ انہوں نے نیوزی لینڈ چیریٹی کے نام سے ایک تنظیم بھی بنا رکھی ہے ۔ بہاولپور کے رہنے والے اطہراعوان اقبال کے شیدائی ہیں ۔ اور انہی کی کوششوں سے نیوزی لینڈ جیسے چھوٹے اور دوردراز ملک میں یوم اقبال کی اتنی شاندار اور کامیاب تقریب کا
انعقاد ممکن ہو سکا۔
(یوم اقبال کی تقریب کا آنکھوں دیکھا حال انشاءاللّہ علیحدہ سے ایک مضمون میں لکھوں گا)



تبصرہ لکھیے