میانہ روی سے مراد درمیانے درجے کی زندگی گزارنا، کفایت شعاری اور اعتدال ہے۔ دینِ اسلام ہمیں زندگی کے تمام معاملات میں اعتدال اور میانہ روی کا حکم دیتا ہے۔ دین کا ہر حکم فطرت کے عین مطابق اور اعتدال پر قائم ہے، مثلاً عبادات، اخراجات، گفتگو، آواز، چال چلن، میل جول، اٹھنا، بیٹھنا اور دیگر معاملات وغیرہ۔نماز، روزہ اور زکوٰۃ کی طرح حج بھی اسلام کا ایک رکن ہے۔
تمام عمر میں ایک مرتبہ صرف اسی شخص پر فرض ہے جسے اللہ تعالیٰ نے اتنا مال دیا ہو کہ اپنے وطن سے مکہ مکرمہ تک آنے جانے پر قادر ہو اور اپنے اہل و عیال کے مصارف واپسی تک برداشت کر سکتا ہو۔ جیسا کہ فرمانِ الٰہی ہے:
”لوگوں پر اللہ تعالیٰ کا حق ہے کہ جو اس کے گھر تک پہنچنے کی استطاعت رکھتا ہو، وہ اس کے گھر کا حج کرے۔“ (سورۂ آل عمران: 97)
اللہ رب العزت فرماتے ہیں:
”اور (مسلمانوں!) اسی طرح تو ہم نے تم کو ایک معتدل امت بنایا ہے تاکہ تم دوسرے لوگوں پر گواہ بنو، اور رسول تم پر گواہ بنے۔“ (سورۃ البقرہ: 143)
رسول اللہ ﷺ کے دنیا میں آنے سے پہلے ماضی میں بہت سی امتیں رہی ہیں، لیکن اللہ رب العزت نے کسی امت اور کسی قوم کو یہ اعزاز نہیں بخشا جو امتِ محمدیہ (علی صاحبہا الصلاۃ والسلام) کو بخشا ہے۔ اس بات کا اندازہ اس سے بھی لگایا جا سکتا ہے کہ روزِ محشر جب تمام لوگ جمع ہوں گے تو کل ایک سو بیس صفیں قائم ہوں گی، جن میں سے اسی صفیں امتِ محمدیہ (علی صاحبہا الصلاۃ والسلام) کی ہوں گی اور بقیہ چالیس صفیں دیگر امتوں کی ہوں گی۔اعتدال و میانہ روی ہر معاملے میں ہونا ضروری ہے، جیسا کہ عقائد میں اعتدال کی تعلیمات، تحریکات میں اعتدال کی ضرورت، دین و دنیا میں اعتدال کی تعلیم، خالق اور مخلوق کے حقوق کی ادائیگی میں اعتدال، انصاف اور اعتدال، مال کمانے کے متعلق اعتدال، مال خرچ کرنے کے متعلق اعتدال، نوافل اور فرائض کے درمیان اعتدال، شادی بیاہ کے موقع پر اعتدال، آپس کے تعلقات میں اعتدال، مزاج کا اعتدال، عقل اور جذبات میں میانہ روی۔ اسی طرح زندگی کے تمام معاملات میں اعتدال و میانہ روی کا ہونا انتہائی ضروری ہے۔
جو شخص اعتدال قائم رکھتا ہے، اللہ جل جلالہ اسے مالدار بنا دیتا ہے اور جو آدمی ضرورت سے زائد خرچ کرتا ہے، اللہ پاک اسے فقیر کر دیتا ہے۔ (کنز العمال، 2/الجزء الثالث، ص 22، حدیث: 5434)
نبی کریم ﷺ نے ارشاد فرمایا: ”اللہ کے نزدیک سب سے پسندیدہ عمل وہ ہے جو ہمیشہ کیا جائے، اگرچہ تھوڑا ہو۔“ (مسلم، حدیث: 782، ص 394)
اسی طرح نبی کریم ﷺ نے کثرت سے نفلی روزے رکھنے والے ایک صحابی سے ارشاد فرمایا: ”تم پر تمہارے جسم کا بھی حق ہے۔“ (بخاری، ج 1، ص 649، حدیث: 1975)
اسی طرح حضرت عمر فاروق رضی اللہ عنہ فرماتے ہیں: ”پیٹ بھر کر کھانے پینے سے بچو، کیوں کہ یہ جسم کو خراب کرتا، بیماریاں پیدا کرتا اور نماز میں سستی لاتا ہے، اور تم پر کھانے پینے میں میانہ روی لازم ہے، کیونکہ اس سے جسم کی اصلاح ہوتی ہے اور فضول خرچی سے نجات ملتی ہے۔“ (کنز العمال، 138/15، حدیث: 4170)
حضرت عائشہ رضی اللہ عنہا سے روایت ہے کہ حضور اکرم ﷺ اُن کے پاس تشریف لائے اور اُن (حضرت عائشہؓ) کے پاس ایک عورت بیٹھی تھیں۔ آپ ﷺ نے پوچھا: ”یہ کون ہیں؟“ میں نے جواب دیا: ”یہ فلاں عورت ہے، جس کی نماز کا تذکرہ کیا جاتا ہے۔“ آپ ﷺ نے فرمایا: ”بس ٹھہرو! تم وہ چیز لازم پکڑو جس کی تمہیں طاقت ہو۔ اللہ کی قسم! اللہ تعالیٰ نہیں اکتاتا، بلکہ تم اکتا جاؤ گے۔ اللہ تعالیٰ کو وہ اطاعت زیادہ محبوب ہے، جسے کرنے والا اس پر مداومت اختیار کرے۔“ (بخاری و مسلم)
حضرت عبداللہ بن مسعود رضی اللہ عنہ سے روایت ہے کہ حضور اکرم ﷺ نے ارشاد فرمایا: ”دین میں بے جا تشدد کرنے والے ہلاک ہوگئے۔“ آپ ﷺ نے یہ بات تین مرتبہ ارشاد فرمائی۔ (صحیح مسلم)
حضرت عبداللہ بن سرجس رضی اللہ عنہ سے روایت ہے کہ نبی کریم ﷺ نے فرمایا: ”نیک راہ روش، کسی کام میں آہستگی اور غور و فکر کے لیے تاخیر کرنا اور میانہ روی، وہ خوبیاں ہیں جو نبوت کے چوبیس اجزاء میں سے ایک جز ہیں۔“ (مشکوٰۃ المصابیح، حدیث: 988)
حضرت ابوالدرداء رضی اللہ عنہ سے روایت ہے کہ نبی کریم ﷺ نے فرمایا: ”انسان کی سمجھ داری یہ ہے کہ وہ اپنی معیشت میں میانہ روی قائم کرے۔“ (مسند احمد، حدیث نمبر: 21695)
حضرت عبداللہ بن مسعود رضی اللہ عنہ سے روایت ہے کہ رسول اللہ ﷺ نے فرمایا: ”وہ کبھی محتاج نہیں ہوتا جو خرچ کرنے میں میانہ روی کو ملحوظ رکھے۔“ (مسند احمد، حدیث نمبر: 4269)
حضرت حذیفہ رضی اللہ عنہ سے روایت ہے کہ رسول اللہ ﷺ نے فرمایا: ”مال کی فراوانی کے وقت میانہ روی قائم کرنا، تنگدستی اور غربت کے وقت میانہ روی قائم کرنا اور عبادات میں میانہ روی قائم کرنا بہت ہی پسندیدہ بات ہے۔“ (مسند بزار، حدیث نمبر: 2946)
حضرت ابوہریرہ رضی اللہ عنہ سے روایت ہے کہ حضور اکرم ﷺ نے ارشاد فرمایا: ”دین آسان ہے اور جو کوئی بے جا تشدد دین میں اختیار کرتا ہے، دین اس پر غالب آجاتا ہے۔ پس تم میانہ روی اختیار کرو، خوش ہو جاؤ اور صبح و شام اور رات کو کچھ حصے کی عبادت سے مدد حاصل کرو۔“ (صحیح بخاری)
حضرت انس رضی اللہ عنہ سے روایت ہے کہ حضور اکرم ﷺ مسجد میں تشریف لائے تو آپ ﷺ نے دو ستونوں کے درمیان ایک رسی بندھی ہوئی پائی۔ آپ ﷺ نے دریافت فرمایا: ”یہ رسی کیسی ہے؟“ بتایا گیا کہ یہ زینب کی رسی ہے۔ جب تھک جاتی ہیں تو اس سے سہارا لیتی ہیں۔ آپ ﷺ نے فرمایا: ”اسے کھول ڈالو، ہر کوئی طبیعت کے نشاط کی حالت میں نماز (تہجد) پڑھے، جب سستی پیدا ہو جائے تو سو جائے۔“ (بخاری و مسلم)
حضرت عبداللہ بن عباس رضی اللہ عنہ سے روایت ہے کہ حضور اکرم ﷺ خطبہ ارشاد فرما رہے تھے۔ اچانک آپ ﷺ کی نگاہ ایک کھڑے ہوئے آدمی پر پڑی۔ آپ ﷺ نے اس کے بارے میں دریافت فرمایا۔ صحابہ کرامؓ نے بتایا کہ یہ ابواسرائیل ہے، جس نے نذر مانی ہے کہ دھوپ میں کھڑا رہے گا اور بیٹھے گا نہیں، نہ سایہ لے گا، نہ گفتگو کرے گا اور روزہ رکھے گا۔ حضور اکرم ﷺ نے ارشاد فرمایا: ”اسے کہہ دو کہ وہ بات کر لے، سایے میں ہو جائے، بیٹھ جائے اور روزے کو مکمل کرے۔“ (صحیح بخاری)
حضرت انسؓ بیان کرتے ہیں کہ تین اشخاص نبی ﷺ کی عبادت کے متعلق پوچھنے کے لیے نبی ﷺ کی ازواجِ مطہرات کے پاس آئے۔ جب انہیں اس کے متعلق بتایا گیا تو گویا انہوں نے اسے کم محسوس کیا، چنانچہ انہوں نے کہا: ”ہماری نبی ﷺ سے کیا نسبت؟ اللہ نے تو ان کی اگلی پچھلی تمام خطائیں معاف فرما دی ہیں۔“ ان میں سے ایک نے کہا: ”میں تو ہمیشہ ساری رات نماز پڑھوں گا۔“ دوسرے نے کہا: ”میں دن کے وقت ہمیشہ روزہ رکھوں گا اور افطار نہیں کروں گا۔“ اور تیسرے نے کہا: ”میں عورتوں سے اجتناب کروں گا اور میں کبھی شادی نہیں کروں گا۔“
نبی ﷺ ان کے پاس آئے اور پوچھا: ”تم وہ لوگ ہو جنہوں نے اس طرح، اس طرح کہا ہے؟ اللہ کی قسم! میں تم سے زیادہ اللہ سے ڈرتا ہوں اور تم سے زیادہ تقویٰ رکھتا ہوں، لیکن میں روزہ بھی رکھتا ہوں اور افطار بھی کرتا ہوں، رات کو نماز پڑھتا ہوں اور سوتا بھی ہوں، اور میں عورتوں سے شادی بھی کرتا ہوں۔ پس جو شخص میری سنت سے اعراض کرے، وہ مجھ سے نہیں۔“ (مشکوٰۃ: 145)
حضرت عبداللہ بن عمروؓ بیان کرتے ہیں کہ ایک آدمی رسول اللہ ﷺ کی خدمت میں حاضر ہوا اور اس نے آپ سے جہاد میں شریک ہونے کی اجازت طلب کی تو آپ ﷺ نے فرمایا: ”کیا تیرے والدین زندہ ہیں؟“ اس نے عرض کیا: ”جی ہاں!“ آپ ﷺ نے فرمایا: ”ان دونوں (کی خدمت) میں مجاہدہ (انتہائی کوشش) کر۔“ ایک دوسری روایت میں ہے، آپ ﷺ نے فرمایا: ”اپنے والدین کے پاس چلا جا اور ان سے اچھی طرح سلوک کر۔“ (مشکوٰۃ: 3817)
لہٰذا ہمیں چاہیے کہ اسلامی تعلیمات کے مطابق اپنے تمام معاملات میں میانہ روی اختیار کریں تاکہ ہماری زندگی سکون و چین سے گزرے۔ اللہ تعالیٰ ہمیں عمل کرنے کی توفیق نصیب فرمائے۔ آمین۔
تبصرہ لکھیے