پاکستان میں نوجوانوں کو زندگی کے ابتدائی مراحل ہی سے کامیابی کے ایک مخصوص تصور کے ساتھ پروان چڑھایا جاتا ہے۔ اچھے نمبروں سے تعلیم حاصل کرنا، کسی معروف ادارے میں داخلہ لینا، اچھی ملازمت حاصل کرنا اور مالی طور پر مستحکم ہونا کامیابی کی بنیادی علامتیں سمجھی جاتی ہیں۔ بلاشبہ تعلیم، محنت اور خودمختاری اہم ہیں، لیکن مسئلہ اس وقت پیدا ہوتا ہے جب ان مقاصد کو حاصل کرنے کے لیے نوجوانوں پر غیر ضروری دباؤ ڈالا جاتا ہے۔
ہر نوجوان کی صلاحیت، دلچسپی اور زندگی کے حالات مختلف ہوتے ہیں، مگر معاشرہ اکثر سب کے لیے کامیابی کا ایک ہی معیار مقرر کر دیتا ہے۔اس دباؤ میں والدین کی توقعات بھی ایک اہم کردار ادا کرتی ہیں۔ والدین اپنے بچوں کے بہتر مستقبل کے خواہاں ہوتے ہیں اور ان کی خواہش ہوتی ہے کہ ان کے بچے زندگی میں وہ مقام حاصل کریں جو شاید وہ خود حاصل نہ کر سکے۔ تاہم بعض اوقات یہی خواہشات نوجوانوں کے لیے ذہنی دباؤ کا سبب بن جاتی ہیں۔ کسی دوسرے کے بچے کی کامیابی کو مثال بنا کر پیش کرنا، بار بار تعلیمی نتائج کا موازنہ کرنا اور مستقبل کے حوالے سے مسلسل سوالات کرنا نوجوانوں میں احساسِ کمتری پیدا کر سکتا ہے۔ بعض نوجوان اپنی حقیقی دلچسپیوں کو نظر انداز کرکے صرف اس لیے ایسے شعبوں کا انتخاب کرتے ہیں تاکہ وہ اپنے خاندان کی توقعات پر پورا اتر سکیں۔اس صورتحال میں سوشل میڈیا نے بھی ایک نیا چیلنج پیدا کر دیا ہے۔ انسٹاگرام، فیس بک اور دیگر ڈیجیٹل پلیٹ فارمز پر نوجوان روزانہ دوسروں کی کامیابیوں، خوشیوں، بیرونِ ملک تعلیم، نئی ملازمتوں، مہنگے طرزِ زندگی اور خوبصورت لمحات کو دیکھتے ہیں۔
مسئلہ یہ نہیں کہ لوگ اپنی کامیابیاں دوسروں کے ساتھ کیوں بانٹتے ہیں، بلکہ مسئلہ یہ ہے کہ ان پوسٹس کو دیکھنے والا نوجوان اکثر اپنی پوری زندگی کا موازنہ کسی دوسرے شخص کی زندگی کے چند منتخب اور خوبصورت لمحات سے کرنے لگتا ہے۔سوشل میڈیا پر نظر آنے والی زندگی ہمیشہ مکمل حقیقت کی عکاسی نہیں کرتی۔ وہاں اکثر کامیابی دکھائی دیتی ہے، لیکن اس کے پیچھے چھپی ناکامیاں، مشکلات، مالی مسائل اور طویل جدوجہد نظر نہیں آتی۔ اس کے باوجود نوجوان خود کو دوسروں سے پیچھے محسوس کرنے لگتے ہیں۔ کسی کی نئی ملازمت، کسی کی بیرونِ ملک کامیابی یا کسی کی کاروباری ترقی دیکھ کر وہ اپنی صلاحیتوں اور کامیابیوں پر سوال اٹھانے لگتے ہیں۔ یوں ایک غیر محسوس مقابلہ شروع ہو جاتا ہے جس میں منزل کا تعین دوسروں کی زندگیوں کو دیکھ کر کیا جاتا ہے۔پاکستان میں تعلیم مکمل کرنے والے نوجوانوں کے لیے روزگار کے مواقع اور معاشی غیر یقینی صورتحال بھی اس دباؤ کو مزید بڑھا دیتی ہے۔ ڈگری حاصل کرنے کے بعد مناسب ملازمت تلاش کرنا، تجربے کی کمی کے باعث مواقع سے محروم رہنا اور اپنے مستقبل کے بارے میں غیر یقینی کا شکار ہونا بہت سے نوجوانوں کا مشترکہ تجربہ ہے۔
ایک طرف انہیں کہا جاتا ہے کہ تعلیم حاصل کرو اور اپنے پیروں پر کھڑے ہو جاؤ، جبکہ دوسری طرف عملی زندگی میں قدم رکھتے ہی انہیں ایسے مسائل کا سامنا کرنا پڑتا ہے جن کے لیے اکثر تعلیمی ادارے انہیں مکمل طور پر تیار نہیں کر پاتے۔اس تمام صورتحال کا اثر نوجوانوں کی ذہنی اور جذباتی صحت پر بھی پڑتا ہے۔ مسلسل موازنہ، ناکامی کا خوف، مستقبل کی فکر اور دوسروں کی توقعات پر پورا اترنے کی کوشش ذہنی تھکن اور بے چینی کو جنم دے سکتی ہے۔ کئی نوجوان اپنی پریشانیوں کا اظہار اس لیے نہیں کرتے کہ انہیں کمزور سمجھا جائے گا یا ان کی مشکلات کو سنجیدگی سے نہیں لیا جائے گا۔ بعض اوقات انہیں صرف یہ کہہ کر خاموش کروا دیا جاتا ہے کہ ابھی عمر ہی کیا ہے، زندگی میں تو آگے بہت کچھ دیکھنا ہے۔ حالانکہ نوجوان ہونا اس بات کی ضمانت نہیں کہ انسان پریشانیوں، خوف اور ذہنی دباؤ سے محفوظ ہے۔یہ سمجھنا ضروری ہے کہ ہر نوجوان کی کامیابی کا وقت اور راستہ مختلف ہوتا ہے۔ کسی کے لیے کامیابی جلد اچھی ملازمت حاصل کرنا ہے، کسی کے لیے اپنے کاروبار کا آغاز کرنا، جبکہ کسی کے لیے اپنی تعلیم مکمل کرنا یا اپنی پسند کے شعبے میں پہچان بنانا ہی ایک بڑی کامیابی ہو سکتی ہے۔ زندگی کو صرف عہدے، تنخواہ، ڈگری یا سوشل میڈیا پر ملنے والی پذیرائی سے نہیں ناپا جا سکتا۔
والدین، تعلیمی اداروں اور معاشرے کو اس حوالے سے اپنا کردار ادا کرنے کی ضرورت ہے۔ والدین کو چاہیے کہ وہ بچوں کا دوسروں سے موازنہ کرنے کے بجائے ان کی انفرادی صلاحیتوں اور دلچسپیوں کو سمجھیں۔ تعلیمی اداروں میں ذہنی صحت، کیریئر کونسلنگ اور عملی زندگی کی تیاری پر توجہ دی جانی چاہیے۔ اسی طرح نوجوانوں کو بھی یہ سمجھنے کی ضرورت ہے کہ سوشل میڈیا پر نظر آنے والی کامیابیاں زندگی کا مکمل عکس نہیں ہوتیں اور ہر شخص کو اپنی رفتار سے آگے بڑھنے کا حق حاصل ہے۔آج کی نوجوان نسل کو صرف کامیابی کے خواب دکھانے کی نہیں بلکہ اسے اپنی ناکامیوں، الجھنوں اور مشکلات کے بارے میں بات کرنے کا محفوظ ماحول دینے کی بھی ضرورت ہے۔ ہر نوجوان سے یہ توقع رکھنا درست نہیں کہ وہ ہر وقت بہترین کارکردگی دکھائے، ہر مقابلے میں کامیاب ہو اور ہر فیصلے میں درست ثابت ہو۔ غلطیاں کرنا، راستہ بدلنا اور دوبارہ آغاز کرنا بھی زندگی کا حصہ ہے۔آخرکار کامیابی کی اصل خوبصورتی دوسروں سے آگے نکلنے میں نہیں بلکہ اپنی صلاحیتوں کو پہچاننے، اپنی زندگی کے مقاصد متعین کرنے اور ذہنی سکون کے ساتھ آگے بڑھنے میں ہے۔
نوجوان نسل کو یہ احساس دلانا ضروری ہے کہ ان کی قدر صرف ان کی ڈگری، ملازمت یا مالی حیثیت سے نہیں بلکہ ان کی شخصیت، صلاحیتوں اور انسانی وجود سے بھی ہے۔ شاید اب وقت آ گیا ہے کہ ہم نوجوانوں سے صرف یہ پوچھنے کے بجائے کہ وہ زندگی میں کیا بننا چاہتے ہیں، یہ بھی پوچھیں کہ وہ اپنی زندگی میں کس قدر مطمئن اور خوش ہیں۔
تبصرہ لکھیے