کسی بھی فتنے کو رسول اللہ صلی اللہ علیہ سلم کی پیش کی گئیں قیامت کی نشانیوں پر تطبیق کرنے سے قبل ماہر علماء کرام سے رائے لے لینی چاہیئے ۔ بلا شبہ رسول اللہ صلی اللہ علیہ وسلم کی تمام بیان کردہ پیشینگوئیاں سچ ثابت ہوں گی کیونکہ آپ کو وحی الٰہی سے معلوم ہوا۔
لیکن ہم انسان ہیں ،ہمارے پاس غیب کا علم نہیں ۔ اس لئے کئی بار یوں بھی ہو جاتاہے کہ فتنے کی وقوع پذیری میں حدیث رسول صلی اللہ علیہ وسلم کی کچھ تھوڑی بہت مماثلت بھی ہو تو لوگ تطبیق کر کے حدیث رسول صلی اللہ علیہ وسلم کے اصل معانی سے دوری اختیار کر لیتے ہیں جس سے فتنہ جنم لیتا ہے ۔ آرٹیفیشل انٹیلیجنس کو دجال ہی کہنا اور یہ رائے رکھنا کہ کوئی مجسم دجال نہیں آئے گا ۔ان تمام احادیث رسول صلی اللہ علیہ وسلم کا انکار ہے، جس میں رسول اللہ صلی اللہ علیہ وسلم نے دجال کے مجسم حالت میں آنے کا ذکر کیا ہے ۔
دجال لوگوں کو اپنے ربّ ہونے پر جبری اقرار کروائے گا جبکہ آرٹیفیشل انٹیلیجنس انسانی پرومٹ کی محتاج ہے ۔ دجال لوگو کو ہارڈ فارم میں اناج اگا کر دیکھائے گا ، درختوں کو ہرا بھرا کرے گا ۔ جبکہ آرٹیفیشل انٹیلیجنس زراعت میں روبوٹک مشینری اور ادویات یا کیمیکل کی محتاج ہے ۔ اور دجال کو سیدنا عیسیٰ علیہ السلام کے ہاتھوں قتل کیا جائے گا ۔ دجال کا ظہور کب ہو گا اسکا علم بھی اللہ ربّ العالمین کے پاس ہے ۔ نبوی منہج یہی ہے کہ اس سے اللہ ربّ العزت کی پناہ طلب کی جائے ۔اور اس فتنے سے بچنے کے لئے اللہ سے مسنون دعائیں کی جائیں جو ہر نبی اور اہل ایمان کا شیوا رہا ہے ۔
اور رسول اللہ صلی اللہ علیہ وسلم کی بعض احادیث کو مان کر دانستہ بعض احادیث کا انکار کرنا رسول اللہ صلی اللہ علیہ وسلم کی تکذیب کرنے کے برابر ہے ۔ یہ فتنہ انکار حدیث کی طرف لے جانے والا عمل ہے ، جس سے رسول اللہ صلی اللہ علیہ وسلم کی اتباع کے راستے کمزور ہوتے ہیں ۔ اس سے ایمان میں نقص پیدا ہوتا ہے اور بہت سے لوگ ایسے فتنے میں مبتلا ہو کر فتنہ الحاد پر بھی چل نکلتے ہیں ، کیونکہ صحیح تطبیق نہ ہونے کی صورت میں شیطان ان کے دلوں میں وسوسے ڈال دیتا ہے ۔ جس سے وہ احادیث کا انکار کرنے کے ساتھ ساتھ ڈائریکٹ دین کے ہی منکر ہو جاتے ہیں ۔
اللہ اس عظیم آزمائش سے ہر مسلمان کو محفوظ فرمائے آمین ۔
اور اللہ کریم دجال کی فتنے سے ہمیں اپنی پناہ میں رکھے آمین ۔
تبصرہ لکھیے