امیر العظیم: اخلاص، بصیرت اور خدمت کی روشن داستان – کامران اشرف

ایک ریکارڈنگ کے سلسلے میں محترم امیر العظیم صاحب کے دفتر جانے کا موقع ملا۔ وہاں چند سینئر صحافی پہلے سے موجود تھے۔ اجازت ملنے کے بعد ہم نے کیمرے نصب کرنا شروع کیے۔ اسی دوران امیر العظیم صاحب گفتگو میں مصروف تھے، مگر جونہی ہماری طرف متوجہ ہوئے، فوراً فرمایا: “کیمرہ یہاں زیادہ بہتر رہے گا۔” یہ ایک مختصر جملہ تھا، لیکن اس سے ان کی میڈیا اور پروڈکشن کے معاملات پر گہری نظر کا اندازہ ہوتا تھا۔ ان کی ٹیکنیکل سمجھ اور میڈیا مینجمنٹ کا تجربہ واقعی غیر معمولی تھا۔

امیر العظیم صاحب نے فیوچر وژن کمیونیکشن کی بنیاد رکھی اور میڈیا کے میدان میں ایک منفرد شناخت قائم کی۔ تعلقاتِ عامہ (PR) کے شعبے میں ان کا وسیع تجربہ ان کی شخصیت کا وہ روشن پہلو تھا جس سے شاید بہت سے لوگ پوری طرح واقف نہ ہو سکے۔ انہوں نے سادگی، خلوص اور انکساری کو ہمیشہ اپنی شخصیت کا حصہ بنائے رکھا۔امیر العظیم صاحب نے بطور جنرل سیکریٹری جماعت اسلامی پاکستان اور سیکریٹری اطلاعات و نشریات اپنی ذمہ داریاں نہایت بصیرت کے ساتھ ادا کیں۔ ان کی قیادت میں الیکٹرانک میڈیا، پرنٹ میڈیا اور ڈیجیٹل میڈیا کے شعبوں کو منظم انداز میں فروغ دیا گیا۔ وہ جدید تقاضوں اور نئی ٹیکنالوجی کو اپنانے کے حامی تھے، مگر اس کے ساتھ ساتھ اپنی نظریاتی بنیادوں اور اصولوں پر کبھی سمجھوتہ نہیں کیا۔ طلبہ تحریک سے لے کر قومی سطح کی قیادت تک ان کی زندگی اخلاص، تنظیم، فکری پختگی اور جدت کا حسین امتزاج رہی۔

اللہ تعالیٰ محترم امیر العظیم صاحب کی کامل مغفرت فرمائے، ان کی خدمات کو شرفِ قبولیت عطا فرمائے اور انہیں جنت الفردوس میں اعلیٰ مقام نصیب فرمائے۔ آمین۔