ریاست کی ترقی اور استحکام میں سرکاری و نیم سرکاری ملازمین کا کردار ہمیشہ بنیادی حیثیت رکھتا ہے۔ یہ وہ محبِ وطن شہری ہوتے ہیں جو اپنی جوانی، صلاحیتیں اور زندگی کے بہترین سال ملک و قوم کی خدمت کے لیے وقف کر دیتے ہیں۔ وہ اپنی ذاتی کاروباری ترقی یا دولت جمع کرنے کے بجائے اپنے فرائض کو ترجیح دیتے ہیں اور اس امید کے ساتھ ریٹائر ہوتے ہیں کہ بڑھاپے میں ملنے والی پنشن ان کی بنیادی ضروریات پوری کرنے کے لیے کافی ہوگی۔
بدقسمتی سے پاکستان میں بڑھتی ہوئی مہنگائی اور افراطِ زر نے پینشنرز کی زندگی کو شدید مشکلات سے دوچار کر دیا ہے۔ خوراک، ادویات، بجلی، گیس اور دیگر ضروریاتِ زندگی کی قیمتوں میں مسلسل اضافہ ہو رہا ہے، جبکہ بیشتر پنشنرز کی آمدنی ان اخراجات کا بوجھ برداشت کرنے سے قاصر ہے۔ ایسے حالات میں ضروری ہے کہ حکومت پینشنرز کی پنشن میں سالانہ اضافہ مہنگائی کی حقیقی شرح کے مطابق کرے تاکہ ان کی قوتِ خرید برقرار رہ سکے۔ دنیا کے مہذب ممالک اپنے بزرگ شہریوں کی عزت اور فلاح کو اولین ترجیح دیتے ہیں۔ وہاں حکومتیں عمر رسیدہ افراد کو معاشی تحفظ فراہم کرتی ہیں تاکہ وہ عزت اور وقار کے ساتھ زندگی گزار سکیں۔
پاکستان میں بھی یہی اصول اپنانے کی ضرورت ہے۔ جن افراد نے اپنی پوری زندگی ملک و قوم کی خدمت میں گزاری، انہیں بڑھاپے میں معاشی پریشانیوں، قرضوں اور محتاجی کا سامنا نہیں کرنا چاہیے۔ افسوس کی بات یہ ہے کہ ہر سال بجٹ کی تیاری کے دوران پینشنرز کے مسائل اور مشکلات کو اکثر نظر انداز کر دیا جاتا ہے۔ حالانکہ یہ طبقہ زندگی کے نہایت حساس مرحلے سے گزر رہا ہوتا ہے جہاں بیماریوں، ادویات اور روزمرہ اخراجات میں مسلسل اضافہ ان کے لیے ایک بڑا چیلنج بن جاتا ہے. اس صورتحال میں وفاقی اور صوبائی اسمبلیوں کے منتخب نمائندوں، سیاسی جماعتوں، انسانی حقوق کی تنظیموں، صحافیوں، دانشوروں اور سماجی رہنماؤں پر ذمہ داری عائد ہوتی ہے کہ وہ پینشنرز کے حقوق کے لیے مؤثر آواز بلند کریں۔
بزرگ شہریوں کا احترام صرف اخلاقی فریضہ ہی نہیں بلکہ ایک مہذب معاشرے کی پہچان بھی ہے۔ ضرورت اس امر کی ہے کہ حکومت پینشنرز کی پنشن میں خاطر خواہ اضافہ کرے اور اسے مہنگائی کی شرح سے منسلک کرے تاکہ وہ اپنی خوراک، علاج اور دیگر بنیادی ضروریات کے لیے کسی کے سامنے دستِ سوال دراز کرنے پر مجبور نہ ہوں۔ یہ صرف معاشی مسئلہ نہیں بلکہ انسانی وقار، سماجی انصاف اور قومی ذمہ داری کا تقاضا بھی ہے۔
اللہ تعالیٰ سے دعا ہے کہ پاکستان کو ایسی مخلص، دیانتدار اور عوام دوست قیادت نصیب ہو جو ہر شہری، بالخصوص بزرگ پینشنرز کے حقوق کا تحفظ کرے اور انہیں عزت، سکون اور معاشی تحفظ کے ساتھ زندگی گزارنے کے مواقع فراہم کرے۔
بزرگوں کی دعا سے قوم کا مستقبل سنورتا ہے
جو ان کا حق ادا کرے، وہی معاشرہ نکھرتا ہے
تبصرہ لکھیے