کیا اسلامی جمہوریت کا تجربہ ناکام ہو چکا؟- غلام اصغر ساجد

ایک نقطہء نظر۔ آپ کا اتفاق ضروری نہیں۔
دو اُصول۔
1۔ جب اللہ تعالٰی یہ جان لے گا کہ جو لوگ اُس کے دین کو قائم کرنے کے لیے اٹھے ہیں وہ اس قابل ہو گئے ہیں کہ انہیں خلافت کی ذمّہ داری دے دی جائے تب اللہ تعالٰی انہیں کامیابی عطا کرے گا۔
2۔ دوسرے یہ کہ یہ اللہ تعالٰی کا کسی قوم پر انعام ہو گا کہ وہاں اسلامی نظام قائم ہو جائے۔
سوچنے کی باتیں۔
اولاً کیا ہم اس قابل ہو گئے ہیں کہ اللہ تعالٰی ہمیں اپنی خلافت کی امانت سونپ دے
اور وسرے یہ کہ کیا ہم بحیثیّت قوم اس قابل ہیں کہ اللہ تعالٰی ہم پر اپنا انعام کرے۔
دونوں اصولوں کے بارے میں جامع تبصرے۔
کوئی نطام حکومت خواہ کیسا ہی اعلٰی مرتبے کا ہو، اس کے قوانین خواہ کتنے ہی بہتر ہوں اگر
1۔ اس کی عمارت عمدہ اخلاق کی مضبوط بنیاد پر قائم نہ ہو،
2۔ اگر اس کے چلانے والے بلند سیرت و کردار کے مالک نہ ہوں اور
3۔ اگر وہ معاشرہ جس میں اسے قائم کیا گیا ہو ایمان دار اور خدا ترس نہ ہو تو وہ کبھی کامیابی کے ساتھ نہیں چل سکتا۔
"تصریحات" صفحہ 404
اس معاملے میں سب سے پہلی بات جو سمجھ لینی چاہیے وہ یہ ہے کہ جس چیز کا نام اسلامی نظام ہے وہ کسی بے ایمان اور بد کردار حکومت کے ہاتھوں سے نہیں چل سکتا۔ کوئی اللہ سے بے خوف بیورو کریسی اسے نہیں چلا سکتی۔اور کسی ایسی آبادی میں وہ ٹھیک طور پر نہیں چل سکتا جس کی اخلاقی حالت بالعموم خراب ہو اور خراب کی جاتی رہی ہو۔
"تصریحات" صفحہ 412
پہلے اصول کے بارے میں مولانا مودودیؒ فرماتے ہیں۔
خوب سمجھ لیجیے کہ اللہ جلّ شانہٗ اسلام کی دعوت لے کر اٹھنے والوں کے لیے آزمائشوں کی بھٹی ضرور گرم کرتا ہے تا کہ کوئی بودا اور خام آدمی اس میدان میں قدم نہ رکھنے پائے۔ اور جو لوگ ایمان کا اقرار کر کے اس راہ پر آ جائیں وہ لازماً اسی بھیر سے گزارے جائیں ، تاکہ حق و صداقت کے ساتھ ان کا عشق اور دین کی سر بلندی کے لیے ان کا عزم اور اقامت دین کے لیے ان کا کردار پختہ اور قابلِ اعتماد ہو جائے۔۔۔۔۔۔
خوب جان لیجیے کہ اس سرزمین پر اسلام کا غلبہ اگر ہو سکتا ہے تو اسی طرح ہو سکتا ہے کہ اس مقصد کے لیے کام کرنے والے اسی بھٹی سے گزریں جس سے دورِ اوّل کے اہل ایمان گزرے تھے۔ اس کے لیے ناگزیر ہے کہ وہ ہر قربانی دینے، ہر مشقّت اٹھانے، ہر نقصان بھگتنے اور ہر خطرہ برداشت کرنے کے لیے تیّار ہوں۔ جب تک وہ یہ امتحان پاس نہ کر لیں گے ان پر ایک دارالسلام کے انتظام کا بوجھ نہیں ڈالا جائے گا۔ کیونکہ وہ اس بوجھ کو سہار نہ سکیں گے۔۔۔۔اس لیے اس کو اللہ کی رحمت سمجھیے کہ وہ آپ کو پختہ کرنے کے لیے آزمائشوں کی بھٹی سے گزار رہا ہے اور قبل از وقت آپ پر ذمّہ داریوں کا بوجھ نہیں ڈال رہا۔
جب اللہ تعالٰی کے علم میں یہ ہو گا کہ یہاں ایک ایسی جماعت بن گئی ہے جس میں کھرا سونا ہی پایا جاتا ہے اور کھوٹ سے وہ صاف ہو گئی ہے، جس کی دیانت و امانت اور خدا ترسی قابل اعتماد ہے، جو کبر و نخوت اور انانیت و نفسانیت سے پاک ہے، جو اپنی برائی کے لیے نہیں اٹھی ہے بلکہ فی الواقع اللہ کے دین ہی کی بالا تری قائم کرنا چاہتی ہے، تب اللہ کے فضل سے یہ پوری امید ہے کہ وہ ایسی جماعت کو دنیوی کامیابی بھی عطا فرمائے گا، جس طرح اس کے پیش روؤں کو وہ عطا کر چکا ہے۔ اس لیے صبر اور ہمت و استقامت کے ساتھ آزمائشوں سے گزریے اور اللہ تعالٰی سے دعا مانگتے رہیے کہ وہ آپ کو قامت دین کے کام کی اہلیت و صلاحیّت عطا فرمائے۔
یہی بات ہے جو حضرت خبابؓ بن ارت سے رسول اللہ ﷺ نے فرمائی تھی۔
حضرت خبابؓ بن الارت بیان کرتے ہیں کہ رسول اللہ ﷺ بیت اللہ کے سائے میں چادر سر کے نیچے رکھّے آرام فرما رہے تھے کہ ہم نے آپ سے شکایت کی اور عرض کیا
"آپ اللہ سے ہماری نُصرت کیوں نہیں مانگتے اور ہمارے لیے دُعا کیوں نہیں کرتے ؟
آپؐ نے فرمایا۔ تم سے پہلے جو ایسے لوگ گزرے ہیں کہ اُن میں سے کسی کے لیے گڑھا کھودا جاتا۔ پھر آرا لایا جاتا اور اس سے اس کے جسم کو چیرا جاتا۔ یہاں تک کہ اس کے جسم کے دو ٹکڑے ہو جاتے۔ پھر بھی وہ دین سے نہ پھرتا۔ اور اس کے جسم میں لوہے کے کنگھے چبھوئے جاتے جو گوشت سے گزر کر ہڈیوں اور پٹھوں تک پہنچ جاتے، مگر وہ اللہ کا بندہ حق سے نہ پھرتا۔
اللہ کی قسم۔ اللہ کا یہ دین غالب ہو کر رہے گا۔ یہاں تک کہ سوار صنعأ (یمن) سے حضر موت تک کا سفر کرے گا۔ اور راستہ میں اللہ کے سوا کسی کا خوف نہ ہو گا۔ البتّہ چرواہے کو صرف بھیڑیوں کا خوف رہے گا کہ کہیں بکری اٹھا نہ لے جائیں۔
لیکن تم لوگ جلدی کرتے ہو۔
"تصریحات" صفحہ 289 تا 292