محترم جناب وزیراعلیٰ گلگت بلتستان
جناب جسٹس (ر) یار محمد صاحب
موضوع: پڑی بنگلہ واٹر چینل کی فوری بحالی اور عوام کو درپیش شدید آبی بحران
محترم جناب!
گزشتہ دو ماہ سے پڑی بنگلہ واٹر چینل انتہائی تشویشناک اور خطرناک صورتحال سے دوچار ہے۔ یہ اہم آبپاشی و پینے کے پانی کا واحد ذریعہ اب تک متعدد مرتبہ ٹوٹ چکا ہے اور حالیہ خرابی نے علاقے کے عوام کو شدید مشکلات میں مبتلا کر دیا ہے۔
کھیت، کھلیان، باغات اور سبزیوں کی فصلیں پانی نہ ملنے کے باعث سوکھ رہی ہیں۔ مویشیوں اور انسانوں کے لیے پانی نایاب ہو چکا ہے۔ پینے کے پانی اور وضو کے لیے لوگ دربدر پھرنے پر مجبور ہیں۔ صورتحال اس قدر سنگین ہے کہ ایک ٹینکر پانی جگلوٹ سے تقریباً نو ہزار روپے میں منگوانا پڑ رہا ہے، جو علاقے کے اکثر غریب اور متوسط خاندانوں کی استطاعت سے باہر ہے۔ اہلیانِ پڑی بنگلہ اس وقت شدید کرب اور اضطراب میں مبتلا ہیں۔ پانی جیسی بنیادی ضرورت سے محرومی نے لوگوں کی زندگی اجیرن بنا دی ہے۔ اگر فوری اقدامات نہ کیے گئے تو زرعی نقصان کے ساتھ ساتھ انسانی مشکلات میں بھی مزید اضافہ ہوگا۔
لہٰذا آپ سے نہایت مؤدبانہ مگر پُرزور اپیل ہے کہ چیف سیکریٹری، سیکریٹری آبپاشی، ڈپٹی کمشنر اور متعلقہ حکام کو ہنگامی بنیادوں پر احکامات جاری فرمائیں تاکہ پڑی بنگلہ واٹر چینل کی فوری مرمت اور ایمرجنسی واٹر حالی کو یقینی بنایا جا سکے۔ یہ محض ایک معمولی مسئلہ نہیں بلکہ ہزاروں افراد کی زندگی، صحت اور روزگار کا مسئلہ ہے۔
امید ہے کہ آپ اس انسانی المیے کا فوری نوٹس لے کر متاثرہ عوام کو اس کربناک صورتحال سے نجات دلانے میں اپنا کردار ادا فرمائیں گے۔
والسلام
امیرجان حقانی
و اہلیانِ پڑی بنگلہ
تبصرہ لکھیے