سچا دوست ملنا خوش قسمتی ہے – ڈاکٹر محمد شافع صابر

صاحبو!
بات بس اتنی سی ہے کہ آپ کی زندگی میں کم سے کم ایک دوست ایسا لازمی ہونا چاہیے جو آپ کی بیک پر آپ کی سائیڈ لے بس۔ ایک ایسا خیر خواہ ہوناچاہیے جو کہ آپ کی غیر موجودگی میں آپ کو ڈیفینڈ کرے۔

دوسری جو اہم بات ہے،وہ یہ ہے کہ آپ نے جب یہ کہہ دیا کہ یہ کام ایسے کرنا ہے وہ آگے سے چوں تک نا کرے،وہ بنا سوچے سمجھے کہے کہ جی ایسا ہی ہو گا،کیونکہ اس کے پیچھے ایک ماٹو ہو کہ بھائی نے کہا ہے تو کرنا ہے، کسی شک،کسی شبہ کی کوئی گنجائش موجود ہی نہیں ، کیونکہ بھائی چارے کی اصل تعریف ہی یہی ہے۔ایک اور نہایت ضروری بات یہ ہے کہ آپ کا سچا دوست آپکی اصلاح بھی کرے،سب کے سامنے نہیں،ون آن ون،اکیلے میں ۔ آپ کی بات کو نوٹ کرے،جو آپ نے کسی محفل میں کی ہو،جب سب اٹھ کر چلے جائیں،وہ آپ کے پاس آئے،آپکو ایک موٹی سی گالی دے اور کہے یہ کیا چول ماری ہے؟

اس کی توصیح کروائے اور آپ کو سمجھائے کہ ایسا نہیں ایسا کرنا ہے،اور آپ اس کو گلے لگا کر کہیں لو یو ۔ ایک ایسا بندا جو کہ آپ کی ہر ہاں میں ہاں ملائے، آپ کے غلط کام کو صحیح کہے، آپ کو غلط چیزوں سے نا روکے،وہ سب کچھ ہے،وہ آپ کا دوست نہیں ہے۔ وہ مفاد پرست ہے ۔ ایسا شخص جو کہ ہر کامیابی کے موقع پر آپ کے ساتھ ہو اور ناکامی میں فوراً ہاتھ چھوڑ جائے،وہ آپکا دوست ہرگز نہیں ۔ افراتفری کے اس دور میں سچا دوست ملنا آسان نہیں ۔ سچا دوست بننے کے لئے آپ کو اپنی ” میں ” کی قربانی دینا پڑتی ہے۔ چوبیس گھنٹے اپنی دستیابی ظاہر کروانا ہوتی ہے، دوست کے دکھ سکھ،خوشی غمی، جیت ہار میں ہر جگہ ساتھ کھڑا ہونا ہوتا ہے۔

سچا دوست آپ کی خامیاں اور کمزوریاں صرف اپنے تک محدود تک رکھتا ہے،انکی اصلاح کرنے کی کوشش کرے، لیکن ان خامیوں اور کمزوریوں کی بھنک آپ کے مخالفین کو لگنے تک نا دے ۔ اگر آپ کے پاس ایسا دوست نہیں تو کام خراب ہے، سچ میں خراب ہے۔ اسکا مطلب ہے کہ آپ کہیں نا کہیں تنہا ہیں،اکیلے ہیں ۔ اداس ہیں ۔ اس کا حل نکالیے ۔ منافق اور مفاد پرستی کے اس دور میں ایک مخلص دوست ملنا ایک نعمت سے کم نہیں ۔۔ اگر یہ نعمت میسر نہیں تو اوپر والے سے دعا کریں کہ آپ کو یہ نعمت میسر آئے ۔

آپ کی زندگیوں میں ایک فیمیل بیسٹ فرینڈ لازمی ہونی چاہیئے ۔ جسکے ساتھ کوئی لو افئیر نا ہو اور نا ہی چلنے کی امید ہو۔ یقین مانیے! اگر آپ کے پاس ایسی بیسٹی ہے تو وہ آپ خوش قسمت ترین انسان ہیں۔ فیمیل فرینڈ آپ کو جج نہیں کرتی،آپ کو غلط مشورہ نہیں دیتی، وہ آپکے ساتھ تب کھڑی ہوتی ہے،جب باقی سب ساتھ چھوڑ دیتے ہیں۔ وہ ایک اچھی Listener ہوتی ہے،آپ کی ساری پریشانیاں سنتی ہے، پھر آپ کو سمجھاتی ہے۔ آپ کو اپنی دانست میں صحیح مشورہ دیتی ہے۔ اس کے ساتھ جو آپ کا بانڈ ہوتا ہے،وہ سے سے زیادہ سٹرانگ ہوتا ہے، لیکن ایسی دوستی بہت کم لوگوں کو میسر ہوتی ہے۔

یاد رکھیے!
جب آپ کامیاب ہوتے ہیں،مفاد پرستوں کا ٹولہ آپ کے اردگرد منڈلاتا نظر آتا ہے، جب پہلی ٹھوکر لگتی ہے،سب سے زیادہ خوشامدی سب سے پہلے بھاگتا ہے۔ ایک مخلص دوست ہی ہوتا ہے جو آپ کے کندھے پر ہاتھ رکھ کر آپ کو دلاسہ دیتا ہے۔ اب یہ آپ کی قسمت پر منحصر ہے کہ آپ کو ایسا سچا دوست کب ملے گا۔