خواب جس کے سرہانے دھرے تھے- ثمینہ سید

کتاب: خواب زندہ رہتے ہیں
شاعر : عرفان صادق
آگ تھے ابتدائے عشق میں ہم
ہوگئے خاک، انتہا یہ ہے

میر تقی میر ایسا فرما گئے ہیں۔ انہوں نے عشق کی آنچ کو دھیما نہیں ہونے دیا تھا۔ خود کو دانستہ اس میں جلا کر خود اذیتی کا لطف لیتے رہے شعر کہتے رہے۔یہ خود اذیتی شاید شاعر کے خمیر میں شامل ہے۔یوں جیسے شعر میں طبیعت رواں رہنے کے لیے یہ ضروری امر ہو۔شاعر کو حقیقت سے فرار ہی اچھا لگتا ہے وہ اپنی طبیعت کی روانی کے لیے کہتا ہے کہ " خواب زندہ رہتے ہیں " اور کبھی خواب سرہانے رکھ کر سو جاتا ہے۔وہ اسی میں طمانیت محسوس کرتا ہے۔ دیکھا جائے تو اس کے الفاظ جو اس کے خوابوں کی فہرستیں ہیں وہ انسان کے بعد بھی امر رہتے ہیں اسے زندہ رکھتے ہیں تو یوں اس کے خواب زندہ رہتے ہیں۔

عرفان صادق کا شمار عہد حاضر کے صف اول کے شعراء میں ہوتا ہے ان کی غزل میں ٹھہراؤ ہے اورتسلسل بھی ہے۔ ان کے موضوعات جدت و ندرت کاامتزاج ہیں۔ ایک دور تھا جب غزل کو ہی شاعری سمجھا جاتا تھا۔یہی وجہ ہے کہ غزل میں بہت سے تجربات ہونے لگے تاکہ جمود پیدا نہ ہو جائے۔ غزل اصل میں تو جذبات کا اظہار ہے،محبوب کی مدح سرائی ہے۔ اپنی شدتوں کو سلیقے کے پیرہن پہنا کر شعروں میں ڈھالنا ہے۔ اب یہاں تہذیب وتمدن، سماجی بندشیں اور جس عہد میں شاعر جی رہا ہے اس سے ہم آہنگ بھی ہو۔ تو سونے پہ سہاگہ ہے۔ مذکورہ کتاب عرفان صادق کا پانچواں اردو شعری مجموعہ ہے۔پنجابی میں بھی شعر کہتے ہیں ایک کتاب " لوں لوں اچ اڈیک" منظرِ عام پر آ چکی ہے۔اور " ابد آباد "شائع ہو چکی ہے۔

وہ حافظ آباد کے قریب قلعہ بلونت سنگھ میں پیدا ہوئے۔ ابتدائی تعلیم وہیں سے حاصل کی۔ ایم اے اردو لاہور یعنی پنجاب یونیورسٹی سے کیا۔ وہ کم عمری سے ہی شعر کہنے لگے تھے۔ مطالعہ کی عادت نے شعر کہنے کے پیمانے اور سلیقے دونوں کی خوب تربیت کی۔ لاہور آنے کے بعد مشاعروں میں شرکت کرنے لگے۔ حلقہ ءاحباب بڑھتا چلا گیا۔ ایک ادبی تنظیم سیوا آرٹس سوسائٹی کے نام سے بنائی اور کتابیں بھی چھاپنے لگے یوں سیوا آرٹس سوسائٹی کے پلیٹ فارم سے اب تک سینکڑوں کتابیں چھپ چکی ہیں اور تقریبات جن میں زیادہ تر مشاعرے شامل ہیں تسلسل سے معیاری سطح پر ہوتی رہتی ہیں۔ کہتے ہیں

اسی سے ہم شاعری کے ساتھ ان کی جڑت اور کمٹ منٹ کا اندازہ لگا سکتے ہیں۔ ان کے بہت سے اشعار زبان زدِ عام ہیں۔ وہ ایک مضبوط ادبی ساکھ بنا چکے ہیں۔ اس کتاب کا پیش لفظ ایک نظم" کہوں کیا" کی صورت میں لکھتے ہیں۔ جس میں شاعر اور اس کے لفظوں کی حرمت کا ذکر ہے، پیڑ، پودوں اور پرندوں کے ہونے سے رونقوں کی بات ہے۔ وہ اس کائنات کے ہزارہا دکھ اس ایک نظم میں رقم کر چکے ہیں۔ کہ یہ وہ دنیا نہیں رہی جس کی ربِ تعالیٰ نے انسان کو بشارت دی تھی۔ کہتے ہیں

غزل اپنے الفاظ ، جذبات اور رجحانات کو فنی سانچوں میں ڈھالنے کا نام ہے۔ شاعر ہئیت اور تخیل کی بنیاد پر اپنا اسلوب طے کرتا ہے۔شعر کہتا رہتا ہے موضوعات میں تنوع آتا جاتا ہے۔ لیکن پیمانوں میں مہارت سے الفاظ جڑنا ہی شاعری نہیں ہے۔بلکہ جذبات کو، اپنے گردوپیش کو، ذاتی اور کائناتی وارداتوں کو کلاسیکیت اور جدت کو بیان کرنے کا سلیقہ بھی ازبر ہو۔ تبھی شاعر کے تخیل کا کینوس وسیع تر ہوتا چلا جائے گا۔کچھ مختلف کیفیات کے اشعار دیکھیے۔

عرفان صادق کی شاعری میں محبت، فطری ماحول، سماجی منظر اور پس منظر اپنی پوری شفاف اور حساس صورت میں نظر آتے ہیں۔وہ چراغ جلا کر منڈیر پہ رکھ دینے کے قائل ہیں۔انہیں یقین ہے روشنی دریچوں سے دروں تک پھیلتی چلی جائے گی، کائنات میں کچھ بھی ایسا نہیں ہے جو روشنی کا راستہ روک سکے۔

ان کے کلام میں زندگی توازن سے گزارنے کی خواہش نظر آتی ہے۔ وہ جذبات و احساسات کو تہذیب کے دائرے میں رکھ کر روایات کی پاسداری کرنا چاہتے ہیں۔انا اور خودداری پر سمجھوتہ نہیں کرنا چاہتے۔ شاعر ہونے کے باوجود طبیعت میں وقار انکساری کی نسبت زیادہ ہے۔ جھکتے جھکتے سنبھل جاتے ہیں۔ جو ان کی فطرت کے عملی اور حقیقت پسند ہونے کا پتہ دیتے ہیں۔ شاید انہیں اپنی ذات پر، اپنی صلاحیت پر یا پھر محبت پر کچھ زیادہ ہی یقین ہے۔

عرفان صادق تخلیق کے تمام تر تقاضوں سے شناسا ہیں۔وہ شاعری کے اسرار و رموز کو خوب جانتے ہیں۔اسی لیے شاعری میں طرح طرح کے تجربات کرتے رہتے ہیں۔کبھی بحروں میں،کبھی نئی اور تروتازہ زمینوں کے، کبھی زبان و بیان کے،مختصر یہ کہ وہ شاعری میں تازہ کاری کے قائل نظر آتے ہیں۔انوکھی تراکیب اور استعارے لاتے ہیں۔

وہ اضطراب پر ضبط کرنا جانتے ہیں۔حقیقت کو خواب بنا کر سرہانے رکھ لیتے ہیں۔ آئینے میں انہیں اپنا چہرہ روشن نظر آتا ہے تو وہ اعتماد سے اپنے چیلنجز سیٹ کر لیتے ہیں، چراغ کو ہوا میں رکھنے سے بھی نہیں ڈرتے۔تتلی کے بدن سے خوشبو کشید کر کے شعر میں روح پھونکنے کا ہنر جانتے ہیں۔ اضطرابی کیفیات کو جمالیات کے رنگوں میں رنگ کر خوش رنگ غزل کہتے ہیں۔ ان کے ہاں تصوف کے نمایاں رنگ ہیں۔وہ اپنے گاؤں کی سرسبز و شاداب ہواؤں میں سانس لیتے ہوئے پر لطف پنجابی اشعار اور بولیاں کہتے ہیں۔ جن میں روایت کے روپہلے رنگ جھلکتے ہیں۔ ماحول سے محبت اور جڑت نظر آتی ہے۔

تاریخ کا بیان، سیاست کے اثرات، معاشی بدحالی، اقدار کے عروج وزوال اور جنگوں کے نتیجے میں ہونے والی شکست و ریخت جیسے پختہ موضوعات بھی ان کے شعروں میں ملتے ہیں۔

اداسی، ہجرو فراق اور جدائی کی نوحہ گری بھی ان کی شاعری میں اشکباری کرتے نظر آتے ہیں۔

شاعر جمالیات کا ترجمان ہے وہ زندگی کی تلخیوں میں بھی گداز ڈھونڈ لیتا ہے۔عرفان صادق کی شاعری زخموں کی بخیہ گیری کرتی ہے۔ ان کی کچھ غزلیں غنائیت سے بھرپور ہیں۔ سادہ الفاظ میں کیفیات خود بخود گنگنانے لگتی ہیں۔اشعار آنکھوں کے سامنے مناظر بناتے چلے جاتے ہیں۔ شجر جو بے زبان نظر آتے ہیں وہ ان کے جذبات و احساسات کو بھی شعروں میں ڈھالتے ہیں توکبھی نظم کرتے ہیں۔ شعر دیکھیے

ان اشعار میں جو احساسات ہیں وہ عرفان صادق کے گاؤں سے ان کے خالص ماحول سے انہیں ملے ہیں،بچپن سے ہی ان کے خون میں رچ بس گئے ہیں۔ شاید وہ کان لگا کر پیڑوں کے دکھ سکھ سنتے تھے۔اور جس عمر میں نوجوان صرف اپنی ذات سے منسلک خواب دیکھتے تھے تب بھی وہ اشجار، مٹی ہواؤں، چراغ اور گندم کی بالیوں کی خوشبو اپنے اندر اتارتے تھے۔ اداسی بھی شاید اسی ماحول سے مستعار لی ہے جو ان کے اشعار میں مسلسل جاگزیں ہے۔ وہ ظلم و جور اور اسیری کے خلاف آواز اٹھاتے ہیں۔ ان کے ہاں بہت سے مزاحمتی اشعار ہیں۔ جو ظالم کے خلاف احتجاج ہیں۔

ان کے اردو شعری مجموعے
۱.چاند کی شال میں لپٹے وعدے
۲.رتجگوں کی بارش
۳.میں آنکھیں بھول آیا ہوں
۴.یہی لمحہ محبت ہے
۵. خواب زندہ رہتے ہیں
اور ابد آباد شاعری کے شجر پہ یونہی شادابیاں رہیں۔ آمین