ہوم << کچھ اپنے دل پر بھی زخم کھاؤ - حبیب الرحمن

کچھ اپنے دل پر بھی زخم کھاؤ - حبیب الرحمن

گزشتہ دنوں ہونے والے کچھ عدالتی فیصلوں اور کچھ عدم اعتماد کی تحریک کی کامیابی کے نتیجے میں وجود میں آنے والی شہباز حکومت کے اقدامات اس بات پر اکسا رہے ہیں کہ بلا خوف و خطر ان پر تبصرہ آرائی کی جائے۔ اس میں کوئی شک نہیں کہ آج کل حکومت ہو یا اعلیٰ عدالتیں، ان کے فیصلوں اور اٹھائے جانے والے اقدامات پر اختلافی بات کہنے کا مطلب خودکشی کے مترادف ہے لیکن نہ کہنا بھی اپنے ہی ہاتھوں اپنا گلا گھونٹ لینے سے کم نہیں۔ چند ہفتے قبل اعلیٰ عدالت نے آئین کے آرٹیکل 63 کے سلسلے میں تشریح کرتے ہوئے یہ فیصلہ سنایا تھا جو ارکانِ اسمبلی جس پارٹی کی جانب سے دیئے گئے ٹکٹ پر الیکشن جیت کر آتے ہیں وہ پارٹی پالیسیوں سے انحراف نہیں کر سکتے اور نہ ہی اپنی پارٹی کے سر براہ کی رائے کے خلاف کسی دوسری پارٹی کے حق میں اپنا ووٹ ڈال سکتے ہیں۔ پارٹی پالیسی کے خلاف ڈالا گیا ووٹ نہ تو گنتی میں شمار کیا جا سکتا ہے.

اور نہ ہی وہ اسمبلی کے رکن رہنے کے اہل ہو سکتے ہیں۔ اسی فیصلے کی روشنی میں پی ٹی آئی کے بیس سے زیادہ ارکانِ اسمبلی "ڈی سیٹ" کر دیئے گئے اور ان کے ووٹوں کو "شمار" سے باہر بھی نکال دیا گیا۔ ایک مزے کی بات یہ ہوئی کہ عدالت نے ارکانِ اسمبلی کو ڈی سیٹ کرنے کے بعد یہ فیصلہ پھر بھی پارلیمان پر چھوڑ دیا کہ ڈی سیٹ کئے جانے کی مدت کتنے عرصے کیلئے ہونی چاہیے۔ اگر یہ معاملہ بھی پارلمان ہی کو کرنا تھا تو ان کے ڈی سیٹ کئے جانے کے معاملے کو بھی کیوں نہ پارلیمان پر ہی چھوڑ دیا جاتا۔

آئین میں آئینی طریقے سے کسی حکومت کو تبدیل کرنے کا ایک طریقہ کار رکھ دیا گیا تھا۔ یہ ضروری نہیں کہ اگر کسی شخصیت کے ظاہری رکھ رکھاؤ کو دیکھ کر اس کو ریاستی معاملات چلانے کا اہل سمجھ لیا گیا ہو، وہ منتخب ہونے یا وزیرِ اعظم بننے کے بعد سارے معاملات بحسن و خوبی انجام تک پہنچا سکے۔ اسی ضرورت کے پیشِ نظر ایک آئینی طریقہ کار کے طور پر تحریک عدم اعتماد کو ہاؤس میں پیش کئے جانے راستہ کا نکالا بھی گیا تھا اور ہے بھی۔ عدم اعتماد کا مطلب ہی اس کے علاوہ اور کچھ نہیں ہوا کرتا کہ عوام کے نمائندے، خواہ ان کا تعلق اپوزیشن سے ہو یا خود حکومت میں بیٹھے اراکین سے، ان کو منتخب وزیرِ اعظم اور ان کی کابینہ کی کار کردگی غیر تسلی بخش لگ رہی ہے۔ تحریکِ عدم اعتماد کی کامیابی یا ناکامی دعوے کی خود ہی تصدیق یا تکذیب کر دیا کرتی ہے۔ اعلیٰ عدالتی فیصلے کے بعد کیا کوئی یہ بتا سکتا ہے کہ "عدم اعتماد" کی تحریک کا کوئی جواز رہ جاتا ہے؟۔ ایک ایسی پارٹی جس کو صرف ایک ووٹ کی بھی برتری حاصل ہو، کیا اس کے خلاف عدم اعتماد کی تحریک کا کوئی مقصد رہ جاتا ہے؟۔ اس نقطہ نظر کو سامنے رکھا جائے تو یہ جمہوریت کی وہ شکل ہوگی جسے بد ترین آمریت قرار دیا جائے تو بے جا نہیں ہوگا اس لئے کہ وہ کسی آمر کی طرح اپنی من مانیاں کرتی نظر آئے گی۔

موجودہ شہباز حکومت جو کہ عمران حکومت کو محض مہنگائی کرتے جانے کو جواز بنا کر وجود میں آئی تھی، مہنگائی کے آگے بند باندھنے میں سخت ناکام نظر آ رہی ہے۔ بظاہر اس نے بہت چاہا کہ پیٹرول ڈیزل کی قیمتیں نہ بڑھائی جائیں لیکن عمران حکومت کی "سو سنار کی پر ایک لوہار کی" مار کر یہ ثابت کر دیا کہ دونوں کی سوچ و فکر میں کوئی تضاد نہیں۔ تھوڑی دیر کیلئے یہ بات مان بھی لی جائے کہ مہنگائی پر بند باندھنا نہ تو عمران حکومت کیلئے ممکن تھا اور نہ ہی کسی بھی آنے والی حکومت کیلئے ممکن ہوسکے گا لیکن کیا اس کا یہ مطلب ہے کہ مہنگائی کا ہر زخم عوام ہی کو لگایا جائے، امرا و حکمرانوں کو خراش تک نہ آئے۔

یہ بات تو طے ہے کہ ہمارا حکمران طبقہ، جس میں اعلیٰ حکومتی عہدیداروں سے لیکر تمام اراکینِ اسمبلیوں اور سینیٹ ممبران شامل ہیں، معاشرے کے جس طبقے سے تعلق رکھتے ہیں، ان میں سے کوئی ایک بھی ایسا نہیں جس کا گزارا محض ان کی سرکاری تنخواہوں سے ہی ہوتا ہو بلکہ سچی بات یہ ہے کہ جو تنخواہیں وہ لیتے ہیں وہ ان کے بچوں کے جیب خرچ کے برابر بھی نہیں۔ یہ وہ طبقہ ہے جو منتخب ہونے سے قبل بھی نہایت خوشحال ہوتا ہے اور منتخب ہونے کے بعد تو اپنا حجم کئی گنا بڑھا لیتا ہے۔ عمران خان نے اپنے دور میں نہ صرف وزرا و ممبران کی تنخواہوں میں کئی کئی گنا اضافہ کیا بلکہ ان کی مراعات میں بھی وہ اضافہ دیکنے میں آیا جو گزشتہ ساری حکومتوں کے ادوار میں دیکھنے میں نہیں آیا تھا جبکہ یہ وہ طبقہ ہے جسے ان تنخواہوں کی کوئی ضرورت ہی نہیں تھی۔ شہباز شریف نے جس مجبوری کے طور پر پٹرول کی قیمتوں میں اضافہ کیا ہے.

اسی مجبوری کو حقیقی مجبوری تسلیم کرتے ہوئے تمام ایسے ارکان اسمبلی و ممبران سینیٹ، بشمول صدر، ورزرائے اعلیٰ، گورنرز اور مشیران کی کی تنخواہوں کے اجرا پر پابندی لگا دینے کے احکامات بھی جاری کرنے چاہئیں تھے تاکہ عام لوگوں کو یہ احساس ہوتا ہے کہ اس مشکل گھڑی میں صرف وہ ہی اپنے پیٹ پر پتھر نہیں باندھے ہوئے نہیں بلکہ ان کے نمائندے اور رہنما بھی دو دو پتھر باندھے ہوئے ہیں۔ یہ بات تصدیق شدہ ہے کہ جب تک وزیرِ اعظم سمیت سب کی مراعات ختم نہیں کی جائیں گی، جہازوں کے ملکی و غیر ملکی سفر منسوخ نہیں کئے جائیں گے، مفت بجلی، گیس اور پٹرول کے اجرا کا سلسلہ بند نہیں ہوگا، سرکاری رہائش گاہیں بند اور ساری سرکاری گاڑیاں ضبط کرنے جیسے اقدامات نہیں اٹھائے جائیں گے اس وقت تک ملک کسی طور بھی ترقی کی منزل کی جانب گامزن نہیں ہو سکتا۔

Comments

Click here to post a comment