ہوم << شفاعت :عشقِ رسول ﷺ کا خوبصورت شعری اظہار – محمد شفیق اعوان
600x314

شفاعت :عشقِ رسول ﷺ کا خوبصورت شعری اظہار – محمد شفیق اعوان

نعتیہ اَدَب اُردُو شاعری کی وہ مقدس اور محترم روایت ہے جس کی اساس حُبِ رسول ﷺ، عقیدت و احترام، قلبی وابستگی اور اتباعِ نبوی پر قائم ہے۔ یہ محض کسی عظیم شخصیت کی مدح و توصیف یا جذبات و احساسات کے اظہار کا نام نہیں، بلکہ ایک ایسی روحانی اور فکری وابستگی کا منظوم اظہار ہے جو انسان کے ایمان، کردار، اخلاق اور طرزِ زندگی کو متاثر کرتی ہے۔

نعت گوئی کی حقیقی معنویت اسی وقت سامنے آتی ہے جب شاعر کے الفاظ میں محبت کی حرارت، فکر میں سیرتِ نبویﷺ کی روشنی اور کردار میں اسوۂ رسول ﷺ کی جھلک موجود ہو۔اسی مقدس ادبی روایت میں محمد ضیغم مغیرہ کا اولین نعتیہ مجموعہ ’’شفاعت‘‘ ایک قابلِ توجہ اضافہ ہے۔ یہ مجموعہ شاعر کے عشقِ رسول ﷺ، قلبی وارفتگی، دینی شعور اور ادبی ذوق کا مظہر ہے۔ اس کتاب کا مطالعہ کرتے ہوئے محسوس ہوتا ہے کہ شاعر نے نعت کو محض شعری اظہار کا ذریعہ نہیں بنایا بلکہ اسے اپنی قلبی وابستگی، فکری ترجیحات اور دینی احساسات کے اظہار کا وسیلہ قرار دیا ہے۔ ان کے ہاں محبتِ رسول ﷺ کا جذبہ بھی ہے، مدینہ منورہ کی حاضری کی تڑپ بھی، سیرتِ طیبہ سے رہنمائی حاصل کرنے کی خواہش بھی اور عصرِ حاضر کے مسلمانوں کو اپنے اسلاف کی روشن تعلیمات کی طرف متوجہ کرنے کا احساس بھی۔

کتاب کا تعارف اور اشاعتی کوائف
’’شفاعت‘‘ محمد ضیغم مغیرہ کا نعتیہ کلام پر مشتمل مجموعہ ہے، جسے المجاہد پبلشرز، گوجرانوالہ نے شائع کیا ہے۔ کتاب کا پہلا ایڈیشن فروری 2024ء میں منظرِ عام پر آیا۔ یہ 144 صفحات پر مشتمل ہے۔ اعلیٰ معیار کے کاغذ، سادہ اور رنگین سرورق، خوب صورت پیش ورق اور مضبوط جلد بندی کے ساتھ کور نے کتاب کی ظاہری پیش کش کو بھی دل کش بنایا ہے۔کتاب کے ابتدائی تئیس صفحات میں نامِ کتاب، ناشر کا نام، ضابطۂ اشاعت، انتساب اور فہرستِ مضامین شامل ہیں۔ اس کا انتساب مولانا سید ابو الاعلیٰ مودودیؒ، نعیم صدیقیؒ، ماہر القادریؒ اور حفیظ تائبؒ کے نام کیا گیا ہے۔ یہ چاروں شخصیات دینی فکر، اسلامی ادب اور نعتیہ روایت کے حوالے سے اپنی الگ شناخت رکھتی ہیں۔

ان کے ناموں سے انتساب شاعر کی فکری و ادبی وابستگی اور ان شخصیات سے قلبی احترام کا اظہار ہے۔فہرست میں احمد جاوید، خورشید رضوی، اختر عثمان، معین نظامی، حافظ محمد ادریس، خلیل الرحمٰن چشتی، ناصر اقبال مجاہد اور خود محمد ضیغم مغیرہ کی تحریریں شامل ہیں۔ کتاب کے فلیپ پر خلیل الرحمٰن چشتی، حافظ محمد ادریس، احمد جاوید، خورشید رضوی، معین نظامی اور اختر عثمان کی آرا درج ہیں۔ ان اہلِ علم و ادب کی تحریروں اور تاثرات کی موجودگی کتاب کی اہمیت میں اضافہ کرتی ہے اور قاری کو اس کے مطالعے کے لیے ایک فکری پس منظر فراہم کرتی ہے۔

محبتِ رسول ﷺ: نعت کی اصل بنیاد
نعت گوئی کی اساس محبتِ رسول ﷺ ہے، لیکن یہ محبت محض جذباتی کیفیت یا رسمی عقیدت تک محدود نہیں رہتی۔ قرآنِ مجید نے محبتِ الٰہی کو اطاعتِ رسول ﷺ کے ساتھ وابستہ کرکے اس تعلق کی حقیقت واضح کردی ہے۔ اللّٰہ تعالیٰ ارشاد ہے:
ترجمہ: ”اے نبی صلّی اللّٰہ علیہ وسلّم! لوگوں سے کہہ دو کہ” اگر تم حقیقت میں اللّٰہ سے محبت رکھتے ہو تو میری( محمدؐ ) پیروی اختیار کرو، اللّٰہ تم سے محبت کرے گا اور تمہاری خطاؤں سے درگزر فرمائے گا ۔ وہ بڑا معاف کرنے والا اور رحیم ہے۔“ (سورۃ آل عمران آیت 31 )،
ترجمہ قرآن مجید مع مختصر حواشی از مولانا سید ابو الاعلیٰ مودودی، ادارہ ترجمان القرآن پرائیویٹ لمیٹڈ لاہور اشاعت مارچ 1998ء ، صفحہ 153

اس آیت سے معلوم ہوا کہ محبتِ رسول ﷺ کا پہلا تقاضا اتباعِ رسول ﷺ ہے۔ جو شخص سنتِ نبوی ﷺ پر عمل نہیں کرتا، اس کی محبّت محض دعویٰ رہ جاتی ہے۔رسول اور نبی پیروی اور اطاعت کے لیے ہوتے ہیں۔اصلی اور حقیقی اُمتی وہی ہے جو ایمان لانے کے بعد اللّہ کے رسول آنحضور محمد ﷺ کی کامل اطاعت کرے۔
اس آیت سے معلوم ہوتا ہے کہ محبت کا معتبر ثبوت اتباع ہے۔ رسول اللّہ ﷺ سے محبت کا تقاضا ہے کہ آپؐ کی تعلیمات کو سمجھا جائے، آپؐ کے اسوۂ حسنہ کو اپنایا جائے اور زندگی کے معاملات میں آپؐ کی سنت کو رہنما بنایا جائے۔محمد ضیغم مغیرہ کے ہاں بھی یہ احساس نمایاں ہے کہ عشقِ رسول ﷺ صرف دعوے کا نام نہیں، بلکہ اس کے لیے فکر و عمل کی اصلاح ضروری ہے۔ وہ اپنی ذات کے احتساب سے بھی گریز نہیں کرتے اور اپنے عشق کے دعوے اور عملی زندگی کے درمیان موجود فاصلے کو محسوس کرتے ہیں۔ چنانچہ کہتے ہیں:

؎ آپؐ کی سیرت و افکار سے ہوں دُور بہت
عشق کا دعویٰ ہے، کردار سے ہوں دُور بہت
؎ مَیں نے انداز کو، لہجے کو، نہ سیرت کو پڑھا
سیرتِ پاکؐ کے آثار سے ہوں دُور بہت
؎ زندگی مغربی تہذیب کے سانچے میں کٹی
آپؐ کی راہ کے معیار سے ہوں دُور بہت
(شفاعت، صفحہ 40)

یہ اشعار محض اظہارِ ندامت نہیں بلکہ ایک اجتماعی حقیقت کی طرف بھی اشارہ کرتے ہیں۔ ہمارا المیہ یہ ہے کہ ہم محبتِ رسول ﷺ کے دعوے تو کرتے ہیں، لیکن اپنی انفرادی اور اجتماعی زندگی میں سیرتِ طیبہ ﷺ کی پیروی سے غافل رہتے ہیں۔ شاعر نے اس تضاد کو اپنی ذات کے حوالے سے بیان کرکے دراصل ہر صاحبِ ایمان کو خود احتسابی کی دعوت دی ہے۔اسی مضمون کو ایک دوسرے مقام پر مزید واضح کرتے ہیں:

؎ حضورؐ آپ کی سیرت کو جب سے چھوڑا ہے
حضورؐ آج یہ انسان نہیں ہے حیواں ہے
؎ وہ جس نے رحمتِ عالمؐ کا راستہ چھوڑا
زمانے بھر میں کوئی اس سے بڑھ کے ناداں ہے!
(شفاعت، صفحہ 78)

یہاں شاعر کا لہجہ قدرے خطیبانہ اور اصلاحی ہے۔ وہ انسانی تہذیب اور اخلاقی عظمت کی بنیاد سیرتِ نبوی ﷺ کو قرار دیتے ہیں۔ ان کے نزدیک انسان کی حقیقی شرافت اور معاشرتی بھلائی کا راستہ اسی اسوۂ حسنہ ﷺ کی پیروی میں پوشیدہ ہے۔

جذبۂ عشق، عجز و نیاز اور مدینہ منورہ کی تڑپ
کتاب ’’شفاعت‘‘ کا ایک نمایاں وصف شاعر کی والہانہ محبت اور بارگاہِ رسالت مآب ﷺ میں عجز و نیاز کا اظہار ہے۔ ان کے ہاں مدینہ منورہ محض ایک مقدس شہر نہیں بلکہ عشق، عقیدت، روحانی سکون اور قلبی وابستگی کا مرکز ہے۔ شاعر کی آرزو ہے کہ اسے اس شہر کی حاضری نصیب ہو اور اس کی زندگی کا ہر راستہ اسی منزل کی طرف رواں رہے۔یہ تڑپ ان اشعار میں نہایت سادگی اور تاثیر کے ساتھ سامنے آتی ہے:

؎ دل تڑپتا ہے تڑپتا ہی چلا جاتا ہے
کاش اِک بار مدینے میں بلائیں آقاؐ
؎ اس خطا کار کی بھی نیند منور ہو جائے
کیا یہ ممکن ہے میرے خواب میں آئیں آقاؐ
(شفاعت، صفحات 26، 27)

یہاں شاعر نے اپنی محرومی، آرزو اور امید کو کسی پیچیدہ لفظی آرائش کے بغیر بیان کیا ہے۔ سادہ الفاظ میں موجود یہی سوز و گداز ان اشعار کی تاثیر کا سبب ہے۔
مدینہ منورہ سے وابستگی کو شاعر نے اپنی شناخت اور مقصدِ حیات کا حصہ بنا دیا ہے:

؎ شہرِ مدینہ میرا رستہ، شہرِ مدینہ منزل بھی
شہرِ مدینہ عشق ہے میرا اور مِری پہچان بھی ہے
(شفاعت، صفحہ 32)

یہ شعر شاعر کی قلبی وابستگی کی بھرپور ترجمانی کرتا ہے۔ مدینہ منورہ سے نسبت اس کے لیے محض ایک جذباتی کیفیت نہیں بلکہ زندگی کے سفر کی سمت متعین کرنے والا احساس ہے۔اسی آرزو کو ایک اور مقام پر یوں بیان کرتے ہیں:

؎ ان آنکھوں کو دیدار محمدؐ کی ضیا دے
اِک بار مجھے راہ مدینہ کی عطا دے

؎ لے جائے مجھے ساتھ جو پھر شہرِ نبیؐ کو
اے کاش! کوئی قافلے والا یہ صدا دے
(شفاعت، صفحہ 48)

یہ اشعار ایک عاشقِ رسول ﷺ کے دل کی وہ کیفیت بیان کرتے ہیں جس میں مدینہ منورہ کی حاضری سب سے بڑی آرزو بن جاتی ہے۔ شاعر کی زبان پر دُعا ہے، دل میں امید اور آنکھوں میں انتظار ہے۔

نعت میں عجز، توبہ اور شفاعت کی اُمید
کتاب کا عنوان ’’شفاعت‘‘ اپنے اندر ایک اہم دینی اور روحانی مفہوم رکھتا ہے۔ شفاعت کا تصوّر اسلامی عقیدے میں اللّٰہ تعالیٰ کی اجازت اور مشیت کے تابع ہے۔ قرآنِ مجید واضح کرتا ہے کہ کوئی بھی اللّٰہ کی اجازت کے بغیر شفاعت نہیں کرسکتا۔ ارشادِ باری تعالیٰ ہے:
ترجمہ: ’’کون ہے جو اُس کی جناب میں اُس کی اجازت کے بغیر سفارش کر سکے؟‘‘(سورۃ البقرہ، آیت 255) ،ایضاً صفحہ 123

اسی طرح اللّٰہ تعالیٰ ارشاد فرماتا ہے:
ترجمہ:” یہ ( لوگ) کہتے ہیں”رحمان اولاد رکھتے ہیں۔ سُبحان اللّہ“، وہ ( یعنی فرشتے) تو بندے ہیں جنہیں عزّت دی گٸی ہے۔ اُس (اللّہ) کے حضور بڑھ کر نہیں بولتے اور بس اُس کے حکم پر عمل کرتے ہیں۔ جو کچھ اُن کے سامنے ہے اسے بھی وہ جانتا ہے اور جو کچھ اُن سے اوجھل ہے اس سے بھی وہ باخبر ہے۔ وہ ( فرشتے) کسی کی سفارش نہیں کرتے بجز اُس کے جس کے حق میں سفارش سننے پر اللّہ راضی ہو، اور وہ اس کے خوف سے ڈرتے رہتے ہیں۔“ ( سورۃ الانبیاء، آیت 28 )
ایضاً صفحہ 827

اس عقیدے کی روشنی میں شاعر کی امید، دعا اور عجز کو سمجھنا چاہیے۔ وہ اپنی خطاؤں کا اعتراف کرتے ہوئے بارگاہِ الٰہی میں رسول اللّہ ﷺ کی شفاعت کی امید رکھتے ہیں۔ چنانچہ کہتے ہیں:

؎ اُمید کے اور خوف کے مَیں بیچ کھڑا ہوں
اے شافعِ محشر مجھے محشر میں شفا دے

؎ مَیں اپنی خطاؤں کے اندھیروں میں کھڑا ہوں
سینے کو میرے عشق محمدؐ کا دِیا دے
(شفاعت، صفحہ 49)

ان اشعار میں خوف و امید کی کیفیت نمایاں ہے۔ شاعر اپنی کم مائیگی اور خطاؤں کا احساس رکھتے ہوئے اللّہ تعالیٰ سے رحمت کا طلب گار ہے۔ اس کے دل میں عشقِ رسول ﷺ کی روشنی پیدا کرنے کی آرزو بھی ہے اور روزِ محشر شفاعت کی امید بھی۔ایک دوسرے شعر میں شاعر اپنی روحانی کیفیت کا اظہار کرتا ہے:

؎ مَیں ہوں ویراں، مَیں ہوں صحرا، مجھے دریا کر دے
پَست ہوں عشقِ نبیؐ سے مجھے اعلیٰ کر دے
(شفاعت، صفحہ 24)

یہاں شاعر نے اپنی باطنی ویرانی کو صحرا اور روحانی سرشاری کو دریا سے تشبیہ دی ہے۔ اس کے نزدیک عشقِ رسول ﷺ انسان کی شخصیت کو بلندی، وسعت اور معنوی زندگی عطا کرنے والا جذبہ ہے۔

سیرتِ طیبہ: شاعر کے فکر و فن کا مرکزی موضوع
’’شفاعت‘‘ کے مطالعے سے اندازہ ہوتا ہے کہ شاعر کی نعت گوئی کا دائرہ صرف مدح و ثنا، جذبات اور مدینہ منورہ کی حاضری کی آرزو تک محدود نہیں۔ اس میں سیرتِ نبوی ﷺ کے مختلف پہلوؤں کو بھی موضوع بنایا گیا ہے۔ محمدرسول اللّہ ﷺ کی عبادت، شب بیداری، تعلیم و تربیت، خدمتِ خلق، ایثار، صبر، عدل اور دعوتی جدوجہد کا ذکر شاعر کے فکری شعور کی نشان دہی کرتا ہے۔قرآنِ مجید میں اللّہ نے محمد رسول اللّٰہ ﷺ کی ذاتِ اقدس کو انسانیت کے لیے بہترین نمونہ قرار دیا ہے:اللّہ تعالٰی نے فرمایا:
ترجمہ: ”درحقیقت تم لوگوں کے لیے اللّٰہ کے رسول صلّی اللّٰہ علیہ وسلّم میں ایک بہترین نمونہ ہے، ہر اُس شخص کے لیے جو اللّٰہ اور یوم آخر کا اُمیدوار ہو اور کثرت سے اللّٰہ کو یاد کرے۔“( سورۃ الاحزاب آیت 21 )
ایضاً صفحہ 1063

شاعر نے اسی قرآنی تصوّر کو اپنے کلام میں سیرت کے مختلف واقعات کے ذریعے اجاگر کیا ہے:

؎ جس کی راتیں سجدے کرتے اور قیام میں بیت گئیں
شاہِ مدینہ کے اسلوب میں دعوت کا اظہار پڑھو

؎ میرا پیمبر۔ جس نے اپنا، سب لوگوں میں بانٹ دیا
عشقِ نبیؐ کے دعوے دارو! آؤ یہ کردار پڑھو
(شفاعت، صفحہ 30)

؎ مسجد نبوی کی تعمیر میں جس نے خود مزدوری کی
خندق کھودنے والے آقاؐ کی خوشبو مہکار پڑھو
(شفاعت، صفحہ 31)

ان اشعار میں شاعر نے عبادت، ایثار، محنت اور اجتماعی جدوجہد کو سیرتِ نبوی ﷺ کے نمایاں اوصاف کے طور پر پیش کیا ہے۔ بالخصوص ’’میرا پیمبر۔ جس نے اپنا، سب لوگوں میں بانٹ دیا‘‘ ایک ایسا مصرع ہے جو محمد رسول اللّہ ﷺ کی بے مثال سخاوت، رحمت اور خدمتِ انسانیت کی جامع تصویر پیش کرتا ہے۔شاعر نے سیرتِ طیبہ کو ایک زندہ اور دائمی رہنمائی کے سرچشمے کے طور پر بھی دیکھا ہے:

؎ ہر انسان کے دُکھوں کا مداوا، سیرتِ احمدِ مُرسلؐ ہے
ہر انسان پریشاں بھی ہے، رنجیدہ حیران بھی ہے

؎ سیرت کا ہر باب مغیرہؔ روشن روشن تارہ ہے
سیرتِ احمدِ مُرسلؐ دیکھو، اِک زندہ قرآن بھی ہے
(شفاعت، صفحات 33، 33)

ان اشعار کا بنیادی پیغام یہ ہے کہ رسول اللّٰہ ﷺ کی سیرت کسی ایک زمانے یا معاشرے کے لیے مخصوص نہیں، بلکہ ہر دَور کے انسان کے لیے رہنمائی فراہم کرتی ہے۔ شاعر نے اسے ’’زندہ قرآن‘‘ کہہ کر اس حقیقت کی طرف اشارہ کیا ہے کہ آپ ﷺ کی زندگی قرآنِ مجید کی عملی تفسیر ہے۔

اخلاقِ نبوی اور اصلاحِ معاشرہ
اللہ تعالیٰ نے خود بھی اپنے محبوب نبی ﷺ کے بلند اخلاق کی شہادت دی:
وَاِنَّكَ لَعَلٰى خُلُقٍ عَظِيْمٍ۔ (سورۃ القلم، آیت 4)
ترجمہ: ’’اور بے شک تم اخلاق کے بڑے مرتبے پر ہو۔‘‘ ایضاً صفحہ 1459
محبّت اگر صرف جذبات تک محدود رہے تو وہ ایک وقتی کیفیت بن جاتی ہے۔ جذبات کی لہریں اُٹھتی ہیں، آنکھیں اشک بار ہوتی ہیں، زبانیں درود سے معطر ہوتی ہیں، لیکن وقت گزرنے کے ساتھ وہ کیفیت بھی دھندلا جاتی ہے۔ اس کے برعکس جب محبّت علم کے ساتھ جڑ جائے تو وہ صرف ایک جذبہ نہیں رہتی بلکہ کِردار، تہذیب اور تمدن کی بنیاد بن جاتی ہے۔ یہی وہ محبت ہے جو انسان کے افکار، اعمال اور اخلاق کو سنوار دیتی ہے۔
محمد رسول اللّہ ﷺ کی پوری زندگی قرآنِ مجید کی عملی تفسیر ہے۔ حضرت عائشہؓ سے جب آپ ﷺ کے اخلاق کے بارے میں پوچھا گیا تو انہوں نے فرمایا:
”كَانَ خُلُقُهُ الْقُرْآنَ“، یعنی ”آپ ﷺ کا اخلاق قرآن تھا۔“ (صحیح مسلم)۔ اس ایک جملے میں سیرتِ نبوی ﷺ کی جامع ترین تعبیر موجود ہے۔ گویا قرآنِ کریم نظریہ ہے اور محمد رسول اللّہ ﷺ اس نظریے کا عملی نمونہ۔
ایک اور روایت ہے:
ترجمہ:”سعد بن ہشام بن عامر رضی اللّہ عنہ بیان کرتے ہیں کہ مَیں ام المومنین حضرت عاٸشہؓ کی خدمت میں حاضر ہوا اور ان سے پوچھا: اے ام المومنین! مجھے نبی ﷺ کے خُلق کے متعلق بتاٸیں، انہوں نے فرمایا :” آپ ﷺ کا خُلق قرآن تھا۔“کیا تم نے قرآن پاک میں یہ ارشادِ ربانی نہیں پڑھا، آپﷺ بلاشبہ خُلقِ عظیم پر ہیں۔“ (مُسند احمد بن حنبل)
تفہیم الاحادیث جلد دوم از مولانا سید ابو الاعلیٰ مودودی، مرتب عبدالوکیل علوی، ادارہ معارف اسلامی منصورہ لاہور، اشاعت اؤل ستمبر 1994ء، صفحہ 132
”ام المومنین حضرت عاٸشہ رضی اللّه عنہا نے محمد رسول اللّه ﷺ کے اخلاق کی بہترین تعریف فرماٸی ہے۔ اس کے معنی یہ ہیں کہ محمد رسول اللّه ﷺ نے دنیا کے سامنے محض قرآن مجید کی تعلیم ہی پیش نہیں کی تھی بلکہ خود اس کا مجسم نمونہ بن کر دکھا دیا تھا ۔جس چیز کا قرآن میں حکم دیا گیا آپﷺ نے خود سب سے بڑھ کر اس پر عمل کیا، جس چیز سے اس میں روکا گیا آپﷺ نے خود سب سے زیادہ اجتناب فرمایا ، جن اخلاقی صفات کو اس میں فضیلت قرار دیا گیا سب سے بڑھ کر آپﷺ کی ذات اُن سے متّصف تھی، اور جن صفات کو اُس میں ناپسندیدہ ٹھرایا گیا سب سے زیادہ آپﷺ اُن سے پاک تھے۔“(تفہیم القرآن جلد6، سورة القلم حاشیہ 4 )
ایضاً صفحہ 133، 134
اس ارشاد کا مفہوم یہ ہے کہ رسول اللہ ﷺ نے قرآنِ مجید کی تعلیمات کو صرف بیان نہیں فرمایا بلکہ اپنی پوری زندگی میں ان کا عملی نمونہ پیش کیا۔
محمد ضیغم مغیرہ نے بھی اپنے کلام میں اخلاقِ نبوی کو معاشرتی اصلاح کا بنیادی وسیلہ قرار دیا ہے:
؎ آج اَغراض کے زمانے میں
آگہی کا کمال آپؐ سے ہے
؎ حسنِ اخلاق کی قیامت تک
جو بھی ہے وہ مثال آپؐ سے ہے
؎ ان مفادات کے اندھیروں میں
روشنی کا خیال آپؐ سے ہے
(شفاعت، صفحات 76، 77)
ان اشعار میں شاعر نے عصرِ حاضر کی مفاد پرستی کے مقابلے میں رسول اللّہ ﷺ کے اخلاقِ حسنہ کو روشنی کا سرچشمہ قرار دیا ہے۔ آج جب معاشرے میں ذاتی مفادات، خود غرضی، عدم برداشت، بددیانتی اور حقوق تلفی جیسے مسائل عام ہیں، ایسے میں سیرتِ نبوی ﷺ کی اخلاقی تعلیمات کی طرف رجوع کرنا وقت کی اہم ضرورت ہے۔
شاعر کا یہ شعر بھی اسی فکر کا تسلسل ہے:
؎ حضورؐ آپ کے قدموں کی خاک پر سو بار
مِری حیات کا ہر ایک سانس قربان ہے
(شفاعت، صفحہ 78)
اس شعر میں اظہارِ محبت کے ساتھ شاعر نے اپنی زندگی کو حضور اکرم ﷺ کی نسبت سے وابستہ کرنے کا عزم ظاہر کیا ہے۔
( ختمِ نبوت، ناموسِ رسالت اور دینی وابستگی)
کتاب کے اہم موضوعات میں عشقِ رسول ﷺ کے ساتھ ختمِ نبوت اور ناموسِ رسالت کا احساس بھی شامل ہے۔ شاعر اس نسبت کو محض ایک جذباتی وابستگی نہیں بلکہ ایمان کی ذمہ داری سمجھتا ہے۔ وہ اپنے جذبات کو یوں بیان کرتا ہے:
؎ میرے مُرسل، میرے سرکار، میرے آقاؐ ہیں
آپؐ کی راہ پہ جاں اپنی فدا ہو جائے
؎ سر کٹے، خون بہے ختمِ نبوت پہ مِرا
عشقِ مُرسل میں مِرا فرض ادا ہو جائے
(شفاعت، صفحہ 28)
ان اشعار میں شاعر نے ختمِ نبوت کے عقیدے سے اپنی غیر متزلزل وابستگی کا اظہار کیا ہے۔ اس کے نزدیک عقیدۂ ختمِ نبوت کا تحفظ ایک دینی ذمہ داری ہے۔ یہ موضوع شاعر کے اس دینی شعور کو نمایاں کرتا ہے جس میں محبتِ رسول ﷺ، وفأ رسالت اور اسلامی عقائد کی پاس داری ایک دوسرے سے مربوط ہیں۔
اسی طرح شاعر کی خواہش ہے کہ معاشرے میں رسول اللّہ ﷺ کے قائم کردہ عدل و انصاف اور خیر و فلاح کے نظام کی روح دوبارہ زندہ ہو:
؎ پھر مدینے کی ریاست کا زمانہ لوٹے
میرے اس عہد کے لوگوں کا بھلا ہو جائے
(شفاعت، صفحہ 28)
یہ شعر ایک تاریخی عہد کی محض یاد نہیں دلاتا بلکہ اس عہد کی بنیادی اقدار، عدل، مساوات، دیانت، اخوت اور انسانی حقوق کے احترام کی تجدید کی خواہش بھی ظاہر کرتا ہے۔
( علم، تحقیق اور فکری بیداری)
محمد ضیغم مغیرہ کے کلام کا ایک قابلِ قدر پہلو علم و تحقیق کی اہمیت کا احساس ہے۔ شاعر اس حقیقت سے آگاہ ہے کہ اُمتِ مُسلمہ کا عروج علم، عمل، تحقیق اور فکری بیداری سے وابستہ ہے۔ وہ مسلمانوں کے موجودہ حالات پر افسوس کرتے ہوئے انہیں علمی میدان میں اپنی ذمہ داری یاد دلاتا ہے:
؎ ہم نے عِلم کا رستہ چھوڑا، ہم تحقیق سے غافل ہیں
عِلم کی مشعل روشن رکھنا، آقاؐ کا فرمان بھی ہے
(شفاعت، صفحہ 32)
یہ شعر موجودہ مسلم معاشرے کے ایک بنیادی فکری مسئلے کی طرف اشارہ کرتا ہے۔ ایک ایسا معاشرہ جس کی تہذیب کی بنیاد علم، تعلیم، تفکر اور تحقیق پر رکھی گئی تھی، جب خود علمی سرگرمیوں سے دُور ہوجائے تو اس کی فکری و تہذیبی ترقی متاثر ہونا لازمی ہے۔
شاعر کی یہ فکر بھی قابلِ توجہ ہے کہ سیرتِ نبوی ﷺ کا مطالعہ انسان کو شعور اور آگہی عطا کرتا ہے:
؎ مجھے عشقِ نبیؐ کی بارگہ سے
شعور اور آگاہی وافر ملی ہے
(شفاعت، صفحہ 63)
اس شعر میں محبت کو علم اور معرفت کے ساتھ مربوط کیا گیا ہے۔ یہی نعت کا وہ فکری پہلو ہے جو اسے محض جذباتی شاعری سے بلند کرکے اصلاحِ فکر و کردار کا ذریعہ بناتا ہے۔
(عشقِ رسول ﷺ کا خاندانی اور تہذیبی ورثہ)
شاعر نے بعض مقامات پر عشقِ رسول ﷺ کو اپنی خاندانی تربیت، خصوصاً والدہ کی دعاؤں اور ابتدائی تربیت سے وابستہ کیا ہے۔ یہ ایک خوب صورت اور قابلِ قدر پہلو ہے، کیونکہ محبتِ رسول ﷺ کا جذبہ نسل در نسل منتقل ہونے والی دینی و تہذیبی روایت کا حصہ بھی ہے۔
؎ یہ مغیرہؔ جی میرا عشقِ نبیؐ
میرے ماں باپ کی نشانی ہے
(شفاعت، صفحہ 35)
اسی مضمون کو ایک دوسرے شعر میں مزید دل نشیں انداز سے بیان کیا ہے:
؎ ماں نے مجھے دی لَوری فقط عشقِ نبیؐ کی
یہ حُبِ نبیؐ ماں کی دُعاؤں کی جزا ہے
(شفاعت، صفحہ 45)
یہاں ماں کی لوری، دعا اور محبت کے ذریعے ایک ایسی تربیتی روایت کی تصویر سامنے آتی ہے جس میں بچے کی ابتدائی ذہنی و روحانی تشکیل کے ساتھ عشقِ رسول ﷺ کو بھی جوڑ دیا جاتا ہے۔
( درود و سلام اور روحانی آسودگی)
نعتیہ شاعری میں درُود و سلام کی نسبت کو خاص اہمیت حاصل ہے۔ قرآنِ مجید میں اللّٰہ تعالیٰ نے اہلِ ایمان کو رسول اللّہ ﷺ پر درُود و سلام بھیجنے کا حکم دیا ہے:
ترجمہ:” اللّه اور اُس کے ملاٸکہ نبیﷺ پر درود بھیجتے ہیں، اے لوگو جو ایمان لاٸے ہو، تم بھی اُن (آپﷺ) پر درود و سلام بھیجو۔“ سورة الاحزاب آیت 56
ترجمہ قرآن مجید مع مختصر حواشی از مولانا سید ابو الاعلی مودودی، ادارہ ترجمان القرآن پرائیویٹ لمیٹڈ لاہور،اشاعت مارچ 1998ء، صفحہ 1077
” اللّه کی طرف سے اپنے نبیﷺ پر صلٰوة کا مطلب یہ ہے کہ وہ آپ ﷺ پر بے حد مہربان ہے، آپؐ کی تعریف فرماتا ہے، آپؐ کے کام میں برکت دیتا ہے، آپؐ کا نام بلند کرتا ہے ، اور آپؐ پر اپنی رحمتوں کی بارش فرماتا ہے۔ ملاٸکہ کی طرف سے آپؐ پر صلٰوة کا مطلب یہ ہے کہ وہ آپؐ سے غایت درجےکی محبت رکھتے ہیں اور آپؐ کے حق میں اللّه سے دُعا کرتے ہیں کہ وہ (اللّه) آپؐ کو زیادہ سے زیادہ بلند مرتبے عطا فرماٸے۔ اہلِ ایمان کی طرف سے آپؐ پر صلٰوة کا مطلب یہ ہے کہ وہ بھی آپؐ کے حق میں اللّه سے دعا کریں کہ وہ (اللّه) آپؐ پر اپنی رحمتیں نازل فرماٸے۔“ ایضاً صفحہ 1077
محمد رسول اللّہ ﷺ نے فرمایا:
ترجمہ: ”جو شخص مجھ پر ایک مرتبہ درُود بھیجتا ہے، اللّہ تعالٰی اس پر دس رحمتیں نازل فرماتا ہے۔“ (صحیح مسلم: 408)
محمد ضیغم مغیرہ کے کلام میں درُود و سلام کی اسی روحانی نسبت کا اظہار ملتا ہے:
؎ ثنائے احمدِ مُرسل مِرا وقار بنا
عطائے نعتِ نبیؐ سے مَیں تابدار بنا
؎ درود پاک کی نسبت سے معجزہ یہ ہوا
خزاں زدہ تھا مگر موسمِ بہار بنا
؎ مَیں اپنے فکر و عمل سے ہوا پریشاں جب
درُود پاک میرے چارسُو حصار بنا
(شفاعت، صفحہ 52)
ان اشعار میں درود و سلام کو روحانی آسودگی اور قلبی سکون کا ذریعہ قرار دیا گیا ہے۔ شاعر کی نظر میں درود پاک محض زبان سے ادا کیے جانے والے الفاظ نہیں بلکہ ایک ایسی مقدس نسبت ہے جو انسان کے باطن میں امید، سکون اور تازگی پیدا کرتی ہے۔
اسی کیفیت کا اظہار ان اشعار میں بھی موجود ہے:
؎ اشک پڑھتے رہے درُود و سلام
دل کی اِک ہی صدا حضورؐ! حضورؐ!
(شفاعت، صفحہ 37)
؎ زباں پہ آخری دَم تک درُود پاک رہے
حضورؐ والا! وہ حالات لے کے جاؤں گا
(شفاعت، صفحہ 60)
یہ اشعار شاعر کی دلی آرزو اور روحانی ترجیح کی عکاسی کرتے ہیں کہ زندگی کا آخری لمحہ بھی ذکرِ رسول ﷺ اور درُود و سلام کی نسبت سے منور ہو۔

نعتیہ شاعری میں فنی سادگی اور ادبی خصوصیات
’’شفاعت‘‘ کا ایک نمایاں وصف سادہ، رواں اور عام فہم زبان ہے۔ شاعر نے اپنے جذبات کو پیچیدہ استعارات، ثقیل الفاظ اور غیر ضروری لفظی آرائش میں الجھانے کے بجائے براہِ راست اور دل نشیں پیرائے میں پیش کرنے کی کوشش کی ہے۔ اس سادگی میں ایک خاص طرح کا خلوص اور بے ساختگی محسوس ہوتی ہے۔
ان کے بعض اشعار میں کلاسیکی غزل کا رچاؤ، بعض میں نظم کا خطیبانہ آہنگ اور بعض میں اصلاحی و دعوتی انداز نمایاں ہے۔ شاعر نے مختلف شعری ہیئتوں میں اپنے مضامین کو پیش کیا ہے۔ ان کے ہاں غزل کی لطافت بھی ملتی ہے اور نظم کی فکری وسعت بھی۔مثلاً:

؎ نام اُس کا مِرے نام کی توقیر بنا ہے
وہ نام محمدؐ ہے مِرے دِل کی ضیا ہے

؎ نام آئے غلامانِ محمدؐ میں مِرا بھی
اے مالک و مختار مِری اتنی دُعا ہے
(شفاعت، صفحہ 44)

یہ اشعار نسبتِ رسول ﷺ کو شاعر کے لیے باعثِ عزت و توقیر قرار دیتے ہیں۔ یہاں لفظی سادگی کے باوجود جذبے کی شدت اور مضمون کی معنویت نمایاں ہے۔
اسی طرح:

؎ ثنائے احمدِ مُرسل مِرا وقار بنا
عطائے نعتِ نبیؐ سے مَیں تابدار بنا
(شفاعت، صفحہ 52)

اس شعر میں شاعر نے اپنی ادبی شناخت اور ذاتی وقار کو نعت گوئی سے وابستہ کیا ہے۔ یہ اس کے لیے محض ایک شعری مشغلہ نہیں بلکہ سعادت اور روحانی نسبت کا معاملہ ہے۔آپ کے اشعار ایسے بھی ہیں جنہیں تحت اللفظ اور ترنم، دونوں انداز میں پیش کیا جاسکتا ہے۔ ان میں سادہ الفاظ، واضح مفہوم اور مناسب آہنگ کی وجہ سے سماعت پذیری کا وصف موجود ہے۔ تاہم فنی اعتبار سے بعض مقامات پر مزید محنت، لفظوں کے انتخاب میں مزید احتیاط اور شعری تراکیب کی تراش خراش کی گنجائش بھی محسوس ہوتی ہے۔ یہ کسی بھی ابتدائی نعتیہ مجموعے کے حوالے سے ایک فطری ادبی امکان ہے، جس پر آئندہ کام میں توجہ دی جاسکتی ہے۔

نعت گوئی میں عقیدے کی صحت اور احتیاط
نعت ایک نہایت حساس صنفِ ادب ہے۔ اس میں محبت و عقیدت کے اظہار کے ساتھ عقیدۂ توحید، مقامِ عبدیت اور مقامِ رسالت کے فرق کو ملحوظ رکھنا ضروری ہے۔ رسول اللّٰہ ﷺ اللّٰہ تعالیٰ کے آخری نبی، برگزیدہ بندے اور تمام جہانوں کے لیے رحمت ہیں۔ آپ ﷺ کی عظمت بیان کرتے ہوئے نہ غلو کی گنجائش ہے اور نہ آپ کے مقام و مرتبے میں کمی کی۔

رسول اللّٰہ ﷺ نے اپنی مدح میں غلو سے منع فرماتے ہوئے ارشاد فرمایا:
لَا تُطْرُونِي كَمَا أَطْرَتِ النَّصَارَى ابْنَ مَرْيَمَ، فَإِنَّمَا أَنَا عَبْدُهُ، فَقُولُوا عَبْدُ اللّٰهِ وَرَسُولُهُ۔
ترجمہ: ’’میری تعریف میں اس طرح حد سے نہ بڑھو جس طرح عیسائیوں نے ابنِ مریم کی تعریف میں حد سے تجاوز کیا۔ میں تو صرف اللّہ کا بندہ ہوں، لہٰذا مجھے اللّہ کا بندہ اور اس کا رسول کہو۔‘‘(صحیح البخاری، کتاب أحادیث الأنبیاء، حدیث 3445۔)

یہ حدیث نعت گوئی کے لیے ایک بنیادی اصول فراہم کرتی ہے کہ محبت و عقیدت کے باوجود اللّہ تعالیٰ کی الوہیت اور رسول اللّہ ﷺ کی عبدیت و رسالت کا فرق ہمیشہ قائم رہنا چاہیے۔’’شفاعت‘‘ کے مطالعے میں ایک قابلِ اطمینان بات یہ ہے کہ شاعر کے ہاں عقیدت کے اظہار کے ساتھ عقیدے کی حدود کا احساس بھی نمایاں ہے۔ اس کے کلام میں محبت کو توحید کے منافی کسی تصوّر میں تبدیل کرنے کے بجائے مقامِ رسالت اور مقامِ عبدیت کی پاس داری کا رجحان ملتا ہے۔ یہ وصف نعتیہ ادب میں خاص اہمیت رکھتا ہے۔

اہلِ علم و ادب کی آرا اور کتاب کی ادبی قدر و قیمت
’’شفاعت‘‘ کے ابتدائی صفحات میں شامل اہلِ علم و ادب کے تاثرات کتاب کے فکری اور ادبی تعارف میں اہم کردار ادا کرتے ہیں۔ایک صاحبِ علم نے محمد ضیغم مغیرہ کے جذبۂ عشق و عقیدت کے حوالے سے لکھا ہے:بلاشبہ حضور ﷺ کی مدحت سرائی کا جو انداز آپ نے اپنایا ہے، وہ آپ کے نبیِ مہربان سے والہانہ عشق، عقیدت، جذب و مستی کی اعلیٰ کیفیات کا غماز ہے۔ اللّہ کریم زورِ قلم اور زیادہ کرے۔ آمین۔‘‘
یہ رائے شاعر کے قلبی جذبے اور نعت گوئی کے خلوص کی نشان دہی کرتی ہے۔ایک دوسرے ادبی تاثر میں اس بات پر زور دیا گیا ہے کہ نعت گوئی میں جذبۂ محبت کے ساتھ شعور اور احتیاط بھی ضروری ہیں۔ جوش کی عنان ہوش کے ہاتھ میں رہنی چاہیے اور عقیدت کے وفور میں سیرت و تعلیمات کی حدود سے تجاوز نہیں ہونا چاہیے۔ اس رائے میں نعت گوئی کے ایک نہایت اہم فکری اصول کی طرف توجہ دلائی گئی ہے۔ایک اور صاحبِ قلم نے مغیرہ کے کلام کو سادہ گوئی کی عمدہ مثال قرار دیتے ہوئے لکھا ہے کہ ان کی نعتیں محض قافیہ پیمائی یا الفاظ و تراکیب کی آرائش نہیں بلکہ جذبۂ محبت اور تخلیقی وارفتگی کا اظہار ہیں۔ ان کے نزدیک شاعر کا کلام تحت اللفظ اور ترنم، دونوں انداز میں پیش کیے جانے کی صلاحیت رکھتا ہے۔

ایک دوسرے تاثراتی مضمون میں کتاب کے مختلف پہلوؤں کا احاطہ کرتے ہوئے لکھا گیا ہے کہ اس نعتیہ مجموعے میں کلاسیکی رچاؤ، فنی گرفت، ادبی چاشنی، احتیاط و ذمہ داری کا احساس، قرآنی فہم، سیرتِ پاک کے واقعات، تحریکیت اور عصرِ حاضر کا شعور یکجا ہیں۔ ان تمام خوبیوں سے بڑھ کر شاعر کے ہاں وارفتگی، سچائی اور خلوصِ محبت نمایاں ہیں۔یہ رائے کتاب کے مجموعی مزاج کو سمجھنے میں مدد دیتی ہے۔ نعتیہ شاعری میں فنی خوب صورتی یقیناً اہم ہے، لیکن اس کی اصل روح خلوصِ نیت، درست فکر اور محبتِ رسول ﷺ سے وابستگی میں پوشیدہ ہوتی ہے۔ایک اور صاحبِ قلم نے نعت کو محض شاعری کے بجائے روحانی مفاہیم کا حامل اظہار قرار دیا ہے اور شاعر کی محبت و عقیدت کو اس کے کلام کا نمایاں وصف بتایا ہے۔ ان کے نزدیک یہ محبت صرف اشعار میں نہیں بلکہ شاعر کے باطن میں موجزن ہونی چاہیے اور ہر سچے امتی کے کردار میں بھی نظر آنی چاہیے۔ان تمام آرا سے واضح ہوتا ہے کہ کتاب کے مطالعے میں اس کے فنی پہلوؤں کے ساتھ ساتھ روحانی، فکری اور اصلاحی جہات کو بھی اہمیت دی گئی ہے۔

محمد ضیغم مغیرہ کا ادبی سفر اور نعتیہ شناخت
محمد ضیغم مغیرہ ہمارے عہد کے ان قلم کاروں میں شمار ہوتے ہیں جنہوں نے زمانۂ طالب علمی ہی سے قلم و قرطاس سے تعلق قائم کیا۔ ان کی متعدد تصانیف ان کی ادبی و فکری وابستگی کا ثبوت ہیں۔ ’’شفاعت‘‘ ان کی اسی ادبی شناخت کا ایک اہم اور مختلف النوع پہلو ہے، کیونکہ نعت گوئی میں داخل ہونا محض کسی نئی شعری صنف کو اختیار کرنا نہیں بلکہ ایک ایسی مقدس روایت سے وابستگی ہے جس کے تقاضے عام شاعری سے کہیں زیادہ حساس اور ذمہ دارانہ ہیں۔یہ ان کا او۱ّلین نعتیہ مجموعہ ہے، اس لیے اسے ان کے نعتیہ سفر کی ابتدا اور ایک اہم تخلیقی پیش رفت کے طور پر دیکھا جانا چاہیے۔ اس مجموعے میں موجود جذبۂ محبت، سیرت سے وابستگی، مدینہ منورہ کی آرزو، درود و سلام سے قلبی تعلق اور اصلاحِ معاشرہ کا احساس ان کے فکری رجحانات کو واضح کرتا ہے۔

عصرِ حاضر میں نعتیہ ادب کی اہمیت
ہمارا عہد عمومی اعتبار سے فکری، اخلاقی اور تہذیبی زوال کا عہد سمجھا جاتا ہے، لیکن اس دَور کا ایک مثبت پہلو یہ بھی ہے کہ نعتیہ ادب کو غیر معمولی فروغ حاصل ہوا ہے۔ گزشتہ چند دہائیوں میں نعتیہ مجموعوں کی اشاعت، نعتیہ مشاعروں، ادبی نشستوں، رسائل کے خصوصی شماروں، ریڈیو، ٹیلی وژن اور ڈیجیٹل ذرائع ابلاغ کے ذریعے اس صنف کو وسعت حاصل ہوئی ہے۔تاہم نعتیہ ادب کی ترقی کا معیار صرف کتابوں کی تعداد یا محافل کی کثرت نہیں ہونا چاہیے۔ اصل اہمیت اس بات کی ہے کہ نعت میں محبتِ رسول ﷺ کے ساتھ سیرت کی معرفت، عقیدے کی صحت، زبان کی شائستگی، فنی پختگی اور اصلاحِ کردار کا پیغام کس حد تک موجود ہے۔محمد ضیغم مغیرہ نے ’’شفاعت‘‘ کے ذریعے اسی وسیع ادبی و روحانی روایت میں اپنی جگہ بنانے کی کوشش کی ہے۔ ان کے کلام میں جہاں ایک طرف مدینہ منورہ کی حاضری کی آرزو ہے، وہیں دوسری طرف امتِ مسلمہ کی علمی، اخلاقی اور عملی حالت پر تشویش بھی ہے۔ یہی امتزاج اس مجموعے کو محض جذباتی نعتیہ کلام سے آگے لے جاتا ہے۔

مجموعی تاثر اور حاصلِ مطالعہ
’’شفاعت‘‘ کے مطالعے سے یہ حقیقت سامنے آتی ہے کہ محمد ضیغم مغیرہ نے نعت گوئی کو اپنے قلبی احساسات اور دینی وابستگی کے اظہار کا ذریعہ بنایا ہے۔ ان کے ہاں عشقِ رسول ﷺ کی وارفتگی بھی ہے، مدینہ منورہ کی تڑپ بھی، درود و سلام کی نسبت بھی، سیرتِ طیبہ سے رہنمائی حاصل کرنے کی خواہش بھی اور مسلمانوں کو علمی و اخلاقی بیداری کی طرف متوجہ کرنے کا جذبہ بھی۔کتاب کے مختلف حصوں میں محبت، عجز، دعا، امید، توبہ، سیرت، اخلاق، علم، ختمِ نبوت اور اصلاحِ معاشرہ جیسے موضوعات سامنے آتے ہیں۔ یہ موضوعاتی تنوع اس بات کی علامت ہے کہ شاعر نعت کو محض ایک محدود جذباتی دائرے میں نہیں دیکھتا بلکہ اسے زندگی کے مختلف شعبوں سے مربوط کرنے کی کوشش کرتا ہے۔

فنی اعتبار سے کتاب کی سادگی، رواں زبان اور عام فہم اسلوب قابلِ توجہ ہیں۔ بعض اشعار میں جذبے کی شدت اور بعض میں فکر کی گہرائی نمایاں ہے۔ شاعر نے اپنے احساسات کو سادہ اور مانوس الفاظ میں بیان کرنے کی کوشش کی ہے، جس سے کلام کی ابلاغی قوت میں اضافہ ہوتا ہے۔ آئندہ مجموعوں میں فنی تراش خراش، مضمون کی ندرت، شعری اختصار اور لفظی انتخاب پر مزید توجہ ان کے نعتیہ سفر کو زیادہ پختگی عطا کرسکتی ہے۔اس کتاب کا سب سے اہم وصف یہ ہے کہ اس میں محبتِ رسول ﷺ کو سیرتِ نبوی سے وابستہ کرنے کا رجحان موجود ہے۔ شاعر بار بار اس حقیقت کی طرف متوجہ کرتا ہے کہ عشق کا دعویٰ کردار کی اصلاح اور اتباعِ رسول ﷺ کے بغیر مکمل نہیں ہوتا۔ یہی وہ احساس ہے جو نعتیہ شاعری کو محض ادبی سرگرمی کے بجائے ایک روحانی اور اخلاقی ذمہ داری بناتا ہے۔علامہ اقبال نے محبتِ رسول ﷺ اور وفائے رسالت کے اسی بنیادی تصوّر کو اپنے اس لازوال شعر میں بیان کیا ہے:

؎ کی محمدؐ سے وفا تُو نے تو ہم تیرے ہیں
یہ جہاں چیز ہے کیا، لوح و قلم تیرے ہیں
(کلیاتِ اقبال، اردو، علامہ محمد اقبال، غ ع، صفحہ 208، مطبوعہ حوالہ: فروری 1973ء)

اقبال کے اس شعر کا بنیادی پیغام یہی ہے کہ رسول اللّہ ﷺ سے سچی وفا انسان کو انفرادی و اجتماعی زندگی میں سربلندی، خودی اور مقصدیت عطا کرتی ہے۔ یہ وفا محض زبان کا اقرار نہیں بلکہ فکر، عمل، کردار اور اجتماعی زندگی میں اتباعِ نبوی کا نام ہے۔محمد ضیغم مغیرہ کا مجموعہ ’’شفاعت‘‘ بھی اسی جذبۂ وفا اور محبت کی ایک شعری پیش کش ہے۔ شاعر نے اپنے احساسات، آرزوؤں، دعاؤں اور دینی وابستگی کو اشعار میں سمو کر بارگاہِ رسالت مآب ﷺ میں نذرانۂ عقیدت پیش کیا ہے۔اللّٰہ تعالیٰ سے دعا ہے کہ وہ محمد ضیغم مغیرہ کی اس ادبی و روحانی کاوش کو شرفِ قبولیت عطا فرمائے، ان کے جذبۂ عشق و عقیدت کو مزید استحکام بخشے، ان کے قلم کو مزید پختگی اور وسعت عطا کرے اور انہیں سیرتِ طیبہ کے پیغام کو اپنے فکر و عمل میں اپنانے کی توفیق دے۔

’’شفاعت‘‘ کے حوالے سے شاعر کے لیے یہی دعا ہے کہ ان کی یہ پہلی نعتیہ کاوش آئندہ مزید معیاری اور فکر انگیز نعتیہ تخلیقات کا پیش خیمہ ثابت ہو اور ان کا قلم عشقِ رسول ﷺ، ادبِ رسالت اور پیغامِ سیرت کی خدمت میں مسلسل مصروف رہے۔محبت کا سب سے معتبر ثبوت محبوب کی پیروی ہے، اور رسول اللّٰہ ﷺ سے محبت کا سب سے خوب صورت اظہار آپ ﷺ کی تعلیمات کو اپنی زندگی کا حصہ بنانا ہے۔آمین یا رب العالمین۔

مصنف کے بارے میں

Avatar photo

محمد شفیق اعوان

محمد شفیق اعوان ،ناظم امن لاٸبریری ،محلہ منشیاں ،گاٶں و ڈاک خانہ شمس آباد ،تحصيل حضرو ،ضلع أٹک پوسٹ کوڈ 43490 موبائل نمبر 03085040024

تبصرہ لکھیے

Click here to post a comment