ہمارے ہاں علم دوستی اور کتاب سے محبت نا ہونے کے برابر ہے اور صورت حال اس قدر ابتر ہو چکی ہے کر اچھے قول کو یا تو حدیث کہا جاتا ہے یا حضرت علی کے نام سے منسوب کر دیا جاتا ہے . ایسے ہی ادبی حوالے سے ہر ایسا شعر جس میں پیار و محبت کی بات ہو وہ فیض یا جون ایلیا سے منسوب کر دیا جاتا ہے . حضرت اقبال کی شاعری میں چوں کہ امت مسلمہ کی زبو حالی اور ایک امید پرستی نظر آتی ہے لہذا ایسا شعر جس میں مسلمانوں کا درد ہو جس میں کوئی اسلامی تشخص کی بات ہو اس کو حضرت اقبال سے منسوب کر دیا جاتا ہے .
اقبال چوں کہ ہمارے قومی شاعر ہیں اس لیے ان کے یوم پیدائش اور یوم وفات پر ہر شخص کوشش کرتا ہے سوشل میڈیا پر ان کے اشعار سے ان کو خراج عقیدت پیش کیا جائے تو اقبال سے منسوب ایسے ایسے سطحی اشعار دیکھنے کو ملتے ہیں بندے کی عقل دنگ رہ جاتی . یہ چند ایسے مشہور اشعار کی ایک فہرست ہے جو غلط طور پر اقبال سے منسوب ہیں مگر ان کے شعراء کوئی اور ہیں :
خدا نے آج تک اس قوم کی حالت نہیں بدلی
نہ ہو جس کو خیال آپ اپنی حالت کے بدلنے کا
(مولانا ظفر علی خان)
نور خدا ہے کفر کی حرکت پہ خندہ زن
پھونکوں سے یہ چراغ بجھایا نہ جائے گا
( مولانا ظفر علی خاں)
فضائے بدر پیدا کر، فرشتے تیری نصرت کو
اتر سکتے ہیں گردوں سے قطار اندر قطار اب بھی
( مولانا ظفر علی خاں)
معجزہ شق القمر کا ہے مدینے سے عیاں
مہ نے شق ہوکر لیا ہے دین کو آغوش میں
(عزیز لکھنوی )
قتل حسین اصل میں مرگِ یزید ہے
اسلام زندہ ہوتا ہے ہر کربلا کے بعد
( محمد علی جوہر)
تندی باد مخالف سے نہ گھبرا اے عقاب
یہ تو چلتی ہے تجھے اونچا اڑانے کیلئے
( سید صادق حسین شاہ)
اسلام کے دامن میں اور اِس کے سِوا کیا ہے
اک ضرب یَدّ اللہی، اک سجدہِ شبیری
(وقار انبالوی)
اسلام کی فطرت میں قدرت نے لچک دی ہے
اتنا ہی یہ ابھرے گا جتنا کہ دبا دیں گے
(صفی لکھنوی)
تِری رحمتوں پہ ہے منحصر میرے ہر عمل کی قبولیت
نہ مجھے سلیقہِ التجا، نہ مجھے شعورِ نماز ہے
( نامعلوم)
اللہ سے کرے دور ، تو تعلیم بھی فتنہ
املاک بھی اولاد بھی جاگیر بھی فتنہ
ناحق کے لیے اٹھے تو شمشیر بھی فتنہ
شمشیر ہی کیا نعرہ تکبیر بھی فتنہ
(سرفراز بزمی)
کسے خبر تھی کہ لے کر چراغِ مصطفوی
جہاں میں آگ لگاتی پھرے گی بو لہبی
(جمیل مظہری)
تبصرہ لکھیے