ہوم << ماہ ِ جماد ی الثانی کے فضائل اور تاریخی حیثیت – مولانا قاری محمد سلمان عثمانی
600x314

ماہ ِ جماد ی الثانی کے فضائل اور تاریخی حیثیت – مولانا قاری محمد سلمان عثمانی

ماہِ جمادی الثانی ہجری اعتبار سے چھٹا مہینہ ہے۔ اس مہینے پر اسلامی سال کا نصف ہوتا ہے۔ اس کو جمادی الاخریٰ بھی کہا جاتا ہے۔ مفسر علامہ ابن کثیر رحمہ اللہ نے اپنی شہرہ آفاق تفسیر میں اس کی وجہ تسمیہ یہ ذکر کی ہے کہ یہ نام ”جمادی“ اور ”الثانی“ دو لفظوں کا مجموعہ ہے۔ جمادی، جمد سے بنا ہے، جس کے معنی ”ٹھنڈک“ کے آتے ہیں، اور الثانی کا معنی ہے ”دوسرا“۔ یوں اس کا مجموعی مطلب بنتا ہے ”دوسری ٹھنڈک“۔ جس زمانے میں اس مہینے کا نام تجویز کیا گیا، اس وقت عرب میں اس قدر سخت سردی پڑ رہی تھی کہ برتنوں میں پڑا ہوا پانی جم جاتا تھا اور یہ اس سردی کا دوسرا مہینہ تھا۔ اس موسمی کیفیت کے پیشِ نظر اس ماہ کا نام جمادی الثانی رکھا گیا۔

اس مہینے کا شریعتِ اسلام سے کوئی تعلق نہیں، جس کی وجہ سے اسے دوسرے مہینوں پر کوئی جزوی یا کلی فضیلت حاصل ہو، نہ اس میں کوئی مخصوص عبادت مشروع ہے اور کوئی خاص حکم اس سے متعلق ہے۔ بعض قدیم محققین نے اس مہینے کی پہلی، پندرہویں اور انتیسویں تاریخوں میں ایک مخصوص طریقے سے چار نوافل پڑھنے پر یہ فضیلت نقل کی ہے کہ ایسے شخص کو ہزار نیکیاں ملتی ہیں اور جنت میں اس کے لیے چار حوریں پیدا کی جاتی ہیں۔ ایسی روایات بے سند ہیں، جن پر عمل نہیں کیا جا سکتا۔ لہٰذا اس مہینے میں معمول کی عبادت کی جائے اور اس پر کسی خاص ثواب کا اعتقاد نہ رکھا جائے۔

اس ماہ میں بہت سے تاریخی واقعات پیش آئے، جس کی وجہ سے اس مہینے کو مسلمہ تاریخی حیثیت حاصل ہے اور یہ اہلِ سیر اور اہلِ تاریخ کی مباحث کا موضوع رہا ہے۔ لہٰذا سیرت و سوانح کی کتب کے معتبر حوالوں سے اس ماہ پیش آنے والے اہم غزوات اور معروف شخصیات کی وفیات کا مختصر ذکر قارئین کی خدمت میں پیش کیا جاتا ہے۔

اس ماہ میں ہونے والا اہم ترین معرکہ ”یرموک“ ہے، جو خلیفہ راشد حضرت عمر بن خطاب رضی اللہ عنہ کے عہدِ مبارک میں پیش آیا۔ یہ جنگ مسلمانوں کے لیے تاریخی حیثیت رکھتی ہے۔ اس جنگ کی کمان حضرت ابوعبیدہ رضی اللہ عنہ کے ہاتھ میں تھی۔ مسلمانوں کے مدِمقابل رومی فوج تھی۔ دریائے یرموک کے کنارے واقع ہونے والی اس جنگ میں مسلمانوں نے جرأت و بہادری کے انمٹ نقوش چھوڑے۔ رومی فوج مسلمانوں سے چار گنا زیادہ تھی اور ان کی طرف سے اس قدر سخت تیر اندازی ہوئی کہ تیروں میں سورج چھپ گیا، لیکن اس کے باوجود مسلمانوں نے اسے پسپا کر کے روم پر فتح کے جھنڈے گاڑ دیے اور اس دور کی سپر پاور طاقت کو ملیا میٹ کر کے رکھ دیا۔

15 ہجری، ماہِ جمادی الثانی میں بصرہ شہر کی بنیاد رکھی گئی۔ یہ علاقہ بھی حضرت عمر رضی اللہ عنہ کے عہدِ زریں میں مسلمان فوج کے زیرِ نگیں آیا تھا۔ اس شہر کی آبادی کا سہرا حضرت عتبہ بن غزوان کے سر ہے۔ حضرت عمر رضی اللہ عنہ نے ان کو یہ ذمہ داری سونپی کہ ایلہ نامی بندرگاہ کے قریب ایک شہر بسائیں۔ امیرالمومنین کی ہدایت پر عتبہ آٹھ سو آدمیوں کو لے کر روانہ ہوئے۔ یہ جگہ خالی میدان تھی، زمین کنکریلی تھی اور گرد و پیش کہیں پانی اور سبزے کا نام و نشان بھی نہیں تھا۔ حضرت عتبہ نے مناسب جگہوں پر مکانات بنوا کر محلے آباد کیے، عوامی ضروریات کے لیے سرکاری عمارتیں تعمیر کروائیں، یہاں کی نئی آبادی کی دینی ضروریات کے لیے باقاعدہ طور پر تعلیمی حلقے قائم کیے اور ماہر معلمین کا انتظام کیا۔ دیکھتے ہی دیکھتے یہ چھوٹا سا قصبہ بہت بڑے شہر کی صورت اختیار کر گیا اور اس کا شمار بڑے بڑے شہروں میں ہونے لگا۔ آج بھی اس شہر کو ایک تاریخی حیثیت حاصل ہے اور امت کے کبار مفسرین، محدثین، مؤرخین اور صوفیائے کرام نے اس کی مردم خیز مٹی سے جنم لیا ہے۔

ماہِ جمادی الثانی میں جن جلیل القدر صحابہ کرام رضی اللہ عنہم کی وفاتِ حسرت آیات کے المناک سانحات پیش آئے، ان میں ایک نام حضرت کعب بن مالک رضی اللہ عنہ کا ہے۔ ان کی کنیت ابوعبداللہ تھی اور قبیلہ بنو سلمہ کے چشم و چراغ تھے۔ بیعتِ عقبہ ثانیہ کے موقع پر مشرف بہ اسلام ہوئے۔ امام ابی حاتم رحمہ اللہ نے انہیں اصحابِ صفہ میں شمار کیا ہے۔ غزوۂ تبوک میں جو تین صحابہ کرام رضی اللہ عنہم پیچھے رہ گئے تھے اور اس کی وجہ سے سب مسلمانوں نے پچاس دن تک ان کا سوشل بائیکاٹ کیے رکھا اور بالآخر اللہ تعالیٰ نے ان کی معافی کا قرآنِ کریم میں اعلان فرمایا، ان میں ایک حضرت کعب بن مالک رضی اللہ عنہ بھی تھے۔

امام محمد بن سیرین رحمہ اللہ فرماتے ہیں کہ حضرت کعب بن مالک رضی اللہ عنہ کا شمار نبی کریم صلی اللہ علیہ وسلم کے خاص درباری شعراء میں ہوتا تھا۔ باختلافِ اقوال آپ رضی اللہ عنہ کی وفات چالیس، پچاس یا اکیاون ہجری میں ہوئی۔

رسولِ اکرم صلی اللہ علیہ وسلم کے چچازاد بھائی حضرت عبداللہ بن عباس رضی اللہ عنہ کا سانحۂ ارتحال بھی اسی ماہ میں پیش آیا۔ آپ رضی اللہ عنہ پوری جماعتِ صحابہ میں سب سے زیادہ قرآنی علوم کے ماہر تھے۔ اسی بنا پر آپ رضی اللہ عنہ کو ”رئیس المفسرین“، ”ترجمان القرآن“ اور ”حبر الامۃ“ کے لقب سے یاد کیا جاتا ہے۔ جب مسلمان شعبِ ابی طالب کی قید کاٹ رہے تھے، اس وقت آپ کی پیدائش ہوئی۔ خلفائے راشدین کے عہدِ مبارک میں کئی بار امیرِ حج مقرر کیے گئے۔ قرآنی علوم پر مہارت کے ساتھ ساتھ اعلیٰ درجے کے فقیہ بھی تھے۔ ان کے حلقۂ درس میں جلیل القدر صحابہ و تابعین شریک ہو کر کسبِ فیض کرتے تھے۔ حضرت عمر رضی اللہ عنہ کو جب بھی کوئی مسئلہ درپیش ہوتا تو انہی کی طرف رجوع فرماتے۔ عقلی کمال کا عالم یہ تھا کہ خلفائے راشدین کے ادوار میں انہیں مشیر کے عہدے پر فائز کیا گیا اور بہت سے اہم دینی امور میں ان کی رائے کے پیشِ نظر فیصلے کیے گئے۔ 68 ہجری میں بعمر ستر سال آپ رضی اللہ عنہ نے دنیا سے رحلت فرمائی اور محمد بن حنفیہ نے نمازِ جنازہ پڑھائی۔

ماہِ جمادی الثانی، 22 ہجری میں مشہور صحابی حضرت ابودرداء رضی اللہ عنہ کے انتقالِ پرملال کا واقعہ پیش آیا۔ آپ رضی اللہ عنہ ایک درویش مزاج اور انتہائی سادہ زندگی گزارنے والے تھے۔ کسی شخص کا بلند مکان دیکھتے تو برہم ہو جاتے اور اس کو تنبیہ کرتے ہوئے فرماتے کہ اتنی مختصر زندگی میں اتنی بڑی عمارتیں کیوں بناتے ہو۔ عبادت کا شوق اس قدر غالب تھا کہ اس عظیم مقصد کے لیے اپنی تجارتی سرگرمیاں موقوف کر دیں۔ مالی اعتبار سے بہت کمزور تھے، لیکن خوددار تھے اور کسی کے سامنے دستِ سوال دراز نہیں کرتے تھے۔

آپ رضی اللہ عنہ نے لوگوں کی تعلیم کے لیے مسجد میں مختلف حلقے قائم کر رکھے تھے۔ ہر دس افراد پر ایک حلقہ ہوتا تھا اور اس کا ایک نگران مقرر تھا، جو انہیں دین کے مسائل سکھاتا تھا۔ مجلس کے آخر میں سوالات کی عام نشست ہوتی اور جس کو جو مسئلہ پوچھنا ہوتا، پوچھ لیتا تھا۔ حضرت عثمانِ غنی رضی اللہ عنہ کے دورِ خلافت میں کلمہ طیبہ پڑھتے ہوئے جان، جانِ آفریں کے سپرد کر دی۔

مصنف کے بارے میں

Avatar photo

مولانا قاری محمد سلمان عثمانی

تبصرہ لکھیے

Click here to post a comment