یہ روداد اس مقدس نشان کی جستجو، رات بھر کی دشوار چڑھائی اور ایک اجنبی کی مہربانی سے جڑی یاد کا بیان ہے۔ کینڈی سے سری پاڈا تک کا یہ سفر قدرت کے حسن، جسمانی مشقت اور عقیدت کی کشش کو ایک لڑی میں پروتا ہے، اور بتاتا ہے کہ کبھی کبھی ایک دروازہ کھل جانے سے پوری روداد کا رنگ بدل جاتا ہے۔ ان راستوں پر چلنے والوں کے لیے یہ پہاڑ محض زمین کی ایک بلندی نہیں؛ اس سے دعائیں، منتیں، امیدیں اور مذہبی نسبتیں وابستہ ہیں۔ اس پہاڑ پر ہر چڑھنے والا اپنے ساتھ کوئی ان کہی داستان لاتا ہے اور واپسی پر اس پہاڑ سے وابستہ زندگی بھر تازہ رہنے والی بیش قیمت یادیں اپنے اندر سموئے نیچے اترتا ہے ۔ یہ آٹھ قسطوں پر مبنی ایسے ہی اس سفر کی یادداشت ہے جو میں نے سولہ گھنٹے کے اس انتہائی دشوار گزار پہاڑی راستے پر اس مقدس نشان تک پہنچنے کے لئے کیا ( 10 گھنٹے جانے میں اور چھ گھنٹے واپسی میں )اور یہ سفر ان یادوں کی کہانی ہے جو میں اس پہاڑ سے اپنے ساتھ واپس لایا ۔
آئیے میرے ساتھ ۔مل کر اس ناقابل فراموش اور مشکل ترین سفر پر چلتے ہیں جو آپ کو مدتوں یاد رہے گا ۔۔۔
قسط نمبر 3
جنت نظیر کینڈی اور دل کی بے قراری
شنیدن کے بود مانندِ دیدن، سنا ہوا کب دیکھے ہوئے کے برابر ہو سکتا ہے ۔ ہم صبح آٹھ بجے کولمبو سے نکلے تھے۔ پانچ گھنٹوں کی مسافت کے بعد، دوپہر ایک بجے کے لگ بھگ، گاڑی کینڈی کی پہاڑیوں میں داخل ہونے لگی۔ میں کھڑکی کے قریب بیٹھا اس شہر کو قریب آتا دیکھ رہا تھا جس کی ایک خوش رنگ اور خوبصورت تصویر بچپن سے میرے دل کے نہاں خانوں میں بسی تھی اب اس سے ملاقات ہونے والی تھی۔
نہلان نے گاڑی ایک چڑھائی پر موڑی۔ سڑک کے کنارے کھڑے درخت کچھ دیر تک نگاہ کا راستہ روکے رہے، پھر ایک موڑ آیا، سبز شاخوں کی اوٹ ہٹی اور سامنے پوری وادی کھل گئی۔ جیسے اچانک کوئی کھڑکی جنت میں کھل گئی ہو ۔ میں بے اختیار خاموش ہو گیا۔کینڈی سبز پہاڑیوں کی آغوش میں دور تک پھیلا ہوا تھا۔ قریب کی ڈھلوانوں پر درختوں کے گہرے سائے تھے، ان کے درمیان دھوپ میں چمکتی سرخ کھپریل کی چھتیں چھوٹے چھوٹے سرخ جزیرے معلوم ہوتی تھیں۔ کہیں کوئی سفید دیوار سبزے سے جھانکتی، کہیں مکانوں کی ایک قطار پہاڑ کے خم کے ساتھ مڑ کر نگاہ سے اوجھل ہو جاتی۔ ان آبادیوں کے عقب میں پہاڑیوں کی تہیں اٹھتی چلی گئی تھیں؛ قریب کی بلندیوں پر ایک ایک درخت پہچانا جاتا تھا، دور کی سبز چوٹیاں نیلاہٹ میں دھندلی پڑتی جاتی تھیں۔ جیسے سبز رنگ نیلے رنگ میں مدغم ہو رہا ہو
دوپہر کی روشنی وادی میں یکساں نہیں اتری تھی۔ کسی ڈھلوان پر دھوپ کھلی ہوئی تھی، کسی پر بادل کا ہلکا سا سایہ چل رہا تھا۔ یوں ایک ہی منظر میں سبزے کے کتنے رنگ جمع ہو گئے تھے۔ کہیں یہ سبزہ گہرا تھا تو کہیں سبز رنگ اور دھوپ کی کرنوں کے ملاپ سے اس میں روپہلی سبزی مائل چمک پیدا ہو گئی تھی میری نگاہ کہیں ٹھہرتی تو فوراً دوسرا گوشہ اپنی طرف بلا لیتا۔وادی کے پار، ایک بلند پہاڑی پر، بدھ کا عظیم دیو ہیکل بہت بڑا سفید مجسمہ کھڑا تھا۔ گھنے سبزے کے اوپر اس کی روشن قامت سفید رنگت آسمان کے سامنے یوں ابھری ہوئی تھی کہ نگاہ شہر کی کتنی ہی تفصیلوں میں بھٹک کر پھر اسی کی طرف لوٹ آتی۔ اس کا بایاں ہاتھ یوں پھیلا ہوا تھا جیسے پورے شہر کو نیچے پھیلی آبادی کو خاموش آشیرواد دے رہا ہو۔
سری لنکا بدھ کے مجسموں کی سرزمین ہے ۔ ہر شہر ہر گاؤں کا اپنا بدھا ہے ۔۔ اور یہاں جیسے بڑا بدھا بنانے کا ایک باقاعدہ مقابلہ نظر آتا ہے ۔۔
بدھ کا ہر نیا مجسمہ دیکھ کر مجھے گمان ہوتا تھا کہ یہ پچھلے والے سے بڑا ہے۔ لیکن اگلے شہر میں یہ گمان غلط ثابت ہو جاتا ۔۔ یہاں بھی یہی خیال آیا، مگر اس بار اس کی عظمت میں پہاڑی کی بلندی اور وادی کی وسعت بھی شامل ہو گئی تھی۔ اس سفید قامت کے نیچے گھر کتنے چھوٹے دکھائی دیتے تھے؛ اور ان گھروں میں جاری زندگی، اس فاصلے سے، کتنی خاموش۔
مجھے بچپن کے وہ کرکٹ میچ یاد آئے جن کے دوران کیمرہ کبھی میدان سے اٹھ کر کینڈی کی پہاڑیوں پر ٹھہر جاتا تھا۔ تب میں چند لمحوں کے اس منظر کو آنکھوں میں سمیٹنے کی کوشش کرتا، ابھی آنکھوں کی پیاس بجھتی نہیں تھی کہ کیمرہ بس ایک لمحے کی جھلک دکھا کر واپس لوٹ جاتا کھیل دوبارہ شروع ہو جاتا اور پہاڑ اسکرین سے غائب ہو جاتے۔ اور اسکور بورڈ نظر آنے لگتا ۔۔جیسے کوئی حسینہ ایک ثانیہ کے لئے اپنے حسن کی چھب دکھا کر چھپ جائے ۔۔
لیکن آج منظر سامنے کھلا تھا۔ میں جتنی دیر چاہتا اسے دیکھ سکتا تھا، مگر نگاہ پھر بھی جیسے اس کی وسعت کے سامنے کم پڑ رہی تھی۔ کوئی پابندی نہ ہونے کے باوجود آنکھوں کی پیاس تھی کہ بجھتی نہیں تھی ۔۔
گاڑی آہستہ آہستہ شہر میں اترنے لگی۔ فاصلے سکڑنے لگے اور وادی کی مجموعی تصویر چھوٹی چھوٹی تفصیلوں میں بٹنے لگی۔ کسی گھر کی بالکونی پر گملے رکھے تھے، کسی چھت پر دھوپ چمک رہی تھی، کہیں شاخیں دیوار پر اس قدر جھکی تھیں کہ مکان باغ کا حصّہ معلوم ہوتا تھا۔ سڑک پہاڑ کے بدن کے ساتھ مڑتی جاتی اور ہر موڑ گزشتہ منظر کو سمیٹ کر ایک نیا دریچہ کھول دیتا۔
پھر درختوں کے درمیان پانی چمکا۔
پہلے ایک مختصر سی نیلی جھلک دکھائی دی، جیسے سبز پردے میں کوئی روشن شگاف پڑ گیا ہو۔ اگلے موڑ پر وہ جھلک کشادہ ہوئی اور جھیل سامنے آ گئی۔
شہر کے قلب میں ٹھہرا ہوا پانی، کناروں پر جھکے درخت اور سطح پر لرزتے ہوئے پہاڑوں کے عکس۔ ہوا کا ایک نرم جھونکا گزرتا تو پانی پر باریک شکنیں ابھرتیں اور عکس کچھ دیر کے لیے ٹوٹ کر پھر جڑنے لگتے۔ جہاں دھوپ پڑتی وہاں چمک کی ننھی ننھی کرچیاں بکھری جاتیں ۔۔ درختوں کے سائے تلے پانی کا رنگ گہرا نیلا ہو جاتا۔ کہیں اس پر چھائے سبز پہاڑوں کی پرچھائیں اسے سبز بنا دیتی تھیں ۔
میں نے سر ذرا موڑ کر جھیل کو دیر تک دیکھنا چاہا۔ لیکن وہ پہلی جھلک جلد ہی نگاہ سے اوجھل ہو گئی ۔ گاڑی آگے بڑھ رہی تھی اور منظر ساتھ ساتھ بدل رہا تھا۔ دل چاہتا تھا نہلان کچھ اور آہستہ چلے، اس پہلی ملاقات کو طویل کر دے اتنی جلدی نہ کرے ۔۔
کینڈی ایک خوبصورت شہر کے طور پر ہی دل کے نہاں خانوں میں محفوظ تھا لیکن آج جب اپنی آنکھوں سے اسے دیکھا تو بے اختیار حافظ یاد آگیا وہ سچ کہتا تھا ۔
“شنیدن کے بود مانند دیدن “
کینڈی کے بارے میں سنی ہوئی باتیں، دیکھی ہوئی تصویریں اور برسوں پہلے دل میں جاگی خواہش، سب اس دوپہر کے منظر میں آ ملے تھے۔ ایک عجیب سی شناسائی بھی تھی اور پہلی بار دیکھنے کی حیرت بھی۔ جیسے کسی ایسے شخص سے ملاقات ہو جس کے بارے میں بہت کچھ سن رکھا ہو، مگر اس کی آواز اور چہرے کی روشنی کا اندازہ روبرو آ کر ہی ہوا ہو۔ہمارا ہوٹل جھیل کے اوپر ایک پہاڑی پر بنا تھا۔ وہاں پہنچے تو کھڑکی نے شہر کا ایک اور منظر ہمارے سامنے رکھ دیا۔ نیچے جھیل پیالے میں بھرے نیلگوں پانی کی طرح دکھائی دیتی تھی۔ اس کے گرد درخت، پھر چھتیں، پھر سبز ڈھلوانیں اور ان کے عقب میں پہاڑیوں کا خاموش سلسلہ۔ وادی کے پار سفید مجسمہ اب بھی اپنی جگہ نمایاں تھا۔کمرے میں سامان رکھتے ہی میں نے کمرے کی کھڑی کھول دی تازہ ہوا کا جھونکا چہرے سے ٹکرایا سارے بدن میں مستی ولطافت کی جیسے ایک لہر سی دوڑ گئی سفر کی ساری تھکاوٹ ۔۔ بدن کی ساری کثافت ذہن کی سستی جیسے ایک پل میں ہوا گئی ۔
سامنے نگاہوں کے سامنے جھیل کا خوبصورت منظر پھیلا تھا ۔ نیچے پانی پر روشنی آہستہ آہستہ رنگ بدل رہی تھی۔ بادل کا سایہ جھیل کے ایک کنارے سے دوسرے کی طرف سرکتا تو سطح پر رنگ کی ایک نئی تہہ کھل جاتی۔ کہیں ہوا درختوں کی شاخیں ہلاتی، کہیں دھوپ کسی چھت کو روشن کر کے آگے بڑھ جاتی۔ اتنی دور سے آوازیں مدھم پڑ گئی تھیں، مگر منظر میں زندگی کی موجودگی ہر طرف محسوس ہوتی تھی۔ دنیا جہان کی خوبصورتی جیسے میری نگاہوں میں سما گئی تھی ۔۔کمرے میں پہنچتے ہہی بیگم صاحبہ بستر پر ڈھیر ہوگئیں ۔۔ زینیہ اور بلال بھی اپنے کمروں میں مختصر وقت گزارنے کے بعد ہمارے کمرے میں آگئے تھے سامان کھلنے لگا، کمرے میں باتیں ہونے لگیں، زینیہ ماں کے بیگ میں اپنی کچھ چیزیں ڈھونڈ رہی تھی ۔۔ بلال انٹرنیٹ کا پاس ورڈ تلاش کررہا تھا
مگر میری توجہ بار بار باہر چلی جاتی۔ میں کھڑکی سے ہٹتا اور چند لمحوں بعد پھر وہیں آن کھڑا ہوتا، جیسے اندیشہ ہو کہ میری غیرموجودگی میں روشنی نے کوئی نیا منظر نہ بنا دیا ہو ۔۔
پانچ گھنٹے کی مسافت بدن میں موجود تھی، مگر اس منظر نے آرام کا خیال دل سے مٹا دیا تھا ۔۔ میں نے کھڑکی کے قریب کرسی کھینچ لی۔
کیری مہودا ۔۔ دودھ کا سمندر اور کینڈی سنہالی بادشاہوں کا آخری دارالحکومت
کینڈی جھیل، جسے مقامی زبان میں ’’کیری مُہُودا ‘‘ کہتے ہیں، کیری مہودا کا مطلب ہے دودھ کا سمندر ۔یہ دودھیا سمندر شہر کے قلب میں پانی کا ایک پُرسکون آئینہ معلوم ہوتی تھی۔ سارے شہر کی رونقیں اس کے دم قدم سے آباد ہیں اگر یہ کہا جائے کہ یہ جھیل ہی اس شہر کا قلب ہے تو غلط نہیں ہو گا ۔
گرد و پیش کی سبز پہاڑیاں اس میں جھک کر اپنا عکس دیکھتی تھیں۔ ہوا کا ہلکا سا جھونکا گزرتا تو سطحِ آب پر باریک لہریں دوڑ جاتیں اور ان میں درختوں کے عکس ٹوٹ کر پھر جڑنے لگتے۔ کنارے کے درختوں کا سایہ پانی پر پھیلا ہوا تھا؛ کہیں دھوپ کی کرن پڑتی تو یوں لگتا جیسے کسی نے جھیل پر چاندی کے چند ورق بکھیر دیے ہوں۔
جھیل کے اندر اور اطراف میں بنے شاہی محلات کے درمیان ہی ایک طرف بدھا کے دانت کا مندر بھی ہے ۔۔ اس کا سنہرا کلس ان محلات میں اس طرح چمکتا تھا جیسے بہت سی مہارانیوں کے بیچ اکلوتا راجا براجمان ہو ۔
کیری مُہُودا کے کنارے لگے بلند وبالا درختوں کے جھنڈ اس ان کے نیچے پھولوں کے تختوں کے بیچ بچھے تخت نما بینچ ایک جنت نظیر منظر پیش کرتے تھے ۔۔
اس شہر کا حال تو خوبصورت ہے ہی اس میں ماضی کی آہٹ بھی بڑی صاف سنائی دیتی ہے۔ بلکہ اس شہر کی ساری آب وتاب اسکی خوبصورتی اس کی شہرت ہے ہی اپنے شاندار ماضی کی وجہ سے . کینڈی سنہالی بادشاہوں کا آخری دارالحکومت تھا؛ ۱۸۱۵ء میں برطانوی اقتدار آنے پر یہاں کی شاہی حکمرانی کا باب بند ہوا۔ اور برٹش راج قائم ہوا ۔ پرانے محل اور مقدس دانت کا مندر اس گزرے عہد کی یاد اپنے اندر سنبھالے ہوئے ہیں۔ مندر میں بدھ سے منسوب دانت کا تبرک آج بھی عقیدت کا مرکز ہے؛ یہاں تاریخ کتابوں سے نکل کر ایک زندہ روایت کی صورت سامنے آتی ہے۔
کہتے ہیں جب گوتم بدھ کی آخری رسومات کے دوران کُشی نگر میں ان کی چتا کو آگ لگائی گئی تو کھیما نامی ایک بدھ بھکشو نے ان کی چتا سے سامنے کے تین دانت محفوظ کر لئے . ایک دانت گردش دوراں کی نذر ہو کر دنیا کی نظروں سے اوجھل ہو گیا ۔۔ ان میں سے ایک دانت پاکستان کے ٹیکسلا میوزیم میں موجود ہے اور تیسرا کینڈی جھیل کے کنارے بنے شانداد ٹمپل کی زینت بنا ہوا ہے ۔ دانت مندر میں لکھی تحریر کے مطابق کھیما نے وہ دانت کلنگ کے بادشاہ برہم دت کے حوالے کیا، جس نے اسے اپنے شہر دنت پورہ میں عقیدت کے ساتھ رکھ دیا ۔ بعد میں وقت گزرنے کے ساتھ ساتھ یہ دانت بدھ بادشاہوں کی حکمرانی کی علامت بن گیا اور جس کے پاس دانت ہوتا وہی حکمران بنتا . روایت کے مطابق چوتھی صدی عیسوی میں شہزادی ہیما مالا اور شہزادہ دنتا اسے کلنگ سے سری لنکا لائے۔
اس وقت جزیرے پر بادشاہ کیرتی سری میگھ ورن کی حکومت تھی۔ ابتدا میں اسے سری لنکا کے پہلے دارالحکومت انورادھاپورہ میں رکھا گیا؛ بعد کے زمانوں میں دارالحکومت بدلنے کے ساتھ اس تبرک کی محفوظ پناہ گاہ بھی بدلتی رہی۔ اور یوں جب کینڈی سری لنکا کے حکمرانوں کی آخری راج دھانی بنا تو یہ دانت بھی مستقل طور پر کینڈی منتقل ہو گیا ۔
کھانے کی میز سے کینڈی جھیل تک ،منظر کے اندر اترنے کا سفر
نان و صحبت بر سرِ خوان، قهوه و رؤیا کنارِ آب
’’دسترخوان پر کھانا اور ہم نشینی، پانی کے کنارے کافی اور خواب۔‘
جھیل کے کنارے بسا کینڈی سامنے تھا، اور اس دوپہر مجھے اسے جی بھر کر دیکھنے کی فرصت میسر آ گئی تھی۔
کمرے کی کھڑکی سے باہر نگاہ جاتی تو دیر تک لوٹنے کا نام نہ لیتی۔ پہاڑی ڈھلوانوں پر بکھرے مکان، درختوں میں چھپی چھتیں اور ان کے دامن میں ٹھہرا جھیل کا پانی—سامنے آشیرواد دیتا بدھا کا سفید مجسمہ ۔۔ اسکے چہرے پر چھایا سکوں جیسے وادی کے سارے مناظر پر بھی چھایا تھا ہر منظر ایسا پر سکون ایسا شانت جو آدمی کو بھی خاموش اور پرسکون کر دیتا تھا ۔
مگر کھڑکی کے اس پار پھیلی دنیا کو دیکھتے دیکھتے بھی دل نہ بھرا۔ آتش شوق اور بڑھ گیا جی چاہا کہ اس منظر کے اندر اتر جاؤں؛ ان راستوں پر چلوں جو یہاں سے محض لکیریں دکھائی دیتے تھے، اور اس پانی کے پاس جا بیٹھوں جس پر دوپہر کی روشنی دھیرے دھیرے رنگ بدل رہی تھی۔
میں کمرے سے باہر نکل آیا۔
کچھ دیر ادھر اُدھر نہلان کو تلاش کرتا رہا۔ وہ کہیں دکھائی نہ دیا تو اس کا نمبر ملا لیا۔ اس نے پہلی ہی گھنٹی پر فون اٹھا لیا۔ بتانے لگا کہ ہوٹل کے مرکزی دروازے کی دائیں جانب، کار پارک کے ساتھ ڈرائیوروں کی رہائش کے لیے ایک الگ حصہ بنا ہوا ہے اور وہ وہیں موجود ہے۔ اس فائیو اسٹار ہوٹل میں مہمانوں کے ساتھ آنے والے ڈرائیوروں کے قیام کا بھی انتظام تھا۔
میں اسی جانب چل پڑا۔ ابھی کچھ ہی دور گیا تھا کہ نہلان سامنے سے میری طرف آتا دکھائی دیا۔ مجھے دیکھ کر اس کے چہرے پر وہی مانوس مسکراہٹ پھیل گئی جو سفر کے آغاز سے ہمارے درمیان بے تکلفی کا ایک خاموش وسیلہ بنی ہوئی تھی۔
’’کھانا کھایا؟‘‘ میں نے قریب آنے پر پوچھا۔اس نے نفی میں سر ہلا دیا۔
تب یکایک مجھے اپنی بھوک بھی یاد آ گئی۔ علی الصبح ناشتہ کرکے کولمبو سے نکلے تھے۔ راستے میں بلال کے خریدے ہوئے امرود، سرخ کیلے اور انناس کھاتے رہے، مگر باقاعدہ کھانے کا خیال سفر کے منظروں اور باتوں میں کہیں پیچھے رہ گیا تھا۔
’’چلو، پھر پہلے کچھ کھا لیتے ہیں۔‘‘
میں اسے ساتھ لے کر ہوٹل کے ریستوران میں آ گیا۔ اندر قدم رکھتے ہی کھانوں کی اشتہا انگیز خوشبو نے بھوک کو پوری شدت سے جگا دیا۔ باہر کے منظروں نے اب تک جس طلب کو بھلائے رکھا تھا، وہ یہاں پہنچتے ہی اپنا حق مانگنے لگی۔
میز پر بیٹھ کر میں نے بیگم صاحبہ کو فون کیا اور بتایا کہ ہم ریستوران میں ہیں۔ انہوں نے کہا کہ وہ اور زینبیہ کچھ دیر بعد آئیں گی۔ البتہ چند ہی لمحوں بعد بلال ہم سے آن ملا، اور میز کے گرد پھر سفر کی مانوس صحبت جمع ہو گئی۔
کھانا آیا تو کچھ دیر کے لیے باتوں کی رفتار دھیمی پڑ گئی۔ صبح سے جاری سفر کے بعد اطمینان سے بیٹھ کر کھانے کی اپنی ہی آسودگی تھی۔ کھانے کے دوران نہلان اس ہوٹل کی تاریخ اور اس میں موجود سہولتوں کا ذکر کرتا رہا ۔۔اس نے بتایا کہ ڈرائیوروں اور گائڈ حضرات کے لئے مختص حصہ بھی بہت شاندار اور آرام دہ ہے جس میں کھانا پینا سب مفت ہے .شیشوں کے پار کینڈی کی سبز پہاڑیاں دکھائی دے رہی تھیں، مگر اب میری نگاہ بار بار ان کے نیچے چھپی جھیل کو ڈھونڈنے لگتی تھی۔
کھانے کے بعد بلال اپنے کمرے میں واپس چلا گیا۔ میں نے مسکرا کر نہلان کی طرف دیکھا. کھانے کے بعد بلال اپنے کمرے میں واپس چلا گیا۔ وہ تھکا ہوا لگ رہا تھا۔ میں نے مسکرا کر نہلان کی طرف دیکھا۔
’’آؤ کچھ دیر جھیل کنارے بیٹھتے ہیں۔‘‘وہ فوراً اٹھ کھڑا ہوا۔
میں نے کافی خریدی اور کپ ہاتھوں میں لیے ہم دونوں ہوٹل سے باہر نکل آئے۔ جھیل کی طرف جاتا پہاڑی راستہ بل کھاتا نیچے اتر رہا تھا۔ کھانے کے بعد قدموں میں ایک خوش گوار سستی تھی، اور کہیں پہنچنے کی جلدی بھی نہ تھی۔ ہم آہستہ آہستہ چلنے لگے۔
درختوں کی شاخوں کے بیچ جھیل کبھی دکھائی دیتی، کبھی سبز پتوں کے پیچھے چھپ جاتی۔ کسی موڑ پر پانی کا ایک روشن ٹکڑا نگاہ کے سامنے آ جاتا، تو اگلے موڑ پر تنوں اور شاخوں کی اوٹ میں گم ہو جاتا۔ یوں لگتا تھا جیسے راستہ جھیل تک لے جاتے ہوئے اس کے دیدار کو تھوڑا تھوڑا دکھا کر شاید میرے شوق دیدار کو مذید ہوا دے رہا تھا ۔ کافی کے کپ سے اٹھتی بھاپ چہرے کو چھوتی، اور درختوں کے سائے سے گزرتی ہوا اس کی خوشبو اپنے ساتھ لے جاتی۔ اور دوسرے ہی لمحے جھیل کی جانب سے آنے والا خوشگوار جھونکا چہرے سے ٹکرا کر جھیل کی طرف سے خوش آمدید کا پیغام لاتا ۔۔ نہلان میرے ساتھ چل رہا تھا۔ کبھی ہم کوئی مختصر سی بات کر لیتے، لیکن زیادہ تر خاموشی سے نیچے اترتے رہے ۔۔ بعض منظروں کے سامنے زبان خودبخود بند ہوجاتی ہے اور آنکھوں کا کام بڑھ جاتا ہے ۔۔ ایسے میں آدمی چاہتا ہے کہ دیکھنے کے اس لمحے میں کوئی خلل نہ آئے۔
ہر موڑ کے ساتھ پانی قریب آ رہا تھا۔ اب کنارے پر ایک قطار میں درخت الگ الگ پہچانے جانے لگے تھے، سورج کی روشنی کی لرزش پانی پر واضح دکھائی دیتی تھی، اور دور سے ایک تصویر معلوم ہونے والا منظر اپنی چھوٹی چھوٹی جزئیات کے ساتھ ہمارے سامنے کھل رہا تھا۔کینڈی ایک ایسی کتاب بن گیا تھا جسے میں اب تک کھڑکی سے، صرف اس کے سرورق کی حد تک دیکھتا رہا تھا۔ اب میں اس کے اندر اتر رہا تھا اور جھیل کی طرف جاتا ہر موڑ اس کا ایک نیا ورق کھول رہا تھا.
کینڈی جھیل کے کنارے حسین نظاروں کے درمیان دل کی بے قراری
جھیل کنارے پہنچ کر میں دور تک بچھی سبز ملائم اور مخملیں گھاس پر بیٹھ گیا۔ نہلان نے بھی میرے قریب جگہ بنا لی۔ لگتا تھا جیسے کنارے پر دور تک سبز قالین بچھا ہو ۔۔ سامنے پانی پر دھوپ کے ننھے ننھے ٹکڑے لرز رہے تھے۔ ہلکی ہوا سطح کو چھوتی تو پہاڑیوں کے عکس میں شکنیں پڑ جاتیں اور کنارے تک آتی لہریں پتھروں سے آہستہ آہستہ سرگوشی کرنے لگتیں۔
وادی کے پار اونچی پہاڑی پر کھڑے سفید بدھا کی بلندی اب اور زیادہ نمایاں تھی ۔ وہ اتنا نمایاں اتنا بڑا تھا کہ نیچے پھیلی ساری وادی پر حاوی نظر آتا تھا ۔ میں نے کچھ دیر اسے دیکھا، پھر نگاہ پانی پر جھکا دی۔ نیچے جھیل کے خاموش ساکن پانی میں بھی اس کا عکس وادی میں چلنے والی مست ہوا اور جھیل کے نیلگوں پانی سے کھیلنے میں مصروف تھا ۔ ہوا چلتی تو بدھا لہراتا جھومتا پھر اپنی جگہ ساکت ہو کر اگلے جھونکے کا انتظار کرنے لگتا ۔ دور کسی پرندے کی آواز ابھری۔ ہوا میں درختوں کی ٹھنڈک تھی اور سفر کے بعد میسر آنے والی اس فرصت میں ایک عجیب سی آسودگی۔ لیکن دل میں عجیب سی بے قراری
کیری مُہُودا کے کنارے لگے بلند وبالا درختوں کے جھنڈ اس ان کے نیچے پھولوں کے تختوں کے بیچ بچھے تخت نما بینچ ایک جنت نظیر منظر پیش کرتے تھے ۔ جھیل کا کنارہ شہر کی ہلکی سی سرگوشی کو بھی اپنی خاموشی میں سمو لیتا تھا۔آسمان پر گہرے سیاہ بادل چھائے تھے ۔ لگتا تھا کسی بھی لمحے چھینٹے پڑنے لگیں گے ۔ ہلکی ہلکی بہت خوشگوار ہوا چل رہی تھی ۔۔ کینڈی کا موسم کولمبو سے بہت مختلف تھا ۔۔ وہاں کی گرمی اور اور جان لیوا نمی کے مقابلے میں کینڈی کا موسم انتہائی شاندار تھا ۔ منظر ایسا تھا کہ جی چاہتا، وقت یہیں ٹھہر جائے، وقت کی رفتار دھیمی پڑ جائے، اس جھیل کو اس منظر کو فرصت سے دیکھوں اور اس کے حسن کو اپنے اندر اترنے دوں۔ یہیں کنارے پر بیٹھ کر دیر تک پانی کو دیکھتا رہوں، گزرتے لمحوں کا حساب چھوڑ دوں اور مستقبل کی فکر ہوا میں اڑا دوں اور بس اس منظر کو آہستہ آہستہ اپنی یاد کا حصہ بننے دوں۔ مگر دل میں اٹھتی بے قراری مجھے آگے بلا رہی تھی۔
میرے سامنے دنیا کا خوبصورت ترین نظارہ بچھا تھا بہترین موسم تھا مگر نگاہ جس سکون میں ڈوبنا چاہتی تھی، دل وہاں ٹھہرنے کو تیار نہ تھا۔ جھیل میرے سامنے تھی لیکن میرا دل اس چوٹی پر اٹکا تھا جس پر حضرت آدم کے پاؤں کا نقش ثبت تھا ۔۔ جسے مقامی زبان میں سری پادا کہتے ہیں ۔۔ سر پادا کی ان دیکھی بلندی میرے خیالوں میں میرے دل و دماغ میں چھا گئی تھی ۔۔ مجھے بتایا گیا تھا کہ کینڈی سے بھی ایک راستہ اس چوٹی کی طرف جاتا ہے ۔۔ اور وہاں جانے کی حضرت آدم کے قدم کا دیدار کرنے کی خواہش مسلسل میرے سکون میں ایک ہلچل پیدا کر رہی تھی۔ نگاہ کینڈی کے لہروں پر ابھرتے ڈوبتے منظروں پر ٹھہرتی اور خیال سری پادا کی بلندیوں کی طرف نکل جاتا۔
سدارتھ سے بدھا تک: ایک شہزادے کا روحانی سفر
سمن کوٹ — جہاں ایک قدم صدیوں کی راہ بن گیا
آسمان پر چھائے گہرے بادلوں کی وجہ سے جھیل کے پانی پر دوپہر کی روشنی نرم پڑنے لگی تھی۔ ہوا چلتی تو سطح پر بدھا کے سفید عکس کے گرد باریک شکنیں ابھرتیں اور پھر پھیلتی ہوئی کنارے کے کھڑے درختوں کے عکس میں کچھ دیر کے لیے بکھر جاتیں ۔۔
شہر کی چہل پہل کے درمیان اس جھیل کا ٹھہراؤ دل کو بہت بھلا لگتا تھا۔ میں دیر تک جھیل کے کنارے بیٹھا رہا ۔۔ میں نے دیر تک اسے دیکھا ، محسوس کیا .
نہلان بھی میرے پہلو میں سبز مخملیں گھاس کے نرم بستر پر ایک درخت سے ٹیک لگائے نیم دراز تھا جیسے اس پر بھی اس حسین منظر نے جادو کر دیا تھا . بڑی دیر ہم دونوں خاموش رہے ۔
جھیل سے اور موسم سے باتیں کرتے رہے ۔ لیکن میرے بے قرار دل سے آخر رہا نہ گیا ۔
میں نے چوٹی پر کھڑے بدھا کا ایک نظر دیکھا وہ اتنا بڑا تھا کہ اتنی دور سے بھی مجھے اس کے چہرے پر چھائے ٹھہراؤ اور ہونٹوں پر پھیلی نرم محبت بھری مسکراہٹ صاف نظر آتی تھی .
نیچے سڑکوں پر زندگی رواں تھی، لوگ اپنے اپنے کاموں میں مصروف تھے، گاڑیاں گزر رہی تھیں؛ مگر مجسمے کے چہرے پر ایسا سکون تھا جیسے شہر کی ساری بے قراری اس تک پہنچتے پہنچتے تھک گئی ہو۔
نہلان میرے پاس بیٹھا جھیل کو دیکھ رہا تھا۔ سارا راستہ اس کے ہاتھ اسٹیئرنگ پر اور نگاہ سڑک پر رہی تھی۔ اب اسے یوں فرصت سے بیٹھے دیکھ کر محسوس ہوا کہ سفر میں مقامات کے ساتھ آدمیوں سے ملاقات بھی آہستہ آہستہ ہوتی ہے۔
میں نے پہاڑی کی طرف اشارہ کیا۔
’’نہلان، جس بدھا سے تمہارے دیس کے لوگ اتنی عقیدت رکھتے ہیں، اس کی اپنی زندگی کا سفر کہاں سے شروع ہوا تھا؟‘‘اس نے مجسمے کی طرف نگاہ اٹھائی، پھر چند لمحوں بعد بولا:
’’صاحب، بدھ کا اصل نام سدھارتھ گوتم تھا۔ ان کی پیدائش لمبنی میں ہوئی، جو آج کل نیپال میں ہے۔ وہ شاکیہ قبیلے کے ایک حکمران گھرانے سے تعلق رکھتے تھے۔ ان کے بچپن اور جوانی کی جو کہانی ہم سنتے آئے ہیں، وہ تاریخ اور مذہبی عقیدت کی روائیتی مٹی میں اس طرح گندھی ہے کہ دونوں کو ایک دوسرے سے جدا کرنا ممکن نہیں۔”
نہلان خود مسیحی تھا اس کی بیوی بدھسٹ تھی اور چونکہ وہ سری لنکا میں پیدا ہوا تھا یہیں پلا بڑا تھا اس لئے اس سرزمین کی بدھ روایتیں بھی اس کی یادداشت کا حصہ تھیں۔۔ وہ انہیں ایک ایسے شخص کی مانوسیت سے بیان کر رہا تھا جس نے بچپن سے ان کہانیوں کو اپنے گرد زندہ دیکھا ہو۔
’’کہتے ہیں، ان کے والد چاہتے تھے کہ بیٹا بڑا ہو کر حکمران بنے،‘‘ اس نے بات آگے بڑھائی۔ ’’اس لیے اسے آسائشوں میں رکھا اور دکھ، بیماری اور موت کے مناظر سے بچانے کی کوشش کی۔ جوان ہوئے تو یشودھرا سے شادی ہوئی۔ ایک بیٹا پیدا ہوا، راہول۔ ۔۔ گھر تھا، خاندان تھا، محلات تھے ۔۔ حکمرانی تھی ہر طرح کا عیش و آرام میسر تھا بظاہر زندگی نے ان کے لیے سب دروازے کھول رکھے تھے۔‘‘
’’پھر وہ گھر سے کیوں نکلے؟‘‘ میں نے پوچھا۔
نہلان کچھ دیر پانی کی لہروں کے ساتھ کھیلتے بدھا کے عکس کی طرف دیکھتا رہا۔
’’روایت میں چار منظروں کا ذکر آتا ہے۔ ایک روز انہوں نے ایک بوڑھا آدمی دیکھا؛ جھکی ہوئی کمر، کمزور جسم، لرزتے قدم۔ پھر ایک بیمار کو دیکھا، اس کے بعد ایک میت کو۔ ان کے سامنے زندگی کی وہ حقیقتیں آ گئی تھیں جنہیں ان سے دور رکھنے کی کوشش کی گئی تھی۔‘‘
ہمارے سامنے پانی کی سطح پر ایک سوکھا پتّا تیرتا ہوا گزرا۔ ہوا اسے کبھی کنارے کی طرف لاتی، کبھی پھر کھلے پانی میں دھکیل دیتی۔
’’بڑھاپا، بیماری اور موت،‘‘ میں نے آہستہ سے دہرایا۔ ’’ان باتوں کو جاننا اور انہیں اپنے سامنے دیکھنا، شاید دو الگ تجربے ہیں۔‘‘
’’جی صاحب۔ کہتے ہیں، وہ سوچنے لگے کہ اگر انسان کا حسن، جوانی اور صحت، سب کچھ ایک دن چھن جانا ہے تو پھر ان سے وابستہ اطمینان کتنا ناپائیدار ہے۔ چوتھا منظر ایک تارکِ دنیا کا ایک سادھو کا تھا۔ جو بہت مطمئن تھا اپنی زندگی سے بہت خوش ۔ اسے دیکھا تو دل میں یہ خواہش پیدا ہوئی کہ وہ بھی نکلیں اور اس دکھ سے نجات کا کوئی راستہ تلاش کریں۔‘‘
میں نے پہاڑی پر سفید مجسمے کو دوبارہ دیکھا۔ اس کے چہرے کا سکون اب مجھے پہلے سے مختلف محسوس ہوا۔ نہلان کی کہانی نے اس خاموش شبیہ کے پیچھے ایک بے چین نوجوان کو لا کھڑا کیا تھا۔
’’انسان کے اندر کوئی سوال جاگ جائے تو آسائش بھی اسے سلا نہیں سکتی،‘‘ میں نے کہا۔نہلان نے اثبات میں سر ہلایا۔
’’روایت کے مطابق انتیس برس کی عمر میں انہوں نے اس رات گھر چھوڑ دیا۔ جس رات ان کا بیٹا راہول پیدا ہوا ۔۔ پھر کئی برس مختلف استادوں سے سیکھتے رہے، دیس دیس کی خاک چھانتے رہے مراقبہ کیا اور سخت ریاضتیں کیں۔ بھوک اور مشقت سے جسم نڈھال ہو گیا، لیکن جس جواب کی تلاش تھی، وہ ہاتھ نہ آیا۔‘‘
’’گھر بھی چھوڑ دیا اور سکون بھی نہ ملا۔‘‘
’’جی۔ پھر انہیں محسوس ہوا کہ جسم کو اس حد تک تکلیف دینا بھی راستہ نہیں۔ انہوں نے انتہائی ریاضت ترک کر دی اور آسائشوں میں ڈوب جانے اور خود کو اذیت دینے کے درمیان اعتدال کی راہ اپنائی۔ بدھ مت میں اسے درمیانی راہ کہتے ہیں۔‘‘
قریب کے کسی درخت سے ایک پرندہ اڑا۔ چند لمحے اس کے پروں کی آواز آئی، پھر اس کے چہچہانے کی سریلی آواز فضا میں گونجی پھر وہ جھیل کے اوپر پھیلی روشنی میں دور نکل گیا۔ یوں لگا جیسے وہ نہلان کی کہانی کا کوئی کردار ہو ۔
’’اور وہ بدھ کب کہلائے؟‘‘
’’بودھ گیا میں ایک پیپل کے درخت کے نیچے مراقبے کے بعد،‘‘ نہلان نے جواب دیا۔ ’’بدھ روایت کے مطابق وہیں انہیں بیداری حاصل ہوئی۔ نروان ملا ۔۔ بدھ کا مطلب بھی بیدار ہونے والا ہے۔ انہیں اپنے سوالوں کا جواب مل گیا ۔۔ دل کی بے قراری کو قرار آگیا ۔ پھر انہوں نے سارناتھ میں اپنی تعلیم کا آغاز کیا۔ انسان کا دکھ کیا ہے، وہ کیوں پیدا ہوتا ہے اور اس سے نجات کیسے مل سکتی ہے؛ یہی ان کی تعلیم کے بنیادی سوال تھے۔‘‘
نہلان خاموش ہو گیا۔
اب جھیل کنارے کی آوازیں پھر نمایاں ہونے لگی تھیں۔ پیچھے سے چند راہ گیر گفتگو کرتے ہوئے گزرے۔ کہیں کسی بچے کی ہنسی ابھری۔ پانی کنارے سے ٹکرا کر پلٹتا تو ایک مدھم سی سرسراہٹ سنائی دیتی۔ شہر اپنے معمول میں تھا، مگر میرے اندر نہلان کی سنائی ہوئی کہانی ابھی جاری تھی۔میں سوچ رہا تھا کہ ہم تاریخی اور مذہبی ہستیوں کو اکثر ان کی آخری پہچان کے ساتھ دیکھتے ہیں۔ ان کے ناموں کے گرد صدیوں کی عقیدت جمع ہوتی ہے؛ ان تک پہنچنے سے پہلے کی بے یقینی، تنہائی اور جستجو ہماری نگاہ سے اوجھل رہ جاتی ہے۔ سامنے پہاڑی پر بیٹھا سفید بدھ سب کو دکھائی دیتا تھا۔ اس سکون تک پہنچنے کے لیے بھٹکتا ہوا سدھارتھ تصور میں لانا پڑتا تھا۔
’’اس چہرے کو دیکھ کر اندازہ نہیں ہوتا کہ اس کے پیچھے اتنی بے قراری ہوگی،‘‘ میں نے کہا۔
نہلان نے بھی نگاہ اٹھائی۔
’’شاید اسی لیے لوگ اسے دیکھ کر سکون محسوس کرتے ہیں، صاحب۔‘‘
اس کا مختصر سا جواب سن کر میں کچھ دیر خاموش رہا۔ جھیل کے پانی میں اب شام کے رنگ گہرے ہونے لگے تھے۔ درختوں کے عکس لمبے اور مبہم ہو گئے تھے، مگر پہاڑی پر مجسمے کی سفیدی ابھی روشن تھی۔سری پادا کی بات یاد آئی۔ راستے بھر ہم اس چٹان پر بنے قدم نما نشان کی نسبتوں پر گفتگو کرتے آئے تھے۔ اب کینڈی کی اس جھیل کے کنارے بیٹھ کر میرے ذہن میں سدھارتھ کے اپنے قدموں کا خیال ابھر رہا تھا؛ وہ قدم جو کبھی ایک محفوظ اور مانوس زندگی سے باہر نکلے ہوں گے۔
’’نہلان، ہم بدھ سے منسوب قدم کا نشان دیکھنے کی بات کر رہے تھے،‘‘ میں نے کہا۔ ’’مگر ان کی کہانی سن کر سوچتا ہوں کہ گھر سے رخصت ہوتے وقت پہلا قدم اٹھانا کتنا مشکل رہا ہوگا۔‘‘اس نے آہستگی سے جواب دیا:
’’اپنوں کو پیچھے چھوڑنا آسان نہیں ہوتا، صاحب۔‘‘
میں نے اسے دیکھا۔ وہ پھر جھیل کی طرف متوجہ ہو گیا تھا۔ جھیل میں لہراتا بدھا اب ساکن ہو گیا تھا ۔میں نہیں جانتا تھا کہ اس لمحے نہلان کے ذہن میں کس کا خیال آیا، مگر اس کے لہجے میں کچھ ایساتھا جس نے مجھے مزید سوال کرنے سے روک دیا۔کچھ دیر ہم یونہی بیٹھے رہے۔ پہاڑی پر سفید مجسمہ، جھیل پر اترتی شام ۔پانی میں ٹھہرا اس کا عکس اور پانی کے اس پار روشن ہوتی چند کھڑکیاں؛ منظر میں دھیرے دھیرے رات شامل ہو رہی تھی۔ بدھا کا ذکر چھڑا تو سری پادا پھر یاد آگیا ۔
’’راستے میں آپ نے بتایا تھا کہ بدھ مت کے ماننے والے سری پادا کے نشان کو بدھ کا قدم سمجھتے ہیں۔ اس کی پوری کہانی کیا ہے؟‘‘اس نے جھیل سے نگاہ اٹھائی۔
’’اس کہانی کا رشتہ ان کی سری لنکا آمد کی روایت سے ہے، صاحب۔ لیکن اسے سمجھنے کے لیے ان کے تینوں دوروں کا ذکر کرنا پڑے گا۔‘‘
’’تین مرتبہ آئے تھے؟‘‘
’’سری لنکا کی بدھ مت روایت یہی بیان کرتی ہے۔ مہاونس کے پہلے باب میں ان کا احوال ملتا ہے۔‘‘
میں ذرا سنبھل کر بیٹھ گیا۔ سامنے پانی تھا، عقب میں شہر کی مدھم آوازیں، اور سامنے بدھا ۔ گفتگو میں ایک ایسا زمانہ کھلنے والا تھا جس تک پہنچنے کے لیے تصور کو بہت دور جانا پڑتا ۔
’’نروان حاصل کرنے کے بعد پہلی مرتبہ نویں مہینے میں مہِیَنگَنہ آئے،‘‘ اس نے کہا۔ ’’روایت میں وہاں یَکّھوں کے اجتماع، غیرمعمولی مظاہر اور پھر ان کی تعلیم کا ذکر ہے۔ اسی موقع پر پہاڑ سُمن کوٹ سے وابستہ مہاسُمن نے ان سے کوئی ایسی یادگار مانگی جس کی تعظیم کی جا سکے۔ بدھ نے اپنے سر کے کچھ بال دیے، جنہیں مہِیَنگَنہ میں محفوظ کیا گیا۔‘‘
’’یہ سُمن وہی ہیں جن کی نسبت پہاڑ کے نام میں آتی ہے؟‘‘
’’جی، اس مذہبی روایت میں وہ سری پادا کا محافظ دیوتا اور اس پہاڑ پر آباد بستی سمن آباد میں رہتا تھا ۔”
میں نے پانی پر جھکتے ایک درخت کو دیکھا۔ کسی بزرگ کی جدائی سے پہلے اس کی کوئی نشانی مانگ لینے کا احساس مجھے مانوس لگا۔ عقیدت اپنے تعلق کو ہر صورت میں محفوظ رکھنا چاہتی ہے؛ کوئی ایسی چیز جس کے سامنے کھڑے ہو کر غیرموجود ہستی کی یاد تازہ ہو سکے۔
’’دوسری آمد کی کہانی کیا ہے؟‘‘
’’روشن ضمیری کے پانچویں سال ناگ دیپ کی طرف آئے۔ مہودَر اور چُلودَر نام کے دو ناگ حکمران ایک ہیرے جواہرات سے بنے ایک تخت پر جھگڑ رہے تھے۔ مہاونس کی داستان میں بدھ کی آمد، تاریکی اور پھر روشنی کے معجزاتی بیان کے ساتھ ان کی صلح کرانے والی تعلیم آتی ہے۔ دونوں نے تخت ان کی نذر کر دیا۔‘‘
’’ایک تخت کے لیے جنگ،‘‘ میں نے آہستہ سے کہا۔نہلان مسکرایا۔
’’جی صاحب، کہانی بہت پرانی ہے۔‘‘
ہم دونوں کچھ لمحوں کے لیے خاموش ہو گئے۔ جھیل کے کنارے سے ایک خاندان گزرا۔ ایک چھوٹا بچہ بڑوں سے آگے نکل کر پانی کے قریب جانے لگا تو کسی نے پکار کر اسے روک لیا۔ اکیسویں صدی کی زندگی کی ان معمولی آوازوں کے درمیان اڑھائی سال پرانے بادشاہوں اور ان کے تخت کا قصہ عجیب محسوس ہوتا تھا۔
پھر میں نے پوچھا:
’’اور سری پادا؟‘‘
’’تیسری آمد اسی سے متعلق ہے۔ روایت کے مطابق روشن ضمیری کے آٹھویں سال، ویساک کے پورے چاند کے موقع پر، وہ پانچ سو بھکشوؤں کے ساتھ کیلنیا آئے۔ وہاں کے ناگ حکمران مَنی اَکّھِک نے دعوت دی تھی۔ ان کی ضیافت ہوئی اور انہوں نے تعلیم دی۔‘‘
میں نے تصور میں اس پرانی مجلس کو دیکھا، مگر خود کو اس کی جزئیات گھڑنے سے روکے رکھا۔ اتنا کافی تھا کہ روایت میں ایک میزبان تھا، دور سے آئے ہوئے مہمان تھے اور انہیں سننے والے لوگ۔ صدیوں بعد انہی مختصر لفظوں سے کتنے ذہنوں نے اپنے اپنے منظر بنائے ہوں گے۔
’’پھر وہ کیلنیا سے پہاڑ کی طرف گئے؟‘‘
’’مہاونس کا بیان مختصر ہے: کیلنیا میں تعلیم دینے کے بعدمہا سمن کی دعوت پر انہوں نے سُمن کوٹ کا دورہ کیا اور اسی ایک دن قیام کیا اور اسی دوران اپنے قدم کا نشان چھوڑا، پھر پہاڑ کے دامن میں بھکشوؤں کے ساتھ دن گزارا اور دیگھاواپی کی طرف روانہ ہوئے۔‘‘
’’بس اتنا ہی؟‘
’’مہاونس کی اصل عبارت اس مقام اور قیام کے بارے میں میں زیادہ تفصیل نہیں دیتی۔‘‘
میں نے پہاڑی پر کھڑے ہاتھ پھیلائے سفید مجسمے کی طرف دیکھا۔ دل چاہتا تھا پوچھوں کہ وہ کس سمت سے چڑھے، راستے میں کہاں ٹھہرے، چوٹی پر موسم کیسا تھا۔ مگر ہر سوال کا جواب کسی پرانی کتاب میں موجود نہیں ہوتا۔ بعض جگہ روایت چند لفظ رکھ دیتی ہے اور ان کے گرد ایک طویل خاموشی باقی رہ جاتی ہے۔
’’تو چوٹی تک ان کے پہنچنے کا ایسا احوال نہیں ملتا جیسا ابن بطوطہ یا جان ڈیوی اپنے سفر کا لکھتے ہیں؟‘‘
’’نہیں صاحب۔ یہ کسی مسافر کی لکھی ہوئی ڈائری یا روز نامچہ تو ہے نہیں۔ اس کا مقصد صرف مقدس مقام سے بدھ کا تعلق بیان کرنا ہے۔‘‘
میں نے سر ہلایا۔ اور اپنے تصورات کے گھوڑے کو لگام ڈالنے کی کوشش کرتا رہا۔ اگر اس مختصر بیان کے گرد اپنی طرف سے راستے، موسم اور مکالمے سجا دیتا تو قاری کے لیے یہ پہچاننا مشکل ہو جاتا کہ کتاب کہاں ختم ہوئی اور میرا تصور کہاں شروع ہوا۔پھر ہم خاموشی سے کچھ دیر جھیل کو دیکھتے رہے۔میرے ذہن میں اب اس پہاڑ کا ایک مبہم خاکہ تھا: درختوں سے بلند ہوتی ڈھلوانیں، بادلوں میں چھپتی چوٹی اور اس پر ایک نشان، جس تک پہنچنے کے لیے نسل در نسل لوگ اپنے گھروں سے نکلتے رہے ہوں گے۔ ان کے لیے وہ محض چٹان کی سطح پر بنا نقش نہیں تھا؛ اس کے ساتھ ایک ایسی موجودگی کا یقین وابستہ تھا جسے وہ اپنی زندگی سے بہت بڑا سمجھتے تھے.
’’اسے بائیں قدم کا نشان مانتے ہیں؟‘‘ میں نے پوچھا۔
’’جی، بدھ مت کی معروف نسبت یہی ہے۔‘‘
میں نے اپنے قدموں کی طرف دیکھا۔ سفر میں آدمی کے پاؤں پر گرد جمتی ہے، ایڑی دکھنے لگتی ہے، تھکن گھٹنوں تک چڑھ آتی ہے۔ پھر بھی ایک قدم کے نشان کی زیارت کی خواہش اسے ہزاروں قدم چلنے پر آمادہ کر دیتی ہے۔ مجھے اس تعلق کی گہرائی پہلی بار کچھ زیادہ محسوس ہوئی۔۔۔
مہاونس کیا ہے “
اپنے ذہن میں بار بار ابھرتا سوال میں نے آخر پوچھ ہی لیا
“مہاونس سری لنکا کی قدیم ترین تاریخی اور مذہبی کتاب ہے جو پالی زبان میں لکھی گئی تھی ۔
پالی میں اس کا مطلب ہے “ عظیم تاویل یا عظیم سلسلہ نصب “
اس میں سری لنکا کے بادشاہوں، بدھ مت کی سری لنکا آمد، خانقاہوں اور اہم مذہبی مقامات کی روایات بیان ہوئی ہیں ۔۔ اسے
ایک بدھ راہب “ مہانام “ نے لکھا تھا ۔ جس کا تعلق سری لنکا کے قدیم شہر انورادھاپورا کی مہاوِہار خانقاہ سے تھا ۔ “
اس نے تفصیل بتاتے ہوئے کہا
’’لیکن مہاونس خود کب لکھی گئی؟‘‘ نہلان نے میری طرف دیکھا۔
’’بدھ کے زمانے کے بہت بعد۔ اس کی ابتدائی تدوین تقریباً پانچویں صدی عیسوی سے متعلق سمجھی جاتی ہے۔‘‘
میں نے آہستہ سے کہا:
’’تب اس کہانی کو اسی حیثیت سے پڑھنا چاہیے جس میں وہ ہم تک پہنچی ہے: ایک قدیم مذہبی روایت، جس نے اس جزیرے کی یاد اور عقیدت کو صورت دی۔ بدھ کی یہاں آمد یا چٹان پر نشان چھوڑنے کو آزاد تاریخی شہادت سے ثابت شدہ واقعہ کہنا الگ دعویٰ ہوگا۔‘‘نہلان نے اثبات میں سر ہلایا۔
اس وضاحت کے بعد بھی کہانی کی کشش میرے لیے باقی تھی۔ اب مجھے اس کے لفظوں کے ساتھ ان انسانوں کا خیال بھی آ رہا تھا جنہوں نے اسے سنا، محفوظ کیا اور اپنی اولاد کو سنایا ہوگا۔ کسی بچے نے پہلی بار اپنے بزرگ سے پوچھا ہوگا کہ ہم اس پہاڑ پر کیوں جاتے ہیں، اور جواب میں یہی داستان کھل گئی ہوگی۔ پھر وہ بچہ بڑا ہوا ہوگا، کسی اور کا ہاتھ تھام کر انہی راستوں پر چلا ہوگا۔
جھیل کے کنارے ایک پتا پانی پر آ گرا۔ تھوڑی دیر وہ ایک ہی جگہ گھومتا رہا، پھر ہوا اسے آہستہ آہستہ دور لے گئی۔ میں اسے دیکھتا رہا۔
’’آپ جب اپنی بیوی کے ساتھ اوپر گئے تھے،‘‘ میں نے پوچھا، ’’تو اسے یہ پوری کہانی معلوم تھی؟‘‘
’’وہ بدھ مت کی ماننے والی ہے، صاحب۔ اس کے لیے وہ جگہ بچپن سے مقدس تھی۔‘‘
’’اور آپ کے لیے؟‘
اس کے چہرے پر وہی مسکراہٹ لوٹ گئی جو اپنی شادی کا ذکر کرتے ہوئے آئی تھی۔
’’ہم نے ساتھ جانے کا وعدہ کیا تھا۔ اوپر پہنچے تو بہت تھکے ہوئے تھے، مگر خوش تھے۔‘‘
میں مزید کچھ نہ پوچھ سکا۔ اس کی مختصر سی بات میں اس کے سفر کا حاصل موجود تھا۔ لیکن میرے دل میں لگا خواہش کا ننھا پودا اب ایک تناور درخت بنتا جا رہا تھا ۔ سر ی پادا جانے کا خیال اب کینڈی جھیل کی ساری خوبصورتیوں ساری دلکشیوں پر غالب آچکا تھا ۔
تبصرہ لکھیے