درسِ حدیث بعد نمازِ ظہر
ڈاکٹر قاری محمد ضیاء الرحمٰن صاحب
امام و خطیب فیصل مسجد اسلام آباد
بسم اللہ الرحمٰن الرحیم
معزز نمازی حضرات
اللہ رب العزت کا بے شمار شکر ہے کہ اس نے ہمیں ایک بار پھر محرم الحرام جیسے عظمت و حرمت والے مہینے تک پہنچایا۔ یہ مہینہ ہمیں ایثار، قربانی، صبر، استقامت اور اطاعتِ الٰہی کا درس دیتا ہے۔
موضوعِ درس:
محرم الحرام، عاشوراء اور نماز کی اہمیت
حدیثِ مبارکہ
سیدنا ابو ہریرہ رضی اللہ تعالیٰ عنہ سے روایت ہے کہ *رسول اللہ صلی اللہ علیہ وسلم* نے فرمایا:
عَنْ أَبِي هُرَيْرَةَ رَضِيَ اللهُ عَنْهُ قَالَ: قَالَ رَسُولُ اللهِ ﷺ:أَفْضَلُ الصِّيَامِ بَعْدَ رَمَضَانَ شَهْرُ اللَّهِ الْمُحَرَّمُ(صحیح مسلم)
ترجمہ:رمضان المبارک کے روزوں کے بعد سب سے افضل روزے اللہ کے مہینے محرم کے روزے ہیں۔
محرم الحرام کا مہینہ اسلامی سال کا آغاز ہے اور یہ مہینہ اللہ تعالیٰ نے اپنی طرف منسوب فرمایا ہے۔ یہ نسبت اس مہینے کی عظمت اور فضیلت کو مزید نمایاں کرتی ہے۔ رمضان المبارک کے بعد نفلی روزوں میں سب سے زیادہ اجر و ثواب اسی مہینے کے روزوں کا ہے۔خصوصی طور پر یومِ عاشوراء یعنی دس محرم کا دن بے شمار فضائل کا حامل ہے۔ نبی کریم صلی اللہ علیہ وسلم نے اس دن روزہ رکھنے کی ترغیب دی اور ساتھ ہی یہ تعلیم بھی دی کہ نو اور دس محرم یا دس اور گیارہ محرم کا روزہ رکھا جائے تاکہ امتِ مسلمہ کی ایک مستقل شناخت قائم رہے۔
عاشوراء کا پیغام
عاشوراء محض ایک تاریخی دن نہیں بلکہ حق و باطل کے درمیان واضح لکیر کا نام ہے۔ یہی وہ دن ہے جس کی نسبت ہمیں نواسۂ رسول، سیدنا امام حسین رضی اللہ تعالیٰ عنہ کی عظیم قربانی یاد دلاتی ہے۔امام حسین رضی اللہ عنہ نے ظلم اور جبر کے سامنے سر تسلیم خم کرنے کے بجائے حق کا عَلَم بلند رکھا۔ آپ نے اپنے اہلِ بیت اور ساتھیوں سمیت جانیں قربان کر دیں لیکن باطل کے سامنے جھکنے کو قبول نہ کیا۔
کربلا کا پیغام ہر دور کے مسلمان کے لیے یہ ہے کہ حق پر ثابت قدم رہنا کامیابی ہے. ظلم کے سامنے خاموشی اختیار کرنا مؤمن کی شان نہیں۔دین کی حفاظت قربانی مانگتی ہے۔ایمان کی قیمت جان سے بھی بڑھ کر ہے۔آج کے مسلمان کو چاہیے کہ وہ عاشوراء کے روزے کے ساتھ ساتھ اس کے پیغام کو بھی اپنی زندگی کا حصہ بنائے۔
9 اور 10 محرم کے روزوں کی خصوصی ترغیب
اس سال عاشوراء جمعہ المبارک کے مبارک دن آ رہا ہے۔ جمعہ خود ہفتے کے تمام دنوں کا سردار اور فضیلت والا دن ہے۔ جب عاشوراء کی عظمت اور جمعہ کی فضیلت ایک ساتھ جمع ہو جائیں تو مؤمن کے لیے اجر و ثواب کے دروازے مزید وسیع ہو جاتے ہیں۔فیصل مسجد کی جانب سے اندرونِ ملک اور بیرونِ ملک سے آنے والے تمام نمازی حضرات کے لیے یہ محبت بھرا پیغام ہے۔خود بھی 9 اور 10 محرم کے روزے رکھیں۔اپنے اہلِ خانہ کو ترغیب دیں۔دوستوں، عزیزوں اور ساتھیوں کو اس عظیم سنت کی یاد دہانی کروائیں۔اس موقع کو اللہ تعالیٰ کی قربت حاصل کرنے کا ذریعہ بنائیں۔ممکن ہے زندگی کا یہ عاشوراء ہمارے لیے مغفرت، درجات کی بلندی اور جنت کے حصول کا سبب بن جائے۔
نماز کی اہمیت اور جمعہ کی فجر
درس میں نماز کی عظمت پر بھی خصوصی گفتگو کی گئی۔
نماز مؤمن کی معراج، ایمان کی علامت اور اللہ تعالیٰ سے تعلق کا سب سے مضبوط ذریعہ ہے. خصوصی طور پر جمعہ کے دن فجر کی نماز کی اہمیت کو اجاگر کیا گیا۔ بہت سے لوگ جمعہ کی تیاری تو کرتے ہیں لیکن فجر کی نماز سے غفلت برتتے ہیں۔ حالانکہ اللہ تعالیٰ کے نزدیک دن کا آغاز اطاعت اور عبادت سے ہونا سب سے بڑی سعادت ہے۔جو شخص فجر کی نماز باجماعت ادا کرتا ہے وہ اللہ تعالیٰ کی حفاظت میں آ جاتا ہے۔ فجر کی نماز انسان کے دل کو نور بخشتی، رزق میں برکت پیدا کرتی اور پورے دن کو خیر و بھلائی سے بھر دیتی ہے۔اگر ہم اپنی زندگی میں حقیقی تبدیلی چاہتے ہیں تو فجر کی نماز کو اپنی ترجیحات میں سب سے اوپر رکھنا ہوگا۔ یہی وہ نماز ہے جو اخلاص، استقامت اور اللہ سے سچے تعلق کی پہچان ہے۔
دعا
درس کے اختتام پر اجتماعی دعا کا اہتمام کیا گیا۔ اللہ رب العزت سے دعا کی گئی کہ وہ ہمیں محرم الحرام کی برکتوں سے بھرپور استفادہ کرنے، عاشوراء کے روزے رکھنے، نمازوں کی پابندی کرنے اور نیکیوں میں ایک دوسرے سے آگے بڑھنے کی توفیق عطا فرمائے۔
فلسطین اور غزہ کے مظلوم مسلمانوں کے لیے خصوصی دعا کی گئی کہ اللہ تعالیٰ ان کی قربانیوں کو قبول فرمائے ان کی مشکلات آسان فرمائے۔ ان کی حفاظت فرمائے اور انہیں عزت و سربلندی عطا فرمائے۔امتِ مسلمہ کے اتحاد، امن اور استحکام کے لیے دعا کی گئی۔
خصوصی طور پر پاکستان کے لیے دعا کی گئی کہ اللہ رب العزت ہمارے وطن کو اندرونی و بیرونی تمام فتنوں، سازشوں اور شرور سے محفوظ فرمائے۔ امن، ترقی اور استحکام عطا فرمائے اور اس ملک کو اسلام کا مضبوط قلعہ بنائے۔ آمین یا رب العالمین
تبصرہ لکھیے